Mungu Amhesabia Haki Asiye Mtauwa

UJUMBE HUU ni kwa ajili yako. Utayapata maneno haya katika Waraka kwa Warumi, katika mlango wa nne na mstari wa tano:

Lakini kwa mtu asiyefanya kazi, bali anamwamini yeye ambaye amhesabia haki asiyekuwa mtauwa, imani yake mtu huyo imehesabiwa kuwa ni haki.

Nakuvuta fikira zako kwa maneno haya, "Yeye ambaye amhesabia haki asiye mtauwa." Yanaonekana kwangu kuwa ni maneno ya ajabu sana.

Je, hushangai kwamba yapasa kuwepo usemi kama huo katika Biblia, "Ambaye amhesabia haki asiye mtauwa?" Nimesikia ya kwamba watu wanaozichukia fundisho za msalaba huleta shtaka hili juu ya Mungu, ya kwamba Yeye huwaokoa watu waovu na kuwapokea kwake wachafu kuliko wote. Tazama jinsi Andiko hili linavyolikubali shtaka hilo, na kulieleza waziwazi! Kwa kinywa cha mtumishi wake Paulo, kwa uvuvio wa Roho Mtakatifu, Yeye hujitwalia cheo cha "Yeye ambaye amhesabia haki asiye mtauwa." Yeye huwafanya kuwa wenye haki wale walio wasio na haki, huwasamehe wale wanaostahili kuadhibiwa, na huwafadhili wale wasiostahili fadhili yoyote. Ulidhani, sivyo, kwamba wokovu ni kwa ajili ya walio wema? kwamba neema ya Mungu ni kwa ajili ya walio safi na watakatifu, walio huru na dhambi? Imekuingia moyoni kwamba, kama ungekuwa bora, ndipo Mungu angekulipa; nawe umedhani kwamba kwa sababu hustahili, kwa hiyo haingekuwepo njia yoyote ya wewe kuifurahia fadhili yake. Yakupasa kushangaa kidogo kuisoma sentensi kama hii: "Yeye ambaye amhesabia haki asiye mtauwa." Sishangai kwamba unashangaa; kwa maana pamoja na kuizoea kwangu kote neema kuu ya Mungu, mimi sikomi kuistaajabia. Yasikika ya kushangaza, sivyo, kwamba yawezekana kwa Mungu mtakatifu kumhesabia haki mtu asiye mtakatifu? Sisi, kwa kadiri ya sheria ya asili ya mioyo yetu, sikuzote twanena juu ya wema wetu wenyewe na ustahili wetu wenyewe, nasi twashikilia kwa ukaidi kwamba lazima liwepo jambo fulani ndani yetu ili kupata kuangaliwa na Mungu. Basi, Mungu, aonaye ndani ya hila zote, ajua ya kuwa hakuna wema wowote ndani yetu. Yeye asema ya kwamba "Hakuna mwenye haki hata mmoja." Ajua ya kuwa "matendo yetu yote ya haki yamekuwa kama nguo iliyotiwa unajisi," na kwa hiyo Bwana Yesu hakuja ulimwenguni kutafuta wema na haki ndani ya mtu, na kuwapa wale wasio na kitu miongoni mwao. Yeye huja, si kwa sababu tu wenye haki, bali ili kutufanya kuwa wenye haki: yeye amhesabia haki asiye mtauwa.

Wakili aingiapo mahakamani, kama ni mtu mwaminifu, hutamani kuitetea kesi ya mtu asiye na hatia na kumhesabia haki mbele ya mahakama kutokana na mambo yaliyowekwa juu yake kwa uongo. Yapasa kusudi la wakili liwe kumhesabia haki mtu asiye na hatia, wala hampasi kujaribu kumkinga mwenye hatia. Halimo katika haki ya mwanadamu wala katika uwezo wa mwanadamu kumhesabia haki kweli mwenye hatia. Huu ni muujiza uliowekwa kwa ajili ya Bwana peke yake. Mungu, Mfalme aliye mwenye haki bila kikomo, ajua ya kuwa hakuna mtu mwenye haki juu ya nchi atendaye mema wala asiyefanya dhambi, na kwa hiyo, katika enzi isiyo na mwisho ya asili yake ya Kimungu na katika fahari ya upendo wake usioelezeka, hulichukua jukumu hilo, si sana la kuwahesabia haki wenye haki kama la kumhesabia haki asiye mtauwa. Mungu ameziibua njia na mbinu za kumfanya mtu asiye mtauwa asimame akikubaliwa kwa haki mbele zake: ameweka mfumo ambao kwa haki kamilifu aweza kumtendea mwenye hatia kana kwamba maisha yake yote alikuwa huru na kosa, naam, aweza kumtendea kana kwamba ni huru kabisa na dhambi. Yeye amhesabia haki asiye mtauwa.

