Imani Yaweza Kufananishwaje?

ILI KULIFANYA JAMBO la imani liwe wazi zaidi, nitakupa mifano michache. Ijapokuwa Roho Mtakatifu peke yake ndiye awezaye kumfanya msomaji wangu aone, ni wajibu wangu na furaha yangu kutoa nuru yote niwezayo, na kumwomba Bwana wa kimungu afumbue macho ya vipofu. Laiti msomaji wangu angeliomba ombi hilohilo kwa ajili yake mwenyewe!

Imani iokoayo ina mifano yake katika mwili wa mwanadamu.
Ni jicho litazamalo. Kwa jicho twaleta akilini kile kilicho mbali; twaweza kuuleta jua na nyota zilizo mbali akilini kwa kutupa jicho tu. Vivyo hivyo kwa kutumaini twamleta Bwana Yesu karibu nasi; na ijapokuwa yu mbali Mbinguni, huingia moyoni mwetu. Mtazame Yesu tu; kwa maana wimbo huo ni kweli kabisa--
Kuna uzima katika kumtazama Yule Aliyesulubiwa,
Kuna uzima wakati huu kwa ajili yako.

Imani ni mkono ushikao. Mkono wetu ushikapo kitu chochote kwa ajili yake, hufanya sawasawa na afanyavyo imani ipokeapo Kristo na baraka za ukombozi wake. Imani husema, "Yesu ni wangu." Imani husikia habari za damu isamehe, na kupaza sauti, "Naikubali inisamehe." Imani huiita mirathi ya Yesu afaye kuwa mali yake mwenyewe; nayo ni mali yake, kwa maana imani ni mrithi wa Kristo; amejitoa nafsi yake na yote aliyo nayo kwa imani. Twaa, ee rafiki, kile ambacho neema imekuandalia. Hutakuwa mwizi, kwa maana una ruhusa ya kimungu: "Yeye atakaye, na ayatwae maji ya uzima bure." Yeye awezaye kupata hazina kwa kuishika tu atakuwa mpumbavu kweli kweli akibaki maskini.

Imani ni kinywa kilishacho juu ya Kristo. Kabla chakula hakijaweza kutulisha, ni lazima kipokewe ndani yetu. Hili ni jambo rahisi--huku kula na kunywa. Twapokea kwa hiari kinywani kile kilicho chakula chetu, kisha twakubali kiende chini hata ndani ya matumbo yetu, ambako hutwaliwa na kufyonzwa katika mwili wetu. Paulo asema, katika Waraka wake kwa Warumi, katika sura ya kumi, "Lile neno li karibu nawe, naam, katika kinywa chako." Basi, lililobaki ni kulimeza tu, kuliacha lishuke hata ndani ya nafsi. Laiti watu wangelikuwa na hamu ya kula! Kwa maana yeye aliye na njaa akiona nyama mbele yake hahitaji kufundishwa jinsi ya kula. "Nipe," akasema mtu mmoja, "kisu na uma na nafasi." Alikuwa tayari kabisa kufanya yaliyobaki. Kweli, moyo wenye njaa na kiu ya Kristo wahitaji tu kujua kwamba ametolewa bure, na papo hapo utampokea. Kama msomaji wangu yumo katika hali hiyo, asisite kumpokea Yesu; kwa maana aweza kuwa na hakika kwamba hatalaumiwa kamwe kwa kufanya hivyo: kwa kuwa "wote waliompokea aliwapa uwezo wa kufanyika watoto wa Mungu." Hamsukumii mbali mtu ye yote, bali huwapa ruhusa wote wamjiao kubaki wana milele.

Shughuli za maisha huifananisha imani kwa njia nyingi. Mkulima huizika mbegu njema ardhini, na kutarajia si tu kwamba itaishi bali izidishwe. Ana imani katika mpango wa agano, kwamba "wakati wa kupanda na wakati wa kuvuna havitakoma," naye hulipwa kwa ajili ya imani yake.

