እናንተ፣ ልክ እንደ እኔ

እኔ የአባቴን ትእዛዝ እንደ ጠበቅሁ በፍቅሩም እንደምኖር፥ ትእዛዜን ብትጠብቁ በፍቅሬ ትኖራላችሁ—ዮሐንስ 15:10

በወይን ግንዱና በቅርንጫፉ መካከል በባሕርይ፣ ስለዚህም በዓላማ ያለውን ፍጹም መመሳሰል ከአንድ ጊዜ በላይ ለመናገር አጋጣሚ አግኝተናል። እዚህ ክርስቶስ ከእንግዲህ በምሳሌ አይናገርም፤ ይልቁንም የራሱ ሕይወት የእኛ ሕይወት ትክክለኛ አብነት እንዴት እንደ ሆነ በግልጥ ይነግረናል። በፍቅሩ ልንኖር የምንችለው በመታዘዝ ብቻ እንደ ሆነ ተናግሮ ነበር። አሁን ደግሞ እርሱ በአብ ፍቅር የኖረው በዚህ መንገድ እንደ ነበረ ይነግረናል። የወይን ግንዱ እንደ ሆነ እንዲሁ ቅርንጫፉ ነው። ሕይወቱ፣ ብርታቱና ደስታው በአብ ፍቅር ነበረ፤ በእርሱም የኖረው በመታዘዝ ብቻ ነበር። እኛም ቀኑን ሙሉ ሕይወታችንን፣ ብርታታችንንና ደስታችንን በፍቅሩ ልናገኝ እንችላለን፤ ነገር ግን በእርሱ ልንኖር የምንችለው እንደ እርሱ ባለ መታዘዝ ብቻ ነው። ከወይን ግንዱ ጋር ፍጹም መመሳሰል ቅርንጫፉ ከሚያስተምራቸው ትምህርቶች እጅግ ውድ ከሆኑት አንዱ ነው። ክርስቶስ የወይን ግንድ ሆኖ አብን እንደ ገበሬ ያከበረው በመታዘዝ ነበር፤ አማኙም ቅርንጫፍ ሆኖ ክርስቶስን እንደ ወይን ግንድ የሚያከብረው በመታዘዝ ነው።

መታዘዝና መኖር—ይህ የእኛ ሕይወት ሕግ ሊሆን እንደሚገባው ሁሉ የክርስቶስም ሕይወት ሕግ ነበር። እኛ በሁሉ ነገር እርሱን እንድንመስል እርሱ በሁሉ ነገር እኛን መሰለ። እርሱ እንደ ተመላለሰ እኛም እንድንመላለስበት መንገድን ከፈተ። የሰውን ባሕርይ እንዴት እንደምንለብሰው ሊያስተምረን ወሰደው፤ መታዘዝም የፍጡር የመጀመሪያ ግዴታ እንደ ሆነ ሁሉ በእግዚአብሔር ሞገስ ለመኖርና ወደ ክብሩ ለመግባት ብቸኛው መንገድ እንደ ሆነ አሳየን። አሁንም ሊያስተምረንና ሊያበረታታን ይመጣል፤ እርሱ የአባቱን ትእዛዛት እንደ ጠበቀና በፍቅሩ እንደሚኖር እኛም ትእዛዛቱን እንድንጠብቅ ይለምነናል።

በመታዘዝና በመኖር መካከል፣ በእግዚአብሔር ትእዛዛትና በፍቅሩ መካከል ያለው የዚህ ግንኙነት መለኮታዊ ተገቢነት በቀላሉ ይታያል። የእግዚአብሔር ፈቃድ የመለኮታዊ ፍጽምናው ማዕከል ነው። በትእዛዛቱ እንደ ተገለጠ፣ ፍጡር ወደ ፈጣሪው አምሳል እንዲያድግ መንገድን ይከፍታል። ፈቃዱን በመቀበልና በማድረግ ከእርሱ ጋር ወደ ኅብረት እወጣለሁ። ስለዚህም ወልድ ወደ ዓለም በመጣ ጊዜ፦ «አምላኬ ሆይ፥ ፈቃድህን ላደርግ መጥቼአለሁ» ያለው! የፍጡር ስፍራ ይህ ነበር፤ ብፅዕናውም ይህ በሆነ ነበር። ሰው በውድቀት ያጣው ይህን ነበር። ክርስቶስ ሊመልሰው የመጣው ይህን ነበር። እርሱ ሰማያዊ የወይን ግንድ ሆኖ ከእኛ የሚፈልገውና ለእኛ የሚሰጠው ይህ ነው፤ እርሱ የአባቱን ትእዛዛት በመጠበቅ በፍቅሩ እንደ ኖረ፣ እኛም ትእዛዛቱን ጠብቀን በፍቅሩ እንድንኖር ነው።

እናንተ፣ ልክ እንደ እኔ—ቅርንጫፉ ከወይኑ ግንድ ጋር አንድ ዓይነት ሕይወት ከሌለው በቀር ፍሬ ሊያፈራ አይችልም። ሕይወታችን የክርስቶስ ሕይወት ትክክለኛ አምሳያ ሊሆን ይገባዋል። ራሱንና ሕይወቱን ለቅርንጫፎቹ የሚያካፍል የወይን ግንድ እንደ ሆነ በምናምነው መጠን ልክ እንዲህ ሊሆን ይችላል። «እናንተ፣ ልክ እንደ እኔ» ይላል የወይኑ ግንድ፤ አንድ ሕግ፣ አንድ ባሕርይ፣ አንድ ፍሬ። የመታዘዝን ትምህርት የመኖር ምሥጢር አድርገን ከጌታችን እንቀበል። ቀላል፣ ያለ ማመንታት የሆነ፣ በሁሉ ነገር የሆነ መታዘዝ ሊይዘው የሚገባውን ስፍራ በጣም ጥቂት እንደ ያዘ እንናዘዝ። ክርስቶስ የማንታዘዝ ሆነን ጠላቶች ሳለን ስለ እኛ ሞተ። ወደ ፍቅሩ ተቀበለን፤ አሁን በእርሱ ስላለን ቃሉ፦ «ታዘዙ ኑሩም፤ እናንተ፣ ልክ እንደ እኔ» የሚል ነው። ራሳችንን በፈቃደኝነትና በፍቅር ለሚደረግ መታዘዝ እንስጥ። እርሱ በፍቅሩ እንድንኖር ይጠብቀናል።

እናንተ፣ ልክ እንደ እኔ። ቅርንጫፉን በሁሉ ነገር የሕይወትህና የአምሳልህ ተካፋይ የምታደርገው የተባረክህ የወይን ግንዴ ሆይ፣ በዚህም ደግሞ እንደ አንተ ልሆን ይገባኛል፤ ሕይወትህ በመታዘዝ በአብ ፍቅር እንደ ነበረ፣ የእኔም እንዲሁ በፍቅርህ ይሁን! መድኃኒት ሆይ፣ መታዘዝ በእውነት በአንተና በእኔ መካከል ያለ ማሰሪያ እንዲሆን እርዳኝ።