Mwezi wa Machi

Machi 1

FURAHA KWA WALIOTUPWA NJE

"Lisikieni neno la Bwana, ninyi mnaotetemeka kwa neno lake; Ndugu zenu waliowachukia, waliowatupa nje kwa ajili ya jina langu, walisema, Bwana na atukuzwe; lakini yeye atatokea kwa furaha yenu, nao watatahayari." Isaya 66:5

Yamkini andiko hili halimhusu hata mmoja katika elfu ya wasomaji wa kitabu hiki kidogo cha ahadi; lakini Bwana humtia moyo yule mmoja kwa maneno kama haya. Na tuwaombee wote wanaotupwa nje isivyo haki kutoka katika jamii wanayoipenda. Bwana na atokee kwa furaha yao!

Andiko hili lawahusu watu wenye neema kweli kweli, wanaotetemeka kwa neno la Bwana. Hawa walichukiwa na ndugu zao, na hatimaye wakatupwa nje kwa sababu ya uaminifu wao na utakatifu wao. Jambo hili lazima liliwauma sana; na zaidi sana kwa kuwa kutupwa kwao nje kulifanyika kwa jina la dini, na kwa madai ya kumtukuza Mungu. Ni mengi kama nini yanayotendwa kwa ajili ya Ibilisi katika jina la Mungu! Kulitumia jina la Yehova ili kuongeza sumu kwenye kuuma kwa nyoka wa zamani ni mfano wa hila zake.

Kutokea kwa Bwana kwa ajili yao ndilo tumaini la watu wake wanaoteswa. Yeye hutokea kama wakili na mtetezi wa wateule wake; na afanyapo hivyo, humaanisha wokovu ulio dhahiri kwa wamchao Mungu, na aibu kwa wanaowaonea. Ee Bwana, litimize neno hili kwa wale ambao watu wanawadhihaki!

Machi 2

KUTOA BILA KUNONG'ONA

"Bali wewe utoapo sadaka, hata mkono wako wa kushoto usijue ufanyalo mkono wako wa kuume: sadaka yako iwe kwa siri: na Baba yako aonaye sirini yeye mwenyewe atakujazi kwa dhahiri." Mathayo 6:3,4

Hakuna ahadi iliyofanywa kwa wale wanaowapa maskini ili waonwe na watu. Wamekwisha pata thawabu yao mara moja, wala hawawezi kutazamia kulipwa mara mbili.

Na tuifiche hisani yetu; -- naam, tuifiche hata nafsi zetu zisijue. Toa mara nyingi na kwa wingi kama jambo la kawaida, hata usiangalie tena kwamba umemsaidia maskini kuliko uangaliavyo kwamba umekula chakula chako cha kawaida. Fanya sadaka zako bila hata kujinong'oneza mwenyewe, "Mimi ni mkarimu kama nini!" Usijaribu hivyo kujilipa mwenyewe thawabu. Liache jambo hilo kwa Mungu, ambaye hakosi kamwe kuona, kuandika, na kulipa. Heri mtu ashughulikaye kwa siri na wema wake: yeye hupata furaha ya pekee katika hisani zake zisizojulikana. Hii ndiyo mkate, ambao ukiliwa kwa siri, ni mtamu kuliko karamu za wafalme. Nawezaje kujistarehesha leo kwa anasa hii ipendezayo? Na niwe na karamu ya kweli ya wororo na mmiminiko wa moyo.

Hapa na huko baadaye Bwana, mwenyewe, atashughulikia binafsi kumlipa yeye atoaye sadaka kwa siri. Hili litakuwa kwa njia yake na wakati wake mwenyewe; naye atachagua lililo bora kabisa. Ahadi hii inamaanisha mengi kiasi gani, itahitaji umilele kufunua.

Machi 3

KUTOACHWA KUANGAMIA

"Maana hutaiacha nafsi yangu kuzimu; wala hutamwacha mtakatifu wako aone uharibifu." Zaburi 16:10

Neno hili lina utimizo wake sahihi katika Bwana Yesu; lakini pia lawahusu, kwa tofauti kidogo, wote walio ndani yake. Nafsi yetu haitaachwa katika hali ya kutengana, na mwili wetu, ujapoona uharibifu, utafufuka tena. Maana ya jumla, kuliko matumizi yake mahususi, ndiyo tunayotaka kuielekeza mawazo ya wasomaji wetu wakati huu wa pekee.

Twaweza kushuka rohoni chini sana hata tukaonekana tumezama katika shimo la kuzimu; lakini hatutaachwa humo. Twaweza kuonekana kama tuko mlangoni pa mauti moyoni, na nafsini, na fahamuni; lakini hatuwezi kukaa humo. Kufa kwetu kwa ndani kwa habari ya furaha na tumaini kwaweza kwenda mbali sana; lakini hakuwezi kuendelea mpaka matokeo yake kamili, hata kufikia uharibifu kamili wa kukata tamaa kulikojaa giza. Twaweza kwenda chini sana, lakini si chini kuliko Bwana aruhusuvyo; twaweza kukaa katika shimo la chini kabisa la shaka kwa muda, lakini hatutaangamia humo. Nyota ya tumaini ingali mbinguni hata usiku uwapo na giza kuu. Bwana hatatusahau na kututia mikononi mwa adui. Na tupumzike katika tumaini. Twashughulika na Yeye ambaye rehema zake hudumu milele. Bila shaka, kutoka mautini, na gizani, na katika kukata tamaa, tutainuka tena hata uzima, na nuru, na uhuru.

Machi 4

MHESHIMU MUNGU

"Wanaoniheshimu nitawaheshimu" 1 Samweli 2:30

Je, naifanya heshima ya Mungu kuwa shabaha kuu ya maisha yangu na kanuni ya mwenendo wangu? Kama ni hivyo, ataniheshimu. Yamkini kwa muda sitapata heshima yo yote kwa mwanadamu, lakini Mungu mwenyewe ataniwekea heshima kwa njia yenye matokeo zaidi. Mwishoni itaonekana kwamba njia iliyo hakika zaidi ya kufikia heshima ni kuwa radhi kutiwa aibuni kwa ajili ya dhamiri.

Eli hakumheshimu Bwana kwa kuisimamia vema nyumba yake, na wanawe hawakumheshimu Bwana kwa mwenendo unaostahili utumishi wao mtakatifu, kwa hiyo Bwana hakuwaheshimu, bali aliuondoa ukuhani mkuu katika jamaa yao, akamfanya Samweli kijana kuwa mkuu katika nchi badala ya ye yote wa ukoo wao. Kama nataka jamaa yangu itukuzwe, sharti nimheshimu Bwana katika mambo yote. Mungu aweza kuwaacha waovu wapate heshima za kidunia; lakini ule utukufu autoao yeye mwenyewe, naam, utukufu, na heshima, na kutokufa, huutunza kwa ajili ya wale ambao kwa utii mtakatifu hujitahidi kumheshimu.

