Dibaji

KITABU CHA HUNDI CHA IMANI

Ni Ahadi za Thamani Zilizopangwa

Kwa Matumizi ya Kila Siku

Pamoja na Maelezo Mafupi Yatokanayo na Uzoefu

Na

C. H. Spurgeon

DIBAJI

Ahadi itokayo kwa Mungu yaweza kufananishwa kwa mafundisho makubwa na hundi ilipwayo kwa agizo. Hutolewa kwa mwenye kuamini kwa nia ya kumkirimia kitu chema. Haikusudiwi kwamba aisome kwa raha, kisha aiache. La, yampasa kuiona ahadi kuwa ni jambo la kweli, kama vile mtu aitendeavyo hundi.

Yampasa kuitwaa ahadi, na kuitia sahihi kwa jina lake mwenyewe kwa kuipokea binafsi kuwa ni kweli. Kwa imani yampasa kuikubali kuwa ni yake mwenyewe. Hutia muhuri wake ya kwamba Mungu ni kweli, tena ni kweli kwa habari ya neno hili la ahadi mahususi. Huendelea zaidi, na kuamini ya kuwa amekwisha kuipata baraka katika kuwa na ahadi yake iliyo hakika, kwa hiyo huweka jina lake juu yake ili kushuhudia kuipokea baraka.

Baada ya kufanya hivyo, yampasa kwa imani kuipeleka ahadi mbele za Bwana, kama vile mtu apelekavyo hundi mezani pa Benki. Yampasa kuiomba kwa maombi, akitumaini kuwa itatimizwa. Kama amefika benki ya Mbinguni katika tarehe iliyo sahihi, atapokea kiasi kilichoahidiwa mara moja. Kama tarehe itakuwa mbele zaidi, yampasa kungoja kwa saburi hata ifike; lakini wakati huo aweza kuihesabu ahadi kuwa ni fedha, kwa maana Benki ni hakika italipa wakati wa kulipwa ufikapo.

Wengine hushindwa kutia sahihi ya imani juu ya hundi, hivyo hawapati kitu; na wengine ni walegevu katika kuipeleka, nao hao pia hawapokei kitu. Hili si kosa la ahadi, bali ni kosa la wale wasiotenda nayo kwa akili timamu, kwa namna ya kibiashara.

Mungu hakutoa ahadi yo yote asiyoitimiza, wala hakutia moyo tumaini lo lote asiloliliza. Ili kuwasaidia ndugu zangu kuamini jambo hili, nimetayarisha kijitabu hiki. Kuziona ahadi zenyewe ni kwema kwa macho ya imani: kadiri tuzidivyo kuyatafakari maneno ya neema, ndivyo tutakavyozidi kupata neema kutokana na maneno hayo. Katika Maandiko yenye kufariji nimeongeza ushuhuda wangu mwenyewe, matunda ya majaribu na uzoefu. Naziamini ahadi zote za Mungu, lakini nyingi zake nimezijaribu na kuzithibitisha mimi mwenyewe. Nimeona ya kuwa ni kweli, kwa maana zimetimizwa kwangu. Haya, natumaini, yaweza kuwatia moyo vijana; wala hayatakosa kuwafariji watu wazima. Uzoefu wa mtu mmoja waweza kuwa na faida kuu kwa mwingine; na kwa sababu hii mtu wa Mungu wa zamani aliandika, "Nalimtafuta Bwana, naye akanijibu"; na tena, "Maskini huyu aliita, naye Bwana akamsikia."

Nilianza vipande hivi vya kila siku nilipokuwa nikichuchumaa katika mawimbi ya mabishano. Tangu hapo nimetupwa katika "maji ya kuogelea," ambayo, kama si mkono wa Mungu ulionitegemeza, yangekuwa maji ya kunizamisha. Nimevumilia dhiki zitokazo katika mapigo mengi. Maumivu makali ya mwili yalifuata baada ya huzuni ya moyo, na haya yaliambatana na msiba, na mateso katika nafsi ya mmoja aliye mpendwa kama uhai. Maji yaliendelea kuingia daima, wimbi juu ya wimbi. Sisemi haya ili kudai huruma, bali ni kumfanya msomaji aone ya kwamba mimi si baharia wa nchi kavu. Nimevuka mara nyingi sana bahari zile zisizo za amani: naijua misukosuko ya mawimbi, na mvumo wa upepo. Kamwe ahadi za Yehova hazikuwa za thamani kwangu kama saa hii. Nyingine zake sikuzielewa hata sasa; sikuwa nimefika tarehe zilipokomaa, kwa maana mimi mwenyewe sikuwa nimekomaa vya kutosha kuitambua maana yake.

