Mwezi wa Oktoba

Oktoba 1

AGANO ALIKUMBUKALO

"Amewapa chakula wamchao; ataikumbuka agano lake milele." Zaburi 111:5

Wale wamchao Mungu hawana haja ya kuogopa uhitaji. Katika miaka hii yote mirefu Bwana amewapatia daima chakula watoto wake mwenyewe, wakiwa jangwani, au kando ya kijito Kerithi, au katika utumwa, au katikati ya njaa. Hata sasa Bwana ametupa siku kwa siku riziki yetu ya kila siku, wala hatuna shaka ya kwamba ataendelea kutulisha hata tusihitaji tena.

Kwa habari ya baraka zilizo kuu na bora zaidi za agano la neema, hataacha kamwe kuzitoa kadiri hali yetu ipasavyo. Anakumbuka ya kwamba alifanya agano, wala hatendi kamwe kana kwamba analijutia. Analikumbuka hata tunapomchokoza atuangamize. Anakumbuka kutupenda, kutulinda, na kutufariji, kama vile alivyoahidi kufanya. Anakumbuka kila nukta na kila herufi ya ahadi zake, wala haachi neno lake hata moja lianguke chini.

Sisi kwa masikitiko hatumkumbuki Mungu wetu, bali yeye kwa neema anatukumbuka. Hawezi kumsahau Mwana wake aliye Mdhamini wa Agano, wala Roho wake Mtakatifu autekelezaye agano kwa bidii, wala heshima yake mwenyewe, iliyofungamana na agano. Kwa hiyo msingi wa Mungu unasimama imara, wala hakuna mwaminiye atakayepoteza urithi wake wa kimungu, ulio wake kwa agano la chumvi.

Oktoba 2

FARAJA NJIANI KUELEKEA NYUMBANI

"Yusufu akawaambia ndugu zake, Mimi ninakufa; lakini Mungu hakika atawajilia, naye atawapandisha kutoka nchi hii mpaka nchi aliyowaapia Ibrahimu, na Isaka, na Yakobo." Mwanzo 50:24

Yusufu alikuwa kama uangalizi wa Mungu uliojivika mwili kwa ndugu zake. Kina Yusufu wetu wote hufa, na faraja elfu hufa pamoja nao. Misri haikuwa tena kama ilivyokuwa kwa Israeli baada ya Yusufu kufa, wala ulimwengu hauwezi tena kuwa kwa baadhi yetu kama ulivyokuwa hapo wapendwa wetu walipokuwa hai.

Lakini tazama jinsi maumivu ya kifo kile cha huzuni yalivyopunguzwa! Walikuwa na ahadi ya kwamba Mungu aliye hai atawajilia. Kutembelewa na Yehova! Fadhili iliyoje! Faraja iliyoje! Mbingu iliyoje hapa duniani! Ee Bwana, utujilie leo; ingawa kwa kweli hatustahili wewe kuingia chini ya dari yetu.

Lakini zaidi iliahidiwa: Bwana angewatoa. Wangeiona Misri karibu baridi Yusufu akiisha kufa; naam, ingekuwa kwao nyumba ya utumwa. Lakini haikuwa hivyo milele; wangetoka humo kwa wokovu wa kimungu, na kuenenda mpaka nchi ya ahadi. Hatutalia hapa milele. Tutaitwa nyumbani kwenye nchi ya utukufu tuungane na wapendwa wetu. Kwa hiyo, "farijianeni kwa maneno hayo."

Oktoba 3

VIOO VIAKISIVYO UZURI WA BWANA

"Nami katika haki nitautazama uso wako; nikiamka nitashiba kwa sura yako." Zaburi 17:15

Fungu la watu wengine hujaza miili yao, na kutajirisha watoto wao, bali fungu la mwaminiye ni la namna nyingine. Watu wa ulimwengu huu wana hazina yao katika ulimwengu huu, bali watu wa ulimwengu ujao hutazama juu zaidi na mbali zaidi.

Milki yetu ni ya sehemu mbili. Tunao uwepo wa Mungu hapa na mfano wake huko baadaye. Hapa twautazama uso wa Bwana katika haki, kwa maana tumehesabiwa haki katika Kristo Yesu. Ee, furaha ya kuutazama uso wa Mungu aliyepatanishwa nasi! Utukufu wa Mungu katika uso wa Yesu Kristo hutupa mbingu hapa duniani, nao utakuwa kwetu mbingu ya mbingu huko juu.

Lakini kuona hakuishii hapo: tutabadilishwa kuwa mfano wa kile tunachokitazama. Tutalala kitambo kidogo kisha tutaamka na kujikuta kama vioo viakisivyo uzuri wa Bwana wetu. Imani humwona Mungu kwa mtazamo ubadilishao. Moyo hupokea sura ya Yesu ndani ya vilindi vyake, hata tabia ya Yesu ichapwe nafsini. Huku ndiko kushiba. Kumwona Mungu na kuwa mfano wake -- nitatamani nini zaidi? Uthabiti wa Daudi wenye uhakika hapa umefanywa na Roho Mtakatifu kuwa ahadi ya Bwana. Naiamini. Naitarajia. Bwana, unijalie. Amina.

Oktoba 4

SUMAKU YENYE NGUVU

"Nami nikiinuliwa juu ya nchi, nitawavuta wote kwangu." Yohana 12:32

Njoni, enyi watenda kazi, mtiwe moyo. Mnahofu ya kwamba hamwezi kuvuta kusanyiko. Jaribuni kuhubiri Mwokozi aliyesulubiwa, aliyefufuka, na aliyepaa; kwa maana huku ndiko "kuvuta" kukuu kupita kote kulikopata kudhihirishwa kati ya wanadamu. Ni nini kilichokuvuta kwa Kristo ila Kristo? Ni nini kinachokuvuta kwake sasa ila nafsi yake mwenyewe iliyobarikiwa? Kama umevutwa kwenye dini kwa kitu kingine chochote, karibuni utavutwa mbali nayo; bali Yesu amekushika, naye atakushika hata mwisho. Kwa nini, basi, kuutia shaka uwezo wake wa kuwavuta wengine? Nenda kwa jina la Yesu kwa wale ambao hata sasa wamekuwa wakaidi, uone kama halitawavuta.

Hakuna namna ya mtu iliyo nje ya nguvu hii ya kuvuta. Wazee na vijana, matajiri na maskini, wajinga na wenye elimu, wapotovu au wapendezao -- watu wote watahisi nguvu hii ivutayo. Yesu ndiye sumaku pekee. Tusifikiri juu ya nyingine yoyote. Muziki hautavuta kwa Yesu, wala ufasaha, wala mantiki, wala matambiko, wala kelele. Yesu mwenyewe ndiye apasaye kuwavuta watu kwake mwenyewe; naye Yesu anatosha kabisa kwa kazi hiyo katika kila hali. Usijaribiwe na udanganyifu wa siku hizi; bali kama watenda kazi wa Bwana fanyeni kazi kwa njia yake mwenyewe, na kuvuta kwa kamba za Bwana mwenyewe. Vuta kwa Kristo, na vuta kwa Kristo, kwa maana ndipo Kristo atavuta kwa kupitia wewe.

