Kwa Neema kwa Njia ya Imani

"Mmeokolewa kwa neema, kwa njia ya imani" (Waefeso 2:8).

NAONA NI VYEMA kugeuka kando kidogo ili nikuombe wewe msomaji wangu utazame kwa ibada chemchemi ya wokovu wetu, ndiyo neema ya Mungu. "Mmeokolewa kwa neema." Kwa sababu Mungu ni mwenye neema, ndiyo maana watu wenye dhambi husamehewa, hugeuzwa, husafishwa, na kuokolewa. Si kwa sababu ya kitu chochote kilichomo ndani yao, wala kiwezacho kuwamo ndani yao, ndipo wanaokolewa; bali ni kwa sababu ya upendo, wema, huruma, rehema, fadhili, na neema ya Mungu isiyo na mipaka. Basi ngoja kitambo kidogo penye chemchemi yenyewe. Tazama mto safi wa maji ya uzima, utokao katika kiti cha enzi cha Mungu na cha Mwana-Kondoo!

Neema ya Mungu ni shimo lisilo na kina! Ni nani awezaye kupima upana wake? Ni nani awezaye kuvumbua kina chake? Kama sifa nyingine zote za Uungu, haina kikomo. Mungu amejaa upendo, kwa maana "Mungu ni upendo." Mungu amejaa wema; jina lenyewe "God" ni kifupi cha "good," yaani "mwema." Wema na upendo usio na mipaka huingia katika asili yenyewe ya Uungu. Ni kwa sababu "fadhili zake ni za milele" ndipo watu hawaangamizwi; ni kwa sababu "rehema zake hazikomi" ndipo wenye dhambi huletwa kwake na kusamehewa.

Kumbuka jambo hili; la sivyo waweza kuanguka katika kosa kwa kuikaza akili yako sana juu ya imani iliyo mfereji wa wokovu hata ukaisahau neema iliyo chemchemi na chanzo cha imani yenyewe. Imani ni kazi ya neema ya Mungu ndani yetu. Hakuna mtu awezaye kusema ya kwamba Yesu ndiye Kristo isipokuwa kwa Roho Mtakatifu. "Hakuna mtu awezaye kuja kwangu," asema Yesu, "asipovutwa na Baba aliyenipeleka." Hivyo imani, ndiyo kuja kwa Kristo, ni tokeo la kuvutwa na Mungu. Neema ndiyo kianzio na kikomo cha wokovu; na imani, ingawa ni ya lazima, ni sehemu ya maana tu ya mtambo ambao neema huutumia. Tunaokolewa "kwa njia ya imani," lakini wokovu ni "kwa neema." Zitangaze maneno hayo kama kwa baragumu ya malaika mkuu: "Mmeokolewa kwa neema." Habari njema kama nini kwa wasiostahili!

Imani inashika nafasi ya mfereji au bomba la kupitishia maji. Neema ndiyo chemchemi na kijito; imani ndiyo mfereji ambao gharika ya rehema hushuka kwao ili kuwaburudisha wana wa watu wenye kiu. Ni jambo la kusikitisha sana mfereji unapovunjika. Ni mandhari ya huzuni kuiona mifereji mingi mikubwa kandokando ya Rumi ambayo haipitishi tena maji kuingia mjini, kwa sababu matao yamevunjika na majengo hayo ya ajabu yamekuwa magofu. Mfereji sharti uwekwe mzima ili kupitisha mkondo; na vivyo hivyo, imani sharti iwe ya kweli na thabiti, ikiongoza moja kwa moja hata kwa Mungu na kushuka moja kwa moja hata kwetu, ili iwe mfereji wa rehema wenye faida kwa nafsi zetu.

Hata hivyo, nakukumbusha tena ya kwamba imani ni mfereji au njia tu, wala si chemchemi yenyewe, nasi haitupasi kuiangalia kiasi cha kuiinua juu ya chanzo cha kimungu cha baraka zote kilicho katika neema ya Mungu. Kamwe usiifanye imani yako kuwa Kristo, wala usiifikirie kana kwamba ni chanzo cha wokovu wako kinachojitegemea. Uzima wetu unapatikana katika "kumtazama Yesu," wala si katika kuitazama imani yetu wenyewe. Kwa imani mambo yote hutuwezekana; lakini nguvu haziko katika imani, bali katika Mungu ambaye imani humtegemea. Neema ndiyo injini yenye nguvu, na imani ndiyo mnyororo ambao kwao gari la nafsi hufungwa katika ile nguvu kuu iendeshayo. Haki ya imani si ubora wa kimaadili wa imani, bali ni haki ya Yesu Kristo ambayo imani huishika na kuimiliki. Amani iliyo ndani ya nafsi haitokani na kuitafakari imani yetu wenyewe; bali hutujia kutoka kwake yeye aliye amani yetu, ambaye imani hugusa pindo la vazi lake, na uwezo hutoka kwake kuingia nafsini.

Basi ona, rafiki mpendwa, ya kwamba udhaifu wa imani yako hautakuangamiza. Mkono utetemekao waweza kupokea zawadi ya dhahabu. Wokovu wa Bwana waweza kutujia ijapokuwa tuna imani kama punje ya haradali tu. Nguvu ziko katika neema ya Mungu, wala si katika imani yetu. Jumbe kubwa zaweza kupelekwa kwa njia ya nyaya nyembamba, na ushuhuda utoao amani wa Roho Mtakatifu waweza kuufikia moyo kwa njia ya imani iliyo kama uzi ambayo yaonekana karibu haiwezi kujistahimili uzito wake yenyewe. Mfikirie zaidi yeye umtazamaye kuliko kule kutazama kwenyewe. Lazima uutazame mbali hata na kutazama kwako mwenyewe, usione kitu ila Yesu, na neema ya Mungu iliyodhihirishwa ndani yake.