Mwezi wa Agosti

Agosti 1

AGANO LAWAFIKIA WATOTO

"Nami nitalifanya imara agano langu kati ya mimi na wewe, na uzao wako baada yako, kwa vizazi vyao, kuwa agano la milele; kwamba nitakuwa Mungu kwako na kwa uzao wako baada yako" Mwanzo 17:7

Ee Bwana, umefanya agano nami, mtumishi wako, katika Kristo Yesu Bwana wangu; na sasa, nakusihi, waache watoto wangu waingizwe katika maandalizi yake yenye neema. Niruhusu kuiamini ahadi hii kwamba imefanywa kwangu kama vile kwa Ibrahimu. Najua ya kuwa watoto wangu wamezaliwa katika dhambi, na kuumbwa katika uovu, kama vile watoto wa watu wengine; kwa hiyo sitaki kitu kwa msingi wa kuzaliwa kwao, kwa maana najua vema ya kwamba "kilichozaliwa kwa mwili ni mwili," wala si zaidi. Bwana, uwafanye wazaliwe chini ya agano lako la neema kwa Roho wako Mtakatifu!

Nawaombea wazao wangu katika vizazi vyote. Uwe Mungu wao kama ulivyo Mungu wangu. Heshima yangu iliyo kuu ni kwamba umeniruhusu kukutumikia; wazao wangu na wakutumikie katika miaka yote ijayo. Ee Mungu wa Ibrahimu, uwe Mungu wa Isaka wake! Ee Mungu wa Hana, umkubali Samweli wake!

Kama, Bwana, umenifadhili katika jamaa yangu, nakuomba uwakumbuke watu wengine wa nyumba za watu wako ambao bado hawajabarikiwa. Uwe Mungu wa jamaa zote za Israeli. Asiwepo hata mmoja wa wale wanaoliogopa jina lako ajaribiwe kwa nyumba isiyomcha Mungu na yenye uovu, kwa ajili ya Mwana wako Yesu Kristo. Amina.

Agosti 2

NENA YALE AKUFUNDISHAYO

"Basi sasa enenda, nami nitakuwa pamoja na kinywa chako, na kukufundisha utakayoyanena" Kutoka 4:12

Watumishi wengi wa kweli wa Bwana ni wazito wa kusema, na waitwapo kumtetea Bwana wao, huingiwa na wasiwasi mkuu wasije wakaiharibu kazi njema kwa utetezi wao mbaya. Katika hali kama hiyo ni vema kukumbuka ya kuwa Bwana ndiye aliyeuumba ulimi ulio mzito hivyo, nasi imetupasa kujihadhari tusije tukamlaumu Muumba wetu. Yamkini ulimi mzito si uovu mkuu kama ulimi wa haraka, na uchache wa maneno waweza kuwa baraka kuliko mafuriko ya maneno. Tena ni hakika kabisa ya kuwa nguvu ya kweli iokoayo haiko katika ufasaha wa kibinadamu, pamoja na mafumbo yake, na misemo yake ya kupendeza, na maonyesho yake makuu. Kupungukiwa na ufasaha si upungufu mkubwa kama uonekanavyo.

Mungu akiwa pamoja na kinywa chetu, na pamoja na akili zetu, tutakuwa na kitu kilicho bora kuliko shaba iliayo ya ufasaha, au upatu uvumao wa ushawishi. Mafundisho ya Mungu ni hekima; uwepo wake ni nguvu. Farao alikuwa na sababu zaidi ya kumwogopa Musa aliyekuwa na kigugumizi kuliko msemaji fasaha kuliko wote katika Misri; kwa maana aliyoyanena yalikuwa na nguvu ndani yake; alinena mapigo na mauti. Bwana akiwa pamoja nasi katika udhaifu wetu wa asili, tutavikwa nguvu zipitazo za kawaida. Kwa hiyo, na tunene kwa ajili ya Yesu kwa ujasiri, kama itupasavyo kunena.

Agosti 3

HAKI YA KUYAPATA MAMBO MATAKATIFU

"Lakini kuhani akimnunua mtu awaye yote kwa fedha yake, huyo atakula katika kitu hicho, na wale waliozaliwa nyumbani mwake; hao watakula chakula chake" Mambo ya Walawi 22:11

Wageni, na wapitaji, na watumishi wa kuajiriwa hawakuruhusiwa kula vitu vitakatifu. Ndivyo ilivyo katika mambo ya kiroho hata sasa. Lakini kulikuwa na aina mbili walioruhusiwa mezani patakatifu: wale walionunuliwa kwa fedha ya kuhani, na wale waliozaliwa nyumbani mwa kuhani. Kununuliwa na kuzaliwa, hizi ndizo dalili mbili zisizoweza kupingwa za haki ya kuyapata mambo matakatifu.

Kununuliwa. Kuhani wetu Mkuu amewanunua kwa thamani wote wamwaminio. Wao ni mali yake kamili -- ni wa Bwana kabisa. Si kwa sababu ya walivyo wenyewe, bali kwa ajili ya bwana wao ndipo wanakubaliwa katika mapendeleo yale yale ayafurahiayo Yeye mwenyewe, nao "watakula chakula chake." Yeye ana chakula cha kula ambacho watu wa dunia hawakijui. "Kwa kuwa ninyi ni wa Kristo," kwa hiyo mtashiriki pamoja na Bwana wenu.

Kuzaliwa. Hii ni njia iliyo hakika vilevile ya kuyapata mapendeleo; tukizaliwa nyumbani mwa Kuhani twapata nafasi yetu pamoja na wengine wa jamaa. Kuzaliwa mara ya pili kwatufanya kuwa warithi pamoja, na wa mwili mmoja; na kwa hiyo ile amani, na furaha, na utukufu, ambavyo Baba amempa Kristo, Kristo ametupa sisi. Ukombozi na kuzaliwa upya vimetupa madai maradufu ya kibali cha Mungu cha ahadi hii.

Agosti 4

YEYE HUBARIKI NA KULINDA

"BWANA akubariki, na kukulinda" Hesabu 6:24

Kifungu hiki cha kwanza cha baraka ya kuhani mkuu kwa hakika ni ahadi. Ile baraka ambayo Kuhani wetu Mkuu aitamkayo juu yetu ni lazima ije, kwa maana yeye hunena nia ya Mungu.

Furaha iliyoje kukaa chini ya baraka ya Mungu! Hii hutia ladha ya neema katika vitu vyote. Tukibarikiwa, basi mali zetu zote na anasa zetu zimebarikiwa; naam, hasara zetu na misalaba yetu, na hata masikitiko yetu yamebarikiwa. Baraka ya Mungu ina kina, ina msisitizo, ina matokeo. Baraka ya mwanadamu yaweza kuanza na kuishia katika maneno; bali baraka ya Bwana hutajirisha na kutakasa. Matakwa yaliyo bora tuwezayo kuwa nayo kwa rafiki yetu mpendwa si "Ufanikiwe," bali "Bwana akubariki."

