Mwezi wa Julai

Julai 1

MUNGU PAMOJA NASI

"Mungu atakuwa pamoja nanyi" Mwa. 48:21

Yakobo mzee mwema hakuweza tena kuwa pamoja na Yusufu, kwa kuwa saa yake ya kufa ilikuwa imewadia; lakini alimwacha mwanawe pasipo wasiwasi, kwa maana alisema kwa uthabiti, "Mungu atakuwa pamoja nanyi." Wapendwa wetu wa karibu, au rafiki zetu wenye kutusaidia zaidi, waitwapo nyumbani kwa mauti, imetupasa kujifariji kwa kufikiri kwamba Bwana hakuondoka kwetu, bali yu hai kwa ajili yetu, na hukaa nasi milele.

Kama Mungu yu pamoja nasi, tumo katika ushirika unaotutukuza, ijapokuwa sisi ni maskini na kudharauliwa. Kama Mungu yu pamoja nasi, tuna nguvu zitoshelezazo kila jambo, kwa kuwa hakuna neno lililo gumu lisilowezekana kwa Bwana. Kama Mungu yu pamoja nasi, sikuzote tu salama, kwa maana hakuna awezaye kuwadhuru wale waendao chini ya uvuli wake. Ee, furaha iliyoje tuliyo nayo hapa! Si kwamba Mungu yu pamoja nasi tu, bali atakuwa pamoja nasi. Pamoja nasi kama watu mmoja mmoja; pamoja nasi kama jamaa; pamoja nasi kama makanisa. Je! Jina lenyewe la Yesu si Imanueli -- Mungu pamoja nasi? Je! Hili si lililo bora kuliko yote, kwamba Mungu yu pamoja nasi? Na tuwe wenye bidii kwa ujasiri, na wenye tumaini kwa furaha. Kusudi letu ni lazima listawi, kweli ni lazima ishinde, kwa kuwa Bwana yu pamoja na wale walio pamoja naye.

Siku hii yote neno hili tamu na lifurahiwe na kila mwaminifu aendeaye "Kitabu cha Hundi cha Imani." Hakuna furaha iliyo kuu zaidi iwezekanayo.

Julai 2

USINGIZI WA KUBURUDISHA

"Ndivyo humpa mpenzi wake usingizi" Zab. 127:2

Maisha yetu si ya kujishughulisha kwa wasiwasi, bali ni ya imani yenye furaha. Baba yetu wa mbinguni atawaruzuku watoto wake mahitaji yao, naye anajua tunayohitaji kabla hatujamwomba. Kwa hiyo twaweza kwenda vitandani mwetu saa iliyo halali, wala tusijichoshe kwa kukesha usiku sana tukifanya mashauri, na kutunga hila, na kubuni njia. Tukiwa tumejifunza kumtegemea Mungu wetu, hatutalala macho na hofu ikitafuna mioyo yetu; bali tutamwachia Bwana masumbufu yetu, na kumtafakari yeye kutakuwa kutamu, naye atatupa usingizi wa kuburudisha.

Kuwa mpendwa wa Bwana ni heshima iliyo kuu kuliko zote iwezekanayo, na yeye aliye nayo aweza kuhisi kwamba tamaa yenyewe isingaliweza kutaka zaidi, na kwa hiyo kila haja ya ubinafsi na iende ikalale. Kuna nini zaidi hata mbinguni kuliko upendo wa Mungu? Basi, pumzika, Ee nafsi, kwa maana una vitu vyote.

Lakini twahangaika huku na huku, mpaka Bwana mwenyewe atupe si sababu za kupumzika tu, bali pumziko lenyewe. Naam, yeye hufanya hivyo. Yesu mwenyewe ndiye amani yetu, pumziko letu, na yetu yote. Kifuani pake twalala kwa salama kamili, katika uhai na katika mauti pia.

"Nikiwa nimenyunyiziwa upya kwa damu ya msamaha,

Najilaza nipate kupumzika,

Kana kwamba katika mikono ya Mungu wangu,

Au kifuani pa Mwokozi wangu.

Julai 3

KIONGOZI NJIA YOTE

"Yeye atakuwa kiongozi wetu hata kufa" Zab. 48:14

Twahitaji kiongozi. Nyakati nyingine tungetoa vyote tulivyo navyo ili tuambiwe hasa tufanye nini, na tugeuke wapi. Tu tayari kutenda yaliyo mema, lakini hatujui ni njia ipi katika mbili tuifuate. Ee, laiti tungekuwa na kiongozi!

Bwana Mungu wetu ajishushaye hutuhudumia kama kiongozi. Yeye anaijua njia, naye atatuongoza katika hiyo hata tufike mwisho wa safari yetu kwa amani. Hakika hatuhitaji uongozi ulio hakika zaidi ya huu. Na tujitie kabisa chini ya uongozi wake, wala hatutaikosa kamwe njia yetu. Na tumfanye yeye kuwa Mungu wetu, nasi tutamwona kuwa kiongozi wetu. Tukiishika sheria yake hatutaikosa njia iliyo sawa ya uzima, tukijifunza kwanza kumtegemea yeye katika kila hatua tunayopiga.

Faraja yetu ni hii, ya kwamba kama yeye alivyo Mungu wetu milele na milele, hataacha kamwe kuwa pamoja nasi kama kiongozi wetu. "Hata kufa" atatuongoza, kisha tutakaa naye milele, wala hatutatoka nje tena kamwe. Ahadi hii ya uongozi wa Mungu inahusisha usalama wa maisha yote: wokovu mara moja, uongozi hata saa yetu ya mwisho, kisha heri isiyo na mwisho. Je! Kila mmoja asiitafute hii katika ujana, na kuifurahia katika umri wa makamo, na kuistarehea katika uzee? Siku hii na tutazame juu tupate uongozi kabla hatujajiaminisha nje ya mlango.

Julai 4

NENO, CHAKULA CHA LAZIMA

"Mtu hataishi kwa mkate tu, ila kwa kila neno litokalo katika kinywa cha Mungu." Mt. 4:4

Kama Mungu angalitaka hivyo tungeweza kuishi bila mkate, kama vile Yesu alivyoishi kwa siku arobaini; lakini tusingeweza kuishi bila Neno lake. Kwa Neno hilo tuliumbwa, na kwa hilo peke yake twaweza kuhifadhiwa katika kuwako, kwa maana yeye huvitegemeza vitu vyote kwa neno la uweza wake. Mkate ni kisababu cha pili; Bwana mwenyewe ndiye chanzo cha kwanza cha riziki yetu. Aweza kutenda kazi bila kisababu cha pili kama vile awezavyo pamoja nacho; wala haitupasi kumfunga katika njia moja tu ya kutenda. Tusiwe na papara kupita kiasi kuvitaka vinavyoonekana, bali na tumtazame Mungu asiyeonekana. Tumesikia waaminifu wakisema ya kwamba katika umaskini mkubwa, mkate ulipopungua, hamu yao ya kula nayo ilipungua pia; na kwa wengine, mahitaji ya kawaida yalipowaishia, Bwana amewapelekea msaada usiotazamiwa. Lakini ni lazima tuwe na Neno la Bwana. Kwa hili peke yake twaweza kumpinga shetani. Tunyang'anye hili, na adui yetu atatushika mkononi mwake, kwa maana tutazimia mara. Nafsi zetu zahitaji chakula, wala hakuna kwa ajili yazo nje ya Neno la Bwana. Vitabu vyote na wahubiri wote wa dunia hawawezi kutuandalia hata mlo mmoja: ni Neno litokalo katika kinywa cha Mungu peke yake liwezalo kukijaza kinywa cha mwaminifu. Bwana, utupe daima mkate huu. Twauthamini kuliko vyakula vitamu vya kifalme.

