Mwezi wa Mei

Mei 1

AMEJAA NYIMBO

"Milima na vilima vitabubujika kwa kuimba mbele yenu, na miti yote ya kondeni itapiga makofi" Isaya 55:12

Dhambi isamehewapo, huzuni yetu iliyo kubwa hukoma, na furaha yetu iliyo kweli huanza. Furaha ambayo Bwana huwapa wale aliowapatanisha naye ni kuu hata kufurika na kuijaza asili yote furaha. Ulimwengu wa vitu una muziki uliofichika ndani yake, na moyo uliofanywa upya hujua jinsi ya kuutoa na kuufanya usikike. Uumbaji ni kinanda, na mtu mwenye neema huvipata vitufe vyake, huweka mkono wake juu yake, na kuuamsha mfumo wote wa ulimwengu kwa upatano wa sifa. Milima na vilima, na vitu vingine vikubwa, ni, kama kwamba, sauti ya chini ya kwaya; hali miti ya msituni, na vitu vyote vyenye uhai, huuchukua wimbo wa nyimbo tamu.

Neno la Mungu lifanikiwapo kati yetu, na roho zikaokolewa, ndipo kila kitu huonekana kimejaa wimbo. Tusikiapo maungamo ya waaminio wachanga, na ushuhuda wa watakatifu waliofundishwa vema, twafurahishwa hata twapaswa kumsifu Bwana, kisha huonekana kana kwamba miamba na vilima, na misitu na mashamba, vinaitikia sauti zetu za shangwe, na kuugeuza ulimwengu kuwa kikundi cha wachezaji muziki. Bwana, katika siku hii ya furaha ya Mei, uniongoze nitoke katika ulimwengu wako wenye nyimbo nikiwa tajiri wa sifa kama ndege wa mbugani aimbaye kwa nguvu.

Mei 2

KUPANDA KWA KIROHO

"Apandaye kwa Roho atavuna uzima wa milele kwa Roho" Wagalatia 6:8

Kupanda huonekana kama biashara ya hasara, kwa maana twaweka nafaka nzuri ardhini tusiione tena kamwe. Kupanda kwa Roho huonekana jambo la kuwazika tu, la ndoto; kwa maana twajikana wenyewe, na kwa dhahiri hatupati kitu kwa ajili yake. Lakini tukipanda kwa Roho kwa kujitahidi kuishi kwa Mungu, tukitaka kuyatii mapenzi ya Mungu, na kujitoa wenyewe kuikuza heshima yake, hatutapanda bure. Uzima utakuwa thawabu yetu, naam, uzima wa milele. Huu twaufurahia hapa tuingiapo katika kumjua Mungu, na ushirika na Mungu, na kumfurahia Mungu. Uzima huu hutiririka kama mto uzidio kuwa na kina na upana, hata utupeleke katika bahari ya heri isiyo na mwisho, ambako uzima wa Mungu ni wetu milele na milele.

Tusipande leo kwa mwili wetu, kwa maana mavuno yake yatakuwa uharibifu, kwa kuwa mwili huelekea njia hiyo sikuzote; bali kwa kujishinda kwa utakatifu na tuishi kwa ajili ya makusudio yaliyo ya juu, safi, na ya kiroho zaidi, tukitaka kumheshimu Bwana wetu aliye mtakatifu sana kwa kuitii Roho yake iliyo na neema sana. Yatakuwa mavuno makubwa jinsi gani tutakapovuna uzima wa milele! Miganda mingapi ya raha isiyo na mwisho itavunwa! Sherehe iliyoje mavuno hayo yatakayokuwa! Bwana, utufanye wavunaji kama hao, kwa ajili ya Mwanao.

Mei 3

SIKILIZA ISHARA

"Kisha itakuwa, utakaposikia sauti ya kwenda juu ya vilele vya miti ya miforsadi, ndipo ujitahidi; kwa maana wakati huo Bwana atakutangulia mbele yako, kuipiga jeshi la Wafilisti" 2 Samweli 5:24

Kuna ishara za Bwana kutenda ambazo zapaswa kututia nia. Roho wa Mungu huvuma apendako, nasi twaisikia sauti yake. Ndipo wakati wetu wa kuwa macho kuliko wakati wo wote. Twapaswa kuikamata nafasi ile ya dhahabu, na kuitumia kadiri tuwezavyo. Ni juu yetu kupigana na Wafilisti kila wakati; lakini Bwana mwenyewe atutanguliapo, ndipo tuwe hodari zaidi katika vita.

Upepo uliyatikisa mavilele ya miti, naye Daudi na watu wake wakaitwaa hii kuwa ishara ya kushambulia, nao waliposonga mbele Bwana mwenyewe akawapiga Wafilisti. Lo, laiti leo Bwana atupe mwanya wa kunena kwa ajili yake na wengi wa rafiki zetu! Na tuwe macho kuutumia mwanya wa matumaini utakapokuja. Ni nani ajuaye kwamba huenda hii ikawa siku ya habari njema; majira ya kuvuna roho. Na tuweke sikio letu wazi kusikia mvumo wa upepo, na akili zetu tayari kuitii ishara. Je, ahadi hii, "ndipo Bwana atakutangulia mbele yako," si kitia-moyo cha kutosha kufanya uume? Kwa kuwa Bwana hututangulia, hatuthubutu kurudi nyuma.

Mei 4

USHINDI KATIKA MAPIGO

"Usifurahi juu yangu, Ee adui yangu; niangukapo, nitainuka; niketipo gizani, Bwana atakuwa nuru kwangu" Mika 7:8

Haya huenda yakawa hisia ya mtu mume au mke aliyekanyagwa chini na kuonewa. Adui yetu aweza kuizima nuru yetu kwa kitambo. Kuna tumaini la hakika kwetu ndani ya Bwana; na tukiwa twamtumaini yeye, na kushika ukamilifu wetu, majira yetu ya kushushwa chini na giza yatakwisha karibu. Matukano ya adui ni ya kitambo tu. Bwana atageuza kicheko chao kuwa maombolezo karibuni, na kuugua kwetu kuwa kuimba.

Ijapokuwa adui mkuu wa roho angetushinda kwa kitambo, kama alivyowashinda watu walio bora kuliko sisi, hata hivyo na tujipe moyo, kwa maana tutamshinda karibuni. Tutainuka kutoka kuanguka kwetu, kwa kuwa Mungu wetu hakuanguka, naye atatuinua. Hatutakaa gizani, ijapokuwa kwa kitambo twaketi humo; kwa kuwa Bwana wetu ni chemchemi ya nuru, naye atatuletea siku ya furaha karibuni. Tusikate tamaa, wala tusitie shaka. Mzunguko mmoja wa gurudumu na aliye chini kabisa atakuwa juu. Ole wao wachekao sasa, kwa maana wataomboleza na kulia majivuno yao yatakapogeuka kuwa dharau ya milele. Bali heri waombolezao wote watakatifu, kwa maana watafarijiwa kwa Mungu.