Mfanyabiashara huweka fedha zake chini ya uangalizi wa mtunza benki, na kutumaini kabisa uaminifu na uimara wa benki. Hukabidhi rasilimali yake mikononi mwa mwingine, naye hujisikia raha zaidi sana kuliko kama angelikuwa na dhahabu tupu iliyofungiwa katika kasha la chuma.

Baharia hujitumainisha kwa bahari. Aogeleapo huuondoa mguu wake chini na kuutegemeza mwili wake juu ya bahari iinuayo. Hangeweza kuogelea kama asingejitupa kabisa juu ya maji.

Mfua dhahabu huitia madini ya thamani motoni uonekanao kama wenye tamaa ya kuiteketeza, lakini huipokea tena kutoka tanuruni ikiwa imesafishwa kwa ule moto.

Huwezi kugeukia mahali po pote katika maisha bila kuiona imani ikifanya kazi kati ya mtu na mtu, au kati ya mtu na sheria ya asili. Basi, kama vile tunavyotumaini katika maisha ya kila siku, vivyo hivyo yatupasa kumtumaini Mungu kama alivyodhihirishwa katika Kristo Yesu.

Imani ipo katika watu mbalimbali kwa vipimo tofauti, kwa kadiri ya maarifa yao au kukua kwao katika neema. Wakati mwingine imani si zaidi ya kushikamana tu na Kristo; hisia ya kutegemea na utayari wa kutegemea hivyo. Ushukapo pwani utaona makombe-mwamba yakigandamana na mwamba. Watembea kwa mwendo wa taratibu hata mwambani; wampiga huyo mnyama pigo la haraka kwa fimbo yako, naye hunasuka. Jaribu kombe-mwamba linalofuata kwa njia hiyo. Umempa onyo; alisikia pigo ulilompiga jirani yake, naye hushikamana kwa nguvu zake zote. Hutamwondoa kamwe; sivyo wewe! Piga, na kupiga tena, lakini waweza kuuvunja mwamba mapema zaidi. Rafiki yetu mdogo, kombe-mwamba, hajui mengi, lakini hushikamana. Hafahamu umbo la mwamba lilivyoumbika, lakini hushikamana. Aweza kushikamana, naye amepata kitu cha kushikamana nacho: haya ndiyo maarifa yake yote, naye huyatumia kwa usalama na wokovu wake. Ni uhai wa kombe-mwamba kushikamana na mwamba, nao ni uhai wa mwenye dhambi kushikamana na Yesu. Maelfu ya watu wa Mungu hawana imani zaidi ya hii; wanajua vya kutosha kushikamana na Yesu kwa moyo wao wote na nafsi yao yote, na hii hutosha kwa amani ya sasa na usalama wa milele. Yesu Kristo kwao ni Mwokozi mwenye nguvu na uwezo, Mwamba usiotikisika wala kubadilika; hushikamana naye kwa uhai wao, na kushikamana huku huwaokoa. Ewe msomaji, huwezi kushikamana? Fanya hivyo mara moja.

Imani huonekana mtu mmoja anapomtegemea mwingine kwa kujua ubora wa huyo mwingine. Hii ni imani ya juu zaidi; imani ijuayo sababu ya kutegemea kwake, na kuitenda. Sidhani kwamba kombe-mwamba lajua mengi juu ya mwamba: lakini imani ikuavyo huzidi kuwa na akili. Kipofu hujitumainisha kwa kiongozi wake kwa sababu ajua kwamba rafiki yake aweza kuona, na, kwa kutumaini, hutembea alikomwongoza kiongozi wake. Kama maskini huyo amezaliwa kipofu hajui kuona ni nini; lakini ajua kwamba kuna kitu kama kuona, na kwamba rafiki yake analo nalo naye hivyo huweka mkono wake kwa hiari mkononi mwa yule aonaye, na kufuata uongozi wake. "Twaenenda kwa imani, si kwa kuona." "Heri wale wasioona, wakaamini." Huu ni mfano wa imani mzuri kama uwezavyo kuwa; twajua kwamba Yesu ana ndani yake ustahili, na uwezo, na baraka, ambavyo sisi hatuna, na kwa hiyo twajitumainisha kwake kwa furaha ili awe kwetu kile tusichoweza kuwa sisi wenyewe. Twamtumaini kama vile kipofu amtumainivyo kiongozi wake. Hausaliti kamwe tumaini letu; bali yeye "amefanywa kwetu na Mungu kuwa hekima, na haki, na utakaso, na ukombozi."