Julai 5

WOKOVU KAMILI

"Lakini nitakuokoa siku ile, asema Bwana; wala hutatiwa katika mkono wa watu unaowaogopa." Yer. 39:17

Watu waaminifu wa Bwana wanapoteswa kwa ajili yake, watapata jumbe tamu za upendo kutoka kwake mwenyewe, na nyakati nyingine watakuwa na habari njema kwa wale wanaowahurumia na kuwasaidia. Ebed-meleki alikuwa Mkushi tu aliyedharauliwa, lakini alimtendea Yeremia wema, kwa hiyo Bwana akampelekea ahadi hii ya pekee kwa kinywa cha nabii wake. Na tuwe wenye kuwakumbuka daima watumishi wa Mungu wanaoteswa, naye atatupa thawabu.

Ebed-meleki angeokolewa na wale watu ambao aliogopa kisasi chao. Alikuwa mtu mnyenyekevu mweusi, lakini Yehova angemtunza. Maelfu waliuawa na Wakaldayo, lakini Mnegro huyu mnyonge hakuweza kudhuriwa. Sisi nasi twaweza kuwaogopa baadhi ya wakuu walio na uchungu juu yetu; lakini tukiwa tumekuwa waaminifu kwa kusudi la Bwana katika saa ya mateso, yeye atakuwa mwaminifu kwetu. Baada ya yote, mtu aweza kufanya nini bila ruhusa ya Bwana? Yeye hutia lijamu katika kinywa cha ghadhabu, na hatamu juu ya kichwa cha nguvu. Na tumche Bwana, wala hatutakuwa na mwingine wa kumwogopa. Hakuna kikombe cha maji baridi kinachotolewa kwa nabii wa Mungu aliyedharauliwa kitakachokosa thawabu yake; nasi tukisimama upande wa Yesu, Yesu atasimama upande wetu.

Julai 6

UPENDO WAKE; KIPAWA CHAKE; MWANAWE

"Kwa maana jinsi hii Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele." Yn. 3:16

Katika nyota zote za angani, nyota ya kaskazini ndiyo iliyo na faida zaidi kwa mwanamaji. Andiko hili ni nyota ya kaskazini, kwa maana limeziongoza nafsi nyingi zaidi kwenye wokovu kuliko andiko lingine lolote. Miongoni mwa ahadi ni kama vile Dubu Mkuu alivyo miongoni mwa makundi ya nyota.

Maneno kadha ndani yake yang'aa kwa mwangaza wa pekee. Hapa tuna upendo wa Mungu, wenye "jinsi hii" ndani yake, ionyeshayo ukuu wake usiopimika. Kisha tuna kipawa cha Mungu katika uhuru na ukuu wake wote. Hiki nacho ni Mwana wa Mungu, kile kipawa cha pekee kisicho na kifani cha upendo ambao usingeweza kamwe kujidhihirisha kikamilifu hata Mzaliwa-pekee wa Mbingu alipokwisha tumwa aje kuishi na kufa kwa ajili ya wanadamu. Mambo haya matatu yamejaa nuru.

Kisha kuna sharti rahisi la kuamini, ambalo kwa neema huelekeza njia ya wokovu iliyowafaa watu wenye hatia. Hili linaungwa mkono kwa maelezo mapana -- "kila mtu amwaminiye." Wengi wamepata nafasi katika neno "kila mtu" ambao wangalijiona wametengwa nje kwa neno lililo finyu zaidi. Kisha huja ile ahadi kuu, ya kwamba wamwaminio Yesu hawatapotea, bali watakuwa na uzima wa milele. Hili ni la kutia moyo kwa kila mtu ahisiye kwamba yu tayari kupotea, na kwamba hawezi kujiokoa mwenyewe. Twamwamini Bwana Yesu, nasi tuna uzima wa milele.

Julai 7

KWAYA YA MILIMANI

"Imbeni, enyi mbingu; ufurahi, Ee nchi; pazeni sauti ya kuimba, enyi milima; kwa maana Bwana amewafariji watu wake, naye atawahurumia watu wake walioteswa." Isa. 49:13

Faraja za Bwana ni tamu hivi, hata si watakatifu wenyewe tu waziimbao, bali hata mbingu na nchi zaweza kuuimba wimbo. Yataka jambo kubwa kuufanya mlima uimbe; na hata hivyo nabii huyaita kwaya kubwa yao. Lebanoni, na Sirioni, na milima mirefu ya Bashani na Moabu, angeiweka yote kuimba kwa sababu ya neema ya Yehova kwa Sayuni wake mwenyewe. Je! Sisi nasi hatuwezi kuifanya milima ya magumu, na ya majaribu, na ya siri, na ya taabu iwe sababu za sifa kwa Mungu wetu? "Pazeni sauti ya kuimba, enyi milima!"

Neno hili la ahadi, ya kwamba Mungu wetu atawahurumia watu wake walioteswa, lina mvumo mzima wa kengele ulioambatana nalo. Sikilizeni muziki wao -- "Imbeni!" "Furahini!" "Pazeni sauti ya kuimba." Bwana angependa watu wake wawe na furaha kwa sababu ya upendo wake usiokoma. Hangependa tuwe na huzuni na mashaka; hutaka kwetu ibada ya mioyo iaminio. Yeye hawezi kutupungukia: mbona basi tuugue au kununa kana kwamba yeye angefanya hivyo? Ee, laiti tungekuwa na kinubi kilichonyooshwa vema! Ee, laiti tungekuwa na sauti kama zile za makerubi mbele ya kiti cha enzi!