Kristo Yesu alikuja ulimwenguni awaokoe wenye dhambi. Ni jambo la kushangaza sana--jambo la kustaajabiwa zaidi ya yote na wale wanaolifurahia. Najua kwamba kwangu hata leo hii ni ajabu kubwa kuliko zote niliyoisikia, kwamba Mungu apate kunihesabia haki mimi. Najiona kuwa donge la kutostahili, chungu la uozo, na lundo la dhambi, mbali na upendo wake ulio wa nguvu zote. Najua kwa hakika kamili ya kuwa nimehesabiwa haki kwa imani iliyo katika Kristo Yesu, na kutendewa kana kwamba nalikuwa mwenye haki kamili, na kufanywa mrithi wa Mungu na mrithi pamoja na Kristo; na bado kwa asili yangu yanipasa kuchukua nafasi yangu miongoni mwa wenye dhambi kuliko wote. Mimi, nisiyestahili kabisa, natendewa kana kwamba nalikuwa nastahili. Napendwa kwa upendo mwingi kana kwamba sikuzote nalikuwa mtauwa, ambapo hapo kwanza nalikuwa si mtauwa. Ni nani awezaye kujizuia kutostaajabia jambo hili? Shukrani kwa fadhili kama hiyo yasimama imevikwa mavazi ya mshangao.

Basi, ijapokuwa jambo hili ni la kushangaza sana, nataka uangalie jinsi linavyoifanya injili ipatikane kwako na kwangu. Kama Mungu amhesabia haki asiye mtauwa, basi, rafiki mpenzi, aweza kukuhesabia haki wewe. Je, huyo siye aina ya mtu ulivyo wewe? Kama huujaokoka wakati huu, ni maelezo yanayokufaa kabisa; umeishi bila Mungu, umekuwa kinyume cha utauwa; kwa neno moja, umekuwa nawe u asiye mtauwa. Labda hujahudhuria hata mahali pa ibada siku ya Jumapili, bali umeishi bila kuijali siku ya Mungu, na nyumba yake, na Neno lake--jambo hili lathibitisha ya kuwa umekuwa si mtauwa. La kusikitisha zaidi, yamkini hata umejaribu kuwa na shaka juu ya kuwako kwa Mungu, nawe umefikia hata kusema ya kwamba ulifanya hivyo. Umeishi juu ya dunia hii nzuri, iliyojaa alama za uwepo wa Mungu, na wakati huo wote umeyafumba macho yako usizione ushuhuda ulio wazi wa uweza wake na Uungu wake. Umeishi kana kwamba hakuna Mungu. Naam, ungependezwa sana kama ungeweza kujithibitishia kwa hakika ya kuwa hakuna Mungu kamwe. Yamkini umeishi miaka mingi sana kwa jinsi hii, hata sasa umekwisha kutulia vyema katika njia zako, na bado Mungu hayumo katika njia hizo zozote. Kama ungebandikwa alama

ASIYE MTAUWA

ingekueleza vyema kama vile bahari ingebandikwa alama ya maji ya chumvi. Sivyo?

Yamkini wewe ni mtu wa aina nyingine; umezizingatia kwa ukawaida namna zote za nje za dini, na bado hukuwa na moyo ndani yake hata kidogo, bali kwa kweli umekuwa si mtauwa. Ijapokuwa umekutana na watu wa Mungu, hujakutana na Mungu wewe mwenyewe; umekuwa katika kwaya, na bado hukumsifu Bwana kwa moyo wako. Umeishi bila upendo wowote kwa Mungu moyoni mwako, wala kujali amri zake katika maisha yako. Basi, wewe ndiwe aina ya mtu ambaye injili hii imetumwa kwake--injili hii isemayo ya kuwa Mungu amhesabia haki asiye mtauwa. Ni jambo la ajabu sana, lakini kwa furaha lapatikana kwako. Lakufaa sawasawa. Sivyo? Jinsi ninavyotamani kwamba ungeikubali! Kama wewe ni mtu mwenye akili, utaiona neema ya ajabu ya Mungu katika kuwaandalia watu kama wewe ulivyo, nawe utajiambia mwenyewe, "Mhesabie haki asiye mtauwa! Mbona, basi, mimi nisihesabiwe haki, tena nihesabiwe haki mara moja?"

