Mwezi wa Novemba

Novemba 1

UKAMILIFU NA HIFADHI

"Yeye awaitaye ni mwaminifu, ambaye naye atalifanya." 1 Wathesalonike 5:24

Atafanya nini? Atatutakasa kabisa. Angalia mstari uliotangulia. Ataiendeleza kazi ya utakaso hata tuwe wakamilifu katika kila sehemu. Atazihifadhi "roho zetu, na nafsi, na mwili, bila lawama, hata kuja kwake Bwana wetu Yesu Kristo." Hatatuacha tuanguke kutoka katika neema, wala kuingia chini ya mamlaka ya dhambi. Fadhili hizi ni kubwa namna gani! Yatupasa kumwabudu kweli mtoaji wa vipawa visivyoelezeka namna hii.

Ni nani atakayefanya haya? Ni Bwana aliyetuita kutoka gizani na kutuingiza katika nuru yake ya ajabu, kutoka katika mauti ya dhambi na kutuingiza katika uzima wa milele ndani ya Kristo Yesu. Yeye peke yake ndiye awezaye kufanya haya: ukamilifu na hifadhi ya namna hii yaweza kutoka tu kwa Mungu wa neema yote.

Kwa nini atafanya haya? Kwa sababu yeye ni "mwaminifu" -- mwaminifu kwa ahadi yake mwenyewe iliyoahidiwa kumwokoa yeye aaminiye; mwaminifu kwa Mwanawe, ambaye thawabu yake ni kwamba watu wake watawekwa mbele zake bila hatia; mwaminifu kwa kazi aliyoianza ndani yetu kwa wito wetu wenye nguvu. Si uaminifu wao wenyewe, bali uaminifu wa Bwana mwenyewe, ndio watakatifu wanaoutegemea.

Njoo, nafsi yangu, hapa pana karamu kuu ya kuanzia mwezi wenye huzuni. Yawezekana kukawa na ukungu nje, lakini na kuwe na mwangaza wa jua ndani.

Novemba 2

UTAJIRI WA MBINGUNI

"Hatawanyima kitu chema hao waendao kwa unyofu." Zaburi 84:11

Bwana aweza kuzuia vitu vingi vipendezavyo, lakini si "kitu chema." Yeye ndiye mwamuzi bora wa kile kilicho chema kwetu. Vitu vingine ni vyema bila shaka, na hivi twaweza kuvipata kwa kuvitaka kwa njia ya Yesu Kristo Bwana wetu.

Utakatifu ni kitu chema, na huu atautenda ndani yetu bure. Kushinda tabia mbaya, hasira kali, na mazoea maovu, atatujalia kwa furaha, wala haitupasi kubaki bila ushindi huu.

Uhakika kamili atautoa, na ushirika wa karibu naye mwenyewe, na kuingia katika kweli yote, na ujasiri wenye kufanikiwa penye kiti cha rehema. Kama hatuna haya, ni kwa kukosa imani ya kupokea, wala si kwa kutotaka kwa Mungu kutoa. Utulivu, hali ya kimbingu, saburi kuu, na upendo wa moto -- haya yote atawapa wenye bidii takatifu.

Lakini angalia sana ya kwamba yatupasa "kwenda kwa unyofu." Pasiwe na makusudi ya kupingana wala shughuli za udanganyifu; pasiwe na unafiki wala hila. Tukienda kwa uchafu Mungu hawezi kutupa fadhili, kwa maana hilo lingekuwa ni kutuza dhambi. Njia ya unyofu ndiyo njia ya utajiri wa mbinguni -- utajiri mkubwa hata wa kuhusisha kila kitu chema.

Ni ahadi iliyoje ya kuisihi katika maombi! Na tupige magoti.

Novemba 3

KATIKA WAKATI WA MUNGU

"Maana njozi hii bado ni kwa wakati ulioamriwa, inafanya haraka kuufikia mwisho, wala haitasema uongo; ijapokawia, ingojee; kwa kuwa haina budi kuja, haitakawia." Habakuki 2:3

Rehema yaweza kuonekana ya kukawia, lakini ni ya hakika. Bwana kwa hekima yake isiyopungua ameuamuru wakati wa kutoka kwa uweza wake wa neema, na wakati wa Mungu ndio wakati ulio bora. Sisi tuna haraka; njozi ya baraka inachochea shauku yetu, na kuiharakisha tamaa yetu; lakini Bwana atazishika miadi yake. Yeye hatangulii wakati wake kamwe; wala hakawii kamwe.

Neno la Mungu hapa lanenwa kama kitu kilicho hai kitakachonena, na kitakachokuja. Kamwe si herufi iliyokufa, kama tunavyojaribiwa kuhofu tunapokuwa tumelitazamia utimizo wake kwa muda mrefu. Neno hai liko njiani likitoka kwa Mungu aliye hai, na ijapokuwa laonekana kukawia, kwa kweli halikawii. Gari la moshi la Mungu halijachelewa. Ni jambo la saburi tu, na karibuni tutajionea sisi wenyewe uaminifu wa Bwana. Hakuna ahadi yake itakayoanguka; "haitasema uongo." Hakuna ahadi yake itakayopotea kimya kimya; "itanena." Faraja iliyoje itakayoinena kwa sikio liaminilo! Hakuna ahadi yake itakayohitaji kufanywa upya kama hati isiyoweza kulipwa siku iliyostahili kulipwa -- "haitakawia."

Njoo, nafsi yangu, huwezi kumngoja Mungu wako? Pumzika ndani yake na utulie katika amani isiyoelezeka.

Novemba 4

WEWE CHIMBA MAHANDAKI

"Akasema, Bwana asema hivi, Fanyeni bonde hili mahandaki, mahandaki. Kwa maana Bwana asema hivi, Hamtaona upepo, wala hamtaona mvua; walakini bonde hilo litajaa maji, mpate kunywa, ninyi na ng'ombe zenu na wanyama wenu." 2 Wafalme 3:16, 17

Majeshi matatu yalikuwa yakiangamia kwa kiu, naye Bwana akaingilia kati. Ijapokuwa hakupeleka wingu wala mvua, walakini akaandaa maji tele. Yeye hategemei njia za kawaida, bali aweza kuwashangaza watu wake kwa mambo mapya ya hekima na uweza. Hivyo twafanywa kuona zaidi ya Mungu kuliko taratibu za kawaida zingeweza kudhihirisha. Ijapokuwa Bwana asionekane kwa ajili yetu kwa jinsi tunavyotazamia, au kutamani, au kudhani, walakini kwa njia moja au nyingine atatuandalia. Ni baraka kuu kwetu kuinuliwa juu ya kutazama sababu za pili, ili tupate kuutazama uso wa Sababu ile Kuu ya Kwanza.

