Mwezi wa Januari

Januari 1

AHADI YA KWANZA YA BIBLIA

"Nami nitaweka uadui kati yako na huyo mwanamke, na kati ya uzao wako na uzao wake; huo utakuponda kichwa, na wewe utamponda kisigino." Mwanzo 3:15

Hii ndiyo ahadi ya kwanza kwa mwanadamu aliyeanguka. Ndani yake mna injili nzima, na kiini cha agano la neema. Kwa sehemu kubwa imekwisha timizwa. Uzao wa mwanamke, naam, Bwana wetu Yesu, alipondwa kisigino chake, nako kupondwa huko kulikuwa kwa kutisha. Jinsi gani kutakavyokuwa kutisha kule kupondwa kwa mwisho kwa kichwa cha nyoka! Hili kwa hakika lilitendeka Yesu alipoiondoa dhambi, akaishinda mauti, na kuivunja nguvu ya Shetani; lakini bado lasubiri utimilifu mkamilifu zaidi katika Ujio wa Pili wa Bwana wetu, na katika Siku ya Hukumu. Kwetu sisi ahadi hii yasimama kama unabii ya kwamba tutateswa na nguvu za uovu katika hali yetu ya chini, na hivyo kupondwa kisigino chetu; lakini tutashinda katika Kristo, awekaye mguu wake juu ya kichwa cha nyoka wa zamani. Mwaka huu wote yamkini tutalazimika kujifunza sehemu ya kwanza ya ahadi hii kwa kuionja, kupitia majaribu ya ibilisi, na ukatili wa wasiomcha Mungu walio uzao wake. Waweza kutuponda hata tukachechemea kwa kisigino kilichoumia; lakini na tuishike sehemu ya pili ya andiko, nasi hatutafadhaika. Kwa imani na tufurahi ya kwamba bado tutatawala katika Kristo Yesu, uzao wa mwanamke.

Januari 2

KUSHINDA HATA KUPATA USHINDI

"Naye Mungu wa amani atamponda Shetani chini ya miguu yenu upesi." Warumi 16:20

Ahadi hii yafuata vema ile ya jana. Ni dhahiri tutafananishwa na Kichwa chetu cha agano, si tu katika kupondwa kisigino chake, bali pia katika kumshinda kwake yule mwovu. Hata chini ya miguu yetu joka wa zamani atapondwa. Waumini wa Rumi walikuwa wamehuzunishwa na mafarakano kanisani; lakini Mungu wao alikuwa "Mungu wa amani," naye akawapa raha ya nafsi. Adui mkuu aliwakwaza miguu wale wasio waangalifu, akadanganya mioyo ya wanyofu; lakini ilimpasa kupata hasara, na kukanyagwa chini na wale aliowasumbua. Ushindi huu usingewajia watu wa Mungu kwa ustadi au nguvu zao wenyewe; bali Mungu mwenyewe angemponda Shetani. Ijapokuwa ingekuwa chini ya miguu yao, hata hivyo kupondwa huko kungekuwa kwa Bwana peke yake.

Na tumkanyage mjaribu kwa ujasiri! Si pepo wa hali ya chini tu, bali Mkuu wa giza mwenyewe lazima aanguke mbele yetu. Kwa kumtumaini Mungu bila shaka, na tuutazamie ushindi wa haraka. "UPESI." Neno la furaha! Upesi tutaweka mguu wetu juu ya nyoka wa zamani! Furaha iliyoje kuuponda uovu! Aibu iliyoje kwa Shetani kupondwa kichwa chake na miguu ya wanadamu! Kwa imani katika Yesu na tumkanyage mjaribu chini.

Januari 3

PUMZIKA JUU YA AHADI

"Nchi hii uilalayo nitakupa wewe." Mwanzo 28:13

Hakuna ahadi iliyo ya tafsiri ya nafsi moja tu: si mali ya mtakatifu mmoja, bali ya waumini wote. Ndugu yangu, kama waweza kwa imani kulala juu ya ahadi, na kupumzika juu yake, ni yako. Pale Yakobo "alipofikia," akakaa, akapumzika, hapo ndipo alipoimiliki. Alipojinyoosha kwa uchovu wake juu ya nchi, akiwa na mawe ya mahali pale kuwa mto wake, hakudhani ya kwamba kwa njia hiyo alikuwa akiingia katika kumiliki nchi; lakini ndivyo ilivyokuwa. Aliona katika ndoto yake ile ngazi ya ajabu iunganishayo, kwa waumini wote wa kweli, dunia na mbingu; na hakika mahali kilichosimama chini ya ngazi ndipo ilipompasa kuwa na haki juu ya udongo, kwa maana la sivyo asingeweza kuifikia hiyo ngazi ya Mungu. Ahadi zote za Mungu ni Ndiyo na Amina katika Kristo Yesu; na kwa kuwa yeye ni wetu, kila ahadi ni yetu tukikubali tu kulala juu yake kwa imani ya kupumzika.

Njoo, ewe uliyechoka, tumia maneno ya Bwana wako kuwa mito yako. Lala kwa amani. Ota ndoto juu yake peke yake. Yesu ndiye ngazi yako ya nuru. Tazama malaika wakija na kwenda juu yake kati ya nafsi yako na Mungu wako; nawe uwe na hakika ya kwamba ahadi ni fungu lako mwenyewe alilokupa Mungu, na ya kwamba si wizi kwako kuitwaa iwe yako, kama iliyonenwa kwako wewe hasa.

Januari 4

KATIKA UTULIVU WA AMANI

"Nitawalaza salama." Hosea 2:18

Naam, watakatifu watapata amani. Fungu ambalo neno hili la neema latoka lanena juu ya amani "na wanyama wa kondeni, na ndege wa angani, na vitambaavyo juu ya nchi." Hii ni amani na adui wa duniani, na maovu ya siri, na masumbufu madogo! Lolote katika haya laweza kutuzuia tusilale, lakini hakuna hata mojawapo litakalofanya hivyo. Bwana atayaharibu kabisa yale yatishayo watu wake: "Nitavunja upinde na upanga na vita, viondoke katika nchi." Amani itakuwa kubwa kweli wakati vyombo vyote vya wasiwasi vitakapovunjwa vipande vipande.

Pamoja na amani hii kutakuja pumziko. "Ndivyo humpa mpenzi wake usingizi." Wakiwa wameandaliwa kikamilifu na kutulizwa kimungu, waumini hulala katika utulivu wa amani.

Pumziko hili litakuwa salama. Ni jambo moja kulala, lakini ni jambo jingine kabisa "kulala salama." Tumeletwa katika nchi ya ahadi, nyumba ya Baba, chumba cha upendo, na kifua cha Kristo: hakika sasa twaweza "kulala salama." Ni salama zaidi kwa mwamini kulala kwa amani kuliko kukaa macho na kufadhaika.

