Habari za Kuokolewa na Kutenda Dhambi

HAPA NINGEPENDA kusema neno moja au mawili yaliyo wazi kwa wale wanaoifahamu njia ya kuhesabiwa haki kwa imani iliyo katika Kristo Yesu, lakini shida yao ni kwamba hawawezi kuacha kutenda dhambi. Kamwe hatuwezi kuwa na furaha, wala raha, wala afya ya kiroho hata tutakapokuwa watakatifu. Hatuna budi kuiondoa dhambi; lakini kuondolewa huku kutafanywaje? Hili ndilo swali la uzima au mauti kwa watu wengi. Asili ya kale ina nguvu sana, nao wamejaribu kuizuia na kuifuga; lakini haitawaliki, nao hujikuta, ijapokuwa wanatamani kuwa bora, wakizidi kuwa wabaya kuliko kwanza. Moyo ni mgumu mno, nia ni shupavu mno, tamaa ni kali mno, mawazo ni ya kigeugeu mno, fikira haziongozeki, shauku ni za kishenzi mno, hata mtu huhisi kwamba ana pango la wanyama wa mwitu ndani yake, watakaomla kabla ya kutawaliwa naye. Twaweza kuinena asili yetu iliyoanguka kama vile Bwana alivyomwambia Ayubu katika habari za Lewiathani: "Je! Utacheza naye kama na ndege? Au utamfunga kwa ajili ya wanawali wako?" Mtu angeweza vivyo hivyo kutumaini kuushika upepo wa kaskazi katika kiganja cha mkono wake kama anavyotumaini kuzitawala kwa nguvu zake mwenyewe nguvu hizo za dhoruba zikaazo ndani ya asili yake iliyoanguka. Hii ni kazi kubwa kuliko kazi zote za hadithi za Herkulesi: Mungu anahitajiwa hapa.

"Ningeweza kuamini kwamba Yesu angeisamehe dhambi," asema mtu mmoja, "lakini shida yangu ni kwamba natenda dhambi tena, na kwamba nahisi mielekeo ya kutisha ya uovu ndani yangu. Kama vile jiwe, likirushwa juu hewani, lirudivyo chini haraka tena, ndivyo nami, ijapokuwa napandishwa mbinguni kwa mahubiri ya bidii, narudi tena katika hali yangu ya kutokuhisi. Ole wangu! Nashawishika kwa urahisi na macho ya nyoka fira ya dhambi, na hivyo nashikwa kama chini ya uchawi, hata siwezi kuponyoka kutoka katika upumbavu wangu mwenyewe."

Rafiki mpendwa, wokovu ungekuwa jambo lisilokamilika kwa kusikitisha kama usingelishughulika na sehemu hii ya hali yetu iliyoharibika. Twataka kutakaswa kama vile tunavyotaka kusamehewa. Kuhesabiwa haki bila utakaso kusingekuwa wokovu hata kidogo. Kungemwita mwenye ukoma kuwa safi, na kumwacha afe kwa ugonjwa wake; kungeisamehe uasi na kumwacha mwasi abaki adui wa mfalme wake. Kungeondoa matokeo lakini kuupuuze chanzo, na hili lingetuachia kazi isiyo na mwisho wala tumaini mbele yetu. Kungeukomesha mto kwa muda, lakini kuiacha chemchemi ya unajisi iliyo wazi, ambayo mapema au baadaye ingebubujika kwa nguvu zaidi. Kumbuka ya kuwa Bwana Yesu alikuja kuiondoa dhambi kwa njia tatu; alikuja kuiondoa adhabu ya dhambi, nguvu ya dhambi, na, mwishoni, uwepo wa dhambi. Papo hapo waweza kuifikia sehemu ya pili--nguvu ya dhambi yaweza kuvunjwa mara moja; na hivyo utakuwa njiani kuelekea ya tatu, yaani, kuondolewa kwa uwepo wa dhambi. "Nasi twajua ya kuwa yeye alidhihirishwa, ili aziondoe dhambi zetu."

