Mwenye Haki na Mwenye Kuhesabia Haki

TUMEKWISHA KUONA wasio watauwa wakihesabiwa haki, nasi tumelitafakari lile kweli kuu, ya kwamba Mungu peke yake ndiye awezaye kumhesabia haki mtu ye yote; sasa twasonga hatua moja mbele na kuuliza swali hili--Awezaje Mungu aliye mwenye haki kumhesabia haki watu wenye hatia? Hapa twakutana na jibu kamili katika maneno ya Paulo, katika Warumi 3:21-26. Tutasoma mistari sita kutoka katika sura hiyo ili tupate mwendo wa fungu hili:

"Lakini sasa, haki ya Mungu imedhihirika pasipo sheria, inashuhudiwa na torati na manabii; ni haki ya Mungu iliyo kwa njia ya imani katika Yesu Kristo kwa wote na juu ya wote waaminio; maana hakuna tofauti; kwa sababu wote wamefanya dhambi, na kupungukiwa na utukufu wa Mungu; wanahesabiwa haki bure kwa neema yake, kwa njia ya ukombozi ulio katika Kristo Yesu; ambaye Mungu amekwisha kumweka awe upatanisho kwa njia ya imani katika damu yake, ili aonyeshe haki yake, kwa sababu ya kuziachilia dhambi zote zilizotangulia kufanywa, katika ustahimili wa Mungu; naam, ili kuionyesha haki yake wakati huu, apate kuwa mwenye haki, na mwenye kumhesabia haki yeye amwaminiye Yesu."

Niruhusu hapa nikupe kidogo cha mambo niliyoyaona mwenyewe. Nilipokuwa chini ya mkono wa Roho Mtakatifu, nikiwa chini ya kuhukumiwa kwa dhambi, nalikuwa na hisia iliyo wazi na kali ya haki ya Mungu. Dhambi, iwe nini kwa watu wengine, kwangu mimi ilikuwa mzigo usiovumilika. Haikuwa sana kwamba naliiogopa jehanamu, bali kwamba naliiogopa dhambi. Nalijijua kuwa mwenye hatia ya kutisha kiasi kwamba nakumbuka kuhisi ya kwamba kama Mungu asingeniadhibu kwa ajili ya dhambi, ilimpasa kufanya hivyo. Nalihisi ya kwamba Mwamuzi wa dunia yote ilimpasa kuihukumu dhambi kama yangu. Naliketi katika kiti cha hukumu, nikajihukumu mwenyewe niangamie; kwa maana nalikiri ya kwamba kama ningekuwa Mungu, nisingeweza kufanya jingine ila kumpeleka kiumbe mwenye hatia kama nilivyokuwa mimi mpaka jehanamu iliyo chini kabisa. Wakati huo wote, moyoni mwangu nalikuwa na wasiwasi mkubwa kwa ajili ya heshima ya jina la Mungu, na unyofu wa serikali yake ya kimaadili. Nalihisi ya kwamba isingeituliza dhamiri yangu kama ningesamehewa pasipo haki. Ile dhambi niliyoifanya sharti iadhibiwe. Lakini ndipo palipokuwa na lile swali, jinsi Mungu awezavyo kuwa mwenye haki, na bado kunihesabia haki mimi niliyekuwa na hatia namna hiyo. Naliuliza moyo wangu: "Awezaje kuwa mwenye haki na wakati huo huo mwenye kuhesabia haki?" Nalitaabika na kuchoshwa na swali hili; wala sikuweza kuona jibu lo lote kwalo. Bila shaka, nisingeweza kamwe kubuni jibu ambalo lingeituliza dhamiri yangu.