Ni jambo la kupendeza vilevile kulindwa na Mungu; kulindwa naye, kuwekwa karibu naye, kulindwa ndani yake. Wamelindwa kweli wale ambao Mungu huwalinda; wamehifadhiwa na uovu, wamewekwa akiba kwa furaha isiyo na mipaka. Kulinda kwa Mungu huandamana na baraka yake, ili kuithibitisha na kuifanya idumu.

Mwandishi wa kitabu hiki kidogo hutamani ya kwamba baraka tajiri na ulinzi wa hakika ulitamkwao hapa uje juu ya kila msomaji ambaye huenda wakati huu anayaangalia maneno haya. Tafadhali uivute aya hii kwa Mungu kama maombi kwa ajili ya watumishi wake.

Agosti 5

SHERIA MOYONI

"Sheria ya Mungu wake imo moyoni mwake; hatua zake hazitateleza" Zaburi 37:31

Itie sheria moyoni, na mtu mzima yu sawa. Hapa ndipo sheria ipasapo kuwa; kwa maana hapo hukaa, kama zile mbao za mawe ndani ya sanduku, mahali palipoiwekewa. Kichwani huitatanisha, mgongoni humlemea, moyoni humtegemeza.

Neno teule lililoje litumikalo hapa, "sheria ya Mungu wake!" Tumjuapo Bwana kuwa Mungu wetu wenyewe sheria yake hutugeukia kuwa uhuru. Mungu akiwa nasi katika agano hutufanya kuwa na shauku ya kuyatii mapenzi yake na kuenenda katika amri zake. Je, agizo hili ni agizo la Baba yangu? Basi napendezwa nalo.

Hapa twahakikishiwa ya kwamba mtu mwenye moyo wa utii atategemezwa katika kila hatua aichukuayo. Atatenda lililo haki, na kwa hiyo atatenda lililo la hekima. Tendo takatifu siku zote ndilo lililo na busara zaidi, ijapokuwa wakati huo laweza lisionekane hivyo. Twasafiri katika njia kuu ya maongozi ya Mungu na neema yake tuishikapo njia ya sheria yake. Neno la Mungu halijapata kuipotosha nafsi hata moja bado; maelekezo yake ya wazi ya kuenenda kwa unyenyekevu, na kwa haki, na kwa upendo, na katika kumcha Bwana, ni maneno ya hekima ya kuifanikisha njia yetu kama yalivyo kanuni za utakatifu za kuyaweka mavazi yetu safi. Aendaye kwa haki huenda salama.

Agosti 6

NENDA; UITWAE MALI YAKO

"Tazama, BWANA, Mungu wako, ameiweka nchi mbele yako; kwea, ukaimiliki, kama BWANA, Mungu wa baba zako, alivyokuambia; usiogope wala usifadhaike" Kumbukumbu 1:21

Kuna urithi wa neema ambao imetupasa kuwa hodari vya kutosha kuutwaa uwe milki yetu wenyewe. Yote aliyoyapata mwamini mmoja yako huru kwa mwingine. Twaweza kuwa hodari katika imani, na wenye moto katika upendo, na wenye wingi katika kazi; hakuna kizuizi; na tukwee tukaimiliki. Uzoefu ulio mtamu kupita yote na neema iliyo angavu kupita yote ni kwa ajili yetu kama vile ilivyo kwa ndugu zetu wo wote; Yehova ameuweka mbele yetu; hakuna awezaye kuikana haki yetu; na tukwee tuimiliki kwa jina lake.

Ulimwengu nao umewekwa mbele yetu ili ushindwe kwa ajili ya Bwana Yesu. Hatuna budi kutoacha nchi yo yote wala pembe yake yo yote bila kuitiisha. Kile kitongoji duni kilicho karibu na nyumba yetu kimewekwa mbele yetu, si ili kuvitatiza vitendo vyetu, bali ili kuvinyenyekea. Hatuna budi ila kukusanya ujasiri wa kutosha kusonga mbele, nasi tutayashinda makao ya giza na mioyo migumu kwa ajili ya Yesu. Tusiwaache kamwe watu katika kijia au uchochoro wafe kwa sababu hatuna imani ya kutosha katika Yesu na injili yake ya kukwea na kuimiliki nchi. Hakuna mahali palipo na giza mno, wala mtu aliye mchafu mno hata kuwa nje ya nguvu za neema. Uoga, ondoka! Imani yaandamana kwenda kushinda.

Agosti 7

KANUNI ZA KUFANIKIWA

"Uwe hodari tu na moyo wa ushujaa mwingi, uangalie kutenda sawasawa na sheria yote, aliyokuamuru Musa mtumishi wangu; usiiache, kwa kuelekea mkono wa kuume wala wa kushoto, upate kufanikiwa kila uendako" Yoshua 1:7

Naam, Bwana atakuwa pamoja nasi katika vita vyetu vitakatifu, lakini hutaka kwetu tuzifuate kanuni zake kwa ukamilifu. Ushindi wetu utategemea sana utii wetu kwake kwa moyo wetu wote, tukitia nguvu na ujasiri katika matendo ya imani yetu. Tukiwa na moyo nusu hatuwezi kutumaini zaidi ya baraka nusu.

Imetupasa kumtii Bwana kwa uangalifu na kwa fikira. "Uangalie kutenda" ndio msemo utumikao, nao umejaa maana. Hili lahusu kila sehemu ya mapenzi ya Mungu; imetupasa kutii kwa utayari wa kila upande. Kanuni ya mwenendo wetu ni "sawasawa na sheria yote." Hatuwezi kuchagua na kuteua, bali imetupasa kuzipokea amri za Bwana kama zijavyo, moja na zote. Katika haya yote imetupasa kuendelea kwa usahihi na kwa kudumu. Mwendo wetu na uwe wa kunyoka, usiogeukia kuume wala kushoto. Hatuna budi tusikosee kwa kuwa wakali kuliko sheria, wala kugeukia kwa wepesi katika njia iliyo huru na rahisi zaidi. Kwa utii kama huo utakuja ufanisi wa kiroho. Ee Bwana, utusaidie tuone kama sivyo hasa! Hatutaijaribu ahadi yako bure.

Agosti 8

TUMAINI LISILOWEKWA VIBAYA

"Bwana MUNGU atanisaidia" Isaya 50:7

Haya, katika unabii, ni maneno ya Masihi katika siku ya utii wake hata mauti, alipowatolea mgongo wake wale wampigao, na mashavu yake wale wang'oao ndevu. Alikuwa na tumaini katika msaada wa Mungu, akamtumaini Yehova.

Ee nafsi yangu, huzuni zako ni kama vumbi dogo la mizani ukilinganisha na za Bwana wako! Je, huwezi kuamini ya kuwa Bwana Mungu atakusaidia? Bwana wako alikuwa katika hali ya pekee; kwa maana kama mwakilishi wa watu wenye dhambi -- badala yao na dhabihu yao -- ilikuwa lazima Baba amwache, na kumfanya aingie katika kuachwa kwa nafsi. Ulazima kama huo haukuwekwa juu yako: hufungwi kulia, "Mbona umeniacha?" Je, Mwokozi wako hata katika hali kama hiyo bado alimtegemea Mungu, nawe huwezi? Alikufa kwa ajili yako, na hivyo akalifanya lisiwezekane kwamba uachwe peke yako; kwa hiyo, uchangamke.

