Mwezi wa Aprili

Aprili 1

NJIA KUU YA MFALME

"Wasafiri, wajapokuwa wapumbavu, hawatapotea humo" Isa. 35:8

Njia ya utakatifu imenyooka na iko wazi kiasi kwamba akili zilizo dhaifu sana haziwezi kupotea kama zikiifuata daima. Wenye hekima ya kidunia wana mizunguko na mageuzo mengi, na bado hufanya makosa ya kutisha, na kwa kawaida hukosa lengo lao. Sera ya kidunia ni kitu duni chenye kuona karibu tu, na watu wanapoichagua kuwa njia yao, huwaongoza juu ya milima yenye giza. Akili zenye neema hazijui kufanya lolote ila kama Bwana anavyowaagiza; lakini jambo hili huwaweka katika njia kuu ya mfalme, na chini ya ulinzi wa kifalme.

Msomaji asijaribu kamwe, hata kwa kitambo, kujiokoa katika shida kwa uongo, au kwa tendo lenye shaka; bali na akae katikati ya njia kuu ya kweli na unyofu, naye atakuwa akifuata njia iliyo bora kabisa. Katika maisha yetu kamwe tusifanye usafiri wa kuzunguka-zunguka, wala tusiote ndoto ya hila. Uwe mwadilifu wala usiogope. Mfuate Yesu wala usijali matokeo mabaya. Kama uovu mkubwa kabisa ungeweza kuepukwa kwa kutenda mabaya, basi katika jaribio lenyewe tungekuwa tumeanguka katika uovu ulio mbaya kuliko ubaya mwingine wowote ungeweza kuwa. Njia ya Mungu lazima iwe njia iliyo bora. Ifuate ijapokuwa watu wanakudhania mpumbavu, nawe utakuwa na hekima kweli.

Bwana, uwaongoze watumishi wako katika njia iliyonyoka kwa sababu ya adui zao.

Aprili 2

NGUVU YA KWELI YA MOYO

"Yatafakari hayo; ujitoe kwa hayo kabisa; ili kuendelea kwako kuonekane kwa watu wote" 1 Tim. 4:15

Hii, kwa kweli, ni ahadi kwamba, kwa kutafakari kwa bidii na kwa kuutoa moyo wetu wote kwa kazi yetu ya Bwana, tutafanya maendeleo ambayo wote wanaweza kuyaona. Si kwa kusoma haraka-haraka, bali kwa kutafakari kwa kina, ndipo tunanufaika kwa Neno la Mungu. Si kwa kufanya kazi nyingi kwa uzembe, bali kwa kutoa fikira zetu bora kwa lile tunalolijaribu, ndipo tutapata faida ya kweli. "Katika kazi zote mna faida," lakini si katika mzaha na haraka bila nguvu ya kweli ya moyo.

Tukijigawa kati ya Mungu na mali, au kati ya Kristo na nafsi, hatutafanya maendeleo yoyote. Ni lazima tujitoe kabisa kwa mambo matakatifu, la sivyo tutakuwa wafanyabiashara duni katika biashara ya mbinguni, na wakati wa kuhesabu bidhaa zetu hakuna faida itakayoonekana.

Je, mimi ni mhudumu? Basi na niwe mhudumu kabisa, wala nisitumie nguvu zangu katika mambo ya pili. Nina nini na siasa za vyama, au anasa za ubatili? Je, mimi ni Mkristo? Basi na nifanye utumishi wangu wa Yesu kuwa kazi yangu, kazi ya maisha yangu, shughuli yangu moja. Ni lazima tuwe ndani-kwa-ndani na Yesu, kisha nje-kwa-nje kwa ajili ya Yesu, la sivyo hatutafanya maendeleo wala faida, wala kanisa au ulimwengu hautasikia uvutano ule wenye nguvu ambao Bwana angependa tuutumie.

Aprili 3

KUITIKIA MAONYO

"Kwa kuwa moyo wako ulikuwa mwororo, nawe umenyenyekea mbele za Bwana, uliposikia niliyoyanena juu ya mahali hapa, na juu ya wenyeji wake, ya kwamba watakuwa ukiwa na laana, nawe umeyararua mavazi yako, na kulia mbele zangu; mimi nami nimekusikia, asema Bwana" 2 Fal. 22:19

Wengi hudharau maonyo, nao huangamia. Heri yeye atetemekaye kwa neno la Bwana. Yosia alifanya hivyo, naye akaepushwa asione ule uovu ambao Bwana alikusudia kuuleta juu ya Yuda kwa sababu ya dhambi zake kubwa. Je, wewe una wororo huu? Je, unafanya unyenyekevu huu wa nafsi? Basi wewe nawe utaepushwa katika siku ya uovu. Mungu huweka alama juu ya watu wanaougua na kulia kwa sababu ya dhambi ya nyakati hizi. Malaika mwangamizi ameamriwa kuutunza upanga wake alani mwake hata wateule wa Mungu watakapokuwa wamehifadhiwa: hao hutambulika vema kwa kicho chao cha kimungu, na kutetemeka kwao kwa Neno la Bwana. Je, nyakati zinatisha? Je, Upapa na Ukafiri vinasonga mbele kwa hatua kubwa, nawe unahofia adhabu ya kitaifa juu ya taifa hili lililotiwa unajisi? Vyema, waweza kuhofia. Lakini pumzika katika ahadi hii, "Utakusanywa kaburini mwako kwa amani; wala macho yako hayataona uovu wote nitakaouleta juu ya mahali hapa." Bora zaidi, Bwana mwenyewe aweza kuja, ndipo siku za maombolezo yetu zitakapokwisha.

Aprili 4

MAVU YA MUNGU

"Nami nitatuma mavu mbele yako, watakaowafukuza Wahivi, na Wakanaani, na Wahiti, mbele yako" Kut. 23:28

Mavu hayo yalikuwa nini si lazima tulifikirie. Yalikuwa jeshi la Mungu mwenyewe, ambalo aliituma mbele ya watu wake ili kuwauma adui zao, na kuufanya ushindi wa Israeli kuwa rahisi. Mungu wetu, kwa njia alizozichagua mwenyewe, atawapigania watu wake, na kuwaudhi adui zao, kabla hawajaingia katika vita vyenyewe. Mara nyingi huwatia fadhaa wapinzani wa kweli kwa njia ambazo wana-mageuzi wenyewe hawana sehemu nazo. Hewa imejaa nguvu za ajabu ziwasumbuazo adui za Israeli. Twasoma katika Ufunuo kwamba "nchi ikamsaidia mwanamke.