Je, leo tuna neema ya kutosha kuchimba mahandaki ambamo baraka ya Mungu yaweza kutiririka? Ole! Mara nyingi twashindwa kuionyesha imani ya kweli na ya vitendo. Leo na tuwe tukitazamia majibu ya maombi. Kama vile mtoto aliyekwenda mkutanoni kuomba mvua alivyochukua mwavuli pamoja naye; vivyo hivyo na tumtazamie Bwana kweli kweli na kivitendo atubariki. Na tulijaze bonde mahandaki, na tutazamie kuyaona yote yamejaa.

Novemba 5

YALIYO MACHUNGU YATAKOMA

"Kwa maana sitashindana milele, wala sitakuwa na hasira sikuzote; kwa sababu roho ingezimia mbele zangu, na hizo nafsi nilizozifanya." Isaya 57:16

Baba yetu wa mbinguni hutafuta kutufundisha, si kutuangamiza. Kushindana kwake nasi kuna kusudi jema kwetu. Hatakuwa na silaha juu yetu sikuzote. Twadhani Bwana amekawia katika maadhabu yake, lakini ni kwa sababu sisi tumepungukiwa na saburi. Huruma yake yadumu milele, lakini si kushindana kwake. Usiku waweza kuvuta urefu wake wa kuchosha, lakini sharti hatimaye upishe mchana wa furaha. Kama vile kushindana kulivyo kwa kitambo tu, ndivyo na ghadhabu iletayo kushindana ilivyo kwa kitambo kidogo tu. Bwana huwapenda wateule wake mno hata asiweze kuwa na hasira nao sikuzote.

Kama angetutenda sikuzote kama afanyavyo mara kwa mara tungezimia kabisa, na kushuka bila tumaini hata malango ya mauti. Jipe moyo, ewe moyo mpenzi! Bwana atakoma karibu kutukemea. Vumilia, kwa maana Bwana atakutegemeza, na kukuvusha. Yeye aliyekuumba anajua jinsi ulivyo dhaifu, na jinsi uwezavyo kuvumilia kidogo. Atakishika kwa upole kile alichokifinyanga kwa wororo namna hii. Basi, usiogope kwa sababu ya machungu ya sasa, kwa maana yaharakia wakati ujao wa furaha. Yeye aliyekupiga atakuponya; ghadhabu yake ndogo itafuatwa na rehema kuu.

Novemba 6

FURAHIA NA TAMAA

"Nawe utajifurahisha kwa Bwana, naye atakupa haja za moyo wako." Zaburi 37:4

Kujifurahisha katika Mungu kuna nguvu ya kubadilisha, na humwinua mtu juu ya tamaa mbovu za asili yetu iliyoanguka. Kujifurahisha katika Yehova si tamu ndani yake tu, bali huitia utamu nafsi yote, hata tamaa za moyo ziwe za namna ambayo Bwana aweza kuahidi salama kuzitimiza. Je, hiyo si furaha kuu iumbayo tamaa zetu hata ziwe kama tamaa za Mungu?

Njia yetu ya kipumbavu ni kutamani, kisha kuanza kujitahidi kufikia tunachokitamani. Hatushughuliki kwa njia ya Mungu, ambayo ni kumtafuta yeye kwanza, kisha kutazamia vitu vyote kuongezwa kwetu. Kama tutakubali moyo wetu ujazwe na Mungu hata ufurike kwa furaha, ndipo Bwana mwenyewe atakavyoangalia kwamba hatutapungukiwa na kitu chema chochote. Badala ya kwenda mbali kutafuta furaha na tukae nyumbani pamoja na Mungu, na tunywe maji kutoka chemchemi yetu wenyewe. Yeye aweza kututendea zaidi sana kuliko rafiki zetu wote. Ni afadhali kutosheka na Mungu peke yake kuliko kwenda huku na huku tukihangaika na kutamani kwa uchungu vitu duni vya wakati na hisia. Kwa kitambo twaweza kupatwa na masikitiko; lakini kama haya yakitusogeza karibu zaidi na Bwana, ni vitu vya kuthaminiwa mno, kwa maana hatimaye yatatuhakikishia utimizo wa tamaa zetu zote zilizo za haki.

Novemba 7

UNYENYEKEVU WA KWELI WATUZWA

"Naye ajinyenyekeshaye atakwezwa." Luka 18:14

Haipasi kuwa vigumu kwetu kujinyenyekeza, kwa maana tuna nini cha kujivunia? Yatupasa kushika mahali pa chini kabisa bila kuambiwa. Kama tuna busara na uaminifu tutakuwa wadogo machoni petu wenyewe. Hasa mbele za Bwana katika maombi tutapungua hata kuwa si kitu. Huko hatuwezi kunena juu ya ustahili, kwa maana hatuna: kilio chetu kimoja tu chapasa kuwa kwa rehema: "Ee Mungu, unionee huruma mimi mwenye dhambi."

Hapa pana neno la kufariji kutoka kwenye kiti cha enzi. Tutakwezwa na Bwana tukijinyenyekeza. Kwetu sisi njia ya kwenda juu ni ya kuteremka. Tunapovuliwa nafsi twavikwa unyenyekevu, na huu ndio vazi lililo bora kabisa. Bwana atatukweza katika amani na furaha ya moyo; atatukweza hata katika kulijua Neno lake na ushirika naye mwenyewe; atatukweza katika kuufurahia msamaha wa hakika na kuhesabiwa haki. Bwana huweka heshima zake juu ya wale wawezao kuzivaa kwa heshima ya Mtoaji. Huwapa manufaa, kukubalika, na uvutano wale wasiotaka kujivuna kwa hayo, bali watakaonyenyekezwa na hisia ya wajibu mkubwa zaidi. Wala Mungu wala mwanadamu hajali kumwinua mtu ajiinuaye mwenyewe; bali Mungu na watu wema huungana kuiheshimu thamani ya kiasi.

Ee Bwana, izamishe nafsi yangu ili niinuke ndani yako.

Novemba 8

UKUBWA WA NEEMA

"Neema yangu yakutosha; kwa maana uweza wangu hutimilika katika udhaifu." 2 Wakorintho 12:9

Udhaifu wetu wapasa kuthaminiwa kwa kuwa hufanya nafasi kwa nguvu za Mungu. Huenda tusingaliijua kamwe nguvu ya neema kama tusingalihisi udhaifu wa asili. Ahimidiwe Bwana kwa ajili ya mwiba katika mwili, na mjumbe wa Shetani, hapo yanapotusukuma tuende kwenye nguvu za Mungu.

Hili ni neno la thamani kutoka mdomo wa Bwana wetu mwenyewe. Limemfanya mwandishi acheke kwa furaha. Neema ya Mungu yanitosha mimi! Nadhani kweli yanitosha. Je, anga si latosha kwa ndege, na bahari si latosha kwa samaki? Yeye Atoshaye Vyote yatosha kwa uhitaji wangu ulio mkubwa kuliko wote. Yeye atoshaye kwa dunia na Mbingu bila shaka aweza kukidhi hali ya funza maskini kama mimi.