Naweza kufanya nini siku hii ili kumheshimu Bwana? Nitakuza utukufu wake kwa ushuhuda wa kinywa changu, na kwa utii wangu wa vitendo. Pia nitamheshimu kwa mali yangu, na kwa kumtolea utumishi fulani wa pekee. Na niketi nifikiri jinsi niwezavyo kumheshimu, kwa kuwa yeye ataniheshimu.

Machi 5

BARAKA ZA NYUMBANI

"Huyabariki makao ya wenye haki" Mithali 3:33

Yeye humcha Bwana, na kwa hiyo huingia katika ulinzi wa Mungu hata kwa habari ya paa liwafunikalo yeye na jamaa yake. Nyumba yake ni makao ya upendo, shule ya mazoezi matakatifu, na mahali pa nuru ya mbinguni. Ndani yake kuna madhabahu ya jamaa ambapo jina la Bwana huheshimiwa kila siku. Kwa hiyo Bwana huyabariki makao yake. Yaweza kuwa kibanda cha hali ya chini au jumba la fahari; lakini baraka ya Bwana huja kwa sababu ya tabia ya mkaaji, wala si kwa sababu ya ukubwa wa makao.

Nyumba iliyobarikiwa zaidi ni ile ambayo bwana na bibi ni watu wamchao Mungu; lakini mwana au binti au hata mtumishi aweza kuleta baraka juu ya nyumba nzima. Bwana mara nyingi huihifadhi, huifanikisha, na kuiruzuku jamaa kwa ajili ya mtu mmoja au wawili ndani yake, ambao ni wenye haki machoni pake, kwa sababu neema yake imewafanya hivyo. Wapenzi, na tuwe na Yesu kuwa mgeni wetu wa daima kama walivyokuwa naye wale madada wa Bethania, ndipo tutabarikiwa kweli kweli.

Na tuangalie kwamba katika mambo yote tu wenye haki -- katika biashara yetu, katika kuwahukumu wengine, katika kuwatendea jirani zetu, na katika tabia yetu wenyewe. Mungu mwenye haki hawezi kuzibariki shughuli zisizo za haki.

Machi 6

MLINZI WA YATIMA

"Kwa kuwa kwako wewe yatima hupata rehema" Hosea 14:3

Hii ni sababu bora kabisa ya kutupilia mbali matumaini mengine yote na kumtegemea Bwana peke yake. Mtoto aachwapo bila mlinzi wake wa asili, Mungu wetu huingia na kuwa mlinzi wake: vivyo hivyo mtu apotelewapo na kila kitu cha kutegemea, aweza kujitupa juu ya Mungu aliye hai na kupata katika yeye yote ayahitajiyo. Yatima hutupwa juu ya ubaba wa Mungu, naye huwaruzuku. Mwandishi wa kurasa hizi anajua maana ya kuning'inia juu ya mkono mtupu wa Mungu, naye hutoa ushuhuda wake kwa hiari kwamba hakuna tumaini lililo na uhakika kama huu kwa mambo ya kweli, wala lililo na hakika ya kulipwa kwa matokeo, kama kumtumaini Mungu asiyeonekana lakini aliye hai daima.

Baadhi ya watoto walio na baba hawafaidiki sana kwa sababu yao, lakini yatima walio na Mungu ni matajiri. Ni afadhali kuwa na Mungu bila rafiki mwingine kuliko kuwa na walezi wote wa duniani bila Mungu. Kufiwa na kiumbe ni jambo la uchungu, lakini maadamu Bwana angali chemchemi ya rehema kwetu, sisi si mayatima kweli. Watoto yatima na waliombe neno hili la neema asubuhi hii, na wote waliofiwa na tegemeo lionekanalo na wafanye vivyo hivyo. Bwana, na nipate rehema kwako! Kadiri nizidivyo kuwa mhitaji na asiye na msaada, ndivyo nizidivyo kwa ujasiri kuuomba moyo wako wenye upendo.

Machi 7

HURU KUTOKA VIFUNGONI

"Bwana huwafungua waliofungwa" Zaburi 146:7

Amekwisha fanya hivyo. Mkumbuke Yusufu, Israeli katika Misri, Manase, Yeremia, Petro, na wengine wengi. Angali aweza kufanya hivyo. Huyavunja makomeo ya shaba kwa neno, na kuzikata pingu za chuma kwa tazamo. Anafanya hivyo. Katika mahali elfu waliotaabika wanatoka kwenda kwenye nuru na wanaa. Yesu angali hutangaza kufunguliwa kwa gereza kwa wale waliofungwa. Wakati huu milango inarudishwa nyuma na pingu zinaanguka chini.

Atafurahi kukuweka huru, rafiki mpendwa, kama wakati huu unaomboleza kwa sababu ya huzuni, na shaka, na hofu. Itakuwa furaha kwa Yesu kukupa uhuru. Itampa furaha kubwa kukufungua kama vile itakavyokuwa furaha kwako wewe kufunguliwa. La, si lazima wewe uikate ile pingu ya chuma: Bwana mwenyewe atafanya hivyo. Mtumaini yeye tu, naye atakuwa Mkombozi wako. Mwamini yeye ijapokuwa kuta za mawe, au minyororo ya chuma. Shetani hawezi kukushika, dhambi haiwezi kukufunga, hata kukata tamaa hakuwezi kukufunga, kama utamwamini sasa Bwana Yesu, na wingi wa neema yake, na ukamilifu wa uweza wake wa kuokoa.

Mpinge adui, na neno lililo mbele yako sasa liwe wimbo wako wa wokovu: "Yehova huwafungua waliofungwa."

Machi 8

MALI YETU IMEBARIKIWA

"Kitabarikiwa kikapu chako na akiba yako" Kumbukumbu la Torati 28:5

Utii huleta baraka juu ya mahitaji yote ambayo bidii yetu hutuchumia. Kile kiingiacho na kutoka mara moja, kama tunda katika kikapu ambalo ni la matumizi ya papo hapo, kitabarikiwa; na kile kilichowekwa akiba kwetu kwa majira marefu zaidi kitapokea baraka vivyo hivyo. Yamkini fungu letu ni la kikapu cha mkononi. Tuna kidogo cha kifungua kinywa, na tonge dogo la chakula cha mchana katika kikapu tuendapo kufanya kazi yetu asubuhi. Hili ni jema, kwa maana baraka ya Mungu imeahidiwa kwa kikapu. Kama tukiishi mkono kwa kinywa, tukipata riziki ya kila siku siku hiyo, tu katika hali njema kama Israeli; kwa maana Bwana alipowakaribisha watu wake aliowapenda aliwapa mana ya siku moja tu kwa wakati mmoja. Walihitaji nini zaidi? Sisi twahitaji nini zaidi?