"Ananilaza katika malisho ya majani mabichi." Kamwe hatupumziki hata Mfariji atulaze.

Januari 5

DHAMANA YA AJABU

"Nitakutia nguvu." Isaya 41:10

Tunapoitwa kutumika au kuteseka, twahesabu nguvu zetu, nasi twaziona kuwa pungufu kuliko tulivyodhani, na pungufu kuliko tunavyohitaji. Lakini moyo wetu usizame ndani yetu maadamu tuna neno kama hili la kutegemea, kwa maana latuhakikishia yote tuwezayo kuhitaji. Mungu ana nguvu za ukuu wote; nguvu hizo aweza kutupatia sisi; na ahadi yake ni ya kwamba atafanya hivyo. Atakuwa chakula cha nafsi zetu, na afya ya mioyo yetu; na hivyo atatupa nguvu. Hakuna kukisia kiasi cha nguvu ambacho Mungu aweza kuweka ndani ya mtu. Nguvu za kimungu zijapo, udhaifu wa kibinadamu si kizuizi tena.

Je, hatukumbuki nyakati za kazi na majaribu ambamo tulipokea nguvu za pekee hata tukajistaajabia? Katikati ya hatari tulikuwa watulivu, chini ya msiba tulikuwa watiifu, katika kashfa tulijizuia, na katika ugonjwa tulivumilia. Ukweli ni kwamba, Mungu hutoa nguvu zisizotazamiwa wakati majaribu yasiyo ya kawaida yatujiapo. Twainuka juu ya nafsi zetu dhaifu. Waoga hujigeuza wanaume, wapumbavu hupewa hekima, na wanyamavu hupokea saa ile ile lililo lao kunena. Udhaifu wangu mwenyewe wanifanya nisite, lakini ahadi ya Mungu yanifanya niwe hodari. Bwana, unitie nguvu "sawasawa na neno lako."

Januari 6

MSAADA KUTOKA NJE

"Naam, nitakusaidia." Isaya 41:10

Ahadi ya jana ilituhakikishia nguvu kwa yale tunayopaswa kutenda, lakini hii yatuhakikishia msaada katika mambo ambapo hatuwezi kutenda peke yetu. Bwana asema, "Nitakusaidia." Nguvu za ndani zaongezwa na msaada wa nje. Mungu aweza kutuinulia washirika katika vita vyetu ikimpendeza machoni pake; na hata kama hatatuletea msaada wa kibinadamu, yeye mwenyewe atakuwa ubavuni petu, na hili ni bora zaidi. "Mshirika wetu Mtukufu" ni bora kuliko majeshi ya wasaidizi wanaokufa.

Msaada wake ni wa wakati wake: yeye ni msaada uliopo tayari wakati wa taabu. Msaada wake una hekima nyingi: yeye ajua jinsi ya kumpa kila mtu msaada umfaao na kumwelekea. Msaada wake una nguvu kamili, ijapokuwa msaada wa mwanadamu ni bure. Msaada wake ni zaidi ya msaada, kwa maana yeye huchukua mzigo wote, na kutimiza uhitaji wote. "Bwana ndiye anisaidiaye, sitaogopa; mwanadamu atanitenda nini?"

Kwa sababu amekwisha kuwa msaada wetu, twahisi tumaini kwake kwa wakati huu na wakati ujao. Sala yetu ni, "Bwana, uwe msaada wangu"; ujuzi wetu ni, "Roho naye hutusaidia udhaifu wetu"; matarajio yetu ni, "Nitainua macho yangu niitazame milima, msaada wangu utakapotoka"; na wimbo wetu punde utakuwa, "Wewe, Bwana, umenisaidia."

Januari 7

SIKUZOTE KUKUA

"Utaona makuu kuliko haya." Yohana 1:50

Haya yanenwa kwa mwamini aliye kama mtoto, aliyekuwa tayari kumkubali Yesu kuwa Mwana wa Mungu, Mfalme wa Israeli, kwa kipande kimoja tu cha hoja yenye kushawishi. Wale walio radhi kuona wataona: ni kwa sababu twafumba macho yetu ndipo twapofuka kwa kusikitisha hivyo.

Tumekwisha ona mengi. Mambo makuu yasiyochunguzika Bwana ametuonyesha, ambayo kwa hayo twalisifu jina lake; lakini kuna kweli kubwa zaidi katika Neno lake, vilindi vikuu zaidi vya ujuzi, vimo virefu zaidi vya ushirika, kazi kubwa zaidi za manufaa, magunduzi makuu zaidi ya nguvu, na upendo, na hekima. Haya bado tutayaona kama tu radhi kumwamini Bwana wetu. Kipawa cha kubuni mafundisho ya uongo ni cha kuangamiza, lakini uwezo wa kuiona kweli ni baraka. Mbingu zitafunguliwa kwetu, njia iendayo huko itawekwa wazi kwetu ndani ya Mwana wa Adamu, na biashara ile ya kimalaika ipitayo kati ya ufalme wa juu na wa chini itadhihirishwa zaidi kwetu. Na tuweke macho yetu wazi kuelekea vitu vya rohoni, na kutazamia kuona zaidi na zaidi. Na tuamini ya kwamba maisha yetu hayatashuka hata kuwa si kitu, bali ya kwamba tutakuwa sikuzote katika hali ya kukua, tukiona mambo makuu na makuu zaidi, hata tumtazame Mungu Mkuu mwenyewe, wala tusipoteze tena kumwona.

Januari 8

USAFI WA MOYO NA MAISHA

"Heri walio safi wa moyo, maana hao watamwona Mungu." Mathayo 5:8

Usafi, naam usafi wa moyo, ndilo jambo kuu la kulenga. Twahitaji kufanywa safi ndani kwa Roho na kwa Neno, ndipo tutakuwa safi nje kwa kujiweka wakfu na kwa utii. Kuna uhusiano wa karibu kati ya shauku na ufahamu: tukipenda uovu, hatuwezi kufahamu yaliyo mema. Kama moyo ni mchafu, jicho litakuwa hafifu. Watawezaje watu wapendao vitu vichafu kumwona Mungu mtakatifu?

Ni pendeleo lililoje kumwona Mungu hapa! Kumtazama yeye kidogo ni Mbingu hapa chini! Katika Kristo Yesu walio safi wa moyo humtazama Baba. Twamwona yeye, kweli yake, upendo wake, kusudi lake, enzi yake, tabia yake ya agano, naam, twamwona yeye mwenyewe katika Kristo. Lakini hili laeleweka tu kadiri dhambi izuiliwavyo isiingie moyoni. Ni wale tu wanaolenga utauwa waweza kulia, "Macho yangu yamemwelekea Bwana daima." Shauku ya Musa, "Nakusihi unionyeshe utukufu wako," yaweza kutimizwa ndani yetu tu kadiri tunavyojitakasa na uovu wote. Tutamwona "kama alivyo"; na "kila mwenye matumaini haya katika yeye hujitakasa." Kufurahia ushirika wa sasa na tumaini la ono la baraka ni sababu zenye nguvu za usafi wa moyo na maisha. Bwana, utufanye safi wa moyo, ili tupate kukuona wewe!

