Mkombozi Wangu Yu Hai

DAIMA nimekuwa nikizungumza nawe msomaji juu ya Kristo aliyesulubiwa, aliye tumaini kuu la wenye hatia; lakini ni hekima yetu kukumbuka ya kuwa Bwana wetu amefufuka kutoka kwa wafu, tena anaishi milele.

Hutakiwi kumtumaini Yesu aliyekufa, bali Yeye ambaye, ijapokuwa alikufa kwa ajili ya dhambi zetu, amefufuka tena kwa ajili ya kuhesabiwa haki kwetu. Waweza kumwendea Yesu papo hapo kama kwa rafiki aliye hai na aliyepo. Yeye si kumbukumbu tu, bali ni Nafsi iliyoko daima ambaye atazisikia sala zako na kuzijibu. Anaishi kwa kusudi la kuiendeleza kazi ile ambayo kwa ajili yake wakati mmoja aliutoa uhai wake. Anawaombea wenye dhambi mkono wa kuume wa Baba, na kwa sababu hiyo aweza kuwaokoa kabisa wale wamjiao Mungu kwa yeye. Njoo ukamjaribu Mwokozi huyu aliye hai, kama hujawahi kufanya hivyo kabla.

Yesu huyu aliye hai amefufuliwa pia mpaka cheo cha juu cha utukufu na uweza. Sasa hasikitiki tena kama "mtu mnyenyekevu mbele ya adui zake," wala hataabiki kama "mwana wa yule seremala"; bali ametukuzwa juu sana kupita enzi zote na uweza na kila jina litajwalo. Baba amempa uweza wote mbinguni na duniani, naye autumia utawala huu wa juu katika kuitimiza kazi yake ya neema. Sikia yale ambayo Petro na mitume wengine walishuhudia juu yake mbele ya kuhani mkuu na baraza:

Mungu wa baba zetu alimfufua Yesu, ninyi mliyemuua mkimtundika juu ya mti. Mtu huyo Mungu amemtukuza kwa mkono wake wa kuume, awe Mkuu na Mwokozi, awape Israeli toba na msamaha wa dhambi (Matendo 5:30, 31).

Utukufu unaomzunguka Bwana aliyepaa mbinguni wapasa kupuliza tumaini katika kifua cha kila mwenye kuamini. Yesu si mtu duni--Yeye ni "Mwokozi, tena mkuu." Yeye ni Mkombozi wa wanadamu aliyevikwa taji na kuketishwa katika kiti cha enzi. Mamlaka kuu ya uhai na mauti imewekwa kwake; Baba amewaweka watu wote chini ya utawala wa upatanisho wa Mwana, hata aweze kumhuisha yeye amtakaye. Yeye hufungua, wala hakuna afungaye. Kwa neno lake nafsi iliyofungwa kwa kamba za dhambi na hukumu yaweza kufunguliwa mara moja. Yeye hunyosha fimbo ya enzi ya fedha, na kila aigusaye huishi.

Ni vema kwetu ya kuwa kama vile dhambi iishivyo, na mwili uishivyo, na Ibilisi aishivyo, vivyo hivyo Yesu yu hai; tena ni vema ya kuwa uweza wowote hivi vinao wa kutuangamiza, Yesu ana uweza mkuu zaidi wa kutuokoa.

Kutukuzwa kwake kote na uwezo wake wote ni kwa ajili yetu. "Ametukuzwa awe," tena ametukuzwa "awape." Ametukuzwa awe Mkuu na Mwokozi, ili awape yote yanayohitajika kutimiza wokovu wa wote waingiao chini ya utawala wake. Yesu hana kitu ambacho hatakitumia kwa wokovu wa mwenye dhambi, wala hapana lolote alilo ambalo hatalidhihirisha katika wingi wa neema yake. Waunganisha ukuu wake na uokozi wake, kana kwamba hangependa kuwa na kimoja pasipo kingine; naye anaonyesha kutukuzwa kwake kuwa kumekusudiwa kuwaletea watu baraka, kana kwamba huu ndio ua na taji ya utukufu wake. Je, kuna jambo lolote liwezalo kuinua zaidi matumaini ya wenye dhambi watafutao, wamtazamao Kristo?

Yesu alistahimili unyonge mkuu, na kwa hiyo palikuwa na nafasi ya yeye kutukuzwa. Kwa unyonge huo alitimiza na kustahimili mapenzi yote ya Baba, na kwa hiyo alilipwa thawabu kwa kuinuliwa mpaka utukufu. Anatumia kutukuzwa huko kwa ajili ya watu wake. Inua macho yako uvitazame vilima hivi vya utukufu, ambako msaada wako sharti utoke. Tafakari utukufu ulio juu wa Mkuu na Mwokozi. Je, si jambo la matumaini makuu kwa wanadamu ya kwamba Mtu sasa yuko juu ya kiti cha enzi cha ulimwengu wote? Je, si utukufu ya kwamba Bwana wa vyote ndiye Mwokozi wa wenye dhambi? Tuna Rafiki mahakamani; naam, Rafiki juu ya kiti cha enzi. Atatumia uwezo wake wote kwa ajili ya wale wanaokabidhi mambo yao mikononi mwake. Vema aimbavyo mmoja wa washairi wetu:

Yu hai siku zote ili kutuombea

Mbele ya uso wa Babaye;

Mpe, ee nafsi yangu, shauri lako alitetee,

Usiitilie shaka neema ya Baba.

Njoo, rafiki, ukabidhi shauri lako na jambo lako kwa mikono ile iliyowahi kutobolewa, ambayo sasa imetukuzwa kwa pete za muhuri za uweza na heshima ya kifalme. Hapana shauri lililowahi kushindwa lililoachwa mikononi mwa Wakili huyu mkuu.