Uthibitisho

NATAKA UTAMBUE usalama ule ambao Paulo aliutazamia kwa uhakika kwa watakatifu wote. Asema hivi--"Atakayewathibitisha ninyi hata mwisho, mpate kuwa hamna hatia katika siku ya Bwana wetu Yesu Kristo." Huu ndio uthibitisho wa aina inayostahili kutamaniwa kuliko vitu vyote. Waona ya kuwa unadhania kwamba watu hao wako katika njia iliyo sawa, nao unakusudia kuwathibitisha katika iliyo sawa. Lingekuwa jambo la kutisha kumthibitisha mtu katika njia za dhambi na za uongo. Fikiri juu ya mlevi aliyethibitika, au mwivi aliyethibitika, au mwongo aliyethibitika. Lingekuwa jambo la kusikitisha mtu kuthibitika katika kutokuamini na kutokuwa na utauwa. Uthibitisho wa Kimungu waweza kufurahiwa tu na wale ambao neema ya Mungu imekwisha kudhihirishwa kwao. Ni kazi ya Roho Mtakatifu. Yeye atoaye imani huitia nguvu na kuithibitisha; Yeye awashaye upendo ndani yetu huuhifadhi na kuuongeza mwako wake. Lile atufanyalo kulijua kwa mafundisho yake ya kwanza, Roho huyo mwema hutufanya kulijua kwa uwazi zaidi na kwa uhakika zaidi kwa mafundisho ya kuendelea. Matendo matakatifu huthibitishwa hata yawe mazoea, na hisia takatifu huthibitishwa hata ziwe hali za kudumu. Uzoefu na utendaji huthibitisha imani zetu na maazimio yetu. Furaha zetu na huzuni zetu, kufaulu kwetu na kushindwa kwetu, vyote hutakaswa kwa lengo lilo hilo; kama vile mti usaidiwavyo kujikita mizizi kwa manyunyu mororo na kwa pepo kali vilevile. Akili hufundishwa, na katika maarifa yake yaongezekayo hukusanya sababu za kudumu katika njia iliyo njema; moyo hufarijiwa, na hivyo hufanywa kushikamana zaidi na kweli ile ifarijiyo. Mshiko huzidi kuwa imara, na mwendo huzidi kuwa thabiti, na mtu mwenyewe huwa mwenye uthabiti na wa maana zaidi.

Huu si ukuaji wa kimaumbile tu, bali ni kazi ya Roho iliyo dhahiri kama vile wongofu. Bwana hakika atawapa wale wanaomtegemea kwa uzima wa milele. Kwa kutenda kazi ndani yetu atatuokoa na kuwa "tusio na uthabiti kama maji," na kutufanya tuwe wenye mizizi na msingi. Ni sehemu ya njia ile ambayo kwayo hutuokoa--kutujenga ndani ya Kristo Yesu na kutufanya tukae ndani yake. Msomaji mpendwa, waweza kulitazamia hili kila siku; wala hutaaibika. Yeye umtumainiye atakufanya uwe kama mti uliopandwa kandokando ya vijito vya maji, uliohifadhiwa hata jani lako nalo halitanyauka.

Ni nguvu iliyoje kwa kanisa Mkristo aliyethibitika! Ni faraja kwa wenye huzuni, na msaada kwa walio dhaifu. Je, hutamani kuwa hivyo? Waaminio waliothibitika ni nguzo katika nyumba ya Mungu wetu. Hao hawachukuliwi na kila upepo wa elimu, wala hawaangushwi na jaribu la ghafula. Ni tegemeo kubwa kwa wengine, nao hutenda kama nanga wakati wa taabu ya kanisa. Wewe uanzaye maisha matakatifu waweza kuthubutu kutumaini kwa shida kwamba utakuwa kama wao. Lakini si lazima uogope; Bwana mwema atatenda kazi ndani yako kama atendavyo ndani yao. Siku moja kati ya hizi wewe uliye sasa "mtoto mchanga" katika Kristo utakuwa "baba" katika kanisa. Litumainie jambo hili kuu; lakini litumainie kama kipawa cha neema, wala si kama ujira wa kazi, au kama zao la nguvu zako mwenyewe.