Katika kazi au majaribu ya siku hii sema, "Bwana Mungu atanisaidia." Toka nje kwa ujasiri. Ukaze uso wako kama gumegume, ukusudie ya kuwa hakuna kuzimia wala aibu itakayokukaribia. Mungu akisaidia, ni nani awezaye kuzuia? Ukiwa na hakika ya msaada wa Mwenyezi, ni jambo gani liwezalo kuwa zito mno kwako? Ianze siku kwa furaha, wala usiache kivuli cho chote cha shaka kije kati yako na mwanga wa jua wa milele.

Agosti 9

KUPOGOA ILI KUZAA MATUNDA

"Kila tawi ndani yangu lisilozaa huliondoa; na kila tawi lizaalo hulisafisha, ili lizidi kuzaa" Yohana 15:2

Hii ni ahadi ya thamani kwake yeye aishiye kwa ajili ya kuzaa matunda. Mwanzoni yaonekana kuwa na sura kali. Je, tawi lizaalo halina budi kupogolewa? Je, kisu hakina budi kukata hata lililo bora na lenye faida zaidi? Bila shaka ndivyo, kwa maana kazi kubwa ya Bwana wetu ya kusafisha hufanywa kwa njia ya mateso ya namna moja au nyingine. Si wabaya bali wema ndio walio na ahadi ya dhiki katika maisha haya. Lakini, basi, mwisho wake huzidi kufidia hali ya uchungu ya njia yake. Kama twaweza kuzaa matunda zaidi kwa ajili ya Bwana wetu, hatutajali kupogolewa na kupoteza majani.

Lakini, kusafishwa nyakati nyingine hufanywa kwa Neno pasipo jaribu, na hili huondoa lo lote lililoonekana kuwa gumu katika ladha ya ahadi. Kwa Neno tutafanywa kuwa wenye neema zaidi na wenye faida zaidi. Bwana, aliyetufanya, kwa kadiri fulani, kuwa wazaao matunda, atatenda ndani yetu hata tufikie kiwango cha juu zaidi sana cha uzazi. Je, hii si furaha kuu? Kweli kuna faraja zaidi katika ahadi ya kuzaa matunda kuliko kama tungehakikishiwa utajiri, au afya, au heshima.

Bwana Yesu, litimize upesi neno lako lenye neema kwangu, ukanifanye niwe na wingi wa matunda kwa sifa yako!

Agosti 10

HUSHUSHA ILI KUINUA

"BWANA hufukarisha, naye hutajirisha; huangusha chini, naye huinua" 1 Samweli 2:7

Mabadiliko yangu yote hutoka kwake yeye asiyebadilika kamwe. Kama ningekuwa tajiri, ningeuona mkono wake ndani yake, nami ningemsifu; nami niuone vivyo hivyo mkono wake nikifanywa maskini, nami nimsifu kwa moyo wote. Tushukapo katika dunia, ni la Bwana, na hivyo twaweza kulipokea kwa saburi: tupandapo katika dunia, ni la Bwana, na twaweza kulikubali kwa shukrani. Vyo vyote iwavyo, Bwana ndiye aliyelitenda, nalo ni jema.

Yaonekana ya kuwa njia ya Yehova ni kuwashusha wale awakusudiao kuwainua, na kuwavua wale anaokusudia kuwavika. Ikiwa ndiyo njia yake, ndiyo njia iliyo na hekima na iliyo bora kuliko zote. Kama sasa navumilia kushushwa chini naweza kufurahi sana, kwa sababu naona ndani yake dibaji ya kuinuliwa. Kwa kadiri tunyenyekezwavyo kwa neema, ndivyo tutakavyoinuliwa katika utukufu. Ufukara ule utakaogeuzwa kuwa utajiri wetu wapasa kukaribishwa.

Ee Bwana, umenishusha chini siku hizi, ukanifanya nihisi udogo wangu na dhambi yangu. Si jambo la kupendeza, lakini nakuomba ulifanye liwe la faida kwangu. Ah, laiti ungenifanya hivyo niweze kuchukua uzito mkubwa zaidi wa furaha na wa faida; na nitakapokuwa tayari kwalo, basi unijalie, kwa ajili ya Kristo! Amina.

Agosti 11

KUNGOJA, SI KUKIMBIA

"Hakika nafsi yangu inamngojea Mungu; wokovu wangu hutoka kwake" Zaburi 62:1

Hali ya heri! -- kungoja kweli na kumngoja Bwana peke yake. Hii na iwe hali yetu siku hii yote, na kila siku. Kungoja wakati wake, kungoja katika utumishi wake, kungoja katika kutumaini kwa furaha, kungoja katika maombi, na kuridhika. Nafsi yenyewe ingojapo hivyo, iko katika hali iliyo bora na ya kweli kuliko zote ya kiumbe mbele za Muumba wake, mtumishi mbele za Bwana wake, mtoto mbele za Baba yake. Hatumruhusu Mungu kuamriwa, wala hatumnung'unikii; hatutaruhusu ukorofi, wala kutokuamini. Wakati uo huo, hatukimbii mbele ya lile wingu, wala hatuwaendei wengine kwa msaada: hakuna kati ya haya kutakakoitwa kumngoja Mungu. Mungu, na Mungu peke yake, ndiye tumaini la mioyo yetu.

Uhakika wa heri! -- kutoka kwake wokovu unakuja; uko njiani. Utatoka kwake, wala si kwa mwingine ye yote. Yeye atakuwa na utukufu wote wake, kwa maana yeye peke yake aweza na atautenda. Naye atautenda kwa hakika kabisa katika wakati wake na jinsi yake mwenyewe. Atatuokoa na shaka, na mateso, na masingizio, na dhiki. Ijapokuwa hatuoni dalili yake bado, twaridhika kungoja mapenzi ya Bwana, kwa maana hatuna shaka juu ya upendo wake na uaminifu wake. Atalitimiza kwa hakika kabla ya muda mrefu, nasi tutamsifu mara moja kwa ajili ya rehema ijayo.

Agosti 12

NURU GIZANI

"Kwa maana wewe u taa yangu, Ee BWANA; naye BWANA ataangaza giza langu" 2 Samweli 22:29

Je, mimi ni nuruni? Basi wewe, Ee Bwana, u taa yangu. Ujiondoe, na furaha yangu itakuwa imekwenda; lakini maadamu u pamoja nami, naweza kuwa bila mienge ya wakati na mishumaa ya faraja iliyoumbwa. Nuru iliyoje ambayo uwepo wa Mungu huutupa juu ya vitu vyote! Tulisikia habari za mnara wa taa ulioweza kuonekana umbali wa maili ishirini, bali Yehova wetu si Mungu wa karibu tu, bali huonekana tokea mbali, hata katika nchi ya adui. Ee Bwana, mimi nina furaha kama malaika penzi lako lijazapo moyo wangu. Wewe ndiwe haja yangu yote.