Tusiogope kamwe. Nyota katika mizunguko yao hupigana na adui za nafsi zetu. Mara nyingi tunapoenda vitani hatuoni jeshi la kushindana nalo. "Bwana atawapigania ninyi, nanyi mtanyamaza kimya." Mavu ya Mungu yaweza kufanya zaidi ya silaha zetu. Kamwe hatungeweza kuota kwamba ushindi utapatikana kwa njia kama zile atakazozitumia Yehova. Ni lazima tuzitii amri zetu za kwenda mbele na kutoka kwenda kuyashinda mataifa kwa ajili ya Yesu, nasi tutaona kwamba Bwana ametutangulia, na kuitengeneza njia; hata mwishoni tutakiri kwa furaha, "Mkono wake wa kuume, na mkono wake mtakatifu, ndio uliompatia ushindi."

Aprili 5

HUSAHAULIWI

"Wewe u mtumishi wangu; Ee Israeli, hutasahauliwa nami" Isa. 44:21

Yehova wetu hawezi kuwasahau watumishi wake hata aache kuwapenda. Aliwachagua si kwa muda, bali milele. Alijua watakavyokuwa alipowaita katika jamaa ya kimungu. Huzifuta dhambi zao kama wingu; nasi twaweza kuwa na hakika kwamba hatawafukuza nje kwa maovu ambayo ameyafuta. Ingekuwa kukufuru kufikiri jambo kama hilo.

Hatawasahau hata aache kuwafikiria. Kitambo kimoja cha kusahau kwa Mungu wetu kingekuwa uangamivu wetu. Kwa hiyo asema: "Hutasahauliwa nami." Wanadamu hutusahau: wale tuliowafadhili hutugeukia: hatuna makao ya kudumu katika mioyo isiyo na uthabiti ya wanadamu; lakini Mungu hatamsahau kamwe hata mmoja wa watumishi wake wa kweli. Hujifunga nasi si kwa yale tunayomtendea, bali kwa yale aliyotutendea. Tumependwa muda mrefu mno, na kununuliwa kwa gharama kubwa mno, hata sasa tusahauliwe. Yesu huona ndani yetu taabu ya nafsi yake, na hilo hawezi kamwe kulisahau. Baba huona ndani yetu bibi-arusi wa Mwanawe, na Roho huona ndani yetu kazi yake mwenyewe yenye matokeo. Bwana hutufikiria. Siku hii tutasaidiwa na kutegemezwa. Laiti Bwana asisahauliwe kamwe nasi!

Aprili 6

MFALME MMOJA, BWANA MMOJA

"Naye Bwana atakuwa mfalme juu ya nchi yote; siku ile Bwana atakuwa mmoja, na jina lake moja" Zek. 14:9

Tarajio lililobarikiwa! Hii si ndoto ya mwenye shauku, bali ni tangazo la Neno lisilokosea. Yehova atajulikana kati ya watu wote, na utawala wake wa neema utakiriwa na kila kabila la wanadamu. Leo, hali iko mbali sana na hivyo. Ni wapi mtu yeyote ainamiapo mbele ya Mfalme Mkuu? Kuna uasi kiasi gani! Kuna mabwana wengi, na miungu mingi, juu ya nchi! Hata kati ya wanaokiri kuwa Wakristo kuna tofauti kiasi gani za mawazo juu yake na injili yake! Siku moja kutakuwa na Mfalme mmoja, Yehova mmoja, na jina moja kwa Mungu aliye hai. Ee Bwana, uihimize! Kila siku twalia, Ufalme wako uje.

Hatutajadili swali la lini jambo hili litakuwa, tusije tukapoteza faraja ya hakika ya kwamba litakuwa. Kwa hakika kama vile Roho Mtakatifu alivyonena kwa vinywa vya manabii wake, ndivyo kwa hakika nchi yote itakavyojaa utukufu wa Bwana. Yesu hakufa bure. Roho wa Mungu hafanyi kazi bure. Makusudi ya milele ya Baba hayatazuiliwa. Hapa, ambapo Shetani alishinda, Yesu atavikwa taji, na Bwana Mungu Mwenyezi atatawala. Na tuende zetu katika kazi na vita vyetu vya kila siku, tukiwa tumetiwa nguvu katika imani.

Aprili 7

BILA KUMWOGOPA MWANADAMU

"Na mataifa yote ya duniani wataona ya kuwa umeitwa kwa jina la Bwana; nao watakuogopa" Kum. 28:10

Basi hatuwezi kuwa na sababu ya kuwaogopa. Jambo hili lingeonyesha roho duni, nalo lingekuwa alama ya kutokuamini badala ya imani. Mungu aweza kutufanya kuwa kama yeye mwenyewe, hata watu walazimishwe kuona ya kuwa twalichukua jina lake kwa haki, na kwamba kweli sisi ni mali ya Yehova Mtakatifu. Laiti tuipate neema hii, ambayo Bwana anangoja kuitoa!

Uwe na hakika kwamba watu wasiomcha Mungu huwaogopa watakatifu wa kweli. Huwachukia, lakini pia huwaogopa. Hamani alitetemeka kwa sababu ya Mordekai, hata alipokuwa akitafuta kumwangamiza mtu yule mwema. Kwa kweli, chuki yao mara nyingi hutokana na hofu ambayo wana kiburi mno kuikiri. Na tuifuate njia ya kweli na unyofu bila kutetemeka hata kidogo. Hofu si yetu, bali ni ya wale watendao mabaya na kupigana na Bwana wa majeshi. Kama kweli jina la Mungu wa milele limetajwa juu yetu, tu salama; kwa maana, kama zamani, ilimtosha Mrumi kusema Romanus sum, Mimi ni Mrumi, naye angeweza kudai ulinzi wa majeshi yote ya milki ile kubwa; vivyo hivyo kila aliye mtu wa Mungu ana Uweza wote kuwa mlinzi wake, na Mungu angependa zaidi kuzitoa mbingu malaika kuliko kumwacha mtakatifu bila ulinzi. Uwe hodari kuliko simba kwa ajili ya haki, kwa kuwa Mungu yu pamoja nawe.

Aprili 8

KUHIFADHIWA HATA MWISHO WA KAZI

"Bwana akasimama karibu naye, akasema, Uwe na moyo mkuu, Paulo; kwa maana kama vile ulivyonishuhudia mambo yangu katika Yerusalemu, imekupasa kunishuhudia vivyo hivyo huko Rumi nako" Mdo. 23:11

Je, wewe ni shahidi wa Bwana, nawe u hatarini sasa hivi? Basi kumbuka kwamba hufi hata kazi yako itakapokwisha. Kama Bwana ana ushahidi zaidi upasao kuutoa, utaishi hata uutoe. Ni nani awezaye kukivunja chombo ambacho Bwana anakusudia kukitumia tena?