Basi, na tumtegemee Mungu wetu na neema yake. Kama hataiondoa huzuni yetu atatuwezesha kuivumilia. Nguvu zake zitamiminwa ndani yetu hata funza aipure milima; na kisicho kitu kitakuwa mshindi juu ya wote walio wakuu na wenye nguvu. Ni afadhali kwetu kuwa na nguvu za Mungu kuliko zetu wenyewe; kwa maana kama tungekuwa na nguvu mara elfu kuliko tulizo nazo, zote zingekuwa si kitu mbele ya adui; na kama tungeweza kuwa dhaifu zaidi ya tulivyo, jambo lisilowezekana karibu, walakini tungeweza kufanya mambo yote katika Kristo.

Novemba 9

MAARIFA YA LAZIMA

"Nao watajua ya kuwa mimi, Bwana, Mungu wao, ni pamoja nao, na ya kuwa wao, nyumba ya Israeli, ni watu wangu, asema Bwana MUNGU." Ezekieli 34:30

Kuwa watu wa Bwana mwenyewe ni baraka teule, lakini kujua ya kuwa tu hivyo ni baraka ya faraja. Ni jambo moja kutumaini kwamba Mungu yu pamoja nasi, na jambo jingine kujua ya kuwa yu hivyo. Imani hutuokoa, lakini uhakika hututosheleza. Twamtwaa Mungu kuwa Mungu wetu tunapomwamini; lakini twapata furaha yake tunapojua ya kuwa yeye ni wetu, na ya kuwa sisi tu wake. Hakuna mwaminifu apasaye kutosheka na kutumaini na kutegemea tu, yampasa kumwomba Bwana amwongoze hata kwenye uhakika kamili, ili mambo ya tumaini yapate kuwa mambo ya hakika.

Ni hapo tunapofurahia baraka za agano, na kumwona Bwana wetu Yesu akiinuliwa kwa ajili yetu kama mche wa sifa, ndipo tunapofikia maarifa dhahiri ya fadhili za Mungu kwetu. Si kwa sheria, bali kwa neema, ndivyo tujifunzavyo ya kuwa sisi tu watu wa Bwana. Na tuelekeze macho yetu sikuzote upande wa neema ya bure. Uhakika wa imani hauwezi kamwe kuja kwa matendo ya sheria. Ni fadhila ya kiinjili, na yaweza kutufikia tu kwa njia ya injili. Tusitazame ndani yetu. Na tumtazame Bwana peke yake. Kadiri tumwonavyo Yesu ndivyo tutakavyouona wokovu wetu.

Bwana, tuletee wimbi kubwa la upendo wako hata tuoshwe mbali na matope ya shaka na hofu.

Novemba 10

KWENDA BILA KUJIKWAA

"Hatakuacha mguu wako usogezwe." Zaburi 121:3

Kama Bwana hataliruhusu, wala wanadamu wala mashetani hawawezi kulifanya. Wangefurahi kiasi gani kama wangeweza kutuangusha anguko la aibu, kutufukuza kutoka mahali petu, na kutuzika mbali na kumbukumbu! Wangeweza kufanya haya kwa kadiri ya kutosheka kwa mioyo yao kama isingekuwako kizuizi kimoja, na kimoja tu: Bwana hataliruhusu; na kama yeye hataliruhusu, sisi hatutalipatwa nalo.

Njia ya uzima ni kama kusafiri katikati ya milima ya Alpi. Katika mapito ya milimani mtu yu hatarini daima ya kuteleza kwa mguu. Mahali njia ilipo juu kichwa hukumbwa na kizunguzungu, ndipo miguu huteleza upesi: pana mahali palipo laini kama kioo, na pengine palipo na mawe yaliyolegea, na katika mojawapo ya haya kuepuka anguko ni kugumu. Yeye awezeshwaye maisha yake yote kujiweka mnyoofu na kwenda bila kujikwaa ana sababu bora kabisa za shukrani. Kwa mashimo na mitego, magoti dhaifu, miguu iliyochoka, na adui wenye hila, hakuna mwana wa Mungu angesimama imara hata saa moja kama isingekuwa ni upendo mwaminifu usiotaka mguu wake usogezwe. "Katikati ya mitego elfu nasimama Nikitegemezwa na kulindwa na mkono wako; Mkono huo usioonekana utanishika nikae imara, Na kuniongoza hata mlima wako mtakatifu."

Novemba 11

WATU HURU WA BWANA

"Kwa maana dhambi haitawatawala ninyi; kwa sababu hamwi chini ya sheria, bali chini ya neema." Warumi 6:14

Dhambi itatawala kama iwezavyo: haiwezi kutosheka na mahali popote palipo chini ya kiti cha enzi cha moyo. Mara kwa mara twaogopa kwamba itatushinda, ndipo tunapomlilia Bwana, "Wala usiache uovu wowote unitawale." Hili ndilo jibu lake la faraja, "Dhambi haitawatawala ninyi. Yaweza kuwashambulia, na hata kuwatia jeraha; lakini kamwe haitasimika enzi juu yenu."

Kama tungekuwa chini ya sheria, dhambi yetu ingejikusanyia nguvu na kutushika chini ya uwezo wake; kwa maana ni adhabu ya dhambi kwamba mtu huingia chini ya nguvu ya dhambi. Kwa kuwa tu chini ya agano la neema, twahifadhiwa tusimwache Mungu aliye hai kwa tangazo la hakika la agano. Twaahidiwa neema, ambayo kwayo twarudishwa kutoka katika kutangatanga kwetu, twatakaswa uchafu wetu, na kuwekwa huru kutoka minyororo ya mazoea.

Twaweza kujilaza chini kwa kukata tamaa na kuwa "radhi kuwatumikia Wamisri" kama tungali watumwa tukitenda kazi kwa ajili ya uzima wa milele; lakini kwa kuwa sisi tu watu huru wa Bwana, twajipa moyo kupigana na uovu wetu na majaribu yetu, tukiwa na hakika ya kwamba dhambi haitatuleta tena chini ya mamlaka yake. Mungu mwenyewe hutupa kushinda kwa Bwana wetu Yesu Kristo, ambaye utukufu una yeye milele na milele. Amina.

Novemba 12

NAFSI ZILIZOTAKASWA HUTOSHEKA

"Na watu wangu watashibishwa kwa wema wangu, asema Bwana." Yeremia 31:14

Angalia neno "wangu" lililokuja mara mbili: "Watu wangu watashibishwa kwa wema wangu."

