Mwezi wa Desemba

Desemba 1

MWENENDO WA KWELI WA KUTEMBEA

"Aendaye kwa unyofu huenda salama" Mithali 10:9

Mwenendo wake waweza kuwa wa taratibu, lakini ni salama. Yeye afanyaye haraka kupata utajiri hatakuwa asiye na hatia wala salama; bali kudumu kwa uthabiti katika unyofu, hata kama hakuleti utajiri, hakika kutaleta amani. Katika kutenda yaliyo haki na sawa tu kama mtu atembeaye juu ya mwamba, kwa maana tuna hakika kwamba kila hatua tuchukuayo ni juu ya ardhi imara na salama. Kwa upande mwingine, mafanikio makubwa kabisa yapatikanayo kwa miamala ya mashaka lazima siku zote yawe matupu na ya hila, na mtu aliyeyapata lazima daima aogope kwamba siku ya kutolewa hesabu itakuja, na ndipo faida zake zitamhukumu.

Na tushikamane na kweli na haki. Kwa neema ya Mungu na tumwige Bwana na Bwana wetu, ambaye kinywani mwake haikuonekana hila yo yote. Tusiogope kuwa maskini, wala kutendewa kwa dharau. Kamwe, kwa sababu yo yote ile, tusifanye lile ambalo dhamiri yetu haiwezi kulihesabia haki. Tukipoteza amani ya ndani, twapoteza zaidi ya kile mali kiwezacho kununua. Tukikaa katika njia ya Bwana mwenyewe, wala tusiitende dhambi dhidi ya dhamiri yetu, njia yetu ni salama dhidi ya wote wajao. Ni nani awezaye kutudhuru kama tukiwa wafuasi wa lile lililo jema? Twaweza kudhaniwa wapumbavu na wapumbavu ikiwa tu imara katika unyofu wetu; lakini mahali pale ambapo hukumu haikosei tutakubaliwa.

Desemba 2

KIELELEZO CHETU KITAKATIFU KULIKO VYOTE

"Nimemweka Bwana mbele yangu daima; kwa kuwa yuko kuume kwangu, sitaondoshwa" Zaburi 16:8

Hii ndiyo njia ya kuishi. Tukiwa na Mungu mbele yetu daima, tutakuwa na uandamani ulio bora kuliko yote, kielelezo kitakatifu kuliko vyote, faraja tamu kuliko zote, na uvutano wenye nguvu kuliko wote. Hili lazima liwe tendo la nia lililoazimiwa. "Nimemweka," nalo lazima lidumishwe kama jambo lililowekwa na kukaziwa. Kuwa na jicho daima kwa jicho la Bwana, na sikio kwa sauti ya Bwana -- hii ndiyo hali iliyo sawa kwa mtu mtauwa. Mungu wake yu karibu naye, akiijaza upeo wa macho yake, akiongoza njia ya maisha yake, na kutoa kiini cha kutafakari kwake. Ni ubatili gani tungeepuka, ni dhambi gani tungezishinda, ni fadhila gani tungezionyesha, ni furaha gani tungezionja kama kweli tungemweka Bwana mbele yetu daima! Kwa nini basi tusifanye?

Hii ndiyo njia ya kuwa salama. Bwana akiwa daima akilini mwetu, twaanza kuhisi usalama na hakika kwa sababu ya kuwa kwake karibu hivyo. Yu kuume kwetu ili kutuongoza na kutusaidia; na kwa hiyo hatuondoshwi na hofu, wala nguvu, wala hila, wala kigeugeu. Mungu asimamapo kuume kwa mtu, mtu huyo mwenyewe ni hakika atasimama. Njoni basi, enyi adui wa kweli! Nirukieni kama tufani kali, kama mpendavyo. Mungu ananitegemeza. Mungu anakaa nami. Nimwogope nani?

Desemba 3

AMANI HATA KATIKA HATARI YO YOTE

"Nami nitafanya nao agano la amani, nami nitawakomesha wanyama wabaya katika nchi; nao watakaa salama jangwani, na kulala misituni" Ezekieli 34:25

Ni kilele cha neema kwamba Yehova awe katika agano na mwanadamu, kiumbe dhaifu, mwenye dhambi na kifacho. Lakini Bwana ameingia kwa dhati katika mapatano ya uaminifu nasi, na kutoka katika agano hilo hatageuka kamwe. Kwa sababu ya agano hili tu salama. Kama simba na mbwa-mwitu wafukuzwavyo na wachungaji, ndivyo uvutano wote wenye madhara utakavyofukuzwa mbali. Bwana atatupa raha kutokana na wasumbuao na waharibuo; wanyama wabaya watakomeshwa katika nchi. Ee Bwana, itimize ahadi yako hii hata sasa!

Watu wa Bwana wapaswa kufurahia usalama katika mahali penye hatari kuu zaidi: majangwa na misitu itakuwa kama malisho na mazizi kwa kundi la Kristo. Kama Bwana hataibadili hali ya mahali kuwa bora, atatufanya sisi kuwa bora zaidi mahali pale. Jangwa si mahali pa kukaa, lakini Bwana aweza kupafanya hivyo; msituni mtu ahisi analazimika kukesha badala ya kulala, na hata hivyo Bwana humpa mpendwa wake usingizi hata huko. Hakuna kitu cha nje wala cha ndani kipaswacho kumtia hofu mtoto wa Mungu. Kwa imani jangwa laweza kuwa vitongoji vya Mbinguni, na misitu ukumbi wa utukufu.

Desemba 4

KUFUNIKWA NA KULINDWA

"Atakufunika kwa manyoya yake, na chini ya mbawa zake utatumaini; kweli yake ni ngao yako na kigao" Zaburi 91:4

Mfano wa kujishusha kweli kweli! Kama vile kuku alindavyo vifaranga vyake na kuwaacha wajibanze chini ya mbawa zake, ndivyo Bwana atakavyowalinda watu wake, na kuwaruhusu wajifiche ndani yake. Je, hatujawaona vifaranga vidogo vikichungulia toka chini ya manyoya ya mama? Je, hatujasikia kilio chao kidogo cha furaha ya kuridhika? Kwa njia hii na tujikinge ndani ya Mungu wetu, na kuhisi amani ifurikayo kwa kujua kwamba yeye anatulinda.

Bwana anapotufunika sisi twatumaini. Ingekuwa jambo la ajabu kama tusingetumaini. Twawezaje kutokuamini wakati Yehova mwenyewe anakuwa nyumba na makao, kimbilio na raha kwetu?

Hili likiisha kufanyika, twatoka kwenda vitani kwa jina lake na kufurahia uangalizi ule ule wa ulinzi. Twahitaji ngao na kigao, na tunapomtumaini Mungu kabisa, kama vile kifaranga kimtumainivyo kuku, twaikuta kweli yake ikituvika silaha toka kichwani hata miguuni. Bwana hawezi kusema uongo; lazima awe mwaminifu kwa watu wake; ahadi yake lazima isimame. Kweli hii ya hakika ndiyo ngao yote tuihitajiyo. Nyuma yake twayakaidi mishale yenye moto ya adui.

