Mungu Ndiye Mwenye Kuwahesabia Haki

Warumi 8:33

JAMBO LA AJABU kweli, huku kuhesabiwa haki, yaani kufanywa mwenye haki. Kama tusingaliivunja sheria za Mungu tusingalihitaji jambo hili, kwa maana tungalikuwa wenye haki katika nafsi zetu. Yeye ambaye maisha yake yote ametenda yale yaliyompasa kutenda, wala hakutenda kamwe lolote lisilompasa, huhesabiwa haki kwa sheria. Lakini wewe, msomaji mpendwa, si wa namna hiyo, nina hakika kabisa. Una unyofu mwingi mno usiweze kujifanya kuwa huna dhambi, kwa hiyo wahitaji kuhesabiwa haki.

Basi, ukijihesabia haki mwenyewe, utakuwa umejidanganya nafsi yako tu. Kwa hiyo usijaribu kufanya hivyo. Halina faida kamwe.

Ukiwaomba wanadamu wenzako wakuhesabie haki, wao waweza kufanya nini? Waweza kuwafanya baadhi yao wakuseme mema kwa fadhili ndogo, na wengine watakusengenya kwa jambo dogo zaidi. Hukumu yao haifai sana.

Andiko letu lasema, "Mungu ndiye mwenye kuwahesabia haki," na hili lafaa zaidi. Ni jambo la kushangaza, nalo latupasa kulitafakari kwa uangalifu. Njoo uone.

Kwanza kabisa, hakuna mwingine ila Mungu ambaye angaliwaza kuwahesabia haki wale walio na hatia. Wameishi katika uasi wa dhahiri; wametenda uovu kwa mikono yote miwili; wamezidi kuwa waovu; wamerudia dhambi hata baada ya kuteswa kwa ajili yake, na hivyo kwa kitambo walilazimika kuiacha. Wameivunja sheria, na kuikanyaga injili. Wamekataa matangazo ya rehema, na kudumu katika uovu. Wawezaje kusamehewa na kuhesabiwa haki? Wanadamu wenzao, wakikata tamaa juu yao, husema, "Hawa ni watu wasio na tumaini." Hata Wakristo huwatazama kwa huzuni badala ya tumaini. Lakini si hivyo kwa Mungu wao. Yeye, katika fahari ya neema yake ya uteule, akiisha kuwachagua baadhi yao kabla ya kuwekwa misingi ya ulimwengu, hatatulia hata awahesabie haki, na kuwafanya wakubaliwe katika yule Mpendwa. Je! Haikuandikwa, "Na wale aliowachagua tangu asili, hao akawaita; na wale aliowaita, hao akawahesabia haki; na wale aliowahesabia haki, hao akawatukuza"? Hivyo waona kuna baadhi ambao Bwana amekusudia kuwahesabia haki: kwa nini wewe na mimi tusiwe miongoni mwao?

Hakuna mwingine ila Mungu ambaye angaliwaza kunihesabia haki mimi. Mimi ni ajabu kwa nafsi yangu mwenyewe. Sina shaka ya kuwa neema hiyo yaonekana vivyo hivyo kwa wengine. Mtazame Sauli wa Tarso, aliyetoa povu kinywani, akiwapinga watumishi wa Mungu. Kama mbwa-mwitu mwenye njaa, aliwatesa wana-kondoo na kondoo kila upande; na hata hivyo Mungu alimwangusha njiani kuelekea Dameski, akaubadili moyo wake, na kumhesabia haki kwa ukamilifu hata baada ya muda si mrefu, mtu huyu akawa mhubiri mkuu kuliko wote waliopata kuishi wa kuhesabiwa haki kwa imani. Yampasa mara nyingi alistaajabu kwamba alihesabiwa haki kwa imani katika Kristo Yesu; kwa maana wakati mmoja alikuwa mtetezi hodari wa wokovu kwa matendo ya sheria. Hakuna mwingine ila Mungu ambaye angaliwaza kumhesabia haki mtu kama Sauli mtesaji; lakini Bwana Mungu ni mtukufu katika neema.

