Ole! Siwezi Kufanya Lo Lote!

BAADA YA MOYO WENYE WASIWASI kukubali fundisho la upatanisho, na kujifunza ukweli mkuu kwamba wokovu ni kwa imani katika Bwana Yesu, mara nyingi hutaabishwa sana na hisia ya kutoweza kuelekea lililo jema. Wengi wanalia kwa uchungu, "Siwezi kufanya lo lote." Hawalifanyi hili kuwa kisingizio, bali wanalihisi kama mzigo wa kila siku. Wangalitaka kama wangaliweza. Kila mmoja wao aweza kusema kwa unyofu, "Kutaka nataka, bali jinsi ya kutenda lile nitakalo sipati."

Hisia hii yaonekana kuifanya injili yote kuwa bure na isiyo na maana; kwa maana chakula chamfaa nini mtu mwenye njaa kama hawezi kukifikia? Mto wa maji ya uzima wafaa nini kama mtu hawezi kunywa? Twaikumbuka hadithi ya tabibu na mtoto wa mwanamke maskini. Yule tabibu mwenye hekima alimwambia mama kwamba mwanawe mdogo angepona upesi chini ya matibabu yaliyofaa, lakini ilikuwa lazima kabisa mwanawe anywe divai iliyo bora kila siku, na kwamba akae kwa majira huko katika mojawapo ya chemchemi za maji ya kuoga za Ujerumani. Haya, kwa mjane ambaye hakuweza hata kupata mkate wa kula! Basi, wakati mwingine humwonekania moyo wenye taabu kwamba injili rahisi ya "Amini nawe uishi," si rahisi hivyo baada ya yote; kwa maana yamtaka mwenye dhambi maskini afanye lile asiloweza kufanya. Kwa yule aliyeamshwa kweli, lakini aliyefundishwa nusu tu, panaonekana kuwa na kiungo kilichokosekana; kule kuko wokovu wa Yesu, lakini utafikiwaje? Nafsi haina nguvu, wala haijui ifanye nini. Yakaa mahali penye kuuona mji wa makimbilio, wala haiwezi kuingia langoni pake.

Je, upungufu huu wa nguvu umeandaliwa katika mpango wa wokovu? Ndiyo. Kazi ya Bwana ni kamilifu. Yaanza pale tulipo, wala haitutaki neno lo lote ili ikamilike. Yule Msamaria mwema alipomwona yule msafiri amelala akiwa amejeruhiwa na nusu-mfu, hakumwambia ainuke na aje kwake, na apande punda aende zake mpaka nyumba ya wageni. La, "alifika pale alipokuwa," akamhudumia, akamwinua juu ya mnyama, akamchukua mpaka nyumba ya wageni. Ndivyo Bwana Yesu atutendeavyo katika hali yetu ya chini na ya taabu.

Tumeona kwamba Mungu huhesabia haki, kwamba huwahesabia haki waovu, na kwamba huwahesabia haki kwa njia ya imani katika damu ya thamani ya Yesu; sasa yatupasa kuona hali walimo hawa waovu wakati Yesu autendapo wokovu wao. Watu wengi walioamshwa hawataabiki kwa ajili ya dhambi yao tu, bali kwa ajili ya udhaifu wao wa kiadili. Hawana nguvu ya kutoroka katika matope waliyoanguka ndani yake, wala ya kujiepusha nayo katika siku zijazo. Hawaomboli kwa ajili ya lile walilolitenda tu, bali kwa ajili ya lile wasiloweza kulitenda. Wanajiona kuwa hawana uwezo, hawana msaada, na wamekufa kiroho. Yaweza kuonekana ni ajabu kusema kwamba wanajihisi wamekufa, walakini ni vivyo hivyo. Kwa kadiri ya maoni yao wenyewe, hawafai kwa lo lote lililo jema. Hawawezi kuisafiri njia iendayo Mbinguni, kwa maana mifupa yao imevunjika. "Hakuna mmoja wa watu wenye nguvu aliyepata mikono yake;" naam, "hawana nguvu." Kwa furaha, imeandikwa, kama uthibitisho wa pendo la Mungu kwetu:

Hapo tulipokuwa hatuna nguvu, wakati ulipotimia, Kristo alikufa kwa ajili ya waovu (Warumi 5:6).