Januari 9

KUPATA KWA KUTOA

"Nafsi ya mkarimu itanenepeshwa." Mithali 11:25

Kama natamani kusitawi rohoni, sina budi nisiweke akiba za hazina zangu, bali nigawe kwa maskini. Kuwa mchoyo na bahili ndiyo njia ya ulimwengu ya kufanikiwa, lakini si njia ya Mungu, kwa maana yeye asema, "Kuna atawanyaye, lakini huongezewa zaidi; na kuna azuiaye isivyostahili, lakini huelekea uhitaji." Njia ya imani ya kupata ni kutoa. Sina budi kujaribu hili tena na tena; nami naweza kutazamia ya kwamba kadiri ya ufanisi utakaonifaa utanijia kama thawabu ya neema kwa mwenendo wa ukarimu.

Bila shaka, siwezi kuwa na hakika ya kupata utajiri. Nitanona, lakini si kunona kupita kiasi. Utajiri mkubwa mno waweza kunifanya mzito kama walivyo wanene kwa kawaida, na kunisababishia ugonjwa wa tumbo wa kupenda dunia, na labda kuniletea kuoza kwa mafuta ya moyo. La, kama nimenona vya kutosha kuwa na afya, naweza kuridhika sana; na kama Bwana anijalia riziki ya kunitosha, naweza kutosheka kabisa.

Lakini kuna unene wa akili na wa roho ambao ningeutamani sana, nao huja kama tokeo la fikira za ukarimu kuelekea Mungu wangu, kanisa lake, na wanadamu wenzangu. Nisibane, nisije nikaifanya njaa nafsi yangu. Na niwe mkarimu na mtoaji; kwa maana kwa njia hiyo nitakuwa kama Bwana wangu. Yeye alijitoa mwenyewe kwa ajili yangu: je, nitamnyima kitu chochote?

Januari 10

MALIPO YA KIMUNGU

"Yeye anyweshaye atanyweshwa naye mwenyewe." Mithali 11:25

Kama nikiwaangalia wengine kwa bidii, Mungu ataniangalia mimi; na kwa njia moja au nyingine atanilipa. Na niwaangalie maskini, naye Bwana ataniangalia mimi. Na niwatunze watoto wadogo, naye Bwana atanitendea kama mtoto wake. Na nilishe kundi lake, naye atanilisha mimi. Na ninyweshe bustani yake, naye atafanya nafsi yangu kuwa bustani iliyonyweshwa. Hii ni ahadi ya Bwana mwenyewe; na iwe langu kutimiza sharti, kisha kutazamia utimilifu wake.

Naweza kujijali nafsi yangu hata nikawa mgonjwa wa mawazo; naweza kuchunga hisia zangu mwenyewe hata nisihisi lolote; nami naweza kuomboleza udhaifu wangu hata nikawa dhaifu mno wa kuomboleza. Itakuwa na faida zaidi kwangu kuwa mtu asiyejipenda, na kwa upendo kwa Bwana wangu Yesu kuanza kujali nafsi za wale walio karibu nami. Tangi langu linazidi kupungua; hakuna mvua mpya ijayo kulijaza; nifanye nini? Nitang'oa kizibo, niache vilivyomo vibubujike vinyweshe mimea inayonyauka pande zote. Naona nini? Birika langu laonekana kujaa lipitapo. Chemchemi ya siri inafanya kazi. Vilipokuwa vyote vimetuama, chemchemi mpya ilikuwa imetiwa muhuri; lakini akiba yangu itokapo kunywesha wengine, Bwana hunikumbuka mimi. Haleluya!

Januari 11

IMANI HUUONA UPINDE

"Hata itakuwa, nitakapoleta wingu juu ya nchi, ndipo upinde utaonekana winguni." Mwanzo 9:14

Sasa hivi mawingu yametosha kwa wingi, lakini hatuogopi ya kwamba ulimwengu utaangamizwa kwa gharika. Twauona upinde wa mvua mara nyingi za kutosha kuzuia tusiwe na hofu kama hizo. Agano alilofanya Bwana na Nuhu lasimama imara, wala hatuna mashaka juu yake. Basi, kwa nini tudhani ya kwamba mawingu ya taabu, yanayotia giza anga letu sasa, yatakomea katika kuangamia kwetu? Na tuzitupilie mbali hofu hizo zisizo na msingi wala heshima.

Imani sikuzote huuona upinde wa ahadi ya agano kila hisi ionapo wingu la mateso. Mungu ana upinde ambao kwao aweza kufyatua mishale yake ya maangamizi; lakini tazama! umeelekezwa juu. Ni upinde usio na mshale wala uzi; ni upinde uliotungikwa kwa maonyesho, hautumiki tena kwa vita. Ni upinde wa rangi nyingi, uonyeshao furaha na shangwe, wala si upinde mwekundu kwa damu ya machinjo, au mweusi kwa hasira. Na tuwe na moyo mkuu. Kamwe Mungu hatii giza anga letu hata kuliacha agano lake bila shahidi; na hata kama angefanya hivyo, tungemtumaini, kwa kuwa hawezi kubadilika, wala kusema uongo, wala kwa njia yoyote nyingine kushindwa kulishika agano lake la amani. Hata maji yatakapoifunika tena nchi, hatutakuwa na sababu ya kumtilia Mungu wetu shaka.

Januari 12

"UPENDO HATA MWISHO"

"Kwa maana Bwana hatatupa milele." Maombolezo 3:31

Aweza kutupa kwa kitambo, lakini si milele. Mwanamke aweza kuvua mapambo yake kwa siku chache, lakini hatayasahau, wala kuyatupa jaani. Si mfano wa Bwana kuwatupa wale awapendao: kwa maana, "kwa kuwa aliwapenda watu wake waliokuwa ulimwenguni, aliwapenda hata mwisho." Wengine hunena juu ya sisi kuwa katika neema na kutoka humo, kana kwamba tu kama sungura wakimbiao kuingia na kutoka mashimoni mwao: lakini, kwa kweli, si hivyo. Upendo wa Bwana ni jambo zito na la kudumu zaidi ya hili.

Alituchagua tangu milele, naye atatupenda katika milele yote. Alitupenda hata akafa kwa ajili yetu, na kwa hiyo twaweza kuwa na hakika ya kwamba upendo wake hautakufa kamwe. Heshima yake imefungamana sana na wokovu wa mwamini, hata hawezi kumtupa zaidi ya awezavyo kuyatupa mavazi yake mwenyewe ya cheo kama Mfalme wa utukufu. La, la! Bwana Yesu, kama Kichwa, hawatupi kamwe viungo vyake; kama Mume, hamtupi kamwe bibi-arusi wake.