Je, mimi ni gizani? Basi wewe, Ee Bwana, utaangaza giza langu. Kabla ya muda mrefu mambo yatabadilika. Mambo yaweza kuzidi kuwa ya kusononesha, na wingu laweza kurundikwa juu ya wingu; lakini likiwa giza hata nisiweze kuuona mkono wangu mwenyewe, hata hivyo nitauona mkono wa Bwana. Nisipoweza kuiona nuru ndani yangu, wala kati ya rafiki zangu, wala katika ulimwengu mzima, Bwana, aliyesema "Iwe nuru," ikawa nuru, aweza kusema vivyo hivyo tena. Atanisema nami niingie katika mwanga wa jua bado. Sitakufa bali nitaishi. Kunapambazuka tayari. Aya hii tamu hung'aa kama nyota ya asubuhi. Nitapiga makofi kwa furaha kabla ya saa nyingi kupita.

Agosti 13

KABLA YA KUITA NA WAKATI WA KUITA

"Hata itakuwa, kabla hawajaniita, nitajibu; nao wakiwa katika kunena, nitasikia" Isaya 65:24

Kazi ya haraka hii! Bwana hutusikia kabla hatujaita; na mara nyingi hutujibu kwa haraka ile ile. Akiyaona mbele mahitaji yetu, na maombi yetu, huyapanga maongozi hata kabla haja yenyewe haijainuka amekwisha kuiandaa, kabla jaribu halijatushambulia amekwisha kutuvika silaha dhidi yake. Huu ni upesi wa kujua-yote, nasi mara nyingi tumeuona ukitendeka. Kabla hatujaota juu ya mateso yaliyokuwa yakija, faraja iliyo hodari iliyokuwa itutegemeze chini yake ilikuwa imekwisha wasili. Mungu ajibuye maombi tuliye naye ni wa namna gani!

Kifungu cha pili chaashiria simu. Ijapokuwa Mungu yumo Mbinguni na sisi tuko duniani, hata hivyo hulifanya neno letu, kama neno lake mwenyewe, lisafiri kwa upesi mno. Tuombapo vema twanena sikioni mwa Mungu. Mpatanishi wetu mwenye neema huyawasilisha maombi yetu mara moja, na Baba mkuu huyasikia na kuyatabasamia. Kuomba kukuu huku! Ni nani asingekuwa mwingi katika maombi ajuapo ya kuwa analo sikio la Mfalme wa wafalme? Siku hii nitaomba katika imani, si kwa kuamini tu ya kwamba nitasikiwa, bali ya kwamba nimesikiwa; si kwamba nitajibiwa tu, bali ya kwamba tayari ninalo jibu. Roho Mtakatifu, unisaidie katika hili!

Agosti 14

MARUDI YA MTOTO SI YA MILELE

"Nami kwa ajili ya haya nitawatesa wazao wa Daudi, lakini si milele" 1 Wafalme 11:39

Katika jamaa ya neema kuna adabu, na adabu hiyo ni kali vya kutosha kufanya kutenda dhambi kuwe jambo ovu na chungu. Sulemani, akipotoshwa na wake zake wa kigeni, alikuwa amesimamisha miungu mingine, akamkasirisha sana Mungu wa baba yake; kwa hiyo sehemu kumi katika kumi na mbili za ufalme zilipasuliwa, zikasimamishwa kuwa dola pinzani. Hili lilikuwa mateso makali kwa nyumba ya Daudi, nalo lilikuja juu ya ukoo huo dhahiri kutoka mkono wa Mungu, kama tokeo la mwenendo usio mtakatifu. Bwana atawarudi watumishi wake wapendwao kuliko wote wakiacha utii kamili kwa sheria zake: labda saa hii hasa marudi kama hayo yako juu yetu. Na tulie kwa unyenyekevu "Ee Bwana, unionyeshe ni kwa nini unashindana nami."

Kifungu kitamu kilichoje cha kuokoa hicho -- "lakini si milele!" Adhabu ya dhambi ni ya milele, bali marudi ya kibaba ya dhambi hiyo katika mtoto wa Mungu ni ya kitambo tu. Ugonjwa, na umaskini, na huzuni ya roho, vitapita vitakapokuwa vimekwisha kufanya kazi yake iliyokusudiwa. Kumbuka, hatuko chini ya sheria, bali chini ya neema. Fimbo yaweza kutuumiza, lakini upanga hautatufanya tufe. Huzuni yetu ya sasa imekusudiwa kutuleta kwenye toba, ili tusiharibiwe pamoja na wabaya.

Agosti 15

DHAMANA YA JINA

"Nanyi mkiomba lo lote kwa jina langu, hilo nitalifanya, ili Baba atukuzwe ndani ya Mwana" Yohana 14:13

Si kila mwamini ambaye amekwisha jifunza kuomba kwa jina la Kristo. Kuomba si kwa ajili yake tu, bali kwa jina lake, kama tulivyopewa idhini naye, ni namna ya juu ya maombi. Hatungethubutu kuomba mambo mengine kwa jina hilo lililobarikiwa, kwa maana ingekuwa unajisi wa kusikitisha wa jina hilo; lakini ombi lionekanapo kuwa haki wazi hata tuthubutu kulitia jina la Yesu, ndipo ni lazima lijaliwe.

Maombi ni ya hakika zaidi kufanikiwa kwa sababu ni kwa ajili ya utukufu wa Baba kupitia Mwana. Hutukuza kweli yake, uaminifu wake, nguvu zake, neema yake. Kujaliwa kwa maombi, yatolewapo kwa jina la Yesu, hufunua upendo wa Baba kwake, na heshima aliyoiweka juu yake. Utukufu wa Yesu na wa Baba umefungamana pamoja kiasi kwamba neema iutukuzayo mmoja huutukuza mwingine. Mfereji hupata sifa kwa ujazo wa chemchemi, na chemchemi huheshimiwa kwa mfereji ambao kwao hutiririka. Kama kujibiwa kwa maombi yetu kungemvunjia Bwana wetu heshima, hatungeomba; lakini kwa kuwa katika jambo hili yeye hutukuzwa, tutaomba bila kukoma katika jina hilo pendwa ambalo ndani yake Mungu na watu wake wana ushirika wa furaha.

Agosti 16

FUNUA NA UNGAMA DHAMBI

"Yeye afichaye dhambi zake hatafanikiwa; bali yeye aziungamaye na kuziacha atapata rehema" Mithali 28:13

Hii ndiyo njia ya rehema kwa mwenye dhambi mwenye hatia atubuye. Hana budi kuacha zoea la kuifunika dhambi. Hili hujaribiwa kwa uongo, uikanao dhambi; kwa unafiki, uifichao; kwa kujisifu, kuihesabiao haki; na kwa maungamo ya kelele, yajaribuyo kuifidia.