Oktoba 5

KWA AMRI YA MUNGU

"Na mabaki ya Yakobo yatakuwa kati ya mataifa mengi kama umande utokao kwa Bwana, kama manyunyu juu ya majani; wasiomngoja mtu, wala kuwasubiri wanadamu." Mika 5:7

Kama jambo hili ni kweli kwa Israeli halisi, ni kweli zaidi sana kwa Israeli wa kiroho, watu wa Mungu waaminio. Watakatifu wanapokuwa kama ipasavyo, ni baraka isiyopimika kwa wale walio kati yao waliotawanyika.

Wao ni kama umande; kwa maana kwa namna ya utulivu, isiyo na majivuno, huwaburudisha walio karibu nao. Kwa kimya lakini kwa matokeo huhudumia uzima, ukuaji, na furaha ya wale wakaao pamoja nao. Wakija wapya kutoka mbinguni, wakimetameta kama almasi juani, wanaume na wanawake wenye neema huwatunza walio dhaifu na wasio na maana hata kila jani la majani lipate tone lake la umande. Wakiwa wadogo kama watu mmoja mmoja, wao, wakiunganishwa, watosha kwa makusudi ya upendo ambayo Bwana huyatimiza kwa kupitia wao. Matone ya umande hutimiza uburudisho wa mashamba mapana. Bwana, utufanye kama umande!

Watu watauwa ni kama manyunyu yajayo kwa amri ya Mungu bila ruhusa wala idhini ya mwanadamu. Hufanya kazi kwa ajili ya Mungu watu wakipenda wasipende; hawaombi ruhusa ya wanadamu zaidi ya vile mvua isivyoiomba. Bwana, utufanye hivyo, wepesi kwa ujasiri, na huru katika utumishi wako popote fungu letu litakapoangukia.

Oktoba 6

UONGOZI WA KIONGOZI WETU

"Lakini yeye atakapokuja, huyo Roho wa kweli, atawaongoza awatie kwenye kweli yote." Yohana 16:13

Kweli ni kama pango kubwa tunalotamani kuingia ndani yake, lakini hatuwezi kulipita peke yetu. Mlangoni ni angavu na weupe; lakini kama tungependa kwenda mbali zaidi na kuchunguza vyumba vyake vya ndani kabisa, ni lazima tuwe na kiongozi, ama sivyo tutajipoteza. Roho Mtakatifu, aijuaye kweli yote kikamilifu, ndiye kiongozi aliyewekwa wa waaminio wote wa kweli, naye huwaongoza kadiri wawezavyo kustahimili, kutoka chumba kimoja cha ndani hata kingine, ili wapate kuyaona mambo ya ndani ya Mungu, na siri yake ifunuliwe kwao.

Ahadi iliyoje hii kwa akili iulizayo kwa unyenyekevu! Twatamani kuijua kweli, na kuingia ndani yake. Twafahamu tabia yetu wenyewe ya kukosea, nasi twahisi haja ya haraka ya kiongozi. Twafurahi kwamba Roho Mtakatifu amekuja na kukaa kati yetu. Anajishusha kutenda kama kiongozi kwetu, nasi twaukubali uongozi wake kwa furaha. "Kweli yote" twataka kuijifunza, ili tusiwe wa upande mmoja na wasio na usawa. Hatungependa kuwa wajinga kwa makusudi wa sehemu yoyote ya ufunuo, tusije tukakosa baraka, au kupata dhambi. Roho wa Mungu amekuja ili apate kutuongoza kutuingiza katika kweli yote: na tuisikilize kwa mioyo yenye utii maneno yake na kuufuata uongozi wake.

Oktoba 7

DAIMA WA KWANZA KATIKA USHIRIKA

"Yeye awatangulia kwenda Galilaya; huko mtamwona, kama alivyowaambia." Marko 16:7

Mahali alipoagiza kukutana na wanafunzi wake, huko angekuwapo kwa wakati wake. Yesu hutimiza miadi yake. Kama akiahidi kukutana nasi kwenye kiti cha rehema, au katika ibada ya hadhara, au katika sakramenti, twaweza kutegemea kwamba atakuwapo. Sisi kwa uovu twaweza kukaa mbali na mahali pa mkutano palipoagizwa, bali yeye hafanyi hivyo kamwe. Asema, "Walipo wawili au watatu wamekusanyika kwa jina langu, nipo papo hapo kati yao"; hasemi "Nitakuwapo," bali, "Nipo tayari huko."

Yesu ni daima wa kwanza katika ushirika: "Yeye awatangulia." Moyo wake u pamoja na watu wake, furaha yake i ndani yao, hachelewi kamwe kukutana nao. Katika ushirika wote, yeye hututangulia.

Lakini hujidhihirisha kwa wale wamfuatao: "Huko mtamwona." Kuona kwenye furaha! Hatujali kumwona aliye mkuu kati ya wanadamu tu, bali kumwona YEYE ni kujazwa furaha na amani. Nasi tutamwona, kwa maana anaahidi kuwajia wale wamwaminio, na kujidhihirisha kwao. Uwe na hakika ya kwamba itakuwa hivyo, kwa maana hufanya kila kitu sawasawa na neno lake la ahadi: "Kama alivyowaambia." Shika maneno hayo ya mwisho, uwe na hakika ya kwamba hata mwisho atakutendea "kama alivyowaambia."

Oktoba 8

KAMWE SI PEKE YAKO

"Hutaitwa tena Uliyeachwa." Isaya 62:4

"Kuachwa" ni neno la kuhuzunisha. Lasikika kama kengele ya msiba. Ni kumbukumbu ya huzuni kali sana, na unabii wa mabaya makubwa. Shimo la taabu lafunuka katika neno hilo "Kuachwa." Kuachwa na yule aliyeweka rehani heshima yake! Kuachwa na rafiki aliyejaribiwa na kuaminiwa muda mrefu! Kuachwa na jamaa mpendwa! Kuachwa na baba na mama! Kuachwa na wote! Hii ni taabu kweli, lakini yaweza kuchukuliwa kwa saburi ikiwa Bwana atatuinua.

Lakini itakuwaje kuhisi kuachwa na Mungu? Fikiri juu ya kilio kile kichungu kuliko vyote, "Mungu wangu, Mungu wangu, mbona umeniacha?" Je, tumepata kuonja hata kidogo uchungu na nyongo ya "Kuachwa," kwa maana hiyo? Kama ndivyo, na tumsihi Bwana wetu atuokoe na kurudiwa kwa huzuni isiyoelezeka namna hiyo. Ee, giza kama hilo lisirudi kamwe! Watu kwa uovu walisema juu ya mtakatifu, "Mungu amemwacha; mfuatilieni na kumkamata." Lakini daima ilikuwa uongo. Fadhili za upendo za Bwana zitawalazimisha adui zetu wakatili kula maneno yao wenyewe, au, angalau, kunyamaza ndimi zao.

