Kwa Nini Twaokolewa kwa Imani?

KWA NINI IMANI IMECHAGULIWA kuwa njia ya wokovu? Bila shaka swali hili huulizwa mara nyingi. "Kwa neema mmeokolewa kwa njia ya imani," hakika ndilo fundisho la Maandiko Matakatifu, na amri ya Mungu; lakini kwa nini iwe hivyo? Kwa nini imani ichaguliwe badala ya tumaini, au upendo, au uvumilivu?

Yatupasa kuwa wanyenyekevu katika kujibu swali kama hilo, kwa maana njia za Mungu haziwezekani kueleweka sikuzote; wala haturuhusiwi kwa kiburi kuzihoji. Kwa unyenyekevu twaweza kujibu ya kwamba, kwa kadiri tuwezavyo kutambua, imani imechaguliwa kuwa njia ya neema, kwa sababu imani ina uwezo wa asili wa kutumika kama mpokeaji. Tuseme ninakaribia kumpa maskini sadaka: naiweka mkononi mwake--kwa nini? Naam, isingefaa kuiweka sikioni mwake, au kuiweka juu ya mguu wake; mkono waonekana umeumbwa mahsusi ili kupokea. Vivyo hivyo, katika hali yetu ya akili, imani imeumbwa mahsusi kuwa mpokeaji: ni mkono wa mtu, na kuna kufaa katika kupokea neema kwa njia yake.

Niache niweke jambo hili wazi kabisa. Imani impokeayo Kristo ni tendo rahisi kama vile mtoto wako apokeavyo tunda kutoka kwako, kwa sababu wewe walinyoosha na kuahidi kumpa tunda hilo akija kwa ajili yake. Kuamini na kupokea kunahusu tunda tu; lakini kunafanyiza tendo lilo hilo kabisa kama imani ihusikayo na wokovu wa milele. Kama vile mkono wa mtoto ulivyo kwa tunda, ndivyo imani yako ilivyo kwa wokovu mkamilifu wa Kristo. Mkono wa mtoto hautengenezi tunda, wala hauliboreshi tunda, wala haustahili tunda; walitwaa tu; na imani imechaguliwa na Mungu kuwa mpokeaji wa wokovu, kwa sababu haijidai kuumba wokovu, wala kuusaidia, bali yaridhika kwa unyenyekevu kuupokea. "Imani ni ulimi uombao msamaha, mkono uupokeao, na jicho liuonalo; lakini si bei iununuayo." Imani haijifanyi kamwe kuwa hoja yake mwenyewe, huegemeza hoja yake yote juu ya damu ya Kristo. Huwa mtumishi mwema wa kuleta utajiri wa Bwana Yesu kwa nafsi, kwa sababu hukiri ni wapi alipouchota, na hukubali ya kwamba neema peke yake ndiyo iliyomkabidhi.

Tena, imani bila shaka imechaguliwa kwa sababu humpa Mungu utukufu wote. Ni kwa imani ili iwe kwa neema, na ni kwa neema ili pasiwe na kujisifu; kwa maana Mungu hawezi kuvumilia kiburi. "Mwenye kiburi humtambua tokea mbali," wala hana haja ya kuwakaribia. Hatatoa wokovu kwa njia itakayodokeza au kukuza kiburi. Paulo asema, "Si kwa matendo, mtu awaye yote asije akajisifu." Basi, imani huondoa kujisifu kote. Mkono upokeao sadaka hausemi, "Yanipasa nishukuriwe kwa kupokea kipawa"; hilo lingekuwa upumbavu. Mkono uupelekapo mkate kinywani hausemi kwa mwili, "Nishukuru; kwa maana nakulisha." Ni jambo rahisi sana afanyalo mkono ingawa ni jambo la lazima sana; wala haujitwalii utukufu kamwe kwa afanyalo. Vivyo hivyo Mungu ameichagua imani ipokee kipawa kisichoelezeka cha neema yake, kwa sababu haiwezi kujitwalia sifa yoyote, bali sharti imwabudu Mungu mwenye neema aliye mtoaji wa kila kilicho chema. Imani huweka taji juu ya kichwa kilichostahili, na kwa sababu hiyo Bwana Yesu alikuwa na desturi ya kuweka taji juu ya kichwa cha imani, akisema, "Imani yako imekuokoa; enenda zako kwa amani."

