Kuzaliwa Upya na Roho Mtakatifu

HAMNA BUDI KUZALIWA MARA YA PILI." Neno hili la Bwana wetu Yesu limeonekana kuwaka kama moto katika njia ya watu wengi, kama upanga uliofutwa wa yule kerubi mlangoni pa Paradiso. Wamekata tamaa, kwa sababu badiliko hili li nje ya juhudi zao zote. Kuzaliwa upya kunatoka juu, na kwa hiyo hakumo katika uwezo wa kiumbe. Basi, ni mbali sana na nia yangu kukana, wala kuficha kamwe, ukweli ili kuleta faraja ya uongo. Nakiri waziwazi kwamba kuzaliwa upya ni jambo lililo juu ya maumbile, na kwamba hakuwezi kutendeka kwa nguvu za mwenye dhambi mwenyewe. Ingekuwa msaada duni kwa msomaji wangu kama ningekuwa mwovu kiasi cha kujaribu kumfariji kwa kumshawishi akatae au kusahau lililo kweli isiyo na shaka.

Lakini je, si jambo la ajabu kwamba sura ile ile ambamo Bwana wetu anatoa tangazo hili pana pia ina maelezo yaliyo dhahiri kuliko yote juu ya wokovu kwa njia ya imani? Soma sura ya tatu ya Injili ya Yohana, wala usikae juu ya sentensi zake za mwanzo peke yake. Ni kweli kwamba mstari wa tatu wasema:

Yesu akajibu, akamwambia, Amin, amin, nakuambia, Mtu asipozaliwa mara ya pili, hawezi kuuona ufalme wa Mungu.

Lakini, tena, mistari ya kumi na nne na kumi na tano yasema:

Na kama vile Musa alivyomwinua yule nyoka jangwani, vivyo hivyo Mwana wa Adamu hana budi kuinuliwa; ili kila mtu amwaminiye asipotee, bali awe na uzima wa milele.

Mstari wa kumi na nane warudia mafundisho yale yale kwa maneno mapana kabisa:

Amwaminiye yeye hahukumiwi; asiyeamini amekwisha kuhukumiwa, kwa sababu hakuliamini jina la Mwana pekee wa Mungu.

Ni dhahiri kwa kila msomaji kwamba maneno haya mawili hayana budi kupatana, kwa kuwa yalitoka katika kinywa kimoja, nayo yameandikwa katika ukurasa ule ule uliovuviwa. Kwa nini tufanye ugumu mahali pasipoweza kuwa na ugumu wo wote? Ikiwa neno moja latuhakikishia umuhimu, kwa wokovu, wa kitu fulani ambacho Mungu peke yake aweza kukitoa, na ikiwa lingine latuhakikishia kwamba Bwana atatuokoa tukimwamini Yesu, basi twaweza kukata shauri salama kwamba Bwana atawapa wale waaminio yote yaliyotangazwa kuwa ni lazima kwa wokovu. Kwa kweli, Bwana huzaa kuzaliwa upya katika wote wamwaminio Yesu; na kuamini kwao ndiyo ushahidi ulio hakika kabisa kwamba wamezaliwa mara ya pili.

Twamtumaini Yesu kwa lile tusiloweza kulitenda sisi wenyewe; kama lingekuwa katika uwezo wetu, kwa nini kumtazamia Yeye? Ni juu yetu kuamini, ni juu ya Bwana kutuumba upya. Yeye hataamini badala yetu, wala sisi hatupaswi kufanya kazi ya kuzaa upya kwa ajili yake. Yatutosha sisi kuitii amri ile ya neema; ni juu ya Bwana kutenda kuzaliwa upya ndani yetu. Yeye aliyeweza kufikia hata kufa msalabani kwa ajili yetu, aweza na atatupa vitu vyote vilivyo lazima kwa usalama wetu wa milele.

"Lakini badiliko la moyo liletalo wokovu ni kazi ya Roho Mtakatifu." Hili nalo ni kweli kabisa, na iwe mbali nasi kulitia shaka, au kulisahau. Lakini kazi ya Roho Mtakatifu ni ya siri na ya fumbo, nayo yaweza kutambulikana kwa matokeo yake tu. Kuna mafumbo juu ya kuzaliwa kwetu kwa asili ambayo kuyachungulia kungekuwa udadisi usio mtakatifu; zaidi sana ndivyo ilivyo katika kazi takatifu za Roho wa Mungu. "Upepo huvuma upendako, na sauti yake waisikia, lakini hujui unakotoka wala unakokwenda; kama hivyo ndivyo alivyo kila mtu aliyezaliwa kwa Roho." Lakini kadiri hii twaijua--kazi ya fumbo ya Roho Mtakatifu haiwezi kuwa sababu ya kukataa kumwamini Yesu ambaye Roho yeye yule amshuhudia.

Kama mtu angeamriwa kupanda shamba, asingeweza kujitetea kwa uzembe wake kwa kusema kwamba kupanda hakuna faida isipokuwa Mungu aifanye mbegu kuota. Asingekuwa na haki ya kupuuza kulima kwa sababu nguvu ya siri ya Mungu peke yake yaweza kuleta mavuno. Hakuna mtu azuiwaye katika shughuli za kawaida za maisha kwa sababu ya kwamba Bwana asipoijenga nyumba, waijengao wafanya kazi bure. Ni hakika kwamba hakuna mtu amwaminiye Yesu atakayekuta kamwe kwamba Roho Mtakatifu akataa kufanya kazi ndani yake; kwa kweli, kuamini kwake ndiyo uthibitisho kwamba Roho tayari anafanya kazi moyoni mwake.

Mungu hufanya kazi katika Majaliwa, lakini kwa hiyo watu hawakai kimya. Wasingeweza kunyoshuka pasipo uweza wa Mungu uwapao uhai na nguvu, lakini huendelea katika njia yao pasipo shaka; uweza huo ukitolewa siku kwa siku na Yeye ambaye pumzi yao i mkononi mwake, nazo njia zao zote ni zake. Ndivyo ilivyo katika neema. Twatubu na kuamini, ijapokuwa tusingeweza kutenda lo lote kati ya hayo kama Bwana asingelituwezesha. Twaiacha dhambi na kumtumaini Yesu, kisha twatambua kwamba Bwana ndiye aliyetenda kazi ndani yetu kutaka na kutenda kwa kulitimiza kusudi lake jema. Ni bure kujifanya kuwa kuna ugumu wo wote wa kweli katika jambo hili.

Baadhi ya kweli ambazo ni vigumu kuzieleza kwa maneno ni rahisi vya kutosha katika uzoefu halisi. Hakuna mgongano kati ya ukweli kwamba mwenye dhambi anaamini, na kwamba imani yake imefanywa ndani yake na Roho Mtakatifu. Ni upumbavu tu uwezao kuwaongoza watu kujitatiza juu ya mambo yaliyo dhahiri hali nafsi zao zi hatarini. Hakuna mtu atakayekataa kuingia mashua ya kuokolea kwa sababu hajui uzito wa hakika wa miili; wala mtu aliyekufa njaa hangekataa kula hata aelewe mwenendo wote wa lishe. Wewe, msomaji wangu, kama hutaamini hata uweze kuelewa mafumbo yote, hutaokoka kamwe kabisa; na kama utaruhusu ugumu uliojibunia wewe mwenyewe ukuzuie usikubali msamaha kwa njia ya Bwana na Mwokozi wako, utaangamia katika hukumu utakayoistahili kwa wingi. Usijiue kiroho kwa ajili ya shauku ya kujadili hoja nyembamba za kifalsafa.