Kinyume cha haya yote ni neno lile bora, Hefsiba -- "Bwana anakupendezea." Hili hugeuza kilio kuwa kucheza. Wale walioota kwamba wameachwa na wamsikie Bwana akisema, "Sitakuacha kamwe, wala sitakupungukia."

Oktoba 9

NINI KITAKASACHO SADAKA ZETU?

"Kuhani atatia baadhi ya hiyo damu juu ya pembe za madhabahu ya kufukizia uvumba wa manukato mbele za Bwana." Walawi 4:7

Madhabahu ya uvumba ndipo mahali watakatifu watoapo maombi yao na sifa zao; nayo yapendeza kuiwaza ikinyunyiziwa damu ya dhabihu ile kuu. Ni jambo hili lifanyalo ibada yetu yote ikubalike kwa Yehova: yeye huiona damu ya Mwana wake mwenyewe, na kwa hiyo huipokea ibada yetu.

Ni vema kwetu kuikaza macho yetu juu ya damu ya sadaka ile moja kwa ajili ya dhambi. Dhambi huchanganyika hata na vitu vyetu vitakatifu, wala toba yetu iliyo bora, imani, maombi, na shukrani havingepokelewa na Mungu isipokuwa kwa ajili ya ustahili wa dhabihu ipatanishayo. Wengi hudharau "damu"; bali kwetu sisi ndiyo msingi wa faraja na tumaini. Kile kilicho juu ya pembe za madhabahu kinakusudiwa kuwa mbele ya macho yetu waziwazi tunapomkaribia Mungu. Damu huyapa maombi nguvu, na kwa hiyo iko juu ya pembe za madhabahu. Iko "mbele za Bwana," na kwa hiyo yapasa iwe mbele yetu. Iko juu ya madhabahu kabla hatujaleta uvumba; iko pale kuzitakasa sadaka zetu na matoleo yetu.

Njoo, na tuombe kwa ujasiri, kwa kuwa dhabihu imetolewa, ustahili umeombewa, damu imo ndani ya pazia, na maombi ya waaminio hayana budi kuwa matamu kwa Bwana.

Oktoba 10

MLANGO WA USHIRIKA ULIOFUNGULIWA

"Nimekupa mlango uliofunguliwa mbele yako, ambao hapana awezaye kuufunga." Ufunuo 3:8

Watakatifu wabakio waaminifu kwa kweli ya Mungu wana mlango uliofunguliwa mbele yao. Ee nafsi yangu, umeazimia kuishi na kufa kwa yale ambayo Bwana ameyafunua katika Neno lake, na kwa hiyo mbele yako umesimama mlango huu uliofunguliwa.

Nitaingia ndani kwa mlango uliofunguliwa wa ushirika na Mungu. Ni nani atakayenikataza? Yesu ameiondoa dhambi yangu, na kunipa haki yake, kwa hiyo naweza kuingia kwa uhuru. Bwana, nafanya hivyo kwa neema yako.

Nami ninao pia mbele yangu mlango uliofunguliwa kuingia katika siri za Neno. Naweza kuingia katika mambo ya ndani ya Mungu. Uteule, Muungano na Kristo, Ujio wa Pili -- yote haya yako mbele yangu, nami naweza kuyafurahia. Hakuna ahadi wala fundisho lililofungwa dhidi yangu sasa.

Mlango uliofunguliwa wa kufikia uko mbele yangu faraghani, na mlango uliofunguliwa wa kufaa hadharani. Mungu atanisikia; Mungu atanitumia. Mlango umefunguliwa kwa mwendo wangu wa kwenda mbele kwenye kanisa lililo juu, na kwa ushirika wangu wa kila siku na watakatifu walio chini. Wengine waweza kujaribu kunifungia ndani au kunifungia nje, lakini yote ni bure.

Karibu nitaona mlango uliofunguliwa kuingia Mbinguni: lango la lulu litakuwa njia yangu ya kuingilia, na ndipo nitaingia kwa Bwana na Mfalme wangu, na kuwa pamoja na Mungu nikifungiwa ndani milele.

Oktoba 11

HURU KUSAFIRI

"Nami nitawatia nguvu katika Bwana; nao watakwenda huko na huko kwa jina lake, asema Bwana." Zekaria 10:12

Faraja kwa watakatifu wagonjwa. Wamezimia nguvu, nao wanahofu ya kwamba hawatainuka kamwe kutoka kitanda cha shaka na hofu; lakini Tabibu yule Mkuu aweza kuiondoa maradhi, na kuuondoa udhaifu uliotokana nayo. Atawatia nguvu walio dhaifu. Hili atalifanya kwa njia iliyo bora kabisa, kwa maana litakuwa "katika Yehova." Nguvu zetu ni bora sana katika Mungu kuliko katika nafsi. Katika Bwana huleta ushirika, katika nafsi zetu zingeleta kiburi. Katika nafsi zetu zingekuwa na mipaka kwa masikitiko, bali katika Mungu hazina mpaka.

Nguvu inapotolewa, mwaminiye huitumia. Huenda huko na huko kwa jina la Bwana. Furaha iliyoje kutembea nje baada ya ugonjwa, na fahari iliyoje kuwa na nguvu katika Bwana baada ya kipindi cha kudhoofika! Bwana huwapa watu wake uhuru wa kwenda huko na huko, na utulivu wa ndani wa kuutumia uhuru huo. Hutufanya kuwa waungwana: sisi si watumwa wasiojua raha, wala wasioona vituko, bali tu huru kusafiri kwa raha katika nchi yote ya Imanueli.

Njoo, moyo wangu, usiwe tena mgonjwa na mwenye huzuni, Yesu anakuamuru uwe na nguvu, na kwenda pamoja na Mungu katika kutafakari kutakatifu. Litii neno lake la upendo.

Oktoba 12

ALAMA YA NEEMA YA AGANO

"Naye Bwana, Mungu wako, atautahiri moyo wako, na moyo wa uzao wako, upate kumpenda Bwana, Mungu wako, kwa moyo wako wote, na kwa roho yako yote, upate kuishi." Kumbukumbu la Torati 30:6

Hapa twasoma habari ya tohara ya kweli.

Angalia mwenye kuifanya: "Bwana, Mungu wako." Yeye peke yake aweza kuutenda moyo wetu kwa matokeo, na kuuondoa uovu wa mwilini na uchafu wake. Kutufanya tumpende Mungu kwa moyo na roho yetu yote ni muujiza wa neema ambao Roho Mtakatifu peke yake aweza kuutenda. Ni lazima tumtazame Bwana peke yake kwa jambo hili wala tusiridhike kamwe na kilicho pungufu ya hicho.