Lakini kama tuna akiba, twamhitaji Bwana kwa kadiri gani aibarikie! Kwa maana kuna shughuli ya kupata, shughuli ya kutunza, shughuli ya kuisimamia, shughuli ya kuitumia; na, Bwana asipoibariki, shughuli hizi zitaila mioyo yetu, hata mali zetu ziwe miungu yetu, na shughuli zetu ziwe kama donda ndugu.

Ee Bwana, ibariki mali yetu. Utuwezeshe kuitumia kwa utukufu wako. Utusaidie kuviweka vitu vya kidunia mahali pake pafaapo, na kamwe akiba yetu isihatarishe wokovu wa nafsi zetu.

Machi 9

MAOMBI KWA AJILI YA AMANI

"Nanyi utakeni amani ya mji ule ambao nimewafanya mchukuliwe mateka huko, mkauombee kwa Bwana; kwa maana katika amani yake mtakuwa na amani ninyi." Yeremia 29:7

Kanuni iliyomo katika andiko hili yatupendekezea sisi sote tulio wageni na wapitaji wa Bwana kwamba imetupasa kutamani kuiendeleza amani na fanaka ya watu tunaokaa kati yao. Hasa taifa letu na mji wetu vipaswavyo kubarikiwa kwa maombezi yetu ya daima. Maombi ya bidii kwa ajili ya nchi yako na nchi nyingine yampasa kila mwamini kinywani mwake.

Kwa shauku na tuombe kwa ajili ya kipawa kikuu cha amani, nyumbani na ng'ambo pia. Kama fitina ingaleta kumwagwa kwa damu katika njia zetu, au kama vita ya ng'ambo ingewaua askari wetu hodari, sote tungeliomboleza msiba huo; kwa hiyo na tuombe kwa ajili ya amani, na kwa bidii tuziendeleze zile kanuni ambazo kwazo matabaka ya nyumbani na jamii za ng'ambo zaweza kufungwa pamoja katika vifungo vya urafiki.

Sisi wenyewe tumeahidiwa utulivu kuhusiana na amani ya taifa, na jambo hili latamanika sana; kwa maana hivyo twaweza kuwalea jamaa zetu katika kumcha Bwana, na pia kuihubiri injili pasipo pingamizi wala kizuizi. Leo na tuwe wengi katika maombi kwa ajili ya nchi yetu, tukiziungama dhambi za taifa, na kuomba msamaha na baraka ya taifa, kwa ajili ya Yesu.

Machi 10

ENENDA NURUNI

"Mimi nimekuja ili niwe nuru ya ulimwengu, ili kila mtu aniaminiye asikae gizani." Yohana 12:46

Ulimwengu huu una giza kama usiku wa manane; Yesu amekuja ili kwa imani tupate nuru, wala tusikae tena katika giza liwafunikalo wanadamu wengine wote.

Neno "kila mtu" ni pana sana: lamaanisha wewe na mimi. Tukimtumaini Yesu hatutakaa tena katika kivuli cha giza cha mauti, bali tutaingia katika nuru yenye joto ya siku isiyokwisha kamwe. Mbona hatutoki kwenye nuru mara moja?

Wingu laweza wakati mwingine kutuelea juu, lakini hatutakaa gizani tukimwamini Yesu. Amekuja atupe mchana mpana. Je, atakuja bure? Tukiwa na imani tuna pendeleo la mwanga wa jua: na tuufurahie. Kutoka usiku wa uovu wa asili, wa ujinga, wa shaka, wa kukata tamaa, wa dhambi, wa hofu, Yesu amekuja kutuweka huru; na waaminio wote watajua kwamba haji bure zaidi kuliko jua lichomozavyo likakosa kutawanya joto na nuru yake.

Kung'uta huzuni yako, ndugu mpendwa. Usikae gizani, bali kaa nuruni. Katika Yesu mna tumaini lako, furaha yako, Mbingu yako. Mtazame yeye, yeye peke yake, nawe utafurahi kama ndege wafurahivyo jua lichomozapo, na kama malaika wafurahivyo mbele ya kiti cha enzi.

Machi 11

VITA VYA NANI?

"Na kusanyiko hili lote litajua ya kuwa Bwana haokoi kwa upanga wala kwa mkuki; kwa maana vita ni vya Bwana, naye atawatia ninyi mikononi mwetu." 1 Samweli 17:47

Jambo hili na likubaliwe, kwamba vita ni vya Bwana, nasi twaweza kuwa na hakika kabisa ya ushindi, na ushindi kwa namna ambayo kuliko zote itaudhihirisha uweza wa Mungu. Bwana husahauliwa mno na watu wote, naam, hata na makusanyiko ya Israeli; na patokeapo nafasi ya kuwafanya watu waone kwamba yule Chanzo Kikuu cha Kwanza aweza kuyatimiza makusudi yake pasipo uweza wa mwanadamu, ni fursa isiyo na thamani ipaswayo kutumiwa vema. Hata Israeli hutazama mno upanga na mkuki. Ni jambo tukufu kutokuwa na upanga mkononi mwa Daudi, na bado Daudi ajue kwamba Mungu wake atalipindua jeshi zima la wageni.

Kama kweli twashindania kweli na haki, tusikawie hata tuwe na kipawa, au mali, au namna nyingine yo yote ya uweza uonekanao mkononi mwetu; bali kwa mawe kama yale tuyapatayo kijitoni, na kwa kombeo letu la kawaida, na tukimbie kumlaki adui. Kama yangelikuwa vita vyetu wenyewe tusingaliweza kuwa na ujasiri; lakini kama twasimama kwa ajili ya Yesu, na kupigana kwa nguvu zake peke yake, ni nani awezaye kutushinda? Bila dalili yo yote ya kusita na tuwakabili Wafilisti; kwa maana Bwana wa majeshi yu pamoja nasi, naye ni nani awezaye kuwa juu yetu?

Machi 12

KUTOKA KWA FURAHA

"Na katika habari za Zabuloni akasema, Furahi, Zabuloni, katika kutoka kwako" Kumbukumbu la Torati 33:18

Baraka za makabila ni zetu; kwa maana sisi ni Israeli wa kweli tumwabuduo Mungu kwa roho, wala hatuutumaini mwili. Zabuloni atafurahi kwa sababu Yehova ataibariki "kutoka" kwake; nasi twaona ahadi kwa ajili yetu wenyewe iliyofichwa ndani ya baraka hii. Tutokapo tutatafuta nafasi za furaha.

Twatoka kusafiri, na riziki ya Mungu ndiyo msindikizo wetu. Twatoka kuhamia nchi nyingine, na Bwana yu pamoja nasi baharini na barani pia. Twatoka kama wamisionari, na Yesu asema, "Tazama, mimi nipo pamoja nanyi siku zote, hata ukamilifu wa dahari." Twatoka siku kwa siku kwenda kazini kwetu, nasi twaweza kufanya hivyo kwa furaha, kwa maana Mungu atakuwa pamoja nasi tangu asubuhi hata jioni.