Basi, angalia zaidi, ya kwamba lazima iwe hivyo--kwamba wokovu wa Mungu ni kwa ajili ya wale wasiostahili, wala hawana matayarisho ya kuupokea. Ni jambo la busara kwamba usemi huo uwekwe katika Biblia; kwa maana, rafiki mpenzi, hakuna wengine wanaohitaji kuhesabiwa haki ila wale wasio na haki yao wenyewe. Kama msomaji yeyote wa kitabu changu ni mwenye haki kamili, hawahitaji kuhesabiwa haki. Wahisi ya kuwa unatimiza wajibu wako vyema, na karibu unaiweka mbingu chini ya deni kwako. Wataka nini na Mwokozi, au na rehema? Wataka nini na kuhesabiwa haki? Utakuwa umechoka na kitabu changu kwa wakati huu, kwani hakitakuwa na faida yoyote kwako.

Kama baadhi yenu mnajivika hivyo majivuno kama hayo, nisikilizeni kwa muda kidogo. Utapotea, kwa hakika kama vile ulivyo hai. Ninyi watu wenye haki, ambao haki yenu yote ni ya matendo yenu wenyewe, ni wadanganyifu au wadanganyika; kwa maana Andiko haliwezi kusema uongo, nalo lasema waziwazi, "Hakuna mwenye haki hata mmoja." Vyovyote vile sina injili ya kuwahubiria wenye kujihesabia haki, la, hata neno moja lake. Kristo Yesu mwenyewe hakuja kuwaita wenye haki, wala mimi sitafanya alilolikataa Yeye kufanya. Kama ningekuita, husingekuja, na kwa hiyo, sitakuita, chini ya tabia hiyo. La, badala yake nakuamuru uiangalie hiyo haki yako mpaka uone ni udanganyifu ulioje. Si ya nguvu hata nusu ya utando wa buibui. Achana nayo! Ikimbie! Ee amini ya kuwa watu pekee wanaoweza kuhitaji kuhesabiwa haki ni wale wasio wenye haki ndani yao wenyewe! Wahitaji jambo fulani litendwe kwa ajili yao ili kuwafanya wenye haki mbele ya kiti cha hukumu cha Mungu. Uwe na hakika, Bwana hufanya tu lililo la lazima. Hekima isiyo na mwisho haijaribu kamwe lisilo la lazima. Yesu hachukui kamwe lililo la ziada. Kumfanya mwenye haki yeye aliye mwenye haki si kazi kwa Mungu--hiyo ingekuwa taabu kwa mpumbavu; bali kumfanya mwenye haki yeye asiye na haki--hiyo ni kazi kwa upendo na rehema isiyo na mwisho. Kumhesabia haki asiye mtauwa--huu ni muujiza unaomstahili Mungu. Na kwa hakika ni hivyo.

Basi, tazama. Kama pako mahali popote ulimwenguni tabibu aliyevumbua dawa za hakika na za thamani, tabibu huyo hutumwa kwa nani? Kwa wale walio na afya kamili? Nadhani sivyo. Mweke katika mtaa usio na wagonjwa, naye hujihisi kwamba hayumo mahali pake. Hakuna kitu cha kufanya. "Wenye afya hawahitaji tabibu, bali walio hawawezi." Je, si dhahiri vivyo hivyo kwamba dawa kuu za neema na ukombozi ni kwa ajili ya wagonjwa wa nafsi? Haziwezi kuwa kwa ajili ya wazima, kwa maana haziwezi kuwafaa hao. Kama wewe, rafiki mpenzi, wahisi kuwa u mgonjwa kiroho, Tabibu amekuja ulimwenguni kwa ajili yako. Kama umeharibika kabisa kwa sababu ya dhambi yako, wewe ndiwe mtu hasa aliyekusudiwa katika mpango wa wokovu. Nasema ya kuwa Bwana wa upendo alikuwa na watu kama wewe ulivyo mbele ya macho yake alipouandaa mfumo wa neema. Fikiri mtu mwenye roho ya ukarimu aamue kuwasamehe wote waliokuwa na deni kwake; ni dhahiri kwamba jambo hili laweza kuwahusu tu wale walio kweli na deni kwake. Mmoja ana deni kwake la pauni elfu; mwingine ana deni la pauni hamsini; kila mmoja hana budi ila bili yake ipokewe, na deni lake lafutwa. Lakini mtu aliye mkarimu kuliko wote hawezi kusamehe madeni ya wale wasio na deni lolote kwake. Ni nje ya uwezo wa Muweza wa Yote kusamehe pasipo dhambi. Msamaha, basi, hauwezi kuwa kwako wewe usiye na dhambi. Msamaha lazima uwe kwa mwenye hatia. Kusamehewa lazima kuwe kwa mwenye dhambi. Ingekuwa ni upumbavu kunena juu ya kuwasamehe wale wasiohitaji msamaha--kuwasamehe wale ambao hawajakosa kamwe.