Malaika alinena juu ya Bwana wetu, "Nawe utamwita jina lake Yesu, kwa maana yeye ndiye atakayewaokoa watu wake na dhambi zao." Bwana wetu Yesu alikuja kuziangamiza ndani yetu kazi za Ibilisi. Lile lililonenwa wakati wa kuzaliwa kwa Bwana wetu lilitangazwa pia katika kufa kwake; kwa maana askari alipoutoboa ubavu wake, mara ikatoka damu na maji, ili kuonyesha uponyaji maradufu ambao kwa huo twaokolewa na hatia na unajisi wa dhambi.

Lakini, kama unasumbuka kwa habari ya nguvu ya dhambi, na kwa habari ya mielekeo ya asili yako, kama vile yawezavyo kukupata, tazama hapa kuna ahadi kwa ajili yako. Iamini, kwa maana imesimama katika lile agano la neema lililopangwa katika mambo yote, tena la hakika. Mungu, asiyeweza kusema uongo, amesema katika Ezekieli 36:26:

Nami nitawapa ninyi moyo mpya, nami nitatia roho mpya ndani yenu; nami nitauondoa moyo wa jiwe katika mwili wenu, nami nitawapa moyo wa nyama.

Waona, yote ni "Nitafanya," na "Nitafanya." "Nitawapa," na "Nitaondoa." Huu ndio mtindo wa kifalme wa Mfalme wa wafalme, awezaye kuyatimiza mapenzi yake yote. Hakuna neno lake litakaloanguka chini kamwe.

Bwana anajua vema kwamba wewe huwezi kuubadili moyo wako mwenyewe, wala huwezi kuitakasa asili yako mwenyewe; lakini yeye ajua pia kwamba yeye aweza kufanya yote mawili. Yeye aweza kumfanya Mkushi aibadili ngozi yake, na chui madoa yake. Sikia haya, ukastaajabu: yeye aweza kukuumba mara ya pili; aweza kukufanya uzaliwe mara ya pili. Huu ni muujiza wa neema, lakini Roho Mtakatifu ataitenda. Lingekuwa jambo la ajabu sana kama mtu angeweza kusimama chini ya maporomoko ya Niagara, na kunena neno litakalofanya mto Niagara uanze kupanda kinyume cha mkondo, na kuruka juu ya genge lile kubwa ambalo sasa unabubujika juu yake kwa nguvu za kutisha. Hakuna kitu ila nguvu za Mungu zingeweza kutimiza ajabu hiyo; lakini hilo lingekuwa zaidi ya mfano ufaao wa lile lingelotokea kama mwelekeo wa asili yako ungegeuzwa kabisa. Yote yanawezekana kwa Mungu. Yeye aweza kuugeuza mwelekeo wa tamaa zako na mkondo wa maisha yako, na badala ya kushuka chini kutoka kwa Mungu, aweza kufanya nafsi yako yote ielekee juu kumwendea Mungu. Hilo, kwa kweli, ndilo Bwana alilloahidi kuwafanyia wote walio katika agano; nasi twajua kutokana na Maandiko ya kuwa waaminio wote wamo katika agano. Niache niyasome maneno hayo tena:

Nami nitatia roho mpya ndani yenu; nami nitauondoa moyo wa jiwe katika mwili wenu, nami nitawapa moyo wa nyama. (Ezekieli 11:19).

Ni ahadi ya ajabu kama nini! Nayo ni ndiyo na amina katika Kristo Yesu kwa utukufu wa Mungu kwa njia yetu. Na tuishike; tuikubali kuwa kweli, na kuifanya kuwa yetu wenyewe. Ndipo itakapotimizwa ndani yetu, nasi tutakuwa na sababu, katika siku na miaka ijayo, ya kuimba juu ya badiliko lile la ajabu ambalo neema kuu ya Mungu imelitenda ndani yetu.