Watu wa namna ile watoshekao na Mungu wamewekwa alama kuwa ni wa Mungu mwenyewe. Yeye hupendezwa nao, kwa maana wao hupendezwa naye. Wao humwita Mungu wao, naye huwaita watu wake; yeye huridhika kuwatwaa kuwa fungu lake, nao huridhika naye kuwa fungu lao. Kuna ushirika wa furaha wa pande zote mbili kati ya Israeli wa Mungu na Mungu wa Israeli.

Watu hawa wameshiba. Hili ni jambo kuu. Ni wachache mno miongoni mwa wana wa watu waliopata kutosheka, fungu lao liwe lolote; wameimeza ruba, nayo hulia daima, "Lete! Lete!" Nafsi zilizotakaswa peke yao ndizo nafsi zilizotosheka. Mungu mwenyewe sharti atuongoe na kututosheleza pia.

Si ajabu ya kwamba watu wa Bwana watoshelezwe na wema wa Bwana wao. Huu ni wema usio na mchanganyiko, ukarimu usio na kipimo, rehema isiyo na kemeo, upendo usio na badiliko, fadhili isiyo na kizuizi. Kama wema wa Mungu hautatutosheleza, ni nini kitakachotutosheleza? Ni nini! Je, bado twaugua? Bila shaka kuna tamaa iliyopotoka ndani kama ni ile ambayo wema wa Mungu hauitosheleza.

Bwana, nimeshiba. Lihimidiwe jina lako.

Novemba 13

ULINZI USIOKOMA

"Tazama, yeye aliye mlinzi wa Israeli hatasinzia wala hatalala usingizi." Zaburi 121:4

Yehova ni "Mlinzi wa Israeli." Hakuna namna yoyote ya kupoteza fahamu imwingiayo kwa siri, wala usingizi mzito wala usingizi mwepesi. Kamwe hakosi kuilinda nyumba na moyo wa watu wake. Hii ni sababu ya kutosha ya sisi kupumzika katika amani kamili. Aleksanda alisema kwamba alilala kwa sababu rafiki yake Parmenio alikuwa akikesha; zaidi sana sisi twaweza kulala kwa sababu Mungu wetu ndiye mlinzi wetu.

"Tazama" hapa limewekwa ili kuvuta fikira zetu kwenye kweli hii ya kufariji. Israeli, alipokuwa na jiwe kuwa mto wake wa kichwa, alilala usingizi; lakini Mungu wake alikuwa macho, akaja katika njozi kwa mtumishi wake. Tulalapo bila ulinzi, Yehova mwenyewe atakifunika kichwa chetu.

Bwana huwalinda watu wake kama tajiri alindavyo hazina yake, kama jemadari alindavyo mji kwa askari, kama mlinzi akeshavyo juu ya mfalme wake. Hakuna awezaye kuwadhuru wale walio katika ulinzi wa namna hii. Na niitie nafsi yangu katika mikono yake mipendwa. Kamwe hatusahau, kamwe hakomi kutuangalia kwa bidii, kamwe hajioni kuwa hana uwezo wa kutuhifadhi.

Ee Bwana wangu, unilinde, nisije nikatangatanga na kuanguka na kupotea. Unilinde, ili nizishike amri zako. Kwa uangalizi wako usiosinzia unizuie nisilale kama mvivu, na kuangamia kama wale walalao usingizi wa mauti.

Novemba 14

JINA LA KULITUMIA

"Mkiniomba neno lolote kwa jina langu, nitalifanya." Yohana 14:14

Ni ahadi iliyoje iliyo pana! Neno lolote! Liwe kubwa au dogo, mahitaji yangu yote yamefunikwa na neno lile "lolote." Njoo, nafsi yangu, uwe huru penye kiti cha rehema, ukamsikie Bwana wako akikuambia, "Panua kinywa chako, nami nitakijaza."

Ni ahadi iliyoje ya hekima! Sikuzote yatupasa kuomba kwa jina la Yesu. Hili litutiapo moyo, pia humheshimu yeye. Hii ni hoja ya daima. Mara kwa mara kila hoja nyingine hutiwa giza, hasa zile tuwezazo kuzitoa katika uhusiano wetu wenyewe na Mungu, au uzoefu wetu wa neema yake; lakini nyakati kama hizo jina la Yesu lina nguvu penye kiti cha enzi kama daima, nasi twaweza kulisihi kwa uhakika kamili.

Ni ombi liloje la kufundisha! Siwezi kuomba neno lolote ambalo siwezi kulitia mkono na muhuri wa Kristo. Sithubutu kulitumia jina la Bwana wangu katika ombi la ubinafsi au la ukaidi. Naweza kulitumia jina la Bwana wangu tu katika maombi ambayo yeye mwenyewe angeyaomba kama angekuwa katika hali yangu. Ni pendeleo kuu kuruhusiwa kuomba kwa jina la Yesu kana kwamba Yesu mwenyewe ndiye aombaye; lakini upendo wetu kwake hautatuacha kamwe kuliweka jina hilo mahali ambapo yeye asingelipenda kuliweka.

Je, naomba kile akubalicho Yesu? Je, nathubutu kutia muhuri wake juu ya ombi langu? Basi ninacho kile nikitafutacho kwa Baba.

Novemba 15

UTAJIRI USIO NA MIPAKA

"Naye Mungu wangu atawajazeni kila mnachokihitaji kwa kadiri ya utajiri wake katika utukufu, ndani ya Kristo Yesu." Wafilipi 4:19

Mungu wa Paulo ni Mungu wetu, naye atatujazia mahitaji yetu yote. Paulo alikuwa na hakika ya hili kwa habari ya Wafilipi, nasi tuna hakika yake kwa habari ya nafsi zetu. Mungu atalifanya, kwa maana ni jambo lililo kama yeye: yeye hutupenda, hufurahi kutubariki, nako kutakuwa ni utukufu kwake kufanya hivyo. Huruma yake, uweza wake, upendo wake, uaminifu wake, vyote hutenda kazi pamoja ili tusipatwe na njaa.

Ni kipimo kilichoje akitumiacho Bwana: "Kwa kadiri ya utajiri wake katika utukufu ndani ya Kristo Yesu." Utajiri wa neema yake ni mkubwa, lakini tuseme nini juu ya utajiri wa utukufu wake? "Utajiri wake wa utukufu ndani ya Kristo Yesu," ni nani atakayeweza kuupima huu? Kwa kadiri ya kipimo hiki kisichopimika Mungu atakijaza kilindi kikubwa cha mahitaji yetu. Yeye humfanya Bwana Yesu kuwa chombo na mfereji wa utimilifu wake, kisha hutugawia utajiri wake wa upendo katika hali yake iliyo juu kabisa. Haleluya!