Mtume Paulo aliyevuviwa awanena watu hawa kama watakaothibitishwa hata mwisho. Alitazamia neema ya Mungu iwahifadhi wao binafsi hata mwisho wa maisha yao, au hata Bwana Yesu atakapokuja. Naam, alitazamia ya kwamba kanisa lote la Mungu kila mahali na katika nyakati zote litahifadhiwa hata mwisho wa kipindi hiki, hata Bwana Yesu, akiwa Bwana-arusi, atakapokuja kuadhimisha karamu ya arusi pamoja na Bibi-arusi wake aliyekamilishwa. Wote walio katika Kristo watathibitishwa ndani yake hata siku ile tukufu. Je, hakusema, "Kwa sababu mimi ni hai, ninyi nao mtakuwa hai"? Tena akasema, "Nawapa kondoo wangu uzima wa milele; wala hawatapotea kamwe, wala hakuna mtu atakayewapokonya mkononi mwangu." Yeye aliyeanza kazi njema ndani yako ataithibitisha hata siku ya Kristo. Kazi ya neema nafsini si matengenezo ya juujuu tu; uhai uliopandwa katika kuzaliwa mara ya pili hutokana na mbegu iliyo hai isiyoharibika, ikaayo na kudumu milele; na ahadi za Mungu alizowaahidia waaminio si za muda mfupi, bali kwa kutimizwa kwake zahitaji mwaminio kushika njia yake hata afike kwenye utukufu usio na mwisho. Tunalindwa kwa nguvu za Mungu, kwa njia ya imani, hata tupate wokovu. "Mwenye haki atashika njia yake." Si kwa sababu ya ustahili wetu au nguvu zetu, bali kama kipawa cha upendeleo ulio huru usiostahiliwa, wale waaminio "wamehifadhiwa katika Kristo Yesu." Katika kondoo wa zizi lake Yesu hatampoteza hata mmoja; hakuna kiungo cha Mwili wake kitakachokufa; hakuna kito cha hazina yake kitakachokosekana siku ile atakapowakusanya vito vyake. Msomaji mpendwa, wokovu upokewao kwa imani si jambo la miezi na miaka; kwa maana Bwana wetu Yesu "ametupatia wokovu wa milele," na kile kilicho cha milele hakiwezi kufikia mwisho.

Paulo tena atangaza tumaini lake ya kwamba watakatifu wa Korintho wangekuwa "wamethibitishwa hata mwisho bila hatia." Kutokuwa na hatia huku ni sehemu ya thamani ya kuhifadhiwa kwetu. Kuhifadhiwa katika utakatifu ni bora kuliko kuhifadhiwa salama tu. Ni jambo la kutisha uonapo watu wa dini wakijikwaa toka aibu moja hata nyingine; hawajaamini nguvu za Bwana wetu za kuwafanya wasiwe na hatia. Maisha ya baadhi ya wanaodai kuwa Wakristo ni mfululizo wa kujikwaa; kamwe hawako chini kabisa, wala mara nyingi hawasimami kwa miguu yao. Hili silo lifaalo kwa mwaminio; amealikwa kwenda pamoja na Mungu, na kwa imani aweza kufikia kudumu imara katika utakatifu; tena imempasa kufanya hivyo. Bwana aweza, si kutuokoa na jehanamu tu, bali kutulinda tusianguke. Si lazima tukubali kushindwa na jaribu. Je, haikuandikwa, "Dhambi haitawatawala ninyi"? Bwana aweza kuilinda miguu ya watakatifu wake; naye atafanya hivyo tukimtumaini afanye hivyo. Si lazima tuyachafue mavazi yetu, twaweza kwa neema yake kuyaweka bila mawaa na dunia; twafungwa kufanya hivyo, "kwa maana pasipo utakatifu hapana mtu atakayemwona Bwana."