Je, ulidhani umetupwa? Kwa nini ulimdhania Bwana uovu kama huo, yeye aliyekuchumbia kwake mwenyewe? Yatupilie mbali mawazo kama hayo, wala usiyaache tena yakae ndani ya nafsi yako. "Mungu hakuwatupa watu wake aliowajua tangu awali" (Warumi 11:2). "Yeye huchukia kuwaacha" (Malaki 2:16).

Januari 13

KAMWE HAWATUPWI NJE

"Naye ajaye kwangu, sitamtupa nje kamwe." Yohana 6:37

Je, kuna kisa chochote cha Bwana wetu kumtupa nje mtu ajaye kwake? Kama kipo, tungependa kukijua; lakini hakuna kilichokuwapo, wala hakitakuwapo kamwe. Miongoni mwa nafsi zilizopotea kuzimu hakuna hata moja iwezayo kusema, "Nilikwenda kwa Yesu, naye akanikataa." Haiwezekani ya kwamba wewe au mimi tuwe wa kwanza ambao Yesu atavunja neno lake kwao. Tusiweke moyoni shaka nzito kama hiyo.

Tuseme sasa twaenda kwa Yesu kwa habari ya maovu ya leo. Kwa hili twaweza kuwa na hakika -- hatatukatalia usikizi, wala hatatutupa nje. Wale kati yetu ambao mara nyingi wamekwenda, na wale ambao hawakuwahi kwenda kamwe -- na twende pamoja, nasi tutaona ya kwamba hatatufungia mlango wa neema yake mbele ya uso wa hata mmoja wetu.

"Mtu huyu huwakaribisha wenye dhambi," lakini hamsukumi mbali hata mmoja. Twamjia katika udhaifu na dhambi, kwa imani itetemekayo, na maarifa madogo, na tumaini haba; lakini hatutupi nje. Twaja kwa sala, na sala hiyo iliyovunjika; kwa kuungama, na kuungama huko kwenye kasoro; kwa sifa, na sifa hiyo pungufu sana ya ustahili wake; lakini hata hivyo hutupokea. Twaja tukiwa wagonjwa, wachafu, tuliochoka, na wasio na thamani; lakini hatutupi nje kamwe. Na twende tena leo kwake yeye ambaye hatutupi nje kamwe.

Januari 14

PUMZIKO NI ZAWADI

"Njoni kwangu, ninyi nyote msumbukao na wenye kulemewa na mizigo, nami nitawapumzisha." Mathayo 11:28

Sisi tuliookoka twapata pumziko katika Yesu. Wale wasiookoka watapokea pumziko wakija kwake, kwa maana hapa aahidi "kulitoa." Hakuna kilicho huru kuliko zawadi; na tuikubali kwa furaha aitoayo kwa furaha. Huna budi kuinunua, wala kuiazima; bali kuipokea kama zawadi. Watumika chini ya mjeledi wa tamaa, choyo, ashiki, au wasiwasi: yeye atakuweka huru kutoka katika utumwa huu wa chuma, na kukupa pumziko. Umelemewa -- naam, "umelemewa sana" na dhambi, hofu, masumbufu, majuto, hofu ya mauti; lakini ukija kwake, atakupua mzigo. Yeye aliuchukua uzito wa dhambi zetu unaoponda, ili tusiendelee kuuchukua. Alijifanya mwenyewe Mchukuzi mkuu wa mizigo, ili kila aliyelemewa aache kuinama chini ya mkandamizo mkubwa mno.

Yesu hutoa pumziko. Ndivyo ilivyo. Je, utaamini? Je, utalijaribu? Je, utafanya hivyo mara moja? Njoo kwa Yesu, kwa kuacha kila tumaini jingine, kwa kumfikiria yeye, kwa kuamini ushuhuda wa Mungu juu yake, na kuvitwaza vyote kwake. Ukija kwake hivyo, pumziko atakalokupa litakuwa la ndani, salama, takatifu, na la milele. Yeye hutoa pumziko likuzalo hata kuwa mbingu, naye hulitoa siku hii kwa wote wamjiao.

Januari 15

KUFANYWA TAJIRI KWA IMANI

"Kwa maana mhitaji hatasahauliwa daima; matarajio ya maskini hayatapotea milele." Zaburi 9:18

Umaskini ni urithi mgumu; lakini wale wamtumainio Bwana hufanywa matajiri kwa imani. Wajua ya kwamba hawakusahauliwa na Mungu; na ijapokuwa yaweza kuonekana kama wamesahauliwa katika mgawanyo wake wa riziki njema, watazamia wakati ambapo haya yote yatanyooshwa. Lazaro hatalala sikuzote kati ya mbwa mlangoni pa tajiri, bali atapata malipo yake kifuani pa Ibrahimu.

Hata sasa Bwana huwakumbuka wanawe maskini lakini wa thamani. "Mimi ni maskini na mhitaji; lakini Bwana hunifikiria," alisema mmoja wa zamani; na ndivyo ilivyo hasa. Maskini wamchao Mungu wana matarajio makuu. Wanatazamia Bwana awaruzuku vitu vyote vya lazima kwa uzima huu na utauwa; wanatazamia kuona vitu vyote vikifanya kazi kwa faida yao; wanatazamia kuwa na ushirika wa karibu zaidi na Bwana wao, aliyekuwa hana mahali pa kulaza kichwa chake; wanautazamia Ujio wake wa Pili, na kushiriki utukufu wake. Matarajio haya hayawezi kupotea, kwa maana yamewekwa akiba katika Kristo Yesu, aishiye milele; na kwa sababu yeye yu hai, nayo yataishi pia. Maskini mtakatifu huimba nyimbo nyingi ambazo tajiri mwenye dhambi hawezi kuzifahamu. Kwa hiyo, tunapokuwa na riziki haba hapa chini, na tuifikirie meza ya kifalme iliyo juu.

Januari 16

HATA WITO ULIO DHAIFU KABISA

"Na itakuwa ya kwamba kila atakayeliitia jina la Bwana ataokoka." Yoeli 2:32

Kwa nini sililiitii jina lake? Kwa nini nakimbilia jirani huyu na yule, hali Mungu yu karibu hivyo naye atausikia wito wangu ulio dhaifu kabisa? Kwa nini naketi chini, na kubuni mbinu, na kutunga mipango? Kwa nini nisijitupe mara moja mimi na mzigo wangu juu ya Bwana? Aendaye moja kwa moja ndiye mkimbiaji bora -- kwa nini sikimbii mara moja kwa Mungu aliye hai? Bure nitatafuta wokovu mahali pengine popote; lakini kwa Mungu nitaupata; kwa maana hapa nina "ATAOKOKA" wake wa kifalme kuufanya uwe wa hakika.