Mwandishi anajua maana ya kujaribiwa katika kazi ya Bwana. Uaminifu umelipwa kwa hasira, na watoaji wakarimu wamesimamisha michango yao; lakini yeye waliyetaka kumwonea hakuwa maskini hata kwa senti moja, la, bali amekuwa tajiri zaidi; kwa maana ahadi hii imekuwa kweli, "Mungu wangu atawajazeni mahitaji yenu yote." Riziki za Mungu ni za hakika zaidi kuliko benki yoyote.

Novemba 16

SILAHA ZILIZOHUKUMIWA KUSHINDWA

"Kila silaha itakayofanyika juu yako haitafanikiwa; na kila ulimi utakaoinuka juu yako katika hukumu utauhukumu kuwa mkosa." Isaya 54:17

Kuna mvumo mkubwa katika vishinikizo na vyuma vya mfua wa adui. Wanatengeneza silaha za kuwapiga watakatifu. Wasingeweza hata kufanya kiasi hiki kama Bwana wa watakatifu asingewaruhusu; kwa maana yeye ndiye aliyemuumba mhunzi avukutaye makaa katika moto. Lakini tazama jinsi wafanyavyo kazi kwa bidii! Panga na mikuki mingapi wanavyoifua! Halina maana, kwa maana juu ya ubapa wa kila silaha waweza kusoma maandiko haya: Haitafanikiwa.

Lakini sasa sikiliza mvumo mwingine: ni ugomvi wa ndimi. Ndimi ni vyombo vya kutisha zaidi kuliko viwezavyo kutengenezwa kwa nyundo na fuawe, na uovu ziutiao hukata ndani zaidi na kuenea kwa upana zaidi. Tutakuwaje sasa? Masingizio, uongo, uchongezi, dhihaka -- hivi ni mishale yenye sumu; twawezaje kukabiliana navyo? Bwana Mungu hutuahidi ya kwamba, kama hatuwezi kuzinyamazisha, walakini tutaokoka tusiharibiwe navyo. Zatuhukumu kwa muda, lakini tutazihukumu hatimaye, na milele. Vinywa vya wale wanenao uongo vitazibwa, na uongo wao utageuzwa kuwa heshima ya watu wema walioteswa kwa huo.

Novemba 17

MUNGU HAWAACHI KAMWE

"Kwa kuwa Bwana hatawatupa watu wake, wala hatauacha urithi wake." Zaburi 94:14

La, wala hatamtupa hata mmoja wao. Mwanadamu ana watu awatupao, lakini Mungu hana; kwa maana kuchagua kwake hakubadiliki, na upendo wake ni wa milele. Hakuna awezaye kumpata mtu hata mmoja ambaye Mungu amemwacha baada ya kujidhihirisha kwake kwa wokovu.

Kweli hii kuu imetajwa katika zaburi ili kuufariji moyo wa mtu aliyeteswa. Bwana huwarudi walio wake; lakini hawaachi kamwe. Matokeo ya kazi ile ya pande mbili ya sheria na fimbo ni kutufundisha, na tunda la mafundisho hayo ni kutulizwa kwa roho, kiasi cha akili, ambako kutokana nako huja raha. Wasiomcha Mungu huachwa peke yao hata shimo lichimbwe watakaloanguka na kunaswa ndani yake; lakini wamchao Mungu hupelekwa shuleni ili waandaliwe kwa hatima yao ya utukufu itakayokuja. Hukumu itarudi na kuimaliza kazi yake juu ya waasi, lakini vivyo hivyo itarudi ili kuwatetea wanyofu na wamchao Mungu. Kwa hiyo twaweza kuistahimili fimbo ya adhabu kwa unyenyekevu wa utulivu; haimaanishi hasira, bali upendo.

Mungu aweza kuadibu na kurekebisha,

Lakini kamwe hawezi kupuuza;

Aweza kwa uaminifu kukemea,

Lakini kamwe hawezi kuacha kupenda.

Novemba 18

DHAHIRI NI YA KIUNGU

"Siku hiyo Bwana atawatetea wenyeji wa Yerusalemu; na yeye aliye dhaifu miongoni mwao siku hiyo atakuwa kama Daudi; na nyumba ya Daudi itakuwa kama Mungu, kama malaika wa Bwana mbele yao." Zekaria 12:8

Mojawapo ya njia bora za Bwana za kuwatetea watu wake ni kuwafanya wenye nguvu katika uwezo wa ndani. Watu ni bora kuliko kuta, na imani ina nguvu kuliko ngome.

Bwana aweza kumtwaa aliye dhaifu kuliko wote miongoni mwetu na kumfanya kama Daudi, shujaa wa Israeli. Bwana, nifanyie hivi mimi! Ingiza nguvu zako ndani yangu, na unijaze ujasiri mtakatifu ili nipate kumkabili yule jitu kwa kombeo na jiwe, nikiwa na tumaini katika Mungu.

Bwana aweza kuwafanya mashujaa wake walio wakuu kuwa hodari zaidi sana kuliko walivyo: Daudi aweza kuwa kama Mungu, kama malaika wa Yehova. Hili lingekuwa maendeleo ya ajabu, lakini lawezekana, kama sivyo lisingenenwa. Ee Bwana, tenda hivi na walio bora wa viongozi wetu! Tuonyeshe uwezalo kufanya -- yaani, kuwainua watumishi wako waaminifu hata kimo cha neema na utakatifu kitakachokuwa dhahiri ni cha kiungu!

Bwana, ukae ndani ya watakatifu wako, nao watakuwa kama Mungu; tia uweza wako ndani yao, nao watakuwa kama wenye uhai wakaao mbele za Yehova. Itimize ahadi hii kwa kanisa lako lote katika siku hii yetu, kwa ajili ya Yesu. Amina.

Novemba 19

KUTOKA UTIIFU HATA BARAKA

"Tangu siku hii ya leo nitawabariki." Hagai 2:19

Mambo yajayo yamefichwa kwetu. Walakini hapa pana kioo ambamo twaweza kuiona miaka isiyozaliwa bado. Bwana asema, "Tangu siku hii ya leo nitawabariki."

Yafaa kuitia maanani siku inayotajwa katika ahadi hii. Kulikuwa na kupungua kwa mavuno, ukungu, na koga, na yote kwa sababu ya dhambi ya watu. Basi, Bwana akawaona hawa walioadhibiwa wakianza kulitii neno lake, na kulijenga hekalu lake, kwa hiyo asema, "Tangu siku ile ambayo msingi wa hekalu la Bwana uliwekwa, tafakarini. Tangu siku hii nitawabariki." Kama tumeishi katika dhambi yoyote, na Roho akituongoza kujitakasa nayo, twaweza kutegemea baraka ya Bwana. Tabasamu lake, Roho wake, neema yake, ufunuo wake ulio kamili zaidi wa kweli yake vyote vitatuthibitikia kuwa baraka iliyoongezwa. Twaweza kupatwa na upinzani mkubwa zaidi kutoka kwa mwanadamu kwa sababu ya uaminifu wetu, lakini tutainuka hata mahusiano ya karibu zaidi na Bwana Mungu wetu, na mwono ulio dhahiri zaidi wa kukubaliwa kwetu ndani yake.

