Kwa Nini Watakatifu Hudumu

TUMAINI lililoujaza moyo wa Paulo kwa habari ya ndugu wa Korintho tumekwisha kuona jinsi lilivyojaa faraja kwa wale waliotetemeka kwa habari ya wakati wao ujao. Lakini kwa nini aliamini kwamba ndugu hao wangethibitishwa hata mwisho?

Nataka wewe uangalie ya kwamba anatoa sababu zake. Nazo ni hizi:

Mungu ni mwaminifu, ambaye kwa yeye mliitwa mwingie katika ushirika wa Mwanawe Yesu Kristo (1 Wakorintho 1:9).

Mtume hasemi, "Wewe u mwaminifu." Ole! uaminifu wa mwanadamu ni jambo lisiloaminika kabisa; ni ubatili mtupu. Hasemi, "Una wachungaji waaminifu wa kukuongoza na kukuelekeza, na kwa hiyo naamini utakuwa salama." La, hasha! kama tukilindwa na wanadamu, tutalindwa vibaya tu. Yeye asema hivi, "Mungu ni mwaminifu." Kama tukionekana kuwa waaminifu, itakuwa kwa sababu Mungu ni mwaminifu. Juu ya uaminifu wa Mungu wetu wa agano ndipo mzigo wote wa wokovu wetu unapopaswa kukaa. Juu ya sifa hii tukufu ya Mungu ndipo jambo hili lategemea. Sisi tu wenye kigeugeu kama upepo, dhaifu kama utando wa buibui, tuna unyonge kama maji. Hakuna tumaini liwezalo kuwekwa juu ya sifa zetu za asili, wala mafanikio yetu ya kiroho; bali Mungu hudumu kuwa mwaminifu. Yeye ni mwaminifu katika upendo wake; hajui kigeugeu, wala kivuli cha kugeuka. Yeye ni mwaminifu kwa kusudi lake; haanzi kazi kisha akaiacha bila kuimaliza. Yeye ni mwaminifu katika mahusiano yake; kama Baba hatawakana watoto wake, kama rafiki hatawakataa watu wake, kama Muumba hataiacha kazi ya mikono yake mwenyewe. Yeye ni mwaminifu kwa ahadi zake, wala hataruhusu hata moja yao ipungukiwe kwa mwamini hata mmoja. Yeye ni mwaminifu kwa agano lake, alilolifanya nasi katika Kristo Yesu, na kulithibitisha kwa damu ya dhabihu yake. Yeye ni mwaminifu kwa Mwanawe, wala hataruhusu damu yake ya thamani imwagike bure. Yeye ni mwaminifu kwa watu wake ambao amewaahidia uzima wa milele, wala hatawaacha.

Uaminifu huu wa Mungu ndio msingi na jiwe la pembeni la tumaini letu la kudumu hata mwisho. Watakatifu watadumu katika utakatifu, kwa sababu Mungu hudumu katika neema. Yeye hudumu kubariki, na kwa hiyo waaminio hudumu kubarikiwa. Yeye huendelea kuwalinda watu wake, na kwa hiyo wao huendelea kuzishika amri zake. Huu ni msingi mzuri imara wa kupumzikia, nao unapatana kwa kupendeza na jina la kitabu hiki kidogo, "yote kwa neema." Basi ni fadhili za bure na rehema zisizo na mwisho zinazolia alfajiri ya wokovu, na kengele zizo hizo tamu hulia kwa uzuri mchana kutwa wa neema.

Wewe waona ya kwamba sababu pekee za kutumaini kwamba tutathibitishwa hata mwisho, na kuonekana bila lawama siku ya mwisho, zinapatikana katika Mungu wetu; lakini ndani yake sababu hizo ni nyingi mno.

Zinakaa kwanza, katika yale ambayo Mungu ameyatenda. Amekwenda mbali hivyo katika kutubariki hata haiwezekani kwake kurudi nyuma. Paulo atukumbusha ya kwamba "ametuita tuingie katika ushirika wa Mwanawe Yesu Kristo." Je! ametuita? Basi wito huo hauwezi kutanguliwa; kwa maana, "karama za Mungu na wito wake havina majuto." Bwana hageuki kamwe kutoka kwa wito wenye nguvu wa neema yake. "Wale aliowaita, hao akawahesabia haki; na wale aliowahesabia haki, hao akawatukuza:" hii ndiyo kanuni isiyobadilika ya utaratibu wa Mungu. Kuna wito wa kawaida, ambao juu yake imesemwa, "Walioitwa ni wengi, bali wateule ni wachache," lakini huu tunaoufikiri sasa ni wito wa namna nyingine, uonyeshao upendo wa pekee, na uletao lazima ya kumiliki kile ambacho kwacho tumeitwa. Katika hali kama hiyo, aliyeitwa yu kama mzao wa Ibrahimu, ambaye Bwana alisema juu yake, "Nimekuita toka ncha za dunia, nikakuambia, Wewe u mtumishi wangu; nimekuchagua wala sikukutupa."