Hofu wakati mwingine hutujia tuanzapo safari, kwa maana hatujui tutakachokutana nacho; lakini baraka hii yaweza kutufaa vema kama neno la kututia moyo. Tunapopakia mizigo tuhame, na tuutie mstari huu katika sanduku letu la safari; na tuudondoshe mioyoni mwetu, na kuutunza humo; naam, na tuuweke juu ya ndimi zetu ututie kuimba. Na tuung'oe nanga kwa wimbo, au turuke ndani ya gari kwa zaburi. Na tuwe wa kabila lile lifurahilo, na katika kila mwendo wetu tumsifu Bwana kwa mioyo yenye furaha.

Machi 13

USIUDHARAU UJANA WAKO

"Ndipo niliposema, Aa, Bwana MUNGU! tazama, siwezi kunena; kwa maana mimi ni mtoto. Lakini Bwana akaniambia, Usiseme, Mimi ni mtoto; kwa maana utakwenda kwa kila mtu nitakayekutuma kwake, nawe utanena kila nitakalokuamuru." Yeremia 1:6,7

Yeremia alikuwa kijana na akahisi kusita kwa asili alipotumwa kwa jambo kubwa na Bwana; lakini yeye aliyemtuma hakutaka aseme, "Mimi ni mtoto." Kile alichokuwa yeye mwenyewe hakikupaswa kutajwa, bali kupotea katika kufikiri kwamba alichaguliwa kunena kwa ajili ya Mungu. Hakuwa na budi kuufikiri na kuuzua ujumbe, wala kuchagua wasikilizaji: alipaswa kunena kile Mungu alichoamuru, na kunena mahali Mungu alipomtuma, na hili angewezeshwa kulifanya kwa nguvu zisizo zake mwenyewe.

Je, si hivyo kwa mhubiri fulani kijana, au mwalimu awezaye kusoma mistari hii? Mungu anajua jinsi ulivyo kijana, na jinsi maarifa yako na uzoefu wako ulivyo mchache; lakini akichagua kukutuma, si juu yako kusita kwa mwito wa mbinguni. Mungu atajitukuza mwenyewe katika udhaifu wako. Kama ungekuwa mzee kama Methusela, miaka yako ingekusaidia kiasi gani? Kama ungekuwa na hekima kama Sulemani, ungeweza kuwa mkaidi sawasawa na yeye. Shika ujumbe wako nao utakuwa hekima yako; fuata amri zako za kuandamana nazo zitakuwa busara yako.

Machi 14

FARAJA YA WORORO

"Kama mtu ambaye mama yake amfariji, ndivyo nitakavyowafariji ninyi." Isaya 66:13

Faraja ya mama! Aa, huu ni wororo wenyewe. Jinsi aingiavyo katika huzuni ya mtoto wake! Jinsi ammkumbatiavyo kifuani pake, na kujaribu kuichukua huzuni yake yote katika moyo wake mwenyewe! Yeye aweza kumwambia yote, naye atamhurumia kama asivyoweza mtu mwingine ye yote. Kati ya wafariji wote mtoto ampenda zaidi mama yake, na hata watu waliokomaa wameona kuwa ni hivyo.

Je, Yehova hujinyenyekeza kutimiza sehemu ya mama? Huu ni wema kweli kweli. Twatambua kwa urahisi jinsi alivyo baba; lakini je, atakuwa kama mama pia? Je, hili halitualiki kwenye ukaribu mtakatifu, kwenye tumaini lisilo na kizuizi, kwenye pumziko takatifu? Mungu mwenyewe awapo "Mfariji" hakuna dhiki iwezayo kudumu kwa muda mrefu. Na tuiseme wazi taabu yetu, ijapokuwa vilio na kuugua vitakuwa usemi wetu ulio tayari zaidi. Hatatudharau kwa machozi yetu; mama yetu hakufanya hivyo. Atauangalia udhaifu wetu kama alivyofanya yeye, naye atayaondoa makosa yetu, ila kwa njia iliyo na hakika na salama zaidi kuliko awezavyo mama yetu. Hatutajaribu kuichukua huzuni yetu peke yetu: hilo lingekuwa ukatili kwake aliye mpole na mwenye fadhili hivyo. Na tuianze siku pamoja na Mungu wetu mwenye upendo, na kwa nini tusiimalize katika msindikizo uo huo, kwa kuwa mama hawachoki watoto wao?

Machi 15

MUNGU NI PATAKATIFU

"Basi sema, Bwana MUNGU asema hivi; Nijapokuwa nimewatupa mbali kati ya mataifa, na nijapokuwa nimewatawanya kati ya nchi mbalimbali, lakini nitakuwa kwao patakatifu kidogo katika nchi zile watakazokwenda." Ezekieli 11:16

Tuhamishwapo mbali na njia za neema za hadharani, hatuondolewi mbali na neema ya njia hizo. Bwana ambaye huwaweka watu wake mahali wanapojihisi kama wahamishwa yeye mwenyewe atakuwa pamoja nao, na kuwa kwao yote ambayo wangaliyapata kwao nyumbani, mahali pa makusanyiko yao ya dhati. Jitwalieni jambo hili, enyi mlioitwa kutanga-tanga!

Mungu ni kwa watu wake mahali pa kimbilio. Hupata patakatifu kwake dhidi ya kila adui. Yeye ni mahali pao pa kuabudia pia. Yu pamoja nao kama alivyokuwa na Yakobo alipolala uwandani, na alipoamka akasema, "Hakika Mungu alikuwapo mahali hapa." Kwao pia atakuwa patakatifu pa utulivu, kama Patakatifu pa Patakatifu, palipokuwa makao yasiyo na sauti ya yeye Aliye wa Milele. Watakuwa watulivu wasiogope uovu.

Mungu mwenyewe, katika Kristo Yesu, ndiye patakatifu pa rehema. Sanduku la agano ni Bwana Yesu, na ile fimbo ya Haruni, na lile gudulia la mana, na zile mbao za sheria, vyote vimo ndani ya Kristo patakatifu petu. Katika Mungu twapata hekalu la utakatifu na la ushirika. Twahitaji nini zaidi? Ee Bwana, itimize ahadi hii na uwe kwetu daima kama patakatifu kidogo!

Machi 16

KWA WENGINE "KIELELEZO"

"Mambo mliyojifunza kwangu na kuyapokea, na kuyasikia na kuyaona, yatendeni hayo; na Mungu wa amani atakuwa pamoja nanyi." Wafilipi 4:9

Ni vema mtu awezapo kuigwa kwa faida kwa undani kama vile Paulo angeliweza kuigwa. Aa, laiti tungepata neema ya kumwiga siku hii na kila siku!