Fundisho la upatanisho, kwa akili yangu, ni mojawapo ya ushahidi ulio hakika kabisa wa uvuvio wa Kimungu wa Maandiko Matakatifu. Ni nani ambaye angetaka au angeweza kuwaza juu ya Mtawala mwenye haki akifa kwa ajili ya mwasi asiye na haki? Haya si mafundisho ya visasili vya wanadamu, wala ndoto ya mawazo ya kishairi. Njia hii ya upatanisho yajulikana kati ya wanadamu kwa sababu tu ni jambo la kweli; hadithi za kubuni zisingeweza kuibuni. Mungu mwenyewe aliiamuru; si jambo ambalo lingeweza kuwaziwa.

Tangu ujana wangu nalikuwa nimeisikia mpango wa wokovu kwa njia ya dhabihu ya Yesu; lakini katika nafsi yangu ya ndani sikuujua zaidi kuliko kama ningezaliwa na kulelewa kuwa Mhotentoti. Nuru ilikuwapo, lakini mimi nalikuwa kipofu; ilikuwa lazima Bwana mwenyewe alifanye jambo hilo liwe dhahiri kwangu. Lilinijia kama ufunuo mpya, jipya kama vile nisingesoma kamwe katika Maandiko ya kwamba Yesu alitangazwa kuwa upatanisho kwa ajili ya dhambi ili Mungu awe mwenye haki. Naamini itampasa kuja kama ufunuo kwa kila mtoto wa Mungu aliyezaliwa upya kila aonapo hilo; namaanisha lile fundisho tukufu la Bwana Yesu kusimama badala yetu. Nalikuja kufahamu ya kwamba wokovu waliwezekana kwa njia ya dhabihu ya kubadilishana; na ya kwamba maandalizi yalikuwa yamefanywa katika utaratibu na mpangilio wa kwanza wa mambo kwa ajili ya ubadilishaji huo. Nalifanywa kuona ya kwamba yeye aliye Mwana wa Mungu, aliye sawa na Baba, na wa milele pamoja na Baba, tangu zamani alikuwa amefanywa Kichwa cha agano cha watu waliochaguliwa, ili katika daraja hiyo apate kuteseka kwa ajili yao na kuwaokoa. Kwa kuwa anguko letu halikuwa mwanzoni ni la binafsi, kwa maana tulianguka katika mwakilishi wetu wa shirika, yaani Adamu wa kwanza, ikawezekana kwetu kurudishwa kwa mwakilishi wa pili, yaani yeye aliyejitwika kuwa kichwa cha agano cha watu wake, apate kuwa Adamu wao wa pili. Naliona ya kwamba kabla sijafanya dhambi kwa hakika, nalikuwa nimeanguka kwa dhambi ya baba yangu wa kwanza; nami nalifurahi ya kwamba kwa hiyo, katika mambo ya sheria, ikawezekana kwangu kuinuka kwa kichwa na mwakilishi wa pili. Anguko kwa njia ya Adamu liliacha tundu la kutorokea; Adamu mwingine aweza kutengua uharibifu uliofanywa na wa kwanza. Nilipokuwa na wasiwasi juu ya uwezekano wa Mungu mwenye haki kunisamehe, nalifahamu na kuona kwa imani ya kwamba yeye aliye Mwana wa Mungu alifanyika mwanadamu, na katika nafsi yake mwenyewe iliyobarikiwa aliichukua dhambi yangu katika mwili wake mwenyewe juu ya mti. Naliona ya kwamba adhabu ya amani yangu iliwekwa juu yake, na ya kwamba kwa kupigwa kwake mimi nalipona. Rafiki mpendwa, je, umepata kuona hayo? Je, umepata kufahamu jinsi Mungu awezavyo kuwa mwenye haki kikamilifu, bila kuiondoa adhabu wala kukibutua ukali wa upanga, na bado awe mwenye rehema zisizo na kikomo, na aweze kuwahesabia haki wasio watauwa wamgeukiao? Ni kwa sababu Mwana wa Mungu, aliye mtukufu kuliko wote katika nafsi yake isiyo na kifani, alijitwika kuithibitisha sheria kwa kuichukua hukumu iliyonistahili mimi, ndiyo sababu Mungu aweza kuipita dhambi yangu. Sheria ya Mungu ilithibitishwa zaidi kwa kifo cha Kristo kuliko ambavyo ingethibitishwa kama wakosaji wote wangepelekwa jehanamu. Mwana wa Mungu kuteseka kwa ajili ya dhambi kulikuwa uthibitisho mtukufu zaidi wa serikali ya Mungu, kuliko kama jamii yote ingeteseka.