Kazi ya mwenye dhambi ni kuungama na kuacha. Mawili haya hayana budi kwenda pamoja. Kuungama hakuna budi kufanywe kwa unyofu kwa Bwana mwenyewe; na hakuna budi kujumuishe ndani yake kukiri kosa, na hisia ya uovu wake, na kulichukia. Hatuna budi tusitupe lawama juu ya wengine, wala kulaumu hali, wala kutolea udhuru wa udhaifu wa asili. Hatuna budi kulieleza wazi kabisa, na kukiri hatia kwa mashtaka. Haiwezi kuwapo rehema hata hili litendeke.

Zaidi ya hayo, hatuna budi kuuacha uovu: tukiisha kukiri kosa letu, hatuna budi kukana kila nia ya sasa na ya wakati ujao ya kukaa ndani yake. Hatuwezi kubaki katika uasi na bado tukae na Enzi ya Mfalme. Zoea la uovu hana budi kuachwa, pamoja na mahali pote, na wenzake, na shughuli, na vitabu, ambavyo vyaweza kutupoteza. Si kwa ajili ya kuungama, wala kwa ajili ya kujirekebisha, bali kwa kushikamana navyo twapata msamaha kwa imani katika damu ya Yesu.

Agosti 17

NI NANI ALIYE NA WINGI?

"Akajibu, Usiogope; kwa maana walio pamoja nasi ni wengi kuliko wale walio pamoja nao" 2 Wafalme 6:16

Farasi na magari, na jeshi kubwa, walimfungia nabii ndani ya Dothani. Mtumishi wake kijana aliingiwa na hofu. Wangewezaje kuokoka mikononi mwa kundi kama hilo la watu wenye silaha? Lakini nabii alikuwa na macho ambayo mtumishi wake hakuwa nayo, naye aliweza kuona jeshi kubwa zaidi lenye silaha bora sana likimlinda na madhara yote. Farasi wa moto wana nguvu kuliko farasi wa nyama, na magari ya moto ni bora sana kuliko magari ya chuma.

Ndivyo ilivyo saa hii. Adui za kweli ni wengi, wenye ushawishi, wenye elimu, na wenye hila; na kweli hupata mateso mikononi mwao; walakini mtu wa Mungu hana sababu ya kutetemeka. Nguvu, zionekanazo na zisizoonekana, za namna iliyo hodari kuliko zote, ziko upande wa haki. Mungu ana majeshi yaliyojificha yatakayojidhihirisha katika saa ya haja. Nguvu zilizo upande wa wema na kweli zazidi sana nguvu za uovu. Kwa hiyo, na tuinue roho zetu, na tuenende kwa mwendo wa watu walio na siri ichangamshayo, iliyowainua juu ya hofu yote. Tuko upande ushindao. Vita vyaweza kuwa vikali, lakini twajua jinsi vitakavyoisha. Imani, ikiwa na Mungu pamoja nayo, imo katika wingi ulio dhahiri: "Walio pamoja nasi ni wengi kuliko wale walio pamoja nao."

Agosti 18

WATAFUTAO, WAONAO

"Ukimtafuta, ataonekana kwako" 1 Nyakati 28:9

Twamhitaji Mungu wetu; huweza kupatikana kwa kutafutwa; naye hatajizuia kwa ye yote wetu kama sisi wenyewe tuutafutapo uso wake. Si, kama ukimstahili, au kununua kibali chake, bali ni kama tu "ukimtafuta." Wale ambao tayari wamjua Bwana hawana budi kuendelea kuutafuta uso wake kwa maombi, na kwa utumishi wa bidii, na kwa shukrani takatifu: kwa hao hatakataa kibali chake na ushirika wake. Wale ambao, hata sasa, hawajamjua kwa raha ya nafsi zao wapasa kuanza kutafuta mara moja, wala wasiache kamwe hata wampate kuwa Mwokozi wao, na Rafiki yao, na Baba yao, na Mungu wao.

Uhakika hodari ulioje ambao ahadi hii humpa mtafutaji! "Atafutaye huona." Wewe, naam wewe, ukimtafuta Mungu wako utampata. Umpatapo umepata uzima, na msamaha, na utakaso, na hifadhi, na utukufu. Je, hutatafuta, na kuendelea kutafuta, kwa kuwa hutatafuta bure? Rafiki mpendwa, mtafute Bwana mara moja. Hapa ndipo mahali, na sasa ndio wakati. Ipinde goti hilo gumu; naam, upinde shingo hiyo iliyo ngumu zaidi, ukamlilie Mungu, Mungu aliye hai. Kwa jina la Yesu tafuta utakaso na kuhesabiwa haki. Hutakataliwa. Huu ndio ushuhuda wa Daudi kwa mwanawe Sulemani, nao ndio ushahidi binafsi wa mwandishi kwa msomaji. Uamini na kuutenda, kwa ajili ya Kristo.

Agosti 19

THAWABU KWA WENYE HAKI

"Hata mtu aseme, Hakika kuna thawabu kwa wenye haki; hakika yuko Mungu ahukumuye duniani" Zaburi 58:11

Hukumu za Mungu katika maisha haya si sikuzote zionekanazo waziwazi, kwa maana katika mambo mengi tukio moja huwapata wote sawasawa. Hii ni hali ya kujaribiwa, si ya adhabu wala thawabu. Walakini nyakati nyingine Mungu hutenda mambo ya kutisha kwa haki, na hata wazembe hulazimishwa kuukiri mkono wake.

Hata katika maisha haya haki ina namna ile ya thawabu iipendeleayo kuliko zote, yaani, tabasamu la Mungu, litengenezalo dhamiri tulivu. Nyakati nyingine malipo mengine hufuata, kwa maana Mungu hatakuwa na deni kwa mtu ye yote. Lakini, wakati uo huo, thawabu iliyo kuu ya wenye haki iko katika maisha yajayo.

Wakati huo huo, kwa kipimo kikubwa, twaona uwepo wa Mtawala mkuu kati ya mataifa. Huvunja vipande vipande viti vya enzi vya udhalimu, na kuwaadhibu watu wenye hatia. Hakuna awezaye kuchunguza historia ya kupanda na kuanguka kwa milki bila kutambua ya kuwa kuna nguvu itendayo kwa ajili ya haki, na, mwishoni, huleta uovu mbele ya baraza lake, na kuuhukumu kwa haki isiyo na huruma. Dhambi haitakosa kuadhibiwa, na wema hautabaki bila kupewa thawabu. Mwamuzi wa dunia yote hana budi kutenda haki. Kwa hiyo, na tuogope mbele zake, wala tusiiogope tena nguvu ya wabaya.

Agosti 20

WOKOVU USIO NA MIPAKA

"Katika taabu sita atakuokoa; naam, katika saba hakuna uovu utakaokugusa" Ayubu 5:19

Elifazi katika haya alinena kweli ya Mungu. Twaweza kuwa na taabu nyingi kama siku za kazi za juma, lakini Mungu aliyefanya kazi katika siku zile sita atatufanyia kazi hata wokovu wetu utimie. Tutapumzika pamoja naye, na ndani yake katika Sabato yetu. Mfululizo wa haraka wa majaribu ni mojawapo wa majaribu makali kuliko yote ya imani. Kabla hatujapona pigo moja, hufuatwa na jingine na jingine hata tuyumbe. Lakini, mfululizo wa haraka vilevile wa wokovu unafariji mno. Nyimbo mpya hupigwa juu ya fuawe kwa nyundo ya mateso, hata tuone katika ulimwengu wa kiroho mfano halisi wa "yule Mhunzi Mwenye Upatano." Uhakika wetu ni kwamba, Bwana afanyapo majaribu yetu kuwa sita, sita yatakuwa, wala si zaidi.

