Tunakusudia Nini?

NILISIKIA HADITHI MOJA; nadhani ilitoka Nchi ya Kaskazini: Mhudumu mmoja alimtembelea mwanamke maskini, akikusudia kumpa msaada; kwa maana alijua ya kuwa alikuwa maskini sana. Akiwa na fedha yake mkononi, aligonga mlango; lakini hakuitika. Akakata kauli kwamba hayupo nyumbani, akaenda zake. Muda mfupi baadaye akakutana naye kanisani, akamwambia ya kwamba alikuwa amekumbuka uhitaji wake: "Nilifika nyumbani kwako, nikagonga mara kadhaa, nami nadhani hukuwapo nyumbani, kwa maana sikupata jibu." "Ulifika saa ngapi, bwana?" "Ilikuwa yapata adhuhuri." "Aa, mpendwa," akasema, "nilikusikia, bwana, nami nasikitika sana kwamba sikuitika; lakini nilidhani ni yule mtu anayekuja kudai kodi." Wanawake maskini wengi wanajua maana ya jambo hili. Basi, ni shauku yangu kusikilizwa, na kwa hiyo nataka kusema kwamba mimi sikuji kudai kodi; naam, lengo la kitabu hiki si kukuomba kitu chochote, bali ni kukuambia ya kwamba wokovu ni wa neema tupu, maana yake, ni bure, bila malipo, bila gharama yoyote.

Mara nyingi, tunapokuwa na hamu ya kuvuta usikivu, msikilizaji wetu hufikiri, "Aa! sasa nitaambiwa wajibu wangu. Ni yule mtu anayekuja kudai kile kinachostahili kwa Mungu, nami nina hakika sina kitu cha kulipa. Sitakuwapo nyumbani." La, kitabu hiki hakiji kukudai kitu, bali kukuletea kitu. Hatutazungumza juu ya sheria, na wajibu, na adhabu, bali juu ya upendo, na wema, na msamaha, na rehema, na uzima wa milele. Basi, usifanye kana kwamba hukuwapo nyumbani: usigeuze sikio la kiziwi, wala moyo usiojali. Sikuombi kitu chochote kwa jina la Mungu wala la mwanadamu. Si nia yangu kutaka lolote mkononi mwako; bali naja kwa jina la Mungu, kukuletea kipawa cha bure, ambacho kukipokea kutakuwa furaha yako ya sasa na ya milele. Fungua mlango, uziache dua zangu ziingie. "Njoni sasa, tusemezane." Bwana mwenyewe anakualika kwenye mazungumzo kuhusu furaha yako ya papo hapo na isiyo na mwisho, naye asingelifanya hivi kama asingekutakia mema. Usimkatae Bwana Yesu anayegonga mlango wako; kwa maana anagonga kwa mkono uliopigiliwa misumari juu ya mti kwa ajili ya watu kama wewe. Kwa kuwa lengo lake pekee ni faida yako, tega sikio lako, umwendee. Sikiliza kwa bidii, na uache neno jema lizame nafsini mwako. Yamkini saa imefika ambayo utaingia katika uzima ule mpya ulio mwanzo wa mbinguni. Imani ni kwa kusikia, na kusoma ni namna ya kusikia: imani yaweza kukujia wakati unaposoma kitabu hiki. Kwa nini isiwe hivyo? Ee Roho mbarikiwa wa neema yote, na iwe hivyo!