Mei 5

KWA NINI KUBAKI MTEKA?

"Bwana, Mungu wako, atakugeuza uteka wako" Kumbukumbu 30:3

Watu wa Mungu mwenyewe waweza kujiuza katika utumwa kwa dhambi. Hili ni tunda chungu mno, la shina lililo chungu kupita kiasi. Ni utumwa ulioje mtoto wa Mungu auzwapo chini ya dhambi, akishikwa minyororo na Shetani, akinyang'anywa uhuru wake, akiibiwa nguvu zake katika kuomba, na furaha yake katika Bwana! Na tuangalie tusije tukaingia katika utumwa kama huo; lakini kama hili limekwisha kutupata, tusikate tamaa kamwe.

Lakini hatuwezi kushikiliwa katika utumwa milele. Bwana Yesu amelipa gharama kubwa mno kwa ukombozi wetu asije akatuacha mkononi mwa adui. Njia ya uhuru ni, "Mrudie Bwana, Mungu wako." Pale tulipopata wokovu kwanza tutaupata tena. Chini ya msalaba wa Kristo tukiziungama dhambi tutapata msamaha na wokovu. Zaidi ya hayo, Bwana atataka tuitii sauti yake sawasawa na yote aliyotuamuru, nasi twapaswa kufanya hivi kwa moyo wetu wote, na kwa roho yetu yote, ndipo uteka wetu utakapokwisha.

Mara nyingi kushuka moyo na taabu kuu ya nafsi huondolewa mara tuachapo sanamu zetu na kujiinamisha kwa utii mbele za Mungu aliye hai. Hatuna haja ya kuwa mateka. Twaweza kurudi kwenye uraia wa Sayuni, tena kwa haraka. Bwana, ugeuze uteka wetu!

Mei 6

DAWA YA HUSUDA

"Moyo wako usiwahusudu wenye dhambi; bali uwe katika kumcha Bwana mchana kutwa. Kwa maana hakika iko thawabu; na tumaini lako halitakatiliwa mbali" Mithali 23:17, 18

Tuwaonapo waovu wakifanikiwa twaelekea kuwahusudu. Tusikiapo sauti ya furaha yao, na roho yetu wenyewe imelemewa, twanusu kudhani ya kwamba wao wana afadhali. Huku ni upumbavu na dhambi. Kama tungaliwajua vizuri zaidi, na hasa kama tungalikumbuka mwisho wao, tungaliwaonea huruma.

Dawa ya husuda iko katika kuishi chini ya hisia ya daima ya uwepo wa Mungu, tukimwabudu Mungu na kushirikiana naye mchana kutwa, ujapokuwa mrefu kadiri gani mchana huo. Dini ya kweli huinua nafsi mpaka nchi iliyo juu zaidi, ambako hukumu huwa wazi zaidi, na tamaa huwa za juu zaidi. Kadiri tulivyo na Mbingu zaidi maishani mwetu, ndivyo tutakavyoitamani dunia kidogo zaidi. Kumcha Mungu hufukuza husuda ya wanadamu.

Pigo la kufisha husuda ni kuutafakari kwa utulivu wakati ujao. Utajiri na fahari ya wasiomcha Mungu ni maonyesho ya ubatili. Mwonekano huu wa fahari humulika kwa saa moja, kisha huzimwa. Je, mtenda-dhambi afanikiwaye ana faida gani kwa kufanikiwa kwake hukumu itakapomjia? Ama mtu mcha Mungu, mwisho wake ni amani na baraka, wala hakuna awezaye kumnyang'anya furaha yake; kwa hiyo, na aache husuda, na ajazwe uradhi mtamu.

Mei 7

USIACHE UOVU UBAKI

"Wala kisiambatane cho chote cha kitu kilicholaaniwa na mkono wako; ili Bwana ageuke na ukali wa hasira yake, akuonee huruma, akurehemu, na kukuongeza, kama alivyowaapia baba zako" Kumbukumbu 13:17

Israeli walipaswa kuiteka miji ya kuabudu sanamu, na kuharibu nyara zote, wakihesabu vyote vilivyonajisiwa na ibada ya sanamu kuwa kitu kilicholaaniwa cha kuteketezwa kwa moto. Basi, dhambi ya kila aina yapaswa kutendewa na Wakristo kwa jinsi iyo hiyo. Hatupaswi kuruhusu tabia hata moja mbaya ibaki. Sasa ni vita vya makali dhidi ya dhambi za kila namna na ukubwa, ziwe za mwili, za akili, au za roho. Hatuoni kuacha huku kwa uovu kuwa kwastahili rehema, bali twakuhesabu kuwa tunda la neema ya Mungu, ambalo tusingependa kabisa kulikosa.

Mungu atufanyapo tusiwe na rehema juu ya dhambi zetu, ndipo huwa na rehema kuu juu yetu. Tuwapo na hasira juu ya uovu, Mungu hana hasira tena juu yetu. Tuzidishapo juhudi zetu dhidi ya uovu, Bwana huzidisha baraka zetu. Njia ya amani, ya kukua, ya usalama, ya furaha katika Kristo Yesu, itapatikana kwa kuyafuata maneno haya: "Wala kisiambatane cho chote cha kitu kilicholaaniwa na mkono wako." Bwana, unitakase leo. Huruma, kufanikiwa, ongezeko, na furaha, hakika vitapewa wale watupao dhambi kwa azimio zito.

Mei 8

WAFANYAKAZI WAHITAJIWA

"Nendeni ninyi nanyi katika shamba la mizabibu; na lo lote lililo haki, mtalipokea" Mathayo 20:7

Naam, kuna kazi katika shamba la mizabibu la Kristo kwa ajili ya miili iliyozeeka. Ni saa ya kumi na moja, na bado atatuacha tufanye kazi. Ni neema kuu iliyoje hii! Hakika kila mzee apaswa kuruka kuukamata mwaliko huu! Baada ya watu kuwa wamesonga miaka, hakuna atakayewataka kuwa watumishi; wao huenda toka duka hata duka, na waajiri huyatazama mavui yao yaliyo na mvi, na kutikisa vichwa vyao. Lakini Yesu atawaajiri wazee, na kuwapa ujira mwema pia! Hii ni rehema kweli. Bwana, uwasaidie wazee kujiandikisha katika utumishi wako pasipo kukawia hata saa moja.

Lakini je, Bwana atawalipa ujira watu wazee waliochoka? Usitie shaka juu ya hilo. Yeye asema atakupa kilicho haki ukifanya kazi katika shamba lake. Hakika atakupa neema hapa na utukufu huko baadaye. Atakupa faraja ya sasa na raha ya wakati ujao; nguvu sawa na siku yako, na maono ya utukufu usiku wa mauti utakapokuja. Vyote hivi Bwana Yesu atawapa wazee waliookoka kwa ukarimu kama vile ampavyo yeye aingiaye katika utumishi wake katika ujana wake.