Jinsi gani Biblia ilivyo ya ajabu zaidi kwangu sasa kuliko ilivyokuwa miezi michache iliyopita! Katika kumtii Bwana, na kuchukua shutuma zake nje ya kambi, sikupokea ahadi mpya; lakini matokeo kwangu ni yale yale kana kwamba ningefanya hivyo, kwa maana zile za zamani zimenifunukia zikiwa na hazina tajiri zaidi. Hasa neno la Bwana kwa mtumishi wake Yeremia limevuma tamu mno masikioni mwangu. Kazi yake ilikuwa kusema na wale wasiotaka kusikia, au wakisikia, wasitake kuamini. Yake ilikuwa huzuni itokayo katika upendo uliokataliwa, na uaminifu usiotetereka; angaliwatoa watu wake katika makosa yao, lakini yeye mwenyewe hakutaka kuiacha njia ya Bwana. Kwake kulikuwa na maneno ya nguvu ya kina yenye kutegemeza, yaliyoulinda moyo wake usianguke mahali ambapo maumbile pasipo msaada yangalizama. Haya na maneno kama hayo ya dhahabu ya neema nimeyapenda kuliko chakula changu cha lazima, na kwa hayo nimezitajirisha kurasa hizi.

Laiti ningeweza kuwafariji baadhi ya watumishi wa Bwana wangu! Nimeandika kutoka moyoni mwangu mwenyewe kwa nia ya kuifariji mioyo yao. Ningewaambia katika majaribu yao -- Ndugu zangu, Mungu ni mwema. Hatawaacha: atawachukua hata mwisho. Kuna ahadi iliyotayarishwa kwa shida zenu za sasa; na kama mtaamini na kuiomba mbele ya kiti cha rehema kwa njia ya Yesu Kristo, mtauona mkono wa Bwana ukinyoshwa kuwasaidia. Kila kitu kingine kitashindwa, lakini neno lake kamwe halitashindwa. Amekuwa mwaminifu kwangu katika matukio yasiyohesabika hata sina budi kuwatia moyo kumtumaini. Ningekuwa mtu asiye na shukrani kwa Mungu na asiye na fadhili kwenu kama nisingefanya hivyo.

Roho Mtakatifu, huyo Mfariji, na awavuvie watu wa Bwana imani mpya! Najua ya kuwa, pasipo uweza wake wa Kimungu, yote niwezayo kusema hayatakuwa na faida; lakini, chini ya uvutano wake uhuishao, hata ushuhuda ulio mnyenyekevu kabisa utaimarisha magoti dhaifu, na kuitia nguvu mikono iliyolegea. Mungu hutukuzwa watumishi wake wamtumainipo kabisa. Hatuwezi kuwa watoto kupita kiasi mbele za Baba yetu wa mbinguni. Wadogo wetu hawaulizi swali lo lote juu ya mapenzi yetu wala uweza wetu, bali wakiisha kupokea ahadi kutoka kwa baba, hufurahi kwa matarajio ya kutimizwa kwake, wasishuke moyo kamwe ya kuwa ni hakika kama jua. Wasomaji wengi, ambao huenda nisiwaone kamwe, na wavumbue wajibu na furaha ya kumtumaini Mungu kwa namna ya kitoto hivyo wakati wanaposoma kipande kidogo nilichotayarisha kwa kila siku ya mwaka.

Kwa miaka mingi maelfu kadhaa ya watu wa Mungu wamesoma vitabu vyangu ASUBUHI KWA ASUBUHI na JIONI KWA JIONI, na wengi wao wamekuwa wema wa kutosha kuniandikia, na kukiri faida ya kusoma huko. Nataraji kitabu hiki kidogo hakitaingilia vitabu vile. Vipande hivi vya kila siku vimekusanywa kutoka katika mfululizo wa mada zilizo tofauti zaidi, tena vina faida zaidi kwa sababu vinahusu mafundisho, uzoefu, matendo, na kila kitu kinginecho. Hiki ni kitamu cha ahadi peke yake, wala hakina budi kutoingilia milo iliyo timilifu zaidi: la, sivyo, bali nataraji kitaamsha shauku kwa ajili yake.

Bwana wetu Yesu na aikubali huduma yangu hii kwa ajili ya kondoo na wana-kondoo wake, kutoka kwa

Mtumishi wake asiyestahili,

C.H. Spurgeon