Angalia mahali tohara hii ifanyikapo. Si ya mwili, bali ya roho. Ndiyo alama muhimu ya agano la neema. Upendo kwa Mungu ndiyo ishara isiyofutika ya uzao uliochaguliwa; kwa muhuri huu wa siri uteule wa neema huthibitishwa kwa mwaminiye. Ni lazima tuangalie tusitumainie tambiko lolote la nje, bali tutiwe muhuri moyoni kwa tendo la Roho Mtakatifu.

Angalia matokeo yake ni nini -- "upate kuishi." Kuwa na nia ya mwili ni mauti. Katika kuushinda mwili twapata uzima na amani. Tukiyaangalia mambo ya Roho, tutaishi. Ee, Yehova, Mungu wetu, na aikamilishe kazi yake ya neema juu ya asili yetu ya ndani, ili kwa maana iliyo kamili na iliyo juu zaidi tupate kuishi kwa Bwana.

Oktoba 13

KAMA, NA AHADI MARA TATU

"Ikiwa watu wangu, walioitwa kwa jina langu, watajinyenyekesha, na kuomba, na kunitafuta uso wangu, na kuziacha njia zao mbaya; basi nitasikia toka mbinguni, nami nitawasamehe dhambi yao, na kuiponya nchi yao." 2 Nyakati 7:14

Tukiitwa kwa jina la Bwana, hata hivyo tu wanaume na wanawake wakosao. Rehema iliyoje kwamba Mungu wetu yu tayari kusamehe! Kila tukosapo na tuharakie kwenye kiti cha rehema cha Mungu wetu, tukitafuta msamaha.

Tunapaswa kujinyenyekesha. Je, hatupasi kunyenyekezwa na jambo hili kwamba baada ya kupokea upendo mwingi hivyo bado twakosa? Ee Bwana, twainama mbele yako mavumbini, na kuungama uchoyo wetu mbaya wa shukrani. Ee, aibu ya dhambi! Ee, aibu yake mara saba katika watu waliopendelewa kama sisi tulivyo!

Tena, tunapaswa kuomba rehema, utakaso, na kuokolewa na nguvu ya dhambi. Ee Bwana, utusikie hata sasa, wala usiuzuie kilio chetu.

Katika maombi haya tunapaswa kuutafuta uso wa Bwana. Ametuacha kwa sababu ya makosa yetu, nasi ni lazima tumsihi arudi. Ee Bwana, utuangalie katika Mwana wako Yesu, na kututabasamia sisi watumishi wako.

Pamoja na haya ni lazima yaende kule kugeuka kwetu wenyewe kutoka uovu. Mungu hawezi kutugeukia mpaka tugeuke kutoka dhambini.

Ndipo huja ahadi mara tatu ya kusikia, msamaha, na kuponya. Baba yetu, utujalie haya mara moja kwa ajili ya Bwana wetu Yesu Kristo.

Oktoba 14

KAMWE HATUONI HAYA

"Basi kila mtu atakayenikiri mbele ya watu, nami nitamkiri mbele za Baba yangu aliye mbinguni." Mathayo 10:32

Ahadi ya neema! Ni furaha kuu kwangu kumkiri Bwana wangu. Yawezayo kuwa makosa yangu, mimi sioni haya kwa ajili ya Yesu, wala siogopi kuyatangaza mafundisho ya msalaba wake. Ee Bwana, sikuificha haki yako ndani ya moyo wangu.

Tamu ni tumaini ambalo andiko laliweka mbele yangu! Rafiki huniacha na adui hushangilia, bali Bwana hamkani mtumishi wake. Bila shaka Bwana wangu atanikiri hata hapa, na kunipa ishara mpya za wema wake wa fadhili. Lakini yaja siku ambapo ni lazima nisimame mbele ya Baba yule mkuu. Furaha iliyoje kufikiri kwamba Yesu atanikiri wakati huo! Atasema, "Mtu huyu kweli aliniamini, naye alikuwa radhi kushutumiwa kwa ajili ya jina langu; na kwa hiyo namkiri kuwa ni wangu." Siku hizi mtu mkuu alipewa cheo cha uungwana, na Malkia akampa utepe uliopambwa kwa vito; lakini je, hilo ni nini? Litakuwa heshima ipitayo heshima zote kwa Bwana Yesu kunikiri mbele ya Utukufu wa kimungu Mbinguni. Nisipate kamwe kuona haya kumkiri Bwana wangu. Nisijiingize kamwe katika ukimya wa woga, au kuruhusu maridhiano ya moyo dhaifu. Je, nitaona haya kumkiri yeye aahidiye kunikiri mimi?

Oktoba 15

KUTEGEMEZWA KWA KULISHWA

"Kama vile Baba aliye hai alivyonituma mimi, nami ni hai kwa Baba; kadhalika naye anilaye mimi, huyo naye atakuwa hai kwa mimi." Yohana 6:57

Twaishi kwa sababu ya muungano wetu na Mwana wa Mungu. Kama Mpatanishi aliye Mungu-mtu, Bwana Yesu huishi kwa Baba aliye na uhai nafsini mwake aliyemtuma, na vivyo hivyo sisi twaishi kwa Mwokozi aliyetuhuisha. Yeye aliye chanzo cha uzima wetu ndiye pia kitegemezo chake. Kuishi hutegemezwa kwa kulishwa. Ni lazima tuutegemeze uzima wa kiroho kwa chakula cha kiroho, na chakula hicho cha kiroho ni Bwana Yesu. Si uzima wake, wala mauti yake, wala huduma zake, wala kazi yake, wala neno lake peke yake, bali yeye mwenyewe, kama ajumuishaye yote haya. Juu ya Yesu, mwenyewe, twajilisha.

Jambo hili twaonyeshwa katika Meza ya Bwana, lakini hufurahiwa kwetu kwa hakika tumfikiripo Bwana wetu, tumwaminipo kwa imani ijitwaliayo, tumtwaapo ndani yetu kwa upendo, na kumfanya kuwa sehemu yetu kwa nguvu ya uzima wa ndani. Twajua ni nini kujilisha kwa Yesu, lakini hatuwezi kukinena au kukiandika. Njia yetu iliyo na hekima zaidi ni kukitenda, na kukitenda zaidi na zaidi. Twasihiwa tule kwa wingi, nayo itakuwa faida yetu isiyo na kikomo kufanya hivyo Yesu awapo chakula chetu na kinywaji chetu.

Bwana, nakushukuru kwamba hiki, kilicho ulazima wa uzima wangu mpya, ni pia furaha yake iliyo kuu kuliko zote. Basi, nakula juu yako saa hii.

Oktoba 16

MMOJA NA KRISTO YESU

"Kwa sababu mimi ni hai, ninyi nao mtakuwa hai." Yohana 14:19

Yesu ameufanya uzima wa waaminio ndani yake kuwa wa hakika kama uzima wake mwenyewe. Kama Kichwa kilivyo hai viungo navyo vi hai. Kama Yesu hakufufuka kutoka kwa wafu, basi tumekufa katika dhambi zetu; lakini kwa kuwa amefufuka, waaminio wote wamefufuka ndani yake. Mauti yake yameziondoa dhuluma zetu, na kuzilegeza kamba zilizotushika chini ya hukumu ya mauti. Kufufuka kwake huthibitisha kuhesabiwa haki kwetu: tumeachiliwa, na rehema husema, "Bwana ameiondoa dhambi yako, hutakufa."