Tena, Mungu huichagua imani kuwa njia ya wokovu kwa sababu ni njia ya hakika, imwungayo mwanadamu na Mungu. Mtu amtumainiapo Mungu, huwako mahali pa muungano kati yao, na muungano huo huhakikisha baraka. Imani hutuokoa kwa sababu hutufanya kumshika Mungu sana, na hivyo hutuleta katika uhusiano naye. Mara nyingi nimetumia mfano ufuatao, lakini sharti niurudie, kwa maana siwezi kuwaza ulio bora zaidi. Naambiwa ya kwamba miaka mingi iliyopita mashua ilipinduka juu ya maporomoko ya Niagara, na watu wawili walikuwa wakichukuliwa na maji, watu waliokuwa ukingoni walipofanikiwa kuwaelekezea kamba juu ya maji, nayo kamba ikashikwa nao wote wawili. Mmoja wao aliishika sana akavutwa salama hata ukingoni; bali yule mwingine, alipoona gogo kubwa likielea likija, kwa upumbavu aliiacha kamba akalishika gogo, kwa maana ndilo lililokuwa kubwa zaidi kati ya vyote viwili, na kwa dhahiri lilionekana bora zaidi kulishika. Ole! gogo pamoja na mtu aliye juu yake likaenda moja kwa moja juu ya lile shimo kubwa, kwa sababu hapakuwa na muungano kati ya gogo na ukingo. Ukubwa wa gogo haukuwa na faida kwake yeye aliyelishika; palihitajika uhusiano na ukingo ili kuleta usalama. Vivyo hivyo mtu ategemeapo matendo yake, au sakramenti, au kitu chochote cha namna hiyo, hataokoka, kwa sababu hapana kiungo kati yake na Kristo; bali imani, ingawa yaweza kuonekana kama uzi mwembamba, imo mikononi mwa Mungu mkuu upande wa ukingo; nguvu zisizo na ukomo huvuta ule uzi uunganishao, na hivyo humvuta mtu kutoka katika uharibifu. Ee heri ya imani, kwa sababu hutuunga na Mungu!

Imani huchaguliwa tena, kwa sababu hugusa chemchemi za matendo. Hata katika mambo ya kawaida imani ya namna fulani ndiyo msingi wa yote. Nastaajabu kama nitakosea nikisema ya kwamba hatutendi kamwe neno lolote isipokuwa kwa imani ya namna fulani. Nikipita chumbani mwangu cha kusomea ni kwa sababu naamini ya kuwa miguu yangu itanichukua. Mtu hula kwa sababu huamini ulazima wa chakula; huenda biasharani kwa sababu huamini thamani ya fedha; hupokea hundi kwa sababu huamini ya kwamba benki itaiheshimu. Kolumbo aliigundua Amerika kwa sababu aliamini ya kuwa kulikuwa na bara jingine ng'ambo ya bahari; na wale Mababa Wasafiri waliikalia kwa sababu waliamini ya kwamba Mungu angekuwa pamoja nao katika zile fuo za miamba. Matendo mengi makuu yamezaliwa na imani; kwa jema au kwa baya, imani hutenda maajabu kwa mtu ambaye hukaa ndani yake. Imani katika hali yake ya asili ni nguvu ishindayo yote, iingiayo katika kila namna ya matendo ya wanadamu. Yamkini yeye aidhihakiye imani katika Mungu ndiye mtu aliye na imani nyingi kuliko wote katika hali mbaya; naam, kwa kawaida huanguka katika usadikivu ambao ungekuwa wa kuchekesha, kama usingekuwa wa aibu. Mungu humpa imani wokovu, kwa sababu kwa kuumba imani ndani yetu hugusa hivyo kiini hasa cha hisia na matendo yetu. Amemiliki, kwa kusema, ile betri na sasa aweza kupeleka mkondo mtakatifu kwa kila sehemu ya asili yetu. Tumwaminipo Kristo, na moyo umekwisha kuwa milki ya Mungu, ndipo twaokolewa na dhambi, na twasukumwa kuelekea toba, utakatifu, bidii, sala, kujiweka wakfu, na kila jambo jingine la neema. "Kile ambacho mafuta ni kwa magurudumu, kile ambacho mizani ni kwa saa, kile ambacho mbawa ni kwa ndege, kile ambacho matanga ni kwa merikebu, ndivyo imani ilivyo kwa kazi na huduma zote takatifu." Uwe na imani, na neema nyingine zote zitafuata na kudumu kushika mwendo wake.