Kama, kwa neema ya Mungu, tukiyatenda mafundisho ya Paulo, twaweza kuidai ahadi iliyo wazi mbele yetu sasa; nayo ni ahadi ya namna gani! Mungu, aipendaye amani, na aifanyaye amani, na aivuviaye amani, atakuwa pamoja nasi. "Amani iwe pamoja nanyi" ni baraka tamu; lakini Mungu wa amani kuwa pamoja nasi ni jambo kubwa zaidi sana. Hivyo tunayo chemchemi na vijito pia, jua na miali yake pia. Kama Mungu wa amani yu pamoja nasi, tutaifurahia amani ya Mungu ipitayo akili zote, ijapokuwa hali za nje zingetisha kutuvuruga. Watu wakigombana, sisi kwa hakika tutakuwa wapatanishi, kama Mfanya amani yu pamoja nasi.

Ni katika njia ya kweli ambako amani ya kweli hupatikana. Tukiiacha imani au kuiacha njia ya haki kwa dhana ya kuendeleza amani, tutakuwa tumekosa sana. Kwanza safi, kisha yenye amani, ndio mpango wa hekima na wa mambo halisi. Na tushike mstari wa Paulo, nasi tutakuwa na Mungu wa amani pamoja nasi kama alivyokuwa na yule mtume.

Machi 17

OGOPA KUOGOPA

"Usiogope nyuso zao; kwa maana mimi nipo pamoja nawe nikuokoe, asema Bwana." Yeremia 1:8

Wakati wo wote hofu iingiapo na kutufanya tusite, tuko hatarini kuanguka katika dhambi. Kiburi kinapaswa kuogopwa, lakini vivyo hivyo woga. "Thubutu kuwa Danieli." Jemadari wetu mkuu apaswa kutumikiwa na askari hodari.

Ni sababu ya namna gani ya ushujaa iliyopo hapa! Mungu yu pamoja na wale walio pamoja naye. Mungu hatakuwa mbali kamwe saa ya mapambano ifikapo. Je, wanakutisha? Wewe u nani hata umwogope mwanadamu atakayekufa? Je, utapoteza kazi yako? Mungu wako umtumikiaye atawapatia watumishi wake mkate na maji. Je, huwezi kumtumaini? Je, wanakumwagia dhihaka? Je, hili litavunja mifupa yako au moyo wako? Livumilie kwa ajili ya Kristo, naam, hata ufurahi kwa sababu yake.

Mungu yu pamoja na wa kweli, na wenye haki, na watakatifu, ili awaokoe; naye atakuokoa wewe. Kumbuka jinsi Danieli alivyotoka katika tundu la simba, na wale watoto watatu watakatifu kutoka katika tanuru. Hali yako si ya kukata tamaa kama yao; lakini kama ingekuwa hivyo, Bwana angekuchukua ukavuka, na kukufanya kuwa mshindi kupita kiasi. Ogopa kuogopa. Uwe na hofu ya kuwa na hofu. Adui yako mbaya kuliko wote yu ndani ya kifua chako mwenyewe. Piga magoti ukalilie msaada, kisha uinuke ukisema, "Nitatumaini, wala sitaogopa."

Machi 18

DUMU KATIKA UNYOFU

"Maombi ya wanyofu ni furaha yake" Mithali 15:8

Hili ni jema kama ahadi, kwa maana latangaza jambo lililopo sasa, litakalokuwa vile vile katika vizazi vyote. Mungu hupata furaha kubwa katika maombi ya watu wanyofu; naam, huyaita furaha yake. Shughuli yetu ya kwanza ni kuwa wanyofu. Bila kupinda upande huu wala ule, dumu katika unyofu: usiwe mkaidi kwa hila, wala uliyeanguka kwa kukubali uovu, uwe mnyofu katika uadilifu mkamilifu na unyoofu. Tukianza kutetereka na kubadilika, tutaachwa tujitegemee wenyewe. Tukijaribu njia zilizopotoka, tutaona kwamba hatuwezi kuomba, na tukijifanya kuomba, tutaona maombi yetu yamefungiwa nje ya Mbingu.

Je, twatenda katika mstari ulionyooka na hivyo kuyafuata mapenzi ya Bwana yaliyofunuliwa? Basi na tuombe sana na kuomba kwa imani. Kama maombi yetu ni furaha ya Mungu, tusimnyime katika kile kimpendezacho. Yeye hauangalii usarufi wake, wala falsafa yake, wala ufasaha wake; katika hayo yote watu wangeweza kuyadharau. Yeye, kama Baba, hupendezwa na vibwabwaji vya watoto wake wachanga, vigugumizi vya wanawe na binti zake waliozaliwa upya. Je, hatupaswi kufurahia maombi kwa kuwa Bwana huyafurahia? Na tufanye shughuli za kwenda kwenye kiti cha enzi. Bwana hutupatia sababu za kutosha za kuomba, nasi twapaswa kumshukuru kwamba ni hivyo.

Machi 19

KUFAA KWA AJILI YA UTUKUFU

"Bwana atatoa neema na utukufu" Zaburi 84:11

Neema ndiyo tuihitajiyo sasa hivi, nayo yapatikana bure. Ni nini kiwezacho kuwa bure kuliko kipawa? Leo tutapokea neema itegemezayo, itiayo nguvu, itakasayo, ishibishayo. Ametoa neema ya kila siku hata sasa, na kwa habari ya wakati ujao, neema hiyo ingali yatosha. Kama tuna neema kidogo tu kosa ni lazima liwe ndani yetu wenyewe; kwa maana Bwana hakubanwa, wala si mzito kuitoa kwa wingi. Twaweza kuomba kadiri tutakavyo wala tusiogope kukataliwa. Yeye hutoa kwa ukarimu wala hakemei.

Bwana aweza asitoe dhahabu, lakini atatoa neema: aweza asitoe faida, lakini atatoa neema. Kwa hakika atatuletea jaribu, lakini atatoa neema kwa kadiri ya jaribu hilo. Twaweza kuitwa kufanya kazi, na kuteswa, lakini pamoja na mwito itakuja neema yote itakayohitajiwa.

Ni NA ya namna gani iliyomo katika andiko -- "na utukufu!" Hatuuhitaji utukufu bado, wala hatujafaa kwa ajili yake; lakini tutaupata kwa taratibu yake. Baada ya kula mkate wa neema, tutakunywa divai ya utukufu. Lazima tupite katika patakatifu -- ambapo ni neema, hata patakatifu pa patakatifu pote -- ambapo ni utukufu. Maneno haya "na utukufu" yatosha kumfanya mtu acheze kwa furaha. Kitambo kidogo -- kitambo kidogo, kisha utukufu milele!