Sina haja ya kuuliza kama naruhusiwa kumwita au la, kwa maana neno lile "kila" ni pana na lililojumlisha yote. Kila humaanisha mimi, kwa maana humaanisha yeyote na kila mtu amwitaye Mungu. Kwa hiyo nitafuata mwongozo wa andiko, na mara moja nitamwita Bwana mtukufu aliyefanya ahadi kubwa hivyo.

Hali yangu ni ya haraka, wala sioni jinsi nitakavyookolewa; lakini hili si shughuli yangu. Yeye afanyaye ahadi atatafuta njia na mbinu za kuitimiza. Ni langu kuzitii amri zake; si langu kuelekeza mashauri yake. Mimi ni mtumishi wake, si wakili wake. Namwita yeye, naye ataniokoa.

Januari 17

MTU ASIYE NA HOFU

"Naye akasema, Hakika nitakuwa pamoja nawe." Kutoka 3:12

Bila shaka, kama Bwana alimtuma Musa katika ujumbe, asingemwacha aende peke yake. Hatari kubwa mno iliyohusika, na nguvu kubwa iliyohitajika, vingefanya iwe ni jambo la kuchekesha kwa Mungu kumtuma Mwebrania maskini na mpweke kukabiliana na mfalme aliye na nguvu kuliko wote katika ulimwengu wote, kisha kumwacha peke yake. Isingeweza kuwaziwa ya kwamba Mungu mwenye hekima angemlinganisha Musa maskini na Farao na majeshi makubwa mno ya Misri. Kwa hiyo asema, "Hakika nitakuwa pamoja nawe," kana kwamba haiwezekani kabisa kwamba angemtuma peke yake.

Katika hali yangu, pia, kanuni ile ile itashika. Kama nikienda katika ujumbe wa Bwana, nikimtegemea kwa unyofu nguvu zake, na kwa jicho moja tu la utukufu wake, ni hakika ya kwamba atakuwa pamoja nami. Kunituma kwake kwamlazimu kunitegemeza. Je, hili halitoshi? Nataka nini zaidi? Kama malaika na malaika wakuu wote wangekuwa pamoja nami, ningeweza kushindwa; lakini kama YEYE yu pamoja nami, lazima nifanikiwe. Ila na niangalie nitende ipasavyo mbele ya ahadi hii. Nisiende kwa woga, kwa moyo nusu, kwa uzembe, kwa kujikinai. Ni mtu wa namna gani impasaye kuwa yeye aliye na Mungu pamoja naye! Katika ushirika kama huo yanipasa kutenda kiume, na kama Musa niingie kwa Farao bila hofu.

Januari 18

KRISTO NA WATOTO WAKE

"Atakapofanya nafsi yake kuwa dhabihu ya dhambi, ataona uzao wake." Isaya 53:10

Bwana wetu Yesu hakufa bure. Kifo chake kilikuwa cha dhabihu: alikufa kama badala yetu, kwa sababu mauti ilikuwa adhabu ya dhambi zetu; na kwa kuwa kujiweka kwake badala yetu kulikubaliwa na Mungu, amewaokoa wale ambao kwa ajili yao alifanya nafsi yake kuwa dhabihu. Kwa mauti alikuwa kama punje ya ngano izaayo matunda mengi. Lazima kuwe na mfululizo wa watoto kwa Yesu; yeye ni "Baba wa milele." Atasema, "Tazama, mimi na watoto niliopewa na Mungu."

Mtu huheshimiwa katika wanawe, na Yesu ana podo lake limejaa mishale hii ya shujaa. Mtu huwakilishwa katika watoto wake, na ndivyo alivyo Kristo katika Wakristo. Katika uzao wake maisha ya mtu huonekana kama yameongezwa na kuenezwa; na ndivyo yalivyo maisha ya Yesu yaendeleavyo katika waumini.

Yesu yu hai, kwa maana auona uzao wake. Hukaza jicho lake juu yetu, hupendezwa nasi, hututambua kama tunda la taabu ya nafsi yake. Na tufurahi ya kwamba Bwana wetu hakosi kuufurahia matokeo ya dhabihu yake ya kutisha, na ya kwamba hataacha kamwe kuyafurahisha macho yake kwa mavuno ya kifo chake. Macho yale yaliyotulilia mara moja, sasa yanatutazama kwa furaha. Naam, huwatazama wale wamtazamao yeye. Macho yetu yanakutana! Furaha iliyoje hii!

Januari 19

KUUNGAMA KWA KINYWA; KUAMINI KWA MOYO

"Ukimkiri Bwana Yesu Kristo kwa kinywa chako na kuamini moyoni mwako ya kuwa Mungu alimfufua katika wafu, utaokoka." Warumi 10:9

Ni lazima kuwe na kuungama kwa kinywa. Je, nimekufanya? Je, nimekiri wazi imani yangu katika Yesu kuwa Mwokozi ambaye Mungu amemfufua katika wafu, nami nimefanya hivyo kwa njia ya Mungu? Na nijibu swali hili kwa unyofu.

Ni lazima pia kuwe na kuamini kwa moyo. Je, naamini kwa moyo wangu wote katika Bwana Yesu aliyefufuka? Je, namtumaini yeye kuwa tumaini langu pekee la wokovu? Je, tumaini hili latoka moyoni mwangu? Na nijibu kama mbele za Mungu.

Kama naweza kudai kwa kweli ya kwamba nimemkiri Kristo na kumwamini, basi nimeokoka. Andiko halisemi yaweza kuwa hivyo, bali ni wazi kama mchana, na dhahiri kama jua mbinguni: "Utaokoka." Kama mwamini na mwungamaji, naweza kuweka mkono wangu juu ya ahadi hii, na kuiomba mbele za Bwana Mungu saa hii, na katika maisha yote, na katika saa ya mauti, na katika siku ya hukumu.

Ni lazima niokolewe na hatia ya dhambi, na nguvu ya dhambi, na adhabu ya dhambi, na hatimaye na uwepo wenyewe wa dhambi. Mungu amesema -- "Utaokoka." Naamini. Nitaokoka: nimeokoka. Utukufu na uwe kwa Mungu milele na milele!

Januari 20

MSHINDI

"Yeye ashindaye nitampa kula matunda ya mti wa uzima, ulio katikati ya paradiso ya Mungu." Ufunuo 2:7

Hakuna mtu awezaye kugeuza mgongo wake siku ya vita, au kukataa kwenda katika vita takatifu. Ni lazima tupigane kama twataka kutawala, na ni lazima tuendelee na vita hata tumshinde kila adui, la sivyo ahadi hii si yetu, kwa maana ni kwa "yeye ashindaye" peke yake. Ni lazima tuwashinde manabii wa uongo waliokuja ulimwenguni, na maovu yote yanayoandamana na mafundisho yao. Ni lazima tuushinde uzembe wetu wa moyo, na mwelekeo wa kupungukiwa na upendo wetu wa kwanza. Soma neno lote la Roho kwa kanisa lililoko Efeso.

