Jinsi Toba Itolewavyo

TUKIRUDI kwenye andiko lile kuu: "Mtu huyo Mungu amemtukuza kwa mkono wake wa kuume, awe Mkuu na Mwokozi, ili awape Israeli toba na msamaha wa dhambi." Bwana wetu Yesu Kristo amepaa juu ili neema ipate kushuka chini. Utukufu wake unatumika kuieneza neema yake zaidi. Bwana hakupiga hatua hata moja kwenda juu isipokuwa kwa kusudi la kuwapandisha juu pamoja naye wenye dhambi waaminio. Ametukuzwa ili atoe toba; na jambo hili tutaliona tukikumbuka kweli chache kuu.

Kazi ambayo Bwana wetu Yesu ameifanya imeifanya toba iwezekane, ipatikane, na ikubalike. Sheria haitaji toba, bali husema wazi, "Roho ile itendayo dhambi ndiyo itakayokufa." Kama Bwana Yesu asingekufa na kufufuka tena na kwenda kwa Baba, toba yako au yangu ingekuwa na thamani gani? Twaweza kuhisi majuto pamoja na vituko vyake, lakini kamwe si toba pamoja na matumaini yake. Toba, kama hisia ya kiasili, ni wajibu wa kawaida usiostahili sifa kubwa: naam, kwa kawaida imechanganyika sana na hofu ya nafsi ya adhabu, hata kwamba kadirio la fadhili zaidi haliithamini sana. Kama Yesu asingaliingilia kati na kutokeza wingi wa ustahili, machozi yetu ya toba yangekuwa kama maji yaliyomwagwa juu ya nchi. Yesu ametukuzwa juu, ili kwa uwezo wa maombezi yake toba ipate mahali mbele za Mungu. Kwa jinsi hii yeye hutupa toba, kwa sababu huiweka toba katika hali ya kukubaliwa, ambayo isingaliweza kamwe kuwa nayo vinginevyo.

Yesu alipotukuzwa juu, Roho wa Mungu alimwagwa ili afanye kazi ndani yetu neema zote zinazohitajika. Roho Mtakatifu huumba toba ndani yetu kwa kuiupya asili yetu kwa njia ya kimuujiza, na kuuondoa moyo wa jiwe katika mwili wetu. Ee, usikae ukikaza macho yako hayo ili kutoa machozi yasiyowezekana! Toba haitoki katika asili isiyotaka, bali katika neema iliyo huru na kuu. Usiende chumbani mwako kujipiga kifua ili kutoa katika moyo wa jiwe hisia zisizokuwako. Bali nenda Kalvari ukaone jinsi Yesu alivyokufa. Tazama juu, milimani, kunakotoka msaada wako. Roho Mtakatifu amekuja kwa kusudi hili, ili azifunike roho za watu na kuzalisha toba ndani yao, kama vile alivyowahi kuatamia machafuko na kutokeza utaratibu. Mvuvie sala yako, "Ee Roho Mbarikiwa, ukae nami. Unifanye mpole na mnyenyekevu wa moyo, ili niichukie dhambi na kuitubu kwa unyofu." Atasikia kilio chako na kukujibu.

Kumbuka tena, kwamba Bwana wetu Yesu alipotukuzwa, hakutupa toba kwa kumtuma Roho Mtakatifu tu, bali kwa kuweka wakfu kazi zote za asili na za Majaliwa kwa makusudi makuu ya wokovu wetu, hata kwamba lo lote katika hizo laweza kutuita kwenye toba, likiwika kama jogoo wa Petro, au likitikisa gereza kama tetemeko la nchi la yule bawabu. Kutoka mkono wa kuume wa Mungu Bwana wetu Yesu huvitawala vitu vyote hapa chini, na kuvifanya vitende kazi pamoja kwa wokovu wa waliokombolewa wake. Hutumia machungu na matamu, majaribu na furaha, ili azalishe ndani ya wenye dhambi nia iliyo bora kwa Mungu wao. Uwe na shukrani kwa Majaliwa yaliyokufanya maskini, au mgonjwa, au mwenye huzuni; kwa maana kwa hayo yote Yesu hutenda uzima wa roho yako na kukugeuza umwelekee yeye. Rehema ya Bwana mara nyingi hufika mlangoni pa mioyo yetu ikipanda farasi mweusi wa mateso. Yesu hutumia ujuzi wetu wote ili kutuachisha nchi na kutubembeleza tuelekee Mbinguni. Kristo ametukuzwa kwenye kiti cha enzi cha mbingu na nchi ili kwamba, kwa njia zote za Majaliwa yake, aitiishe mioyo migumu iletwe kwenye ulaini wa neema wa toba.

Zaidi ya hayo, anatenda kazi saa hii kwa minong'ono yake yote ndani ya dhamiri, kwa Kitabu chake kilichovuviwa, kwa sisi tunaosema kutoka katika Kitabu hicho, na kwa rafiki waombao na mioyo yenye bidii. Aweza kukupelekea neno litakalougonga moyo wako wa mwamba kama kwa fimbo ya Musa, na kufanya vijito vya toba vibubujike. Aweza kukukumbusha andiko fulani livunjalo moyo kutoka katika Maandiko Matakatifu ambalo litakushinda upesi kabisa. Aweza kukulainisha kwa njia ya siri, na kufanya hali takatifu ya moyo ikunyemelee wakati usiotarajia. Uwe na hakika ya jambo hili, kwamba yeye aliyeingia katika utukufu wake, akainuliwa hata katika fahari yote na enzi ya Mungu, anazo njia tele za kutenda toba ndani ya wale awapao msamaha. Hata sasa anangoja akupe toba. Mwombe upesi.