Yesu ameufanya uzima wa watu wake kuwa wa milele kama uzima wake mwenyewe. Wawezaje kufa maadamu yeye yu hai, wakiwa mmoja naye? Kwa sababu hafi tena, na mauti haina tena mamlaka juu yake, kadhalika wao hawatarudi tena makaburini mwa dhambi zao za kale, bali wataishi kwa Bwana katika upya wa uzima. Ee mwaminiye, hapo, chini ya majaribu makuu, uhofupo kwamba siku moja utaanguka kwa mkono wa adui, jambo hili na likutie moyo tena. Hutaupoteza kamwe uzima wako wa kiroho, kwa maana umefichwa pamoja na Kristo katika Mungu. Huitii shaka kutokufa kwa Bwana wako; kwa hiyo, usifikiri kwamba atakuacha ufe, kwa kuwa u mmoja naye. Hoja ya uzima wako ni uzima wake, nao huna budi kutokuwa na hofu juu yake; kwa hiyo pumzika katika Bwana wako aliye hai.

Oktoba 17

HOFU TAKATIFU

"Bali yeye aichaye amri atapata thawabu." Mithali 13:13

Kicho kitakatifu cha Neno la Mungu kimeshuka thamani sana. Watu hujidhania kuwa na hekima zaidi ya Neno la Bwana, na kukaa hukumuni juu yake. "Lakini mimi sikufanya hivyo, kwa sababu ya kumcha Mungu." Sisi twakikubali Kitabu kilichovuviwa kuwa hakikosei, nasi twadhihirisha heshima yetu kwa utii wetu. Hatuna hofu ya Neno, bali twana kicho cha kibinafsi cha mwana kwalo. Hatuogopi adhabu zake, kwa sababu twana hofu ya amri zake.

Hofu hii takatifu ya amri huzaa raha ya unyenyekevu, iliyo tamu zaidi kuliko upele wa kiburi. Huwa kwetu kiongozi katika miendo yetu; kizuizi tunaposhuka mlimani, na kichocheo tunapopanda. Tukilindwa na uovu na kuongozwa katika haki kwa kicho chetu cha amri, twapata dhamiri tulivu, iliyo kama chemchemi ya divai; hisia ya uhuru kutoka wajibu, iliyo kama uzima kutoka kwa wafu; na uhakika wa kumpendeza Mungu, ulio mbingu hapa duniani. Wasiomcha Mungu waweza kukejeli heshima yetu kubwa kwa Neno la Bwana; lakini je, hilo ni nini? Tuzo la mwito wetu wa juu ni faraja itoshayo kwetu. Thawabu za utii hutufanya tuudharau udhihaki wa mdhihaki.

Oktoba 18

MACHOZI, KISHA MAVUNO YA FURAHA

"Wapandao kwa machozi watavuna kwa kelele za furaha." Zaburi 126:5

Nyakati za kulia zafaa kwa kupanda: hatutaki ardhi ikauke sana. Mbegu iliyolowekwa katika machozi ya shauku ya bidii itaota mapema zaidi. Chumvi ya machozi ya maombi itaupa mbegu njema ladha itakayoulinda na funza: kweli inenwayo kwa bidii ya kutisha ina uhai maradufu ndani yake. Badala ya kukoma kupanda kwa sababu ya kulia kwetu, na tuongeze bidii yetu maradufu kwa kuwa majira ni mazuri hivyo.

Mbegu yetu ya mbinguni haingepandwa vema kwa kucheka. Huzuni kuu na shauku kwa ajili ya nafsi za wengine ni mwandamano ufaao zaidi wa mafundisho ya utauwa kuliko jambo lolote lifananalo na mzaha. Tumesikia habari za watu waliokwenda vitani kwa moyo mwepesi, lakini walishindwa; na ndivyo ilivyo kwa wengi wapandao kwa namna iyo hiyo.

Njoo, basi, moyo wangu, endelea kupanda katika kulia kwako, kwa maana una ahadi ya mavuno ya furaha. Utavuna. Wewe, mwenyewe, utaona matokeo fulani ya kazi yako. Haya yatakujia kwa kipimo kikubwa hata kukupa furaha, ambayo mavuno maskini, yaliyonyauka, na machache yasingekupa. Macho yako yanapofifia kwa machozi ya fedha, fikiri juu ya ngano ya dhahabu. Chukua kwa moyo wa furaha taabu na tamaa ya sasa; kwa maana siku ya mavuno itakulipa kikamilifu.

Oktoba 19

MARUDI YALIYOPIMWA

"Nitakurudi kwa kipimo." Yeremia 30:11

Kuachwa bila kurudiwa kungekuwa ishara ya kuangamiza: kungethibitisha kwamba Bwana amesema, "Ameungana na sanamu, mwache." Mungu na akatae jambo kama hilo lisiwe fungu letu kamwe! Ufanisi usiokatizwa ni kitu cha kusababisha hofu na kutetemeka. Wale wote awapendao Bwana kwa wororo huwakemea na kuwarudi: wale asiowathamini huwaacha wajinenepeshe bila hofu, kama ng'ombe kwa machinjo. Ni katika upendo Baba yetu wa mbinguni autumiapo ufito juu ya watoto wake.

Lakini tazama, marudi ni "kwa kipimo": hutupa upendo bila kipimo, bali adhabu "kwa kipimo." Kama chini ya sheria ya kale hakuna Mwisraeli aliyeweza kupokea zaidi ya "arobaini kasoro moja," jambo lililohakikisha kuhesabu kwa uangalifu na mateso yenye mpaka, ndivyo ilivyo kwa kila mtu aliyeadhibiwa katika nyumba ya imani -- kila pigo huhesabiwa. Ni kipimo cha hekima, kipimo cha huruma, kipimo cha upendo, ambavyo kwavyo adhabu yetu yadhibitiwa. Iwe mbali nasi kuasi juu ya maagizo yaliyo ya kimungu hivyo. Bwana, ikiwa wewe wasimama karibu kupima matone machungu ndani ya kikombe changu, yanipasa mimi kwa moyo wa furaha kukitwaa kikombe hicho kutoka mkononi mwako, na kunywa sawasawa na maagizo yako, nikisema "Mapenzi yako yatimizwe."