Yesu ameichukua adhabu ya mauti kwa ajili yetu. Tazama ajabu hiyo! Tazama, yumo pale ametundikwa msalabani! Hii ndiyo mandhari kubwa kuliko zote utakayoiona milele. Mwana wa Mungu na Mwana wa Adamu, yumo pale ametundikwa, akichukua maumivu yasiyoelezeka, mwenye haki kwa ajili ya wasio na haki, ili kutuleta kwa Mungu. Ee, utukufu wa mandhari hiyo! Asiye na hatia aadhibiwa! Mtakatifu ahukumiwa! Aliyebarikiwa daima afanywa laana! Aliye mtukufu kupita kiasi auawa kifo cha aibu! Kadiri niendeleavyo kuyatazama mateso ya Mwana wa Mungu, ndivyo nizidivyo kuwa na hakika ya kwamba lazima yalingane na hali yangu. Kwani aliteseka, kama si kuigeuza adhabu iondoke kwetu? Basi, kama aliigeuza iondoke kwa kifo chake, imegeuzwa iondoke, nao wamwaminio hawana haja ya kuiogopa. Lazima iwe hivyo, ya kwamba kwa kuwa upatanisho umefanyika, Mungu aweza kusamehe bila kuutikisa msingi wa kiti chake cha enzi, wala kukitia hata doa dogo kitabu cha sheria. Dhamiri yapata jibu kamili la lile swali lake kuu. Ghadhabu ya Mungu juu ya uovu, iwe ni namna gani, sharti iwe ya kutisha kupita fikira zote. Musa alisema vema, "Ni nani aujuaye uweza wa hasira yako?" Lakini tusikiapo Bwana wa utukufu akilia, "Mbona umeniacha?" na kumwona akikata roho, twahisi ya kwamba haki ya Mungu imepata uthibitisho tele kwa utii mkamilifu hivyo na kifo cha kutisha hivyo, kilichotolewa na mtu wa Kimungu namna hiyo. Kama Mungu mwenyewe ainama mbele ya sheria yake mwenyewe, ni nini zaidi kingeweza kufanyika? Kuna wingi zaidi katika upatanisho kwa upande wa ustahili, kuliko ulivyo wingi wa dhambi zote za wanadamu kwa upande wa kutostahili.

Kilindi kikuu cha kujitoa sadaka kwa upendo kwa Yesu chaweza kuimeza milima ya dhambi zetu, zote pia. Kwa ajili ya wema usio na kikomo wa mtu huyu mmoja aliye mwakilishi, Bwana aweza kabisa kuwatazama watu wengine kwa upendeleo, wajapokuwa hawastahili kadiri gani ndani yao na kwa nafsi zao wenyewe. Ilikuwa muujiza wa miujiza kwamba Bwana Yesu Kristo asimame badala yetu na

Aichukue ili sisi tusiichukue kamwe
Ghadhabu ya haki ya Baba yake.

Lakini amekwisha kufanya hivyo. "Imekwisha." Mungu atamhurumia mwenye dhambi kwa sababu hakumhurumia Mwana wake. Mungu aweza kuzipita dhambi zako kwa sababu aliziweka dhambi hizo juu ya Mwanawe pekee mzaliwa karibu miaka elfu mbili iliyopita. Kama ukimwamini Yesu (hilo ndilo jambo lenyewe), basi dhambi zako zilichukuliwa mbali naye yeye aliyekuwa mbuzi wa kuachiwa kwa ajili ya watu wake.