Tena, imani ina uwezo wa kutenda kazi kwa upendo; huathiri moyo kuuelekeza kwa Mungu, na kuuvuta moyo kuyafuata mambo yaliyo bora. Yeye amwaminiye Mungu bila shaka lolote atampenda Mungu. Imani ni tendo la akili; lakini pia hutoka moyoni. "Kwa moyo mtu huamini hata kupata haki"; na kwa hiyo Mungu humpa imani wokovu kwa sababu hukaa jirani kabisa na moyo, na ni ndugu wa karibu wa upendo; na upendo ndio mzazi na mlezi wa kila hisia na tendo takatifu. Kumpenda Mungu ni utii, kumpenda Mungu ni utakatifu. Kumpenda Mungu na kumpenda mwanadamu ni kufananishwa na sura ya Kristo; na huu ndio wokovu.

Zaidi ya hayo, imani huzaa amani na furaha; yeye aliye nayo hupumzika, na hutulia, hufurahi na kushangilia, na hii ni maandalizi kwa ajili ya mbinguni. Mungu huvipa imani vipawa vyote vya mbinguni, kwa sababu hii miongoni mwa nyinginezo, ya kwamba imani hutenda kazi ndani yetu uzima na roho ile itakayodhihirishwa milele katika ulimwengu ule wa juu ulio bora zaidi. Imani hutuvika silaha kwa ajili ya uzima huu, na elimu kwa ajili ya uzima ujao. Humwezesha mtu kuishi na kufa bila hofu; humwandaa kwa tendo na kwa mateso; na kwa hiyo Bwana huichagua kuwa njia iliyo rahisi zaidi ya kutupelekea neema, na kwa hivyo kutuhifadhi kwa ajili ya utukufu.

Hakika imani hutufanyia lisiloweza kufanywa na kitu kingine chochote; hutupa furaha na amani, na hutufanya tuingie rahani. Kwa nini watu hujaribu kupata wokovu kwa njia nyingine? Mhubiri mmoja wa zamani asema, "Mtumishi mpumbavu aambiwaye kufungua mlango, huutia bega lake na kuusukuma kwa nguvu zake zote; lakini mlango hausogei, wala hawezi kuingia, atumie nguvu zozote awezazo. Mwingine huja na ufunguo, na kwa urahisi hufungua mlango, na kuingia mara moja. Wale watakao kuokolewa kwa matendo wanausukuma mlango wa mbinguni bila mafanikio; bali imani ndio ufunguo uufunguao mlango papo hapo." Wewe msomaji, hutautumia ufunguo huo? Bwana anakuamuru uamini katika Mwanawe mpendwa, kwa hiyo waweza kufanya hivyo; na ukifanya hivyo utaishi. Je, hii siyo ahadi ya injili, "Aaminiye na kubatizwa ataokoka"? (Marko 16:16). Waweza kuwa na pingamizi gani juu ya njia ya wokovu ijipendekezayo yenyewe kwa rehema na hekima ya Mungu wetu mwenye neema?