Je, wadhani kwamba lazima upotee kwa sababu wewe ni mwenye dhambi? Hii ndiyo sababu unayoweza kuokolewa. Kwa sababu wajikiri mwenyewe kuwa mwenye dhambi ningependa kukutia moyo uamini ya kuwa neema imewekwa kwa ajili ya watu kama wewe ulivyo. Mmoja wa watunga nyimbo wetu hata alithubutu kusema:

Mwenye dhambi ni kitu kitakatifu;
Roho Mtakatifu amemfanya kuwa hivyo.

Ni kweli kabisa, kwamba Yesu hutafuta na kuokoa kilichopotea. Alikufa na kufanya upatanisho halisi kwa ajili ya wenye dhambi halisi. Watu wasipochezea maneno, au kujiita wenyewe "wenye dhambi wanyonge," kwa unyenyekevu wa maneno matupu, mimi hufurahi mno kukutana nao. Ningefurahi kuzungumza usiku kucha na wenye dhambi wa kweli. Nyumba ya wageni ya rehema kamwe haifungi milango yake juu ya watu kama hao, wala siku za kazi wala Jumapili. Bwana wetu Yesu hakufa kwa ajili ya dhambi za kuwaziwa, bali damu ya moyo wake ilimwagwa ili kuosha madoa mekundu ya kina, ambayo hakuna kingine kiwezacho kuyaondoa.

Yeye aliye mwenye dhambi mweusi--huyo ndiye aina ya mtu ambaye Kristo Yesu alikuja kumfanya mweupe. Mhubiri wa injili wakati mmoja alihubiri mahubiri kutokana na maneno, "Na shoka limekwisha kuwekwa penye mashina ya miti," naye alitoa mahubiri hivi hata mmoja wa wasikilizaji wake akamwambia, "Mtu angedhani kwamba ulikuwa ukiwahubiria wahalifu. Mahubiri yako yalipaswa kutolewa katika gereza la mkoa." "La, sivyo," akasema yule mtu mwema, "kama ningekuwa nikihubiri katika gereza la mkoa, nisingehubiri kutokana na andiko hilo, humo ningehubiri 'Ni neno la kuaminiwa, tena lastahili kukubalika kabisa, ya kwamba Kristo Yesu alikuja ulimwenguni awaokoe wenye dhambi.'" Ni hivyo hivyo. Sheria ni kwa ajili ya wenye kujihesabia haki, ili kulishusha kiburi chao: injili ni kwa ajili ya waliopotea, ili kuiondoa kukata tamaa kwao.

Kama huujapotea, wataka nini na Mwokozi? Je, mchungaji ampasa kuwafuata wale ambao hawakupotea kamwe? Mbona mwanamke aifagie nyumba yake kwa ajili ya vipande vya fedha ambavyo havikutoka kamwe katika mfuko wake? La, dawa ni kwa ajili ya wagonjwa; uhai ni kwa ajili ya wafu; msamaha ni kwa ajili ya wenye hatia; kufunguliwa ni kwa ajili ya waliofungwa: kufumbuliwa macho ni kwa ajili ya vipofu. Yawezaje Mwokozi, na kufa kwake msalabani, na injili ya msamaha, kuelezwa, isipokuwa kwa dhana ya kuwa watu ni wenye hatia na wanaostahili hukumu? Mwenye dhambi ndiye sababu ya injili kuwapo. Wewe, rafiki yangu, ambaye neno hili sasa lakujia, kama wewe hustahili, wastahili mabaya, wastahili jehanamu, wewe ndiwe aina ya mtu ambaye injili imewekwa, na kuandaliwa, na kutangazwa kwa ajili yake. Mungu amhesabia haki asiye mtauwa.

Ningependa kulifanya jambo hili liwe wazi sana. Nataraji kwamba nimekwisha kufanya hivyo; lakini bado, ijapokuwa ni wazi, ni Bwana peke yake awezaye kumfanya mtu alione. Mwanzoni laonekana la kushangaza mno kwa mtu aliyeamshwa kwamba wokovu upaswe kuwa kweli kwa ajili yake yeye aliye mpotevu na mwenye hatia. Hudhani ya kuwa lazima uwe kwa ajili yake yeye aliye mtu mwenye toba, akisahau kuwa toba yake ni sehemu ya wokovu wake. "Ee," asema, "lakini lazima niwe hivi na vile,"--ambayo yote ni kweli, kwani atakuwa hivi na vile kama tunda la wokovu; lakini wokovu humjia kabla hajapata matunda yoyote ya wokovu. Kwa kweli, humjia wakati anastahili tu maelezo haya matupu, maskini, ya chini, ya machukizo, "asiye mtauwa." Ndivyo alivyo tu wakati injili ya Mungu inapokuja kumhesabia haki.