Oktoba 20

KUTOKA KILA DHAMBI

"Naye atawaokoa watu wake na dhambi zao." Mathayo 1:21

"Bwana, uniokoe na dhambi zangu. Kwa jina lako la Yesu natiwa moyo kuomba hivi. Uniokoe na dhambi zangu za zamani, ili mazoea yake yasinishike mateka. Uniokoe na dhambi zangu za asili, ili nisiwe mtumwa wa udhaifu wangu mwenyewe. Uniokoe na dhambi zilizo daima mbele ya macho yangu, ili nisipoteze chuki yangu juu yake. Uniokoe na dhambi za siri; dhambi nisizoziona kwa kukosa kwangu nuru. Uniokoe na dhambi za ghafula na za kunishtua: nisichukuliwe miguuni kwa mafuriko ya jaribu. Uniokoe, Bwana, na kila dhambi. Uovu wowote usiwe na mamlaka juu yangu."

Wewe peke yako waweza kufanya hili. Mimi siwezi kuzikata minyororo yangu mwenyewe au kuwaua adui zangu mwenyewe. Wajua jaribu, kwa maana ulijaribiwa. Wajua dhambi, kwa maana ulichukua uzito wake. Wajua jinsi ya kunisaidia katika saa yangu ya vita; waweza kuniokoa nisitende dhambi, na kuniokoa nikiisha kutenda dhambi. Imeahidiwa katika jina lako lenyewe kwamba utafanya hili, nami nakuomba unijalie leo kuuhakikisha unabii huo. Nisitawaliwe na hasira, au kiburi, au kukata tamaa, au namna yoyote ya uovu; bali wewe uniokoe kuingia katika utakatifu wa maisha, ili jina lako la Yesu litukuzwe ndani yangu kwa wingi.

Oktoba 21

JEDWALI LA MUNGU LA KUZIDISHA

"Mdogo atakuwa elfu, na mnyonge atakuwa taifa hodari; mimi, Bwana, nitalihimiza jambo hili kwa wakati wake." Isaya 60:22

Kazi za Bwana mara nyingi huanza kwa kiwango kidogo, wala si mbaya kwa jambo hili. Udhaifu hufundisha imani, huleta Mungu karibu, na hushinda utukufu kwa jina lake. Zithamini ahadi za kuongezeka! Mbegu ya haradali ndiyo ndogo kuliko mbegu zote, lakini huwa mti-mmea, wenye matawi ambayo ndege wa angani hutua ndani yake. Twaweza kuanza na mmoja, na huyo "aliye mdogo," lakini bado atakuwa "elfu." Bwana ni hodari kwenye jedwali la kuzidisha. Mara ngapi alimwambia mtumishi wake aliye peke yake, "Nitakuzidisha!" Mtumaini Bwana, enyi walio mmoja mmoja na wawili wawili; kwa maana atakuwa kati yenu mkikusanyika kwa jina lake.

"Aliye mdogo." Ni nini kiwezacho kuwa cha kudharauliwa zaidi machoni pa wale wahesabuo vichwa na kupima nguvu! Lakini huyu ndiye kiini cha taifa kuu. Nyota moja tu ndiyo huanza kung'aa jioni, lakini punde anga hujaa taa zisizohesabika.

Wala hatuna haja ya kudhani kwamba tumaini la kuongezeka liko mbali, kwa maana ahadi ni, "Mimi, Yehova, nitalihimiza jambo hili kwa wakati wake." Hakutakuwa na haraka ya kabla ya wakati, kama ile tuionayo katika mikutano yenye mchafuko; itakuwa yote kwa wakati wake; lakini hata hivyo hakutakuwa na kuchelewa. Bwana ahimizapo, mwendo wake wa kasi ni wa utukufu.

Oktoba 22

OMBEA KWA AHADI YAKE MWENYEWE

"Wewe, Ee Bwana MUNGU, umenena hivyo; na kwa baraka yako nyumba ya mtumishi wako ibarikiwe milele." 2 Samweli 7:29

Hii ni ahadi iliyoombewa, na hivyo hutupa mafundisho maradufu. Lolote alilolinena Bwana MUNGU yatupasa kulipokea kuwa hakika ni kweli, kisha kuliombea kwenye kiti cha enzi.

Ee, tamu iliyoje kunukuu yale ambayo Mungu wetu mwenyewe amenena! Ni ya thamani jinsi gani kutumia "kwa hiyo" ambalo ahadi hupendekeza, kama Daudi afanyavyo katika mstari huu!

Hatuombi kwa sababu twaona shaka, bali kwa sababu twaamini. Kuomba bila kuamini hakumpasi mtoto wa Bwana. La, Bwana, hatuwezi kukutia shaka: tumesadiki kwamba kila neno lako ni msingi wa hakika kwa matarajio yaliyo na ujasiri zaidi. Twakujia na kusema, "Fanya kama ulivyonena." Ibariki nyumba ya mtumishi wako. Uwaponye wagonjwa wetu; uwaokoe wanaosita; uwarudishe wanaotanga-tanga; uwathibitishe wanaoishi katika hofu yako. Bwana, utupe chakula na mavazi sawasawa na neno lako. Uzifanikishe shughuli zetu; hasa uzibariki jitihada zetu za kulijulisha injili yako mtaani mwetu. Uwafanye watumishi wetu kuwa watumishi wako, watoto wetu kuwa watoto wako. Baraka na itiririke hata vizazi vijavyo, na maadamu yeyote wa jamaa yetu abaki duniani na wabaki waaminifu kwako. Ee Bwana MUNGU "nyumba ya mtumishi wako ibarikiwe."

Oktoba 23

MAVUNO YA NURU NA FURAHA

"Nuru imepandwa kwa ajili ya wenye haki, na furaha kwa walio wanyofu wa moyo." Zaburi 97:11

Haki mara nyingi hugharimu kwa mtu aishikaye kwa hatari zote, lakini mwishowe italipa gharama zake zenyewe, na kurudisha faida isiyo na mwisho. Maisha matakatifu ni kama kupanda mbegu: mengi yanatoka, na kwa kuonekana yamezikwa udongoni, yasije yakakusanywa tena. Twakosea tunapotazamia mavuno ya mara moja; lakini kosa hilo ni la kawaida sana, kwa maana yaonekana lisilowezekana kuizika nuru. Lakini nuru "imepandwa," lasema andiko. Yalala kwa siri: hakuna aiwezaye kuiona, imepandwa. Tuna hakika kabisa kwamba haina budi siku moja kujidhihirisha.

Tuna hakika kamili kwamba Bwana amewekea mavuno wale wapandao nuru, nao watayavuna, kila mtu kwa nafsi yake. Ndipo itakapokuja furaha yao. Miganda ya furaha kwa mbegu za nuru. Moyo wao ulikuwa mnyofu mbele za Bwana, ingawa watu hawakuwapa sifa kwa hilo, bali hata waliwalaumu: walikuwa wenye haki, ingawa wale walio karibu nao waliwashutumu kama wachambuzi. Iliwapasa kungoja, kama wakulima wangojavyo matunda ya thamani ya nchi: lakini nuru ilipandwa kwa ajili yao, na furaha ilikuwa ikiandaliwa kwa ajili yao na Bwana wa mavuno.

Jipeni moyo, ndugu zangu! Hatuna haja ya kufanya haraka. Na tumiliki nafsi zetu kwa saburi, kwa maana punde nafsi zetu zitamiliki nuru na furaha.

