Mwezi wa Februari

Februari 1

USIKATE TAMAA KAMWE

"Lakini kwenu ninyi mnaolicha jina langu, jua la haki litawazukia, lenye kuponya katika mbawa zake" Malaki 4:2

Neno hili la neema, lililotimizwa mara moja katika ujio wa kwanza wa Bwana wetu mtukufu, na bado litakalotimizwa kwa ukamilifu zaidi katika ujio wake wa pili, ni la kutumiwa kila siku pia. Je, msomaji, kwako ni giza? Je, usiku unazidi kuwa weusi mzito zaidi? Hata hivyo tusikate tamaa: jua bado litazuka. Wakati usiku ulipo na giza zaidi, ndipo mapambazuko yalipo karibu zaidi.

Jua litakalozuka si la kawaida. Ni LILE jua -- Jua la Haki, ambalo kila mwali wake ni utakatifu. Yeye ajaye kutufariji, aja kwa njia ya haki vilevile kama kwa njia ya rehema, aja pasipo kuivunja sheria yo yote hata ili kutuokoa. Yesu adhihirisha utakatifu wa Mungu kama vile aonyeshavyo upendo wake. Wokovu wetu, utakapokuja, utakuwa salama kwa sababu ni wa haki.

Jambo letu moja la kuulizia lipaswa kuwa -- "Je, twalicha jina la Bwana? Je, twamheshimu Mungu aliye hai, na kuenenda katika njia zake?" Basi kwetu sisi usiku hauna budi kuwa mfupi; na asubuhi ijapo, magonjwa yote na huzuni yote ya nafsi yetu vitakwisha milele. Nuru, na joto, na furaha, na uwazi wa kuona vitakuja, na kuponywa kwa kila ugonjwa na dhiki kutafuata.

Je, Yesu ametuzukia? Na tukae katika jua. Je, ameuficha uso wake? Na tungoje kuzuka kwake. Atang'aa kwa hakika kama jua.

Februari 2

KUENI

"Nanyi mtatoka nje, na kukua kama ndama wa mazizini" Malaki 4:2

Naam, jua liangazapo, wagonjwa huyaacha makao yao, wakatoka nje kuvuta hewa safi. Jua lileapo wakati wa masika na wakati wa hari, ng'ombe huyaacha mazizi yao, wakatafuta malisho juu ya milima mirefu. Vivyo hivyo, tunapokuwa na ushirika ulio dhahiri na Bwana wetu, twaacha zizi la kukata tamaa, na kutoka nje katika mashamba ya matumaini matakatifu. Twapanda hata milima ya furaha, na kula malisho matamu yameayo karibu zaidi na Mbingu kuliko chakula cha watu wa mwilini.

Ku"toka nje" na ku"kua" ni ahadi maradufu. Ee nafsi yangu, uwe na shauku ya kufurahia baraka zote mbili! Kwa nini uwe mfungwa? Ondoka, ukatembee kwa uhuru. Yesu asema ya kwamba kondoo wake wataingia na kutoka na kupata malisho; toka nje, basi, ukajilishe katika malisho manono ya upendo usio na mipaka.

Kwa nini ubaki mtoto mchanga katika neema? Kua. Ndama wachanga hukua upesi, hasa wakilishwa zizini; nawe una uangalizi bora wa Mkombozi wako. Basi kua katika neema, na katika kumjua Bwana na Mwokozi wako. Usiwe uliyebanwa wala uliyedumaa. Jua la Haki limekuzukia. Uitikie miali yake, kama vichipukizi viitikiavyo jua la kawaida. Ufungue moyo wako, ukue na kupanuka ndani yake katika mambo yote.

Februari 3

HUTOA KWA UKARIMU

"Yeye asiyemwachilia Mwana wake mwenyewe, bali alimtoa kwa ajili yetu sisi sote, atakosaje kutukirimia na mambo yote pamoja naye?" Warumi 8:32

Kama hii si ahadi kwa umbo lake, ni ahadi kwa hakika. Naam, ni zaidi ya ahadi moja, ni mkusanyiko wa ahadi. Ni chungu ya akiki, na zumaridi, na almasi, pamoja na kipande cha dhahabu cha kuzitia. Ni swali lisiloweza kujibiwa kamwe kwa namna ya kutuletea wasiwasi wo wote moyoni. Bwana aweza kutunyima nini baada ya kutupa Yesu? Kama twahitaji vitu vyote vya Mbinguni na duniani, atatukirimia: kwa maana kama kungekuwa na mpaka po pote, angemzuia Mwanawe mwenyewe.

Nataka nini leo? Sina budi ila kuomba tu. Naweza kutafuta kwa bidii, lakini si kana kwamba yanipasa kutumia nguvu, na kunyakua kwa shuruti zawadi isiyotolewa kwa hiari kutoka mkononi mwa Bwana; kwa maana atatoa kwa ukarimu. Kwa mapenzi yake mwenyewe, alitupa Mwanawe mwenyewe. Kwa hakika hakuna mtu ambaye angependekeza zawadi kama hiyo kwake. Hakuna mtu ambaye angethubutu kuiomba. Ingekuwa ujuvi mno. Alimtoa kwa ukarimu Mwanawe pekee; na, ee nafsi yangu, je, huwezi kumtumaini Baba yako wa mbinguni akupe kitu cho chote, akupe kila kitu? Sala yako maskini isingekuwa na nguvu mbele za Mwenyezi kama nguvu zingehitajika; bali upendo wake, kama chemchemi, hujizukia wenyewe, na kufurika ili kutimiza mahitaji yako yote.

Februari 4

ATARUDI

"Sitawaacha ninyi yatima; naja kwenu" Yohana 14:18

Alituacha, walakini hatukuachwa yatima. Yeye ni faraja yetu, naye amekwenda; lakini hatukuachwa bila faraja. Faraja yetu ni ya kwamba atatujia, na hii ni faraja ya kutosha kututegemeza katika kutokuwapo kwake kulikorefushwa. Yesu tayari yuko njiani: asema, "Naja upesi": aja kwa mbio kutuelekea. Asema, "Nitakuja": wala hakuna awezaye kuzuia kuja kwake, au kukuahirisha hata kwa robo saa. Asema hasa, "Nitakujieni ninyi"; na ndivyo atakavyofanya. Kuja kwake ni hasa kwa watu wake mwenyewe na kwa ajili yao. Hii yakusudiwa kuwa faraja yao ya sasa wakati wanapoomboleza kwa kuwa Bwana arusi hajaonekana bado.