Njoo, nafsi yangu, jifiche chini ya mbawa hizo kuu, jipoteze katikati ya manyoya hayo mororo! Jinsi ulivyo na furaha!

Desemba 5

MAHALI PA JUU PA ULINZI

"Yeye atakaa mahali pa juu; mahali pake pa ulinzi patakuwa ngome za majabali; atapewa chakula chake, maji yake ni ya hakika" Isaya 33:16

Mtu ambaye Mungu amempa neema ya kuwa na maisha yasiyo na lawama akaa katika usalama ulio kamili.

Akaa mahali pa juu, juu ya ulimwengu, mbali na risasi za adui, na karibu na Mbingu. Ana makusudi na nia zilizo juu, naye apata faraja na uandamani ulio juu. Afurahi katika milima ya upendo wa milele, ambamo ana makao yake.

Analindwa na ngome za jabali kubwa la kushangaza. Vitu vilivyo imara kuliko vyote katika ulimwengu ni ahadi na makusudi ya Mungu asiyebadilika, na hivi ndivyo ulinzi wa mwamini mtii.

Anaandaliwa mahitaji yake kwa ahadi hii kuu, "Atapewa chakula chake." Kama vile adui asivyoweza kuupanda ngome, wala kuubomoa boma, ndivyo ngome hiyo isivyoweza kutekwa kwa kuzingirwa na njaa. Bwana, aliyenyesha mana jangwani, atawahifadhi watu wake katika akiba njema hata wanapozungukwa na wale watakao kuwafisha njaa.

Lakini itakuwaje kama maji yatapungukiwa? Hilo haliwezekani, "maji yake ni ya hakika." Kuna kisima kisichokauka kamwe ndani ya ngome isiyoweza kushindwa. Bwana huona kwamba hakuna kitu kinachopungua. Hakuna awezaye kumgusa raia wa Sayuni ya kweli. Hata adui awe mkali kiasi gani, Bwana atamhifadhi mteule wake.

Desemba 6

"KUPITIA" BILA KUGHARIKISHWA

"Upitapo katika maji, nitakuwa pamoja nawe; na katika mito, haitakugharikisha; utembeapo katika moto, hutateketea; wala mwali wa moto hautakuwaka juu yako" Isaya 43:2

Daraja hakuna: lazima tupite katika maji, na kuhisi kasi ya mito. Uwepo wa Mungu katika gharika ni bora kuliko chombo cha kuvukia. Ni lazima tujaribiwe, lakini tutakuwa washindi; kwa maana Yehova mwenyewe, aliye na nguvu kuliko maji mengi, atakuwa pamoja nasi. Wakati mwingine wo wote awezapo kuwa mbali na watu wake, Bwana kwa hakika atakuwa pamoja nao katika magumu na hatari. Huzuni za maisha zaweza kupanda hata kimo cha ajabu, lakini Bwana anatosha kwa kila tukio.

Adui za Mungu waweza kuweka njiani mwetu hatari za kutengeneza kwao wenyewe, yaani, mateso na dhihaka za kikatili, ambazo ni kama tanuru la moto uwakao. Ni nini basi? Tutatembea kati ya moto. Mungu akiwa pamoja nasi, hatutateketea; la, hata harufu ya moto haitabaki juu yetu.

Ee, usalama wa ajabu wa msafiri aliyezaliwa mbinguni na aelekeaye mbinguni! Mafuriko hayawezi kumzamisha, wala mioto kumteketeza. Uwepo wako, Ee Bwana, ndio ulinzi wa watakatifu wako dhidi ya hatari mbalimbali za safarini. Tazama, kwa imani najikabidhi kwako, na roho yangu yaingia rahani.

Desemba 7

KIPAWA CHA NGUVU; AMANI YA KUBARIKI

"Bwana atawapa watu wake nguvu; Bwana atawabariki watu wake kwa amani" Zaburi 29:11

Daudi alikuwa ndipo tu ameisikia sauti ya Bwana katika dhoruba ya radi, naye alikuwa ameiona nguvu yake katika tufani ambayo njia yake alikuwa ameieleza; na sasa, katika utulivu wa baridi baada ya dhoruba, nguvu ile ya kulemea ambayo kwayo Mbingu na nchi hutikiswa yaahidiwa kuwa nguvu ya wateule. Yeye atiaye mabawa mshale usiokosa atawapa waliokombolewa mabawa ya tai; yeye atikisaye nchi kwa sauti yake atawatia hofu adui za watakatifu wake, na kuwapa watoto wake amani. Kwa nini tu dhaifu wakati tuna nguvu ya kimungu ya kuikimbilia? Kwa nini twafadhaika wakati amani ya Bwana mwenyewe ni yetu? Yesu, Mungu mwenye nguvu, ni nguvu yetu; na tumvae na kutoka kwenda katika utumishi wetu. Yesu, Bwana wetu mbarikiwa, pia ni amani yetu; na tupumzike ndani yake leo, na kuzikomesha hofu zetu. Baraka iliyoje kumpata yeye kuwa nguvu yetu na amani yetu sasa na hata milele!

Mungu yeye yule apandaye juu ya dhoruba katika siku za tufani atazitawala pia tufani za dhiki yetu, na kutuletea, kabla ya muda mrefu, siku za amani. Tutakuwa na nguvu kwa dhoruba, na nyimbo kwa hali njema ya hewa. Na tuanze mara moja kumwimbia Mungu nguvu yetu na amani yetu. Ondokeni, mawazo ya giza! Inukeni, imani na tumaini!

Desemba 8

KUFUATA HUELEKEA HESHIMA

"Mtu akinitumikia, na anifuate; nami nilipo, hapo ndipo atakapokuwapo na mtumishi wangu; mtu akinitumikia, Baba yangu atamheshimu" Yohana 12:26

Utumishi ulio juu kuliko wote ni kuiga. Kama ningetaka kuwa mtumishi wa Kristo lazima niwe mfuasi wake. Kutenda kama Yesu alivyotenda ndiyo njia ya hakika kabisa ya kuleta heshima kwa jina lake. Na niliangalie hili kila siku.

Kama nikimwiga Yesu nitakuwa na uandamani wake: kama nikiwa kama yeye nitakuwa pamoja naye. Kwa wakati wake atanichukua juu ili nikae pamoja naye huko juu, ikiwa, wakati huohuo, nimejitahidi kumfuata hapa chini. Baada ya mateso yake Bwana wetu alifika katika kiti chake cha enzi, na vivyo hivyo, baada ya sisi kuteseka kitambo pamoja naye hapa chini, sisi nasi tutafika katika utukufu. Mwisho wa maisha ya Bwana wetu utakuwa mwisho wa yetu: kama tuko pamoja naye katika kudhiliwa kwake tutakuwa pamoja naye katika utukufu wake. Njoo, nafsi yangu, jipe moyo, na uweke miguu yako katika nyayo zilizotiwa alama ya damu ambazo Bwana wako amekuachia.