Kama hakuna kazi zaidi ya kufanya kwa ajili ya Bwana wako, haiwezi kukuhuzunisha kwamba yu karibu kukuchukua nyumbani, na kukuweka mahali ambapo utakuwa mbali na uwezo wa adui. Kutoa kwako ushuhuda kwa ajili ya Yesu ndiyo shughuli yako kuu, wala huwezi kuzuiliwa katika jambo hilo hata litakapotimizwa: kwa hiyo uwe na amani. Masingizio makatili, uchongezi mwovu, kutelekezwa na rafiki, kusalitiwa na yule uliyemwamini zaidi ya wote, na lolote jingine liwezalo kuja, haviwezi kuzuia kusudi la Bwana juu yako. Bwana husimama karibu nawe katika usiku wa huzuni yako, naye asema, "Yakupasa kuendelea kunishuhudia." Uwe mtulivu, ujawe na furaha katika Bwana.

Kama huihitaji ahadi hii sasa hivi, waweza kuihitaji karibuni sana. Itunze kama hazina. Kumbuka pia kuwaombea wamisionari, na wote wanaoteswa, ili Bwana awahifadhi hata kukamilika kwa kazi ya maisha yao.

Aprili 9

NAFASI KUU YA BIBLIA

"Wana amani nyingi waipendao sheria yako, wala hawana la kuwakwaza" Zab. 119:165

Naam, upendo wa kweli kwa Kitabu kile kikuu utatuletea amani nyingi kutoka kwa Mungu mkuu, nao utakuwa ulinzi mkubwa kwetu. Na tuishi daima katika ushirika wa sheria ya Bwana, nayo itazaa mioyoni mwetu utulivu ambao hakuna kitu kingine kiwezacho kuuzaa. Roho Mtakatifu hutenda kazi kama Mfariji kwa njia ya Neno, na humwaga nguvu zile njema zituliazo dhoruba za nafsi.

Hakuna kitu kilicho kikwazo kwa mtu ambaye Neno la Mungu linakaa ndani yake kwa wingi. Huuchukua msalaba wake wa kila siku, nao huwa furaha kwake. Kwa jaribu la moto amejiweka tayari, wala hulihesabu kuwa geni, hata alishushwe kabisa nalo. Hakwazwi na kufanikiwa, kama walivyo wengi, wala hapondwi na mashaka, kama wengine walivyokuwa; kwa maana huishi juu ya hali zibadilikazo za maisha ya nje. Bwana wake amwekapo mbele yake siri kubwa fulani ya imani iwafanyayo wengine kulia, "Neno hili ni gumu; ni nani awezaye kulisikia?" mwenye kuamini hulikubali bila kuuliza; kwa maana matatizo yake ya akili hushindwa na kicho chake cha heshima kwa sheria ya Bwana, ambayo kwake ni mamlaka kuu ainamiayo kwa furaha. Bwana, tutendee ndani yetu upendo huu, amani hii, pumziko hili, siku hii ya leo.

Aprili 10

TAZAMA UISHI

"Bwana akamwambia Musa, Jifanyie nyoka ya moto, ukaitundike juu ya mti; hata itakuwa, kila mtu aliyeumwa, atakapoitazama, ataishi" Hes. 21:8

Huu ni mfano wa injili wa utukufu. Yesu, aliyehesabiwa pamoja na wakosaji, hutundikwa mbele yetu msalabani. Kumtazama yeye kutatuponya kuumwa kwa nyoka wa dhambi; kutatuponya mara moja— 'Atakapoitazama, ataishi." Msomaji aombolezaye dhambi yake na ayaangalie maneno haya -- "Kila mtu aitazamaye ataishi." Kila atazamaye ataliona hili kuwa kweli. Mimi nimeliona hivyo. Nilimtazama Yesu nikaishi mara moja. Najua nilifanya hivyo. Msomaji, kama ukimtazama Yesu utaishi wewe nawe. Kweli, umevimba kwa sumu, wala huoni tumaini. Kweli, tena hakuna tumaini ila hili moja. Lakini huku si kuponya kwa mashaka -- "Kila mtu aliyeumwa, atakapoitazama, ataishi."

Yule nyoka wa shaba hakuinuliwa kama kitu cha kustaajabisha kitazamwe na wenye afya; bali kusudi lake maalum lilikuwa kwa ajili ya wale "walioumwa." Yesu alikufa kama Mwokozi wa kweli kwa ajili ya wenye dhambi wa kweli. Kwamba kuumwa kumekufanya kuwa mlevi, au mwivi, au mtu asiye na usafi au mkufuru, kumtazama Mwokozi Mkuu kutakuponya magonjwa haya, na kukufanya uishi katika utakatifu na ushirika na Mungu. Tazama uishi.

Aprili 11

USHIRIKA WA KARIBU

"Wala hawatamfundisha kila mtu jirani yake, na kila mtu ndugu yake, wakisema, Mjue Bwana; kwa maana watanijua wote, tangu aliye mdogo miongoni mwao hata aliye mkubwa miongoni mwao, asema Bwana" Yer. 31:34

Kweli, lolote jingine tusilolijua, twamjua Bwana. Siku hii ahadi hii ni kweli katika uzoefu wetu, nayo si ndogo. Mwenye kuamini aliye mdogo kabisa miongoni mwetu humjua Mungu katika Kristo Yesu. Si kwa ukamilifu kama tutakavyo; lakini kwa kweli na hakika twamjua Bwana. Hatujui mafundisho juu yake tu, bali twamjua YEYE. Yeye ni Baba yetu na Rafiki yetu. Tunafahamiana naye kwa nafsi. Twaweza kusema, "Bwana wangu na Mungu wangu." Tuko katika hali ya ushirika wa karibu na Mungu, na majira mengi ya furaha twayatumia katika uandamani wake mtakatifu. Sisi si wageni tena kwa Mungu wetu, bali siri ya Bwana i pamoja nasi.

Hili ni zaidi ya vile ambavyo maumbile yangeweza kutufundisha. Mwili na damu havikutufunulia Mungu. Kristo Yesu amemjulisha Baba mioyoni mwetu. Basi, ikiwa Bwana ametufanya tumjue yeye mwenyewe, je, hii si chemchemi ya maarifa yote yaokoayo? Kumjua Mungu ni uzima wa milele. Mara tu tunapofikia kumfahamu Mungu, twapata ushuhuda wa kuhuishwa katika upya wa uzima. Ee nafsi yangu, furahi katika maarifa haya, umhimidi Mungu wako mchana huu wote!

Aprili 12

HAKUMBUKI TENA

"Kwa maana nitausamehe uovu wao, wala dhambi yao sitaikumbuka tena" Yer. 31:34

Tumjuapo Bwana, twapokea msamaha wa dhambi. Twamjua kuwa Mungu wa Neema, apitaye makosa yetu. Ni ugunduzi wenye furaha kama nini huu!