Julai 8

KAMBI YA MALAIKA

"Malaika wa Bwana hufanya kituo, akiwazungukia wamchao, huwaokoa." Zab. 34:7

Hatuwezi kuwaona malaika, lakini yatosha kwamba wao waweza kutuona sisi. Yuko Malaika mmoja mkuu wa Agano, ambaye ijapokuwa hatukumwona twampenda, na jicho lake li juu yetu daima mchana na usiku. Yeye ana jeshi la watakatifu chini yake, naye huwafanya hao kuwa walinzi juu ya watakatifu wake na kuwahifadhi na kila uovu. Kama pepo watutendea madhara, wenye kung'aa hutuhudumia. Angalia kwamba Bwana wa malaika haji na kuondoka, wala hatutembelei kwa kupita tu, bali yeye na majeshi yake hufanya kambi kutuzunguka. Makao makuu ya jeshi la wokovu yako pale waishipo wale ambao tumaini lao li katika Mungu aliye hai. Kambi hii huwazunguka waaminifu, hata wasiweze kushambuliwa kutoka upande wowote isipokuwa adui aweze kuvunja maboma ya Bwana wa malaika. Tuna ulinzi usiotikisika, ukesha wa daima. Tukiwa tumewekewa walinzi na wajumbe wa Mungu, hatutashtukizwa na mashambulizi ya ghafula, wala hatutamezwa na majeshi yenye kutushinda nguvu. Wokovu umeahidiwa katika mstari huu -- wokovu kwa mkono wa Akida mkuu wa wokovu wetu, na wokovu huo tutaupata tena na tena hata vita vyetu vitakapotimizwa nasi tuubadilishe uwanja wa mapigano kwa makao ya pumziko.

Julai 9

MWAMINIFU NA MWENYE MANUFAA

"Macho yangu yatawaelekea waaminifu wa nchi, wapate kukaa nami; yeye aendaye kwa njia iliyo kamili, ndiye atakayenitumikia Zab. 101:6

Kama Daudi alinena hivi, twaweza kuwa na hakika kwamba Mwana wa Daudi atakuwa na nia iyo hiyo. Yesu huwatafuta watu waaminifu, naye huwakazia macho yake, ili kuwaangalia, kuwaendeleza, kuwatia moyo, na kuwapa thawabu. Mtu mwenye moyo wa kweli asifikiri kwamba amesahauliwa; Mfalme mwenyewe ana jicho lake juu yake.

Kuna matokeo mawili ya kuangaliwa huku na Mfalme. Kwanza twasoma, "wapate kukaa nami." Yesu huwaleta waaminifu nyumbani mwake, huwaweka katika jumba lake la kifalme, huwafanya kuwa wenzake, hufurahia ushirika wao. Ni lazima tuwe waaminifu kwa Bwana wetu, naye ndipo atakapojidhihirisha kwetu. Uaminifu wetu utakapotugharimu zaidi ndipo utakapolipwa thawabu iliyo bora zaidi; watu wanavyozidi kutukataa kwa ukali, ndivyo Bwana wetu atakavyozidi kutupokea kwa furaha.

Tena, husema juu ya mtu mnyofu, "atanitumikia." Yesu atawatumia kwa utukufu wake mwenyewe wale wanaozidharau hila za sera, na walio waaminifu kwake mwenyewe, na Neno lake, na Msalaba wake. Hawa watakuwa katika msafara wake wa kifalme, watumishi wanaoheshimiwa wa Enzi yake. Ushirika na manufaa ndizo mishahara ya uaminifu. Bwana, nifanye mwaminifu, ili nipate kukaa nawe, na kukutumikia.

Julai 10

IPENDE KANISA

"Wewe utasimama, utaihurumia Sayuni; maana wakati wa kumrehemu umewadia; naam, wakati ulioamriwa umekuja. Kwa kuwa watumishi wako wanazipenda mawe zake, wanaihurumia mavumbi yake." Zab. 102:13, 14

Naam, maombi yetu kwa ajili ya kanisa yatasikiwa. Wakati ulioamriwa umekuja. Twapenda mkutano wa maombi, na shule ya Jumapili, na ibada zote za nyumba ya Bwana. Tumefungwa mioyoni na watu wote wa Mungu, na twaweza kusema kwa kweli, "Hakuna mwana-kondoo katika kundi lako lote ambaye ningekataa kumlisha; hakuna adui ambaye mbele ya uso wake ningeogopa kulitetea kusudi lako."

Kama huu ndio wazo la watu wote, karibuni tutafurahia nyakati za kuburudishwa mbele za uso wa Bwana. Makusanyiko yetu yatajaa, watakatifu watahuishwa, na wenye dhambi watageuzwa. Haya yaweza kuja tu kwa rehema ya Bwana; lakini yatakuja, nasi twaamriwa kuyatazamia. Wakati, wakati ulioamriwa, umekuja. Na tujitahidi. Na tupende kila jiwe la Sayuni yetu, ijapokuwa laweza kuwa limeanguka chini. Na tuithamini kweli iliyo ndogo kuliko zote, agizo lililo dogo kuliko yote, mwaminifu aliye mdogo kuliko wote, ijapokuwa wengine waweza kuwadharau kama mavumbi tu. Tunapoihurumia Sayuni, Mungu yu karibu kuihurumia. Tunapoipendezea kazi ya Bwana, Bwana mwenyewe ataipendezea.

Julai 11

HATUTATENGWA NA MUNGU KAMWE

"Naye kila aishiye na kuniamini hatakufa kabisa hata milele. Je! Wasadiki hayo?" Yn. 11:26

Naam, Bwana, twayasadiki; hatutakufa kamwe. Nafsi yetu yaweza kutengwa na mwili wetu, na hii ni namna moja ya mauti; lakini nafsi yetu haitatengwa kamwe na Mungu, ambako ndiko mauti ya kweli -- mauti iliyotishwa juu ya dhambi -- adhabu ya mauti iliyo mbaya kuliko yote iwezayo kutokea. Twayasadiki haya kwa hakika kamili, kwa maana ni nani atakayetutenga na upendo wa Mungu ulio katika Kristo Yesu Bwana wetu? Sisi ni viungo vya Mwili wa Kristo; je! Kristo atapoteza sehemu za mwili wake? Tumeolewa na Yesu; je! Yeye atafiwa na kuwa mjane? Haiwezekani. Kuna uzima ndani yetu usioweza kutengwa na Mungu; naam, na Roho Mtakatifu akaa ndani yetu, tena tutawezaje kufa? Yesu mwenyewe ndiye uzima wetu, na kwa hiyo hakuna kufa kwetu, kwa maana yeye hawezi kufa tena. Ndani yake tulikufa kwa dhambi mara moja, na hukumu ya kifo haiwezi kutekelezwa mara ya pili. Sasa twaishi, na twaishi milele. Thawabu ya haki ni uzima wa milele, nasi hatuna kitu kilicho pungufu ya haki ya Mungu, na kwa hiyo twaweza kudai thawabu iliyo kuu kabisa.

Tukiishi na kuamini, twaamini kwamba tutaishi na kufurahia. Kwa hiyo twasonga mbele kwa uhakika kamili kwamba uzima wetu u salama ndani ya Kichwa chetu kilicho hai.

Julai 12

NANI, LINI, NA JINSI YA KUOKOA

"Basi Bwana anajua kuwaokoa watauwa na majaribu, na kuwaweka wasio haki katika hali ya adhabu hata siku ya hukumu." 2 Pet. 2:9

Watauwa hujaribiwa na kupimwa. Ile si imani ya kweli isiyotiwa katika kipimo kamwe. Lakini watauwa huokolewa katika majaribu yao, tena si kwa bahati, wala kwa vyombo vya pili, bali kwa Bwana mwenyewe. Yeye binafsi hujitwika kazi ya kuwaokoa wale wanaomtumaini. Mungu huwapenda watauwa au wanaomfanana Mungu, naye hufanya kuwa jambo la maana kujua walipo, na hali yao ni namna gani.