Basi, naweza, kuwasihi wowote wasio na jambo lolote jema juu yao--wanaoogopa kwamba hawana hata hisia njema, wala kitu chochote kabisa kiwezacho kuwapendekeza kwa Mungu--ya kwamba waamini kwa uthabiti ya kuwa Mungu wetu mwenye neema aweza na yu radhi kuwapokea pasipo kitu chochote cha kuwapendekeza, na kuwasamehe kwa hiari yake, si kwa sababu wao ni wema, bali kwa sababu Yeye ni mwema. Je, hafanyi jua lake kuwaangazia waovu kama vile wema? Je, hatoi majira ya rutuba, na kuipeleka mvua na jua kwa wakati wake juu ya mataifa yasiyo watauwa kuliko yote? Naam, hata Sodoma ilikuwa na jua lake, na Gomora ikawa na umande wake. Ee rafiki, neema kuu ya Mungu yapita ufahamu wangu na ufahamu wako, nami ningependa uifikirie kwa ustahili wake! Kama vile mbingu zilivyo juu sana kuliko nchi; ndivyo mawazo ya Mungu yalivyo juu kuliko mawazo yetu. Yeye aweza kusamehe kwa wingi. Kristo Yesu alikuja ulimwenguni awaokoe wenye dhambi: msamaha ni kwa ajili ya wenye hatia.

Usijaribu kujiremba na kujifanya kuwa kitu kingine tofauti na ulivyo hasa; bali njoo kama ulivyo kwake yeye amhesabiaye haki asiye mtauwa. Msanii mkuu muda mfupi uliopita alikuwa amechora sehemu ya baraza la mji aliokaa, naye alitaka, kwa makusudi ya kihistoria, kuwaingiza katika picha yake watu fulani waliojulikana sana mjini. Mfagizaji wa kivukio, asiyechanwa nywele, mchafu, wa matambara, alijulikana na kila mtu, na kulikuwa na nafasi ifaayo kwa ajili yake katika picha. Msanii akamwambia mtu huyu wa matambara na machafu, "Nitakulipa vyema kama utakuja studio yangu na kuniacha nichukue mfano wako." Alikuja asubuhi, lakini mara akaachishwa aende zake; kwani alikuwa amenawa uso wake, na kuchana nywele zake, na kuvaa suti ya nguo za heshima. Alihitajika kama mwombaji, wala hakualikwa katika hali nyingine yoyote. Vivyo hivyo, injili itakupokea katika kumbi zake kama utakuja kama mwenye dhambi, si vinginevyo. Usingoje matengenezo, bali njoo mara moja kwa ajili ya wokovu. Mungu amhesabia haki asiye mtauwa, na hilo lakuchukua ulipo sasa: lakutana nawe katika hali yako mbaya kabisa.

Njoo katika hali yako ya kutokuwa tayari. Namaanisha, mjie Baba yako wa mbinguni katika dhambi yako yote na uchafu wako wote. Mjie Yesu kama ulivyo hasa, mwenye ukoma, mchafu, uchi, usiyefaa kuishi wala kufa. Njoo, wewe uliye takataka hasa za viumbe; njoo, ijapokuwa hauthubutu kutumaini kitu chochote ila mauti. Njoo, ijapokuwa kukata tamaa kumekuandama, kukikandamiza juu ya kifua chako kama jinamizi la kutisha. Njoo umwombe Bwana amhesabie haki mtu mwingine asiye mtauwa. Mbona asifanye hivyo? Njoo kwa maana rehema hii kuu ya Mungu imekusudiwa kwa ajili ya watu kama wewe ulivyo. Nayaweka katika lugha ya andiko, wala siwezi kuyaweka kwa nguvu zaidi: Bwana Mungu Mwenyewe hujitwalia cheo hiki chenye neema, "Yeye ambaye amhesabia haki asiye mtauwa." Yeye huwafanya wenye haki, na kuwafanya watendewe kama wenye haki, wale ambao kwa asili ni wasio watauwa. Je, si neno la ajabu hilo kwako? Msomaji, usikawie mpaka utakapokwisha kulifikiri vyema jambo hili.