Kila mvulana aendaye shule yampasa kutumia imani wakati wa kujifunza. Mwalimu wake humfundisha jiografia, na kumwelekeza juu ya umbo la dunia, na kuwako kwa miji na milki fulani mikubwa. Mvulana mwenyewe hajui kwamba mambo haya ni ya kweli, ila kwa kuwa humwamini mwalimu wake, na vitabu vilivyowekwa mikononi mwake. Hivyo ndivyo utakavyopaswa kufanya kwa Kristo, kama utaokolewa; wapaswa tu kujua kwa sababu yeye akuambia, kuamini kwa sababu akuhakikishia kwamba ni hivyo, na kujitumainisha kwake kwa sababu akuahidi kwamba wokovu ndio utakaokuwa matokeo. Karibu yote uyajuayo wewe nami tumeletewa kwa imani. Uvumbuzi wa kisayansi umefanywa, nasi tuna hakika nao. Kwa msingi gani twauamini? Kwa mamlaka ya watu fulani wanaojulikana wa elimu, ambao sifa zao zimethibitika. Hatujawahi kufanya wala kuona majaribio yao, lakini twaushuhuda wao. Wapaswa kufanya vivyo hivyo kwa habari za Yesu: kwa sababu akufundisha kweli fulani wapaswa kuwa mwanafunzi wake, na kuyaamini maneno yake; kwa sababu ametenda matendo fulani wapaswa kuwa mteja wake, na kujitumainisha kwake. Yeye ni bora kupita wewe bila kikomo, naye hujionyesha kwa tumaini lako kuwa Bwana na Mkuu wako. Kama utampokea yeye na maneno yake utaokolewa.

Namna nyingine na ya juu zaidi ya imani ni ile imani ikuayo kutoka katika upendo. Kwa nini mvulana humtumaini babaye? Sababu ya mtoto kumtumaini babaye ni kwa sababu humpenda. Heri na furaha wale walio na imani tamu katika Yesu, iliyofungamana na upendo mkuu kwake, kwa maana hili ni tumaini lenye raha. Wapendao Yesu hawa huvutwa na tabia yake, na kufurahishwa na utume wake, huchukuliwa na fadhili alizozidhihirisha, na kwa hiyo hawawezi kujizuia kumtumaini, kwa sababu humstaajabia, humheshimu, na humpenda sana.

Njia ya kutumaini kwa upendo kwa Mwokozi yaweza kufananishwa hivi. Bibi mmoja ni mke wa tabibu aliye maarufu kuliko wote wa siku hizo. Hushikwa na ugonjwa hatari, na kuangushwa chini na nguvu zake; walakini yu mtulivu na kimya kwa ajabu, kwa maana mumewe ameufanya ugonjwa huu kuwa somo lake maalumu, naye amewaponya maelfu waliopatwa na jambo kama hilo. Hasumbuki hata kidogo, kwa maana hujisikia salama kabisa mikononi mwa mtu mpendwa kwake namna hiyo, ambaye ndani yake ustadi na upendo vimechanganyika katika hali zake za juu kabisa. Imani yake ina sababu na ni ya asili; mumewe, kwa kila upande, austahili kutoka kwake. Hii ndiyo namna ya imani ambayo waaminio walio na furaha zaidi huitenda kwa Kristo. Hakuna tabibu kama yeye, hakuna awezaye kuokoa kama awezavyo yeye; twampenda, naye atupenda, na kwa hiyo twajiweka mikononi mwake, twakubali cho chote akiagizacho, na kufanya lo lote aamuruo. Twahisi kwamba hakuna litakaloagizwa vibaya wakati yeye ndiye mwelekezaji wa mambo yetu; kwa maana atupenda mno hata asiweze kutuacha tuangamie, wala kuteseka uchungu mmoja usio na sababu.