Lakini ahadi hii imetungwa kwa jinsi ya kimungu iliyoje: Bwana anaahidi kutokumbuka tena dhambi zetu! Je, Mungu aweza kusahau? Asema atafanya hivyo, naye anamaanisha asemalo. Atatuhesabu kana kwamba hatukutenda dhambi kamwe. Upatanisho ule mkuu uliziondoa dhambi zote kwa nguvu kiasi kwamba, kwa nia ya Mungu, hazipo tena. Mwenye kuamini sasa yu ndani ya Kristo Yesu, akikubaliwa kama Adamu katika hali yake ya kutokuwa na hatia; naam, zaidi ya hayo, kwa maana amevaa haki ya kimungu, na ile ya Adamu ilikuwa ya kibinadamu tu.

Bwana Mkuu hatazikumbuka dhambi zetu hata aziadhibu, wala hata atupende hata kidogo kwa upungufu kwa sababu yake. Kama vile deni lilipwapo lisivyokuwa deni tena, ndivyo Bwana afanyavyo ufutaji kamili wa uovu wa watu wake.

Tunapoyaombolezea makosa na mapungufu yetu, na hii ni wajibu wetu maadamu tunaishi, na tufurahi wakati uo huo kwamba kamwe hayatatajwa juu yetu. Jambo hili hutufanya kuichukia dhambi. Msamaha wa Mungu wa bure hutufanya tuwe na shauku ya kutomhuzunisha tena kamwe kwa kutokutii.

Aprili 13

MWILI HUU UTAKAOFANYWA UPYA

"Atakayeubadili mwili wetu wa unyonge, upate kufanywa mfano wa mwili wake wa utukufu" Flp. 3:21

Mara nyingi tunapoteswa na maumivu, tusiweze kufikiri au kuabudu, twahisi kwamba huu kweli ni "mwili wa unyonge wetu," na tunapojaribiwa na tamaa zichipukazo kutoka katika mwili hatuoni neno "wa unyonge" kuwa tafsiri iliyo na nguvu kupita kiasi hata kidogo. Miili yetu hutunyenyekesha; na hilo ndilo jambo bora kabisa waitufanyialo. Laiti tungekuwa wanyenyekevu ipasavyo, kwa sababu miili yetu hutuunganisha na wanyama, na hata hutufungamanisha na mavumbi!

Lakini Mwokozi wetu, Bwana Yesu, atavibadili vyote hivi. Tutafanywa mfano wa mwili wake mwenyewe wa utukufu. Jambo hili litawatokea wote wamwaminio Yesu. Kwa imani nafsi zao zimegeuzwa, na miili yao itapata upya utakaoifanya iwafae roho zao zilizozaliwa upya. Ni upesi kiasi gani mabadiliko haya makuu yatakuja hatuwezi kusema; lakini wazo lake latupasa kutusaidia kuvumilia mateso ya leo, na taabu zote za mwili. Baada ya kitambo kidogo tutakuwa kama Yesu alivyo sasa. Hakuna paji zenye maumivu tena, hakuna viungo vilivyovimba tena, hakuna macho yaliyofifia tena, hakuna mioyo izimiayo tena. Yule mtu wa kale hatakuwa tena furushi la udhaifu, wala mgonjwa fungu la maumivu. "Mfano wa mwili wake wa utukufu." Ni usemi wa ajabu ulioje! Hata mwili wetu utapumzika katika tumaini la ufufuo kama huo!

Aprili 14

UCHAGUZI WANGU NI UCHAGUZI WAKE

"Atatuchagulia urithi wetu" Zab. 47:4

Adui zetu wangetugawia fungu lenye huzuni sana, lakini hatukuachwa mikononi mwao. Bwana atatufanya tusimame katika fungu letu, na mahali petu pameamriwa na hekima yake isiyo na mwisho. Akili yenye hekima kuliko yetu wenyewe hupanga hatima yetu. Kuamriwa kwa mambo yote kuko kwa Mungu, nasi twafurahi kuwa hivyo; twachagua kwamba Mungu atuchagulie. Kama tungeweza kupata matakwa yetu wenyewe, tungependa kuyaacha mambo yote yaende kwa njia ya Mungu.

Kwa kuwa twafahamu upumbavu wetu wenyewe, hatungependa kuzitawala hatima zetu wenyewe. Twahisi salama zaidi na raha zaidi Bwana aiongozapo merikebu yetu kuliko tuwezavyo kuwa kamwe kama tungeweza kuiongoza kwa kufuata hukumu yetu wenyewe. Kwa furaha twaziacha nyakati za sasa zenye maumivu na wakati ujao usiojulikana kwa Baba yetu, Mwokozi wetu, Mfariji wetu.

Ee nafsi yangu, siku hii yaweke matakwa yako miguuni pa Yesu! Kama siku hizi umekuwa mkaidi na mshupavu kidogo, ukitamani kuwa na kutenda kwa kufuata nia yako mwenyewe, sasa iondoe nafsi yako ya kipumbavu, na uziweke hatamu mikononi mwa Bwana. Sema, "Yeye atachagua." Kama wengine wakibisha juu ya enzi ya Bwana, na kujisifu katika hiari ya mwanadamu, wewe uwajibu, "Yeye atanichagulia." Ni uchaguzi wangu ulio huru kabisa kumwacha yeye achague. Kama mtu aliye huru, nachagua kwamba yeye awe na mamlaka kamili.

Aprili 15

HAJA ZA MWENYE HAKI HUTIMIZWA

"Haja ya wenye haki itatimizwa" Mith. 10:24

Kwa sababu ni haja ya haki, ni salama kwa Mungu kuitimiza. Isingekuwa jambo jema kwa mtu mwenyewe, wala kwa jamii kwa ujumla, kwamba ahadi kama hiyo ifanywe kwa wasio haki. Na tuzishike amri za Bwana, naye kwa haki atazijali haja zetu.

Watu wenye haki wanapoachwa kutamani haja zisizo za haki, hazitatimizwa kwao. Lakini basi hizo si haja zao za kweli; ni upotevu wao au makosa yao; nayo ni vema zikataliwe. Haja zao zenye neema zitafika mbele za Bwana, naye hatawakatalia.

Je, Bwana anatunyima maombi yetu kwa muda? Ahadi ya leo na itutie moyo kuomba tena. Je, ametukatalia kabisa? Tutamshukuru hata hivyo, kwa maana sikuzote ilikuwa haja yetu kwamba atukatalie kama akihukumu kwamba kukataa ndiko kulio bora.

Kwa habari ya mambo mengine, twaomba kwa ujasiri mkubwa. Haja zetu kuu ni za utakatifu, kufaa, kufanana na Kristo, kuwa tayari kwa Mbingu. Hizi ni haja za neema kuliko za maumbile -- haja za mtu mwenye haki kuliko za mtu wa kawaida tu. Mungu hatatunyima katika mambo haya, bali atatutendea kwa wingi upitao kiasi. "Nawe utajifurahisha katika Bwana, naye atakupa haja za moyo wako." Siku hii, ee nafsi yangu, omba kwa wingi!