Niwaambie hivi baadhi ya wazee au wazee wa kike wasiookoka, na kumwomba Bwana alibariki, kwa ajili ya Yesu. Nitawapata wapi watu kama hao? Nitakuwa nikiwatafuta, na kwa upole nitawaambia habari hizi.

Mei 9

KUTUMAINI NI FURAHA

"Maana moyo wetu utamfurahia yeye, kwa kuwa tumelitumainia jina lake takatifu" Zaburi 33:21

Shina la imani huzaa ua la furaha ya moyo. Huenda tusifurahi mwanzoni, lakini hufika kwa wakati wake. Twamtumaini Bwana tukiwa na huzuni, na kwa majira yake huijibu hakika yetu hata imani yetu igeuke kuwa mavuno nasi tumfurahie Bwana. Shaka huzaa dhiki, bali kutumaini kwa mwisho humaanisha furaha.

Uhakika ulioelezwa na mtunga-zaburi katika mstari huu kwa kweli ni ahadi iliyoshikwa mikononi mwa hakika takatifu. Lo, laiti tungekuwa na neema ya kuitwaa iwe yetu. Ijapokuwa hatufurahi wakati huu, hata hivyo tutafurahi, kwa hakika kama vile Mungu wa Daudi alivyo Mungu wetu.

Na tuutafakari jina takatifu la Bwana, ili tumtumaini vizuri zaidi na kufurahi kwa haraka zaidi. Yeye ni mtakatifu kwa tabia, mwenye haki, wa kweli, mwenye neema, mwaminifu na asiyebadilika. Je, Mungu kama huyu hapaswi kutumainiwa? Yeye ni mwenye hekima yote, mwenye uwezo wote, na yupo mahali pote; je, hatuwezi kumtegemea kwa moyo wa furaha? Naam, tutafanya hivyo mara moja, na kufanya hivyo pasipo kizuizi. Yehova-Yire atatupatia riziki, Yehova-Shalom atatuletea amani, Yehova-Tsidkenu atatuhesabia haki, Yehova-Shama atakuwa karibu milele, na katika Yehova-Nisi tutamshinda kila adui. Wale walijuao jina lako watakutumaini; nao wakutumainio watakufurahia, Ee Bwana.

Mei 10

MCHE MUNGU PEKE YAKE

"Hata twaweza kusema kwa ujasiri, Bwana ndiye msaidizi wangu, wala sitaogopa neno atakalonitenda mwanadamu" Waebrania 13:6

Kwa sababu Mungu hatatuacha wala kututupa kamwe, twaweza kuridhika na vitu tulivyo navyo. Kwa kuwa Bwana ni wetu, hatuwezi kuachwa bila rafiki, bila hazina, na bila makao. Uhakika huu waweza kutufanya tujisikie huru kabisa na wanadamu. Chini ya ulinzi wa juu namna hii hatujaribiwi kujikunyata mbele ya wenzetu, na kuwaomba ruhusa ya kuyaita maisha yetu kuwa yetu wenyewe; bali tusemalo twalisema kwa ujasiri, na kupinga upinzani wo wote.

Yeye amchaye Mungu hana la kuogopa jingine. Twapaswa kumwogopa Bwana aliye hai kiasi kwamba vitisho vyote viwezavyo kutumiwa na mnyanyasaji aliye na kiburi zaidi visiwe na matokeo juu yetu kuliko mluzi wa upepo. Mwanadamu siku hizi hawezi kututenda mabaya kama alivyoweza mtume alipoandika mstari ulio kichwani mwa ukurasa huu. Vyombo vya mateso na miti ya kuchomea vimepitwa na wakati. Jitu Papa haliwezi kuwachoma wasafiri sasa. Ikiwa wafuasi wa waalimu wa uongo watajaribu dhihaka na mzaha wa kikatili, hatustaajabu, kwa maana watu wa ulimwengu huu hawawezi kuipenda mbegu ya mbinguni. Basi je? Twapaswa kuvumilia dhihaka ya ulimwengu. Haivunji mifupa. Mungu akitusaidia, na tuwe hodari, na ulimwengu ughadhabikapo na ughadhabike, lakini tusiuogope.

Mei 11

NGOJEA MWISHO

"Gadi, jeshi litamshinda; bali yeye atalishinda mwishoni." Mwanzo 49:19

Baadhi yetu tumekuwa kama kabila la Gadi. Adui zetu kwa kitambo walikuwa wengi mno kwetu, walitujia kama jeshi. Naam, na kwa kitambo walitushinda; nao walishangilia sana kwa sababu ya ushindi wao wa muda. Hivyo walithibitisha tu sehemu ya kwanza ya urithi wa jamaa kuwa ni yetu kweli, kwa maana watu wa Kristo, kama Dani, watashindwa na jeshi. Kushindwa huku ni kwenye maumivu makuu, nasi tungekata tamaa kama tusingaliamini kwa imani mstari wa pili wa baraka ya baba yetu, "Yeye atashinda mwishoni." "Kila lililo jema huishia jema," alisema mshairi wa ulimwengu; naye alinena kweli. Vita huhukumiwa, si kwa mafanikio au kushindwa kwa kwanza, bali kwa yale yatokeayo "mwishoni." Bwana atawapa kweli na haki ushindi "mwishoni"; na, kama asemavyo Bw. Bunyan, hilo lamaanisha milele, kwa maana hakuna liwezalo kuja baada ya mwisho.

Tuhitajilo ni saburi ya kudumu katika kutenda mema, hakika ya utulivu katika Nahodha wetu mtukufu. Kristo, Bwana wetu Yesu, atatufundisha sanaa yake takatifu ya kuukaza uso kama gumegume ili kupitia kazi au mateso hata tuweze kusema, "Imekwisha." Haleluya. Ushindi! Ushindi! Twaiamini ahadi. "Yeye atashinda mwishoni."

Mei 12

WATUMISHI WAHESHIMIWA

"Atunzaye mtini atakula matunda yake; naye amngojaye bwana wake atapata heshima" Mithali 27:18

Yeye autunzaye mtini ana tini kwa taabu yake, na yeye amngojaye bwana mwema ana heshima kuwa thawabu yake. Kwa kweli Bwana Yesu ndiye aliye bora kabisa wa mabwana, nayo ni heshima kuruhusiwa kufanya tendo dogo kabisa kwa ajili yake. Kuwatumikia baadhi ya mabwana ni kama kuulinda mti wa mikadu na kula mikadu iwe ujira wa mtu; lakini kumtumikia Bwana wangu Yesu ni kutunza mtini wa tini zilizo tamu kuliko zote. Utumishi wake ni furaha yenyewe, kudumu ndani yake ni kupandishwa cheo, kufanikiwa ndani yake ni baraka hapa chini, na thawabu yake ni utukufu huko juu.