Tunapopoteza hisia ya furaha ya kuwapo kwake twaomboleza; lakini haitupasi kuhuzunika kama vile kusingekuwa na tumaini. Bwana wetu kwa hasira kidogo amejificha kwetu kwa kitambo; lakini atarudi kwa upendeleo kamili. Anatuacha kwa namna fulani, lakini kwa namna fulani tu. Ajitengapo, huacha rehani nyuma ya kwamba atarudi. Ee Bwana, njoo upesi! Hakuna uzima katika maisha haya ya duniani kama wewe umekwenda. Twahema kwa kutamani kurudi kwa tabasamu lako tamu. Utatujia lini? Tuna hakika utatokea; lakini uwe kama paa, au kama ayala kijana. Usikawie, Ee Mungu wetu!

Februari 5

HAKI IMERIDHIKA

"Nami nitakapoiona ile damu, nitawapitia" Kutoka 12:13

Kuiona kwangu mimi ile damu ya thamani ni kwa faraja yangu; lakini ni kuiona kwake Bwana ndiko kunikinga salama yangu. Hata nisipoweza kuiona, Bwana huitazama, na kunipitia kwa sababu yake. Ijapokuwa sistarehe kadiri ipasavyo, kwa sababu imani yangu ni hafifu, hata hivyo mimi ni salama vilevile, kwa maana jicho la Bwana si hafifu, naye huiona damu ya ile Dhabihu kuu kwa kutazama kusikoyumba. Furaha iliyoje hii!

Bwana huona maana ya ndani iliyo kuu, ukamilifu usio na kikomo wa yote yaliyomaanishwa kwa kufa kwa Mwanawe mpendwa. Huiona kwa kumbukumbu yenye raha ya haki iliyoridhika, na sifa zake zote zisizo na kifani zilizotukuzwa. Aliuangalia uumbaji ukiendelea, akasema, "Ni chema sana"; lakini asema nini juu ya ukombozi katika ukamilifu wake? Asema nini juu ya utii hata kufa wa Mwanawe Mpendwa? Hakuna awezaye kueleza furaha yake katika Yesu, raha yake katika ile harufu nzuri ambayo Yesu aliitoa alipojitoa mwenyewe pasipo mawaa kwa Mungu.

Sasa twapumzika katika salama ya utulivu. Tuna Dhabihu ya Mungu na Neno la Mungu ili kuumba ndani yetu hisia ya salama kamili. Atatupitia, sharti atupitie, kwa sababu hakumhurumia Mbadala wetu mtukufu. Haki hushikana mikono na upendo ili kuandaa wokovu wa milele kwa wote waliolinyunyiziwa damu.

Februari 6

BARAKA MJINI

"Ukiisikiza sauti ya Bwana, Mungu wako, utabarikiwa mjini" Kumbukumbu 28:2, 3

Mji umejaa masumbufu, na yeye alazimikaye kwenda huko siku baada ya siku, huuona kuwa mahali pa uchakavu na machofu makuu. Umejaa makelele, na mvurugiko, na msongamano, na taabu nyingi: mengi ni majaribu yake, na hasara, na mahangaiko. Lakini kwenda huko na baraka ya Mungu huondoa ukali wa ugumu wake; kukaa huko na baraka hiyo ni kuona furaha katika kazi zake, na nguvu zilinganazo na madai yake.

Baraka mjini yaweza isitufanye kuwa wakuu, lakini itatuhifadhi kuwa wema; yaweza isitufanye kuwa matajiri, lakini itatuhifadhi kuwa wanyofu. Iwe sisi ni wachukuzi, au waandishi, au wasimamizi, au wafanyabiashara, au mahakimu, mji utatupa nafasi za kufaa. Ni kuvua kuzuri mahali penye makundi ya samaki, nalo ni jambo la tumaini kumtumikia Bwana wetu katikati ya makutano yasongamanayo. Twaweza kupendelea utulivu wa maisha ya mashambani; lakini tukiitwa mjini, twaweza bila shaka kuupendelea kwa sababu kuna nafasi ya nguvu zetu.

Leo na tutumaini mema kwa sababu ya ahadi hii, na shughuli yetu na iwe kuwa na sikio wazi kwa sauti ya Bwana, na mkono ulio tayari kutimiza amri yake. Utii huleta baraka. "Katika kuzishika amri zake mna thawabu nyingi."

Februari 7

RUDI KUTOKA KURUDI NYUMA

"Ukimrudia Mwenyezi utajengwa" Ayubu 22:23

Elifazi, katika usemi huu, alinena kweli kuu, iliyo muhtasari wa Maandiko mengi yaliyovuviwa. Msomaji, je, dhambi imekuangusha chini? Je, umekuwa kama gofu? Je, mkono wa Bwana umekunyoshea, hata katika mali umekuwa maskini, na rohoni umevunjika? Je, ni upumbavu wako mwenyewe uliokuletea uharibifu huu wote? Basi jambo la kwanza la kufanya ni kumrudia Bwana. Kwa toba ya ndani na imani ya kweli, itafute njia yako ya kurudi kutoka kwenye kurudi nyuma kwako. Ni wajibu wako, kwa maana umegeuka kumwacha yeye uliyekiri kumtumikia. Ni hekima yako, kwa maana huwezi kushindana naye ukafanikiwa. Ni haja yako ya haraka, kwa maana aliyoyafanya si kitu ukilinganisha na ayawezayo kufanya kwa njia ya kuadhibu, kwa kuwa yeye ni Mwenyezi wa kuadhibu.

Tazama ahadi iliyoje ikualikayo! Utakuwa "umejengwa." Hakuna ila Mwenyezi awezaye kuisimamisha nguzo zilizoanguka, na kuzirudisha kuta zinazotetereka za hali yako; lakini yeye aweza, naye atafanya hivyo ukimrudia. Usikawie. Akili yako iliyopondwa yaweza kukukatia tamaa kabisa ukiendelea kuasi; lakini ungamo la moyoni litakupumzisha, na imani ya unyenyekevu itakufariji. Fanya hivi, na yote yatakuwa mema.