Yafaa sana kutafakari ya kwamba Bwana auondoapo moyo wa jiwe, tendo hilo limekwisha kutendeka; na hapo lilipokwisha tendeka, hakuna nguvu ijulikanayo iwezayo kamwe kuuondoa moyo ule mpya autoao, na roho ile ya haki aitiayo ndani yetu. "Kwa maana karama za Mungu na wito wake ni vitu asivyojuta"; yaani, pasipo yeye kujuta; hataondoa alichokwisha kutoa. Mwache akufanye upya nawe utafanywa upya. Marekebisho ya mwanadamu na kujisafisha kwake huisha upesi, kwa maana mbwa hurudia matapiko yake; lakini Mungu awekapo moyo mpya ndani yetu, moyo huo mpya wakaa humo milele, wala hautakuwa mgumu kuwa jiwe tena kamwe. Yeye aliyeufanya kuwa nyama atauhifadhi hivyo. Katika hili twaweza kufurahi na kushangilia milele katika kile Mungu akiumbacho katika ufalme wa neema yake.

Kuliweka jambo hili kwa urahisi kabisa--je, umepata kusikia mfano wa Bwana Rowland Hill wa paka na nguruwe jike? Nitautoa kwa namna yangu mwenyewe, ili kuonyesha maana ya maneno yenye nguvu ya Mwokozi wetu--"Hamna budi kuzaliwa mara ya pili." Wamwona paka yule? Ni kiumbe safi kama nini! Jinsi ajiogeshavyo kwa ustadi kwa ulimi wake na miguu yake! Ni jambo la kupendeza kweli! Je, umepata kumwona nguruwe jike akifanya hivyo? La, hukupata kamwe. Ni kinyume cha asili yake. Hupendelea kugaagaa matopeni. Nenda ukamfundishe nguruwe jike kujiosha, ukaone ni mafanikio madogo kama nini utakayopata. Lingekuwa jambo kubwa la usafi kama nguruwe wangekuwa safi. Wafundishe kujiosha na kujisafisha kama vile paka alivyokuwa akifanya! Kazi bure. Waweza kwa nguvu kumwosha nguruwe jike yule, lakini huharakisha matopeni, na mara huwa mchafu kama kwanza. Njia pekee uwezayo kumfanya nguruwe jike ajioshe ni kumbadili awe paka; ndipo atakapojiosha na kuwa safi, lakini si kabla ya hapo! Dhania kwamba mabadiliko hayo yamekamilishwa, ndipo kile kilichokuwa kigumu au kisichowezekana ni chepesi vya kutosha; nguruwe tangu hapo atafaa kwa sebule yako na kwa zulia lako la mekoni. Ndivyo ilivyo kwa mtu asiyemcha Mungu; huwezi kumlazimisha afanye lile ambalo mtu aliyefanywa upya hulifanya kwa hiari kabisa; waweza kumfundisha, na kumwekea kielelezo chema, lakini hawezi kujifunza ustadi wa utakatifu, kwa maana hana nia nao; asili yake humwelekeza njia nyingine. Bwana amfanyapo kuwa mtu mpya, ndipo vitu vyote huvaa sura tofauti. Badiliko hili ni kubwa mno, hata siku moja nalimsikia mtu aliyeongoka akisema, "Ama ulimwengu wote umebadilika, au sivyo mimi ndimi." Asili mpya hufuata lililo jema kwa kawaida kama vile asili ya kale itangatangavyo kuandama lililo baya. Ni baraka iliyoje kupokea asili kama hiyo! Roho Mtakatifu peke yake ndiye awezaye kuitoa.

Je, imepata kukugusa moyo ni jambo la ajabu kama nini kwa Bwana kumpa mtu moyo mpya na roho ya haki? Labda umepata kumwona kamba, aliyepigana na kamba mwingine, akapoteza mojawapo ya makucha yake, na kucha jipya likaota. Hilo ni jambo la kushangaza; lakini ni jambo la kustaajabisha zaidi sana kwamba mtu apewe moyo mpya. Hili, kwa hakika, ni muujiza upitao nguvu za maumbile. Kuna mti. Ukikata mojawapo ya matawi yake, jingine laweza kuota mahali pake; lakini je, waweza kuubadili mti; waweza kuutamu utomvu mchungu; waweza kufanya mwiba uzae tini? Waweza kupandikiza kitu kilicho bora zaidi ndani yake, na huo ndio mfano ambao maumbile hutupa juu ya kazi ya neema; lakini kuubadili kabisa utomvu ulio uhai wa mti ungekuwa muujiza kweli kweli. Ajabu na siri ya nguvu kama hiyo Mungu huitenda ndani ya wote wamwaminio Yesu.