Aprili 16

VYOTE VIGEUZWA UTAKATIFU

"Siku hiyo, juu ya njuga za farasi kutaandikwa, UTAKATIFU KWA BWANA" Zek. 14:20

Siku ya furaha ambapo vitu vyote vitawekwa wakfu, na njuga za farasi zitalia utakatifu kwa Bwana! Siku hiyo imenijia mimi. Je, sivifanyi vitu vyote kuwa vitakatifu kwa Mungu? Mavazi haya, ninapoyavaa au kuyavua, je, hayatanikumbusha haki ya Kristo Yesu, Bwana wangu? Je, kazi yangu haitafanywa kama kwa Bwana? Laiti leo mavazi yangu yawe mavazi ya kikuhani, chakula changu sakramenti, nyumba yangu hekalu, meza yangu madhabahu, maneno yangu uvumba, na mimi mwenyewe kuhani! Bwana, itimize ahadi yako, wala kisiwe kitu kwangu cha kawaida au najisi.

Na nilitarajie hili kwa imani. Kwa kuamini kwamba ni hivyo, nitasaidiwa kulifanya liwe hivyo. Kwa kuwa mimi mwenyewe ni mali ya Yesu, Bwana wangu aweza kuandika orodha ya vyote nilivyo navyo, kwa maana ni mali yake kabisa; nami nimeazimia kulithibitisha kuwa hivyo kwa matumizi nitakayoyafanya nayo siku hii. Tangu asubuhi hata jioni ningeyapanga mambo yote kwa kanuni yenye furaha na takatifu. Njuga zangu zitalia—kwa nini zisilie? Hata farasi zangu watakuwa na njuga -- ni nani aliye na haki ya muziki kama walivyo watakatifu? Lakini njuga zangu zote, muziki wangu, furaha yangu, vitageuzwa kuwa utakatifu, na vitalia jina la "Mungu Mwenye Furaha."

Aprili 17

ADUI WAFANYWA KUWA NA AMANI

"Njia za mtu zikimpendeza Bwana, huwafanya hata adui zake wawe na amani naye" Mith. 16:7

Ni lazima nihakikishe kwamba njia zangu zinampendeza Bwana. Hata hapo nitakuwa na adui; na, huenda, kwa hakika zaidi kwa sababu najitahidi kufanya lililo haki. Lakini ni ahadi iliyoje hii! Bwana atafanya ghadhabu ya mwanadamu imsifu yeye, na kuipunguza hata isije ikanihuzunisha.

Aweza kumlazimisha adui aache kunidhuru, hata ingawa ana nia ya kufanya hivyo. Hivi alifanya kwa Labani, aliyemfuatia Yakobo, lakini hakuthubutu kumgusa. Au aweza kuituliza ghadhabu ya adui, na kumfanya awe rafiki, kama alivyofanya kwa Esau, aliyekutana na Yakobo kwa jinsi ya kindugu, ijapokuwa Yakobo aliogopa kwamba angempiga yeye na jamaa yake kwa upanga. Bwana aweza pia kumgeuza adui mkali kuwa ndugu katika Kristo, na mtenda kazi mwenzake, kama alivyofanya kwa Sauli wa Tarso. Laiti angefanya hivi katika kila hali ambapo roho ya kutesa inapotokea!

Heri mtu ambaye adui zake hufanywa kuwa kwake kama vile simba walivyokuwa kwa Danieli pangoni, watulivu na wenye kuandamana naye! Nitakapokutana na mauti, aitwaye adui wa mwisho, naomba niwe na amani. Ila jambo langu kuu na liwe kumpendeza Bwana katika mambo yote. Laiti ningekuwa na imani na utakatifu; kwa maana hivi ni furaha kwa Aliye Juu Sana!

Aprili 18

YEYE HAKOSI KAMWE

"Nitakuwa pamoja nawe; sitakupungukia, wala sitakuacha" Yos. 1:5

Neno hili kwa Yoshua hunukuliwa mara nyingi; ndilo msingi wa lile neno la Agano Jipya, "Yeye mwenyewe amesema, Sitakupungukia kamwe, wala sitakuacha kamwe."

Wapendwa, maisha ya vita yako mbele yetu, lakini Bwana wa Majeshi yu pamoja nasi. Je, tumeitwa kuwaongoza watu wakuu lakini wasio na uthabiti? Ahadi hii inatuhakikishia hekima yote na busara tutakayohitaji. Je, tunapaswa kushindana na adui werevu na wenye nguvu? Hapa pana nguvu na ushujaa, uhodari na ushindi. Je, tuna urithi mkubwa wa kuutwaa? Kwa ishara hii tutalifikia kusudi letu; Bwana mwenyewe yu pamoja nasi.

Ingekuwa ole kwetu kweli kama Yehova angeweza kutupungukia; lakini, kwa kuwa hili haliwezi kuwa kamwe, pepo za fadhaa zimelazwa zilale katika mapango ya uaminifu wa kimungu. Hakuna hata mara moja ambayo Bwana atatuacha. Litokee lolote, atakuwa upande wetu. Rafiki hutuacha, msaada wao ni kama manyunyu ya Aprili tu; lakini Mungu ni mwaminifu, Yesu ni yeye yule milele, na Roho Mtakatifu hukaa ndani yetu.

Njoo, ee moyo wangu, uwe mtulivu na mwenye tumaini leo. Mawingu yaweza kukusanyika, lakini Bwana aweza kuyapeperusha yaende. Kwa kuwa Mungu hatanipungukia, imani yangu haitapungukia; na, kwa kuwa hataniacha, wala mimi sitamwacha yeye. Laiti ningekuwa na imani yenye pumziko!

Aprili 19

MTAFUTAJI HODARI

"Kwa maana Bwana MUNGU asema hivi; Tazama, mimi, naam, mimi mwenyewe, nitawatafuta kondoo zangu, na kuwaulizia" Kut. 34:11

Jambo hili hulifanya mwanzoni ambapo wateule wake ni kama kondoo wanaotanga-tanga wasiomjua Mchungaji wala zizi. Ni kwa ajabu iliyoje Bwana huwapata wateule wake! Yesu ni mkuu kama Mchungaji atafutaye kadhalika kama Mchungaji aokoaye. Ijapokuwa wengi wa wale ambao Baba yake alimpa wamekwenda karibu na mlango wa jehanamu kadiri wawezavyo, lakini Bwana kwa kutafuta na kuulizia huwavumbua, na kuwakaribia kwa neema. Ametutafuta sisi: na tuwe na tumaini jema kwa wale wanaowekwa mioyoni mwetu katika maombi, kwa maana atawavumbua wao pia.