Februari 8

SALAMA YENYE FURAHA

"Nitakushika kwa mkono wa kuume wa haki yangu" Isaya 41:10

Kuogopa kuanguka ni jambo jema. Kuwa mjuvi wa kuhatarisha si ishara ya hekima. Nyakati hutujia tunapohisi ya kwamba hatuna budi kuanguka chini kama hatuna tegemeo maalum sana. Hapa tunalo. Mkono wa kuume wa Mungu ni kitu kikuu cha kuegemea. Angalia, si mkono wake tu, ujapoihifadhi Mbingu na nchi mahali pake, bali mkono wake wa kuume: nguvu zake zilizoungana na ustadi, nguvu zake mahali zilipo hodari zaidi. La, hii si yote, imeandikwa, "Nitakushika kwa mkono wa kuume wa haki yangu." Mkono ule autumiao kuudumisha utakatifu wake, na kutekeleza hukumu zake za kifalme -- huu utanyoshwa ili kuwategemeza wale wamtumainio. Hatari yetu ni ya kutisha, lakini salama yetu ni yenye furaha. Mtu ambaye Mungu humtegemeza, mashetani hawawezi kumwangusha chini.

Miguu yetu yaweza kuwa dhaifu, lakini mkono wa kuume wa Mungu ni wenye uweza wote. Njia yaweza kuwa ngumu, lakini Uweza wa yote ndiye kutegemeza kwetu. Twaweza kwenda mbele kwa ujasiri. Hatutaanguka. Na tuegemee daima mahali vitu vyote viegemeapo. Mungu hataziondoa nguvu zake, kwa maana haki yake nayo iko pale pale: atakuwa mwaminifu kwa ahadi yake, na mwaminifu kwa Mwanawe, na kwa hiyo mwaminifu kwetu sisi. Imetupasa kuwa na furaha iliyoje! Je, hatuko hivyo?

Februari 9

UCHAFU UMESAFISHWA

"Nami nitawaleta hao wa sehemu ya tatu kati ya moto, nami nitawasafisha kama fedha isafishwavyo, nami nitawajaribu kama dhahabu ijaribiwavyo: wataliitia jina langu, nami nitawaitikia; nitasema, Hao ni watu wangu; nao watasema, Bwana ni Mungu wangu" Zekaria 13:9

Neema hutubadili kuwa madini ya thamani, kisha moto na tanuru hufuata kama tokeo lisiloepukika. Je, twashtuka kwa hili? Je, tungependelea kuhesabiwa kuwa hatufai, ili tupate kupumzika, kama mawe ya kondeni? Hii ingekuwa kuchagua fungu lililo baya zaidi: kama Esau, kutwaa ile chakula cha dengu, na kuliacha fungu la agano. La, Bwana; kwa furaha tutatupwa katika tanuru kuliko kutupwa nje mbali na uwepo wako!

Moto husafisha tu, hauangamizi. Twapaswa kupitishwa katika moto, wala si kuachwa ndani yake. Bwana huwathamini watu wake kama fedha, na kwa hiyo hujitaabisha kuuondoa uchafu wao. Kama tu wenye hekima, tutaukaribisha zaidi mchakato wa kusafishwa kuliko kuukataa. Sala yetu itakuwa kwamba mchanganyiko wetu uondolewe kwetu badala ya sisi kuondolewa katika kaure ya kuyeyushia.

Ee Bwana, wewe hakika watujaribu! Tu tayari kuyeyuka chini ya ukali wa mwali. Hata hivyo, hii ni njia yako, na njia yako ndiyo iliyo bora. Tutegemeze chini ya jaribu na kuukamilisha mchakato wa kutakasika kwetu, nasi tutakuwa wako milele na milele.

Februari 10

SHAHIDI WA DAIMA

"Kwa maana utakuwa shahidi wake kwa watu wote, wa mambo hayo uliyoyaona na kuyasikia" Matendo 22:15

Paulo alichaguliwa kumwona na kumsikia Bwana akinena naye kutoka Mbinguni. Uchaguzi huu wa Kimungu ulikuwa upendeleo mkuu kwake mwenyewe; lakini haukukusudiwa kuishia kwake, ulikusudiwa kuwa na uvutano juu ya wengine; naam, juu ya watu wote. Ni kwa Paulo ambaye Ulaya inadaiwa injili saa hii.

Ni fungu letu kwa kadiri yetu kuwa mashahidi wa yale Bwana aliyotufunulia, nalo ni hatari kwetu kama tukiuficha ufunuo ule wa thamani. Kwanza, hatuna budi kuona na kusikia, ama sivyo hatutakuwa na neno la kusema; lakini tukiisha fanya hivyo, hatuna budi kuwa na shauku ya kutoa ushuhuda wetu. Ni lazima uwe wa binafsi: "Utakuwa wewe." Ni lazima uwe kwa ajili ya Kristo: "Utakuwa shahidi wake." Ni lazima uwe wa daima na wenye kuvuta yote; twapaswa kuwa hivi zaidi ya mambo yote mengine, na kwa kuyaacha mambo mengine mengi. Ushuhuda wetu usiwe kwa wachache wateule watakaotupokea kwa furaha; bali kwa watu wote" -- kwa wote tuwezao kuwafikia, vijana au wazee, matajiri au maskini, wema au wabaya. Hatupaswi kunyamaza kamwe kama wale waliopagawa na pepo bubu; kwa maana maneno yaliyo mbele yetu ni amri, na ahadi, wala hatupaswi kuyakosa -- "Utakuwa shahidi wake." "Ninyi ni mashahidi wangu, asema Bwana."

Bwana, unitimizie neno hili mimi pia!

Februari 11

JE, WATOTO WAMO NDANI?

"Nitamimina Roho yangu juu ya wazao wako, na baraka yangu juu ya vizazi vyako" Isaya 44:3

Watoto wetu wapendwa hawana Roho wa Mungu kwa asili, kama tuonavyo waziwazi. Twaona mengi ndani yao yatufanyayo kuogopa juu ya wakati wao ujao, na hili hutusukuma katika sala ya uchungu. Mwana anapokuwa mkaidi kupita kiasi, twalia pamoja na Abrahamu, "Laiti Ishmaeli angeishi mbele zako!" Tungependelea kuwaona binti zetu kuwa kina Hana kuliko malkia. Andiko hili yapasa kututia moyo sana. Hufuata baada ya maneno, "Usiogope, Ee Yakobo, mtumishi wangu," nalo laweza vyema kuziondoa hofu zetu.

Bwana atatoa Roho wake; atamtoa kwa wingi, akimmimina; atamtoa kwa nguvu, hata awe baraka ya kweli na ya milele. Chini ya kumiminwa huku kwa Kimungu watoto wetu watajitokeza, na "mmoja atasema, Mimi ni wa Bwana; na mwingine atajiita kwa jina la Yakobo."

Hii ni mojawapo ya ahadi zile ambazo kwa habari zake Bwana atatakwa. Je, haitupasi, kwa nyakati zilizowekwa, kwa namna ya pekee, kuwaombea wazao wetu? Hatuwezi kuwapa mioyo mipya, lakini Roho Mtakatifu aweza; naye asihiwa kwa urahisi. Baba mkuu hupendezwa na sala za baba na mama. Je, tunao wapendwa wo wote nje ya safina? Tusipumzike hata watakapofungiwa ndani pamoja nasi kwa mkono wa Bwana mwenyewe.