Nyakati nyingine njia yao huonekana kama kizungu-mzungu, wala hawawezi kufikiri watakavyookoka na hatari iliyowatisha. Wasiyoyajua wao, Bwana wao huyajua. Yeye anajua wa kumwokoa, na wakati wa kuokoa, na jinsi ya kuokoa. Huokoa kwa njia iliyo na faida zaidi kwa watauwa, na yenye kumponda zaidi mjaribu, na yenye kumtukuza zaidi yeye mwenyewe. Twaweza kumwachia Bwana lile "jinsi," na kutosheka kufurahi katika hakika ya kwamba yeye, kwa njia moja au nyingine, atawaleta watu wake wenyewe kupitia hatari zote, na majaribu, na vishawishi vya maisha haya ya kufa, hata mkono wake wa kuume katika utukufu.

Siku hii sina haki ya kuchungulia siri za Bwana wangu, bali kungoja kwa saburi wakati wake, nikijua hili, ya kwamba ingawa mimi sijui neno lolote, Baba yangu wa mbinguni anajua.

Julai 13

KUTUMAINI KABISA

"Kwa maana hakika nitakuokoa, wala hutaanguka kwa upanga, bali maisha yako yatakuwa nyara kwako; kwa sababu umeniamini mimi, asema Bwana." Yer. 39:18

Angalia nguvu ya kuhifadhi ya kumtumaini Mungu. Wakuu wa Yerusalemu walianguka kwa upanga, lakini Ebed-meleki maskini alikuwa salama, kwa maana tumaini lake lilikuwa katika Yehova. Ni wapi pengine ambapo mtu angemtumaini isipokuwa kwa Muumba wake? Ni upumbavu kwetu tunapomstahi kiumbe kuliko Muumba. Ee, laiti tungeweza katika mambo yote kuishi kwa imani, ndipo tungeokolewa katika kila wakati wa hatari! Hakuna mtu aliyewahi kumtumaini Bwana bure, wala hakuna atakayefanya hivyo kamwe.

Bwana asema, "Hakika nitakuokoa." Angalia lile "hakika" la Kimungu. Yajapokuwa mambo mengine yasiyo na hakika, utunzaji wa Mungu juu ya waaminio ni wa hakika. Mungu mwenyewe ndiye mlinzi wa wenye neema. Chini ya bawa lake takatifu kuna usalama hata wakati kila hatari imesambaa nje. Je! Twaweza kuikubali ahadi hii kuwa ya hakika? Basi katika dhiki yetu ya sasa tutaona kwamba yasimama imara. Twatumaini kuokolewa kwa sababu tuna rafiki, au kwa sababu tuna busara, au kwa sababu twaweza kuona dalili za matumaini; lakini hakuna kimoja katika hivi kilicho chema hata nusu kama neno rahisi la Mungu, "kwa sababu umeniamini mimi." Ndugu msomaji, jaribu njia hii, na, ukiijaribu, utaishika maisha yako yote. Ni tamu kama vile ilivyo ya hakika.

Julai 14

MIZIGO ITWIKWE KWAKE

"Umtwike Bwana mzigo wako, naye atakutegemeza; hatamwacha mwenye haki aondoshwe milele." Zab. 55:22

Ni mzigo mzito, uviringishe juu ya Mwenyezi. Ni mzigo wako sasa, nao wakuponda; lakini Bwana atakapoutwaa, hatauona kuwa kitu. Ukiitwa bado kuuchukua, "yeye atakutegemeza." Utakuwa juu yake, wala si juu yako. Utategemezwa chini yake hata mzigo utakuwa baraka. Mlete Bwana katika jambo hilo, nawe utasimama wima chini ya kile ambacho chenyewe kingekuinamisha.

Hofu yetu iliyo mbaya kuliko zote ni kwamba jaribu letu lisije likatuondoa katika njia ya wajibu; lakini hili Bwana hatalikubali kamwe. Tukiwa wenye haki mbele yake, hatavumilia dhiki yetu ituondoe katika kusimama kwetu. Katika Yesu hutupokea kama wenye haki, na katika Yesu atatuweka hivyo.

Namna gani juu ya saa hii ya sasa? Je! Waenda nje kwa jaribu la siku hii peke yako? Je! Mabega yako maskini yatakwaruzwa tena kwa mzigo wenye kukandamiza? Usiwe mpumbavu hivyo. Mwambie Bwana yote juu ya huzuni yako, na kumwachia. Usiutue mzigo wako chini, kisha kuutwaa tena; bali uuviringishe juu ya Bwana, na kuuacha hapo. Ndipo utakapotembea kwa upana, mwaminifu mwenye furaha asiye na mzigo, ukiimba sifa za Mchukua-mizigo wako mkuu.

Julai 15

MWENYE KUOMBOLEZA AFARIJIWA

"Heri wenye huzuni; maana hao watafarijiwa." Mt. 5:4

Kwa bonde la kilio twaifikia Sayuni. Mtu angedhani kuomboleza na kubarikiwa vilikuwa vinapingana, lakini Mwokozi mwenye hekima isiyo na kikomo aviunganisha pamoja, katika heri hii. Alichokiunganisha yeye mtu asikitenganishe. Kuomboleza kwa ajili ya dhambi -- dhambi zetu wenyewe, na dhambi za wengine -- ndiyo muhuri wa Bwana aliouweka juu ya waaminifu wake. Roho ya neema itakapomwagwa juu ya nyumba ya Daudi, au nyumba nyingine yoyote, wataomboleza. Kwa kuomboleza kutakatifu twapokea zilizo bora za baraka zetu, kama vile bidhaa adimu kuliko zote zitujiavyo kwa maji. Si kwamba mwenye kuomboleza atabarikiwa siku ijayo tu, bali Kristo humwita heri hata sasa.

Roho Mtakatifu kwa hakika ataifariji mioyo ile iombolezayo kwa ajili ya dhambi. Watafarijiwa kwa kutiwa kwa damu ya Yesu, na kwa nguvu ya kusafisha ya Roho Mtakatifu. Watafarijiwa kwa habari ya dhambi izidiyo ya mji wao na ya kizazi chao kwa hakika ya kwamba Mungu atajitukuza mwenyewe, hata wanadamu wamwasi kadiri gani. Watafarijiwa kwa tumaini la kwamba watawekwa huru kabisa na dhambi kabla ya muda mrefu, na karibuni watachukuliwa juu wakae milele katika uwepo wenye utukufu wa Bwana wao.