Hapa twaona hali ya kutokuwa na msaada iliyo dhahiri ikisaidiwa—ikisaidiwa kwa kuingilia kati kwa Bwana Yesu. Kutokuwa kwetu na msaada ni kwingi kupita kiasi. Haikuandikwa, "Tulipokuwa dhaifu kiasi Kristo alikufa kwa ajili yetu"; wala, "Tulipokuwa na nguvu kidogo tu"; bali maelezo ni ya jumla yasiyo na masharti; "Hapo tulipokuwa hatuna nguvu." Hatukuwa na nguvu yo yote iliyoweza kusaidia katika wokovu wetu; maneno ya Bwana wetu yalikuwa kweli kabisa, "Pasipo mimi ninyi hamwezi kufanya neno lo lote." Naweza kwenda mbali zaidi ya andiko, na kukukumbusha pendo kuu ambalo Bwana alitupenda nalo, "hata tulipokuwa wafu kwa sababu ya makosa na dhambi." Kuwa mfu ni zaidi hata ya kuwa hatuna nguvu.

Jambo moja ambalo yampasa mwenye dhambi maskini asiye na nguvu kulikaza akili yake juu yake, na kulishika imara, kama msingi wake mmoja wa tumaini, ni ile hakika ya kimungu kwamba "wakati ulipotimia Kristo alikufa kwa ajili ya waovu." Amini hili, na kutoweza kote kutatoweka. Kama isemwavyo katika hadithi za Midas kwamba aligeuza kila kitu kuwa dhahabu kwa kukigusa, ndivyo ilivyo kweli kwa imani kwamba hugeuza kila kitu iguacho kuwa chema. Mahitaji yetu hasa na udhaifu wetu huwa baraka wakati imani inaposhughulika navyo.

Na tukae juu ya namna fulani za upungufu huu wa nguvu. Kwanza, mtu mmoja atasema, "Bwana, sionekani kuwa na nguvu ya kukusanya mawazo yangu, na kuyakaza juu ya mambo yale mazito yanayohusu wokovu wangu; sala fupi ni karibu kunizidia. Ni hivyo kwa sehemu, labda, kwa sababu ya udhaifu wa asili, kwa sehemu kwa sababu nimejidhuru kwa ufisadi, na kwa sehemu pia kwa sababu najitaabisha kwa masumbufu ya dunia, hata sifai kwa mawazo yale ya juu yaliyo lazima kabla ya nafsi kuokolewa." Hii ni namna iliyozoeleka sana ya udhaifu wa dhambi. Angalia hili! Wewe huna nguvu katika jambo hili; na wako wengi kama wewe. Hawakuweza kuendeleza mfululizo wa mawazo yaliyopangana hata kuokoa uhai wao. Wanaume na wanawake wengi maskini hawajui kusoma wala hawakufundishwa, na hawa wangeliona kufikiri kwa kina kuwa kazi nzito sana. Wengine ni wepesi na wa mzaha kwa asili, hata wasingeweza kufuata mwenendo mrefu wa hoja na kufikiri, kama vile wasivyoweza kuruka. Wasingeweza kamwe kuufikia ujuzi wa siri yo yote yenye kina hata wangeutumia uhai wao wote katika juhudi hiyo. Basi, huna haja ya kukata tamaa: kile kilicho lazima kwa wokovu si mawazo yasiyokoma, bali kumtegemea Yesu kwa moyo mnyofu. Shika wewe jambo hili moja—"Wakati ulipotimia Kristo alikufa kwa ajili ya waovu." Kweli hii haitakutaka utafiti wo wote wenye kina wala hoja yenye kina, wala ushahidi wa kushawishi. Iko pale: "Wakati ulipotimia Kristo alikufa kwa ajili ya waovu." Kaza akili yako juu ya hilo, na pumzika hapo.