Februari 12

MUNGU HUPENDEZWA KUTOA

"Bwana akamwambia Abramu, baada ya Lutu kutengana naye, Inua sasa macho yako, ukatazame toka mahali hapo ulipo, upande wa kaskazini, na kusini, na mashariki, na magharibi: kwa maana nchi hii yote uionayo, nitakupa wewe na uzao wako milele" Mwanzo 13:14, 15

Baraka ya pekee kwa tukio la kukumbukwa. Abramu alikuwa amesuluhisha ugomvi wa jamaa. Alikuwa amesema, "Nakusihi, isiwe furugu kati ya mimi na wewe, kwa maana sisi tu ndugu"; na kwa hiyo alipokea baraka iliyo ya wapatanishi. Bwana na mtoaji wa amani hupendezwa kuidhihirisha neema yake kwa wale waitafutao amani na kuifuatia. Kama twatamani ushirika wa karibu zaidi na Mungu, hatuna budi kukaa karibu zaidi na njia za amani.

Abramu alikuwa amejitendea kwa ukarimu mwingi kwa jamaa yake, akimpa nafasi ya kuchagua nchi. Kama twajikana nafsi kwa ajili ya amani, Bwana atatulipa kwa kupita kiasi. Kwa kadiri baba huyu wa mababa awezavyo kuona, aweza kudai, nasi twaweza kufanya vivyo hivyo kwa imani. Abramu alilazimika kungoja umiliki halisi, lakini Bwana aliirithisha nchi juu yake na wazao wake. Baraka zisizo na mipaka ni zetu kwa kipawa cha agano. Vitu vyote ni vyetu. Tunapompendeza Bwana, hutufanya tutazame kila mahali, na kuona vitu vyote ni vyetu, ikiwa vitu vilivyopo, au vitu vitakavyokuja, vyote ni vyetu, nasi tu wa Kristo, na Kristo ni wa Mungu.

Februari 13

ULIYEBARIKIWA MASHAMBANI

"Utabarikiwa mashambani" Kumbukumbu 28:3

Ndivyo Isaka alivyobarikiwa alipotembea humo wakati wa jioni ili kutafakari. Mara ngapi Bwana ametukuta tulipokuwa peke yetu! Ua na miti vyaweza kushuhudia furaha yetu. Twaitazamia heri kama hiyo tena.

Ndivyo Boazi alivyobarikiwa alipovuna mavuno yake, na wafanyakazi wake wakamlaki kwa baraka. Bwana na awafanikishe wote waendeshao jembe! Kila mkulima aweza kuisihi ahadi hii kwa Mungu, kama kweli aitii sauti ya Bwana Mungu.

Twaenda shambani kufanya kazi kama baba Adamu alivyofanya; na kwa kuwa laana ilianguka juu ya udongo kwa dhambi ya Adamu wa kwanza, ni faraja kuu kupata baraka kwa Adamu wa pili.

Twaenda shambani kwa mazoezi ya mwili, nasi twafurahi katika kuamini ya kwamba Bwana atayabariki mazoezi hayo, na kutupa afya, ambayo tutaitumia kwa utukufu wake.

Twaenda shambani kujifunza maumbile, wala hakuna kitu katika maarifa ya uumbaji uonekanao ambacho hakiwezi kutakaswa kwa matumizi yaliyo bora zaidi kwa baraka ya Mungu.

Mwishowe twapaswa kwenda shambani kuwazika wafu wetu; naam, wengine kwa zamu yao watatuchukua hata shamba la Mungu la makaburi: lakini tumebarikiwa, tukiwa twalia kaburini, au twalala ndani yake.

Februari 14

REHEMA KWA WASIOSTAHILI

"Amtumainiye Bwana, fadhili zitamzunguka" Zaburi 32:10

Ee thawabu njema ya kutumaini! Bwana wangu, unipe kwa ukamilifu! Yeye atumainiye zaidi ya watu wote hujihisi kuwa mwenye dhambi; na tazama, rehema imeandaliwa kwa ajili yake: ajua kuwa hana ustahili wo wote, lakini rehema huingia, na kumtunza kwa ukarimu mwingi. Ee Bwana, unipe rehema hii, kama nikutumainivyo!

Angalia, ee nafsi yangu, ulinzi ulioje unao! Kama vile mfalme azungukwavyo na askari, ndivyo wewe uzungukwavyo na rehema. Mbele na nyuma, na pande zote, hupanda walinzi hawa wa neema waliopanda farasi. Twakaa katikati ya mfumo wa rehema, kwa maana twakaa ndani ya Kristo Yesu.

Ee nafsi yangu, hewa iliyoje uivutayo! Kama vile hewa ikuzungukavyo, ndivyo rehema ya Bwana wako ikuzungukavyo. Kwa wabaya kuna huzuni nyingi, lakini kwako kuna rehema nyingi mno hata huzuni zako hazistahili kutajwa. Daudi asema, "Furahini katika Bwana, mkashangilie, enyi wenye haki; pigeni kelele za furaha, ninyi nyote mlio wanyofu wa moyo." Kwa kuitii amri hii moyo wangu utashinda katika Mungu, nami nitautangaza furaha yangu. Kama ulivyonizunguka kwa rehema, mimi nami nitazizunguka madhabahu zako, Ee Mungu wangu, kwa nyimbo za kushukuru!

Februari 15

AKUMBUKAYE SIKUZOTE

"Bwana ametukumbuka: atatubariki" Zaburi 115:12

Naweza kutia muhuri wangu juu ya sentensi hiyo ya kwanza. Je, wewe huwezi? Naam, Yehova ametufikiria, ametutimizia mahitaji, ametufariji, ametuokoa, na kutuongoza. Katika mienendo yote ya utawala wake ametukumbuka, wala hajayapuuza mambo yetu duni. Nia yake imekuwa imejaa sisi -- hiyo ndiyo namna nyingine ya neno "kumbuka." Hivyo ndivyo ilivyokuwa tangu awali, wala pasipo kikomo hata kimoja. Lakini kwa nyakati za pekee, tumekuona kwa dhahiri zaidi kukumbuka huku, nasi twapenda kuzikumbuka saa hii kwa shukrani ifurikayo. Naam, naam, "Bwana ametukumbuka."