Oktoba 24

UTHABITI WA KIMUNGU

"Nami nitakufanya kuwa kwa watu hawa ukuta wa shaba wenye ngome; nao watapigana nawe, lakini hawatakushinda; kwa maana mimi ni pamoja nawe kukuokoa na kukuponya, asema Bwana." Yeremia 15:20

Uthabiti katika hofu na imani ya Mungu utamfanya mtu kuwa kama ukuta wa shaba, ambao hakuna awezaye kuubomoa au kuuvunja. Bwana peke yake aweza kuwafanya hivyo; lakini twahitaji watu kama hao kanisani, na ulimwenguni, lakini hasa kwenye mimbari.

Dhidi ya watu wa kweli wasiokubali maridhiano zama hizi za unafiki zitapigana kwa meno na kucha. Hakuna kionekanacho kumchukiza Shetani na mbegu yake kama uthabiti. Hushambulia uimara mtakatifu kama vile Waashuri walivyozizingira miji yenye ngome. Furaha ni kwamba hawawezi kuwashinda wale ambao Mungu amewafanya wenye nguvu katika nguvu zake. Wakichukuliwa huku na huku kwa kila upepo wa fundisho, wengine wahitaji tu kupeperushwa, nao huondoka; bali wale waipendao mafundisho ya neema, kwa sababu wanayo neema ya mafundisho, husimama kama miamba katikati ya bahari zenye ghasia.

Uthabiti huu watoka wapi? "Mimi ni pamoja nawe, asema Bwana": hilo ndilo jibu la kweli. Yehova ataziokoa na kuziponya nafsi zilizo aminifu na mashambulizi yote ya adui. Majeshi yako kinyume chetu, lakini Bwana wa majeshi yu pamoja nasi. Hatuthubutu kuondoka hata inchi moja; kwa maana Bwana mwenyewe hutushika mahali petu, na hapo tutakaa milele.

Oktoba 25

MUNGU KWANZA, KISHA NYONGEZA

"Bali utafuteni kwanza ufalme wa Mungu na haki yake, na hayo yote mtazidishiwa." Mathayo 6:33

Tazama jinsi Biblia ianzavyo: "Hapo mwanzo Mungu." Maisha yako na yaanze vivyo hivyo. Tafuta kwa nafsi yako yote, kwanza na zaidi ya yote, ufalme wa Mungu, kama mahali pa uraia wako, na haki yake kama tabia ya maisha yako. Kwa habari ya yaliyosalia, yatakuja kutoka kwa Bwana mwenyewe bila wewe kuwa na wasiwasi juu yake. Yote yanayohitajika kwa maisha haya na utauwa "mtazidishiwa."

Ahadi iliyoje hii! Chakula, mavazi, makazi, na kadhalika, Mungu hujitwika kukuongezea wewe wakati umtafutapo. Wewe uangalie shughuli zake, naye ataangalia zako. Kama wataka karatasi na uzi, wapewa vitu hivyo bure ununuapo bidhaa zilizo za maana zaidi; na vivyo hivyo yote tuyahitajiyo ya vitu vya duniani tutayapata yakitupwa ndani pamoja na ufalme. Yeye aliye mrithi wa wokovu hatakufa kwa njaa; naye avikaye nafsi yake haki ya Mungu hawezi kuachwa na Bwana na mwili ulio uchi. Iondoe mbali fadhaa ipatayo. Weka akili yako yote juu ya kumtafuta Bwana. Kutamani ni umaskini, na wasiwasi ni taabu: kumtumaini Mungu ni mali, na kufanana na Mungu ni urithi wa mbinguni. Bwana, nakutafuta, unipate.

Oktoba 26

KWA AJILI YETU

"Kwa ajili ya wateule zitafupizwa siku zile." Mathayo 24:22

Kwa ajili ya wateule wake Bwana huzuia hukumu nyingi, na kuzifupiza nyingine. Katika dhiki kuu moto ungeteketeza vyote isipokuwa, kwa kuwaangalia wateule wake, Bwana huupoza mwali. Hivyo, wakati awaokoapo wateule wake kwa ajili ya Yesu, pia huhifadhi jamii ya wanadamu kwa ajili ya wateule wake.

Heshima iliyoje hivyo huwekwa juu ya watakatifu! Yawapasa kwa bidii gani kutumia uvutano wao kwa Bwana wao! Atayasikia maombi yao kwa ajili ya wenye dhambi, na kuzibariki jitihada zao kwa wokovu wao. Huwabariki waaminio ili wapate kuwa baraka kwa walio katika kutoamini. Mwenye dhambi mwingi huishi kwa sababu ya maombi ya mama, au mke, au binti, ambaye Bwana humwangalia.

Je, tumeutumia vema uwezo wa pekee ambao Bwana ametukabidhi? Je, twaiombea nchi yetu, na nchi nyingine, na kizazi hiki? Je, katika nyakati za vita, njaa, na tauni, twasimama kama waombezi, tukiomba kwamba siku zifupizwe? Je, twaomboleza mbele za Mungu milipuko ya kutokuamini, upotovu, na uasherati? Je, twamsihi Bwana wetu Yesu aufupishe utawala wa dhambi kwa kuuhimiza ujio wake mwenyewe wa utukufu? Na tupige magoti, wala tusipumzike kamwe hata Kristo atokee.

Oktoba 27

UTUMISHI WAKE, USO WAKE, JINA LAKE

"Watumwa wake watamtumikia; nao watauona uso wake, na jina lake litakuwa katika vipaji vya nyuso zao." Ufunuo 22:3, 4

Baraka tatu teule zitakuwa zetu katika nchi ya utukufu.

"Watumwa wake watamtumikia." Hakuna mabwana wengine watakaotuonea, hakuna utumishi mwingine utakaotutaabisha. Tutamtumikia Yesu daima, kwa ukamilifu, bila kuchoka, na bila kukosa. Hii ni mbingu kwa mtakatifu: katika mambo yote kumtumikia Bwana Kristo, na kukubaliwa naye kuwa mtumishi wake ni tamaa kuu ya nafsi yetu kwa milele.

"Nao watauona uso wake." Hili hufanya utumishi kuwa wa furaha: naam, ndilo tuzo la sasa la utumishi. Tutamjua Bwana wetu, kwa maana tutamwona kama alivyo. Kuuona uso wa Yesu ni fadhili iliyo kuu kuliko zote ambayo mtumishi aliye mwaminifu kuliko wote wa Bwana aweza kuiomba. Musa angeliomba nini zaidi ya -- "Nionyeshe uso wako"?

"Na jina lake litakuwa katika vipaji vya nyuso zao." Wao humtazama Bwana wao hata jina lake lichapishwe katika vipaji vyao. Wanakubaliwa naye, nao wanamkiri. Alama ya siri ya neema ya ndani hukua kuwa ishara ya hadhara ya uhusiano uliokiriwa.