Heshima zetu zilizo kuu zaidi zitakusanywa katika majira yale tini zitakapoiva, naam katika ulimwengu ujao. Malaika ambao sasa ni watumishi wetu watatuchukua nyumbani kazi ya siku yetu itakapokwisha. Mbingu, aliko Yesu, itakuwa jumba letu la heshima, heri ya milele fungu letu la heshima, na Bwana mwenyewe mwenzi wetu wa heshima. Ni nani awezaye kuwaza maana kamili ya ahadi hii, "Amngojaye bwana wake atapata heshima"?

Bwana, unisaidie kumngojea Bwana wangu. Niache kuiacha fikira yote ya heshima hata saa ile wewe mwenyewe utakaponiheshimu. Roho wako Mtakatifu na anifanye mtenda-kazi na mngojaji mnyenyekevu na mwenye saburi!

Mei 13

SIKU I KARIBU

"Nami nitampa ile nyota ya asubuhi." Ufunuo 2:28

Hata mapambazuko yatakapopambazuka, na vivuli vitakapokimbia, ni baraka iliyoje kumwona Yesu kuwa "nyota ya asubuhi"! Nakumbuka tuliposoma katika magazeti hadithi ya bure kwamba nyota ya Bethlehemu ilikuwa imetokea tena. Tulipouliza tuligundua kwamba ilikuwa tu "nyota ya asubuhi"; lakini hakuna kosa kubwa lililofanyika baada ya yote.

Ni afadhali kumwona Yesu kama jua; lakini tusipoweza kufanya hivyo, jambo lililo afadhali baada ya hilo ni kumwona kuwa nyota ile itabirile mchana, na kuonyesha kwamba nuru ya milele i karibu. Ikiwa leo mimi si yote nitakayokuwa kama nitarajiavyo kuwa, hata hivyo namwona Yesu, na hilo lanihakikishia kwamba siku moja nitafanana naye. Kumwona Yesu kwa imani ni rehani ya kumtazama katika utukufu wake na kugeuzwa kuwa mfano wake. Ikiwa saa hii sina nuru na furaha yote niwezayo kuitamani, hata hivyo nitaipata; kwa maana kwa hakika kama vile ninavyoiona nyota ya asubuhi ndivyo nitakavyoiona mchana. Nyota ya asubuhi haiko mbali na jua kamwe.

Njoo, nafsi yangu, je, Bwana amekupa nyota ya asubuhi? Je, washika sana kweli, neema, tumaini, na upendo ambao Bwana amekupa? Basi katika hili una mapambazuko ya utukufu ujao. Yeye akufanyaye kuushinda uovu, na kudumu katika haki, amekupa katika hilo nyota ya asubuhi.

Mei 14

UPASUAJI KWA KUPONYA

"Njoni, tumrudie Bwana; kwa maana yeye amerarua, naye atatuponya; amepiga, naye atatufunga Hosea 6:1

Ni desturi ya Bwana kurarua kabla ya kuponya. Huku ni upendo wa kweli wa moyo wake, na upasuaji hakika wa mkono wake. Yeye pia hutia jeraha kabla ya kufunga, ama sivyo ingekuwa kazi isiyo na hakika. Sheria hutangulia injili; hisia ya haja hutangulia utoshelezaji wake. Je, msomaji sasa yu chini ya mkono wa Roho ushuhudiao na kuponda? Je, amepokea tena roho ya utumwa hata kuogopa? Huku ni utangulizi wenye faida wa uponyaji na kufunga kwa injili halisi.

Usikate tamaa, moyo mpendwa, bali umjie Bwana na majeraha yako yote yaliyochanika, machubuko meusi, na vidonda vinavyotoka usaha. Yeye peke yake aweza kuponya, naye afurahia kufanya hivyo. Ni kazi ya Bwana wetu kuwafunga waliovunjika moyo, naye yu nyumbani kwa utukufu katika kazi hiyo. Tusikawie, bali mara moja tumrudie Bwana ambaye tumempotoka. Na tumwonyeshe majeraha yetu yaliyoachama, na kumsihi aijue kazi yake mwenyewe, na kuikamilisha. Je, mpasuaji atakata kidonda, kisha amwache mgonjwa wake atoke damu hata afe? Je, Bwana atavunja nyumba yetu ya kale, kisha akatae kutujengea iliyo bora zaidi? Je, wewe hata mara moja waongeza kwa ukaidi taabu ya nafsi maskini zenye wasiwasi? Hilo na liwe mbali nawe, Ee Bwana.

Mei 15

MAHALI PA JUU PA MUNGU

"Nitamweka juu kwa sababu amelijua jina langu Zaburi 91:14

Je, Bwana ananiambia mimi haya? Naam, kama nimelijua jina lake. Ahimidiwe Bwana, mimi si mgeni kwake. Nimemjaribu, na kumthibitisha, na kumjua, na kwa hiyo namtumaini. Nalijua jina lake kuwa Mungu achukiaye dhambi, kwa maana kwa nguvu ya Roho wake ishuhudiayo nimefundishwa kwamba hatafumbia uovu jicho kamwe. Lakini namjua pia kuwa Mungu asamehe dhambi katika Kristo Yesu, kwa maana amenisamehe makosa yangu yote. Jina lake ni uaminifu, nami nalijua, kwa maana hajaniacha kamwe ijapokuwa taabu zangu zimeongezeka juu yangu.

Ujuzi huu ni kipawa cha neema, na Bwana huufanya kuwa sababu ya kwa nini anatoa kipawa kingine cha neema, yaani, kuweka juu. Hii ni neema juu ya neema. Angalia kwamba tukipanda juu wenyewe, mahali hapo paweza kuwa pa hatari; lakini Bwana akitutia huko, ni salama. Aweza kutuinua hata kwa manufaa makubwa, hata uzoefu ulio bora, hata kufanikiwa katika utumishi, hata uongozi kati ya watenda-kazi, hata cheo cha baba kati ya wadogo. Kama hafanyi hivi, aweza kutuweka juu kwa ushirika wa karibu, ufahamu ulio wazi, ushindi mtakatifu, na kutazamia kwa neema utukufu wa milele. Mungu atuwekapo juu, Shetani mwenyewe hawezi kutuvuta chini. Lo, hili na liwe hali yetu mchana huu wote!

Mei 16

TWAPOKEA KAMA TUTOAVYO

"Heri wenye rehema; kwa kuwa hao watapata rehema" Mathayo 5:7

Haifai kwamba mtu asiyetaka kusamehe asamehewe, wala yeye asiyetaka kumpa maskini hatapata mahitaji yake mwenyewe kutoshelezwa. Mungu atatupimia kwa vipimo vyetu wenyewe, na wale waliokuwa mabwana wagumu na wadai wagumu, wataona kwamba Bwana atawatendea kwa ugumu. "Atahukumiwa hukumu isiyo na rehema, asiyeona rehema."