Lakini, hata kama mtu yeyote angaliwaza kuwahesabia haki wasiomcha Mungu, hakuna mwingine ila Mungu awezaye kufanya hivyo. Haiwezekani kabisa mtu yeyote kusamehe makosa ambayo hayakutendwa juu yake mwenyewe. Mtu amekudhuru sana; waweza kumsamehe, nami nataraji utamsamehe; lakini hakuna mtu wa tatu awezaye kumsamehe pasipo wewe. Kama kosa umetendewa wewe, msamaha lazima utoke kwako. Kama tumemtenda Mungu dhambi, kusamehe ni katika uwezo wa Mungu; kwa maana dhambi ni juu yake mwenyewe. Ndiyo sababu Daudi asema, katika Zaburi ya hamsini na moja: "Nimekutenda dhambi wewe peke yako, na kufanya maovu machoni pako"; kwa maana ndipo Mungu, ambaye kosa limetendwa juu yake, aweza kuliondoa kosa hilo. Kile tunachodaiwa na Mungu, Muumba wetu mkuu aweza kukiondoa, kama impendezavyo; na akikiondoa, kimeondoka. Hakuna mwingine ila Mungu mkuu, ambaye tumemtenda dhambi, awezaye kuifuta dhambi hiyo; basi, na tuone kwamba twamwendea yeye na kutafuta rehema mkononi mwake. Tusiongozwe kando na wale watakao tuungame kwao; hawana idhini katika Neno la Mungu kwa madai yao. Lakini hata kama wangeamriwa kutamka msamaha kwa jina la Mungu, ingekuwa afadhali zaidi sisi wenyewe kumwendea Bwana mkuu kwa njia ya Yesu Kristo, Mpatanishi, na kutafuta na kupata msamaha mkononi mwake; kwa kuwa tuna hakika ya kuwa hii ndiyo njia sahihi. Dini ya kuwakilishwa na mwingine yahusisha hatari kubwa mno: afadhali uangalie mambo ya nafsi yako mwenyewe, wala usiyaache mikononi mwa mtu yeyote.

Mungu peke yake aweza kuwahesabia haki wasiomcha Mungu; lakini aweza kufanya hivyo kwa ukamilifu. Huzitupa dhambi zetu nyuma yake, huzifuta; asema ya kwamba hata zikitafutwa, hazitaonekana. Bila sababu nyingine ila wema wake mwenyewe usio na mwisho, ameitengeneza njia tukufu ambayo kwayo aweza kuzifanya dhambi nyekundu kuwa nyeupe kama theluji, na kuziondoa dhambi zetu mbali nasi kama mashariki ilivyo mbali na magharibi. Asema, "Wala sitazikumbuka dhambi zako." Hufikia kiasi cha kuikomesha dhambi. Mmojawapo wa kale alilia kwa mshangao, "Ni nani aliye Mungu kama wewe, mwenye kusamehe uovu, na kupita makosa ya watu wa urithi wake waliosalia? Yeye hashiki hasira yake milele, kwa maana yeye hufurahia rehema" (Mika 7:18).

Sasa hatusemi juu ya haki, wala juu ya kule Mungu kuwatendea watu kwa kadiri ya wanavyostahili. Ukidai kushughulika na Bwana mwenye haki kwa masharti ya sheria, ghadhabu ya milele yakutisha, kwa maana ndivyo unavyostahili. Na libarikiwe jina lake, hakututenda sawasawa na dhambi zetu; bali sasa hushughulika nasi kwa masharti ya neema ya bure na huruma isiyo na mwisho, naye asema, "Nitakupokea kwa neema, nami nitakupenda kwa ukunjufu." Liamini, kwa maana ni kweli hakika ya kwamba Mungu mkuu aweza kuwatendea wenye hatia rehema tele; naam, aweza kuwatendea wasiomcha Mungu kana kwamba wamekuwa wachaji Mungu sikuzote. Isome kwa uangalifu mfano wa mwana mpotevu, ukaone jinsi baba mwenye kusamehe alivyompokea yule mtangatanga aliyerudi kwa upendo mwingi kana kwamba hakuwahi kuondoka, wala kujitia unajisi na makahaba. Alilifanya hili kiasi hata ndugu mkubwa akaanza kunung'unika juu yake; lakini baba hakuuondoa kamwe upendo wake. Ee ndugu yangu, hata uwe na hatia kiasi gani, kama utarudi tu kwa Mungu na Baba yako, atakutendea kana kwamba hukukosa kamwe! Atakuhesabu kuwa mwenye haki, na kukutenda kwa kadiri hiyo. Wasema nini juu ya hili?