Bwana hurudia mwenendo huu wakati wowote mmoja wa kundi lake apotokapo kutoka malisho ya kweli na utakatifu. Waweza kuanguka katika kosa kubwa, dhambi ya kusikitisha, na ugumu wa moyo wenye kuhuzunisha; lakini bado Bwana, aliyekuwa mdhamini wao kwa Baba yake, hatamwacha hata mmoja wao aende mbali hata aangamie. Kwa maongozi na neema atawafuatia hata nchi za ugenini, hata makao ya umaskini, hata mapango ya kutojulikana, hata vilindi vya kukata tamaa; hatampoteza hata mmoja wa wale wote ambao Baba amempa. Ni jambo la heshima kwa Yesu kutafuta na kuokoa kundi lote, bila kumwacha hata mmoja. Ni ahadi iliyoje ya kuiomba, ikiwa saa hii nalazimika kulia, "Nimepotea kama kondoo aliyepotea"!

Aprili 20

KWA IMANI SI KWA HISIA

"Mwenye haki ataishi kwa imani" Rum. 1:17

Sitakufa. Naweza, naamini, katika Bwana Mungu wangu, na imani hii itaniweka hai. Ningependa kuhesabiwa miongoni mwa wale ambao katika maisha yao ni wenye haki; lakini hata kama ningekuwa mkamilifu nisingejaribu kuishi kwa haki yangu; ningeshikamana na kazi ya Bwana Yesu, na bado kuishi kwa imani ndani yake wala si kwa kitu kingine chochote. Kama ningeweza kuutoa mwili wangu uchomwe moto kwa ajili ya Bwana wangu Yesu, hata hivyo nisingejitumainia ujasiri na uthabiti wangu mwenyewe, bali bado ningeishi kwa imani.

"Kama ningekuwa shahidi mtini pa kuchomwa

Ningeliomba kwa jina la Mwokozi wangu;

Ningesihi msamaha kwa ajili yake,

Wala nisingedai dai jingine lolote."

Kuishi kwa imani ni jambo lililo hakika zaidi na lenye furaha zaidi kuliko kuishi kwa hisia au kwa matendo. Tawi, kwa kukaa ndani ya mzabibu, huishi maisha bora kuliko yale ambayo lingeishi lenyewe, hata kama ingewezekana liishi kabisa mbali na shina. Kuishi kwa kushikamana na Yesu, kwa kupata vyote kutoka kwake, ni jambo tamu na takatifu. Ikiwa hata mwenye haki kuliko wote lazima aishi kwa jinsi hii, si zaidi sana mimi niliye mwenye dhambi maskini! Bwana, naamini. Ni lazima nikutumaini kabisa. Ni nini kingine niwezacho kufanya? Kukutumaini wewe ndio uzima wangu. Nahisi kuwa ni hivyo. Nitadumu katika hili hata mwisho.

Aprili 21

MUNGU HULIPA

"Amhurumiaye maskini humkopesha Bwana; na kwa tendo lake jema atamlipa" Mith. 19:17

Twapaswa kuwapa maskini kwa huruma. Si ili tuonekane na kusifiwa, sembuse kupata mamlaka juu yao; bali kwa moyo wa kuwahurumia na kuwaonea huruma safi twapaswa kuwapa msaada.

Hatupaswi kutazamia kupokea kitu chochote kutoka kwa maskini, hata shukrani; bali twapaswa kulihesabu lile tulilofanya kuwa mkopo kwa Bwana. Yeye huchukua wajibu, na, kama tukimtazama yeye katika jambo hilo, hatupaswi kumtazama yule mtu wa pili. Ni heshima iliyoje Bwana atupatiayo anaposhusha hadhi yake kutukopa sisi! Mfanyabiashara yule hupendelewa sana aliye na Bwana katika vitabu vyake. Ingekuwa jambo la kusikitisha kuwa na jina kama hilo limeandikwa kwa kiasi kidogo duni; na tulifanye liwe kiasi kikubwa. Mtu mhitaji ajaye njia hii baadaye, na tumsaidie.

Kwa habari ya kulipwa hatuwezi kulifikiria kirahisi, na bado hapa pana hati ya ahadi ya Bwana. Jina lake libarikiwe, ahadi yake ya kulipa ni bora kuliko dhahabu na fedha. Je, tunapungukiwa kidogo kwa sababu ya ugumu wa nyakati? Twaweza kuthubutu kwa unyenyekevu kuiwasilisha hati hii katika Benki ya Imani. Je, yeyote wa wasomaji wetu amekuwa mchoyo kidogo kwa maskini? Nafsi maskini. Bwana na amsamehe.

Aprili 22

NGUVU YA KUINUA

"Bwana huwafumbua vipofu macho; Bwana huwainua walioinama" Zab. 146:8

Je, nimeinama? Basi na nilisihi neno hili la neema mbele za Bwana. Ni njia yake, ni desturi yake, ni ahadi yake, ni furaha yake, kuwainua walioinama. Je, ni hisia ya dhambi, na kushuka moyo kunakofuata, kunanihuzunisha sasa? Basi kazi ya Yesu, katika hali hii, imefanywa na kutolewa ili kuniinua niingie katika pumziko. Ee Bwana, niinue, kwa ajili ya rehema zako!

Je, ni msiba wa kuhuzunisha, au kushuka kukubwa kwa hali? Hapa tena Mfariji amejitwika kazi ya kufariji. Ni rehema iliyoje kwetu kwamba mtu mmoja wa Utatu Mtakatifu awe Mfariji! Kazi hii itafanywa vema, kwa kuwa Aliye mtukufu jinsi hiyo ameifanya kuwa jukumu lake la pekee.

Wengine wameinama kiasi kwamba ni Yesu peke yake awezaye kuwafungua kutoka udhaifu wao, lakini yeye aweza, naye atafanya hivyo. Aweza kutuinua tupate afya, tumaini, furaha. Amefanya hivyo mara nyingi katika mateso yaliyopita, naye ni Mwokozi yeye yule, na atayarudia matendo yake ya fadhili. Sisi tulioinama na kuhuzunika leo, tutainuliwa juu, na wale wanaotudhihaki sasa wataona haya kubwa. Ni heshima iliyoje kuinuliwa na Bwana! Yafaa kuinama ili tupate kuuonja uweza wake wa kuinua.

Aprili 23

BILA HOFU YA MAUTI

"Yeye aliye na sikio na alisikie neno hili ambalo Roho ayaambia makanisa; yeye ashindaye hatapatikana na madhara ya mauti ya pili" Ufu. 2:11

Mauti ya kwanza ni lazima tuivumilie, isipokuwa Bwana aje ghafla katika hekalu lake. Kwa ajili ya hili na tudumu tayari, tukiyangoja bila hofu, kwa kuwa Yesu ameyageuza mauti kutoka pango lenye huzuni kuwa njia iongozayo kwenye utukufu.

Kitu cha kuogopwa si mauti ya kwanza, bali ya pili; si kutengana kwa nafsi na mwili, bali kutengana kwa mwisho kwa mtu mzima na Mungu. Hii ndiyo mauti kweli. Mauti hii huua amani yote, furaha, raha, tumaini. Mungu akiondoka vyote vimeondoka. Mauti kama hiyo ni mbaya zaidi kuliko kukoma kuwako: ni kuwako bila uzima ule ufanyao kuwako kufae kupatikana.