Angalia kwa faraja nyingi kwamba Bwana Yesu Kristo huwapa toba hii watu wasiotazamiwa kabisa katika ulimwengu. Ametukuzwa ili awape Israeli toba. Kwa Israeli! Katika siku zile mitume waliponena hivyo, Israeli ndilo taifa lililokuwa limetenda dhambi kubwa kupita zote juu ya nuru na upendo, kwa kuthubutu kusema, "Damu yake na iwe juu yetu na juu ya watoto wetu." Lakini bado Yesu ametukuzwa awape toba! Ni ajabu iliyoje ya neema! Kama umelelewa katika nuru ya Kikristo iliyong'aa zaidi, na hata hivyo ukaikataa, bado kuna tumaini. Kama umetenda dhambi juu ya dhamiri, na juu ya Roho Mtakatifu, na juu ya upendo wa Yesu, bado kuna nafasi ya toba. Ujapokuwa mgumu kama Israeli asiyeamini wa kale, ulaini waweza bado kukujia, kwa kuwa Yesu ametukuzwa, na kuvikwa uweza usio na mpaka. Kwa wale walioenda mbali zaidi katika uovu, na kutenda dhambi kwa uzito wa pekee, Bwana Yesu ametukuzwa ili awape toba na msamaha wa dhambi. Nina furaha iliyoje kuwa na injili timilifu namna hii ya kuihubiri! Una furaha iliyoje kuruhusiwa kuisoma!

Mioyo ya wana wa Israeli ilikuwa imekuwa migumu kama jiwe la almasi. Lutheri alikuwa akidhani ya kwamba haiwezekani kumwongoa Myahudi. Sisi hatukubaliani naye hata kidogo, na hata hivyo yatupasa kukiri kwamba wazao wa Israeli wamekuwa wakaidi mno katika kumkataa Mwokozi katika karne hizi nyingi. Kweli Bwana alisema, "Israeli hawakunitaka." "Alikuja kwake, wala walio wake hawakumpokea." Lakini kwa ajili ya Israeli Bwana wetu Yesu ametukuzwa kwa kutoa toba na msamaha. Yamkini msomaji wangu ni Mtu wa Mataifa; lakini bado aweza kuwa na moyo mkaidi sana, uliomkataa Bwana Yesu miaka mingi; na hata hivyo ndani yake Bwana wetu aweza kutenda toba. Yawezekana kwamba bado utahisi kulazimika kuandika kama William Hone alivyoandika alipokubali upendo wa Mungu. Yeye ndiye aliyeandika vile vitabu vyenye kufurahisha sana viitwavyo "Kitabu cha Kila Siku," lakini alikuwa zamani mtu asiyeamini mwenye moyo hodari. Alipotiishwa na neema kuu, aliandika:

Moyo wenye kiburi kuu uliopata kupiga

Umetiishwa ndani yangu;

Nia kali kupita zote iliyopata kuinuka

Kuidharau kazi yako na kuwasaidia adui zako

Imenyamazishwa, Bwana wangu, na wewe.

Mapenzi yako, wala si mapenzi yangu, yatimizwe,

Moyo wangu uwe wako milele;

Nikikukiri wewe kuwa Neno lenye uweza,

Mwokozi wangu Kristo, Mungu wangu, Bwana wangu,

Msalaba wako utakuwa ishara yangu.

Bwana aweza kuwapa toba wasiotazamiwa kabisa, akiwageuza simba kuwa wana-kondoo, na kunguru kuwa hua. Na tumtazame yeye ili badiliko hili kuu litendeke ndani yetu. Bila shaka kutafakari mauti ya Kristo ni mojawapo ya njia zilizo hakika na za haraka zaidi za kupata toba. Usikae chini ukajaribu kuvuta toba kutoka kisima kikavu cha asili iliyoharibika. Ni kinyume cha sheria za akili kudhani kwamba waweza kuilazimisha nafsi yako iingie katika hali ile ya neema. Uupeleke moyo wako kwa sala kwa yeye auelewaye, na useme, "Bwana, usafishe. Bwana, uufanye upya. Bwana, tenda toba ndani yake." Kadiri unavyojaribu kutokeza hisia za toba ndani yako mwenyewe, ndivyo utakavyokata tamaa zaidi; lakini ukimfikiri Yesu kwa imani akifa kwa ajili yako, toba italipuka. Tafakari jinsi Bwana alivyomwaga damu ya moyo wake kwa upendo kwako. Weka mbele ya jicho la akili yako ile dhiki na jasho la damu, msalaba na mateso; nawe ukifanya hivi, yeye aliyekuwa mchukuzi wa huzuni hii yote atakutazama, na kwa mtazamo ule atakufanyia yale aliyomfanyia Petro, hata wewe nawe utatoka nje na kulia kwa uchungu. Yeye aliyekufa kwa ajili yako aweza, kwa Roho wake wa neema, kukufanya ufe kwa dhambi; na yeye aliyeingia katika utukufu kwa niaba yako aweza kuivuta nafsi yako imfuate, mbali na uovu, na kuelekea utakatifu.

Nitatosheka kama nikikuachia wazo hili moja; usitazame chini ya barafu ili kuona moto, wala usitumaini kupata toba katika moyo wako wa kiasili. Mtazame yeye aliye hai upate uzima. Mtazame Yesu kwa yote uyahitajiyo kati ya Lango la Kuzimu na Lango la Mbinguni. Kamwe usitafute penginepo sehemu yo yote ya kile ambacho Yesu apenda kukibariki; lakini kumbuka,

Kristo ni yote.