Uache ukweli huu mmoja mkuu, wa neema, wenye utukufu ukae rohoni mwako hata unukize mawazo yako yote, na kukufanya ushangilie ijapokuwa huna nguvu, ukiona ya kuwa Bwana Yesu amekuwa nguvu yako na wimbo wako, naam, amekuwa wokovu wako. Kwa kadiri ya Maandiko ni jambo lililofunuliwa, kwamba wakati ulipotimia Kristo alikufa kwa ajili ya waovu walipokuwa bado hawana nguvu. Labda umeyasikia maneno haya mara mia, walakini hukupata kamwe kuelewa maana yake hapo awali. Yana harufu ya kufariji, sivyo? Yesu hakufa kwa ajili ya haki yetu, bali alikufa kwa ajili ya dhambi zetu. Hakuja kutuokoa kwa sababu tulistahili kuokolewa, bali kwa sababu tulikuwa hatufai kabisa, tumeharibika, na tumepotea. Hakuja duniani kwa sababu yo yote iliyokuwa ndani yetu, bali kwa sababu peke yake alizozitoa katika vilindi vya pendo lake mwenyewe la kimungu. Wakati ulipotimia alikufa kwa ajili ya wale awaelezao, si kuwa watauwa, bali kuwa waovu, akiwapachika sifa isiyo na tumaini kadiri alivyoweza kuichagua. Kama una akili kidogo tu, hata hivyo ikaze juu ya kweli hii, ambayo yafaa kwa uwezo ulio mdogo kabisa, na yaweza kuufariji moyo ulio mzito kuliko yote. Uache andiko hili likae chini ya ulimi wako kama tonge tamu, hata liyeyuke moyoni mwako na kukoleza mawazo yako yote; ndipo haitakuwa neno hata mawazo hayo yawe yametawanyika kama majani ya vuli. Watu ambao hawakung'aa kamwe katika elimu, wala kuonyesha ubunifu wo wote wa akili, hata hivyo wamekuwa na uwezo kamili wa kulikubali fundisho la msalaba, na wameokolewa kwa hilo. Mbona wewe usiweze?

Namsikia mtu mwingine akilia, "Aa, bwana, upungufu wangu wa nguvu wakaa hasa katika hili, kwamba siwezi kutubu vya kutosha!" Ni wazo la ajabu kama nini watu walilo nalo juu ya toba ilivyo! Wengi hudhania kwamba machozi kadha wa kadha yapasa kudondoshwa, na miguno kadha wa kadha yapasa kutolewa, na kukata tamaa kwingi kwapasa kuvumiliwa. Wazo hili lisilo na akili latoka wapi? Kutokuamini na kukata tamaa ni dhambi, na kwa hiyo sioni jinsi yaweza kuwa sehemu za toba yenye kukubalika; walakini wako wengi wayahesabuo kuwa sehemu za lazima za maisha ya kweli ya Kikristo. Wamekosea sana. Hata hivyo, najua wamaanisha nini, kwa maana katika siku za giza langu nalikuwa nikihisi vivyo hivyo. Nalitamani kutubu, lakini nalidhani kwamba siwezi kulifanya, na wakati huo wote nalikuwa nikitubu. Ijapokuwa yaweza kusikika ajabu, nalihisi kwamba siwezi kuhisi. Nalikuwa nikienda pembeni na kulia, kwa sababu sikuweza kulia; nami naliangukia katika huzuni chungu kwa sababu sikuweza kuihuzunikia dhambi. Ni mchafuko ulioje huu wote tulipoanza, katika hali yetu ya kutokuamini, kuihukumu hali yetu wenyewe! Ni kama kipofu aliangaliaye macho yake mwenyewe. Moyo wangu uliyeyuka ndani yangu kwa hofu, kwa sababu nalidhani kwamba moyo wangu ulikuwa mgumu kama jiwe gumu sana. Moyo wangu ulivunjika kwa kufikiri kwamba hautavunjika. Sasa naweza kuona kwamba nalikuwa nikionyesha kile hasa nilichodhani sina; lakini wakati ule sikujua nilipokuwa.

Laiti ningaliweza kuwasaidia wengine waingie katika nuru niifurahiayo sasa! Ningalipenda sana kusema neno ambalo laweza kufupisha wakati wa kutatanika kwao. Ningalisema maneno machache ya wazi, na kumwomba "Mfariji" ayatie moyoni.