Leo na tujaribu kutoa na kusamehe. Na tuzingatie dubu wawili -- vumilia na uache. Na tuwe wema, na wapole, na wororo. Tusiweke tafsiri kali juu ya mwenendo wa watu, wala tusifanye mikataba migumu, wala tusizue magombano ya kipumbavu, wala tusiwe wagumu kuridhika. Hakika twataka kubarikiwa, na twataka pia kupata rehema; na tuwe wenye rehema, ili tupate rehema. Na tuitimize sharti, ili tuipate ile heri. Je, si wajibu wa kupendeza kuwa mwema? Je, hakuna utamu mwingi zaidi ndani yake kuliko kuwa na hasira na kukosa ukarimu? Naam, kuna baraka katika jambo lenyewe! Zaidi ya hayo, kupata rehema ni thawabu tajiri. Ni nini ila neema kuu iwezayo kupendekeza ahadi kama hii? Sisi twawaonea rehema wenzetu wanaokufa kwa senti chache, naye Bwana hutusamehe "deni ile yote."

Mei 17

HAKUNA HAJA YA KUJINYIMA

"Wenye haki watamiliki mema" Mithali 28:10

Kitabu cha Mithali pia ni Kitabu cha Ahadi. Ahadi zapaswa kuwa mithali kati ya watu wa Mungu. Hii ni ahadi ya ajabu sana. Twazoea kuyawaza mema yetu kuwa ya kurithiwa baadaye, lakini hapa twaambiwa kwamba tutakuwa nayo kuwa milki.

Wala uovu wote na hila zote za adui zetu haziwezi kututenda uharibifu: watatumbukia katika shimo walilolichimba. Urithi wetu umefungwa kwetu kiasi kwamba hatutazuiliwa nao, wala hatutageuzwa njia hata tuukose.

Lakini tunacho nini sasa? Tunayo dhamiri iliyo shwari kwa njia ya damu ya thamani ya Yesu. Tunao upendo wa Mungu uliokazwa juu yetu kupita mabadiliko yote. Tunazo nguvu kwa Mungu katika kuomba wakati wote wa haja. Tunayo maongozi ya Mungu ya kutulinda, malaika wa Mungu wa kututumikia, na, zaidi ya yote, Roho wa Mungu wa kukaa ndani yetu. Kwa kweli, vitu vyote ni vyetu. "Kwamba ni vitu vilivyopo, au vitu vitakavyokuwapo, vyote ni vyenu." Yesu ni wetu. Naam, Utatu wa Kimungu katika umoja ni wetu. Haleluya. Tusinung'unike wala tusilalamike, wala tusijinyime na kujitesa, kwa kuwa tunayo mema kuwa milki. Na tuishi kwa Mungu wetu na kumfurahia mchana kutwa. Utusaidie, Ee Roho Mtakatifu!

Mei 18

HASARA ZASHINDWA

"Nami nitawarudishia miaka ile iliyoliwa na nzige" Yoeli 2:25

Naam, miaka ile iliyopotea ambayo tunaiugulia itarudishwa kwetu. Mungu aweza kutupa neema tele hata tuweze kusongamanisha katika siku zetu zilizosalia utumishi mwingi kadiri utakavyokuwa fidia kwa miaka ile ya kutozaliwa upya ambayo twaiombolezea kwa toba ya unyenyekevu.

Nzige za kurudi nyuma, kupenda dunia, na uvuguvugu, sasa twaziona kuwa tauni ya kutisha. Lo, laiti zisingelikaribia kwetu kamwe! Bwana kwa rehema sasa amezitwaa, nasi twajaa bidii ya kumtumikia. Ahimidiwe jina lake, twaweza kuvuna mavuno ya neema za kiroho kiasi kwamba yatafanya utasa wetu wa zamani utoweke. Kwa neema tajiri twaweza kuutumia uzoefu wetu mchungu, na kuutumia kuwaonya wengine. Twaweza kuwa na mizizi zaidi katika unyenyekevu, kutegemea kama mtoto, na hali ya kiroho yenye toba, kwa sababu ya mapungufu yetu ya zamani. Tukiwa waangalifu, wenye bidii, na wororo zaidi, tutafaidika kwa hasara zetu za kusikitisha. Miaka iliyopotea, kwa muujiza wa upendo, yaweza kurudishwa. Je, laonekana kuwa kipawa kikubwa mno? Na tuamini kwa ajili yake, na kuishi kwa ajili yake, nasi twaweza bado kulipata, kama vile Petro alivyokuwa mtu wa faida zaidi baada ya kujigamba kwake kuponywa kwa udhaifu wake uliogunduliwa. Bwana, utusaidie kwa neema yako.

Mei 19

TWAWEZA KUNENA KWA AJILI YA MUNGU

"Basi Bwana asema hivi, Ukirudi, ndipo nitakapokurudisha, upate kusimama mbele zangu; nawe ukikitoa kilicho cha thamani na kukiacha kilicho kibovu, utakuwa kama kinywa changu" Yeremia 15:19

Maskini Yeremia! Lakini kwa nini twasema hivyo? Nabii aliyelia alikuwa mmoja wa watumishi wateule wa Mungu, na aliyeheshimiwa naye kuliko wengi. Alichukiwa kwa sababu ya kunena kweli. Neno lililokuwa tamu sana kwake lilikuwa chungu kwa wasikiaji wake, hata hivyo alikubaliwa na Bwana wake. Aliamriwa kudumu katika uaminifu wake, ndipo Bwana angeendelea kunena kupitia kwake. Alipaswa kuwashughulikia watu kwa ujasiri na kweli, na kutenda kazi ya Bwana ya kupepeta juu ya wenye kudai dini wa siku zake, ndipo Bwana alimpa neno hili, "Utakuwa kama kinywa changu."

Ni heshima iliyoje! Je, kila mhubiri, naam, kila mwamini, hapaswi kuitamani? Mungu kunena kwa vinywa vyetu, ni ajabu iliyoje! Tutanena kweli iliyo hakika, iliyo safi; nasi tutainena kwa nguvu. Neno letu halitarudi tupu; litakuwa baraka kwa wale walipokeao, na wale walikataao watafanya hivyo kwa hatari yao. Midomo yetu italisha wengi. Tutawaamsha waliolala na kuwaita waliokufa kwenye uzima.

Ee msomaji mpendwa, omba kwamba iwe hivyo kwa watumishi wote waliotumwa wa Bwana wetu.

Mei 20

HATUTHUBUTU KUTIA SHAKA

"Nitakutangulia, na kupasawazisha mahali palipoparuza; nitavunja vipande vipande milango ya shaba, na kukata-kata mapingo ya chuma" Isaya 45:2

Hii ilikuwa kwa ajili ya Koreshi; lakini ni urithi wa daima wa watumishi wote wa kiroho wa Bwana. Ila na tuende mbele kwa imani, nayo njia yetu itasafishwa kwa ajili yetu. Mapindi na mizunguko ya werevu wa mwanadamu na hila ya Kishetani vitanyoshwa kwa ajili yetu; hatutahitaji kufuata mapindi yao yenye kupotosha. Milango ya shaba itavunjwa, na mapingo ya chuma yaliyoifunga yatakatwa vipande viwili. Hatutahitaji gogo la kubomolea wala mtaimbo: Bwana mwenyewe atafanya lisilowezekana kwa ajili yetu, na lisilotarajiwa litakuwa jambo la kweli.