Julai 16

NENO KWA YEYE ACHECHEMEAYE

"Nami nitamwokoa yeye achechemeaye." Sef. 3:19

Wako wengi wa hawa vilema, wanaume kwa wanawake. Waweza kukutana na "yeye achechemeaye" mara ishirini katika saa moja. Wamo katika njia iliyo sawa, na wana shauku sana kupiga mbio ndani yake kwa bidii, lakini ni vilema, na hufanya mwendo wa kusikitisha. Katika njia ya mbinguni wako viwete wengi. Yaweza kuwa husema mioyoni mwao -- Tutakuwaje sisi? Dhambi itatupata, Shetani atatuangusha chini. Tayari-kuchechemea ndilo jina letu na tabia yetu; Bwana hawezi kutufanya askari wema kamwe, wala hata wajumbe wepesi wa kwenda katika shughuli zake. Vema, vema! Yeye atatuokoa, na hilo si jambo dogo. Asema, "Nami nitamwokoa yeye achechemeaye." Katika kutuokoa atajitukuza mwenyewe sana. Kila mmoja atauliza -- Alifanyaje mwanamke huyu kilema kupiga mbio na kuipata taji? Ndipo sifa yote itakapotolewa kwa neema iliyo yenye uweza.

Bwana, ijapokuwa nachechemea katika imani, katika maombi, katika sifa, katika utumishi, na katika saburi, uniokoe, nakusihi! Wewe peke yako ndiwe uwezaye kumwokoa kilema kama mimi nilivyo. Bwana, nisiangamie kwa sababu mimi ni miongoni mwa wa mwisho, bali uwakusanye kwa neema yako walio wa polepole kuliko wote katika wasafiri wako -- naam, mimi. Angalia, amesema itakuwa hivyo, kwa hiyo, kama Yakobo, nishindaye katika maombi, naenda mbele ijapokuwa panda la mguu wangu limeharibika.

Julai 17

SHUJAA KWA AJILI YA KWELI

"Lakini watu wamjuao Mungu wao watakuwa hodari, na kutenda mambo makuu." Dan. 11:32

"Bwana ni shujaa wa vita, Yehova ndilo jina lake." Wale wajiandikishao chini ya bendera yake watakuwa na Amiri atakayewazoeza kwa vita, na kuwapa nguvu na ushujaa pia. Nyakati alizoziandikia Danieli zilikuwa za namna mbaya kabisa, na hapo iliahidiwa kwamba watu wa Mungu wangetokea katika rangi zao zilizo bora: wangekuwa hodari na wenye nguvu kumkabili adui mwenye uwezo.

Ee, laiti tungemjua Mungu wetu; nguvu zake, uaminifu wake, upendo wake usiobadilika, ili tuwe tayari kuhatarisha kila kitu kwa ajili yake. Yeye ni Yule ambaye tabia yake huamsha shauku yetu, na kutufanya tuwe tayari kuishi na kufa kwa ajili yake. Ee, laiti tungemjua Mungu wetu kwa ushirika wa karibu naye; kwa maana ndipo tutakapofanana naye, na kuwa tayari kusimama kwa ajili ya kweli na haki. Yeye atokaye mbele kwa mpya toka kuutazama uso wa Mungu hataogopa kamwe uso wa mwanadamu. Tukikaa naye, tutaipata roho ya kishujaa, na kwetu ulimwengu wa adui utakuwa kama tone la ndoo tu. Jeshi kubwa lisilohesabika la watu, au hata la pepo, litaonekana dogo kwetu kama vile mataifa yalivyo mbele za Mungu, naye huyahesabu kama nzige tu. Ee, laiti tungekuwa mashujaa kwa ajili ya kweli katika siku hii ya uongo.

Julai 18

USHIRIKA WA NYIKANI

"Basi, angalia, nitambembeleza, nami nitamleta nyikani, nikaseme naye kwa maneno ya kumfariji moyo." Hosea 2:14

Wema wa Mungu hutuona tumebembelezwa na dhambi, nao huazimu kujaribu juu yetu vishawishi vyenye uwezo zaidi vya upendo. Je! Hatukumbuki wakati ule ambapo Mpenda-nafsi zetu alipoturogo kwanza na kutuvuta mbali na uzuri wa udanganyifu wa ulimwengu? Atafanya hivi tena na tena kila aonapo tuko karibu kunaswa na uovu.

Aahidi kututenga kando, kwa maana huko ndiko awezako kutushughulikia vema zaidi, na mahali hapa palipotengwa hapatakuwa Paradiso, bali nyika, kwa kuwa mahali kama hapo hapatakuwa na kitu cha kuvuta nadhari zetu mbali na Mungu wetu. Katika majangwa ya dhiki uwepo wa Bwana huwa kila kitu kwetu, nasi twathamini ushirika wake zaidi ya thamani yoyote tuliyoiweka juu yake tulipokaa chini ya mzabibu wetu wenyewe na mtini katika kikundi cha wenzetu. Upweke na dhiki huwaleta wengi zaidi kwao wenyewe na kwa Baba yao wa mbinguni kuliko njia nyingine yoyote.

Alipotubembeleza na kututenga hivyo, Bwana ana mambo mateule ya kutuambia kwa faraja yetu. Yeye "husema na moyo wetu," kama neno la asili lisemavyo. Ee, laiti kwa hili tungepata ahadi hii kufafanuliwa katika uzoefu wetu! Tukibembelezwa na upendo, kutengwa kwa jaribu, na kufarijiwa na Roho ya kweli, na tumjue Bwana na kuimba kwa furaha!

Julai 19

VIATU VYA KAZI NZITO

"Makufuli yako yatakuwa chuma na shaba; na kama zilivyo siku zako, ndivyo zitakavyokuwa nguvu zako." Kumb. 33:25

Hapa kuna vitu viwili vilivyoandaliwa kwa msafiri: viatu na nguvu.

Kwa habari ya viatu: ni vya lazima sana kwa kusafiri katika njia zenye mawe, na kwa kuwakanyaga adui walioleta mauti. Hatutakwenda peku -- hili halingewafaa wana wa damu ya kifalme. Viatu vyetu havitakuwa kabisa vya namna ya kawaida, kwa maana vitakuwa na nyayo za madini yenye kudumu, ambayo hayatachakaa hata safari ikiwa ndefu na ngumu. Tutakuwa na hifadhi iliyolingana na mahitaji ya njia na ya vita. Kwa hiyo na tuandamane mbele kwa ujasiri, tusiogope madhara hata tukikanyaga nyoka, au kuweka mguu wetu juu ya joka mwenyewe.

Kwa habari ya nguvu: zitaendelezwa kadiri ya kuendelea kwa siku zetu, nazo zitalingana na mkazo na mzigo wa siku hizo. Maneno ni machache, "kama zilivyo siku zako, ndivyo zitakavyokuwa nguvu zako," lakini maana yake imejaa. Siku hii twaweza kutazamia jaribu, na kazi itakayohitaji nguvu, lakini twaweza kwa uhakika uo huo kutazamia nguvu zilizolingana. Neno hili lililotolewa kwa Asheri hutolewa kwetu nasi tulio na imani ya kulitwaa liwe letu. Na tuinuke tufike kwenye ujasiri mtakatifu ambao umeundwa kuuamsha ndani ya moyo uaminio.