Kumbuka kwamba mtu atubuye kweli hataridhika kamwe na toba yake mwenyewe. Hatuwezi kutubu kwa ukamilifu zaidi kuliko tuwezavyo kuishi kwa ukamilifu. Yajapokuwa machozi yetu safi kiasi gani, sikuzote yatakuwa na uchafu fulani ndani yake: kutakuwa na kitu cha kutubiwa hata katika toba yetu iliyo bora. Lakini sikiliza! Kutubu ni kuigeuza nia yako juu ya dhambi, na Kristo, na mambo yote makuu ya Mungu. Mna huzuni iliyofichwa katika hili; lakini jambo kuu ni kuugeuza moyo kutoka dhambini kumwelekea Kristo. Kama kuna huku kugeuka, wewe wana kiini cha toba ya kweli, ijapokuwa hakuna hofu wala kukata tamaa kokote kulikopata kutupa kivuli chake juu ya akili yako.

Kama huwezi kutubu kama utakavyo, itakusaidia sana kufanya hivyo ikiwa utaamini imara kwamba "wakati ulipotimia Kristo alikufa kwa ajili ya waovu." Fikiri juu ya hili tena na tena. Wawezaje kuendelea kuwa na moyo mgumu ujuapo kwamba kutokana na pendo lililo kuu "Kristo alikufa kwa ajili ya waovu"? Niruhusu nikushawishi ufikiriane na nafsi yako hivi: Ingawa mimi ni mwovu, ijapokuwa moyo huu wa chuma hautalainika, ijapokuwa najipiga bure kifuani, hata hivyo alikufa kwa ajili ya mfano wangu, kwa kuwa alikufa kwa ajili ya waovu. Laiti niamini hili na kuuhisi uweza wake juu ya moyo wangu wa jiwe!

Futa kila fikira nyingine katika nafsi yako, ukae kitako saa nzima, ukatafakari kwa kina juu ya udhihirisho huu mmoja ung'aao wa pendo lisilostahiliwa, lisilotazamiwa, lisilo na kifani, "Kristo alikufa kwa ajili ya waovu." Soma kwa makini simulizi la kifo cha Bwana, kama ulionavyo katika wainjilisti wanne. Kama kuna kitu kiwezacho kuuyeyusha moyo wako mkaidi, kitakuwa ni kuutazama mateso ya Yesu, na kufikiria kwamba aliteswa haya yote kwa ajili ya adui zake.

Ee Yesu! matamu ni machozi nitokwayo, Nipigapo magoti miguuni pako,

Nikitazama kichwa chako kilichojeruhiwa, kilichozimia, Na kuyahisi masikitiko yako yote.

Moyo wangu wayeyuka kukuona wavuja damu, Moyo huu uliokuwa mgumu hapo awali;

Nakusikia ukiwaombea wenye hatia, Na huzuni yafurika zaidi.

Ilikuwa kwa ajili ya wenye dhambi wewe ulikufa, Nami nimesimama mwenye dhambi:

Nikishawishika kwa jicho lako lililokata roho, Nikichinjwa kwa mkono wako uliotobolewa.

Bila shaka msalaba ndiyo ile fimbo itendayo maajabu iwezayo kutoa maji katika mwamba. Kama waielewa maana kamili ya dhabihu ya kimungu ya Yesu, huna budi kutubu kwa kuwa umepata kumpinga Yeye aliye mwingi wa pendo namna hii. Imeandikwa, "Nao watamtazama yeye ambaye walimchoma; nao watamlilia kama vile mtu amliliavyo mwanawe wa pekee, nao wataona uchungu kwa ajili yake, kama vile mtu aonavyo uchungu kwa ajili ya mzaliwa wake wa kwanza." Toba haitakufanya umwone Kristo; bali kumwona Kristo kutakupa toba. Huwezi kufanya Kristo kutokana na toba yako, bali huna budi kuitafuta toba kwa Kristo. Roho Mtakatifu, kwa kutugeuza tumwelekee Kristo, hutugeuza kutoka dhambini. Basi, geuza macho yako kutoka tokeo hadi chanzo, kutoka toba yako mwenyewe hadi Bwana Yesu, aliyetukuzwa juu ili atoe toba.