Yamkini hatuna siku ya kupumzika, kwa maana taabu saba huja juu yetu. Ni nini basi? "Katika saba hakuna uovu utakaokugusa." Uovu waweza kutunguruma, lakini utawekwa mbali zaidi ya urefu wa mkono, wala hautatugusa hata kidogo. Pumzi yake ya moto yaweza kutuhangaisha, lakini kidole chake kidogo hakiwezi kuwekwa juu yetu.

Tukiwa tumejifunga viuno vyetu tutakabiliana na taabu sita au saba, na kuwaachia hofu wale wasio na Baba, wala Mwokozi, wala Mtakasaji.

Agosti 21

USIKU WA KILIO; SIKU YA FURAHA

"Maana ghadhabu yake ni ya kitambo kidogo; katika radhi yake mna uzima. Huja kilio kukaa usiku kucha, lakini asubuhi huwa furaha" Zaburi 30:5

Kitambo kimoja chini ya ghadhabu ya Baba yetu chaonekana kirefu sana, walakini ni kitambo tu baada ya yote. Tukimhuzunisha Roho wake hatuwezi kutumaini tabasamu lake; lakini yeye ni Mungu aliye tayari kusamehe, naye upesi huweka kando ukumbusho wote wa makosa yetu. Tuzimiapo na kuwa tayari kufa kwa sababu ya kununa kwake, kibali chake hutia uzima mpya ndani yetu.

Aya hii ina noti nyingine ya namna ya haraka. Usiku wetu wa kilio upesi hugeuka kuwa siku ya furaha. Ufupi ndio alama ya rehema katika saa ya kurudiwa kwa waaminio. Bwana hapendi kuitumia fimbo juu ya wateule wake; hupiga pigo moja au mawili, na yote yamekwisha; naam, na uzima na furaha, vifuatavyo ghadhabu na kilio, huzidi kufidia huzuni ile yenye faida.

Njoo, moyo wangu, anza haleluya zako! Usilie usiku kucha, bali uyafute macho yako kwa kutumaini asubuhi. Machozi haya ni umande unaotukusudia mema kama vile miali ya jua ya kesho. Machozi husafisha macho ili kumwona Mungu katika neema yake; na kuufanya uono wa kibali chake kuwa wa thamani zaidi. Usiku wa huzuni hutoa vivuli vile vya taswira ambavyo kwavyo miali ya nuru huonyeshwa kwa udhahiri. Yote ni mema.

Agosti 22

GHADHABU KWA UTUKUFU WA MUNGU

"Hakika ghadhabu ya mwanadamu itakusifu; ghadhabu iliyobaki utaizuia" Zaburi 76:10

Watu wabaya watakuwa na ghadhabu. Hasira yao imetupasa kuivumilia kama nishani ya wito wetu, alama ya kutengwa kwetu nao: kama tungekuwa wa ulimwengu, ulimwengu ungependa vilivyo vyake. Faraja yetu ni kwamba ghadhabu ya mwanadamu itafanywa irudi kuwa utukufu wa Mungu. Wabaya walipomsulibisha Mwana wa Mungu katika ghadhabu yao walikuwa wakiitimiza pasipo kujua kusudi la Mungu, na katika maelfu ya matukio ukaidi wa wasiomcha Mungu hufanya vivyo hivyo. Hujidhania kuwa huru, lakini kama wafungwa katika minyororo huyatimiza pasipo kujua maagizo ya Mwenyezi.

Hila za wabaya hugeuzwa kuwa kushindwa kwao. Hutenda kwa namna ya kujiua wenyewe, na kuzitatiza njama zao wenyewe. Hakuna litakalotoka katika ghadhabu yao liwezalo kututenda madhara ya kweli. Walipowachoma moto mashahidi, moshi uliovuma kutoka mtini uliwakinaisha watu na ukatoliki kuliko kitu kingine cho chote.

Wakati huo huo, Bwana anayo kikanio na mnyororo kwa ajili ya dubu. Huzuia ghadhabu iliyo kali zaidi ya adui. Yeye ni kama msagaji ashikaye nyuma wingi wa maji katika mkondo, na yale ayaruhusuyo yatiririke huyatumia kwa kuzungusha gurudumu lake. Tusiugue, bali tuimbe. Yote ni mema, ijapokuwa upepo wavuma vikali kiasi gani.

Agosti 23

PENDA NA UTAFUTE HEKIMA YA KWELI

"Nawapenda wale wanipendao; na wale wanitafutao kwa bidii wataniona" Mithali 8:17

Hekima huwapenda wampendao, na kuwatafuta wamtafutao. Yeye ana hekima tayari atafutaye kuwa na hekima, naye amekaribia kuipata hekima yeye aitafutaye kwa bidii. Yaliyo kweli juu ya hekima kwa jumla ni kweli hasa juu ya hekima iliyo katika Bwana wetu Yesu. Yeye ndiye tupasaye kumpenda na kumtafuta, na kwa malipo yake tutaufurahia upendo wake, na kumpata yeye mwenyewe.

Kazi yetu ni kumtafuta Yesu mapema maishani. Heri vijana ambao asubuhi yao hutumika pamoja na Yesu! Hakuna mapema mno kumtafuta Bwana Yesu. Watafutao mapema huwa waonao kwa hakika. Imetupasa kumtafuta mapema kwa bidii. Wafanyabiashara wafanikiwao ni wenye kuamka mapema, na watakatifu wafanikiwao humtafuta Yesu kwa shauku. Wale wampatao Yesu kwa utajiri wao huitoa mioyo yao kumtafuta. Imetupasa kumtafuta yeye kwanza, na hivyo mapema kuliko yote. Zaidi ya vitu vyote ni Yesu. Yesu kwanza, wala si kitu kingine hata kama cha pili kibaya.

Baraka yake ni kwamba atapatikana. Hujidhihirisha kwa kuzidi kuwa waziwazi kwa utafutaji wetu. Hujitoa kwa ukamilifu zaidi kwa ushirika wetu. Heri watu wamtafutao Yeye ambaye, apatikanapo, hukaa nao milele, hazina inayozidi kuwa ya thamani kwa mioyo yao na akili zao.

Bwana Yesu, nimekupata; upatikane nami kwa kiwango kisichoelezeka cha kutosheka kwa furaha.