Ee Bwana, utupe vitu hivi vitatu katika mianzo yake hapa, ili tupate kuvimiliki katika ukamilifu wake katika makao yako mwenyewe ya heri!

Oktoba 28

DHAMBI ZA KUTOKUJUA

"Nao watasamehewa; kwa kuwa ni kwa kutokujua." Hesabu 15:25

Kwa sababu ya kutokujua kwetu hatujui kikamilifu dhambi zetu za kutokujua. Lakini twaweza kuwa na hakika ni nyingi, kwa namna ya kutenda na kuacha kutenda. Twaweza kuwa tunafanya kwa unyofu wote, kama utumishi kwa Mungu, jambo ambalo hakuamuru kamwe, wala hawezi kulikubali kamwe.

Bwana huzijua dhambi hizi za kutokujua kila moja. Hili laweza kutuogofya, kwa maana kwa haki atazidai makosa haya mkononi mwetu; lakini kwa upande mwingine, imani huona faraja katika jambo hili, kwa maana Bwana ataangalia kwamba madoa tusiyoyaona yatoshwe. Huiona dhambi ili apate kuacha kuiona kwa kuitupa nyuma yake.

Faraja yetu kuu ni kwamba Yesu, kuhani wa kweli, amefanya upatanisho kwa ajili ya mkutano wote wa wana wa Israeli. Upatanisho huo huhakikisha msamaha wa dhambi zisizojulikana. Damu yake ya thamani hututakasa na dhambi yote. Kwamba macho yetu yameiona na kuililia, au sivyo, Mungu ameiona, Kristo ameifanyia upatanisho, Roho hushuhudia msamaha wake, na hivyo twana amani ya sehemu tatu.

Ee Baba yangu, naisifu maarifa yako ya kimungu, ambayo si tu huyaona maovu yangu, bali huandaa upatanisho unaoniokoa na hatia yake, hata kabla sijajua kwamba nina hatia.

Oktoba 29

DUMISHA TOFAUTI

"Nami nitaweka tofauti kati ya watu wangu na watu wako; kesho itakuwa ishara hii." Kutoka 8:23

Farao anao watu, na Bwana anao watu. Hawa waweza kukaa pamoja, na kuonekana kupata sawasawa, lakini kuna tofauti kati yao, na Bwana ataidhihirisha. Si milele tukio moja litakalowapata wote sawasawa, bali kutakuwa na tofauti kubwa kati ya watu wa ulimwengu na watu wa uchaguzi wa Yehova.

Hili laweza kutokea wakati wa hukumu, Bwana anapokuwa patakatifu pa watakatifu wake. Ni dhahiri sana katika kuongoka kwa waaminio dhambi yao inapoondolewa, hali wasioamini wabaki chini ya hukumu. Tangu wakati huo wao huwa jamii ya pekee, huja chini ya nidhamu mpya, na kufurahia baraka mpya. Nyumba zao, tangu hapo, ziko huru na makundi ya mabaya yanayowatia unajisi na kuwatesa Wamisri. Wanalindwa na uchafu wa tamaa, kuumwa na fadhaa, uharibifu wa uongo, na mateso makali ya chuki, yanayoziangamiza jamaa nyingi.

Uwe na hakika, mwaminiye uliyejaribiwa, ya kwamba ingawa una taabu zako umeokolewa na makundi ya taabu zilizo mbaya zaidi, ambazo hushambulia nyumba na mioyo ya watumishi wa Mkuu wa ulimwengu. Bwana ameweka tofauti; angalia kwamba udumishe tofauti hiyo katika roho, lengo, tabia, na ushirika.

Oktoba 30

UTAKASO KAMILI

"Nami nitawanyunyizia maji safi, nanyi mtakuwa safi; nitawatakaseni na uchafu wenu wote, na vinyago vyenu vyote." Ezekieli 36:25

Furaha iliyoje kuu hii! Yeye aliyetutakasa kwa damu ya Yesu atatutakasa pia kwa maji ya Roho Mtakatifu. Mungu amelinena, na hivyo haina budi kuwa, "Mtakuwa safi." Bwana, twahisi na kuomboleza uchafu wetu, nayo ni ya kufariji kuhakikishiwa kwa kinywa chako mwenyewe kwamba tutakuwa safi. Ee, laiti ungeifanya kazi hii kwa haraka!

Atatuokoa na dhambi zetu zilizo mbaya kuliko zote. Kuinuka kwa kutoamini, na tamaa zidanganyazo zipiganazo na nafsi, mawazo maovu ya kiburi, na mashawishi ya Shetani ya kulikufuru jina takatifu -- yote haya yatatakaswa kabisa hata yasirudi kamwe.

Pia atatutakasa na sanamu zetu zote, ziwe za dhahabu au za udongo: mapenzi yetu machafu, na upendo wetu uliozidi wa kile ambacho chenyewe ni safi. Kile tulichokifanya sanamu ama kitavunjwa kutoka kwetu, au sisi tutavunjwa kutoka kwake.

Ni Mungu asemaye juu ya atakayoyafanya yeye mwenyewe. Kwa hiyo neno hili limethibitika na ni hakika, nasi twaweza kwa ujasiri kutazamia kile linalotuhakikishia. Utakaso ni baraka ya agano, na agano limeagizwa katika mambo yote na ni hakika.

Oktoba 31

SIWEZI KUFA HATA KAZI IMEKWISHA

"Sitakufa bali nitaishi, nami nitayasimulia matendo ya Bwana." Zaburi 118:17

Uhakika mzuri huu! Bila shaka ulikuwa na msingi juu ya ahadi, iliyonong'onezwa moyoni mwa mtunga Zaburi, ambayo aliishika na kuifurahia. Je, hali yangu ni kama ile ya Daudi? Je, nimeshuka moyo kwa sababu adui ananitukana? Je, wako wengi kinyume changu, na wachache upande wangu? Je, kutokuamini kwaniambia nijilaze chini na kufa katika kukata tamaa -- mtu aliyeshindwa, aliyevunjiwa heshima? Je, adui zangu waanza kunichimbia kaburi?

Ni nini basi? Je, nikubali mnong'ono wa hofu, na kuiacha vita, na pamoja nayo kuachana na tumaini lote? La hasha. Ungali uzima ndani yangu: "Sitakufa." Nguvu itarudi na kuuondoa udhaifu wangu: "Nitaishi." Bwana yu hai, nami nitaishi pia. Kinywa changu kitafunguliwa tena: "Nitayasimulia matendo ya Yehova." Naam, nami nitanena juu ya taabu hii ya sasa kama kielelezo kingine cha uaminifu na upendo wa Bwana, Mungu wangu, ufanyao maajabu. Wale ambao kwa furaha wangenipimia jeneza wangoje kidogo; kwa maana "Bwana ameniadhibu sana, lakini hakuniacha nife." Utukufu na uwe kwa jina lake milele! Siwezi kufa hata kazi yangu imekwisha. Hata Bwana atakapopenda hakuna kaburi litakalonifunika.