Sentensi ifuatayo ni tokeo la kimantiki kutokana na ile ya kwanza. Kwa kuwa Mungu habadiliki, ataendelea kutukumbuka wakati ujao kama alivyofanya wakati uliopita; na kutukumbuka kwake ni sawasawa na kutubariki. Lakini hapa tunalo, si hitimisho la akili tu bali tangazo la uvuvio: tunalo kwa mamlaka ya Roho Mtakatifu -- "ATATUBARIKI." Hii yamaanisha mambo makuu yasiyochunguzika. Kutokuwa dhahiri kwenyewe kwa ahadi hii kwaonyesha ufikio wake usio na kikomo. Atatubariki kwa namna yake mwenyewe ya Kimungu, na hiyo milele na milele. Kwa hiyo, kila mmoja wetu na aseme, "Ee nafsi yangu, umhimidi Bwana!"

Februari 16

WASHUGHULIKA NA MUNGU

"Sitatenda kwa hasira yangu kali, sitarudi kumwangamiza Efraimu: kwa maana mimi ni Mungu, wala si mwanadamu" Hosea 11:9

Hivyo Bwana huzidhihirisha rehema zake za kuhurumia. Yamkini msomaji sasa yu chini ya ghadhabu nzito, na kila kitu chatishia maangamizi yake ya haraka. Andiko hili na limshike asianguke katika kukata tamaa. Bwana sasa akualika uzitafakari njia zako, na kuziungama dhambi zako. Kama angekuwa mwanadamu, angekuwa amekukatilia mbali tangu zamani. Kama angetenda sasa kwa namna ya wanadamu, lingekuwa neno na pigo kisha kungekuwa mwisho wako: lakini sivyo, kwa maana "kama vile mbingu zilivyo juu sana kuliko nchi, ndivyo njia zake zilivyo juu sana kuliko njia zako."

Wahukumu kwa haki kwamba amekasirika, lakini hashiki hasira yake milele: ukigeuka kuiacha dhambi na kumwendea Yesu, Mungu atageuka kuiacha ghadhabu. Kwa sababu Mungu ni Mungu, wala si mwanadamu, ungalipo msamaha kwako, ijapokuwa waweza kuwa umezama hata kooni katika uovu. Una Mungu wa kushughulika naye, wala si mwanadamu mgumu, wala hata mwanadamu aliye mwenye haki tu. Hakuna binadamu ye yote ambaye angekuwa na saburi nawe: ungemchosha malaika, kama ulivyomchosha baba yako mwenye huzuni; lakini Mungu ni mvumilivu. Njoo umjaribu mara moja. Ungama, amini, na kuiacha njia yako mbaya, nawe utaokoka.

Februari 17

MUNGU AWEZA KUKUFANYA HODARI

"Basi ninyi iweni hodari, wala mikono yenu isilegee: kwa kuwa kazi yenu itapata thawabu" 2 Nyakati 15:7

Mungu alikuwa amewafanyia mambo makuu Mfalme Asa na Yuda, lakini bado walikuwa watu dhaifu. Miguu yao ilikuwa ikitetereka sana katika njia za Bwana, na mioyo yao ikisitasita sana, hata ilibidi waonywe ya kwamba Bwana atakuwa pamoja nao maadamu wakiwa pamoja naye, lakini kwamba wakimwacha yeye atawaacha. Walikumbushwa pia habari za ufalme wa ndugu, jinsi ulivyopatwa na maovu katika uasi wake, na jinsi Bwana alivyokuwa na neema kwao toba ilipoonyeshwa. Kusudi la Bwana lilikuwa kuwathibitisha katika njia yake, na kuwafanya kuwa hodari katika haki. Ndivyo iipasavyo kuwa kwetu sisi. Mungu astahili kutumikiwa kwa nguvu zote tuzimuduzo.

Kama utumishi wa Mungu wafaa kitu cho chote, wafaa kila kitu. Tutapata thawabu yetu iliyo bora katika kazi ya Bwana kama tukiifanya kwa bidii ya kukusudia. Kazi yetu si bure katika Bwana, nasi twajua hivyo. Kazi ya moyo nusu haitaleta thawabu; lakini, tutakapoitia nafsi yetu yote katika kazi hiyo, tutaona mafanikio. Andiko hili lilipelekwa kwa mtungaji wa maandishi haya katika siku ya dhoruba ya kutisha, likamdokezea kutumia nguvu zote za mvuke, akiwa na hakika ya kuufikia bandari salama pamoja na shehena tukufu.

Februari 18

MUNGU ATAJIBU

"Atawatimizia haja wamchao: naye atasikia kilio chao, na kuwaokoa" Zaburi 145:19

Roho wake mwenyewe ameitenda shauku hii ndani yetu, na kwa hiyo ataijibu. Ni uzima wake mwenyewe ulio ndani unaochochea kilio, na kwa hiyo atakisikia. Wale wamchao yeye ni watu walio chini ya uvutano ulio mtakatifu kupita yote, na kwa hiyo, shauku yao ni kumtukuza Mungu, na kumfurahia milele. Kama Danieli, wao ni watu wa kutamanika, na Bwana atawafanya wayafikie makusudio yao.

Shauku takatifu ni neema katika jani changa, na Mkulima wa mbinguni atazilima hata zifike nafaka kamili katika suke. Watu wamchao Mungu hutamani kuwa watakatifu, kuwa wenye kufaa, kuwa baraka kwa wengine, na hivyo kumheshimu Bwana wao. Hutamani mahitaji yao yatimizwe, msaada chini ya mizigo, mwongozo katika mashaka, wokovu katika dhiki; na wakati mwingine shauku hii ni yenye nguvu sana, na hali yao ni yenye kubana sana, hata hulia kwa uchungu, kama watoto wadogo katika maumivu, ndipo Bwana hutenda kwa ukamilifu kupita yote, na kufanya yote yaliyo ya lazima, sawasawa na Neno hili -- "na kuwaokoa."

Naam, kama twamcha Mungu, hatuna jambo lingine la kuogopa; kama twamlilia Bwana, wokovu wetu ni hakika.

Msomaji na aliweke andiko hili juu ya ulimi wake, na kulitunza kinywani mwake mchana kutwa, nalo litakuwa kwake kama "andazi lililofanywa kwa asali."

Februari 19

HERI MBELE ZAIDI

"Nijapokutesa, sitakutesa tena" Nahumu 1:12

Kuna kikomo cha mateso. Mungu huyaleta na Mungu huyaondoa. Je, wahema, ukisema "Mwisho utakuwa lini?" Kumbuka ya kwamba huzuni zetu hakika na hatimaye zitakwisha maisha haya maskini ya duniani yatakapokwisha. Na tungoje kwa utulivu, na kuvumilia kwa saburi mapenzi ya Bwana hata atakapokuja.