Nimemsikia mwingine akisema, "Ninateswa na mawazo ya kutisha. Kila niendako, kufuru hujiingiza ndani yangu. Mara nyingi kazini kwangu wazo la kutisha hujilazimisha juu yangu, na hata kitandani mwangu nashtuliwa usingizini kwa minong'ono ya yule mwovu. Siwezi kujiepusha na jaribu hili la kutisha." Rafiki, najua umaanishalo, kwa maana mimi mwenyewe nimewindwa na mbwa-mwitu huyu. Mtu angeweza vivyo kutumaini kupigana na kundi la nzi kwa upanga kama vile kuyatawala mawazo yake mwenyewe yanaposhambuliwa na Ibilisi. Nafsi maskini iliyojaribiwa, ikishambuliwa na mashawishi ya Shetani, ni kama msafiri niliyesoma habari zake, ambaye juu ya kichwa chake na masikio yake na mwili wake wote lilikuja kundi la nyuki wenye hasira. Hakuweza kuwazuia wala kuwakwepa. Walimuuma kila mahali na kutishia kuwa kifo chake. Sishangai kuwa wahisi kwamba huna nguvu ya kuyazuia mawazo haya ya kuchukiza na ya machukizo ambayo Shetani huyamwaga katika nafsi yako; walakini ningekukumbusha andiko lililo mbele yetu—"Hapo tulipokuwa hatuna nguvu, wakati ulipotimia, Kristo alikufa kwa ajili ya waovu." Yesu alijua tulipokuwa na tutakapokuwa; aliona ya kuwa hatukuweza kumshinda mkuu wa uwezo wa anga; alijua ya kuwa tutasumbuliwa sana naye; lakini hata wakati ule, alipotuona katika hali ile, Kristo alikufa kwa ajili ya waovu. Tupa nanga ya imani yako juu ya hili. Ibilisi mwenyewe hawezi kukuambia kwamba wewe si mwovu; basi amini, kwamba Yesu alikufa hata kwa ajili ya mfano wako. Kumbuka jinsi Martin Luther alivyoukata kichwa cha Ibilisi kwa upanga wake mwenyewe. "Aa," Ibilisi akamwambia Martin Luther, "wewe ni mwenye dhambi." "Ndiyo," akasema, "Kristo alikufa ili kuwaokoa wenye dhambi." Hivyo akampiga kwa upanga wake mwenyewe. Jifiche wewe katika makimbilio haya, na ukae hapo: "Wakati ulipotimia Kristo alikufa kwa ajili ya waovu." Kama utasimama juu ya kweli hiyo, mawazo yako ya kufuru ambayo huna nguvu ya kuyafukuza yatajiondokea yenyewe; kwa maana Shetani ataona kwamba hafikii lengo lo lote kwa kukutesa nayo.

Mawazo haya, kama wayachukia, si yako hata kidogo, bali ni mashindilizo ya Ibilisi, ambayo yeye ndiye mwenye kuwajibika nayo, wala si wewe. Kama wapigana nayo, si yako zaidi kuliko yalivyo matukano na uongo wa wafanya-ghasia barabarani. Ni kwa njia ya mawazo haya ndipo Ibilisi angetaka kukusukuma ukate tamaa, au angalau akuzuie usimtumaini Yesu. Yule mwanamke maskini mgonjwa hakuweza kumfikia Yesu kwa sababu ya msongamano, nawe u katika hali ile ile, kwa sababu ya mkumbo na msongamano wa mawazo haya ya kutisha. Hata hivyo, alinyosha kidole chake, akaugusa upindo wa vazi la Bwana, naye akapona. Wewe fanya vivyo hivyo.

Yesu alikufa kwa ajili ya wale walio na hatia ya "kila dhambi na kila neno la kufuru," na kwa hiyo nina hakika hatawakataa wale walio mateka wa mawazo maovu bila kupenda. Jitupe juu yake, pamoja na mawazo yako yote, ukaone kama si hodari wa kuokoa. Aweza kuyatuliza yale minong'ono ya kutisha ya yule mwovu, au aweza kukuwezesha kuyaona katika nuru yake ya kweli, ili usisumbuliwe nayo. Kwa njia yake mwenyewe aweza na atakuokoa, na hatimaye akupe amani kamilifu. Mtumaini yeye tu kwa hili na kwa kila jambo lingine.