Bwana, nimeazimia kuwa mwaminifu zaidi kwako, na sahihi zaidi katika kuyafuata mafundisho yako na maagizo yako; basi nakuomba, kwa Kristo Yesu, uzidishe heri ya maisha yangu ya kila siku tangu sasa na hata milele.

Novemba 20

NJAA IMESHIBISHWA

"Kwa maana huitosheleza nafsi yenye shauku, na nafsi yenye njaa huijaza mema." Zaburi 107:9

Ni vyema kuwa na shauku, na kadiri zilivyo kali ndivyo zilivyo bora. Bwana atazitosheleza shauku za nafsi, ziwe kubwa na za kunyakua yote kiasi gani. Na tuwe na shauku kubwa, kwa maana Mungu atatoa kwa wingi. Kamwe hatuko katika hali njema ya akili tunapotosheka na nafsi zetu, na tusiwe na shauku. Tamaa za neema zaidi, na kuugua kusikoweza kunenwa, ni maumivu ya kukua, na yatupasa kutamani kuyahisi zaidi na zaidi. Ee Roho Mbarikiwa, tufanye tuugue na kulia kwa ajili ya vitu vilivyo bora, na kwa ajili ya vingi vya vitu vilivyo bora kabisa!

Njaa si hisia ya kupendeza hata kidogo. Walakini heri wenye njaa na kiu ya haki. Watu wa namna hiyo hawatatuliziwa njaa yao kwa chakula kidogo tu, bali watashibishwa. Hawatashibishwa kwa aina yoyote ya kitu kibovu, bali chakula chao kitastahili Bwana wao mwema, kwa maana watashibishwa kwa wema na Yehova mwenyewe.

Njoo, tusihangaike kwa sababu twatamani na kuona njaa, bali na tuisikie sauti ya Mtunga Zaburi naye akitamani na kuona njaa ya kumwona Mungu akitukuzwa. "Watu na wamshukuru Bwana kwa fadhili zake, na kwa maajabu yake kwa wanadamu!"

Novemba 21

MTAZAMO WA NJE NA WA JUU

"Niangalieni mimi, mkaokoke, enyi ncha zote za dunia; maana mimi ni Mungu, wala hapana mwingine." Isaya 45:22

Hii ni ahadi ya ahadi zote. Yakaa katika msingi wa maisha yetu ya kiroho. Wokovu huja kwa kumtazama yeye aliye "Mungu wa haki, na Mwokozi." Maagizo ni rahisi namna gani! "Niangalieni mimi. Sharti liloje la haki! Bila shaka kiumbe kimpasa kumtazama Muumba. Tumetazama kwingineko muda wa kutosha, ni wakati sasa tumtazame yeye peke yake aalikaye matarajio yetu, na kuahidi kutupa wokovu wake.

Ni kutazama tu! Je, hatutatazama mara moja? Hatupaswi kuleta kitu chochote ndani yetu wenyewe, bali kutazama nje na juu kwa Bwana wetu aliye juu ya kiti chake cha enzi, alikopanda kutoka msalabani. Kutazama hakuhitaji maandalizi, wala juhudi kali: hakuhitaji akili wala hekima, mali wala nguvu. Yote tuyahitajiyo yamo katika Bwana Mungu wetu, na kama tutamtazama yeye kwa ajili ya kila kitu, kila kitu hicho kitakuwa chetu, nasi tutaokoka.

Njoni, enyi mlio mbali, tazameni huku! Enyi ncha za dunia, geuzeni macho yenu upande huu! Kama vile watu waliomo pande za mbali kabisa waonavyo jua na kuifurahia nuru yake, vivyo hivyo ninyi mlalao mipakani mwa mauti penye malango yenyewe ya kuzimu mwaweza kwa kutazama kupokea nuru ya Mungu, uzima wa Mbinguni, wokovu wa Bwana Yesu Kristo, aliye Mungu, na kwa hiyo awezaye kuokoa.

Novemba 22

HAKUNA HUKUMU YA ADHABU

"Katika siku zile, na wakati ule, asema Bwana, uovu wa Israeli utatafutwa, wala hautakuwapo; na dhambi za Yuda, wala hazitaonekana; kwa maana nitawasamehe hao ninaowasaza." Yeremia 50:20

Ni neno la utukufu kweli kweli! Ni msamaha kamili ulioje ulioahidiwa hapa kwa mataifa yenye dhambi ya Israeli na Yuda! Dhambi itaondolewa hata isipatikane, itafutwa hata isiwepo. Utukufu na uwe kwa Mungu wa misamaha!

Shetani huzitafuta dhambi apate kutushitaki kwazo, adui zetu huzitafuta wapate kutuwekea mashtaka, na dhamiri yetu wenyewe huzitafuta hata kwa hamu ya kupita kiasi. Lakini Bwana aitiapo damu ya thamani ya Yesu, hatuogopi upekuzi wa namna yoyote, kwa maana "hazitakuwapo," "hazitaonekana." Bwana amezifanya dhambi za watu wake zikome kuwako: ameukomesha uasi, na kuimaliza dhambi. Dhabihu ya Yesu imezitupa dhambi zetu katika vilindi vya bahari. Hili latufanya tucheze kwa furaha.

Sababu ya kufutwa kwa dhambi yakaa katika jambo hili kwamba Yehova mwenyewe huwasamehe wateule wake. Neno lake la neema si la kifalme tu, bali ni la Kimungu. Yeye hunena msamaha, nasi twasamehewa. Yeye huutumia upatanisho, na tangu saa ile watu wake wako mbali na hofu yote ya hukumu ya adhabu. Lihimidiwe jina la Mungu aangamizaye dhambi!

Novemba 23

KUPATA UVUMILIVU

"Bwana, Mungu wako, atawafukuza mataifa hayo mbele yako kidogo kidogo." Kumbukumbu 7:22

Haitupasi kutazamia kushinda ushindi kwa ajili ya Bwana Yesu kwa pigo moja tu. Kanuni na mazoea maovu hufa kwa shida. Katika sehemu nyingine yachukua miaka ya kazi kuutoa hata uovu mmoja tu kati ya maovu mengi yawachafuayo wenyeji. Yatupasa kuendeleza vita kwa nguvu zetu zote, hata tunapojaliwa mafanikio machache yanayoonekana.

Kazi yetu katika ulimwengu huu ni kuushinda kwa ajili ya Yesu. Haitupasi kufanya maridhiano, bali kuyaangamiza maovu. Haitupasi kutafuta kupendwa na watu, bali kupiga vita visivyokoma na uovu. Kutokuamini, upapa, ulevi, uchafu, uonevu, kupenda dunia, upotovu; haya yote yapasa "kutolewa."