Wakati huo huo, Baba yetu wa Mbinguni huiondoa fimbo kusudi lake katika kuitumia litakapokwisha timizwa kabisa. Atakapokuwa amepiga kuuondoa upumbavu wetu, hakutakuwa na mapigo zaidi. Au, kama mateso yametumwa ili kutujaribu, ili neema zetu zimtukuze Mungu, yatakwisha Bwana atakapokuwa ametufanya tuushuhudie sifa yake. Hatungependa mateso yaondoke hata Mungu atakapokuwa ametoa kwetu heshima yote tuwezayo kumtolea.

Leo yaweza kuwako "shwari kubwa." Ni nani ajuaye jinsi mawimbi yale yenye kuvuma yatakavyoachia mahali baharini ya kioo hivi karibuni, na ndege wa baharini kukaa juu ya mawimbi matulivu? Baada ya dhiki ndefu bakora hutundikwa, na ngano hupumzika ghalani. Twaweza, kabla ya saa nyingi kupita, kuwa na furaha vilevile kama tulivyo na huzuni sasa. Si vigumu kwa Bwana kuugeuza usiku kuwa mchana. Yeye azipelekaye mawingu aweza vivyo hivyo kwa urahisi kuzitakasa mbingu. Na tuchangamke. Ni heri zaidi huko mbele. Na tuimbe Haleluya kwa kutazamia.

Februari 20

MWONGOZO WA DAIMA

"Naye Bwana atakuongoza daima" Isaya 58:11

Una nini? Je, umeipoteza njia yako? Je, umenaswa katika msitu wa giza, wala huwezi kuziona njia zako? Simama kimya, ukauone wokovu wa Mungu. Yeye aijua njia, naye atakuongoza ndani yake ukimlilia.

Kila siku huleta mashaka yake yenyewe. Ni tamu kama nini kuhisi ya kwamba mwongozo wa Bwana ni wa daima! Kama twaichagua njia yetu wenyewe, au kufanya shauri na nyama na damu, twautupa mbali mwongozo wa Bwana; lakini kama twajizuia na mapenzi yetu wenyewe, ndipo atakapoiongoza kila hatua ya njia yetu, kila saa ya mchana, na kila siku ya mwaka, na kila mwaka wa maisha yetu. Kama tu twaongozwa tu, tutaongozwa. Kama twaikabidhi njia yetu kwa Bwana, ataiongoza safari yetu hata tusijipoteze.

Lakini angalia ni kwa nani ahadi hii imetolewa. Soma mstari uliotangulia: "Kama ukimtolea mwenye njaa nafsi yako." Hatuna budi kuwahurumia wengine, na kuwapa, si makombo machache makavu, bali vitu ambavyo sisi wenyewe tungependa kuvipokea. Kama twaonyesha uangalizi wa huruma kwa viumbe wenzetu katika saa ya haja yao, ndipo Bwana atakapoyaangalia mahitaji yetu, na kujifanya kuwa Kiongozi wetu wa daima. Yesu ni Kiongozi, si wa wachoyo, wala wa wale wawaoneao maskini, bali wa wenye fadhili na wenye mioyo ya huruma. Watu kama hao ni wasafiri, ambao hawataikosa njia yao kamwe.

Februari 21

BARAKA JUU YA UDOGO

"Atawabariki wamchao Bwana, wadogo kwa wakubwa" Zaburi 115:13

Hili ni neno la kutia moyo kwa wale walio wa cheo cha chini na hali duni. Mungu wetu ana fikira ya neema sana kwa wale wenye mali ndogo, kipaji kidogo, uvutano mdogo, uzito mdogo. Mungu huvijali vitu vidogo katika uumbaji, na hata huwaangalia shomoro katika kutua kwao juu ya nchi. Hakuna kilicho kidogo kwa Mungu, kwa maana hutumia vyombo visivyo na maana kwa kuyatimiza makusudi yake. Aliye mdogo kuliko wote kati ya watu na amtafute Mungu baraka juu ya udogo wake, naye atauona uwanja wake ulio finyu kuwa wenye furaha.

Miongoni mwa wale wamchao Bwana wako wadogo na wakubwa. Wengine ni watoto wachanga, na wengine ni majitu. Lakini hawa wote wamebarikiwa. Imani ndogo ni imani iliyobarikiwa. Tumaini litetemekalo ni tumaini lililobarikiwa. Kila neema ya Roho Mtakatifu, ijapokuwa ni katika chembe tu, hubeba baraka ndani yake. Zaidi ya hayo, Bwana Yesu aliwanunua wote wawili wadogo na wakubwa kwa damu ile ile ya thamani, naye ameahidi kuwahifadhi wana-kondoo vilevile na kondoo waliokomaa. Hakuna mama ampuuzaye mtoto wake kwa sababu ni mdogo; la, kadiri alivyo mdogo zaidi, ndivyo amnyonyeshavyo kwa huruma zaidi. Kama kuna upendeleo wo wote kwa Bwana, hawapangi kama "wakubwa na wadogo," bali kama "wadogo na wakubwa.

Februari 22

WOKOVU WA ZAMANI HUZAA IMANI

"Daudi akasema tena, Bwana aliyeniponya na makucha ya simba, na makucha ya dubu, ndiye atakayeniponya na mkono wa Mfilisti huyu" 1 Samweli 17:37

Hii si ahadi kama tukiyaangalia maneno tu, lakini ni ahadi kweli kwa maana yake; kwa maana Daudi alinena neno ambalo Bwana alilithibitisha kwa kulifanya kuwa kweli. Alihoji kutokana na wokovu wa zamani ya kwamba atapokea msaada katika hatari mpya. Katika Yesu ahadi zote ni Ndiyo na Amina kwa utukufu wa Mungu kwa sisi, na hivyo matendo ya Bwana ya zamani kwa watu wake waaminio yatarudiwa.

Njoo, basi, na tuzikumbuke fadhili za Bwana za zamani. Tusingeweza kutumaini kuokolewa hapo zamani kwa nguvu zetu wenyewe; hata hivyo Bwana alituokoa. Je, hatatuokoa tena? Tuna hakika atatuokoa. Kama Daudi alivyopiga mbio kumlaki adui yake, ndivyo tutakavyofanya sisi. Bwana amekuwa pamoja nasi, yu pamoja nasi, naye amesema, "Sitakupungukia kamwe wala sitakuacha." Kwa nini twatetemeka? Je, yaliyopita yalikuwa ndoto? Fikiri juu ya dubu aliyekufa na simba. Ni nani Mfilisti huyu? Kweli, si yeye yule yule kabisa, wala si dubu wala simba; lakini basi Mungu ni yeye yule yule, na heshima yake yahusika kadiri iyo hiyo katika jambo hili kama katika lile. Hakutuokoa na wanyama wa mwituni ili kumwacha jitu atuue. Na tuwe na moyo mkuu.