Imani ni shina la utii, na hili laweza kuonekana wazi katika mambo ya maisha. Nahodha amtumainipo rubani kuiongoza meli yake hata bandarini huiendesha meli kwa kadiri ya maagizo yake. Msafiri amtumainipo kiongozi kumvusha mahali pagumu pa kupita, hufuata njia ambayo kiongozi wake humwonyesha. Mgonjwa amwaminipo tabibu, hufuata kwa uangalifu maagizo na maelekezo yake. Imani ikataayo kuzitii amri za Mwokozi ni unafiki mtupu, wala haitaokoa nafsi kamwe. Twamtumaini Yesu atuokoe; hutupa maelekezo juu ya njia ya wokovu; twayafuata maelekezo hayo nasi twaokolewa. Msomaji wangu asilisahau hili. Mtumaini Yesu, na kulithibitisha tumaini lako kwa kufanya lo lote akuamuruo.

Namna mashuhuri ya imani hutokana na maarifa ya hakika; hii hutoka katika kukua katika neema, nayo ni imani imwaminiyo Kristo kwa sababu imemjua, na kumtumaini kwa sababu imemthibitisha kuwa mwaminifu asiyekosea kamwe. Mkristo mmoja mzee alikuwa na desturi ya kuandika herufi T na P pembeni mwa Biblia yake kila alipokuwa amejaribu na kuithibitisha ahadi. Ni rahisi kama nini kumtumaini Mwokozi aliyejaribiwa na kuthibitishwa! Huwezi kufanya hivi bado, lakini utafanya hivyo. Kila kitu ni lazima kiwe na mwanzo. Utapanda hata imani yenye nguvu kwa wakati wake. Imani hii iliyokomaa haiombi ishara wala alama, bali huamini kwa ujasiri. Tazama imani ya nahodha bingwa--mara nyingi nimeistaajabia. Huifungua kamba yake, husafiri kwa mvuke mbali na nchi kavu. Kwa siku, wiki, au hata miezi, haoni tanga wala pwani; walakini huendelea mchana na usiku bila hofu, hata asubuhi moja hujikuta yu kinyume kabisa cha bandari aitakayo ambayo amekuwa akiielekea. Amewezaje kuipata njia yake juu ya kilindi kisicho na njia? Ametumaini dira yake, na kalenda yake ya baharini, na darubini yake, na miili ya mbinguni; na kwa kutii mwongozo wao, bila kuiona nchi, ameongoza kwa usahihi hata haitaji kubadili nukta moja ili kuingia bandarini. Ni jambo la ajabu--kule kusafiri au kwenda kwa mvuke bila kuona. Kiroho ni jambo la baraka kuziacha kabisa pwani za kuona na kuhisi, na kusema, "Kwa heri" kwa hisia za ndani, majaliwa yenye kufariji, ishara, alama, na kadhalika. Ni utukufu kuwa mbali baharini juu ya bahari ya upendo wa kimungu, ukimwamini Mungu, na kuelekea Mbinguni moja kwa moja kwa mwongozo wa Neno la Mungu. "Heri wale wasioona, wakaamini"; kwao watapewa kuingia kwa wingi mwishoni, na safari salama njiani. Je, msomaji wangu hatamtumaini Mungu katika Kristo Yesu? Hapo napumzika kwa tumaini lenye furaha. Ndugu, njoo pamoja nami, umwamini Baba yetu na Mwokozi wetu. Njoo mara moja.