Kumwamini yeye ni nini? Si kusema tu, "Yeye ni Mungu na Mwokozi," bali ni kumtumaini kabisa na kwa ukamilifu, na kumtwaa kuwa wokovu wako wote tangu wakati huu na hata milele--Bwana wako, Mkubwa wako, kila kitu chako. Kama utamtaka Yesu, tayari amekwisha kukupata. Kama ukimwamini yeye, nakuambia huwezi kwenda jehanamu; maana hilo lingeifanya dhabihu ya Kristo kuwa bure. Haiwezekani dhabihu ikubaliwe, na bado nafsi ambayo kwa ajili yake dhabihu hiyo imepokewa ife. Kama nafsi iaminiyo ingeweza kuhukumiwa adhabu, basi kwa nini dhabihu? Kama Yesu alikufa badala yangu, kwa nini nife nami pia? Kila mwenye kuamini aweza kudai ya kwamba dhabihu ilifanywa kwa kweli kwa ajili yake; kwa imani ameiwekea mikono yake, akaifanya kuwa yake mwenyewe, na kwa hiyo aweza kutulia akiwa na hakika ya kwamba hawezi kamwe kuangamia. Bwana hangepokea sadaka hii kwa ajili yetu, kisha atuhukumu tufe. Bwana hawezi kusoma msamaha wetu ulioandikwa kwa damu ya Mwanawe mwenyewe, kisha atupige. Hilo lingekuwa jambo lisilowezekana. Ee, laiti upewe neema mara moja upate kumtazama Yesu na kuanzia mwanzo kabisa, hata kwa Yesu, aliye chemchemi ya rehema kwa mwanadamu mwenye hatia!

"Yeye humhesabia haki asiye mtauwa." "Mungu ndiye mwenye kuhesabia haki," kwa hiyo, na kwa sababu hiyo tu jambo hili laweza kufanyika, naye alifanya kwa njia ya dhabihu ya upatanisho ya Mwanawe wa Kimungu. Kwa hiyo laweza kufanywa kwa haki--kwa haki hivyo kiasi kwamba hakuna mtu atakayelitilia shaka kamwe--kwa ukamilifu hivyo kiasi kwamba katika ile siku kuu ya kutisha, mbingu na nchi zitakapopita, hapatakuwa na ye yote atakayeukana uhalali wa kuhesabiwa haki huko. "Ni nani atakayewahukumia adhabu? Kristo Yesu ndiye aliyekufa. Ni nani atakayewashitaki wateule wa Mungu? Mungu ndiye mwenye kuwahesabia haki."

Basi, nafsi maskini! je, utaingia katika mashua hii ya kuokolea, kama ulivyo hivi? Hapa pana usalama kutoka katika maangamizi ya meli! Ikubali hii wokozi ulio hakika. "Sina kitu pamoja nami," wasema wewe. Huombwi kuleta kitu cho chote pamoja nawe. Watu wanaokimbia kuokoa maisha yao huacha hata nguo zao nyuma. Ruka tu, kama ulivyo hivi.

Nitakuambia jambo hili juu yangu mwenyewe ili kukutia moyo. Tumaini langu pekee la mbinguni lakaa katika upatanisho kamili uliofanywa juu ya msalaba wa Kalvari kwa ajili ya wasio watauwa. Juu ya huo natumaini kwa uthabiti. Sina hata kivuli cha tumaini mahali pengine po pote. Wewe u katika hali ile ile niliyomo mimi; kwa maana hakuna hata mmoja wetu aliye na kitu chake mwenyewe chenye thamani cha kuwa msingi wa kutumainia. Na tuunganishe mikono na kusimama pamoja chini ya msalaba, na kuzikabidhi nafsi zetu mara moja kwa yote kwake yeye aliyeimwaga damu yake kwa ajili ya wenye hatia. Tutaokolewa na Mwokozi mmoja yeye yule. Kama ukiangamia ukimtumaini yeye, basi lazima niangamie nami pia. Nifanye nini zaidi ili kuuthibitisha uhakika wangu mwenyewe katika injili niliyoiweka mbele yako?