Chenye kutatanisha kwa kusikitisha ni ile namna ya kutoweza ikaayo katika ukosefu unaodhaniwa wa uwezo wa kuamini. Sisi si wageni kwa kilio hiki:

Laiti ningaliweza kuamini,
Ndipo yote yangeliwa mepesi;
Nataka, lakini siwezi; Bwana, unifariji,
Msaada wangu sharti utoke kwako.

Wengi hukaa gizani kwa miaka kwa sababu hawana uwezo, kama wasemavyo, wa kufanya lile ambalo ni kuachilia uwezo wote na kupumzika katika uwezo wa mwingine, yaani Bwana Yesu. Naam, ni jambo la ajabu sana, shughuli hii yote ya kuamini; kwa maana watu hawapati msaada mwingi kwa kujaribu kuamini. Kuamini hakuji kwa kujaribu. Kama mtu angetoa taarifa ya jambo lililotukia leo, nisingemwambia kwamba ningejaribu kumwamini. Kama ningeamini ukweli wa mtu aliyeniambia tukio hilo na kusema kwamba aliliona, ningeikubali taarifa hiyo mara moja. Kama nisingemhesabu kuwa mtu wa kweli, bila shaka, ningemkataa; lakini kusingekuwa na kujaribu katika jambo hilo. Basi, Mungu atangazapo kwamba kuna wokovu katika Kristo Yesu, sharti nimwamini mara moja, au nimfanye kuwa mwongo. Bila shaka wewe hutasita-sita katika kuchagua njia iliyo sahihi katika jambo hili. Ushuhuda wa Mungu sharti uwe kweli, nasi twapaswa kumwamini Yesu mara moja.

Lakini yamkini umekuwa ukijaribu kuamini kupita kiasi. Basi usilenge mambo makuu. Uridhike kuwa na imani iwezayo kushika mkononi mwake kweli hii moja, "Hapo tulipokuwa hatuna nguvu, wakati ulipotimia, Kristo alikufa kwa ajili ya waovu." Aliutoa uhai wake kwa ajili ya watu wakati walipokuwa bado hawamwamini, wala hawakuweza kumwamini. Alikufa kwa ajili ya watu, si kama waaminio, bali kama wenye dhambi. Alikuja kuwafanya wenye dhambi hawa kuwa waaminio na watakatifu; lakini alipowafia aliwaona kuwa hawana nguvu kabisa. Kama utaishika kweli kwamba Kristo alikufa kwa ajili ya waovu, na kuiamini, imani yako itakuokoa, nawe waweza kwenda zako kwa amani. Kama utaikabidhi nafsi yako kwa Yesu, aliyekufa kwa ajili ya waovu, ijapokuwa huwezi kuamini mambo yote, wala kuihamisha milima, wala kufanya matendo mengine yo yote ya ajabu, hata hivyo umeokolewa. Si imani iliyo kuu, bali imani iliyo kweli, iokoayo; na wokovu haukai katika imani, bali katika Kristo ambaye imani humtumaini. Imani iliyo kama punje ya haradali italeta wokovu. Si kipimo cha imani, bali unyofu wa imani, ndicho kitu kipaswacho kutazamwa. Bila shaka mtu aweza kuamini kile ajualo kuwa kweli; na kwa kuwa wamjua Yesu kuwa kweli, wewe, rafiki yangu, waweza kumwamini yeye.

Msalaba ambao ndio shabaha ya imani, ndio pia, kwa uweza wa Roho Mtakatifu, chanzo chake. Keti chini ukamtazame Mwokozi anayekufa hata imani ichipuke yenyewe moyoni mwako. Hakuna mahali kama Kalvari kwa kuzaa uhakika. Hewa ya kilima kile kitakatifu huleta afya kwa imani itetemekayo. Watazamaji wengi huko wamesema:

Nikutazamapo, umejeruhiwa, unahuzunika, Usiyepumua juu ya mti uliolaaniwa,

Bwana, nauhisi moyo wangu ukiamini Kwamba wewe uliteswa hivi kwa ajili yangu.

