Kuongezeka kwa Imani

TWAWEZAJE KUPATA ongezeko la imani? Hili ni swali zito sana kwa watu wengi. Wao husema wanataka kuamini, lakini hawawezi. Mengi ya upuzi husemwa juu ya jambo hili. Na tuwe wa vitendo kabisa katika kulishughulikia. Akili ya kawaida yahitajiwa katika dini kama inavyohitajiwa mahali pengine popote. "Nifanye nini ili niweze kuamini?" Mtu mmoja alipoulizwa njia iliyo bora ya kutenda tendo fulani rahisi, alijibu kwamba njia iliyo bora ya kulitenda ni kulitenda mara moja. Twapoteza wakati kwa kujadili njia hali tendo lenyewe ni rahisi. Njia iliyo fupi kabisa ya kuamini ni kuamini. Ikiwa Roho Mtakatifu amekufanya uwe mnyofu, utaamini mara tu ukweli utakapowekwa mbele yako. Utauamini kwa sababu ni kweli. Amri ya injili iko wazi; "Mwamini Bwana Yesu Kristo, nawe utaokoka." Ni bure kulikwepa hili kwa maswali na visingizio. Amri iko wazi; na itiiwe.

Lakini hata hivyo, ikiwa una shida, ipeleke mbele za Mungu katika maombi. Mwambie Baba mkuu hasa ni jambo gani linalokutatiza, umsihi kwa Roho wake Mtakatifu alifumbue swali hilo. Mimi nisipoweza kuamini kauli fulani katika kitabu, hufurahi kumwuliza mwandishi maana yake; naye akiwa mtu wa kweli, maelezo yake yataniridhisha; zaidi sana maelezo ya Mungu juu ya mambo magumu ya Maandiko yataridhisha moyo wa mtafutaji wa kweli. Bwana yu radhi kujifunua mwenyewe; nenda kwake ukaone kama si hivyo. Ingia mara moja chumbani mwako cha faragha, ukalie, "Ee Roho Mtakatifu, uniongoze katika kweli! Nisiyoyajua, unifundishe Wewe."

Tena zaidi, ikiwa imani yaonekana kuwa ngumu, yamkini Mungu Roho Mtakatifu atakuwezesha kuamini ikiwa utasikia mara kwa mara na kwa bidii yale uliyoamriwa kuyaamini. Twaamini mambo mengi kwa sababu tumeyasikia mara nyingi mno. Je, huoni ikiwa hivyo katika maisha ya kawaida, ya kwamba ukisikia jambo mara hamsini kwa siku, mwishowe hulifikia hata kuliamini? Watu wengine wamefikia kuamini kauli zisizowezekana kabisa kwa njia hii, na kwa hiyo sishangai kwamba Roho mwema mara nyingi hubariki njia ya kusikia kweli mara kwa mara, na kuitumia kufanya imani juu ya lile linalopaswa kuaminiwa. Imeandikwa, "Imani ni kwa kusikia"; kwa hiyo sikia mara kwa mara. Nikiisikia injili kwa bidii na kwa makini, siku mojawapo nitajikuta naamini lile nilisikialo, kwa kutenda kwake baraka kwa Roho wa Mungu juu ya akili yangu. Ila tu jihadhari kwamba usikie injili, wala usiivuruge akili yako kwa kusikia au kusoma yale yaliyokusudiwa kukuyumbisha.