Machi 20

RUZUKU YA MUNGU

"Basi, ikiwa Mungu huyavika hivi majani ya kondeni, yaliyopo leo, na kesho hutupwa kalibuni, je, hatazidi sana kuwavika ninyi, enyi wa imani haba." Mathayo 6:30

Nguo ni ghali, na waaminio maskini waweza kuingizwa katika wasiwasi wa kutoka wapi mavazi yao yajayo. Nyayo za viatu ni nyembamba; tutapataje viatu vipya? Tazama jinsi Bwana wetu mwenye kufikiri alivyotangulia kuiondoa shughuli hii. Baba yetu wa mbinguni huyavika majani ya kondeni kwa fahari ambayo Sulemani hakuweza kuilingania: je, hatawavika watoto wake mwenyewe? Tuna hakika atafanya. Yaweza kuwako viraka vingi na kutiwa nyuzi, lakini mavazi tutakuwa nayo.

Mchungaji mmoja maskini aliona nguo zake zimekaribia kuchakaa, na zimefikia hali ambayo zisingeweza kushikamana; lakini kama mtumishi wa Bwana alitazamia Bwana wake amtafutie vazi lake. Ikatokea kwamba mwandishi alipokuwa akimtembelea rafiki alipata kuazima mimbari ya mtu huyo mwema, na ikaingia moyoni mwake kufanya mchango kwa ajili yake, na hapo palikuwa na nguo yake. Visa vingine vingi tumeviona ambavyo wale waliomtumikia Bwana wamemwona kuwa mwenye kuijali nguo yao. Yeye aliyemuumba mwanadamu hata alipofanya dhambi akahitaji mavazi, kwa rehema pia alimpatia hayo; na yale ambayo Bwana aliwapa wazazi wetu wa kwanza yalikuwa bora sana kuliko yale waliojifanyia wenyewe.

Machi 21

EPUKA KUTELEZA KULE

"Ndipo utakapokwenda katika njia yako salama, wala mguu wako hautajikwaa" Mithali 3:23

Yaani, tukifuata njia za hekima na utakatifu tutahifadhiwa ndani yake. Yeye asafiriye mchana katika njia kuu yu chini ya ulinzi fulani. Kuna njia kwa kila mtu, yaani, wito wake mwenyewe ufaao maishani, na tukienda ndani yake kwa ucha Mungu yeye atatuhifadhi SISI tusipatwe na uovu. Yamkini hatutasafiri kwa anasa, lakini tutakwenda salama. Yamkini hatutaweza kupiga mbio kama vijana, lakini tutaweza kwenda kama watu wema.

Hatari yetu iliyo kubwa kuliko zote imo ndani yetu wenyewe: mguu wetu dhaifu una mazoea ya kusikitisha ya kujikwaa. Na tuombe nguvu zaidi za kiadili ili mwelekeo wetu wa kuteleza ushindwe. Wengine hujikwaa kwa sababu hawaoni jiwe njiani: neema ya Mungu hutuwezesha kuitambua dhambi, na hivyo kuiepuka. Na tuiombe ahadi hii, na kumtumaini yeye awashikiliaye wateule wake.

Ole wetu! hatari yetu mbaya kuliko zote ni uzembe wetu wenyewe, lakini dhidi ya hili Bwana Yesu ametuonya tuwe macho, akisema, "Kesheni na kuomba."

Aa, laiti tungepata neema ya kwenda siku hii bila kujikwaa hata mara moja! Haitoshi kwamba hatuanguki kweli; kilio chetu kiwe kwamba tusifanye uteleuzi mdogo kabisa kwa miguu yetu, bali hatimaye tumwabudu yeye "awezaye kutulinda tusijikwae."

Machi 22

NEEMA KWA WANYENYEKEVU

"Huwapa wanyenyekevu neema" Yakobo 4:6

Mioyo ya wanyenyekevu huitafuta neema, kwa hiyo huipata. Mioyo ya wanyenyekevu hukubali mvuto tamu wa neema, na hivyo hupewa kwa wingi zaidi na zaidi. Mioyo ya wanyenyekevu iko katika mabonde ambako vijito vya neema hutiririka, na kwa hiyo huvinywa. Mioyo ya wanyenyekevu ina shukrani kwa neema na kumpa Bwana utukufu wake, na kwa hiyo yapatana na heshima yake kuwapa hiyo.

Njoo, msomaji mpendwa, chukua mahali pa chini. Uwe mdogo katika kujithamini kwako mwenyewe, ili Bwana akufanye mkuu. Yamkini kuugua kwatokea, "Nachelea sikunyenyekea." Yaweza kuwa huu ndio usemi wa unyenyekevu wa kweli. Wengine hujivuna kwa kuwa wanyenyekevu, na hii ni mojawapo ya aina mbaya kabisa za kiburi. Sisi ni viumbe wahitaji, wasio na msaada, wasiostahili, tunaostahili jehanamu, na kama sisi si wanyenyekevu twapaswa kuwa. Na tujinyenyekeze kwa sababu ya dhambi zetu dhidi ya unyenyekevu, ndipo Bwana atatupa kuionja fadhili yake. Ni neema itufanyayo tuwe wanyenyekevu, na neema ipatayo katika unyenyekevu huu nafasi ya kumimina neema zaidi. Na tushuke chini ili tupate kuinuka. Na tuwe maskini wa roho ili Mungu atutajirishe. Na tuwe wanyenyekevu ili tusihitaji kunyenyekezwa, bali tuinuliwe kwa neema ya Mungu.

Machi 23

KIONGOZI WA HAKIKA

"Nami nitawaleta vipofu kwa njia wasiyoijua" Isaya 42:16

Mfikirie Yehova mtukufu asiye na mwisho akifanya kazi ya Kiongozi wa vipofu! Ni kujinyenyekeza kusiko na kikomo namna gani jambo hili laonyesha! Mtu kipofu hawezi kuiona njia asiyoijua. Hata ajuapo njia, ni vigumu kwake kuipita; lakini njia asiyoijua haiwezekani kabisa kwa miguu yake isiyoongozwa. Basi, sisi kwa asili tu vipofu kwa habari ya njia ya wokovu, na bado Bwana hutuongoza ndani yake, na kutuleta kwake mwenyewe, kisha huyafumbua macho yetu. Kwa habari ya wakati ujao, sisi sote tu vipofu, wala hatuwezi kuona saa moja mbele yetu; lakini Bwana Yesu atatuongoza hata mwisho wa safari yetu. Jina lake libarikiwe!

Hatuwezi kubuni ni kwa njia gani wokovu waweza kutujia, lakini Bwana anajua, naye atatuongoza hata tutakapokuwa tumeokoka kila hatari. Heri wale watiao mkono wao katika ule wa Kiongozi mkuu, na kuiacha njia yao na nafsi zao zote kwake. Atawaleta njia yote; na atakapokwisha kuwaleta nyumbani hata utukufuni na kuyafumbua macho yao waione njia aliyowaongoza kwayo, ni wimbo wa shukrani wa namna gani watakaomwimbia Mfadhili wao mkuu! Bwana, mwongoze mtoto wako kipofu maskini siku hii, kwa maana siijui njia yangu!