Mtume alitabiri kwa waaminio hawa lile atakalo sisi kulitafuta--kwamba tupate kuhifadhiwa, bila hatia hata siku ya Bwana wetu Yesu Kristo. Tafsiri iliyorekebishwa yasema "wasiolaumika" badala ya "wasio na hatia." Yamkini tafsiri iliyo bora zaidi ingekuwa "wasioshtakika." Mungu na atujalie ya kwamba katika siku ile kuu ya mwisho tusimame bila mashtaka yoyote, wala asiwepo hata mmoja katika ulimwengu wote awezaye kuthubutu kupinga madai yetu ya kuwa wakombolewa wa Bwana. Tuna dhambi na udhaifu wa kuomboleza, lakini hizi si za aina ya makosa yanayoweza kuthibitisha kwamba tu nje ya Kristo; tutakuwa safi na unafiki, hila, chuki, na kufurahia dhambi; kwa maana mambo haya yangekuwa mashtaka ya kuangamiza. Ijapokuwa kasoro zetu, Roho Mtakatifu aweza kutenda ndani yetu tabia isiyo na doa mbele ya watu; hata, kama Danieli, tusitoe nafasi yoyote kwa ndimi za mashtaka, isipokuwa katika habari ya dini yetu. Wingi wa wanaume na wanawake watauwa wameonyesha maisha yaliyo wazi kabisa, yenye kupatana kotekote, hata hapana aliyeweza kuyapinga. Bwana ataweza kunena juu ya mwaminio mwingi, kama alivyonena juu ya Ayubu, Shetani aliposimama mbele zake, "Je! umemwangalia mtumishi wangu, mtu mkamilifu na mnyofu, mwenye kumcha Mungu na kuepukana na uovu?" Hivi ndivyo msomaji wangu apaswavyo kutazamia mkononi mwa Bwana. Huu ndio ushindi wa watakatifu--kuendelea kumfuata Mwana-Kondoo kila aendako, tukidumisha unyofu wetu kama mbele za Mungu aliye hai. Tusiache kamwe kugeukia njia zilizopotoka, na kumpa adui sababu ya kukufuru. Kwa habari ya mwaminio wa kweli imeandikwa, "Hujilinda nafsi yake, wala yule mwovu hamgusi." Na iandikwe hivyo kwa habari yetu!

Rafiki uanzaye tu maisha ya kimungu, Bwana aweza kukupa tabia isiyolaumika. Ijapokuwa katika maisha yako yaliyopita umekwenda mbali katika dhambi, Bwana aweza kukuokoa kabisa na nguvu za mazoea ya zamani, na kukufanya kielelezo cha wema. Aweza si kukufanya mwadilifu tu, bali aweza kukufanya uchukie kila njia ya uongo na kufuata yote yaliyo ya kitakatifu. Usilitilie shaka. Aliye mkuu wa wenye dhambi si lazima awe nyuma hata kidogo ya walio safi kuliko watakatifu wote. Amini kwa ajili ya hili, na iwe kwako sawasawa na imani yako.

Ee, itakuwa furaha iliyoje kuonekana bila hatia katika siku ya hukumu! Twaimba vyema, tuunganapo katika wimbo ule wa kupendeza:

Nitasimama kwa ujasiri siku ile kuu,
Maana ni nani atakayenishtaki kwa lo lote;
Nami nikiwa nimeachiliwa kwa Damu yako,
Toka laana na aibu kuu ya dhambi?

Furaha iliyoje itakuwa kuufurahia ujasiri huo usio na hofu, mbingu na nchi vitakapokimbia toka uso wa Mwamuzi wa vyote! Furaha hii itakuwa fungu la kila mtu atazamaye neema ya Mungu peke yake katika Kristo Yesu, na katika uwezo huo mtakatifu apiganaye vita bila kukoma na dhambi zote.