መታዘዝና መኖር

ትእዛዜን ብትጠብቁ በፍቅሬ ትኖራላችሁ—ዮሐንስ 15:10

ባለፈው ማሰላሰላችን፣ የክርስቶስን የግል ፍቅር በእውነት በማስተዋልና ያም ፍቅር በእርግጥ ነፍስን እንደሚጠብቃት በመረዳት ብዙ ጊዜ ስለሚገኘው ወደ ዕረፍትና ብርታት ሕይወት መግባት ጠቅሰን ነበር። ከዚህ ሽግግርና ይህን ከሚያይና ከሚቀበል እምነት ጋር በተያያዘ ራስን መስጠት ወይም ራስን መቀደስ የሚለው ቃል ብዙ ጊዜ ይነገራል። ነፍስ ራሷን ለፍጹም መታዘዝ ሕይወት ካላስገዛች በቀር የዚህ አስደናቂ ፍቅር ጥበቃ የእኔ ነው ልትል እንደማትችል ታያለች። ደግሞም ከኃጢአት እንዲጠብቃት ክርስቶስን የምትታመን እምነት፣ ለመታዘዝ የሚሆን ብርታት እንዲሰጣት ወዲያውኑ እርሱን ለመታመን በመድፈር ቅንነቷን ማረጋገጥ እንዳለባት ታያለች። በዚያ እምነት እስከ ዛሬ ያሰናከላትን ሁሉ ለመተውና ለመቁረጥ፣ በእግዚአብሔርም ዘንድ ደስ የሚያሰኝ ሕይወት ለመኖር ቃል ለመግባትና ይህንኑ ለመጠበቅ ትደፍራለች።

አሁን እዚህ በመድኃኒታችን ትምህርት የምናገኘው ሐሳብ ይህ ነው። «በፍቅሬ ኑሩ» በሚለው ቃል በፍቅሩ የሚኖር ሕይወት የሚቻልም ግዴታም በመሆኑ አስፈላጊ እንደ ሆነ ከተናገረ በኋላ፣ ብቸኛው ቅድመ ሁኔታው ምን እንደ ሆነ ይገልጣል፦ «ትእዛዜን ብትጠብቁ በፍቅሬ ትኖራላችሁ»። ይህ በእርግጥ አሁን የከፈተውን የፍቅሩን መኖሪያ በር ለመዝጋት የታሰበ አይደለም። አንዳንዶች ለመቀበል እንደሚቸኩሉት፣ ትእዛዛቱን ልንጠብቅ ስለማንችል በፍቅሩ ልንኖር አንችልም የሚለውን ሐሳብ በምንም መንገድ አያመለክትም። አይደለም፤ ትእዛዙ የተስፋ ቃል ነው፤ «በፍቅሬ ኑሩ» የሚለው የተስፋ ቃል ባይሆን ኖሮ ትእዛዝ ሊሆን ባልቻለም ነበር። ስለዚህም በዚህ በተከፈተ በር የምንገባበትን መንገድ የሚያሳየው ትምህርት የማይደረስበትን ሕልም አያመለክትም፤ ወደ ተባረከ መኖሪያው የሚጋብዘው ፍቅር እጁን ይዘረጋል፣ ትእዛዛቱንም እንድንጠብቅ ያስችለናል። ባረገው ጌታችን ብርታት የመታዘዝን ስእለት ለመሳልና ራሳችንን ትእዛዛቱን ለመጠበቅ ለመስጠት አንፍራ። ወደ ፍቅሩ የሚያደርሰው መንገድ በተወደደውና በሚፈጸመው ፈቃዱ በኩል ያልፋል።

ብቻ ይህ ምን ማለት እንደ ሆነ በሚገባ እናስተውል። የእግዚአብሔር ፈቃድ እንደ ሆነ የምናውቀውን ሁሉ መፈጸማችንን ያመለክታል። እርግጠኛ ያልሆንባቸው አጠራጣሪ ነገሮች ሊኖሩ ይችላሉ። ባለማወቅ የሚደረግ ኃጢአትም ቢሆን የኃጢአት ባሕርይ አለበት። በሥጋ ውስጥ የሚነሡ፣ ልንቆጣጠራቸው ወይም ልናሸንፋቸው የማንችላቸው ያለ ፈቃዳችን የሚፈጸሙ ኃጢአቶች ሊኖሩ ይችላሉ። እግዚአብሔር እነዚህን በጊዜው በመመርመርና በማዋረድ መንገድ ይይዛቸዋል፤ የዋሆችና ታማኞችም ብንሆን ልንጠብቀው ከምንደፍረው የሚበልጥ ነጻነት ይሰጠናል። ነገር ግን ይህ ሁሉ በእውነት በምትታዘዝ ነፍስ ውስጥ ሊገኝ ይችላል። መታዘዝ የሚያመለክተው የጌታችንን ትእዛዛት በተግባር መጠበቅንና ፈቃዱን በምናውቅበት ነገር ሁሉ መፈጸምን ነው። ይህ ሊደረስበት የሚችል የጸጋ ደረጃ ነው፤ መድኃኒታችን እዚህ የሚናገረውም እንዲህ ያለውን መታዘዝ የልባችን ዓላማ አድርገን በክርስቶስ ብርታት መቀበላችንን ነው። ክርስቶስን የወይን ግንዳችን አድርጎ በሚያስችለውና በሚቀድሰው ኃይሉ ማመን ለዚህ የእምነት መታዘዝ ያበቃናል፤ በፍቅሩ የመኖርን ሕይወትም ያረጋግጥልናል።

ትእዛዜን ብትጠብቁ በፍቅሬ ትኖራላችሁ—የሚሰጠውን ሕይወት ምሥጢር የሚገልጥ ሰማያዊው የወይን ግንድ ነው። በፍቅሩ ሙሉ በሙሉ የመኖርን ምሥጢር የሚገልጥላቸው በእርሱ ለሚኖሩት ነው። በፍቅሩ ያለማቋረጥ እየተደሰቱ ወደ መኖር ሕይወት የሚያስገባው፣ ፈቃዱን ለማድረግ በሁሉ ነገር በሙሉ ልብ ራስን መስጠት ነው።

መታዘዝና መኖር። ቸር ጌታ ሆይ፣ ልብህን ማወቅ የሚቻለው ፈቃድህን በማወቅ ብቻ እንደ ሆነ፣ በፍቅርህም መኖር የሚቻለው ያን ፈቃድ በማድረግ ብቻ እንደ ሆነ ይህን ትምህርት አስተምረኝ። ጌታ ሆይ፣ በራሴ ብርታት ማድረግ ምንም ዋጋ እንደሌለው ሁሉ፣ በፍቅርህ ልኖር ብወድ በብርታትህ የሚደረገው የእምነት ሥራ እንዲሁ አስፈላጊና ፈጽሞ የማይቀር እንደ ሆነ አስተምረኝ።