Februari 23

USHIRIKA USIOVUNJIKA NI MUHIMU

"Ninyi mkikaa ndani yangu, na maneno yangu yakikaa ndani yenu, ombeni mtakalo lote, nanyi mtatendewa" Yohana 15:7

Kwa lazima hatuna budi kuwa ndani ya Kristo ili kuishi kwa ajili yake, na hatuna budi kukaa ndani yake ili kuweza kudai ukarimu wa ahadi hii kutoka kwake. Kukaa ndani ya Yesu kamwe si kumwacha kwa ajili ya upendo mwingine, au kitu kingine, bali ni kudumu katika muungano wa uzima, wa upendo, wa kufahamu, wa hiari pamoja naye. Tawi si kwamba huwa karibu na shina tu, bali hupokea daima uzima na kuzaa matunda kutoka kwake. Waaminio wote wa kweli hukaa ndani ya Kristo kwa namna fulani; lakini kuna maana iliyo kuu zaidi, nayo hii hatuna budi kuijua kabla ya kuweza kupata nguvu isiyo na mipaka kwenye kiti cha enzi. "Ombeni mtakalo lote" ni kwa ajili ya kina Enoko waendao pamoja na Mungu, kwa kina Yohana walalao kifuani mwa Bwana, kwa wale ambao muungano wao na Kristo huwaleta katika ushirika wa daima.

Moyo hauna budi kudumu katika upendo, akili hazina budi kuwa na mizizi katika imani, tumaini halina budi kushikamanishwa na Neno, mtu mzima hana budi kuunganishwa na Bwana, ama sivyo ingekuwa hatari kutuaminisha nguvu katika sala. Kibali kisicho na masharti chaweza kutolewa tu kwa yule ambaye uzima wake wenyewe ni, "Si mimi tena, bali Kristo yu hai ndani yangu." Ee wewe uvunjaye ushirika wako, nguvu iliyoje uipotezayo! Kama ungependa kuwa hodari katika maombi yako, Bwana mwenyewe hana budi kukaa ndani yako, na wewe ndani yake.

Februari 24

SIKIA ILI USIKIWE

"Ninyi mkikaa ndani yangu, na maneno yangu yakikaa ndani yenu, ombeni mtakalo lote, nanyi mtatendewa" Yohana 15:7

Angalia vyema, ya kwamba hatuna budi kumsikia Yesu akinena kama twataraji atusikie tunena. Kama hatuna sikio kwa Kristo, naye hatakuwa na sikio kwetu. Kwa kadiri tusikiavyo ndivyo tutakavyosikiwa.

Zaidi ya hayo, kilichosikiwa hakina budi kudumu, hakina budi kuishi ndani yetu, na hakina budi kukaa katika tabia yetu kama nguvu na uweza. Hatuna budi kuzipokea kweli alizozifundisha Yesu, amri alizozitoa, na mienendo ya Roho wake ndani yetu; ama sivyo hatutakuwa na nguvu kwenye kiti cha rehema.

Tuseme maneno ya Bwana wetu yamepokewa, na kukaa ndani yetu, uwanja usio na mipaka wa upendeleo ulioje unaofunuliwa kwetu! Twapaswa kupata matakwa yetu katika sala, kwa sababu tumekwisha yasalimisha matakwa yetu kwa amri ya Bwana. Hivyo kina Eliya hufunzwa kuzishika funguo za Mbinguni, na kufunga au kufungua mawingu. Mtu mmoja kama huyo ni bora kuliko Wakristo elfu wa kawaida. Je, twatamani kwa unyenyekevu kuwa waombezi kwa ajili ya kanisa na ulimwengu, na kama Lutheri kuweza kupata tutakalo kwa Bwana? Basi hatuna budi kuliinamisha sikio letu kwa sauti ya Mpendwa, na kuyatunza maneno yake kama hazina, na kuyatii kwa uangalifu. Ilimpasa "kusikiliza kwa bidii" yeye atakaye kuomba kwa matokeo.

Februari 25

KUTENGWA

"Nanyi mtaitwa makuhani wa Bwana" Isaya 61:6

Ahadi hii ya halisi kwa Israeli ni ya kiroho kwa wazao wa Roho, yaani, kwa waaminio wote. Kama tukiishi sawasawa na mapendeleo yetu, tutamwishia Mungu kwa uwazi na dhahiri, hata watu wataona ya kwamba tumetengwa kwa utumishi mtakatifu, nao watatuita makuhani wa Bwana. Twaweza kufanya kazi, au kufanya biashara, kama wengine wafanyavyo, na hata hivyo twaweza kuwa watumishi wa Mungu peke yetu na kwa ukamilifu wetu. Shughuli yetu moja itakuwa kuitoa dhabihu ya daima ya sala, na sifa, na ushuhuda, na kujiweka wakfu, kwa Mungu aliye hai kwa njia ya Yesu Kristo.

Kwa kuwa hili ndilo lengo letu moja, twaweza kuwaachia mambo yenye kuvuruga wale wasio na wito ulio wa juu zaidi. "Waache wafu wawazike wafu wao." Imeandikwa, "Wageni watasimama na kulisha makundi yenu, na wana wa wageni watakuwa wakulima wenu na watunza-mizabibu wenu." Wao waweza kuendesha siasa, na kufumbua matatizo ya fedha, na kujadili sayansi, na kuamua mabishano mapya ya mwisho ya uhakiki; lakini sisi tutajitoa kwa utumishi kama huo ipasavyo wale ambao, kama Bwana Yesu, wamewekwa kwa ukuhani wa daima.

Tukiipokea ahadi hii ya heshima kama yenye kuhusisha wajibu mtakatifu, na tuvae mavazi ya utakatifu, na kuhudumu mbele za Bwana mchana kutwa.

Februari 26

KWELI IMETHIBITIKA

"Mdomo wa kweli utathibitika milele; bali ulimi wa uongo ni wa kitambo kidogo tu" Mithali 12:19

Kweli hudumu vyema. Wakati huijaribu, lakini huvumilia jaribu vyema kabisa. Basi, kama nimeinena kweli, na kwa sasa yanipasa kuteseka kwa ajili yake, sina budi kuridhika kungoja. Kama pia naiamini kweli ya Mungu, na kujitahidi kuitangaza, naweza kukutana na upinzani mwingi, lakini haipasi kuogopa, kwa maana hatimaye kweli haina budi kushinda.