Bwana Mungu wetu peke yake ndiye awezaye kulitimiza hili. Hutenda kazi kwa watumishi wake waaminifu; na, lihimidiwe jina lake, huahidi ya kwamba atatenda kazi hivyo. "Yehova, Mungu wako, atawafukuza mataifa hayo mbele yako." Hili atalifanya hatua kwa hatua, ili tupate kujifunza uvumilivu, tuzidi katika imani, tukeshe kwa bidii, na tuepuke usalama wa kimwili. Na tumshukuru Mungu kwa mafanikio kidogo, na kuomba zaidi. Tusiurudishe upanga alani kamwe hata nchi yote itakaposhindwa kwa ajili ya Yesu.

Jipe moyo, ewe moyo wangu! Endelea kidogo kidogo, kwa maana vidogo vingi vitafanya jumla kubwa.

Novemba 24

MSAMAHA NA KUACHILIA

"Hatateta sikuzote, wala hatashika hasira yake milele." Zaburi 103:9

Atateta mara kwa mara, ama sivyo asingekuwa Baba mwenye hekima kwa watoto maskini wenye kukosa kama sisi. Kuteta kwake ni kwenye maumivu makubwa kwa wale walio wa kweli, kwa sababu wanahisi jinsi wanavyostahili kwa masikitiko, na jinsi lilivyo baya kwao kumhuzunisha. Twajua maana ya kuteta huku, nasi twainama mbele za Bwana, tukiomboleza kwamba tumfanye awe na hasira nasi.

Lakini ni faraja iliyoje tuipatayo katika maneno haya! "Si sikuzote" atakapoteta. Tukitubu na kumgeukia kwa mioyo iliyovunjika kwa dhambi na iliyovunjika kutoka katika dhambi, atatutabasamia mara moja. Si furaha kwake kuwageuzia uso wenye kununa wale awapendao kwa moyo wake wote: ni furaha yake kwamba furaha yetu iwe timilifu.

Njoo, na tuutafute uso wake. Hakuna sababu ya kukata tamaa, wala hata ya kuvunjika moyo. Na tumpende Mungu atetaye, na baada ya muda mfupi tutaimba: "Hasira yako imegeukia mbali, nawe wanifariji." Ondokeni, enyi mawazo ya giza, enyi kunguru wa nafsi! Ingieni, enyi matumaini ya unyenyekevu na kumbukumbu za shukrani, enyi njiwa wa moyo! Yeye aliyetusamehe zamani kama hakimu, atatusamehe tena kama baba, nasi tutashangilia katika upendo wake mtamu, usiobadilika.

Novemba 25

MILIMA IKAGEUKA TAMBARARE

"Wewe u nani, Ewe mlima mkubwa? Mbele ya Zerubabeli utakuwa nchi tambarare; naye atalitoa jiwe la kilele kwa vigelegele, akisema, Neema, neema iwe juu yake." Zekaria 4:7

Saa hii mlima wa ugumu, dhiki, au uhitaji, waweza kuwa katika njia yetu, na akili ya asili haioni njia ya kuupita juu yake, au kupenya kati yake, au kuuzunguka. Imani na iingie, na mara mlima hutoweka na kuwa tambarare. Lakini imani sharti kwanza isikie neno la Bwana -- "Si kwa uwezo, wala si kwa nguvu, bali ni kwa roho yangu, asema Bwana wa majeshi." Kweli hii kuu ni hitaji la kwanza kwa kukabiliana na majaribu yasiyoshindika ya maisha.

Naona ya kuwa siwezi kufanya lolote, na ya kuwa kumtegemea mwanadamu kote ni ubatili. "Si kwa uwezo." Naona ya kuwa hakuna njia inayoonekana iwezayo kutegemewa, bali nguvu imo katika Roho asiyeonekana. Mungu peke yake sharti atende kazi, na wanadamu na njia sharti visihesabiwe kuwa kitu. Kama ni hivyo, kwamba Mungu Mwenyezi huyatwaa mambo ya watu wake, basi milima mikubwa si kitu. Yeye aweza kuiondoa dunia kama vijana wanavyotupa mipira huku na huku, au kuisukuma kwa mguu wao. Nguvu hii aweza kuniazima mimi. Kama Bwana akiniamuru kuuondoa mlima wa Alpi naweza kufanya hivyo kwa jina lake. Waweza kuwa mlima mkubwa, lakini hata mbele ya udhaifu wangu utakuwa tambarare; kwa maana Bwana amesema. Naweza kuogopa nini hali Mungu yu upande wangu?

Novemba 26

UGEUZAJI WA KIMBINGUNI

"Huzuni yenu itageuka kuwa furaha." Yohana 16:20

Huzuni yao hasa ilikuwa mauti na kutokuwapo kwa Bwana wao, nayo iligeuzwa kuwa furaha alipofufuka kutoka kwa wafu na kujionyesha katikati yao. Huzuni zote za watakatifu zitageuzwa hivyo; hata zilizo mbaya kuliko zote, zionekanazo kana kwamba sharti zibaki milele kuwa chemchemi za uchungu.

Basi kadiri ya huzuni nyingi ndivyo furaha nyingi. Kama tuna mizigo ya huzuni, ndipo nguvu ya Bwana itakapoigeuza kuwa tani za furaha. Basi kadiri taabu inavyozidi kuwa chungu ndivyo furaha inavyozidi kuwa tamu: kupembea kwa pembezi mbali upande wa kushoto kutakifanya kiende mbali zaidi upande wa kulia. Kumbukumbu ya huzuni litaongeza ladha ya furaha: tutaiweka moja kinyume cha nyingine, na mng'ao wa almasi utaonekana dhahiri zaidi kwa sababu ya kizingiti cheusi kilicho nyuma yake.

Njoo, ewe moyo wangu, changamka! Baada ya kitambo kidogo nitakuwa na furaha kama nilivyo na huzuni sasa. Yesu ananiambia kwamba kwa ugeuzaji wa kimbinguni huzuni yangu itageuzwa kuwa furaha. Sioni jinsi itakavyokuwa, lakini naiamini, nami naanza kuimba kwa njia ya kutazamia. Kufadhaika huku kwa roho si kwa muda mrefu, karibu nitakuwa juu miongoni mwa wenye furaha wamsifuo Bwana mchana na usiku, na huko nitaimba juu ya rehema iliyoniokoa kutoka katika dhiki kuu.

Novemba 27

PUMZIKO KATIKA KWENDA KWAKO KOTE

"Akasema, Uso wangu utakwenda pamoja nawe, nami nitakupa raha." Kutoka 33:14

Ahadi ya thamani! Bwana, niwezeshe kuipokea kuwa yangu mimi yote.