Julai 20

KUMTAZAMIA YEYE

"Kwa hao wamtazamiao atatokea mara ya pili, pasipo dhambi, apate kuwaokoa." Ebr. 9:28

Hili ndilo tumaini letu. Yeye ambaye tumekwisha mtazama kama aliyekuja mara moja kuzichukua dhambi za watu wengi, atakuwa na kutokea kwingine kwa wana wa watu; hili ni tarajio la furaha lenyewe. Lakini kutokea kule kwa mara ya pili kuna alama fulani za pekee zinazokutukuza sana.

Bwana wetu atakuwa amemaliza shughuli ya dhambi. Ameiondoa hivyo kutoka kwa watu wake, na ameichukua adhabu yake kwa uthabiti hivyo, hata hatakuwa na jambo lolote nayo katika kuja kwake mara ya pili. Hatatoa sadaka ya dhambi, kwa maana atakuwa ameiondoa dhambi kabisa.

Bwana wetu ndipo atakapotimiza wokovu wa watu wake. Wataokolewa kabisa na kikamilifu, nao katika kila jambo watafurahia utimilifu wa wokovu huo. Yeye haji kuchukua matokeo ya makosa yetu, bali kuleta matokeo ya utii wake; si kuondoa hukumu yetu, bali kutimiza wokovu wetu.

Bwana wetu hivyo hutokea kwa wale tu wamtazamiao. Hataonekana katika hali hii na watu ambao macho yao yamepofushwa kwa ubinafsi na dhambi. Kwao yeye atakuwa Hakimu mwenye kutisha, wala si zaidi. Ni lazima kwanza tumtazame yeye, kisha tumtazamie yeye; na katika hali zote mbili kutazama kwetu kutakuwa uzima.

Julai 21

KUNG'AA KAMA NYOTA NYINGI

"Na walio na hekima watang'aa kama mwangaza wa anga; na hao waongozao wengi kwenye haki watang'aa kama nyota milele na milele." Dan. 12:3

Hapa kuna neno la kuniamsha. Hili lastahili kuishi kwa ajili yake. Kuwa na hekima ni jambo tukufu lenyewe: mahali hapa larejea hekima ya Kimungu ambayo Bwana mwenyewe peke yake awezaye kuitoa. Ee, laiti ningejijua mwenyewe, Mungu wangu, Mwokozi wangu! Nifundishwe kwa njia ya Kimungu hivi hata nipate kuitekeleza kweli ya mbinguni, na kuishi katika nuru yake! Je! Maisha yangu ni ya hekima? Je! Natafuta kile ninachopaswa kutafuta? Je! Naishi kama nitakavyotamani ningaliishi nitakapokuja kufa? Hekima kama hii peke yake ndiyo iwezayo kunipatia mwangaza wa milele kama ule wa anga lililojaa jua.

Kuwa mvuvi wa nafsi ni ustawi wenye utukufu. Ningehitaji kuwa na hekima ikiwa nitamgeuza hata mmoja kwenye haki; zaidi sana ikiwa nitawageuza wengi. Ee, laiti ningekuwa na maarifa ya Mungu, ya watu, ya Neno, na ya Kristo, yatakayoniwezesha kuwageuza wenzangu wanadamu, na kuwageuza kwa idadi kubwa! Ningejitoa katika jambo hili, wala nisipumzike kamwe hata niifikilize. Hili litakuwa bora kuliko kushinda nyota katika ikulu. Hili litanifanya kuwa nyota, nyota ing'aayo, nyota ing'aayo milele na milele; naam, zaidi, litanifanya kung'aa kama nyota nyingi. Nafsi yangu, jiamshe! Bwana, unihuishe!

Julai 22

AHADI YA MILELE

"Nami nitakuposa uwe wangu milele; naam, nitakuposa uwe wangu kwa haki, na kwa hukumu, na kwa ufadhili, na kwa rehema. Nitakuposa uwe wangu kwa uaminifu; nawe utamjua Bwana." Hosea 2:19, 20

Kuposwa kwa Bwana! Heshima na furaha iliyoje! Nafsi yangu, je! Yesu ni wako kweli kwa kuposwa kwake mwenyewe kwa kujishusha? Basi, angalia, ni kwa milele. Hatavunja kamwe uchumba wake, sembuse kudai talaka juu ya nafsi iliyoungwa naye katika vifungo vya ndoa.

Mara tatu Bwana asema, "Nitakuposa uwe wangu." Ni maneno yaliyoje aliyoyakusanya pamoja ili kuonyesha uchumba! Haki huja ili kulifanya agano kuwa halali; hakuna awezaye kuzuia matangazo haya halali. Hukumu huidhinisha muungano huu kwa amri yake: hakuna awezaye kuona upumbavu au kosa katika ndoa hii. Ufadhili huhakikisha kwamba huu ni muungano wa upendo, kwa maana pasipo upendo uchumba ni utumwa, wala si heri. Wakati huohuo, rehema hutabasamu, na hata huimba; naam, hujizidisha kuwa "rehema," kwa sababu ya neema iliyozidi ya muungano huu mtakatifu.

Uaminifu ndio mwandishi, naye huiandika ndoa, na Roho Mtakatifu husema "Amina" juu yake, akiahidi kuufundisha moyo ulioposwa maarifa yote matakatifu yanayohitajika kwa kusudi lake tukufu. Ahadi iliyoje!

Julai 23

KUTOKUMBUKWA KABISA

"Na dhambi zao na uovu wao sitawakumbuka tena kabisa." Ebr. 10:17

Kwa mujibu wa agano hili la neema Bwana huwatendea watu wake kana kwamba hawakutenda dhambi kamwe. Kwa kweli, husahau makosa yao yote. Dhambi za kila namna huzitendea kama kwamba hazikuwako kamwe; kana kwamba zimefutwa kabisa katika kumbukumbu yake. Ee mwujiza wa neema! Mungu hapa hutenda lile ambalo kwa namna fulani haliwezekani kwake. Rehema yake hutenda miujiza inayozidi sana miujiza mingine yote.

Mungu wetu huipuuza dhambi yetu sasa kwa kuwa dhabihu ya Yesu imethibitisha agano. Twaweza kufurahi ndani yake pasipo hofu kwamba atachochewa kuwa na ghadhabu juu yetu kwa sababu ya maovu yetu. Angalia! Yeye hutuweka miongoni mwa wana; hutupokea kama wenye haki; hufurahia sisi kana kwamba tu watakatifu kikamilifu. Hata hutuweka katika mahali pa kuaminiwa; hutufanya walinzi wa heshima yake, wadhamini wa vito vya taji, mawakili wa injili. Hutuhesabu kuwa tunastahili, na hutupa huduma; huu ndio ushahidi ulio mkuu na wa pekee kabisa kwamba hazikumbuki dhambi zetu. Hata tunapomsamehe adui, tu wazito sana kumtumaini; twaona kuwa si busara kufanya hivyo. Lakini Bwana husahau dhambi zetu, na kutuweka kana kwamba hatukukosea kamwe. Ee nafsi yangu, ahadi iliyoje hii! Iamini na uwe na furaha.