Basi, ikiwa kwa neema ya Mungu tunapigana hata mwisho, na kushinda katika vita vile vitukufu, hakuna mauti ya pili iwezayo kuweka kidole chake cha baridi juu yetu. Hatutakuwa na hofu ya mauti na jehanamu, kwa maana tutapokea taji ya uzima isiyonyauka. Jinsi hili litiavyo nguvu kwa vita! Uzima wa milele wastahili vita vya maisha yote. Kuepuka madhara ya mauti ya pili ni jambo linalostahili kupiganiwa maisha yote.

Bwana, utupe imani, ili tupate kushinda, kisha utujalie neema tubaki bila kudhurika ijapokuwa dhambi na Shetani wanatufuatia kwa nyayo!

Aprili 24

SHARTI LA BARAKA

"Leteni zaka kamili ghalani, ili kiwe chakula katika nyumba yangu, mkanijaribu kwa njia hiyo, asema Bwana wa majeshi; mtaona kama sitawafungulia madirisha ya mbinguni, na kuwamwagieni baraka, hata isiwepo nafasi ya kutosha kuipokea," Mal. 3:10

Wengi husoma na kuiomba ahadi hii bila kulitambua sharti ambalo juu yake baraka imeahidiwa. Hatuwezi kutazamia Mbingu zifunguliwe au baraka imwagwe isipokuwa tulipe deni letu kwa Bwana Mungu wetu na kwa kazi yake. Hakungekuwa na uhaba wa fedha kwa makusudi matakatifu kama Wakristo wote wanaokiri wangelipa fungu lao la haki.

Wengi ni maskini kwa sababu wanamnyang'anya Mungu. Makanisa mengi, pia, hukosa maonjo ya Roho kwa sababu wanawafanya watumishi wao njaa. Kama hakuna chakula cha mwili kwa watumishi wa Mungu, si ajabu kama huduma yao ina chakula kidogo tu ndani yake kwa nafsi zetu. Misheni zinaposhindwa kupata mahitaji, na kazi ya Bwana inapozuiliwa na hazina tupu, twawezaje kutazamia wingi mkubwa wa mafanikio ya nafsi?

Njoo, njoo! Nimetoa nini siku hizi? Je, nimekuwa mchoyo kwa Mungu wangu? Je, nimemnyima Mwokozi wangu? Jambo hili halitafaa kamwe. Na nimpe Bwana wangu Yesu zaka yake kwa kuwasaidia maskini, na kuisaidia kazi yake, ndipo nitakapouthibitisha uweza wake wa kunibariki kwa kipimo kikubwa.

Aprili 25

NINI CHA KUWAACHIA WATOTO

"Mtu mwenye haki aendaye katika unyofu wake; wana wake wanabarikiwa baada yake" Mith. 20:7

Wasiwasi juu ya jamaa yetu ni jambo la kimaumbile, lakini tutakuwa na hekima kama tukiugeuza uwe uangalifu juu ya tabia yetu wenyewe. Tukienenda mbele za Bwana katika unyofu, tutafanya zaidi kuwabariki wazao wetu kuliko kama tungewarithisha mashamba makubwa. Maisha matakatifu ya baba ni urithi wenye thamani kwa wanawe.

Mtu mnyofu huwaachia warithi wake kielelezo chake, na hiki chenyewe kitakuwa shimo la utajiri wa kweli. Ni watu wangapi wawezao kufuatisha mafanikio yao maishani hata kielelezo cha wazazi wao!

Huwaachia pia sifa yake njema. Watu hutuwazia vema zaidi kwa kuwa sisi ni wana wa mtu aliyeweza kuaminiwa, warithi wa mfanyabiashara mwenye sifa bora. Laiti vijana wote wangekuwa na shauku ya kulidumisha jina la jamaa!

Zaidi ya yote, huwaachia watoto wake sala zake na baraka ya Mungu asikiaye sala, na hivi hufanya wazao wetu kupendelewa miongoni mwa wanadamu. Mungu atawaokoa hata sisi tutakapokuwa tumekufa. Laiti wangeokolewa mara moja!

Unyofu wetu waweza kuwa njia ya Mungu ya kuwaokoa wana wetu na binti zetu. Wakiona kweli ya dini yetu ikithibitishwa na maisha yetu, huenda watamwamini Yesu wao wenyewe. Bwana, litimize neno hili kwa nyumba yangu!

Aprili 26

KUTENDA KWA NEEMA

"Naye Bwana, Mungu wako, atakubariki katika kila kazi ufanyayo" Kum. 15:18

Bwana Mwisraeli alipaswa kumpa mtumwa wake uhuru wakati wake ufaao, na alipoiacha kazi yake alipaswa kumwanzishia maisha kwa fungu la ukarimu. Jambo hili lilipaswa kufanywa kwa moyo na kwa uchangamfu, ndipo Bwana aliahidi kulibariki tendo hilo la ukarimu. Roho ya agizo hili, na, kwa kweli, sheria yote ya Kristo, hutufunga tuwatende vema wafanya kazi. Yatupasa kukumbuka jinsi Bwana alivyotutendea, na kwamba jambo hili hulifanya kuwa la lazima kabisa kwamba tuwatendee wengine kwa neema. Yawapasa kuwa wakarimu wale walio watoto wa Mungu mwenye neema. Twawezaje kutazamia Bwana wetu mkuu atubariki katika biashara yetu ikiwa tunawaonea wale wanaotutumikia?

Ni baraka iliyoje iliyowekwa hapa mbele ya nia ya ukarimu! Kubarikiwa katika yote tunayoyafanya ni kubarikiwa kweli. Bwana atatuletea baraka hii kwa sehemu katika kufanikiwa, kwa sehemu katika kutosheka kwa nia, na kwa sehemu katika hisia ya upendeleo wake, ambayo ndiyo bora ya baraka zote. Aweza kutufanya tuhisi kwamba tuko chini ya uangalizi wake wa pekee, na kwamba tumezungukwa na upendo wake wa pekee. Jambo hili hufanya maisha haya ya duniani kuwa utangulizi wenye furaha kwa maisha yajayo. Baraka ya Mungu ni zaidi ya mali. Hutajirisha, wala haichanganyi huzuni pamoja nayo.