Nisikose kuliangalia kwamba Baba atawaheshimu wale wamfuatao Mwanawe. Akiniona ni mwaminifu kwa Yesu ataweka juu yangu alama za upendeleo na heshima kwa ajili ya Mwanawe. Hakuna heshima iwezayo kuwa kama hii. Wakuu na wafalme hutoa vivuli tu vya heshima; kiini cha utukufu chatoka kwa Baba. Kwa hiyo, nafsi yangu, mshikamane Bwana wako Yesu kwa ukaribu zaidi kuliko wakati wo wote.

Desemba 9

LILE "YOTE" LA KUAMINI

"Yesu akamwambia, Ukiweza kuamini, yote yawezekana kwake aaminiye" Marko 9:23

Kutokuamini kwetu ndio kizuizi kikubwa kuliko vyote njiani mwetu; kwa kweli, hakuna ugumu mwingine wa kweli kuhusu maendeleo na ufanisi wetu wa kiroho. Bwana aweza kufanya kila kitu; lakini afanyapo sheria kwamba kwa kadiri ya imani yetu ndivyo itakavyokuwa kwetu, kutokuamini kwetu hufunga mikono ya Uweza wake wote.

Naam, muungano wa uovu utatawanywa ikiwa tu twaweza kuamini. Kweli iliyodharauliwa itainua kichwa chake ikiwa tu tutakuwa na tumaini katika Mungu wa kweli. Twaweza kubeba mzigo wetu wa taabu, au kupita bila kujeruhiwa katika mawimbi ya dhiki, ikiwa twaweza kujifunga viuno vyetu kwa mkanda wa amani, mkanda ule ufungwao na mikono ya kutumaini.

Ni nini tusichoweza kuamini? Je, kila kitu chawezekana isipokuwa kumwamini Mungu? Lakini yeye ni wa kweli siku zote; kwa nini hatumwamini? Yeye ni mwaminifu kwa neno lake siku zote; kwa nini hatuwezi kumtumaini? Tunapokuwa katika hali njema ya moyo imani haigharimu juhudi: ndipo ni jambo la kawaida kwetu kumtegemea Mungu kama vile mtoto amtumainivyo babaye.

Baya kuliko yote ni kwamba twaweza kumwamini Mungu katika kila jambo isipokuwa jaribu lililopo linalotukaba sasa. Huu ni upumbavu. Njoo, nafsi yangu, kung'uta dhambi kama hiyo, na umtumaini Mungu wako kwa mzigo, kwa kazi, kwa shauku ya sasa hivi. Hili likiisha kufanyika, yote yamekwisha fanyika.

Desemba 10

MUNGU NI MSHIRIKA WETU

"Lakini kama utaisikia sauti yake kweli kweli, na kuyafanya yote niyanenayo, ndipo nitakuwa adui wa adui zako, na mtesi wa wale wakutesao" Kutoka 23:22

Bwana Kristo katikati ya watu wake apaswa kukiriwa na kutiiwa. Yeye ni naibu wa Mungu, naye anena kwa jina la Baba, nayo ni juu yetu kufanya bila shaka na mara moja kama aamuruavyo. Tutaipoteza ahadi kama tutaipuuza amri.

Kwa utii kamili baraka iliyoje kubwa! Bwana huingia katika muungano na watu wake, wa kushambulia na wa kujilinda. Atawabariki wale watubarikio, na kuwalaani wale watulaanio. Mungu atakwenda kwa moyo na roho pamoja na watu wake, na kuingia katika huruma iliyo ndani zaidi kwa hali yao. Ulinzi ulioje huu atupao! Hatuna haja ya kujishughulisha kwa ajili ya watesi wetu, tunapohakikishiwa kwamba wamekuwa watesi wa Mungu. Kama Yehova ameutwaa ugomvi wetu twaweza kuwaacha maadui mikononi mwake.

Kwa kadiri ya faida yetu wenyewe hatuna adui; lakini kwa ajili ya kweli na haki twatwaa silaha na kutoka kwenda vitani. Katika vita hivi vitakatifu tumeungana na Mungu wa milele, na kama tukiitii kwa uangalifu sheria ya Bwana wetu Yesu, amejifunga kuitoa nguvu yake yote kwa niaba yetu. Kwa hiyo hatumwogopi mwanadamu ye yote.

Desemba 11

TUMAINI NA UTENDE; TENDA NA UTUMAINI

"Mtumaini Bwana, ukatende mema; ndivyo utakavyokaa katika nchi, na hakika utalishwa" Zaburi 37:3

Tumaini na tenda ni maneno yaendayo pamoja vizuri, katika mpango ambao Roho Mtakatifu ameyapanga. Twapaswa kuwa na imani, na imani hiyo yapaswa kutenda kazi. Kumtumaini Mungu hutuweka katika kutenda kutakatifu: twamtumaini Mungu kwa jema, kisha twatenda jema. Hatuketi tuli kwa sababu twatumaini, bali twajiamsha, na kutazamia Bwana atende kupitia kwetu na kwa sisi. Si juu yetu kufadhaika na kutenda uovu, bali kutumaini na kutenda mema. Hatutumaini bila kutenda, wala kutenda bila kutumaini.

Watesi wangetung'oa, kama wangeweza; lakini kwa kutumaini na kutenda twakaa katika nchi. Hatutakwenda Misri, bali tutakaa katika nchi ya Imanueli -- riziki ya Mungu, Kanaani ya upendo wa agano. Hatuondoshwi kwa urahisi kama adui za Bwana wadhanivyo. Hawawezi kutusukuma nje, wala kutuangamiza kabisa: mahali ambapo Mungu ametupa jina na nafasi, hapo twakaa.

Lakini itakuwaje kuhusu ugavi wa mahitaji yetu? Bwana ameweka "hakika" katika ahadi hii. Kwa hakika kama Mungu alivyo wa kweli, watu wake watalishwa. Ni juu yao kutumaini na kutenda, nayo ni juu ya Bwana kutenda kwa kadiri ya kutumaini kwao. Kama si kulishwa na kunguru, au kulishwa na Obadia, au kulishwa na mjane, hata hivyo watalishwa kwa njia fulani. Ondokeni, enyi hofu!

Desemba 12

MOYO WENYE UTULIVU

"Katika kutulia na katika kutumaini itakuwa nguvu yenu" Isaya 30:15

Siku zote ni udhaifu kuwa na wasiwasi na kufadhaika, kuhoji na kutokuamini. Twaweza kufanya nini kama tukijichakaza hata kubaki ngozi na mfupa? Je, twaweza kupata kitu cho chote kwa kuogopa na kughadhibika? Je, hatujifanyi wasiofaa kwa kutenda, na kuvuruga akili zetu kwa uamuzi wa hekima? Twazama kwa juhudi zetu wakati tungeweza kuelea kwa imani.

Ee, kwa neema ya kuwa kimya! Kwa nini kukimbia nyumba hata nyumba kurudia hadithi ya kuchosha ambayo hutufanya kuwa wagonjwa wa moyo zaidi na zaidi tunapoisimulia? Kwa nini hata kukaa nyumbani kulia kwa uchungu kwa sababu ya vituko viovu vya mawazo ambavyo huenda visitimie kamwe? Ingekuwa vema kuutunza ulimi ulio kimya, lakini ingekuwa bora zaidi kama tungekuwa na moyo ulio kimya. Ee, kutulia na kujua kwamba Yehova ndiye Mungu!