Agosti 24

MUNGU JUU YA FALSAFA YA KIBINADAMU

"Kwa maana imeandikwa, Nitaiharibu hekima yao wenye hekima, na akili zao wenye akili nitazikataa" 1 Wakorintho 1:19

Aya hii ni tisho kuwahusu wenye hekima ya kidunia, bali kwa mwamini mnyofu ni ahadi. Wale wanaojidai kuwa na elimu daima hujaribu kuibatilisha imani ya mwamini mnyenyekevu, lakini hushindwa katika majaribio yao. Hoja zao huvunjika, nadharia zao huanguka chini ya uzito wao wenyewe, njama zao zilizofichwa kwa kina hujidhihirisha kabla kusudi lao halijatimizwa. Injili ya zamani haijafa bado, wala haitakufa maadamu Bwana yu hai. Kama ingeweza kuangamizwa ingekuwa imepotea toka duniani zamani sana.

Hatuwezi kuiharibu hekima ya wenye hekima, wala hatuhitaji kujaribu, kwa maana kazi iko katika mikono iliyo bora zaidi. Bwana mwenyewe asema, "Nitafanya," naye hakusudii bure kamwe. Mara mbili katika aya hii hulitangaza kusudi lake, nasi twaweza kuwa na hakika ya kuwa hatalikengeuka.

Kazi safi ilioje Bwana aifanyayo kwa falsafa na "fikira za kisasa" auwekapo mkono wake juu yake! Huushusha muonekano mzuri hata kuwa si kitu; huviharibu kabisa mbao, na majani makavu, na mabua. Imeandikwa ya kwamba ndivyo itakavyokuwa, na ndivyo itakavyokuwa. Bwana, ifanye kazi hii kwa haraka. Amina, na Amina.

Agosti 25

CHAKULA NA MAPUMZIKO

"Mimi mwenyewe nitawalisha kondoo zangu, nami nitawalaza, asema Bwana MUNGU" Ezekieli 34:15

Chini ya uchungaji wa Mungu watakatifu hulishwa hata kushiba. Chao si mchanganyiko wa upepo, usioshibisha, wa "fikira" za kibinadamu tu; bali Bwana huwalisha kwa kweli iliyo imara, yenye uzito, ya ufunuo wa Mungu. Kuna lishe ya kweli kwa nafsi katika Maandiko yaletwapo moyoni na Roho Mtakatifu. Yesu, mwenyewe, ndiye Chakula cha kweli kishikacho uhai cha waaminio. Hapa Mchungaji wetu Mkuu huahidi ya kwamba lishe takatifu kama hiyo tutapewa naye mwenyewe. Kama, katika Siku ya Bwana, mchungaji wetu wa duniani ana mikono mitupu, Bwana hana.

Akili ijaapo kweli takatifu hupumzika. Wale ambao Yehova huwalisha wana amani. Hakuna mbwa atakayewasumbua, hakuna mbwa mwitu atakayewala, hakuna tabia zisizotulia zitakazowahangaisha. Watalala chini na kuyeyusha chakula walichokifurahia. Mafundisho ya neema si ya kutegemeza tu, bali ya kufariji: ndani yake tunazo njia za kujenga na za kulala chini. Kama wahubiri hawatupi mapumziko, na tumtazame Bwana kwa ajili yake.

Siku hii Bwana atujalie kula katika malisho ya Neno, na atulaze chini ndani yake. Isiwepo upumbavu wo wote, wala wasiwasi wo wote, bali Kutafakari na Amani na iitie alama siku hii.

Agosti 26

YEYE MWENYE DHAMIRI NYORORO

"Nami nitahukumu kati ya kondoo na kondoo" Ezekieli 34:22

Wengine ni wanono na wasitawio, na kwa hiyo hawana fadhili kwa wanyonge. Hii ni dhambi nzito, nayo husababisha huzuni nyingi. Kule kusukuma kwa mbavu na kwa bega, kule kuwang'ang'ania wagonjwa kwa pembe, ni njia ya kusikitisha ya kuchukiza katika makusanyiko ya wale wanaojidai kuwa waaminio. Bwana huyatia maanani matendo haya ya kiburi yasiyo na fadhili, naye hukasirishwa sana nayo, kwa maana huwapenda wanyonge.

Je, msomaji ni mmoja wa waliodharauliwa? Je, yeye ni mwenye kuomboleza katika Sayuni, na mtu aliyetiwa alama kwa sababu ya dhamiri yake nyororo? Je, ndugu zake humhukumu kwa ukali? Asiuchukie mwenendo wao; zaidi ya yote asisukume na kung'ang'ania kwa kulipiza. Aliache jambo hilo mikononi mwa Bwana. Yeye ndiye Mwamuzi. Kwa nini tutamani kujiingiza katika kazi yake? Ataamua kwa haki zaidi sana kuliko tuwezavyo. Wakati wake wa hukumu ndio ulio bora, wala haitupasi kuwa na haraka kuuharakisha.

Mdhalimu mwenye moyo mgumu na atetemeke. Ijapokuwa aweza kuwakanyaga wengine bila kuadhibiwa kwa sasa, maneno yake yote ya kiburi yametiwa maanani, na kwa kila mojawapo ni lazima itolewe hesabu mbele ya baraza la Mwamuzi Mkuu.

Saburi, nafsi yangu! Saburi! Bwana anaijua huzuni yako. Yesu wako anakuhurumia!

Agosti 27

WATU TEULE

"Nimekuchagua katika tanuru ya mateso" Isaya 48:10

Hii kwa muda mrefu imekuwa kauli mbiu iliyowekwa mbele ya jicho letu juu ya ukuta wa chumba chetu cha kulala, na kwa njia nyingi vilevile imeandikwa juu ya moyo wetu. Si jambo dogo kuchaguliwa na Mungu. Uchaguzi wa Mungu huwafanya watu waliochaguliwa kuwa watu teule. Afadhali kuwa mteule wa Mungu kuliko mteule wa taifa zima. Pendeleo hili ni tukufu kiasi kwamba kizuizi cho chote kiwezacho kuunganishwa nalo twalikubali kwa furaha nyingi, kama vile Myahudi alivyokula mboga chungu kwa ajili ya Mwana-Kondoo wa Pasaka. Twaichagua tanuru, kwa kuwa Mungu hutuchagua ndani yake.

Twachaguliwa kuwa watu wateswao, wala si watu wafanikiwao, twachaguliwa si katika kasri, bali katika tanuru. Katika tanuru uzuri huharibiwa, umbo huteketezwa, nguvu huyeyushwa, utukufu huteketea, walakini hapa upendo wa milele hufunua siri zake, na kutangaza uchaguzi wake. Ndivyo ilivyokuwa katika hali yetu. Katika nyakati za jaribu kali kuliko yote Mungu ametudhihirishia wito wetu na uchaguzi wetu, nasi tumeuthibitisha: ndipo tumemchagua Bwana kuwa Mungu wetu, naye ameonyesha ya kuwa sisi kwa hakika ni wateule wake. Kwa hiyo, kama leo tanuru itachomwa mara saba zaidi, hatutaiogopa, kwa maana Mwana wa Mungu mtukufu atatembea pamoja nasi katikati ya makaa yawakayo.