Je! Huoni--kwa maana nataka kulieleza hili wazi, jinsi lilivyo jambo zuri ajabu--ya kwamba kama vile hakuna mwingine ila Mungu ambaye angaliwaza kuwahesabia haki wasiomcha Mungu, wala hakuna mwingine ila Mungu awezaye kufanya hivyo, hata hivyo Bwana aweza kufanya? Tazama jinsi mtume alivyoweka pingamizi, "Ni nani atakayewashitaki wateule wa Mungu? Mungu ndiye mwenye kuwahesabia haki." Kama Mungu amemhesabia haki mtu, imefanywa vema, imefanywa kwa haki, imefanywa kwa unyofu, imefanywa milele. Nilisoma maneno katika gazeti lililojaa sumu juu ya injili na wale waihubirio, ya kwamba sisi twashikilia namna fulani ya nadharia ambayo kwayo twadhania ya kuwa dhambi yaweza kuondolewa kwa watu. Hatushikilii nadharia, sisi twatangaza jambo la hakika. Jambo kuu kuliko yote chini ya mbingu ni hili--ya kwamba Kristo kwa damu yake ya thamani hakika huiondoa dhambi, na ya kwamba Mungu, kwa ajili ya Kristo, akishughulika na watu kwa masharti ya rehema ya Mungu, huwasamehe wenye hatia na kuwahesabia haki, si kwa kadiri ya lolote aonalo ndani yao, au aonalo mbele litakalokuwamo ndani yao, bali kwa kadiri ya utajiri wa rehema yake iliyo ndani ya moyo wake mwenyewe. Hili tumelihubiri, twalihubiri, nasi tutalihubiri maadamu tunaishi. "Mungu ndiye mwenye kuwahesabia haki"--awahesabiaye haki wasiomcha Mungu; yeye haoni haya kufanya hivyo, wala sisi kuihubiri.

Kule kuhesabiwa haki kutokako kwa Mungu mwenyewe hakuna budi kuwa bila shaka. Kama Hakimu akinifungua, ni nani awezaye kunihukumu? Kama mahakama iliyo kuu kuliko zote katika ulimwengu imenitangaza kuwa mwenye haki, ni nani atakayenishitaki? Kuhesabiwa haki kutoka kwa Mungu ni jibu la kutosha kwa dhamiri iliyoamshwa. Roho Mtakatifu kwa njia yake huvuvia amani juu ya asili yetu yote, wala hatuogopi tena. Kwa kuhesabiwa haki huku twaweza kuyajibu makelele yote na matukano ya Shetani na watu wasiomcha Mungu. Kwa huku tutaweza kufa: kwa huku tutafufuka tena kwa ujasiri, na kukabili ile hukumu kuu ya mwisho.

Nitasimama kwa ujasiri siku ile kuu,
Maana ni nani atakayenishitaki?
Nami nikiwa nimefunguliwa na Bwana wangu
Kutoka laana na lawama kuu ya dhambi.

Rafiki, Bwana aweza kuzifuta dhambi zako zote. Sipigi risasi gizani nisemapo haya. "Kila dhambi na kila neno la kufuru watasamehewa wanadamu." Ujapokuwa umezama katika uhalifu hata shingoni mwako, aweza kwa neno moja kuuondoa unajisi, na kusema, "Nataka; takasika." Bwana ni mwenye kusamehe sana.

