Toba Lazima Iende Pamoja na Msamaha

NI DHAHIRI kutokana na andiko tulilolinukuu hivi karibuni kwamba toba imefungamana na msamaha wa dhambi. Katika Matendo 5:31 twasoma kwamba Yesu "ametukuzwa ili atoe toba na msamaha wa dhambi." Baraka hizi mbili zatoka katika ule mkono mtakatifu uliokuwa umepigwa misumari msalabani wakati mmoja, lakini sasa umeinuliwa katika utukufu. Toba na msamaha vimefungamanishwa pamoja kwa kusudi la milele la Mungu. Basi alichokiunganisha Mungu, mwanadamu asikitenganishe.

Toba lazima iende pamoja na ondoleo, nawe utaona kwamba ni hivyo ukiitafakari jambo hili kidogo. Haiwezekani msamaha wa dhambi utolewe kwa mwenye dhambi asiyetubu; hilo lingekuwa ni kumthibitisha katika njia zake mbaya, na kumfundisha kuudharau uovu. Kama Bwana angesema, "Wewe unaipenda dhambi, na kuishi ndani yake, nawe unazidi kuwa mbaya zaidi na zaidi, lakini, hata hivyo, nakusamehe," hilo lingekuwa ni kutangaza ruhusa ya kutisha ya kutenda maovu. Misingi ya utaratibu wa jamii ingeondolewa, na ghasia za kimaadili zingefuata. Siwezi kueleza maovu yasiyohesabika ambayo kwa hakika yangetokea kama ungeweza kutenganisha toba na msamaha, na kuipuuza dhambi hali mwenye dhambi akiendelea kuipenda kama zamani. Katika hali halisi ya mambo, kama tunaamini utakatifu wa Mungu, ni lazima iwe hivyo, kwamba tukiendelea katika dhambi zetu, na tusitake kuzitubia, hatuwezi kusamehewa, bali ni lazima tuvune matunda ya ukaidi wetu. Kwa kadiri ya wema usio na mwisho wa Mungu, tumeahidiwa kwamba tukiziacha dhambi zetu, tukiziungama, na, kwa imani, tukiipokea neema iliyoandaliwa katika Kristo Yesu, Mungu ni mwaminifu na wa haki hata atuondolee dhambi zetu, na kutusafisha na udhalimu wote. Lakini, maadamu Mungu yu hai, hakuwezi kuwa na ahadi ya rehema kwa wale wanaoendelea katika njia zao mbaya, na kukataa kukiri makosa yao. Bila shaka hakuna mwasi awezaye kutazamia Mfalme amsamehe uasi wake hali angali katika uasi wa waziwazi. Hakuna awezaye kuwa mpumbavu kiasi cha kudhani kwamba Mwamuzi wa dunia yote ataziondoa dhambi zetu ikiwa sisi wenyewe twakataa kuziondoa.

Zaidi ya hayo, ni lazima iwe hivyo kwa ajili ya ukamilifu wa rehema ya Mungu. Rehema ile ambayo ingeweza kuisamehe dhambi na bado kumwacha mwenye dhambi aishi ndani yake ingekuwa rehema haba na ya juujuu tu. Ingekuwa rehema isiyo sawa na iliyolemaa, kilema kwa mmoja wa miguu yake, na iliyopooza kwa mmoja wa mikono yake. Waonaje wewe, ni upi upendeleo mkubwa zaidi, kutakaswa na hatia ya dhambi, au kuokolewa na nguvu ya dhambi? Sitajaribu kupima katika mizani rehema mbili zilizo bora namna hii. Hakuna hata mojawapo iliyoweza kutufikia bila damu ya thamani ya Yesu. Lakini yaonekana kwangu kwamba kuokolewa na utawala wa dhambi, kufanywa mtakatifu, kufanywa kama Mungu, ni lazima kuhesabiwe kuwa kubwa zaidi ya hizo mbili, ikiwa ni lazima kufanya ulinganisho. Kusamehewa ni fadhili isiyopimika. Twaifanya hii kuwa mojawapo ya nyimbo za kwanza za zaburi yetu ya sifa: "Akusamehe maovu yako yote." Lakini kama tungeweza kusamehewa, kisha tukaruhusiwa kuipenda dhambi, kufurahia uovu, na kugaagaa katika tamaa mbaya, msamaha wa namna hiyo ungefaa nini? Je, usingeweza kugeuka kuwa utamu wenye sumu, ambao ungetuangamiza kabisa? Kuoshwa, na bado kulala matopeni; kutangazwa kuwa safi, na bado kuwa na ukoma mweupe katika kipaji cha uso, kungekuwa ni dhihaka kubwa kabisa ya rehema. Ni faida gani kumtoa mtu kaburini mwake kama utamwacha akiwa amekufa? Kwa nini kumwongoza aingie katika nuru kama angali kipofu? Twamshukuru Mungu, kwamba yeye asamehaye maovu yetu pia huponya magonjwa yetu. Yeye atuoshaye madoa ya wakati uliopita pia hutuinua kutoka njia chafu za sasa, na hutuhifadhi tusianguke wakati ujao. Ni lazima tuzipokee kwa furaha toba na ondoleo pia; haviwezi kutenganishwa. Urithi wa agano ni mmoja usiogawanyika, wala haupasi kugawanywa vipande. Kuigawanya kazi ya neema kungekuwa ni kumkata mtoto aliye hai vipande viwili, na wale wangeruhusu hilo hawana sehemu ndani yake.