Ee, kwa neema ya kuwa na hakika katika Mungu! Mtakatifu wa Israeli lazima awalinde na kuwaokoa walio wake. Hawezi kurudi nyuma katika matamko yake ya dhati. Twaweza kuwa na hakika kwamba kila neno lake litasimama ijapokuwa milima ingeondoka. Anastahili kutumainiwa; na kama tungeonyesha uhakika na utulivu ufuatao, tungeweza kuwa wenye furaha kama roho zilizo mbele ya kiti cha enzi.

Njoo, nafsi yangu, rudi kwenye raha yako, na uegemeze kichwa chako kifuani mwa Bwana Yesu.

Desemba 13

JIONI HUNG'AA KUWA MCHANA

"Itakuwa, wakati wa jioni kutakuwa na nuru" Zekaria 14:7

Ni jambo la kushangaza kwamba iwe hivyo; kwa maana vitu vyote hutisha kwamba wakati wa jioni kutakuwa giza. Mungu huwa na desturi ya kutenda kwa namna iliyo juu sana ya hofu zetu na kupita matumaini yetu, hata twashangaa sana, na kuongozwa kuisifu neema yake ya enzi. La, haitakuwa kwetu kama mioyo yetu itabirivyo: giza halitazidi kuwa usiku wa manane, bali kwa ghafula litang'aa kuwa mchana. Kamwe tusikate tamaa. Katika nyakati mbaya kuliko zote na tumtumaini Bwana yeye ageuzaye giza la uvuli wa mauti kuwa asubuhi. Hesabu ya matofali iongezwapo maradufu Musa hutokea, na dhiki izidipo ndipo iko karibu zaidi na mwisho wake.

Ahadi hii yapaswa kuisaidia saburi yetu. Nuru huenda isije kikamilifu hata matumaini yetu yatakapokwisha kabisa kwa kungoja mchana kutwa bila faida. Kwa waovu jua huchwa kungali bado mchana: kwa wenye haki jua huchomoza wakati ni karibu usiku. Je, tusingoje kwa saburi nuru ile ya mbinguni, ambayo huenda ikawa ya kukawia kuja, lakini ni hakika kujithibitisha kuwa yastahili kabisa kungojewa?

Njoo, nafsi yangu, itwae mithali yako na umwimbie yeye atakayekubariki katika uhai na katika mauti, kwa namna ipitayo yote ambayo maumbile yamepata kuyaona yakiwa katika hali yake bora kabisa.

Desemba 14

HAKUNA KILICHO CHA KALE

"Na yeye aketiye juu ya kiti cha enzi akasema, Tazama, nayafanya yote kuwa mapya" Ufunuo 21:5

Utukufu na uwe kwa jina lake! Vitu vyote vyahitaji kufanywa vipya, kwa maana vimechakaa na kuharibiwa kwa huzuni na dhambi. Ni wakati kwamba vazi la kale likunjwe na kuwekwa kando, na uumbaji uvae vazi lake la Jumapili. Lakini hakuna mwingine awezaye kufanya vitu vyote kuwa vipya isipokuwa Bwana aliyeviumba hapo mwanzo; kwa maana kwahitaji nguvu nyingi kufanya kutoka katika uovu kama kufanya kutoka katika si kitu. Bwana wetu Yesu ameutwaa kazi hiyo, naye anafaa kikamilifu kuitimiza. Tayari ameanza kazi yake, na kwa karne nyingi amedumu katika kufanya mioyo ya wanadamu kuwa mipya, na mpango wa jamii. Hivi karibuni atafanya upya katiba nzima ya serikali ya wanadamu, na asili ya mwanadamu itabadilishwa kwa neema yake; na itakuja siku ambayo mwili utafanywa mpya, na kufufuliwa mfano wa mwili wake wa utukufu.

Furaha iliyoje kuwa wa ufalme ambao kila kitu kinafanywa kipya kwa nguvu ya Mfalme wake! Hatufi kutoweka: twaharakia kuelekea uzima ulio wa utukufu zaidi. Licha ya upinzani wa nguvu za uovu, Bwana wetu mtukufu Yesu anatimiza kusudi lake, akitufanya sisi, na vitu vyote vituzungukavyo, "vipya," na vimejaa uzuri kama vilipotoka mara ya kwanza mkononi mwa Bwana.

Desemba 15

UPATANO WA ULIMWENGU

"Nao watafua panga zao ziwe majembe, na mikuki yao iwe miundu; taifa halitainua upanga juu ya taifa lingine, wala hawatajifunza vita tena Isaya 2:4

Ee, laiti nyakati hizi za furaha zingekuwa zimefika! Kwa sasa mataifa yamejihami sana kwa silaha, nayo yanabuni silaha zilizo za kutisha zaidi na zaidi, kana kwamba lengo kuu la mwanadamu lingeweza kutimizwa tu kwa kuwaangamiza maelfu ya wenzake. Lakini amani itatawala siku moja; naam, na kutawala kiasi kwamba zana za uharibifu zitafuliwa kuwa maumbo mengine na kutumiwa kwa makusudi yaliyo bora zaidi.

Litakuwaje jambo hili? Kwa biashara? Kwa ustaarabu? Kwa usuluhishi? Hatuamini hivyo. Uzoefu uliopita hukataza kutumainia njia dhaifu hivyo. Amani itaanzishwa tu kwa utawala wa Mfalme wa Amani. Lazima awafundishe watu kwa Roho yake, aifanye upya mioyo yao kwa neema yake, na kuwatawala kwa nguvu yake iliyo kuu, ndipo watakapoacha kujeruhi na kuua. Mwanadamu ni jitu la kutisha ikishawaka damu yake, na ni Bwana Yesu peke yake awezaye kumgeuza simba huyu kuwa mwana-kondoo. Kwa kuubadili moyo wa mwanadamu, tamaa zake za kiu ya damu huondolewa. Kila msomaji wa kitabu hiki cha ahadi na atoe leo maombi ya pekee kwa Bwana na Mpaji wa Amani, kwamba angekomesha vita upesi, na kuanzisha upatano juu ya ulimwengu wote.

Desemba 16

KUFUKUZA KWA KIMUNGU

"Utawafukuza Wakanaani, ijapokuwa wana magari ya chuma, tena ijapokuwa wana nguvu" Yoshua 17:18

Ni kitia-moyo kikubwa kwa ushujaa kuhakikishiwa ushindi, kwa maana ndipo mtu hutoka kwenda vitani kwa uhakika, na kuthubutu pale ambapo vinginevyo angeliogopa kwenda. Vita vyetu ni na uovu ulio ndani yetu na unaotuzunguka, nasi twapaswa kusadikishwa kwamba twaweza kupata ushindi, na kwamba tutafanya hivyo katika jina la Bwana Yesu. Hatupandi kuelekea kuanguka, bali kushinda; nasi tutashinda. Neema ya Mungu katika Uweza wake wote imetolewa kwa ajili ya kuupindua uovu katika kila namna: kwa hiyo hakika ya ushindi.