Kama kwa neema tukishinda siku, kama tutakavyoshinda tukimfuata kwa kweli Kiongozi wetu mshindi, ndipo tutakaporuhusiwa kuingia hata katikati kabisa ya paradiso ya Mungu, na kupewa ruhusa kupita kando ya kerubi na upanga wake wa moto, na kuufikia mti ule uliolindwa, ambao mtu akiula, ataishi milele. Hivyo tutaikwepa mauti ile isiyo na mwisho ambayo ni hukumu ya dhambi, na kupata uzima ule wa milele ulio muhuri wa kutokuwa na hatia, chipukizi la kanuni za kutokufa za utakatifu ufananao na wa Mungu. Njoo, moyo wangu, jipe moyo! Kuyakimbia mapigano ni kuipoteza furaha ya Edeni mpya iliyo bora zaidi; kupigana hata ushindi ni kwenda pamoja na Mungu katika Paradiso.

Januari 21

ADUI WA MUNGU WATAINAMA

"Nao Wamisri watajua ya kuwa mimi ndimi Bwana." Kutoka 7:5

Ulimwengu usiomcha Mungu ni mgumu kufundishwa. Misri haimjui Yehova, na kwa hiyo huthubutu kusimamisha sanamu zake, na hata kuthubutu kuuliza -- "Bwana ni nani?" Lakini Bwana amekusudia kuvunja mioyo yenye kiburi, wakitaka wasitake. Hukumu zake zingurumapo juu ya vichwa vyao, zikitia giza anga zao, zikiharibu mavuno yao, na kuwaua wana wao, huanza kutambua kidogo cha nguvu za Yehova. Bado yatakuwapo mambo yatakayotendeka duniani ambayo yatawaleta wenye shaka magotini. Tusifadhaishwe kwa sababu ya makufuru yao, kwa maana Bwana aweza kulitunza jina lake mwenyewe, naye atafanya hivyo kwa njia yenye nguvu sana.

Wokovu wa watu wake mwenyewe ulikuwa njia nyingine yenye nguvu ya kuifanya Misri ijue ya kuwa Mungu wa Israeli alikuwa Yehova, Mungu aliye hai na wa kweli. Hakuna Mwisraeli aliyekufa kwa mojawapo ya mapigo yale kumi. Hakuna hata mmoja wa uzao uliochaguliwa aliyezama katika Bahari ya Shamu. Kadhalika, wokovu wa wateule, na kutukuzwa kwa hakika kwa waumini wote wa kweli, kutawafanya adui wa Mungu walio wakaidi mno wakiri ya kuwa Yehova ndiye Mungu.

Laiti nguvu yake ishawishiyo ingeenea kwa Roho wake Mtakatifu katika kuhubiriwa kwa injili, hata mataifa yote yainame kwa jina la Yesu, na kumwita Bwana!

Januari 22

UKARIMU WA KIKRISTO

"Heri amwangaliaye maskini; Bwana atamwokoa siku ya taabu." Zaburi 41:1

Kuwafikiria maskini na kuwaweka mioyoni mwetu ni wajibu wa mtu Mkristo; kwa maana Yesu aliwaweka pamoja nasi na karibu nasi aliposema, "Maskini mnao sikuzote pamoja nanyi."

Wengi hutoa fedha zao kwa maskini kwa haraka, bila kufikiri; na wengi zaidi hawatoi kitu kabisa. Ahadi hii ya thamani ni ya wale "wamwangaliao" maskini, wakiichunguza hali yao, wakibuni mipango kwa faida yao, na kwa fikira kuitekeleza. Twaweza kufanya zaidi kwa uangalifu kuliko kwa fedha, na zaidi sana kwa vyote viwili pamoja. Kwa wale wamwangaliao maskini, Bwana aahidi kuwaangalia wao katika nyakati za dhiki. Atatutoa katika taabu ikiwa twawasaidia wengine wakiwa katika taabu. Tutapokea msaada wa pekee kabisa wa kimungu ikiwa Bwana aona ya kwamba twajaribu kuwaruzuku wengine. Tutakuwa na wakati wa taabu, hata tuwe wakarimu kadiri gani; lakini kama tu wenye huruma, twaweza kuweka dai la ukombozi wa pekee, naye Bwana hatalikana neno lake na ahadi yake. Wachoyo bahili waweza kujisaidia wenyewe, lakini waumini wenye fikira na ukarimu Bwana atawasaidia. Kama ulivyowatendea wengine, ndivyo Bwana atakavyokutendea wewe. Fungua mifuko yako.

Januari 23

DHABIHU ILIYOKAMILIKA

"Naye ataweka mkono wake juu ya kichwa cha sadaka ya kuteketezwa; nayo itakubaliwa kwa ajili yake ili kufanya upatanisho kwa ajili yake." Mambo ya Walawi 1:4

Ikiwa kwa kuweka huko kwa mkono wake yule ng'ombe alikuwa dhabihu ya mtoaji, si zaidi sana Yesu atakuwa wetu kwa kuweka kwa mkono wa imani?

"Imani yangu huuweka mkono wake

Juu ya kichwa chako kipendwacho,

Nami kama mwenye toba nasimama,

Na hapo naiungama dhambi yangu."

Ikiwa ng'ombe angeweza kukubaliwa kwa ajili yake ili kufanya upatanisho kwa ajili yake, si zaidi sana Bwana Yesu atakuwa upatanisho wetu ulio kamili na wa kutosha kila kitu? Wengine hushindana na kweli kuu ya kufanywa badala; lakini kwetu sisi, ni tumaini letu, furaha yetu, fahari yetu, na yetu yote. Yesu amekubaliwa kwa ajili yetu ili kufanya upatanisho kwa ajili yetu, nasi tu "wenye kukubaliwa katika huyo Mpendwa."

Msomaji na aangalie mara moja kuuweka mkono wake juu ya dhabihu ya Bwana iliyokamilika, ili kwa kuikubali apate faida yake. Kama amekwisha fanya hivyo mara moja, na aifanye tena. Kama hajawahi kufanya hivyo, na anyoshe mkono wake bila kukawia hata dakika moja. Yesu ni wako sasa kama utamtaka. Mtegemee; mtegemee kwa nguvu; naye ni wako pasipo shaka lolote; umepatanishwa na Mungu, dhambi zako zimefutwa, nawe u wa Bwana.

Januari 24

KUTUNZWA KWA MIGUU YETU

"Ataitunza miguu ya watakatifu wake." 1 Samweli 2:9

Njia ni yenye kuteleza, na miguu yetu ni dhaifu, lakini Bwana ataitunza miguu yetu. Tukijitoa kwa imani ya utii kuwa watakatifu wake, yeye mwenyewe atakuwa mlinzi wetu. Si tu ataamuru malaika zake watulinde, bali yeye mwenyewe atazihifadhi hatua zetu.

