Hitimisho

KAMA MSOMAJI wangu hakunifuata hatua kwa hatua alipokuwa akisoma kurasa zangu, kwa kweli nasikitika. Kusoma vitabu kuna faida ndogo isipokuwa kweli zipitazo mbele ya akili zishikwe, zijifanye mali, na zitekelezwe hata kufikia matunda yake ya vitendo. Ni kama vile mtu angeliona chakula tele dukani na hata hivyo akabaki na njaa, kwa kukosa kula kiasi mwenyewe. Ni bure kabisa, msomaji mpendwa, kwamba wewe na mimi tumekutana, isipokuwa umemshika kweli kweli Kristo Yesu, Bwana wangu. Kwa upande wangu palikuwa na shauku dhahiri ya kukufaidi, nami nimefanya niwezavyo yote kwa jambo hilo. Inaniumiza kwamba sikuweza kukutendea mema, kwa maana nimetamani sana kupata baraka hiyo. Nilikuwa nikikufikiri wewe nilipoandika ukurasa huu, nikaweka kalamu yangu chini na kwa uzito nikapiga magoti katika maombi kwa ajili ya kila mtu atakayeusoma. Ni imani yangu thabiti kwamba wasomaji wengi mno watapata baraka, ijapokuwa wewe wakataa kuwa miongoni mwao. Lakini kwa nini ukatae? Kama hutamani baraka teule ambayo ningelikuletea, basi nitendee haki kiasi cha kukiri kwamba lawama ya hukumu yako ya mwisho haitakuwa mlangoni pangu. Sisi wawili tutakapokutana mbele ya kile kiti kikuu cheupe cha enzi hutaweza kunishtaki kwamba nilitumia kwa uzembe usikivu ambao ulipenda kunipa ulipokuwa ukisoma kitabu changu kidogo. Mungu ajua ya kuwa niliandika kila mstari kwa faida yako ya milele. Sasa katika roho nakushika mkono. Nakupa mkamato imara. Je, wahisi kushikwa kwangu kwa kindugu? Machozi yamejaa machoni pangu ninapokutazama na kusema, Mbona utakufa? Je, hutaifikiria nafsi yako? Je, utaangamia kwa uzembe mtupu? Ee, usifanye hivyo; bali pima mambo haya mazito, na ujihakikishie kazi kwa ajili ya umilele! Usimkatae Yesu, upendo wake, damu yake, wokovu wake. Kwa nini ufanye hivyo? Waweza kufanya hivyo?

Nakusihi,

Usimgeuzie kisogo Mkombozi wako!

Lakini kwa upande mwingine, kama maombi yangu yamesikiwa, na wewe, msomaji wangu, umeongozwa kumtumaini Bwana Yesu na kupokea kwake wokovu kwa neema, basi shika daima fundisho hili, na njia hii ya kuishi. Yesu na awe kwako yote katika yote, na neema ya bure na iwe mstari pekee ambao ndani yake unaishi na kutembea. Hakuna uzima kama ule wa mtu aishiye katika upendeleo wa Mungu. Kupokea vyote kama zawadi ya bure huhifadhi akili isiwe na kiburi cha kujihesabia haki, wala kukata tamaa kwa kujishtaki. Hufanya moyo upate uchangamfu wa upendo wenye shukrani, na hivyo huzua hisia ndani ya nafsi ambayo yakubalika mbele za Mungu zaidi bila kikomo kuliko kitu chochote kiwezacho kutokana na hofu ya kitumwa. Wale watumainio kuokolewa kwa kujaribu kufanya wawezavyo yote hawajui lolote juu ya bidii ile iwakayo, joto lile takatifu, furaha ile ya kicha katika Mungu, vitokeavyo pamoja na wokovu utolewao bure sawasawa na neema ya Mungu. Roho ya kitumwa ya kujiokoa mwenyewe haiwezi kulingana na roho ya furaha ya kufanywa wana. Kuna wema wa kweli zaidi katika hisia ndogo kabisa ya imani kuliko katika kuvuta-vuta kwote kwa watumwa wa sheria, au mtambo wote uchoshao wa wenye ibada wapendao kupanda Mbinguni kwa mizunguko ya taratibu za dini. Imani ni ya kiroho, na Mungu aliye roho hupendezwa nayo kwa sababu hiyo. Miaka ya kusema sala, na kwenda kanisani, au kwenda kwenye nyumba za maombi, na taratibu, na matendo, yaweza kuwa chukizo tu mbele za macho ya Yehova; bali mtupo wa jicho la imani ya kweli ni wa kiroho na kwa hiyo ni wa thamani kwake. "Baba awatafuta watu wa namna hiyo wamwabudu." Angalia kwanza utu wa ndani, na mambo ya kiroho, na yaliyosalia yatafuata kwa wakati wake.

Kama wewe mwenyewe umeokoka, kuwa macho kwa ajili ya roho za watu wengine. Moyo wako mwenyewe hautafanikiwa isipokuwa ujawe na shauku kubwa ya kuwabariki wenzako wanadamu. Uzima wa nafsi yako u katika imani; afya yake i katika upendo. Yeye asiyeona shauku kubwa ya kuwaongoza wengine kwa Yesu hajapata kamwe kuwa chini ya nguvu ya upendo mwenyewe. Shika kazi ya Bwana--kazi ya upendo. Anza nyumbani. Kisha watembelee jirani zako. Uangaze kijiji au mtaa unaoishi. Tawanya neno la Bwana kila mahali mkono wako uwezapo kufikia.

Msomaji, ukutane nami mbinguni! Usishuke mpaka jehanamu. Hakuna kurudi tena kutoka makao yale ya taabu. Mbona wataka kuingia njia ya mauti wakati mlango wa Mbinguni umefunguliwa mbele yako? Usikatae msamaha wa bure, wokovu kamili awapao Yesu wote wamtumainio. Usisite wala usikawie. Umeazimia vya kutosha, njoo kwenye vitendo. Mwamini Yesu sasa, kwa uamuzi kamili na wa papo hapo. Chukua maneno pamoja nawe, njoo kwa Bwana wako siku hii, naam siku hii hii. Kumbuka, ee nafsi, yaweza kuwa

sasa au kamwe

kwako. Na iwe SASA; ingekuwa jambo baya sana kama ingekuwa kamwe.

Tena nakuagiza,

ukutane nami mbinguni.