Aprili 27

MUNGU HUIKAMILISHA KAZI YAKE

"Bwana atanitimizia yale yanayonihusu" Zab. 138:8

Yeye aliyeanza ataiendeleza kazi itendekayo ndani ya nafsi yangu. Bwana hujali kila jambo linihusulo. Yote yaliyo mema sasa, lakini bado hayajakamilika, Bwana atayalinda, na kuyahifadhi, na kuyafikisha ukamilifu. Hii ni faraja kubwa. Mimi mwenyewe nisingeweza kuikamilisha kazi ya neema. Kwa hilo nina hakika kabisa, kwa maana nashindwa kila siku, nami nimeshikilia muda huu wote nilio nao kwa sababu tu Bwana amenisaidia. Kama Bwana angeniacha, uzoefu wangu wote uliopita ungekuwa bure, nami ningeangamia njiani. Lakini Bwana ataendelea kunibariki. Ataikamilisha imani yangu, upendo wangu, tabia yangu, kazi ya maisha yangu. Atafanya hivi kwa sababu ameanza kazi ndani yangu. Yeye alinipa lile jali ninalolihisi, na, kwa kiasi fulani, ameyatimiza matarajio yangu ya neema. Yeye hakomeshi kazi bila kuimaliza; jambo hili halingekuwa kwa utukufu wake, wala halingekuwa kama yeye. Yeye ajua jinsi ya kulitimiza kusudi lake la neema, na ijapokuwa asili yangu mbovu na ulimwengu, na ibilisi, vyote hushirikiana kumzuia, mimi sitilii shaka ahadi yake. Atatimiza yale yanayonihusu, nami nitamsifu milele. Bwana, iache kazi yako ya neema ifanye maendeleo fulani siku hii!

Aprili 28

HUWA JAMBO LA PANDE ZOTE MBILI

"Nitakaa ndani yao, na kutembea ndani yao; nami nitakuwa Mungu wao, nao watakuwa watu wangu" 2 Kor. 6:16

Hapa pana masilahi ya pande zote mbili. Kila mmoja ni mali ya mwenzake. Mungu ni fungu la watu wake, na watu wateule ni fungu la Mungu wao. Watakatifu hupata katika Mungu miliki yao kuu, naye huwahesabu kuwa hazina yake ya pekee. Ni shimo la faraja lililoje lililoko katika ukweli huu kwa kila mwenye kuamini!

Hali hii ya furaha ya masilahi ya pande zote mbili huleta kujaliana kwa pande zote mbili. Mungu atawafikiria daima watu wake mwenyewe, nao watamfikiria yeye daima. Siku hii Mungu wangu atanitendea mambo yote; mimi naweza kumtendea nini yeye? Fikira zangu zapasa kumwelekea, kwa maana yeye hunifikiria mimi. Na nihakikishe kwamba ni hivyo, wala nisitosheke kwa kukiri tu kwamba yapasa kuwa hivyo.

Hili, tena, huleta ushirika wa pande zote mbili. Mungu hukaa ndani yetu, nasi twakaa ndani yake; yeye hutembea nasi nasi twatembea na Mungu. Ushirika wa furaha ulioje huu!

Laiti ningekuwa na neema ya kumtendea Bwana kama Mungu wangu: kumtumaini na kumtumikia, kama Uungu wake ustahilivyo! Laiti ningeweza kumpenda, kumwabudu, kumsujudia, na kumtii Yehova katika roho na kweli! hii ndiyo haja ya moyo wangu. Nitakapoifikia, nitakuwa nimeipata Mbingu yangu. Bwana, unisaidie! Uwe Mungu wangu kwa kunisaidia nikujue wewe kuwa Mungu wangu, kwa ajili ya Yesu.

Aprili 29

SAHAU NA USAMEHE

"Usiseme, Nitalipa uovu; mngoje Bwana, naye atakuokoa" Mith. 20:22

Usifanye haraka. Acha hasira ipoe. Usiseme neno wala usifanye lolote kujilipiza kisasi. Kwa hakika utatenda bila hekima ukishika rungu na kupigana vita vyako mwenyewe; na, bila shaka, hutaonyesha roho ya Bwana Yesu. Ni jambo tukufu zaidi kusamehe, na kuliacha kosa lipite. Kuacha jeraha lidumu kifuani mwako, na kutafakari kisasi, ni kuyaweka wazi majeraha ya zamani, na kufanya mapya. Ni afadhali kusahau na kusamehe.

Huenda, wasema kwamba lazima ufanye jambo fulani au utakuwa mwenye hasara kubwa; basi fanya lile ahadi ya asubuhi hii ishauriyo: "Mngoje Bwana, naye atakuokoa." Shauri hili halitakugharimu fedha, lakini lina thamani kubwa zaidi. Uwe mtulivu na kimya. Umngoje Bwana: umwambie malalamiko yako: itandaze barua ya Rabshake mbele za Bwana, na jambo hili lenyewe litakuwa faraja kwa akili yako iliyolemewa. Zaidi ya hayo, kuna ahadi, "Atakuokoa." Mungu atakutafutia njia ya wokovu. Jinsi atakavyofanya wewe wala mimi hatuwezi kubashiri, lakini kwa hakika atafanya. Ikiwa Bwana atakuokoa, jambo hili litakuwa afadhali sana kuliko kuingia katika ugomvi mdogo, na kujifunika uchafu kwa kushindana na aliye najisi. Usikasirike tena. Iache kesi yako kwa Hakimu wa wote.

Aprili 30

THAWABU YA MSHINDI

"Yeye ashindaye nitampa baadhi ya ile mana iliyofichwa, nami nitampa jiwe jeupe, na juu ya jiwe hilo jina jipya limeandikwa, asilolijua mtu ila yeye anayelipokea" Ufu. 2:17

Ee moyo wangu, uchochewe kudumu katika vita takatifu, kwa maana thawabu ya ushindi ni kubwa. Leo twala chakula cha mbinguni kianguacho kandokando ya kambi zetu; chakula cha jangwani, chakula kishukacho kutoka Mbinguni, chakula kisichowapungukia kamwe wasafiri waendao Kanaani. Lakini kumewekwa akiba kwa ajili yetu katika Kristo Yesu daraja lililo juu zaidi la uzima wa kiroho, na chakula kwa ajili yake ambacho, hata sasa, kimefichwa kutoka uzoefu wetu. Katika lile gudulia la dhahabu lililowekwa ndani ya sanduku kulikuwa na sehemu ya mana iliyofichwa, ambayo ijapokuwa iliwekwa miaka mingi haikuharibika kamwe. Hakuna aliyeiona kamwe; ilifichwa pamoja na sanduku la agano, katika Patakatifu pa Patakatifu. Vivyo hivyo, uzima ulio juu kabisa wa mwenye kuamini umefichwa pamoja na Kristo, katika Mungu. Tutaufikia karibuni. Kwa kufanywa washindi kwa neema ya Bwana wetu Yesu, tutakula chakula cha Mfalme, na kujilisha vitu vitamu vya kifalme. Tutajilisha kwa Yesu. Yeye ni "mana yetu iliyofichwa" na pia mana ya jangwani. Yeye ni yote katika yote kwetu katika hali yetu iliyo juu kabisa, na katika hali yetu iliyo chini kabisa. Hutusaidia kupigana, hutupa ushindi, kisha yeye mwenyewe ndiye thawabu yetu. Bwana, unisaidie nishinde.