Tusiketi chini katika hofu ya woga. Na tusonge mbele katika njia ya wajibu; kwa maana Bwana amenena, "Nitakutangulia." Si juu yetu kuuliza kwa nini; bali ni juu yetu kuthubutu na kuenda mbio mbele. Ni kazi ya Bwana, naye atatuwezesha kuifanya: vizuizi vyote lazima vijitoe mbele yake. Je, hakusema, "Nitavunja vipande vipande milango ya shaba"? Ni nini kiwezacho kuzuia kusudi lake au kupinga amri zake? Wale wamtumikiao Mungu wana rasilimali zisizo na mwisho. Njia iko wazi kwa imani ijapokuwa imefungwa kwa nguvu ya mwanadamu. Yehova asemapo, "Nitafanya," kama afanyavyo mara mbili katika ahadi hii, hatuthubutu kutia shaka.

Mei 21

MVUA BILA MAWINGU? KAMWE!

"Mawingu yakijaa mvua, hujimwaga juu ya nchi" Mhubiri 11:3

Kwa nini, basi, twayaogopa mawingu yatiayo giza anga letu sasa? Ni kweli, kwa kitambo hulificha jua, lakini jua halijazimwa; litang'aa tena karibuni. Wakati huohuo mawingu yale meusi yamejaa mvua; na kadiri yalivyo meusi zaidi, ndivyo yalivyo na uwezekano zaidi wa kutoa manyunyu tele. Twawezaje kuwa na mvua bila mawingu?

Taabu zetu daima zimetuletea baraka, nazo zitafanya hivyo daima. Ni magari meusi ya neema angavu. Mawingu haya yatajimwaga karibuni, na kila mche mwororo utafurahi zaidi kwa ajili ya manyunyu. Mungu wetu aweza kutulowesha kwa huzuni, lakini hatatuzamisha kwa ghadhabu; la, atatuburudisha kwa rehema. Barua za mapenzi za Bwana wetu mara nyingi hutujia katika bahasha zenye ukingo mweusi. Magari yake hunguruma, lakini yamebeba faida. Fimbo yake huchanua maua matamu na matunda yaliyo na lishe. Tusitaabike juu ya mawingu, bali tuimbe kwa sababu maua ya Mei yaletwa kwetu kupitia mawingu na manyunyu ya Aprili.

Ee Bwana, mawingu ni vumbi la miguu yako! Ni jinsi gani u karibu katika siku ya mawingu na giza! Upendo hukutazama, nao hufurahi. Imani huyaona mawingu yakijimwaga na kuvifanya vilima vidogo vifurahi pande zote.

Mei 22

WIMBO WA TUMAINI

"Nijapokwenda kati ya taabu utanihuisha; utaunyosha mkono wako juu ya ghadhabu ya adui zangu, na mkono wako wa kuume utaniokoa" Zaburi 138:7

Kutembea kwenye dhiki ni kwa taabu. La, ni kutembea kwenye baraka, kwa kuwa kuna ahadi maalum kwa ajili yake. Nipe ahadi, nayo taabu ni nini? Bwana wangu ananifundisha niseme nini hapa? Ni hili "Utanihuisha." Nitakuwa na uhai zaidi, nguvu zaidi, imani zaidi. Je, si mara nyingi hivyo, kwamba taabu hutuhuisha, kama pumzi ya hewa ya baridi mtu awapo tayari kuzimia?

Ni jinsi gani adui zangu wana hasira, na hasa adui mkuu! Je, nitanyosha mkono wangu na kupigana na adui zangu? La, mkono wangu watumika vizuri zaidi katika kufanya utumishi kwa Bwana wangu. Tena, hakuna haja, kwa maana Mungu wangu atautumia mkono wake ufikao mbali, naye atawashughulikia vizuri zaidi kuliko mimi ningeweza kama ningejaribu. "Kisasi ni juu yangu, mimi nitalipa, asema Bwana." Yeye kwa mkono wake wa kuume wa uwezo na hekima ataniokoa, nami nitatamani nini zaidi?

Njoo, moyo wangu, iseme ahadi hii kwako mwenyewe hata uweze kuitumia kama wimbo wa hakika yako, faraja ya upweke wako. Omba kuhuishwa wewe mwenyewe, na kuliacha lililosalia kwa Bwana, atendaye mambo yote kwa ajili yako.

Mei 23

KUMTEGEMEA MUNGU KABISA

"Kwa maana atamwokoa mhitaji aliapo, na maskini naye, na yeye asiye na msaidizi" Zaburi 72:12

Mhitaji hulia; awezaje kufanya jingine? Kilio chake husikiwa na Mungu; ana haja gani ya kufanya jingine? Msomaji mhitaji na aanze kulia mara moja, kwa maana huku kutakuwa hekima yake. Usilie masikioni mwa rafiki, kwa maana hata wakiweza kukusaidia ni kwa sababu tu Bwana huwawezesha. Njia iliyo karibu zaidi ni kwenda moja kwa moja kwa Mungu, na uache kilio chako kije mbele zake. Aendaye moja kwa moja hukimbia vizuri zaidi: kimbilia kwa Bwana, wala si kwa sababu za pili.

"Ole!" walia, "sina rafiki wala msaidizi." Ni afadhali zaidi hivyo; waweza kumtegemea Mungu katika hali zote mbili -- kama asiye na riziki na asiye na wasaidizi. Fanya haja yako maradufu kuwa ombi lako maradufu. Hata kwa rehema za muda waweza kumngoja Mungu, kwa maana yeye huwatunza watoto wake katika mambo haya ya muda. Ama kwa mahitaji ya kiroho, yaliyo mazito kuliko yote, Bwana atakisikia kilio chako, naye atakuokoa na kukupatia riziki.

Ee rafiki maskini, mjaribu Mungu wako aliye tajiri. Ee wewe usiye na msaada, utegemee msaada wake. Hajaniangusha kamwe, nami nina hakika hatakuangusha kamwe. Njoo kama mwombaji, naye Mungu hatakukatalia msaada. Njoo pasipo ombi ila neema yake. Yesu ni Mfalme, je, atakuacha uangamie kwa uhitaji? Nini! Je, ulilisahau hili?

Mei 24

MMOJA NDIYE WENGI!