Baadhi ya dhambi zetu hupata magari ya chuma katika maumbile yetu, tabia zetu za zamani, mashirika yetu, na kazi zetu. Walakini lazima tuzishinde. Zina nguvu sana, na kwa habari zao sisi tu dhaifu sana; lakini katika jina la Mungu lazima tuzitawale, nasi tutafanya hivyo. Kama dhambi moja ikiwa na mamlaka juu yetu sisi si watu huru wa Bwana. Mtu ashikiliwaye na mnyororo mmoja tu bado ni mateka. Hakuna kwenda Mbinguni na dhambi moja ikitawala ndani yetu, kwa maana kwa habari ya watakatifu imesemwa, "Dhambi haitawatawala ninyi." Inuka, basi, na umwue kila Mkanaani, na uvunje vipande vipande kila gari la chuma! Bwana wa majeshi yu pamoja nasi, na ni nani atakayeikinza nguvu yake iharibuyo dhambi?

Desemba 17

USHIRIKA ULIO KARIBU NA MPENDWA KULIKO WOTE

"Na hivyo tutakuwa pamoja na Bwana milele" 1 Wathesalonike 4:17

Tunapokuwa hapa Bwana yu pamoja nasi, na tutakapoitwa kwenda tuko pamoja naye. Hakuna kumtenga mtakatifu na Mwokozi wake. Wao ni mmoja, na sikuzote lazima wawe mmoja: Yesu hawezi kuwa bila watu wake mwenyewe, kwa maana angekuwa Kichwa kisicho na mwili. Kwamba tumenyakuliwa juu hewani, au twapumzika Paradiso, au twakaa hapa kama wageni, tuko pamoja na Yesu; na ni nani atakayetutenga naye?

Furaha iliyoje hii! Heshima yetu iliyo kuu, raha, faraja, furaha, ni kuwa pamoja na Bwana. Hatuwezi kuwaza kitu cho chote kiwezacho kupita au hata kulingana na ushirika huu wa kimungu. Kwa ushirika mtakatifu lazima tuwe pamoja naye katika kudhiliwa kwake, kukataliwa, na taabu, ndipo tutakapokuwa pamoja naye katika utukufu wake. Kabla ya muda mrefu tutakuwa pamoja naye katika raha yake na katika ufalme wake, katika kutarajia kwake na katika kudhihirika kwake. Tutakuwa kama ilivyo kwake, na kushinda kama ashindavyo.

Ee Bwana wangu, kama nitakuwa pamoja nawe milele, nina hatima isiyo na kifani. Sitamwonea wivu malaika mkuu. Kuwa pamoja na Bwana milele ndilo wazo langu la Mbingu katika hali yake bora kabisa. Si vinubi vya dhahabu, wala taji zisizonyauka, wala nuru isiyo na wingu, ni utukufu kwangu; bali Yesu, Yesu mwenyewe, na mimi mwenyewe pamoja naye milele katika ushirika ulio karibu na mpendwa kuliko wote.

Desemba 18

KULINDWA NA KUFUNIKWA

"Kama ndege warukao, ndivyo Bwana wa majeshi atakavyoulinda Yerusalemu" Isaya 31:5

Kwa bawa la haraka ndege mama huharakisha juu kwenda kuwalinda watoto wake. Hapotezi wakati wo wote njiani ajapo kuwaletea chakula, au kuwalinda na hatari. Hivyo kama juu ya mabawa ya tai Bwana atakuja kwa ulinzi wa wateule wake; naam, atapanda juu ya mabawa ya upepo.

Kwa bawa lililotandazwa mama huwafunika wadogo wake katika kiota. Huwaficha kwa kukiweka mwili wake mwenyewe kati. Kuku hutoa joto lake mwenyewe kwa vifaranga vyake, na kuyafanya mabawa yake nyumba, ambamo hukaa kama nyumbani. Hivyo ndivyo Yehova mwenyewe akuwavyo ulinzi wa wateule wake. Yeye mwenyewe ni kimbilio lao, makao yao, na yote yao.

Kama ndege warukao, na ndege wafunikao (kwa maana neno lamaanisha yote mawili), ndivyo Bwana atakavyokuwa kwetu: na hivi atakuwa mara kwa mara na kwa mafanikio. Tutalindwa na kuhifadhiwa na uovu wote: Bwana ajifananishaye na ndege hatakuwa kama wao katika udhaifu wao, kwa maana yeye ni Yehova wa majeshi. Hii na iwe faraja yetu, kwamba upendo wa Mwenyezi utakuwa wa mbio kusaidia, na wa hakika kufunika. Bawa la Mungu ni la mbio zaidi na la wororo zaidi kuliko bawa la ndege, nasi tutaweka tumaini letu chini ya kivuli chake tangu sasa na hata milele.

Desemba 19

MATESO, LAKINI HAKUNA MFUPA ULIOVUNJIKA

"Huihifadhi mifupa yake yote; hapana hata mmoja unaovunjika" Zaburi 34:20

Ahadi hii kwa muktadha wake yahusishwa na mtu mwenye haki aliyeteswa sana: "Mateso ya mwenye haki ni mengi, lakini Bwana humwokoa nayo yote." Aweza kupata majeraha ya ngozi na majeraha ya nyama, lakini hakuna madhara makubwa yatakayotendeka, "hapana mfupa wake utakaovunjika."

Hii ni faraja kubwa kwa mtoto wa Mungu aliyejaribiwa, na faraja ambayo nathubutu kuipokea; kwa maana hata saa hii sijapata madhara ya kweli kutokana na mateso yangu mengi. Sijapoteza imani, wala tumaini, wala upendo. La, badala ya kuipoteza mifupa hii ya tabia, imeongezeka nguvu na nishati. Nina maarifa zaidi, uzoefu zaidi, saburi zaidi, uthabiti zaidi kuliko nilivyokuwa nao kabla ya majaribu kuja. Wala furaha yangu haijaharibiwa. Michubuko mingi nimeipata kwa ugonjwa, msiba, huzuni, masingizio, na upinzani; lakini mchubuko umepona, wala hakujakuwa na mvunjiko wenye kuvunjika sehemu nyingi wa mfupa, wala hata mvunjiko rahisi. Sababu si vigumu kutafuta. Kama tukimtumaini Bwana, huihifadhi mifupa yetu yote; na kama akiihifadhi, twaweza kuwa na hakika kwamba hakuna hata mmoja uliovunjika.

Njoo, moyo wangu, usihuzunike. Wewe wauma, lakini hakuna mifupa iliyovunjika. Vumilia magumu, na uikaidi hofu.