Kitu duni kama nini ushindi wa muda wa uongo! "Mdomo wa uongo ni wa kitambo kidogo tu!" Ni mtango tu, uchipuao usiku mmoja, na kunyauka usiku mmoja; na kadiri unavyokua zaidi ndivyo kuoza kwake kunavyodhihirika zaidi. Kwa upande mwingine, ni jambo la kustahili kama nini kwa kiumbe asiyekufa kuikiri na kuitetea kweli ile isiyoweza kubadilika kamwe; injili ya milele, iliyothibitishwa katika kweli isiyobadilika ya Mungu asiyebadilika! Methali ya zamani husema, "Anenaye kweli humwaibisha shetani." Bila shaka yeye anenaye kweli ya Mungu atawaaibisha mashetani wote wa jehanamu, na kuwatahayarisha wazao wote wa nyoka ambao sasa hufyonya uongo wao.

Ee moyo wangu, jihadhari upate kuwa katika mambo yote upande wa kweli, katika mambo madogo na makubwa; lakini hasa, upande wake yeye ambaye kwa njia yake neema na kweli vimekuja kati ya wanadamu!

Februari 27

KUTUMAINI KUSIKOYUMBAYUMBA

"Hataogopa habari mbaya: moyo wake u imara, ukimtumaini Bwana" Zaburi 112:7

Wasiwasi wa kusubiri ni wa kutisha. Tunapokosa habari kutoka nyumbani, twaelekea kuhangaika, wala hatuwezi kushawishiwa ya kwamba "kukosa habari ni habari njema." Imani ndiyo dawa ya hali hii ya huzuni: Bwana kwa Roho wake huituliza akili katika utulivu mtakatifu, na hofu yote hutoweka kwa habari ya wakati ujao na wa sasa pia.

Uthabiti wa moyo unaonenwa na Mtunga-Zaburi wapaswa kutafutwa kwa bidii. Si kuamini ahadi hii au ile ya Bwana, bali ni hali ya jumla ya kutumaini kusikoyumbayumba katika Mungu wetu, uhakika tulio nao kwake ya kwamba hatatutenda mabaya yeye mwenyewe, wala hatamwacha mtu mwingine ye yote atudhuru. Uhakika huu wa daima hukutana na yasiyojulikana ya maisha vilevile na yajulikanayo. Kesho na iwe vyo vyote, Mungu wetu ni Mungu wa kesho. Yo yote yaliyotukia, ambayo kwetu hayajulikani, Yehova wetu ni Mungu wa yasiyojulikana vilevile na yajulikanayo. Tumeazimia kumtumaini Bwana, lije lolote. Kama baya kabisa lingetukia, Mungu wetu bado ndiye aliye mkuu na aliye bora kuliko wote. Kwa hiyo hatutaogopa ijapokuwa kubisha kwa mpeleka-barua kungetushtua, au simu ya telegramu ikatuamsha usiku wa manane. Bwana yu hai, na watoto wake waweza kuogopa nini?

Februari 28

MILKI HALISI MBINGUNI

"Mkijua nafsini mwenu ya kwamba mna mali iliyo bora mbinguni, idumuyo" Waebrania 10:34

Hii ni vyema. Mali yetu hapa ni isiyo na uthabiti kabisa; hakuna uthabiti ndani yake. Lakini Mungu ametupa ahadi ya milki halisi katika nchi ya utukufu, na ahadi hiyo huja mioyoni mwetu kwa uhakika kamili wa yakini yake, hata twajua nafsini mwetu ya kwamba tuna mali idumuyo huko. Naam, "tunayo" hata sasa. Watu husema, "Ndege mkononi ni bora kuliko wawili kichakani"; lakini sisi tunaye ndege wetu kichakani na mkononi pia. Mbingu hata sasa ni yetu wenyewe. Tunayo hati-miliki yake, tunayo arabuni yake, tunayo malimbuko yake. Tunayo Mbingu kwa thamani, na kwa ahadi, na kwa msingi: haya twayajua si kwa kusikia kwa sikio tu, bali "nafsini mwetu."

Je, wazo la mali iliyo bora ng'ambo ile ya pili ya Yordani halipaswi kutupatanisha na hasara za sasa? Fedha zetu za matumizi twaweza kuzipoteza, lakini hazina yetu i salama. Tumezipoteza vivuli, lakini mali hubaki, kwa maana Mwokozi wetu yu hai, na mahali alipotuandalia hudumu. Kuna nchi iliyo bora, mali iliyo bora, ahadi iliyo bora; na haya yote hutujia kwa agano lililo bora; kwa hiyo, na tuwe na moyo ulio bora, na kumwambia Bwana, "Kila siku nitakuhimidi; nami nitalisifu jina lako milele na milele."

Februari 29

KINACHOTUFUATA

"Hakika wema na fadhili zitanifuata siku zote za maisha yangu" Zaburi 23:6

Mshairi mmoja mcha Mungu aimba-

"Bwana, wewe

Uwekapo katika wakati wangu siku, kama ufanyavyo sasa,

Isiyojulikana katika miaka mingine, nakusihi, nijalie,

Neema iiangaze, hata hali yake iwe yo yote

Iongeze utakatifu, na kuirefusha sifa!"

Siku hii huja mara moja tu katika miaka minne, Ee, laiti tungeweza kupata baraka maradufu mara nne juu yake! Hata sasa wema na fadhili, kama walinzi wawili, vimetufuata siku baada ya siku, vikilinda nyuma kama vile neema iongozavyo mbele; na kwa kuwa siku hii isiyo ya kawaida ni mojawapo ya siku za maisha yetu, malaika wale wawili walinzi watakuwa pamoja nasi leo pia. Wema wa kutimiza mahitaji yetu, na fadhili za kufuta dhambi zetu -- hawa wawili watazihudumia hatua zetu zote siku hii, na kila siku hata siku zitakapokoma. Kwa hiyo, na tumtumikie Bwana katika siku hii ya pekee kwa kujiweka wakfu kwa moyo, na kuimba sifa zake kwa shauku na utamu kupita kawaida. Je, hatuwezi leo kutoa sadaka isiyo ya kawaida kwa kazi ya Mungu, au kwa maskini? Kwa ubunifu wa upendo na tuifanye siku hii ya ishirini na tisa ya Februari kuwa siku ya kukumbukwa milele.