"Ole!" alia mwingine, "upungufu wangu wa nguvu wakaa upande huu, kwamba siwezi kuiacha dhambi yangu, nami najua kwamba siwezi kwenda Mbinguni na kuichukua dhambi yangu pamoja nami." Nafurahi kwamba unajua hilo, kwa maana ni kweli kabisa. Sharti utengane na dhambi yako, la sivyo huwezi kuolewa na Kristo. Kumbuka lile swali lililong'aa akilini mwa Bunyan kijana alipokuwa katika michezo yake uwanjani siku ya Jumapili: "Je, utazishika dhambi zako uende jehanamu, au utaziacha dhambi zako uende mbinguni?" Hilo lilimsimamisha kabisa. Hilo ni swali ambalo kila mtu itampasa kulijibu: kwa maana hakuna kuendelea dhambini na kwenda mbinguni. Hilo haliwezekani. Sharti uiache dhambi au uache tumaini. Je, wajibu, "Ndiyo, nataka vya kutosha. Kutaka nataka, bali jinsi ya kutenda lile nitakalo sipati. Dhambi hunitawala, nami sina nguvu." Njoo, basi, kama huna nguvu, andiko hili bado ni kweli, "Hapo tulipokuwa hatuna nguvu, wakati ulipotimia, Kristo alikufa kwa ajili ya waovu." Je, waweza bado kuliamini hilo? Mambo mengine yajapoonekana kulipinga, je, utaliamini? Mungu amelisema, nalo ni jambo la hakika; kwa hiyo, lishike kama mauti isiyoachia, kwa maana tumaini lako pekee lakaa hapo. Amini hili na umtumaini Yesu, nawe utapata upesi nguvu utakayoiua nayo dhambi yako; lakini pasipo yeye, yule mtu mwenye nguvu aliyejifunga silaha atakushika milele kuwa mtumwa wake. Kwangu binafsi, nisingaliweza kamwe kuushinda uovu wangu mwenyewe. Nalijaribu nikashindwa. Mielekeo yangu miovu ilikuwa mingi mno kwangu, hata, katika kuamini kwamba Kristo alinifia, naliitupa nafsi yangu yenye hatia juu yake, ndipo nilipopokea kanuni ya ushindi ambayo kwayo naliishinda nafsi yangu ya dhambi. Fundisho la msalaba laweza kutumiwa kuiua dhambi, kama vile mashujaa wa kale walivyotumia panga zao kubwa za mikono miwili, wakiwaangusha adui zao kwa kila pigo. Hakuna kitu kama imani katika Rafiki wa mwenye dhambi: hushinda uovu wote. Kama Kristo amenifia mimi, ingawa ni mwovu, ingawa sina nguvu, basi siwezi kuishi dhambini tena, bali sharti nijiamshe kumpenda na kumtumikia yeye aliyenikomboa. Siwezi kuchezea uovu ulioua Rafiki yangu aliye bora. Sharti niwe mtakatifu kwa ajili yake. Nawezaje kuishi dhambini hali amekufa ili kuniokoa nayo?

Tazama msaada mzuri ulioje huu kwako wewe usiye na nguvu, kujua na kuamini kwamba wakati ulipotimia Kristo alikufa kwa ajili ya waovu kama wewe ulivyo. Je, umelipata wazo hili bado? Ni vigumu, kwa namna fulani, kwa akili zetu zilizotiwa giza, zenye chuki, na zisizoamini, kuona kiini cha injili. Nyakati fulani nimefikiri, nilipomaliza kuhubiri, kwamba nimeieleza injili waziwazi hivi, hata pua iliyo usoni pa mtu isingeweza kuwa dhahiri zaidi; walakini nagundua kwamba hata wasikilizaji wenye akili wameshindwa kuelewa maana ya "Niangalieni mimi mkaokoke." Waongofu husema kwa kawaida kwamba hawakuijua injili mpaka siku fulani na fulani; walakini walikuwa wameisikia kwa miaka. Injili haijulikani, si kwa kukosa maelezo, bali kwa kutokuwapo kwa ufunuo binafsi. Ufunuo huu Roho Mtakatifu yu tayari kuutoa, naye atautoa kwa wale wamwombao. Lakini utolewapo, jumla yote ya ile kweli iliyofunuliwa yakaa ndani ya maneno haya: "Kristo alikufa kwa ajili ya waovu."