Desemba 20

WANADAMU KAMA WANADAMU; MUNGU KAMA MUNGU

"Mimi, naam mimi, ndimi niwafarijiye ninyi; wewe u nani hata umwogope mwanadamu atakayekufa, na mwana wa binadamu atakayefanywa kama majani; ukamsahau Bwana Muumba wako, aliyezitandaza mbingu, na kuiweka misingi ya nchi; ukaogopa daima mchana kutwa kwa sababu ya ghadhabu yake mtesi, kama vile anajitayarisha kuangamiza? na iko wapi ghadhabu yake mtesi?" Isaya 51:12, 13

Andiko lenyewe na litwaliwe kuwa fungu la leo. Hakuna haja ya kulipanua. Wewe utetemekaye, lisome, liamini, jilishe kwalo, na uliombee mbele za Bwana. Yeye umwogopaye ni mwanadamu tu baada ya yote; ambapo yeye akuahidiye kukufariji ni Mungu, Muumba wako, na Muumbaji wa Mbingu na nchi. Faraja isiyo na mwisho hufunika kwa wingi hatari iliyo na mpaka sana.

"Iko wapi ghadhabu yake mtesi?" Imo mkononi mwa Bwana. Ni ghadhabu ya kiumbe kifacho tu; ghadhabu ambayo itakoma mara pumzi itakapotoka puani. Kwa nini, basi, tumwogope yeye aliye dhaifu kama sisi wenyewe? Tusimvunjie Mungu wetu heshima kwa kumfanya mwanadamu duni kuwa mungu. Twaweza kumfanya mwanadamu kuwa sanamu kwa kumpa hofu ya kupita kiasi kama vile kwa kumlipa upendo usio na kiasi. Na tuwatende wanadamu kama wanadamu, na Mungu kama Mungu; ndipo tutakapoenda kwa utulivu katika njia ya wajibu, tukimwogopa Bwana, na tusimwogope mtu mwingine ye yote.

Desemba 21

TOKA GHADHABU HATA UPENDO

"Atarejea tena, atatuhurumia; atayatiisha maovu yetu; nawe utazitupa dhambi zao zote katika vilindi vya bahari" Mika 7:19

Mungu hageuki kamwe kutoka katika upendo wake, lakini upesi hugeuka kutoka katika ghadhabu yake. Upendo wake kwa wateule wake ni kwa kadiri ya asili yake, hasira yake ni kwa kadiri ya kazi yake tu: hupenda kwa sababu yeye ni upendo, hukunja uso kwa sababu ni lazima kwa faida yetu. Atarudi mahali ambapo moyo wake hupumzika, yaani, upendo wake kwa walio wake, ndipo atakapoyahurumia masikitiko yetu na kuyakomesha.

Ahadi iliyoje teule hii -- "Atayatiisha maovu yetu"! Atayashinda. Yanalia ili kututia utumwani, lakini Bwana atatupa ushindi juu yao kwa mkono wake wa kuume. Kama Wakanaani, yatapigwa, kutiwa chini ya nira, na hatimaye kuuawa.

Kwa habari ya hatia ya dhambi zetu, jinsi ilivyoondolewa kwa utukufu! "Dhambi zao zote," -- naam, jeshi lao lote; "utazitupa" -- ni mkono wa Mwenyezi peke yake ungeweza kufanya ajabu kama hiyo; "katika vilindi vya bahari" -- ambako Farao na magari yake walizama. Si katika sehemu za kina kifupi ambazo dhambi zingeweza kuoshwa na kurudishwa juu na wimbi, bali katika "vilindi" ndiko dhambi zetu zitakakotupwa. Zimekwisha zote. Zilizama chini kama jiwe. Haleluya! Haleluya!

Desemba 22

YUPO PAPO HAPO

"Mungu kwetu ni kimbilio na nguvu, msaada upatikanao sana wakati wa taabu" Zaburi 46:1

Msaada usiokuwapo tunapouhitaji ni wa thamani ndogo. Nanga iliyoachwa nyumbani haina faida kwa baharia katika saa ya dhoruba; fedha ambayo mdaiwa alikuwa nayo haina thamani kwake wakati hati ya mashtaka imetolewa juu yake. Misaada michache sana ya kidunia ingeweza kuitwa "iliyopo sana": kwa kawaida iko mbali katika kutafuta, mbali katika kutumia, na mbali zaidi ikishatumika mara moja. Lakini kwa habari ya Bwana Mungu wetu, yupo tunapomtafuta, yupo tunapomhitaji, na yupo tunapokwisha kuufurahia msaada wake.

Yeye ni zaidi ya "kuwapo," yeye yupo sana. Yupo zaidi ya rafiki aliye karibu kuliko wote awezavyo kuwapo, kwa maana yu ndani yetu katika taabu yetu; yupo zaidi kuliko sisi wenyewe tulivyo kwetu, kwa maana nyakati nyingine twapungukiwa na uwepo wa akili. Yupo siku zote, yupo kwa ufanisi, yupo kwa huruma, yupo kabisa. Yupo sasa kama huu ni majira ya huzuni. Na tujipumzishe juu yake. Yeye ni kimbilio letu, na tujifiche ndani yake; yeye ni nguvu yetu, na tujivike yeye; yeye ni msaada wetu, na tumwegemee; yeye ni msaada wetu uliopo papo hapo, na tupumzike ndani yake sasa. Hatuna haja ya kuwa na kihangaiko cha muda mfupi, wala hofu ya kitambo. "Bwana wa majeshi yu pamoja nasi; Mungu wa Yakobo ni kimbilio letu."

Desemba 23

VITU VYA THAMANI

"Na kwa habari ya Yusufu akasema, Nchi yake na ibarikiwe na Bwana, kwa vitu vya thamani vya mbinguni, kwa umande, na kwa vilindi vilalavyo chini" Kumbukumbu 33:13

Twaweza kuwa matajiri katika vitu kama vile Yusufu alivyovipata, nasi twaweza kuvipata kwa maana iliyo juu zaidi. Ee, kwa "vitu vya thamani vya mbinguni!" Nguvu pamoja na Mungu, na kudhihirika kwa nguvu kutoka kwa Mungu, ni vya thamani kuliko vyote. Tungefurahia amani ya Mungu, furaha ya Bwana, utukufu wa Mungu wetu. Baraka ya Nafsi tatu za kimungu katika upendo, na neema, na ushirika twaithamini kupita dhahabu iliyo safi kabisa. Vitu vya duniani ni kama si kitu katika thamani vikilinganishwa na vitu vya Mbinguni.

"Umande." Jinsi ulivyo wa thamani huu! Jinsi tuombavyo na kusifu, tunapokuwa na umande! Uburudisho ulioje, ukuaji ulioje, manukato yalioje, uzima ulioje ulio ndani yetu umande upo! Zaidi ya vitu vingine vyote, kama mimea ya kupandwa kwa mkono wa kuume wa Bwana mwenyewe, twauhitaji umande wa Roho wake Mtakatifu.

"Vilindi vilalavyo chini." Hakika hii yahusu bahari ile isiyoonekana iliyo chini ya ardhi itoayo chemchemi zote za maji safi zifurahishazo dunia. Ee, kuzichimbua chemchemi za milele! Hii ni zawadi isiyoelezeka; mwamini ye yote asipumzike hata aimiliki. Utoshelevu wote wa Yehova ni wetu milele. Na tuukimbilie sasa.