Machi 24

KUIMARISHWA NA KULINDWA

"Lakini Bwana ni mwaminifu, atakayewaimarisha na kuwalinda na uovu." 2 Wathesalonike 3:3

Watu mara nyingi hawana akili kama vile wasivyo na imani. Wangalipo pamoja nasi "watu wasio na akili na waovu." Hakuna faida ya kubishana nao au kujaribu kuwa na amani nao: ni wa uongo mioyoni, na wadanganyifu katika usemi. Basi, ni nini juu ya hili? Je, tutajitia wasiwasi kwa ajili yao? La; na tumgeukie Bwana, kwa maana yeye ni mwaminifu. Hakuna ahadi ya Neno lake itakayovunjwa kamwe. Yeye si mwenye kudai yasiyo na akili juu yetu, wala si mwenye kukosa uaminifu kwa madai yetu juu yake. Tuna Mungu mwaminifu. Hii na iwe furaha yetu.

Atatuimarisha ili watu waovu wasisababishe kuanguka kwetu, naye atatulinda ili hata kimoja katika maovu yanayotushambulia sasa kisitufanyie madhara kweli. Ni baraka ya namna gani kwetu kwamba hatuna haja ya kushindana na watu, bali twaruhusiwa kujikinga ndani ya Bwana Yesu, aliye na huruma ya kweli kabisa kwetu. Kuna moyo mmoja wa kweli, nia moja aminifu, Upendo mmoja usiobadilika kamwe; hapo na tupumzike. Bwana atalitimiza kusudi la neema yake kwetu sisi, watumishi wake, wala hatuna haja ya kuacha kivuli cha hofu kianguke juu ya roho zetu. Yote wawezayo kuyafanya watu au mashetani hayawezi kutuzuia ulinzi na ruzuku ya Mungu. Siku hii na tumwombe Bwana atuimarishe na kutulinda.

Machi 25

USINGIZI WA KUBURUDISHA

"Ulalapo hutaogopa; naam, utalala, na usingizi wako utakuwa mtamu" Mithali 3:24

Je, yamkini msomaji atafungiwa kitandani kwa muda kwa sababu ya ugonjwa? Na apande ghorofani bila dhiki akiwa na ahadi hii moyoni pake -- "Ulalapo hutaogopa."

Twendapo kitandani usiku, neno hili na lilainishe mto wetu. Hatuwezi kujilinda wenyewe katika usingizi, lakini Bwana atatulinda usiku kucha. Wale walalao chini ya ulinzi wa Bwana wako salama kama wafalme na malkia katika majumba yao ya kifalme, naam, salama zaidi sana. Kama pamoja na kulala kwetu kuna kuweka chini kwa shughuli zote na tamaa, tutapata burudisho kutoka vitandani mwetu kama vile wenye wasiwasi na wenye choyo wasivyopata kamwe katika vyao. Ndoto mbaya zitafukuzwa, au hata zikija, tutalifuta wazo lake, tukijua kwamba ni ndoto tu.

Tukilala hivi tutafanya vema. Jinsi Petro alivyolala kwa utamu hata nuru ya malaika isimwamshe, akahitaji kusukumwa kwa nguvu ubavuni ili kumwamsha. Na bado alikuwa amehukumiwa kufa kesho yake. Ndivyo mashahidi walivyolala kabla ya kuchomwa kwao. "Ndivyo humpa mpenzi wake usingizi."

Ili tupate usingizi mtamu ni lazima tuwe na maisha matamu, tabia tamu, tafakari tamu, na upendo mtamu.

Machi 26

KUWAJALI MASKINI

"Bwana atamtia nguvu kitandani pa kuugua kwake" Zaburi 41:3

Kumbuka kwamba hii ni ahadi kwa mtu amwangaliaye maskini. Je, wewe u mmoja wa hawa? Basi jitwalie andiko hili.

Tazama jinsi katika saa ya ugonjwa Mungu wa maskini atakavyombariki mtu awajaliye maskini! Mikono ile ya milele itaitegemeza nafsi yake kama vile mikono ya kirafiki na mito laini iutegemezavyo mwili wa mgonjwa. Ni picha ya wororo na huruma namna gani; jinsi iletavyo Mungu wetu karibu na udhaifu wetu na magonjwa yetu! Ni nani aliyewahi kusikia haya juu ya yule Yupita wa kipagani wa zamani, au juu ya miungu ya India, au China? Huu ni usemi wa pekee kwa Mungu wa Israeli; ndiye anayekubali kuwa muuguzi na mtumishi wa watu wema. Akipiga kwa mkono mmoja, hutegemeza kwa ule mwingine. Aa, ni kuzimia kwenye baraka mtu aangukapo juu ya kifua cha Bwana mwenyewe, na kuchukuliwa juu yake! Neema ndiyo dawa iliyo bora ya kurudisha nguvu; upendo wa Mungu ndio kichocheo kilicho salama zaidi kwa mgonjwa aliye dhaifu; hukifanya nafsi kuwa na nguvu kama jitu, hata mifupa ivunjikapo kupitia ngozi. Hakuna tabibu kama Bwana, hakuna dawa ya kutia nguvu kama ahadi yake, hakuna divai kama upendo wake.

Kama msomaji ameshindwa katika wajibu wake kwa maskini, na aone kile anachopoteza, na mara awe rafiki na msaidizi wao.

Machi 27

KUMKARIBIA MUNGU

"Mkaribieni Mungu, naye atawakaribia ninyi" Yakobo 4:8

Kadiri tumkaribiavyo Mungu zaidi, ndivyo atakavyojifunua kwetu kwa neema zaidi. Yule mwana mpotevu ajapo kwa babaye, babaye humkimbilia kumlaki. Yule njiwa atanga-tangaye arudipo safinani, Nuhu hunyosha mkono wake kumvuta ndani kwake. Yule mke mpole autafutapo msindikizo wa mumewe, mumewe humjia kwa mbawa za upendo. Njoo basi, rafiki mpendwa, na tumkaribie Mungu ambaye kwa neema hutungoja, naam, huja kutulaki.

Je, uliwahi kuliona andiko lile katika Isaya 58:9? Hapo Bwana aonekana kujiweka tayari kwa matumizi ya watu wake, akiwaambia, "Mimi hapa." Ni kana kwamba asema -- "Mna nini cha kuniambia? Naweza kuwafanyia nini? Nangoja niwabariki. Twawezaje kusita kukaribia? Mungu yu karibu kusamehe, kubariki, kufariji, kusaidia, kuhuisha, kuokoa. Jambo kuu kwetu na liwe kumkaribia Mungu. Likifanyika hili, yote yamefanyika. Tukiwakaribia wengine, huenda baada ya muda wakatuchoka na kutuacha; lakini tukimtafuta Bwana peke yake, hakuna badiliko litakalojia nia yake, bali ataendelea kutukaribia zaidi na zaidi kwa ushirika uliojaa na wenye furaha zaidi.