Ataitunza miguu yetu isianguke, tusije tukayachafua mavazi yetu, kuzijeruhi nafsi zetu, na kumfanya adui akufuru.

Ataitunza miguu yetu isitange-tange, tusije tukaingia katika njia za upotovu, au njia za upumbavu, au mwenendo wa desturi za ulimwengu.

Ataitunza miguu yetu isivimbe kwa uchovu, au kutoka malengelenge kwa sababu ya ukali na urefu wa njia.

Ataitunza miguu yetu isijeruhiwe: viatu vyetu vitakuwa vya chuma na shaba, hata ijapokuwa twakanyaga makali ya upanga, au nyoka wenye sumu ya kufisha, hatutatoka damu, wala kutiwa sumu.

Pia atainyakua miguu yetu kutoka katika wavu. Hatutanaswa na hila za adui zetu wenye chuki na werevu.

Kwa ahadi kama hii, na tukimbie bila kuchoka, na kutembea bila hofu. Yeye aitunzaye miguu yetu atafanya hivyo kwa ufanisi.

Januari 25

HUTENDA KWA KUUNGAMA KWA UNYOOFU

"Yeye huwatazama wanadamu, na mtu akisema, Nalikosa, nikayapotosha yaliyokuwa haki, wala hayakunifaa; ataiokoa nafsi yake isiende shimoni, na uhai wake utaiona nuru." Ayubu 33:27, 28

Hili ni neno la kweli, lililokusanywa kutokana na ujuzi wa mtu wa Mungu, nalo ni sawa na ahadi. Yale ambayo Bwana amekwisha yatenda, na anayoyatenda, ataendelea kuyatenda maadamu ulimwengu wasimama. Bwana atawapokea kifuani pake wote wamjiao kwa kuungama dhambi zao kwa unyofu; naam, sikuzote yu macho kuwavumbua wowote walio katika taabu kwa sababu ya makosa yao.

Je, hatuwezi kuyakubali maneno yaliyotumika hapa? Je, hatukukosa, tukakosa binafsi hata kusema, "Nalikosa"? Tukakosa kwa makusudi, tukiyapotosha yaliyo haki? Tukakosa hata kugundua ya kwamba hakuna faida ndani yake, bali hasara ya milele? Basi, na twende kwa Mungu kwa ukiri huu wa unyofu. Yeye haombi zaidi. Sisi hatuwezi kutoa pungufu.

Na tuiombe ahadi yake katika jina la Yesu. Atatuokoa katika shimo la kuzimu litutazamialo; atatujalia uzima na nuru. Kwa nini tukate tamaa? Kwa nini hata tuwe na shaka? Bwana hazidhihaki nafsi zilizonyenyekea. Yeye humaanisha asemayo. Wenye hatia waweza kusamehewa. Wale wanaostahili kuuawa waweza kupokea msamaha wa bure. Bwana, twaungama, nasi twakusihi utusamehe!

Januari 26

MUNGU HUKIMBIZA HOFU

"Hakika hapana uganga juu ya Yakobo, wala hapana uaguzi juu ya Israeli." Hesabu 23:23

Jinsi hili linavyopaswa kukata mzizi na tawi hofu zote za kipumbavu na za ushirikina! Hata kama kungekuwa na ukweli wowote katika uchawi na mabao, visingeweza kuwadhuru watu wa Bwana. Wale ambao Mungu huwabariki, mashetani hawawezi kuwalaani.

Watu wasiomcha Mungu, kama Balaamu, waweza kwa hila kupanga kuangushwa kwa Israeli wa Bwana; lakini pamoja na siri na sera zao zote wamehukumiwa kushindwa. Baruti yao ni chepechepe, makali ya upanga wao yamefifia. Wanakusanyika pamoja; lakini kwa kuwa Bwana hayuko pamoja nao, wanakusanyika bure. Twaweza kuketi kimya, tukiwaacha wasokote nyavu zao, kwa maana hatutanaswa ndani yake. Ijapokuwa wamwite Beelzebuli awasaidie, na kutumia hila zake zote za kinyoka, haitawafaidi kitu: uchawi hautatenda kazi, uaguzi utawadanganya. Baraka iliyoje hii! Jinsi inavyoutuliza moyo! Yakobo wa Mungu hushindana na Mungu, lakini hakuna atakayeshindana nao akawashinda. Israeli wa Mungu wana nguvu na Mungu na kushinda, lakini hakuna atakayekuwa na nguvu ya kuwashinda wao. Hatuna haja ya kumwogopa yule shetani mwenyewe, wala yeyote wa adui zile za siri ambao maneno yao yamejaa hila na mipango yao ni mirefu isiyochunguzika. Hawawezi kuwadhuru wale wamtumainio Mungu aliye hai. Twampinga ibilisi na majeshi yake yote.

Januari 27

TOBA YA THAMANI

"Nanyi huko mtazikumbuka njia zenu, na matendo yenu yote ambayo mmejitia unajisi kwayo; nanyi mtajichukia nafsi zenu machoni penu wenyewe kwa ajili ya maovu yenu yote mliyoyatenda." Ezekieli 20:43

Tunapokubaliwa na Bwana, na kusimama mahali pa upendeleo, na amani, na usalama, ndipo tunaongozwa kutubu makosa yetu yote na mapungufu yetu kuelekea Mungu wetu mwenye neema. Toba ni ya thamani sana, hata twaweza kuiita almasi ya daraja la kwanza, nayo yaahidiwa kwa utamu kwa watu wa Mungu kama tokeo mojawapo la utakaso zaidi la wokovu. Yeye aikubaliye toba, ndiye pia aitoaye toba; naye haitoi kutoka katika "sanduku la uchungu," bali kutoka miongoni mwa yale "maandazi yaliyotengenezwa kwa asali" awalishayo watu wake. Hisia ya msamaha uliogharimiwa kwa damu na ya rehema isiyostahiliwa, ndiyo njia bora ya kuuyeyusha moyo wa jiwe. Je, twahisi ugumu? Na tuufikirie upendo wa agano, ndipo tutaiacha dhambi, tuiombolezee dhambi, na kuichukia dhambi; naam, tutajichukia nafsi zetu kwa kumkosea upendo mkuu usio na mwisho namna hiyo. Na tumjie Mungu kwa ahadi hii ya toba, tukimwomba atusaidie kukumbuka, na kutubu, na kujuta, na kurudi. Laiti tungeweza kufurahia kuyeyuka kwa huzuni takatifu! Faraja iliyoje ingekuwa gharika ya machozi! Bwana, lipige jiwe, au liambie jiwe, ukayafanya maji yatiririke!