Desemba 24

KUVUKA YORDANI KWA KUIMBA

"Adui zako watajipata kuwa waongo kwako" Kumbukumbu 33:29

Adui yule mkuu, ibilisi, ni mwongo tangu mwanzo; lakini ni mwenye kushawishi sana hata, kama mama Hawa, twaongozwa kumwamini. Lakini katika uzoefu wetu tutamthibitisha kuwa mwongo.

Husema kwamba tutaanguka kutoka katika neema, kuvunjia heshima ukiri wetu, na kuangamia kwa hukumu ya waasi-imani; lakini, tukimtumaini Bwana Yesu, tutashikilia njia yetu na kuthibitisha kwamba Yesu hampotezi ye yote ambaye Baba yake alimpa. Hutuambia kwamba mkate wetu utakoma, nasi tutakufa njaa pamoja na watoto wetu; lakini Mlishaji wa kunguru hajatusahau bado, wala hatafanya hivyo kamwe, bali atatuandalia meza mbele ya adui zetu.

Hunong'ona kwamba Bwana hatatuokoa kutoka katika jaribu linalojitokeza kwa mbali, naye hutisha kwamba wakia ya mwisho itaivunja mgongo wa ngamia. Mwongo ulioje yeye! Kwa maana Bwana hatatuacha kamwe, wala hatatutupa. "Na amwokoe sasa!" hulia yule shetani mwongo: lakini Bwana atamnyamazisha kwa kuja kutuokoa.

Hufurahi sana kutuambia kwamba mauti itakuwa nzito mno kwetu. "Utafanyaje katika kufura kwa Yordani?" Lakini hapo pia atajithibitisha kuwa mwongo kwetu, nasi tutavuka mto tukiimba zaburi za utukufu.

Desemba 25

ALIKUJA; ANAKUJA

"Huyu Yesu aliyechukuliwa kutoka kwenu kwenda mbinguni, atakuja jinsi iyo hiyo kama mlivyomwona akienda zake mbinguni" Matendo 1:11

Wengi wanasherehekea kuja kwa kwanza kwa Bwana wetu siku hii; na tuyageuze mawazo yetu kwenye ahadi ya kuja kwake mara ya pili. Huku ni kwa hakika kama kuja kwake kwa kwanza, nako hupata sehemu kubwa ya hakika yake kutoka humo. Yeye aliyekuja kama mtu mnyenyekevu kutumika bila shaka atakuja kutwaa thawabu ya utumishi wake. Yeye aliyekuja kuteseka hatakawia kuja kutawala.

Hili ni tumaini letu la utukufu, kwa maana tutashiriki furaha yake. Leo tuko katika kujificha kwetu na kudhiliwa, kama vile yeye alivyokuwa alipokuwa hapa chini; lakini atakapokuja itakuwa kudhihirika kwetu, kama vile itakavyokuwa kufunuliwa kwake. Watakatifu waliokufa wataishi wakati wa kutokea kwake. Waliosingiziwa na kudharauliwa watang'aa kama jua katika ufalme wa Baba yao. Ndipo watakatifu watakapotokea kama wafalme na makuhani, na siku za kuomboleza kwao zitakwisha. Raha ndefu na fahari isiyowazika ya utawala wa miaka elfu itakuwa malipo tele kwa zama za kushuhudia na kupigana.

Ee, laiti Bwana angekuja! Anakuja! Yu njiani na anasafiri upesi. Sauti ya kukaribia kwake yapaswa kuwa kama muziki kwa mioyo yetu! Lieni, enyi kengele za tumaini!

Desemba 26

MUNGU PEKE YAKE, NDIYE UWEZAYE KUMTUMAINI

"Petro akajibu, akamwambia, Wajapokwazwa wote kwa ajili yako, mimi sitakwazwa kamwe" Mathayo 26:33

"Kwa nini," alia mtu mmoja, "hii si ahadi ya Mungu." Ni kweli, lakini ilikuwa ahadi ya mwanadamu, na kwa hiyo haikufua dafu. Petro alidhani kwamba alikuwa akisema lile ambalo bila shaka angelitimiza; lakini ahadi isiyo na msingi bora kuliko azimio la kibinadamu itaanguka chini. Mara majaribu yalipotokea Petro alimkana Bwana wake, na kutumia viapo kuthibitisha kukana kwake.

Neno la mwanadamu ni nini? Chungu cha udongo kivunjwacho kwa pigo moja. Azimio lako mwenyewe ni nini? Ua, ambalo, kwa uangalizi wa Mungu, laweza kuzaa tunda, lakini ambalo, likiachwa lenyewe, litaanguka chini kwa upepo wa kwanza uutikisao mti.

Juu ya neno la mwanadamu tundika kile tu kiwezacho kustahimili.

Juu ya azimio lako mwenyewe usitegemee hata kidogo.

Juu ya ahadi ya Mungu wako tundika wakati na umilele, ulimwengu huu na ujao, yote yako na yote ya wapendwa wako wote.

Kitabu hiki ni kitabu cha hundi kwa waaminio, na ukurasa huu unakusudiwa kuwa onyo kuhusu ni benki gani watoayo hundi, na sahihi ya nani waikubali. Mtegemee Yesu bila kikomo. Usijitumaini nafsi yako wala ye yote aliyezaliwa na mwanamke, kupita mipaka inayostahili; bali umtumaini yeye peke yake na kwa ukamilifu Bwana.

Desemba 27

FADHILI ZAKE NA AGANO LAKE

"Maana milima itaondoka, na vilima vitaondolewa; bali fadhili zangu hazitaondoka kwako, wala agano langu la amani halitaondolewa, asema Bwana anayekurehemu" Isaya 54:10

Mojawapo ya sifa zipendezazo kuliko zote za upendo wa kimungu ni tabia yake ya kudumu. Nguzo za dunia zaweza kuondolewa mahali pake, lakini fadhili na agano la Yehova wetu mwenye rehema hazitaondoka kamwe kwa watu wake. Jinsi nafsi yangu ihisivyo furaha katika kuamini kwa uthabiti tamko hili lililovuviwa! Mwaka umekaribia kwisha, na miaka ya maisha yangu inazidi kupungua, lakini wakati haumbadili Bwana wangu. Taa mpya zinachukua nafasi ya za kale, mabadiliko ya daima yako juu ya vitu vyote; lakini Bwana wetu ni yeye yule. Nguvu hupindua vilima, lakini hakuna nguvu iwezayo kuwaziwa iwezayo kumwathiri Mungu wa milele. Hakuna kitu katika yaliyopita, yaliyopo, au yajayo kiwezacho kumfanya Yehova kutokuwa na fadhili kwangu.

Nafsi yangu, pumzika katika fadhili za milele za Bwana, akutendeaye kama aliye wa jamaa ya karibu. Kumbuka pia agano la milele. Mungu hulikumbuka daima -- angalia kwamba wewe nawe walikumbuka. Katika Kristo Yesu Mungu mtukufu amejiweka rehani kwako kuwa Mungu wako, na kukushika kama mmoja wa watu wake. Fadhili na agano -- kaa juu ya maneno haya kama vitu vya hakika na vya kudumu ambavyo umilele wenyewe hautavichukua kwako.