"Naamini Ondoleo la Dhambi." Je, Wewe Waamini?

Aweza hata saa hii kutamka hukumu, "Umesamehewa dhambi zako; enenda kwa amani;" na akifanya hivyo, hakuna uwezo mbinguni, wala duniani, wala chini ya nchi, uwezao kukutia shakani, sembuse chini ya ghadhabu. Usiutilie shaka uwezo wa upendo wa Mwenyezi. Wewe usingeweza kumsamehe mwanadamu mwenzako kama angekukosea kama wewe ulivyomkosa Mungu; lakini haikupasi kukipima nafaka ya Mungu kwa pishi lako; mawazo yake na njia zake zi juu ya zako kama vile mbingu zilivyo juu ya nchi.

"Vema," wasema, "lingekuwa muujiza mkuu kama Bwana angenisamehe." Ni kweli kabisa. Ungekuwa muujiza mkuu sana, na kwa hiyo yaelekea atafanya hivyo; kwa maana yeye hufanya "mambo makuu yasiyochunguzika" ambayo hatukuyatazamia.

Mimi mwenyewe nilipigwa chini na hisia ya kutisha ya hatia, iliyoyafanya maisha yangu kuwa mashaka kwangu; lakini niliposikia ile amri, "Niangalieni mimi, mkaokoke, enyi ncha zote za dunia; maana mimi ni Mungu, wala hapana mwingine"--niliangalia, na mara Bwana akanihesabia haki. Yesu Kristo, aliyefanywa dhambi kwa ajili yangu, ndiye niliyemwona, na kule kuona kukanipa raha. Wale walioumwa na nyoka wa moto jangwani walipomtazama yule nyoka wa shaba waliponywa mara moja; na mimi vivyo hivyo nilipomtazama Mwokozi aliyesulubiwa. Roho Mtakatifu, aliyeniwezesha kuamini, alinipa amani kwa njia ya kuamini. Nilijihisi kuwa na hakika ya kuwa nimesamehewa, kama vile kwanza nilivyohisi hakika ya kuhukumiwa. Nilikuwa na hakika ya hukumu yangu kwa sababu Neno la Mungu lilitangaza hivyo, na dhamiri yangu ilishuhudia hilo; lakini Bwana aliponihesabia haki nilifanywa kuwa na hakika vivyo hivyo kwa mashahidi wale wale. Neno la Bwana katika Maandiko lasema, "Amwaminiye yeye hahukumiwi," na dhamiri yangu yashuhudia ya kuwa niliamini, na ya kuwa Mungu katika kunisamehe ni mwenye haki. Hivyo nina ushuhuda wa Roho Mtakatifu na dhamiri yangu mwenyewe, na hawa wawili wapatana kuwa mmoja. Ee, jinsi ninavyotamani msomaji wangu aupokee ushuhuda wa Mungu juu ya jambo hili, ndipo karibuni yeye naye angekuwa na ushuhuda ndani yake mwenyewe!

Nathubutu kusema ya kwamba mwenye dhambi aliyehesabiwa haki na Mungu asimama juu ya msingi ulio imara zaidi kuliko mtu mwenye haki aliyehesabiwa haki kwa matendo yake, kama yupo mtu wa namna hiyo. Kamwe tusingeweza kuwa na hakika zaidi ya kuwa tumetenda matendo ya kutosha; dhamiri ingekuwa na wasiwasi sikuzote isije ikawa, hatimaye, tumepungukiwa, nasi tungekuwa na hukumu itetemekayo ya akili iwezayo kukosea tu ya kutegemea; lakini Mungu mwenyewe ahesabiapo haki, na Roho Mtakatifu ashuhudiapo jambo hilo kwa kutupa amani na Mungu, ndipo twahisi ya kuwa jambo hilo ni hakika na limemalizika, nasi twaingia rahani. Hakuna ulimi uwezao kueleza kina cha utulivu ule uujiao moyo ulioipokea amani ya Mungu ipitayo akili zote.