Kwako Wewe

YEYE ALIYENENA na kuandika ujumbe huu atahuzunika sana kama hautawaongoza wengi kwa Bwana Yesu. Umetumwa kwa kutegemea kama mtoto nguvu za Mungu Roho Mtakatifu, ili aitumie katika kuwaongoa mamilioni, kama impendezavyo. Bila shaka wanaume na wanawake wengi maskini watakichukua kitabu hiki kidogo, naye Bwana atawajilia kwa neema. Ili kufikia lengo hili, lugha iliyo rahisi kabisa imechaguliwa, na maneno mengi ya kawaida yametumika. Lakini kama wenye mali na cheo wataliangalia kitabu hiki, Roho Mtakatifu aweza kuwagusa wao pia; kwa maana kile kiwezacho kueleweka na wasio na elimu hakikosi kuvutia hata kwa wale walioelimishwa. Laiti wengine wangekisoma ambao watakuja kuwa wavunaji wakuu wa roho za watu!

Ni nani ajuaye ni wangapi watakaoipata njia yao ya amani kwa haya wanayoyasoma hapa? Lakini swali lililo la maana zaidi kwako, msomaji mpendwa, ni hili--Je, wewe utakuwa mmoja wao?

Mtu mmoja aliweka chemchemi kando ya njia, akatundika kikombe karibu nayo kwa mnyororo mdogo. Baadaye aliambiwa kwamba mhakiki mkuu wa sanaa alikuwa ameukosoa sana muundo wake. "Lakini," akasema, "je, watu wengi wenye kiu hunywa hapo?" Ndipo wakamwambia kwamba maelfu ya watu maskini, wanaume, wanawake, na watoto, walikata kiu yao katika chemchemi hii; naye akatabasamu, akasema kwamba hakusumbuliwa sana na neno la yule mhakiki, ila alitumaini ya kwamba siku moja ya joto la kiangazi, huyo mhakiki mwenyewe angekijaza kikombe, akaburudika, akalisifu jina la Bwana.

Hii hapa chemchemi yangu, na hiki hapa kikombe changu: kosoa kama upendavyo; lakini unywe maji ya uzima. Hili tu ndilo linalonijali. Afadhali nibariki nafsi ya mfagiaji maskini kabisa wa njia, au mkusanyaji wa matambara, kuliko kumpendeza mwana wa mfalme, nikakosa kumwongoa kwa Mungu.

Msomaji, je, una nia ya dhati katika kusoma kurasa hizi? Kama ndivyo, tumepatana tangu mwanzo; lakini lengo linalokusudiwa hapa si chochote pungufu ya wewe kumpata Kristo na Mbingu. Laiti tungelitafuta jambo hili pamoja! Mimi nafanya hivyo kwa kukiweka wakfu kitabu hiki kidogo kwa maombi. Je, hutaungana nami kwa kumtazamia Mungu juu, na kumwomba akubariki wakati unaposoma? Majaliwa yameziweka kurasa hizi njiani mwako, una muda kidogo wa nafasi wa kuzisoma, nawe unahisi utayari wa kuzitilia maanani. Hizi ni ishara njema. Ni nani ajuaye kama wakati uliowekwa wa baraka umekufikia? Kwa vyovyote vile, "Roho Mtakatifu asema, Leo, kama mtaisikia sauti yake, msifanye migumu mioyo yenu."