Desemba 28

UHAKIKA KAMILI

"Amesema, Sitakupungukia kamwe, wala sitakuacha kamwe" Waebrania 13:5

Mara kadhaa katika Maandiko Bwana amesema hili. Amelirudia mara nyingi, ili kuufanya uhakika wetu kuwa wa hakika maradufu. Kamwe tusiweke shaka juu yake. Ahadi yenyewe ina mkazo wa pekee. Katika Kiyunani ina vikanusho vitano, kila kimoja kikizuia kwa uhakika uwezekano wa Bwana kumwacha wakati wo wote mmoja wa watu wake hata aweze kwa haki kujihisi ameachwa na Mungu wake. Andiko hili lisilo na thamani halituahidi kusamehewa taabu, lakini latuhakikishia dhidi ya kutelekezwa. Twaweza kuitwa kupita njia za ajabu, lakini sikuzote tutakuwa na uandamani wa Bwana wetu, msaada, na maandalizi. Hatuna haja ya kutamani fedha, kwa maana sikuzote tutakuwa na Mungu wetu, na Mungu ni bora kuliko dhahabu, upendeleo wake ni bora kuliko utajiri.

Hakika twapaswa kuridhika na vitu tulivyo navyo, kwa maana yeye aliye na Mungu ana zaidi ya ulimwengu wote pamoja. Twaweza kuwa na nini zaidi ya yeye Asiye na Mwisho? Twaweza kutamani nini zaidi ya Wema wa Mwenyezi.

Njoo, moyo wangu; kama Mungu asema hatakuacha kamwe, wala hatakupungukia, uwe na maombi mengi kwa ajili ya neema, ili wewe usimwache Bwana wako kamwe, wala hata kwa kitambo usiziache njia zake.

Desemba 29

ATATUCHUKUA NYUMBANI

"Hata uzee wenu mimi ndiye; hata mvi zenu nitawachukua; nimefanya, nami nitachukua; naam, mimi nitachukua, nami nitawaokoa" Isaya 46:4

Mwaka umezeeka sana, na hii ni ahadi kwa rafiki zetu wazee; naam, na kwetu sote, umri unapotunyemelea. Na tuishi muda wa kutosha, nasi sote tutakuwa na mvi; kwa hiyo yafaa tuifurahie ahadi hii kwa kuona mbele kwa imani.

Tutakapozeeka Mungu wetu bado atakuwa yeye NILIYE, akidumu daima yeye yule. Mvi hueleza kuchakaa kwetu, lakini yeye hachakai. Tusipoweza kubeba mzigo, na twashindwa hata kujibeba wenyewe Bwana atatuchukua. Kama vile katika siku zetu za ujana alivyotuchukua kama wana-kondoo kifuani mwake, ndivyo atakavyofanya katika miaka yetu ya udhaifu.

Yeye alituumba, naye atatutunza. Tutakapokuwa mzigo kwa rafiki zetu, na mzigo kwetu wenyewe, Bwana hatatukung'utia mbali, bali afadhali atatuinua na kutuchukua na kutuokoa kwa ukamilifu zaidi kuliko wakati wo wote. Katika hali nyingi Bwana huwapa watumishi wake jioni ndefu na ya utulivu. Walifanya kazi kwa bidii mchana kutwa na kujichakaza katika utumishi wa Bwana wao, na hivyo aliwaambia, "Sasa pumzikeni mkitazamia Sabato ile ya milele niliyowaandalia." Tusiuogope uzee. Na tuzeeke kwa neema, kwa kuwa Bwana mwenyewe yu pamoja nasi katika utimilifu wa neema.

Desemba 30

KUPENDWA HATA UKAMILIFU

"Alipokuwa amewapenda watu wake waliokuwa ulimwenguni, aliwapenda hata mwisho" Yohana 13:1

Jambo hili kimsingi ni ahadi; kwa maana kama Bwana wetu alivyokuwa ndivyo alivyo, na kama alivyokuwa kwa wale aliokaa nao duniani, ndivyo atakavyokuwa kwa wapendwa wake wote maadamu mwezi udumupo.

"Alipokuwa amewapenda": hapa ndipo lililokuwa ajabu! Kwamba yeye apate kuwapenda wanadamu hata kidogo ndilo la kustaajabisha. Kulikuwa na nini ndani ya wanafunzi wake maskini hata awapende? Kuna nini ndani yangu?

Lakini akiisha kuanza kupenda, ni asili yake kuendelea kufanya hivyo. Upendo uliwafanya watakatifu kuwa "wake mwenyewe" -- cheo kilichoje teule! Aliwanunua kwa damu nao wakawa hazina yake. Kwa kuwa ni wake, hatawapoteza. Kwa kuwa ni wapendwa wake, hataacha kuwapenda. Nafsi yangu, hataacha kukupenda wewe!

Andiko li vema kama lilivyo: "hata mwisho," hata mpaka kifo chake shauku itawalayo ya upendo kwa walio wake ilitawala katika kifua chake kitakatifu. Lamaanisha pia hata upeo. Hakuweza kuwapenda zaidi: alijitoa mwenyewe kwa ajili yao. Wengine hulisoma, hata ukamilifu. Kweli aliwamwagia upendo mkamilifu, ambao ndani yake hamna dosari wala kasoro, wala ukosefu wa hekima, wala ukosefu wa uaminifu, wala kizuizi.

Ndivyo ulivyo upendo wa Yesu kwa kila mmoja wa watu wake. Na tumwimbie Mpendwa wetu wimbo.

Desemba 31

SI MGENI MBINGUNI

"Utaniongoza kwa shauri lako, na baadaye utanipokea katika utukufu" Zaburi 73:24

Siku hata siku na mwaka hata mwaka imani yangu huamini katika hekima na upendo wa Mungu, nami najua kwamba sitaamini bure. Hakuna neno lake jema lililopata kukosa kutimia, nami nina hakika kwamba hakuna litakaloanguka chini kamwe.

Najiweka mkononi mwake ili aniongoze. Sijui njia nitakayoichagua: Bwana atanichagulia urithi wangu. Nahitaji shauri na ushauri; kwa maana wajibu wangu ni tata, na hali yangu imezongwa. Namtafuta Bwana, kama Kuhani Mkuu wa kale alivyotazamia Urimu na Thumimu yake. Shauri la Mungu asiyekosea nalitafuta kuliko hukumu yangu mwenyewe au ushauri wa rafiki. Yehova mtukufu, wewe utaniongoza!

Karibuni mwisho utakuja: miaka michache zaidi, na lazima niondoke katika ulimwengu huu kwenda kwa Baba. Bwana wangu atakuwa karibu na kitanda changu. Atanilaki katika lango la Mbingu: atanikaribisha katika nchi ya utukufu. Sitakuwa mgeni Mbinguni: Mungu wangu mwenyewe na Baba atanipokea katika raha yake isiyo na mwisho.

UTUKUFU NA UWE KWAKE YEYE

ATAKAYENIONGOZA HAPA,

NA KUNIPOKEA BAADAYE. AMINA.