Julai 24

USAFI KAMILI

"Yeye ashindaye atavikwa mavazi meupe." Ufu. 3:5

Shujaa wa msalaba, pigana mbele! Usipumzike kamwe hata ushindi wako uwe kamili, kwa maana thawabu yako ya milele itastahili maisha ya vita.

Angalia, hapa kuna usafi kamili kwa ajili yako! Wachache katika Sardi walizihifadhi nguo zao pasipo unajisi, na malipo yao ni kuwa wasio na doa. Utakatifu kamili ndio zawadi ya mwito wetu wa juu, na tusiukose.

Angalia, hapa kuna furaha! Utavaa mavazi ya sikukuu, kama yale watu wavaayo katika karamu za arusi; utavikwa uchangamfu, na kufanywa mng'avu kwa kushangilia. Mapigano yenye maumivu yataisha katika amani ya dhamiri, na furaha katika Bwana.

Angalia, hapa kuna ushindi! Utakuwa na ushindi wako. Tawi la mtende, na taji, na vazi jeupe vitakuwa ujira wako; utatendewa kama mshindi, na kukubaliwa kuwa hivyo na Bwana mwenyewe.

Angalia, hapa kuna mavazi ya kikuhani! Utasimama mbele za Bwana katika mavazi kama yale wana wa Haruni waliyovaa; utatoa dhabihu za shukrani, na kumkaribia Bwana kwa uvumba wa sifa.

Ni nani asingepigana kwa ajili ya Bwana atoaye heshima kubwa hivyo kwa aliye mdogo kuliko wote wa watumishi wake waaminifu? Ni nani asingevikwa vazi la mpumbavu kwa ajili ya Kristo, akiona kwamba atatuvika utukufu?

Julai 25

HAKUNA LA KUTUTIA HOFU

"Lakini enenda zako hata mwisho utakapokuwa; maana utastarehe, nawe utasimama katika kura yako mwisho wa siku hizo." Dan. 12:13

Hatuwezi kuzifahamu unabii wote, lakini hata hivyo twautazama kwa furaha, wala si kwa fadhaa. Hakuwezi kuwa na kitu katika amri ya Baba kinachopaswa kumtia hofu mtoto wake kwa haki. Ijapokuwa chukizo la uharibifu litawekwa, hata hivyo mwaminio wa kweli hatatiwa unajisi; bali atatakaswa, na kufanywa mweupe, na kujaribiwa. Ijapokuwa dunia itateketezwa, harufu ya moto haitawajia wateule. Katikati ya mvurugiko wa mata, na uharibifu wa dunia, Bwana Yehova atawahifadhi walio wake.

Tukiwa na azimio la utulivu katika wajibu, hodari katika mapigano, wenye saburi katika mateso, na tuende zetu, tukishika njia yetu, wala tusigeuke kutoka kwake wala kukawia ndani yake. Mwisho utakuja; na tuende zetu hata utakapokuja.

Pumziko litakuwa letu. Vitu vingine vyote hutikisika huku na huku, lakini msingi wetu wasimama imara. Mungu hupumzika katika upendo wake, na kwa hiyo, sisi twapumzika ndani yake. Amani yetu ni, na itakuwa daima, kama mto. Kura katika Kanaani ya mbinguni ni yetu, nasi tutasimama ndani yake, ije yaliyo yote. Mungu wa Danieli atawapa fungu linalostahili wote wanaothubutu kuwa na msimamo kwa ajili ya kweli na utakatifu kama Danieli alivyokuwa. Hakuna tundu la simba litakalotunyang'anya urithi wetu ulio hakika.

Julai 26

KUBADILISHWA KWA JINA

"Tena itakuwa siku hiyo, asema Bwana, utaniita Ishi; wala hutaniita tena Baali; kwa maana nitayaondoa majina ya Mabaali vinywani mwao, wala hawatakumbukwa tena kwa majina yao." Hosea 2:16, 17

Siku hiyo imekuja. Hatumtazami tena Mungu wetu kama Baali, bwana wetu dhalimu na mkuu mwenye uwezo, kwa maana hatuko chini ya sheria, bali chini ya neema. Sasa twamfikiri Yehova, Mungu wetu, kama Ishi wetu, mume wetu mpendwa, bwana wetu katika upendo, jamaa yetu wa karibu katika vifungo vya uhusiano mtakatifu. Hatumheshimu kidogo, bali twampenda zaidi. Hatumtumikii kwa utii kidogo, bali twamtumikia kwa sababu iliyo kuu na yenye kupendeza zaidi. Hatutetemeki tena chini ya mjeledi wake, bali twafurahi katika upendo wake. Mtumwa amebadilishwa kuwa mwana, na kazi imebadilishwa kuwa raha.

Je! Ni hivyo kwako, ndugu msomaji? Je! Neema imeitupa nje hofu ya kitumwa na kuupanda upendo wa kibinafsi wa mwana? Tuna furaha iliyoje katika uzoefu kama huu! Sasa twaiita Siku ya Bwana furaha, na ibada haichoshi kamwe. Maombi sasa ni pendeleo, na sifa ni sikukuu. Kutii ni Mbinguni; kutoa kwa kusudi la Mungu ni karamu. Hivyo vitu vyote vimekuwa vipya. Kinywa chetu kimejaa kuimba, na moyo wetu muziki. Na abarikiwe Ishi wetu wa mbinguni milele na milele.

Julai 27

ZAIDI YA MANENO MATUPU

"Nitawapa ninyi rehema takatifu za Daudi zilizo za hakika." Mdo. 13:34

Hakuna cha mwanadamu kilicho cha hakika; lakini kila kitu cha Mungu ni cha hakika. Hasa rehema za agano ni rehema zilizo za hakika, kama vile Daudi alivyosema "agano la milele, lililopangwa katika mambo yote, na kuhifadhiwa."

Twana hakika kwamba Bwana alikusudia rehema yake. Hakunena maneno matupu tu: kuna kiini na kweli katika kila mojawapo ya ahadi zake. Rehema zake ni rehema kweli kweli. Hata ahadi ikionekana kana kwamba ni lazima ianguke chini kwa sababu ya mauti, hata hivyo haitaanguka kamwe, kwa maana Bwana mwema atalitimiza neno lake.

Twana hakika kwamba Bwana atawapa rehema alizoahidi wote walio wa agano lake. Zitawajia kwa wakati wake wote wateule wa Bwana. Ni za hakika kwa uzao wote, tangu aliye mdogo kuliko wote hata aliye mkuu kuliko wote.

Twana hakika kwamba Bwana ataendeleza rehema zake kwa watu wake mwenyewe. Yeye hatoi kisha kutwaa tena. Alichotupa ni ishara ya kingi zaidi. Kile ambacho hatujakipokea bado ni cha hakika kama kile ambacho kimekwisha kuja; kwa hiyo, na tungoje mbele za Bwana na kutulia. Hakuna sababu ya haki ya kutia shaka hata kidogo. Upendo wa Mungu, na neno lake, na uaminifu wake ni vya hakika. Mambo mengi yana mashaka, lakini juu ya Bwana twaimba -- "Kwa maana rehema zake zitadumu, waaminifu daima, wa hakika daima."