Sharti twaondoke nyakati fulani kutoka makao yetu, kwa maana hapa hatuna mji udumuo. Mara nyingi hutokea kwamba tunapojisikia kama nyumbani zaidi mahali fulani, twaitwa ghafula kutoka hapo. Hapa pana dawa ya ugonjwa huu. Bwana mwenyewe atafuatana nasi. Uwepo wake, unaotia ndani fadhili zake, ushirika wake, uangalizi wake, na uweza wake, utakuwa pamoja nasi daima katika kila safari yetu. Hili lamaanisha zaidi sana kuliko lisemavyo; kwa maana, kwa kweli, lamaanisha vitu vyote. Kama tunaye Mungu pamoja nasi, tunamiliki Mbingu na dunia. Nenda pamoja nami, Bwana, kisha uniamuru popote upendapo!

Lakini twatumaini kupata mahali pa kupumzika. Andiko laahidi hilo. Tutakuwa na raha ya kutolewa, ya kufanywa, na ya kuhifadhiwa na Mungu mwenyewe. Uwepo wake utatufanya tupumzike hata tunapokuwa safarini, naam, hata katikati ya vita. Raha! Neno lililobarikiwa mara tatu. Je, laweza kufurahiwa na wanadamu wenye kufa? Naam, ipo ahadi, na kwa imani twaisihi. Raha huja kutoka kwa Mfariji, kutoka kwa Mfalme wa Amani, na kutoka kwa Baba wa utukufu aliyepumzika siku ya saba kutoka katika kazi zake zote. Kuwa pamoja na Mungu ni kupumzika kwa maana iliyo kuu kuliko zote.

Novemba 28

KUFANYA LILE AWEZALO MUNGU KULIBARIKI

"Bwana ataamuru baraka ikae juu yako katika ghala zako, na katika kila utakalotia mkono wako." Kumbukumbu 28:8

Tukimtii Bwana Mungu wetu atalibariki lile atupalo. Utajiri si laana unapobarikiwa na Bwana. Watu wanapokuwa na zaidi ya wanavyohitaji kwa uhitaji wao wa papo hapo, na kuanza kujiwekea akiba katika maghala, kuoza kwa uchoyo au ukungu wa ugumu wa moyo huelekea kufuata ukusanyaji huo; lakini pamoja na baraka ya Mungu si hivyo. Busara hupanga uwekaji akiba, ukarimu huelekeza matumizi, shukrani hudumisha kujiweka wakfu, na sifa hutamausha furaha. Ni rehema kuu kuwa na baraka ya Mungu katika kasha lako la chuma, na katika hesabu yako ya benki.

Ni fadhili iliyoje inayofanywa kuwa yetu kwa kifungu cha mwisho! "Bwana atakubariki katika kila utakalotia mkono wako." Tusingetia mkono wetu katika neno lolote ambalo hatuthubutu kuomba baraka ya Mungu juu yake, wala tusingelifanya bila maombi na imani. Lakini ni pendeleo lililoje kuweza kutazamia msaada wa Bwana katika kila shughuli! Wengine hunena juu ya mtu mwenye bahati: baraka ya Bwana ni bora kuliko bahati. Ufadhili wa wakuu si kitu mbele ya fadhili ya Mungu. Kujitegemea ni vyema kabisa; lakini baraka ya Bwana ni kubwa mno kupita tunda lote la kipawa, la akili, au la ujanja.

Novemba 29

JUE KUSUBIRI

"Yeye aaminiye hatafanya haraka." Isaya 28:16

Atafanya haraka kuzishika amri za Bwana; lakini hatafanya haraka kwa maana yoyote ya kukosa saburi au isivyofaa.

Hatafanya haraka kukimbia, kwa maana hatashindwa na hofu iletayo fadhaa. Wengine wanaporuka huku na huku kana kwamba akili zao zimewaishia, mwaminifu atakuwa mtulivu, mwenye amani, na mwenye tafakari, na hivyo ataweza kutenda kwa hekima katika saa ya jaribu.

Hatafanya haraka katika matarajio yake, akitamani vitu vyake vyema mara moja na papo hapo; bali atangoja wakati wa Mungu. Wengine wana haraka kubwa ya kuwa na ndege mkononi; kwa maana wanaiona ahadi ya Bwana kama ndege kichakani, isiyoelekea kuwa yao. Waaminio wanajua kusubiri.

Hatafanya haraka kwa kujitumbukiza katika tendo baya au lenye shaka. Kutokuamini sharti kufanye jambo fulani, na hivyo hujiletea uangamivu wake; lakini imani haifanyi haraka kupita mwendo ulio mwema, na hivyo hailazimishwi kurudi nyuma kwa masikitiko kwa njia ile iliyoifuata bila kujali.

Mimi hali yangu ikoje? Je, ninaamini, na kwa hiyo je, nashika mwendo wa mwaminifu, ambao ni kwenda pamoja na Mungu? Tulia, ewe roho itetemekayo! Ee, pumzika katika Bwana, na umngoje kwa saburi! Ewe moyo, angalia kwamba wafanye hivi mara moja!

Novemba 30

MUNGU YU MSTARI WA MBELE

"Naye Bwana, ndiye atakayekutangulia; atakuwa pamoja nawe, hatakupungukia, wala hatakuacha; usiogope, wala usifadhaike." Kumbukumbu 31:8

Mbele ya kazi kuu au vita kuu, hapa pana andiko lipasalo kutusaidia kujifunga silaha zetu. Kama Yehova mwenyewe atatutangulia, ni salama bila shaka kufuata. Ni nani awezaye kuzuia maendeleo yetu ikiwa Bwana mwenyewe yu mstari wa mbele? Njoni, ndugu askari, na tusonge mbele haraka! Kwa nini twasita kupita mbele hata ushindini?

Wala Bwana hayuko mbele yetu tu; yu pamoja nasi. Juu, chini, pande zote, ndani yumo yeye Mwenye uweza wote, aliye kila mahali. Katika wakati wote, hata milele, atakuwa pamoja nasi kama alivyokuwa. Jinsi hili lipasavyo kuutia nguvu mkono wetu! Rukieni kwa ujasiri, enyi askari wa msalaba, kwa maana Bwana wa majeshi yu pamoja nasi!

Kwa kuwa yu mbele yetu na pamoja nasi, hataondoa msaada wake kamwe. Hawezi kushindwa ndani yake mwenyewe, wala hatatushindwa sisi. Ataendelea kutusaidia kwa kadiri ya uhitaji wetu, hata mwisho. Kama asivyoweza kutushindwa, ndivyo asivyotuacha. Sikuzote atakuwa na uwezo na utayari wa kutupa nguvu na msaada hata siku za kupigana zitakapokwisha.

Tusiogope wala tusifadhaike; kwa maana Bwana wa majeshi atashuka vitani pamoja nasi, atabeba uzito wa mapigano, na kutupa ushindi.