Nitakuuliza wewe unayemtafuta Bwana, je, ungetosheka na mojawapo tu ya rehema hizi? Je, ingekuridhisha wewe, msomaji wangu, ikiwa Mungu angekusamehe dhambi yako kisha akakuacha uwe wa kidunia na mwovu kama zamani? La, hasha! Roho iliyohuishwa yaiogopa dhambi yenyewe zaidi kuliko matokeo yake ya adhabu. Kilio cha moyo wako si, "Ni nani atakayeniokoa na adhabu?" bali, "Ole wangu, maskini mimi! Ni nani atakayeniokoa na mwili huu wa mauti? Ni nani atakayeniwezesha kuishi juu ya majaribu, na kuwa mtakatifu, kama vile Mungu alivyo mtakatifu?" Kwa kuwa muungano wa toba na ondoleo unapatana na shauku ya neema, na kwa kuwa ni lazima kwa ajili ya ukamilifu wa wokovu, na kwa ajili ya utakatifu, uwe na hakika kwamba wadumu.

Toba na msamaha vimeunganishwa pamoja katika uzoefu wa waamini wote. Hajapata kuwako mtu aliyeitubia dhambi kwa unyofu kwa toba yenye imani ambaye hakusamehewa; na kwa upande mwingine, hajapata kuwako mtu aliyesamehewa ambaye hakuitubia dhambi yake. Sisiti kusema kwamba chini ya kuba za Mbingu hakujapata kuwa, hakuna, wala hakutakuwa kamwe, tukio lolote la dhambi kuoshwa, isipokuwa wakati uleule moyo uliongozwa kwenye toba na imani katika Kristo. Kuichukia dhambi na hisia ya msamaha huingia pamoja ndani ya nafsi, na hukaa pamoja maadamu tunaishi.

Mambo haya mawili hutendeana na kuitikiana: mtu aliyesamehewa, kwa hiyo hutubu; na mtu atubuye pia bila shaka amesamehewa. Kumbuka kwanza, kwamba msamaha huongoza kwenye toba. Kama tuimbavyo kwa maneno ya Hart:

Sheria na hofu hufanya moyo ukae mgumu,
Wakati wote zifanyapo kazi peke yake;
Bali hisia ya msamaha ulionunuliwa kwa damu
Mara huuyeyusha moyo wa jiwe.

Tunapokuwa na hakika kwamba tumesamehewa, ndipo twauchukia uovu; nami nadhani ya kwamba imani ikuapo hata kuwa uhakika kamili, hata tukawa na yakini pasipo shaka kwamba damu ya Yesu imetuosha na kuwa weupe kuliko theluji, ndipo toba ifikapo kilele chake cha juu kabisa. Toba hukua kadiri imani ikuavyo. Usikose kabisa kufahamu jambo hili; toba si jambo la siku na majuma, adhabu ya muda ikwishe upesi iwezekanavyo! La; ni neema ya maisha yote, kama imani yenyewe. Watoto wadogo wa Mungu hutubu, na vivyo hivyo vijana na akina baba. Toba ni mwenzi asiyetengana na imani. Wakati wote tuendapo kwa imani wala si kwa kuona, chozi la toba humetameta katika jicho la imani. Hiyo si toba ya kweli isiyotokana na imani katika Yesu, na hiyo si imani ya kweli katika Yesu isiyochanganyika na toba. Imani na toba, kama mapacha walioungana, vimeungwa pamoja kwa uhai. Kwa kadiri tuaminivyo upendo wa Kristo usamehecho, kwa kadiri hiyo twatubu; na kwa kadiri tuitubiavyo dhambi na kuuchukia uovu, twafurahia ukamilifu wa msamaha ambao Yesu ametukuzwa ili kuutoa. Kamwe hutauthamini msamaha usipohisi toba; wala kamwe hutaonja funda lililo zito zaidi la toba hata utakapojua kwamba umesamehewa. Yaweza kuonekana jambo geni, lakini ndivyo ilivyo--uchungu wa toba na utamu wa msamaha huchanganyika katika ladha ya kila maisha ya neema, na kufanya furaha isiyo na kifani.

Vipawa hivi viwili vya agano ni uthibitisho wa kila kimoja kwa kingine. Kama najua kwamba natubu, najua kwamba nimesamehewa. Nitajuaje kwamba nimesamehewa isipokuwa nijue pia kwamba nimegeuka kutoka mwenendo wangu wa dhambi wa zamani? Kuwa mwamini ni kuwa mwenye kutubu. Imani na toba si kitu ila spoku mbili katika gurudumu lilelile, mipini miwili ya jembe lilelile. Toba imeelezwa vema kuwa ni moyo uliovunjika kwa ajili ya dhambi, na kuachana na dhambi; nayo yaweza vilevile kunenwa kuwa ni kugeuka na kurudi. Ni badiliko la nia la aina iliyo kamili na ya msingi kabisa, nalo huandamana na huzuni kwa ajili ya yaliyopita, na azimio la kujirekebisha wakati ujao.