Lakini, ikiwa hilo laonekana kuwa shauri duni, ningeongeza tena, fikiri ushuhuda wa wengine. Wasamaria waliamini kwa sababu ya yale yule mwanamke aliyowaambia juu ya Yesu. Mengi ya tuyaaminiyo hutokana na ushuhuda wa wengine. Naamini kuna nchi kama Japani; sijawahi kuiona, na hata hivyo naamini kuna mahali kama hapo kwa sababu wengine wamefika huko. Naamini kwamba nitakufa; sijawahi kufa, lakini wengi mno waliokwisha kufa niliowahi kuwajua, na kwa hiyo nina hakika kwamba nami nitakufa pia. Ushuhuda wa watu wengi hunisadikisha juu ya jambo hilo. Basi, wasikilize wale wakuambiao jinsi walivyookolewa, jinsi walivyosamehewa, jinsi walivyobadilishwa tabia. Ukilichunguza jambo hili utaona kwamba mtu fulani aliye kama wewe hasa amekwisha okolewa. Ikiwa umekuwa mwizi, utaona kwamba mwizi alifurahi kuiosha dhambi yake katika chemchemi ya damu ya Kristo. Ikiwa kwa masikitiko umekuwa mchafu wa mwili, utaona kwamba wanaume na wanawake walioanguka katika njia hiyo wamekwisha takaswa na kubadilishwa. Ikiwa u katika kukata tamaa, huna budi ila kuingia miongoni mwa watu wa Mungu, na kuuliza kidogo, nawe utagundua kwamba baadhi ya watakatifu nao walikuwa katika kukata tamaa vivyo hivyo nyakati fulani, nao watafurahi kukuambia jinsi Bwana alivyowaokoa. Kadiri unavyowasikiliza mmoja baada ya mwingine wa wale walioujaribu neno la Mungu, na kulithibitisha, Roho wa Mungu atakuongoza kuamini. Je, hujasikia habari za yule Mwafrika aliyeambiwa na mmisionari kwamba nyakati fulani maji huwa magumu hata mtu aweze kuyatembea juu yake? Alitangaza kwamba aliamini mambo mengi mno aliyoambiwa na mmisionari; lakini kamwe asingeliamini jambo hilo. Alipofika Uingereza ikatokea kwamba siku moja ya baridi kali aliona mto umeganda, lakini hakuthubutu kuukanyaga. Alijua kwamba ni mto wenye kina kirefu, naye aliona hakika kwamba angezama kama angethubutu kuukanyaga. Hakuweza kushawishiwa kuyatembea maji yaliyoganda hata rafiki yake na wengine wengi walipoyakanyaga; ndipo alishawishika, akajitumainisha mahali ambapo wengine walikuwa wamethubutu salama. Vivyo hivyo, unapowaona wengine wakimwamini Mwana-Kondoo wa Mungu, na kuiona furaha na amani yao, wewe mwenyewe utaongozwa taratibu kuamini. Uzoefu wa wengine ni mojawapo ya njia za Mungu za kutusaidia tuwe na imani. Huna budi ama kumwamini Yesu ama kufa; hakuna tumaini kwako ila katika yeye.

Mpango ulio bora zaidi ni huu--angalia mamlaka ambayo kwa hiyo umeamriwa kuamini, na hili litakusaidia sana kufikia imani. Mamlaka hayo si yangu, ama sivyo ungeweza kuyakataa kwa haki. Lakini umeamriwa kuamini juu ya mamlaka ya Mungu mwenyewe. Yeye akuamuru umwamini Yesu Kristo, wala hupaswi kukataa kumtii Muumba wako. Msimamizi wa kiwanda fulani alikuwa amesikia injili mara nyingi, lakini alisumbuliwa na hofu kwamba huenda asije kwa Kristo. Bwana wake mwema siku moja alipeleka kadi kiwandani--"Njoo nyumbani kwangu mara tu baada ya kazi." Msimamizi akatokea mlangoni pa bwana wake, naye bwana akatoka, akasema kwa ukali kidogo, "Wataka nini, Yohana, kunisumbua wakati huu? Kazi imekwisha, una haki gani kuwa hapa?" "Bwana," akasema, "nilipata kadi kwako iliyosema nije baada ya kazi." "Wataka kusema ati kwa sababu tu ulipata kadi kwangu wapaswa kuja nyumbani kwangu na kuniita nitoke baada ya saa za kazi?" "Basi, Bwana," akajibu msimamizi, "sikuelewi, lakini kwangu yaonekana kwamba, kwa kuwa uliniita, nilikuwa na haki ya kuja." "Ingia ndani, Yohana," akasema bwana wake, "nina ujumbe mwingine ninaotaka kukusomea," akaketi akasoma maneno haya: "Njoni kwangu, ninyi nyote msumbukao na wenye kulemewa na mizigo, nami nitawapumzisha." "Je, wadhani baada ya ujumbe kama huu kutoka kwa Kristo waweza kukosa kwa kuja kwake?" Yule maskini aliona yote mara moja, akamwamini Bwana Yesu hata uzima wa milele, kwa sababu alitambua kwamba alikuwa na kibali na mamlaka mema ya kuamini. Nawe u hivyo, ewe nafsi maskini! Una mamlaka mema ya kuja kwa Kristo, kwa maana Bwana mwenyewe akuamuru umtumaini.