Kama ukijisalimisha kwa kazi yake ya kiungu, Bwana ataibadili asili yako; ataitiisha asili ya kale, na kukupulizia uhai mpya. Weka tumaini lako kwa Bwana Yesu Kristo, naye atauondoa moyo wa jiwe katika mwili wako, naye atakupa moyo wa nyama. Pale ambapo kila kitu kilikuwa kigumu, kila kitu kitakuwa kilaini; pale ambapo kila kitu kilikuwa kiovu, kila kitu kitakuwa chema: pale ambapo kila kitu kilielekea chini, kila kitu kitapanda juu kwa nguvu za kasi. Simba wa hasira atatoa nafasi kwa mwana-kondoo wa upole; kunguru wa uchafu atakimbia mbele ya njiwa wa usafi; nyoka mbaya wa hila atakanyagwa chini ya kisigino cha kweli.

Nimeona kwa macho yangu mwenyewe mabadiliko ya ajabu namna hiyo ya tabia za kiadili na za kiroho hata sikati tamaa juu ya mtu ye yote. Ningeweza, kama ingelifaa, kuwaonyesha wale waliokuwa wanawake wasio na usafi wa mwili ambao sasa ni safi kama theluji iliyopeperushwa, na watu waliokuwa wakikufuru ambao sasa huwafurahisha wote walio karibu nao kwa ujitoaji wao mwingi. Wevi hufanywa waaminifu, walevi wenye kiasi, waongo wenye kweli, na wenye dhihaka wenye bidii. Po pote neema ya Mungu ilipomtokea mtu imemfundisha kukataa ubaya wa kutomcha Mungu na tamaa za kidunia, na kuishi kwa kiasi, na kwa haki, na kwa kumcha Mungu katika ulimwengu huu wa sasa ulio mbaya: na, msomaji mpendwa, itakutendea wewe vivyo hivyo.

"Siwezi kufanya badiliko hili," asema mtu. Ni nani aliyesema ya kwamba waweza? Andiko tulilolinukuu halineni juu ya lile mwanadamu atakalofanya, bali juu ya lile Mungu atakalofanya. Ni ahadi ya Mungu, na ni juu yake yeye kuyatimiza maagano yake mwenyewe. Mtumaini yeye kulitimiza Neno lake kwako, nalo litatendeka.

"Lakini litatendekaje?" Hilo ni shughuli yako wewe? Je, ni lazima Bwana aeleze njia zake kabla wewe hujamwamini? Kazi ya Bwana katika jambo hili ni siri kubwa: Roho Mtakatifu ndiye aitendaye. Yeye aliyeitoa ahadi ndiye mwenye wajibu wa kuishika ahadi, naye anatosha kwa nafasi hiyo. Mungu, aahidiye badiliko hili la ajabu, kwa hakika atalitimiza katika wote wampokeao Yesu, kwa maana wote hao huwapa uwezo wa kufanywa wana wa Mungu. Laiti ungeliamini! Laiti ungelimtendea Bwana mwenye neema haki ya kuamini kwamba yeye aweza na atakutendea jambo hili, ijapokuwa litakuwa muujiza mkubwa! Laiti ungeliamini kwamba Mungu hawezi kusema uongo! Laiti ungelimtumaini kwa moyo mpya, na roho ya haki, kwa maana yeye aweza kukupa hivyo! Bwana na akupe imani katika ahadi yake, imani katika Mwanawe, imani katika Roho Mtakatifu, na imani ndani yake, na kwake yeye kutakuwa sifa na heshima na utukufu milele na milele! Amina.