"Mtu mmoja wenu atawafukuza elfu; kwa kuwa Bwana, Mungu wenu, ndiye awapiganiaye, kama alivyowaahidi" Yoshua 23:10

Kwa nini kuhesabu vichwa? Mtu mmoja pamoja na Mungu ndiye wengi ijapokuwa kuna elfu upande wa pili. Wakati mwingine wasaidizi wetu waweza kuwa wengi mno kwa Mungu kutenda nao, kama ilivyokuwa kwa Gideoni, ambaye hakuweza kufanya lo lote hata alipopunguza idadi ya majeshi yake kwa kuwapunguza. Lakini majeshi ya Bwana kamwe si machache mno. Mungu alipotaka kuanzisha taifa, alimwita Abramu peke yake na kumbariki. Alipotaka kumshinda Farao mwenye kiburi, hakutumia majeshi, bali Musa na Haruni tu. "Utumishi wa mtu mmoja," kama wanavyouita baadhi ya wenye hekima, umetumiwa na Bwana zaidi sana kuliko vikosi vilivyofunzwa pamoja na maofisa wao. Je, Waisraeli wote pamoja waliua wengi kama Samsoni peke yake? Sauli na majeshi yake waliua elfu zao, bali Daudi elfu kumi zake.

Bwana aweza kumpa adui uwezekano mkubwa na bado kumshinda. Tukiwa na imani, tunaye Mungu pamoja nasi, na makutano ya watu ni nini? Mbwa mmoja wa mchungaji aweza kulifukuza mbele yake kundi kubwa la kondoo. Bwana akikutuma, Ee ndugu yangu, nguvu zake zitatimiza kusudi lake la Kimungu. Kwa hiyo, itegemee ahadi, na uwe hodari sana.

Mei 25

HAZINA YA MUNGU

"Bwana atakufungulia hazina yake nzuri" Kumbukumbu 28:12

Hii yataja kwanza mvua. Bwana atatoa mvua hii kwa majira yake. Mvua ni mfano wa maburudisho yote ya mbinguni ambayo Bwana yu tayari kuwapa watu wake. Lo, laiti manyunyu tele yaje kuburudisha urithi wa Bwana!

Twaonekana kudhani kwamba hazina ya Mungu yaweza kufunguliwa tu na nabii mkuu kama Eliya, lakini si hivyo, kwa maana ahadi hii ni kwa waaminifu wote katika Israeli, naam, kwa kila mmoja wao. Ee rafiki uaminiye, "Bwana atakufungulia hazina yake nzuri." Wewe pia, waweza kuona Mbingu ikafunguliwa, na kuutia mkono wako na kuchukua fungu lako, naam, na fungu kwa ajili ya ndugu zako wote walio pande zako. Omba lo lote utakalo, wala hutakataliwa, ukikaa ndani ya Kristo, na maneno yake yakikaa ndani yako.

Hata sasa hujazijua hazina zote za Bwana wako, lakini yeye atazifungua kwa ufahamu wako. Kwa hakika hujafurahia bado utimilifu wa utajiri wa agano lake, lakini yeye ataongoza moyo wako katika upendo wake, na kumfunua Yesu ndani yako. Bwana mwenyewe peke yake aweza kukufanyia hili; lakini hii ndiyo ahadi yake, na ukiisikiliza sauti yake kwa bidii, na kuyatii mapenzi yake, utajiri wake katika utukufu kwa njia ya Kristo Yesu utakuwa wako.

Mei 26

VITU VYA KAWAIDA VYABARIKIWA

"Nanyi mtamtumikia Bwana, Mungu wenu, naye atakibariki chakula chako, na maji yako" Kutoka 23:25

Ahadi iliyoje hii! Kumtumikia Mungu ni furaha kuu yenyewe. Lakini ni pendeleo lililoongezwa lililoje kuwa na baraka ya Bwana ikikaa juu yetu katika mambo yote! Vitu vyetu vya kawaida kabisa huwa vilivyobarikiwa tunapowekwa wakfu kwa Bwana. Bwana wetu Yesu alitwaa mkate na kuubariki; tazama, sisi pia twala mkate uliobarikiwa. Yesu aliyabariki maji na kuyafanya divai: maji tunayoyanywa ni bora kwetu kuliko divai yo yote ambayo kwayo wanadamu hufanya furaha; kila tone lina baraka ndani yake. Baraka ya Kimungu i juu ya mtu wa Mungu katika kila kitu, nayo itakaa naye kila wakati.

Itakuwaje kama tuna mkate na maji tu! Hata hivyo ni mkate na maji yaliyobarikiwa. Mkate na maji tutakuwa navyo. Hilo laonyeshwa, kwa maana lazima viwepo ili Mungu aviibarikie. "Chakula chake atapewa, maji yake ni ya hakika." Mungu akiwa mezani petu, hatuombi baraka tu, bali tunayo. Si madhabahuni tu bali mezani pia atubarikipo. Yeye huwatumikia vema wale wamtumikiao yeye vema. Baraka hii ya mezani si ya deni, bali ya neema. Kwa kweli, kuna neema iliyofuatana; hutupa neema ya kumtumikia, kwa neema yake hutulisha kwa mkate, kisha kwa neema yake huubariki.

Mei 27

KAMA UHAI -- NDIVYO MATUNDA

"Kwa maana vitu hivi vikiwa ndani yenu na kuzidi, vyawafanya ninyi kutokuwa wavivu wala wasiozaa matunda katika kumjua Bwana wetu Yesu Kristo" 2 Petro 1:8

Kama twataka kumtukuza Bwana wetu kwa kuzaa matunda ni lazima tuwe na vitu fulani ndani yetu; kwa maana hakuna kiwezacho kutoka ndani yetu ambacho hakikuwa kwanza kabisa ndani yetu. Ni lazima tuanze na imani, ndiyo msingi wa mema yote; kisha kwa bidii tuiongezee wema, maarifa, kiasi, na saburi. Pamoja na hivi ni lazima tuwe na utauwa na upendano wa ndugu. Vyote hivi vikiunganishwa pamoja hakika vitatufanya tutoe, kama tunda la maisha yetu, vishada vya manufaa, nasi hatutakuwa wajuzi wavivu tu, bali watendaji halisi wa Neno. Vitu hivi vitakatifu haviwi budi kuwa ndani yetu tu, bali kuzidi, ama sivyo tutakuwa watasa. Tunda ni kufurika kwa uhai, na ni lazima tujae kabla ya kuweza kufurika.

Tumewaona watu wenye vipawa na nafasi nyingi ambao hawajapata kamwe kufanikiwa kutenda mema halisi katika kuongoa roho; na baada ya kuchunguza kwa makini tumehitimisha kwamba walikosa neema fulani ambazo ni za lazima kabisa kwa kuzaa matunda. Kwa manufaa halisi, neema ni bora kuliko vipawa. Kama alivyo mtu, ndivyo ilivyo kazi yake. Kama twataka kutenda vizuri zaidi ni lazima tuwe wema zaidi. Neno hili na liwe dokezo la upole kwa wenye kudai dini wasiozaa matunda, na kwangu mimi pia.