Machi 28

TANGULIA NJIANI

"Bwana atakufanya kuwa kichwa, wala si mkia" Kumbukumbu la Torati 28:13

Tukimtii Bwana, atawalazimisha adui zetu kuona kwamba baraka yake yakaa juu yetu. Ijapokuwa hii ni ahadi ya sheria, lakini yasimama imara kwa watu wa Mungu; kwa maana Yesu ameiondoa laana, lakini ameithibitisha baraka.

Ni juu ya watakatifu kutangulia njiani kati ya watu kwa uvutano mtakatifu: hawapaswi kuwa mkia, wa kuburutwa huku na huku na wengine. Hatupaswi kuikubali roho ya zama hizi, bali kuzilazimisha zama zimsujudie Kristo. Kama Bwana yu pamoja nasi, hatutatamani kuvumiliwa kwa dini, bali tutatafuta kuiketisha juu ya kiti cha enzi cha jamii. Je, Bwana Yesu hakuwafanya watu wake kuwa makuhani? Bila shaka wapaswa kufundisha, wala hawapaswi kuwa wanafunzi wa falsafa za wasioamini. Je, sisi katika Kristo hatukufanywa wafalme ili tutawale juu ya nchi? Basi, twawezaje kuwa watumishi wa desturi, watumwa wa maoni ya wanadamu?

Je, wewe, rafiki mpendwa, umeshika msimamo wako wa kweli kwa ajili ya Yesu? Wengi mno wako kimya kwa sababu ya haya, kama si kwa woga. Je, tumwache jina la Bwana Yesu liwekwe nyuma? Je, dini yetu iburutike kama mkia? Je, haipasi badala yake kutangulia njiani na kuwa nguvu itawalayo kwetu sisi na kwa wengine?

Machi 29

IMANI ISIYOOGOPA

"Kwa kuwa mimi nipo pamoja nawe, wala hapana mtu atakayekushambulia ili kukudhuru" Matendo 18:10

Maadamu Bwana alikuwa na kazi kwa Paulo kuifanya Korintho, ghadhabu ya umati ilizuiliwa. Wayahudi walijipinga na kukufuru; lakini hawakuweza kuizuia kuhubiriwa kwa injili, wala kuongoka kwa wasikiaji. Mungu ana uweza juu ya nia zilizo kali kabisa. Huifanya ghadhabu ya mwanadamu imsifu inapolipuka, lakini huonyesha zaidi wema wake aizuiapo; naye aweza kuizuia. "Kwa ukuu wa mkono wako watakuwa kimya kama jiwe, hata watu wako wavuke, Ee Bwana."

Kwa hiyo, usisikie hofu yo yote ya mwanadamu ujuapo kwamba unatimiza wajibu wako. Nenda moja kwa moja, kama vile Yesu angefanya, na wale wapingao watakuwa kama mwanzi uliovunjika na kama utambi utokao moshi. Mara nyingi watu wamekuwa na sababu ya kuogopa kwa sababu wao wenyewe waliogopa; lakini imani isiyoogopa katika Mungu huisukuma hofu kando kama utando wa buibui katika njia ya jitu. Hakuna mtu awezaye kutudhuru Bwana asiporuhusu. Yeye amfanyaye Ibilisi mwenyewe akimbie kwa neno, kwa hakika aweza kuwadhibiti wajumbe wa Ibilisi. Yamkini tayari wanakuogopa wewe kuliko unavyowaogopa wao. Kwa hiyo, songa mbele, na mahali ulipotazamia kukutana na adui utapata rafiki.

Machi 30

MAOMBI, SHUKRANI, SIFA

"Msijisumbue kwa neno lolote; bali katika kila neno kwa kusali na kuomba, pamoja na kushukuru, haja zenu na zijulikane na Mungu. Na amani ya Mungu, ipitayo akili zote, itailinda mioyo yenu na nia zenu katika Kristo Yesu." Wafilipi 4:6,7

Hakuna kujisumbua, bali maombi matupu. Hakuna wasiwasi, bali ushirika mwingi wenye furaha pamoja na Mungu. Zipeleke tamaa zako kwa Bwana wa uhai wako, mlinzi wa nafsi yako. Mwendee ukiwa na sehemu mbili za maombi, na moja ya sifa yenye harufu nzuri. Usiombe kwa shaka, bali kwa shukrani. Fikiri kwamba una haja zako, na kwa hiyo mshukuru Mungu kwa neema yake. Anakupa neema, mpe shukrani. Usifiche kitu. Usiache haja yo yote ikae ikikuuma kifuani mwako; "zijulishe haja zako." Usimkimbilie mwanadamu. Mwendee Mungu wako peke yake, Baba wa Yesu, akupendaye ndani yake.

Hili litakuletea amani ya Mungu mwenyewe. Hutaweza kuielewa amani utakayoifurahia. Itakuzunguka katika kumbatio lake lisilo na mwisho. Moyo na nia kwa njia ya Kristo Yesu vitazamishwa katika bahari ya pumziko. Ije uhai au mauti, umaskini, maumivu, masingizio, wewe utakaa ndani ya Yesu juu ya kila upepo uvurugao au wingu litialo giza. Je, hutaitii amri hii ipendwayo?

Naam, Bwana, nakuamini wewe; lakini, nakusihi, uisaidie kutokuamini kwangu.

Machi 31

UTULIVU WA AKILI

"Usiogope hofu ya ghafula, wala uharibifu wa waovu, ujapo. Kwa maana Bwana atakuwa tumaini lako, naye atailinda miguu yako isinaswe." Mithali 3:25,26

Mungu awapo nje katika hukumu, hataki watu wake washtuke. Hakutoka ili kudhuru, bali kuwatetea wenye haki.

Angetaka waonyeshe ushujaa. Sisi tuufurahiao uwepo wa Mungu twapaswa kuonyesha utulivu wa akili. Kwa kuwa Bwana mwenyewe aweza kuja ghafula, hatupaswi kushangaa kwa jambo lo lote la ghafula. Utulivu chini ya mkumbo na mngurumo wa maovu yasiyotazamiwa ni kipawa cha thamani cha upendo wa Mungu.

Bwana angetaka wateule wake waonyeshe utambuzi, ili wapate kuona kwamba uharibifu wa waovu si msiba wa kweli kwa ulimwengu. Dhambi peke yake ndiyo uovu; adhabu ifuatiayo baada yake ni kama chumvi ihifadhiyo ili kuizuia jamii isioze. Twapaswa kushtushwa zaidi sana na dhambi istahiliyo jehanamu, kuliko na jehanamu itokayo katika dhambi.

Vivyo hivyo, watu wa Bwana wapaswa kuonyesha utulivu mkuu wa roho. Shetani na uzao wake wa kinyoka wamejaa hila zote; lakini wale waendao pamoja na Mungu hawatanaswa katika mitego yao ya udanganyifu. Endelea, wewe uaminiye katika Yesu, na Bwana awe tumaini lako.