Julai 28

INAMA CHINI; UINULIWE JUU

"Basi jinyenyekesheni chini ya mkono wa Mungu ulio hodari, ili awakweze kwa wakati wake." 1 Pet. 5:6

Hili ni sawa na ahadi: tukiinama chini, Bwana atatuinua juu. Unyenyekevu huelekeza kwenye heshima: kunyenyekea ndiyo njia ya kukwezwa. Ule mkono wa Mungu unaotushinikiza chini ndio ungojao kutuinua juu tutakapokuwa tayari kuichukua baraka. Twainama ili tushinde. Wengi hunywea mbele ya watu, na hata hivyo hukosa upendeleo wanaotamani; bali yeye ajinyenyekezaye chini ya mkono wa Mungu hatakosa kutajirishwa, kuinuliwa, kutegemezwa, na kufarijiwa na Yule aliye mwenye neema daima. Ni desturi ya Yehova kuwaangusha chini wenye kiburi, na kuwainua juu wanyenyekevu.

Lakini kuna wakati wa kutenda kwa Bwana. Imetupasa sasa kujinyenyekeza, hata katika saa hii ya sasa; nasi twapaswa kuendelea kufanya hivyo Bwana awekapo mkono wake wa kutuadhibu juu yetu au la. Bwana apigapo, ni wajibu wetu wa pekee kuipokea adhabu kwa kunyenyekea kwa kina. Lakini kwa habari ya kukwezwa kwetu na Bwana, hilo laweza kuja tu "kwa wakati wake," na Mungu ndiye hakimu aliye bora zaidi wa siku na saa hiyo. Je! Twalia kwa kukosa saburi tukiitaka baraka? Je! Tungependa heshima isiyo ya wakati wake? Twafanya nini? Hakika hatujanyenyekezwa kweli, la sivyo tungengoja kwa kunyenyekea kwa utulivu. Basi na tufanye hivyo.

Julai 29

YEYE HUMFUKUZA ADUI YETU

"Amemfukuza adui yako." Sef. 3:15

Kulikuwa kufukuzwa kulioje kule! Shetani amepoteza kiti chake cha enzi katika asili yetu kama vile alivyopoteza makao yake Mbinguni. Bwana wetu Yesu ameiharibu nguvu ya adui iliyotutawala. Aweza kutusumbua, lakini hawezi kutudai kuwa wake. Vifungo vyake havipo tena juu ya roho zetu: Mwana ametuweka huru, nasi tu huru kweli kweli.

Bado adui mkuu ndiye mshtaki wa ndugu; lakini hata katika hali hii Bwana wetu amemfukuza. Wakili wetu humnyamazisha mshtaki wetu. Bwana huwakemea adui zetu, na kuitetea nafsi zetu, hata usiwepo madhara yoyote katika matukano yote ya ibilisi.

Kama mjaribu, roho mbaya bado hutushambulia, na kujiingiza katika nia zetu; lakini hata kutoka hapo amefukuzwa hata asiwe na ubora wake wa kwanza. Hujinyonganyonga kama nyoka, lakini hawezi kutawala kama mfalme. Hutupa mawazo ya kukufuru apatapo nafasi; lakini ni faraja iliyoje aambiwapo anyamaze, na kufanywa aondoke kimyakimya kama mbwa aliyechapwa! Bwana, uwafanyie hivi wowote ambao kwa wakati huu wanasumbuliwa na kuchoshwa kwa mabweko yake. Mfukuze adui yao, nawe uwe mtukufu machoni pao. Umemwangusha chini, Bwana umfukuze nje. Ee, laiti ungemwondoa kabisa katika ulimwengu!

Julai 30

AHADI YA KUKUTANA WAKATI UJAO

"Nitawaona tena, na mioyo yenu itafurahi." Yn. 16:22

Hakika atakuja mara ya pili, na ndipo, atakapotuona, na sisi kumwona, patakuwa na kushangilia kweli kweli. Ee, laiti kurudi huko kwenye furaha!

Lakini ahadi hii inatimizwa kila siku kwa maana nyingine. Bwana wetu mwenye neema ana "tena" nyingi katika kutushughulikia kwake. Alitupa msamaha, naye hutuona tena, na kurudia neno la kuachilia dhambi mpya zisababishazo huzuni yetu. Ametufunulia kukubaliwa kwetu mbele za Mungu, na imani yetu katika baraka hiyo iunguapo kidogo, huja kwetu tena na tena, na kusema, "Amani iwe kwenu"; na mioyo yetu hufurahi.

Wapenzi, rehema zetu zote zilizopita ni ishara za rehema zijazo. Kama Yesu amekuwa nasi, atatuona tena. Usiitazame kibali yoyote iliyopita kama kitu kilichokufa na kuzikwa, cha kuombolezwa; bali uihesabu kama mbegu iliyopandwa, itakayoota, na kutokeza kichwa chake juu ya mavumbi, na kulia, "Nitawaona tena." Je! Nyakati ni za giza kwa sababu Yesu hayuko nasi kama alivyokuwa? Na tujipe moyo; kwa maana hatakawia mbali sana. Miguu yake ni kama ya paa au ayala mchanga, nayo itamleta kwetu upesi. Kwa hiyo na tuanze kuwa na furaha, kwa kuwa asema kwetu hata sasa, "Nitawaona tena."

Julai 31

KILIO; WOKOVU

"Uniite siku ya mateso; nitakuokoa, nawe utanitukuza." Zab. 50:15

Hii ni ahadi kweli kweli!

Hapa kuna tukio la haraka -- "siku ya mateso." Ni giza wakati wa adhuhuri katika siku kama hiyo, na kila saa huonekana yenye giza zaidi kuliko ile iliyoitangulia. Ndipo ahadi hii iko katika majira yake: imeandikwa kwa ajili ya siku ya mawingu.

Hapa kuna shauri la kujishusha, "Uniite." Haitupasi kuhitaji himizo hili: ingekuwa desturi yetu ya daima mchana kutwa na kila siku. Rehema iliyoje kuwa na uhuru wa kumwita Mungu! Hekima iliyoje kuutumia vema! Ni upumbavu ulioje kwenda huku na huku kwa watu! Bwana hutualika kuweka shauri letu mbele yake, na hakika hatutasita kufanya hivyo.

Hapa kuna kitia-moyo cha kuhakikisha: "Nitakuokoa." Jaribu liwe lolote, Bwana hafanyi vighairi, bali huahidi wokovu ulio kamili, wa hakika, wenye furaha. Yeye mwenyewe atautimiza wokovu wetu kwa mkono wake mwenyewe. Twaamini hilo, na Bwana huiheshimu imani.

Hapa kuna tokeo la mwisho: "Utanitukuza." Ah! Tutalitenda hilo kwa wingi kupita kiasi. Atakapokwisha kutuokoa tutamsifu kwa sauti kuu; na kwa kuwa yeye ni hakika kulitenda, na tuanze kumtukuza mara moja.