Katika yale Bwana aliyoyatenda, twaona sababu zenye nguvu za kuhifadhiwa kwetu na utukufu wetu ujao, kwa sababu Bwana ametuita tuingie katika ushirika wa Mwanawe Yesu Kristo. Maana yake ni kuingia katika ushirika na Yesu Kristo, nami nataka wewe uzingatie kwa uangalifu maana ya jambo hili. Kama kweli umeitwa kwa neema ya Mungu, umeingia katika ushirika na Bwana Yesu Kristo, hata ukawa mmiliki-mwenza pamoja naye katika vitu vyote. Tangu sasa wewe u mmoja naye mbele ya macho ya Aliye juu. Bwana Yesu alizichukua dhambi zako katika mwili wake mwenyewe juu ya mti, akifanywa laana kwa ajili yako; na wakati ule ule amekuwa haki yako, hata ukahesabiwa haki ndani yake. Wewe u wa Kristo, na Kristo ni wako. Kama vile Adamu alivyosimama badala ya wazao wake, ndivyo Yesu asimamavyo badala ya wote walio ndani yake. Kama vile mume na mke walivyo mmoja, ndivyo Yesu alivyo mmoja na wote walioungwa naye kwa imani; mmoja kwa muungano wa ndoa usiovunjika kamwe. Zaidi ya hayo, waaminio ni viungo vya Mwili wa Kristo, na hivyo ni mmoja naye kwa muungano wa upendo, ulio hai, na wa kudumu. Mungu ametuita tuingie katika muungano huu, ushirika huu, ushirika huu wa pamoja, na kwa jambo hili lenyewe ametupa ishara na dhamana ya kuthibitishwa kwetu hata mwisho. Kama tungehesabiwa mbali na Kristo, tungekuwa vitu maskini viharibikavyo, ambavyo vingevunjika upesi na kuchukuliwa mbali hata uharibifuni; lakini kwa kuwa tu mmoja na Yesu, tumefanywa washiriki wa asili yake, nasi tumejaliwa uzima wake usiokufa. Hatima yetu imeunganishwa na ile ya Bwana wetu, na hata atakapoweza kuangamizwa yeye, haiwezekani kwamba sisi tuangamie.

Kaa sana katika ushirika huu na Mwana wa Mungu, ambao umeitwa uingie ndani yake: kwa maana tumaini lako lote lakaa hapo. Huwezi kamwe kuwa maskini wakati Yesu ni tajiri, kwa kuwa u katika kampuni moja pamoja naye. Uhitaji hauwezi kamwe kukushambulia, kwa kuwa u mmiliki-mwenza pamoja na yeye aliye Mwenye Mbingu na nchi. Huwezi kamwe kufeli; kwa maana ijapokuwa mmoja wa washirika katika kampuni ni maskini kama panya wa kanisani, na katika nafsi yake amefilisika kabisa, asiyeweza kulipa hata sehemu ndogo ya madeni yake mazito, lakini yule mshirika mwingine ni tajiri kupita fahamu, tajiri asiyeweza kuisha. Katika ushirika kama huo umeinuliwa juu ya huzuni za nyakati, mabadiliko ya wakati ujao, na mtikisiko wa mwisho wa vitu vyote. Bwana amekuita uingie katika ushirika wa Mwanawe Yesu Kristo, na kwa tendo hilo amekuweka mahali pa ulinzi usiokosea.

Kama kweli wewe u mwamini, u mmoja na Yesu, na kwa hiyo u salama. Je! huoni ya kwamba lazima iwe hivyo? Lazima uthibitishwe hata mwisho hata siku ya kufunuliwa kwake, kama kweli umefanywa mmoja na Yesu kwa tendo la Mungu lisilotanguka. Kristo na mwenye dhambi aaminiye wamo katika chombo kimoja: Yesu asipozama, mwamini hatazama kamwe. Yesu amewachukua wale aliowakomboa katika uhusiano wa namna hiyo pamoja naye, hata ni lazima yeye kwanza apigwe, ashindwe, na kuvunjiwa heshima, kabla ya mmoja aliye mdogo kuliko wote wa wale aliowanunua kudhurika. Jina lake liko juu ya kampuni, na hata litakapoweza kuvunjiwa heshima, tu salama dhidi ya hofu yote ya kufeli.

Basi, kwa ujasiri mkuu na tuende mbele hata wakati ujao usiojulikana, tukiwa tumeunganishwa milele na Yesu. Kama watu wa ulimwengu wakipiga kelele, "Ni nani huyu apandaye kutoka jangwani, ameegemea Mpendwa wake?" sisi tutakiri kwa furaha kwamba kweli twamwegemea Yesu, na kwamba tunakusudia kumwegemea zaidi na zaidi. Mungu wetu mwaminifu ni chemchemi ya furaha itiririkayo daima, na ushirika wetu na Mwana wa Mungu ni mto uliojaa furaha. Tukiyajua mambo haya matukufu hatuwezi kukata tamaa: la, bali twalia pamoja na mtume, "Ni nani atakayetutenga na upendo wa Mungu ulio katika Kristo Yesu Bwana wetu?"