Ikiwa hilo halizai imani ndani yako, tafakari ni nini hasa unalolopaswa kuamini--kwamba Bwana Yesu Kristo aliteswa mahali na badala ya wenye dhambi, naye aweza kuwaokoa wote wamtumainio. Naam, hii ndiyo kweli iliyobarikiwa kuliko zote ambayo wanadamu waliambiwa kuiamini; kweli iliyo faafu kuliko zote, iliyo faraja kuliko zote, iliyo ya kimungu kuliko zote iliyowahi kuwekwa mbele ya akili za wanadamu wenye kufa. Nakushauri uifikiri sana, na kuutafuta neema na upendo uliomo ndani yake. Jifunze Wainjilisti wanne, jifunze nyaraka za Paulo, kisha uone kama ujumbe huo si wa kusadikika hata ulazimishwe kuuamini.

Ikiwa hilo halitoshi, basi mfikiri nafsi ya Yesu Kristo--fikiri yeye ni nani, na alichokitenda, na alipo, na alivyo. Wawezaje kumtia shaka? Ni ukatili kutomwamini Yesu aliye mkweli sikuzote. Hakutenda lo lote la kustahili kutokuaminiwa; kinyume chake, yapasa iwe rahisi kumtegemea. Kwa nini kumsulibisha upya kwa kutokuamini? Je, hili si kumvika taji ya miiba tena, na kumtemea mate tena? Nini! Je, hastahili kuaminiwa? Ni tukano gani baya zaidi wale askari walilomwaga juu yake kuliko hili? Wao walimfanya kuwa shahidi; bali wewe wamfanya kuwa mwongo--hili ni baya zaidi kwa mbali. Usiulize nawezaje kuamini? Bali jibu swali lingine--wawezaje kutokuamini?

Ikiwa hakuna lo lote la mambo haya lifaalo, basi kuna kasoro fulani kwako kabisa, na neno langu la mwisho ni hili, jisalimishe kwa Mungu! Chuki ya kimbele au kiburi ndicho kilicho chini ya kutokuamini huku. Roho wa Mungu na aiondoe uadui wako na kukufanya unyenyekee. Wewe ni mwasi, mwasi mwenye kiburi, na ndiyo sababu humwamini Mungu wako. Acha uasi wako; tupa chini silaha zako; salimu amri, jisalimishe kwa Mfalme wako. Naamini kamwe haikuwahi nafsi kuinua mikono yake katika kukata tamaa juu yake yenyewe, na kulia, "Bwana, nasalimu amri," ila imani ikawa rahisi kwake baada ya muda mfupi. Ni kwa sababu bado una ugomvi na Mungu, na umeazimia kufuata mapenzi yako mwenyewe na njia yako mwenyewe, ndiyo sababu huwezi kuamini. "Mwawezaje kuamini," alisema Kristo, "ninyi mnaopokeana utukufu ninyi kwa ninyi?" Nafsi yenye kiburi huzaa kutokuamini. Nyenyekea, ewe mwanadamu. Msalimishie Mungu wako, ndipo utamwamini Mwokozi wako kwa utamu. Roho Mtakatifu na atende sasa kwa siri lakini kwa uhakika ndani yako, na akulete saa hii hii kumwamini Bwana Yesu! Amina.