Mei 28

MKUMBUSHE MUNGU AHADI YAKE

"Nawe ulisema, Hakika nitakutendea mema" Mwanzo 32:12

Hii ndiyo njia ya hakika ya kushinda kwa Bwana katika kuomba. Twaweza kumkumbusha kwa unyenyekevu aliyoyanena. Mungu wetu mwaminifu hatarudi nyuma kutoka kwa neno lake kamwe, wala hataliacha bila kutimizwa; hata hivyo hupenda kuulizwa na watu wake, na kukumbushwa ahadi yake. Hii huburudisha kumbukumbu zao, huhuisha imani yao, na kufanya upya tumaini lao. Neno la Mungu limetolewa, si kwa ajili yake, bali kwa ajili yetu. Makusudi yake yamekwisha kaziwa, wala hahitaji lo lote la kumfunga kwa nia yake ya kuwatendea watu wake mema; lakini hutoa ahadi kwa ajili ya kutuimarisha na kutufariji. Kwa hiyo hutaka tuisihi, na kumwambia, "Wewe ulisema."

"Hakika nitakutendea mema" ndiyo asili yenyewe ya maneno yote yenye neema ya Bwana. Weka mkazo maalum juu ya neno "hakika." Atatutendea mema, mema halisi, mema ya kudumu, mema tu, kila jema. Atatufanya wema, na hii ndiyo kutufanyia mema kwa kiwango cha juu kabisa. Atatutendea kama awatendeavyo watakatifu wake tungali hapa, na hilo ni jema. Atatuchukua karibuni tuwe pamoja na Yesu na wateule wake wote, na hilo ni jema kupita yote. Tukiwa na ahadi hii mioyoni mwetu hatuna haja ya kumwogopa Esau mwenye ghadhabu, wala mtu mwingine ye yote. Kama Bwana atatutendea mema, ni nani awezaye kutudhuru?

Mei 29

WAVUVI HUMFUATA

"Yesu akawaambia, Njoni nyuma yangu, nami nitawafanya kuwa wavuvi wa watu" Marko 1:17

Ni kwa kumfuata Yesu tu twaweza kupata haja ya moyo wetu, na kuwa na manufaa halisi kwa wenzetu. Lo, jinsi tunavyotamani kuwa wavuvi wenye mafanikio kwa ajili ya Yesu! Tungetoa maisha yetu kuokoa roho. Lakini twajaribiwa kujaribu mbinu ambazo Yesu asingezijaribu kamwe. Je, tukubaliane na dokezo hili la adui? Kama tukifanya hivyo, twaweza kuchapua maji, lakini kamwe hatutavua samaki. Ni lazima tumfuate Yesu kama twataka kufanikiwa. Mbinu za kushtua, burudani, na kadhalika -- je, haya ni kumfuata Yesu? Je, twaweza kuwaza Bwana Yesu akivuta mkutano kwa njia kama zile zinazotumiwa sana sasa? Ni nini matokeo ya hila kama hizo? Matokeo ni kitu ambacho Yesu hatakihesabu siku ile kuu ya mwisho.

Ni lazima tushike mahubiri yetu kama alivyofanya Bwana wetu, kwa maana kwa njia hii roho huokolewa. Ni lazima tuhubiri mafundisho ya Bwana wetu, na kutangaza injili iliyo timilifu na ya bure; kwa maana hii ndiyo wavu ambao kwao roho hunaswa. Ni lazima tuhubiri kwa upole wake, ujasiri wake, na upendo wake; kwa maana hii ndiyo siri ya mafanikio na mioyo ya wanadamu. Ni lazima tutende kazi chini ya upako wa Kimungu, tukimtegemea Roho mtakatifu. Hivyo, tukimfuata Yesu, na si kumkimbia mbele, wala kando yake, tutakuwa wavuvi wa watu.

Mei 30

UONO MTAKATIFU

"Lakini nawaambieni, Tangu sasa mtamwona Mwana wa Adamu ameketi mkono wa kuume wa nguvu, akija juu ya mawingu ya mbinguni" Mathayo 26:64

Ah, Bwana, ulikuwa katika hali yako iliyo chini kabisa uliposimamishwa mbele ya wanyanyasaji wako kama mhalifu! Hata hivyo macho ya imani yako yaliweza kuona kupita unyonge wako uliopo hata utukufu wako ujao. Ni maneno gani haya, "Lakini -- tangu sasa"! Ningeuiga uono wako mtakatifu wa mbele, na katikati ya umaskini, au ugonjwa, au masingizio, mimi pia ningesema, "Lakini -- tangu sasa." Badala ya udhaifu, una uwezo wote; badala ya aibu, utukufu wote; badala ya dhihaka, ibada yote. Msalaba wako haujafifisha fahari ya taji yako, wala mate hayakuuharibu uzuri wa uso wako. Sema, afadhali, umetukuzwa na kuheshimiwa zaidi kwa sababu ya mateso yako.

Basi, Bwana, mimi pia ningejipa moyo kutoka "tangu sasa." Ningeisahau dhiki iliyopo katika ushindi ujao. Unisaidie wewe kwa kuniongoza katika upendo wa Baba yako na katika saburi yako mwenyewe, ili nitakapodhihakiwa kwa ajili ya jina lako nisiyumbishwe, bali niyawaze zaidi na zaidi yale ya tangu sasa, na kwa hiyo niyawaze machache zaidi ya leo. Nitakuwa pamoja nawe karibuni na kuutazama utukufu wako. Kwa hiyo, sioni haya, bali nasema katika nafsi yangu ya ndani kabisa, "Lakini -- tangu sasa."

Mei 31

"JIPENI MOYO"

"Ulimwenguni mnayo dhiki; lakini jipeni moyo; mimi nimeushinda ulimwengu" Yohana 16:33

Maneno ya Bwana wangu ni kweli kuhusu dhiki. Nina fungu langu la dhiki pasipo shaka yo yote. Uwanda wa kupura haujaachwa ukiwa umetundikwa mbali na njia, wala siwezi kutumaini kwamba utawekwa kando maadamu ninalala juu ya sakafu ya kupuria. Nawezaje kutazamia kuwa nyumbani katika nchi ya adui, mwenye furaha nikiwa uhamishoni, au mwenye raha katika jangwa? Hapa si mahali pangu pa kupumzika. Hapa ni mahali pa tanuru, na kiwanda cha uhunzi, na nyundo. Uzoefu wangu unapatana na maneno ya Bwana wangu.

Naona jinsi anavyoniambia "jipe moyo." Ole! Mimi naelekea sana kufa moyo. Roho yangu huzama upesi ninapojaribiwa kwa uchungu. Lakini sipaswi kujitoa kwa hisia hii. Bwana wangu aniambiapo nichangamke sithubutu kufa moyo.

Ni hoja gani anayoitumia kunitia moyo? Naam, ni ushindi wake mwenyewe. Asema, "Mimi nimeushinda ulimwengu." Vita vyake vilikuwa vikali zaidi kuliko vyangu. Mimi sijapigana bado hata kumwaga damu. Kwa nini nikate tamaa ya kushinda? Tazama, nafsi yangu, adui amekwisha kushindwa mara moja. Napigana na adui aliyeshindwa. Ee ulimwengu, Yesu amekwisha kukushinda; na ndani yangu, kwa neema yake, atakushinda tena. Kwa hiyo nina moyo mchangamfu, na kumwimbia Bwana wangu ashindaye.