Agosti 28

KUTOKA HALI YO YOTE

"Nami nitamwita Mungu; naye BWANA ataniokoa" Zaburi 55:16

Naam, ni lazima nami nitaomba. Ni nini kingine niwezacho kufanya? Ni lipi lililo bora zaidi niwezalo kufanya? Nikiwa nimesalitiwa, nimeachwa, nimehuzunishwa, nimetatizwa, Ee Bwana wangu, nitakuita. Siklagi yangu imekuwa majivu, na watu husema habari za kunipiga kwa mawe; lakini nautia moyo moyo wangu katika Bwana, atakayenichukua nipite katika jaribu hili kama alivyonichukua nipite katika mengine mengi. Yehova ataniokoa; nina hakika atafanya hivyo, nami naitangaza imani yangu.

Bwana, wala si mwingine ye yote, ataniokoa. Sitaki msaidizi mwingine, wala nisingeutumaini mkono wa mwili hata kama ningeweza. Nitamlilia jioni, na asubuhi, na adhuhuri, wala sitamlilia mwingine ye yote, kwa maana yeye anatosha kwa yote.

Jinsi atakavyoniokoa siwezi kukisia; lakini atafanya, najua. Atafanya kwa njia iliyo bora na iliyo hakika kuliko zote, naye atafanya kwa maana iliyo pana, na ya kweli, na iliyo kamili kuliko zote. Kutoka katika taabu hii na taabu zote zijazo yule MIMI NIKO mkuu ataniokoa kwa hakika kama vile aishivyo; na mauti yajapo, na siri zote za umilele zikifuata baadaye, hata hivyo hili litakuwa kweli: "Bwana ataniokoa." Huu utakuwa wimbo wangu siku hii yote ya vuli. Je, si kama tunda lililoiva kutoka mti wa uzima? Nitajilisha kwalo. Tamu iliyoje kwa kuonja kwangu!

Agosti 29

MABURUDISHO TELE

"Nafsi yao itakuwa kama bustani iliyotiwa maji" Yeremia 31:12

Ee, kuwa na nafsi ya mtu chini ya kilimo cha mbinguni; isiwe tena jangwa, bali bustani ya Bwana! Ikizungushiwa uzio na kutengwa na ukiwa, ikijengewa ukuta wa neema, ikipandwa kwa mafundisho, ikizurwa na upendo, ikipaliliwa kwa adabu ya mbinguni, na kulindwa kwa nguvu za Mungu, nafsi ya mtu iliyofadhiliwa hutayarishwa kuzaa matunda kwa Bwana.

Lakini bustani yaweza kukauka kwa kukosa maji, ndipo mimea yake yote hunyauka, na kuwa tayari kufa. Ee nafsi yangu, upesi kiasi gani ingekuwa hivyo Bwana angekuacha! Katika Mashariki, bustani isiyo na maji upesi huacha kuwa bustani kabisa: hakuna kiwezacho kutimia, wala kukua, wala hata kuishi. Umwagiliaji ukiendelezwa, matokeo yake ni ya kupendeza. Ee, kuwa na nafsi ya mtu ikinyweshwa na Roho Mtakatifu kwa usawa -- kila sehemu ya bustani ikiwa na kijito chake; kwa wingi -- maburudisho ya kutosha yakija kwa kila mti na mmea, ujapokuwa na kiu kiasi gani kwa asili; daima -- kila saa ikileta si joto lake tu, bali maburudisho yake; kwa hekima -- kila mmea ukipokea kile hasa ukihitajicho. Katika bustani waweza kuona kwa ubichi mahali maji yatiririkapo, nawe upesi waweza kutambua ajapo Roho wa Mungu.

Ee Bwana, uninyweshe siku hii, ukanifanya nikuletee thawabu kamili, kwa ajili ya Yesu. Amina.

Agosti 30

FARAJA, USALAMA, KURIDHIKA

"Ijapokuwa nyumba yangu si hivyo mbele za Mungu; lakini amefanya nami agano la milele, lililopangwa katika mambo yote, tena thabiti; kwa maana huu ndio wokovu wangu wote, na haja yangu yote, ajapokuwa hakuufanya kusitawi" 2 Samweli 23:5

Hii si ahadi moja kiasi hicho kama ilivyo jumla ya ahadi -- kisanduku cha lulu. Agano ndilo sanduku lililo na vitu vyote.

Haya ndiyo maneno ya mwisho ya Daudi, lakini yaweza kuwa yangu leo. Hapa kuna kuugua: mambo si kwangu na kwa watu wangu kama ningependa; kuna majaribu, na masumbufu, na dhambi. Haya huufanya mto kuwa mgumu.

Hapa kuna faraja -- "Amefanya nami agano la milele." Yehova amejiweka rehani kwangu, na kulitia muhuri agano kwa damu ya Yesu. Nimefungwa kwa Mungu wangu, na Mungu wangu kwangu.

Hili huleta wazi usalama, kwa kuwa agano hili ni la milele, lililopangwa vema tena thabiti. Hakuna cha kuogopa kutokana na kupita kwa wakati, wala kushindwa kwa jambo fulani lililosahauliwa, wala kutokuwa na hakika kwa asili kwa mambo. Agano ni msingi wa mwamba wa kujengea kwa uzima au kwa mauti.

Daudi ahisi kuridhika: hataki zaidi kwa wokovu wala kwa furaha. Ameokolewa, naye amefurahishwa. Agano ndilo lote awezalo mtu kutamani.

Ee nafsi yangu, umgeukie siku hii Bwana wako Yesu, ambaye Bwana mkuu amemtoa kuwa agano kwa watu. Umtwae awe yako yote katika yote.

Agosti 31

WA KIMUNGU, WA KUISHI MILELE, USIOBADILIKA

"Lakini neno la Bwana hudumu hata milele. Na neno hilo ndilo lile lililohubiriwa kwenu" 1 Petro 1:25

Mafundisho yote ya kibinadamu na, kwa kweli, wanadamu wote, watapita kama majani ya malisho; lakini hapa twahakikishiwa ya kuwa Neno la Bwana ni la tabia iliyo tofauti sana, kwa maana litadumu hata milele.

Hapa tuna injili ya Kimungu; kwa maana ni neno gani liwezalo kudumu milele ila lile linenwalo na Mungu wa milele?

Hapa tuna injili iishiyo milele, iliyojaa uhai kama ilivyokuwa ilipotoka kwanza katika mdomo wa Mungu; iliyo hodari kushawishi na kuongoa, kuzaa upya na kufariji, kutegemeza na kutakasa, kama ilivyokuwa siku zake za kwanza za kutenda maajabu.

Tuna injili isiyobadilika, ambayo si leo majani mabichi, na kesho nyasi kavu; bali sikuzote ni kweli idumuyo ya Yehova asiyebadilika. Maoni hubadilika, lakini kweli iliyothibitishwa na Mungu haiwezi kubadilika zaidi ya Mungu aliyeinena.

Basi, hapa tuna injili ya kufurahia, neno la Bwana ambalo juu yake twaweza kuegemeza uzito wetu wote. "Hata milele" hujumuisha uzima, na mauti, na hukumu, na umilele. Utukufu una Mungu katika Kristo Yesu kwa ajili ya faraja ya milele. Jilishe kwa neno leo, na siku zote za maisha yako.