Toba ni kuziacha

Dhambi tulizozipenda kwanza;

Na kuonyesha kwamba twahuzunika kwa kweli,

Kwa kutozitenda tena.

Basi, ikiwa ndivyo ilivyo, twaweza kuwa na hakika kwamba tumesamehewa; kwa maana Bwana hakupata kuufanya moyo uvunjike kwa ajili ya dhambi na kuachana na dhambi, bila kuusamehe. Kwa upande mwingine, ikiwa twafurahia msamaha, kwa damu ya Yesu, na tumehesabiwa haki kwa imani, na tuna amani na Mungu, kwa Yesu Kristo Bwana wetu, twajua kwamba toba yetu na imani yetu ni za aina iliyo sahihi.

Usiihesabu toba yako kuwa ndiyo sababu ya ondoleo lako, bali kuwa mwenzake. Usitazamie kuweza kutubu hata utakapoiona neema ya Bwana wetu Yesu, na utayari wake wa kuifuta dhambi yako. Viweke vitu hivi vilivyobarikiwa mahali pake, na uvitazame katika uhusiano wao kila kimoja na kingine. Ni Yakini na Boazi wa uzoefu wa wokovu; namaanisha kwamba vyafanana na zile nguzo mbili kubwa za Sulemani zilizosimama mbele ya nyumba ya Bwana, na kufanya lango kuu la fahari kuelekea mahali patakatifu. Hakuna mtu amjiaye Mungu ipasavyo isipokuwa apite katikati ya nguzo za toba na ondoleo. Juu ya moyo wako upinde wa mvua wa neema ya agano umeonyeshwa katika uzuri wake wote pale matone ya machozi ya toba yalipoangaziwa na nuru ya msamaha kamili. Toba ya dhambi na imani katika msamaha wa Mungu ni nyuzi za tando na za mtande za nguo ya wongofu wa kweli. Kwa dalili hizi utamtambua Mwisraeli kweli kweli.

Kurudi kwenye Andiko tunalolitafakari: msamaha na toba, vyote viwili vyatiririka kutoka chanzo kimoja, navyo vyatolewa na Mwokozi mmoja. Bwana Yesu katika utukufu wake huvitoa vyote viwili kwa watu wale wale. Hutalipata ondoleo wala toba pengine popote. Yesu anavyo vyote viwili tayari, naye yu tayari kuvitoa sasa, na kuvitoa kwa ukarimu mkubwa kwa wote watakaovipokea kutoka mkononi mwake. Isisahauliwe kamwe kwamba Yesu hutoa yote yanayohitajika kwa wokovu wetu. Ni jambo la maana sana kwa wote wanaotafuta rehema kukumbuka hili. Imani ni kipawa cha Mungu kama vile Mwokozi ambaye imani hiyo humtegemea. Toba ya dhambi ni kazi ya neema kwa hakika kama vile kufanya upatanisho ambao kwao dhambi hufutwa. Wokovu, tangu mwanzo hata mwisho, ni wa neema peke yake. Hutanielewa vibaya. Si Roho Mtakatifu atubuye. Yeye hajapata kutenda jambo lolote ambalo kwalo apaswa kutubu. Kama angeweza kutubu, hilo halingekidhi haja; ni lazima sisi wenyewe tuitubie dhambi yetu wenyewe, au sivyo hatujaokolewa na nguvu yake. Si Bwana Yesu Kristo atubuye. Atubie nini yeye? Sisi wenyewe twatubu kwa idhini kamili ya kila kipawa cha akili zetu. Utashi, hisia, na moyo, vyote hutenda kazi pamoja kwa moyo wote katika tendo lililobarikiwa la kutubia dhambi; na bado nyuma ya yote hayo yaliyo tendo letu binafsi, kuna ushawishi mtakatifu wa siri uyeyushao moyo, utoao majuto, na uletao badiliko kamili. Roho wa Mungu hutuangaza tuone dhambi ni nini, na hivyo huifanya kuwa chukizo machoni petu. Roho wa Mungu pia hutugeuza kuelekea utakatifu, hutufanya tuuthamini kwa moyo, kuupenda, na kuutamani, na hivyo hutupa msukumo ambao kwao twaongozwa mbele kutoka hatua hata hatua ya utakaso. Roho wa Mungu hutenda kazi ndani yetu kutaka na kutenda kwa kadiri ya mapenzi mema ya Mungu. Kwa Roho huyo mwema na tujisalimishe mara moja, ili atuongoze kwa Yesu, atakayetupa kwa ukarimu baraka maradufu ya toba na ondoleo, kwa kadiri ya utajiri wa neema yake.

"MMEOKOLEWA KWA NEEMA."