Januari 28

MACHOZI YATAKOMA

"Naye Mungu atafuta kila chozi katika macho yao." Ufunuo 21:4

Naam, tutafika hapa kama tu waumini. Huzuni itakoma, na machozi yatafutwa. Huu ni ulimwengu wa kulia, lakini wapita. Kutakuwa na mbingu mpya, na nchi mpya, ndivyo asemavyo mstari wa kwanza wa sura hii; na kwa hiyo hakutakuwa na kitu cha kulilia kuhusu kule kuanguka na taabu zilizofuatana nako. Soma mstari wa pili, ukaangalie jinsi unenavyo juu ya bibi-arusi na arusi yake. Arusi ya Mwana-Kondoo ni wakati wa furaha isiyo na mipaka, na machozi yasingekuwa na nafasi hapo. Mstari wa tatu wasema ya kwamba Mungu mwenyewe atakaa kati ya wanadamu; na hakika mkono wake wa kuume kuna mema ya milele, na machozi hayawezi kutiririka tena.

Hali yetu itakuwaje wakati hapatakuwa na huzuni tena, wala kilio, wala hapatakuwa na maumivu tena? Hili litakuwa la utukufu zaidi kuliko tuwezavyo kuwaza hata sasa. Enyi macho yaliyo mekundu kwa kulia, komesheni matiririko yenu yanayounguza, kwa maana bado kitambo kidogo hamtajua machozi tena! Hakuna awezaye kufuta machozi kama Mungu wa upendo, naye anakuja kufanya hivyo. "Kilio chaweza kukaa usiku kucha, lakini asubuhi huja furaha." Njoo, Bwana, wala usikawie; kwa maana sasa wanaume na wanawake wote sharti walie!

Januari 29

UTII HULETA BARAKA

"Yashike na kuyasikia maneno haya yote ninayokuamuru, ili upate kufanikiwa wewe na watoto wako baada yako milele, utakapotenda yaliyo mema na haki machoni pa Bwana, Mungu wako." Kumbukumbu 12:28

Ijapokuwa wokovu si kwa matendo ya sheria, hata hivyo baraka zilizoahidiwa kwa utii hazikatazwi kwa watumishi waaminifu wa Mungu. Laana Bwana wetu aliziondoa alipofanywa laana kwa ajili yetu, lakini hakuna kifungu cha baraka kilichofutwa.

Twapaswa kuyaangalia na kuyasikiliza mapenzi ya Bwana yaliyofunuliwa, tukielekeza fikira zetu si kwa sehemu zake tu, bali kwa "maneno haya yote." Hapapaswi kuwa na kuchagua-chagua, bali heshima isiyo na upendeleo kwa yote Mungu aliyoamuru. Hii ndiyo njia ya heri kwa baba na kwa watoto wake. Baraka ya Bwana i juu ya wateule wake hata kizazi cha tatu na cha nne. Kama wakienda kwa unyofu mbele zake, atawafanya watu wote wajue ya kwamba wao ni uzao ambao Bwana ameubariki.

Hakuna baraka iwezayo kutujia sisi au wetu kwa njia ya udanganyifu au unafiki wa maneno mawili. Njia za kuufuata ulimwengu na uchafu haziwezi kutuletea mema sisi au wetu. Itakuwa vema kwetu tutakapokwenda vema mbele za Mungu. Kama unyofu hautatufanya tufanikiwe, ujanja hautatufanya. Kile kimpendezacho Mungu kitatuletea furaha sisi.

Januari 30

MSINDIKIZAJI WA MBINGUNI

"Na tazama, mimi nipo pamoja nawe, nami nitakulinda kila utakakokwenda." Mwanzo 28:15

Je, twahitaji rehema za safarini? Hizi hapa ni bora kabisa -- uwepo wa Mungu na hifadhi yake. Mahali pote twahitaji vyote viwili, na mahali pote tutavipata tukienda kwa wito wa wajibu, wala si kwa kufuata matakwa yetu tu. Kwa nini tuuone uhamisho wa kwenda nchi nyingine kuwa lazima ya huzuni, wakati umewekwa juu yetu kwa mapenzi ya Mungu? Katika nchi zote mwamini ni msafiri na mgeni sawasawa; na hata hivyo katika kila pande Bwana ndiye makao yake, kama alivyokuwa kwa watakatifu wake katika vizazi vyote. Twaweza kukosa ulinzi wa mfalme wa duniani, lakini Mungu asemapo, "Nitakulinda," hatumo katika hatari yoyote ya kweli. Huu ni waraka wa baraka wa kusafiria kwa msafiri, na msindikizaji wa mbinguni kwa mhamiaji.

Yakobo hakuwahi kuondoka chumba cha baba yake kabla: alikuwa mtoto wa mama, wala si mtu wa matukio kama nduguye. Lakini alikwenda ugenini, na Mungu akaenda pamoja naye. Alikuwa na mizigo michache, na hakuna wasindikizaji; lakini hakuna mkuu aliyewahi kusafiri na walinzi watukufu zaidi. Hata alipolala katika uwanda wa wazi, malaika walimlinda, na Bwana Mungu akasema naye. Kama Bwana atuamuru twende, na tuseme pamoja na Bwana wetu Yesu, "Ondokeni, twende zetu."

Januari 31

MUNGU HUSIKIA SIKUZOTE

"Mungu wangu atanisikia." Mika 7:7

Rafiki waweza kuwa wasio waaminifu, lakini Bwana hatajitenga na nafsi yenye neema; kinyume chake, atazisikia shauku zake zote. Nabii asema, "Ilinde milango ya kinywa chako, usimfunulie alalaye kifuani mwako. Adui za mtu ni watu wa nyumbani mwake." Hii ni hali ya kusikitisha; lakini hata katika hali kama hiyo Rafiki Bora hubaki mwaminifu, nasi twaweza kumwambia huzuni yetu yote.

Hekima yetu ni kumtazama Bwana, wala si kushindana na wanaume au wanawake. Kama maombi yetu ya upendo yatapuuzwa na jamaa zetu wenyewe, na tumngoje Mungu wa wokovu wetu, kwa maana atatusikia. Atatusikia zaidi kwa sababu ya ukatili na dhuluma za wengine, nasi punde tutakuwa na sababu ya kulia, "Usinifurahie, Ee adui yangu!"

Kwa sababu Mungu ni Mungu aliye hai, aweza kusikia; kwa sababu ni Mungu mwenye upendo, atasikia; kwa sababu ni Mungu wetu wa agano, amejifunga kutusikia. Kama kila mmoja wetu aweza kumtaja kuwa "Mungu wangu," twaweza kwa hakika kabisa kusema, "Mungu wangu atanisikia." Njoo, basi, ewe moyo unaovuja damu, na uache huzuni zako zijieleze mbele za Bwana Mungu wako! Nitapiga magoti kwa siri, na kwa ndani ninong'one, "Mungu wangu atanisikia."