Namsikia mwingine akijiombolezea hivi: "Aa, bwana, udhaifu wangu wakaa katika hili, kwamba sionekani kudumu katika nia moja kwa muda mrefu! Nalisikia neno siku ya Jumapili, nami nagusika; lakini katikati ya juma nakutana na mwenzi mwovu, na hisia zangu njema zote zapotea. Wafanyakazi wenzangu hawaamini lo lote, nao husema mambo ya kutisha namna hiyo, nami sijui jinsi ya kuwajibu, na hivyo najikuta nimeangushwa." Namjua vema huyu Pliable mnyumbufu, nami natetemeka kwa ajili yake; lakini wakati huo huo, kama ni mnyofu kweli, udhaifu wake waweza kukabiliwa na neema ya Mungu. Roho Mtakatifu aweza kumtoa yule pepo mchafu wa kumwogopa mwanadamu. Aweza kumfanya mwoga kuwa hodari. Kumbuka, rafiki yangu maskini usiye na uthabiti, hukupaswi kubaki katika hali hii. Haitafaa kamwe kuwa duni na maskini kwa nafsi yako. Simama wima, ujitazame mwenyewe, ukaone kama uliwahi kukusudiwa kuwa kama chura chini ya haro, ukihofia uhai wako usiweze kusonga wala kusimama tuli. Uwe na nia yako mwenyewe. Hili si jambo la kiroho tu, bali ni jambo lihusulo uanaume wa kawaida. Ningefanya mambo mengi ili kuwapendeza rafiki zangu; lakini kwenda jehanamu ili kuwapendeza ni zaidi ya ningeweza kuthubutu. Yaweza kuwa vema sana kufanya hili na lile kwa ajili ya ushirika mwema; lakini haitafaa kamwe kupoteza urafiki wa Mungu ili kudumisha uhusiano mwema na wanadamu. "Najua hilo," asema yule mtu, "lakini bado, ijapokuwa nalijua, siwezi kujipa ujasiri. Siwezi kuonyesha upande wangu. Siwezi kusimama imara." Basi, kwako wewe pia nina andiko lilo hilo kukuletea: "Hapo tulipokuwa hatuna nguvu, wakati ulipotimia, Kristo alikufa kwa ajili ya waovu." Kama Petro angekuwa hapa, angesema, "Bwana Yesu alinifia hata nilipokuwa kiumbe maskini dhaifu hivi hata yule kijakazi aliyetunza moto akanisukuma niseme uongo, na kuapa kwamba simjui Bwana." Ndiyo, Yesu aliwafia wale waliomwacha wakakimbia. Shika kwa nguvu kweli hii—"Kristo alikufa kwa ajili ya waovu wakati walipokuwa bado hawana nguvu." Hii ndiyo njia yako ya kutoka katika woga wako. Litie hili katika nafsi yako, "Kristo alinifia mimi," nawe utakuwa tayari upesi kumfia yeye. Liamini, kwamba aliteswa mahali pako na badala yako, na kukutolea upatanisho uliokamili, wa kweli, na wenye kutosheleza. Kama utaliamini jambo hilo, utalazimika kuhisi, "Siwezi kuona haya kwa ajili yake aliyenifia." Uhakika kamili kwamba hili ni kweli utakupa nguvu za ujasiri usio na woga. Watazame watakatifu wa zama za mashahidi. Katika siku za kwanza za Ukristo, wazo hili kuu la pendo lipitalo kiasi la Kristo lilipokuwa likimeta katika upya wake wote kanisani, watu hawakuwa tayari kufa tu, bali walizidi kutamani kuteswa, na hata wakajitokeza kwa mamia mbele ya viti vya hukumu vya watawala, wakimkiri Kristo. Sisemi kwamba walikuwa na hekima kujitakia mauti ya kikatili; lakini yathibitisha hoja yangu, kwamba kuhisi pendo la Yesu huinua akili juu ya hofu yote ya lile mtu awezalo kututenda. Mbona lisilete tokeo lilo hilo ndani yako? Laiti sasa likuchochee kwa azimio la ujasiri kutoka nje upande wa Bwana, na kuwa mfuasi wake hata mwisho!

Roho Mtakatifu na atusaidie kufika hata hapa kwa imani katika Bwana Yesu, na itakuwa vema!