የወይን ግንድ (ዮሐንስ 15:1)

እውነተኛ የወይን ግንድ እኔ ነኝ—ዮሐንስ 15:1

ምድራዊ ነገሮች ሁሉ የሰማያዊ እውነታዎች ጥላዎች ናቸው፤ የማይታየው የእግዚአብሔር ክብር በተፈጠሩና በሚታዩ ቅርጾች የተገለጠባቸው መግለጫዎች ናቸው። ሕይወትና እውነት በሰማይ ናቸው፤ በምድር ላይ ያሉን የሰማያዊ እውነቶች ምሳሌዎችና ጥላዎች ናቸው። ኢየሱስ፦ «እውነተኛ የወይን ግንድ እኔ ነኝ» ሲል፣ የምድር የወይን ግንዶች ሁሉ የእርሱ ሥዕሎችና ምልክቶች መሆናቸውን ይነግረናል። እርሱ መለኮታዊው እውነታ ነው፤ እነርሱም የተፈጠሩ መግለጫዎቹ ናቸው። ሁሉም ወደ እርሱ ያመለክታሉ፤ እርሱን ይሰብካሉ፤ እርሱንም ይገልጣሉ። ኢየሱስን ማወቅ ብትወድ የወይን ግንድን አጥና።

ውብ ፍሬ የተሸከመውን ታላቅ የወይን ግንድ ስንት ዓይኖች ተመልክተው አድንቀውታል። ዓይንህ ከሌላው ነገር ሁሉ ተመልሶ እርሱን ብቻ እስኪያደንቅ ድረስ ና፤ ሰማያዊውን የወይን ግንድ ተመልከት። ፀሐያማ በሆነ አገር ስንቶች በወይን ግንድ ጥላ ሥር ተቀምጠው ያርፋሉ። ና፤ በእውነተኛው የወይን ግንድ ጥላ ሥር ጸጥ በል፤ ከቀኑም ሐሩር ከሥሩ እረፍ። ስፍር ቍጥር የሌላቸው ሰዎች በወይን ፍሬ ደስ ይላቸዋል! ና፤ ከእውነተኛው የወይን ግንድ ሰማያዊ ፍሬ ውሰድ፤ ብላም፤ ነፍስህም፦ «ጥላውን እጅግ ወደድሁ ከሥሩም ተቀመጥሁ፤ ፍሬውም ለጕሮሮዬ ጣፋጭ ነበረ» ትበል።

እውነተኛ የወይን ግንድ እኔ ነኝ።—ይህ ሰማያዊ ምሥጢር ነው። ምድራዊው የወይን ግንድ ስለዚህ ሰማያዊ የወይን ግንድ ብዙ ሊያስተምርህ ይችላል። ትኵረት የሚስቡና ውብ የሆኑ ብዙ የንጽጽር ነጥቦች ራሳቸው ወደ አእምሮ ይመጣሉ፤ ክርስቶስ ምን ማለቱ እንደ ነበረም እንድንገነዘብ ይረዱናል። ነገር ግን እንዲህ ያሉ ሐሳቦች ሰማያዊው የወይን ግንድ በቀዝቃዛ ጥላውና ሕይወት በሚሰጥ ፍሬው በእውነት ምን እንደ ሆነ እንድናውቅ አያስተምሩንም። ይህን በተሞክሮ ማወቅ የተሰወረው ምሥጢር ክፍል ነው፤ ይህንንም ከኢየሱስ በቀር፣ እርሱ ራሱ በመንፈስ ቅዱሱ ካልሆነ በቀር፣ ማንም ሊገልጠውና ሊያካፍለው አይችልም።

እውነተኛ የወይን ግንድ እኔ ነኝ።—የወይን ግንዱ ራሱ የሚናገር፣ ለእኛ ያለውንም ሁሉ የሚሰጥና የሚሠራ ሕያው ጌታ ነው። የዚያን ቃል ትርጕምና ኃይል ማወቅ ብትወድ በሐሳብ ወይም በጥናት አገኘዋለሁ ብለህ አታስብ፤ እነዚህ ምኞትንና ተስፋን ጸሎትንም ለማነሣሣት ከእርሱ ምን ማግኘት እንዳለብህ ለማሳየት ይረዱ ይሆናል፤ የወይን ግንዱን ግን ሊያሳዩህ አይችሉም። ራሱን ሊገልጥ የሚችል ኢየሱስ ብቻ ነው። እርሱን እንዲመለከቱ ዓይኖችን ለመክፈት፣ እርሱንም እንዲቀበል ልብን ለመክፈት መንፈስ ቅዱሱን ይሰጣል። ቃሉን ለአንተም ለእኔም እርሱ ራሱ ሊናገረው ይገባል።

እውነተኛ የወይን ግንድ እኔ ነኝ።—ታዲያ ምሥጢሩ በሰማያዊ ውበቱና በረከቱ ሁሉ እንዲገለጥልኝ ብፈልግ ምን ላድርግ? ስለ ምሳሌው አስቀድመህ ባወቅኸው መጠን ራስህን ዝቅ አድርገህ ጸጥ በል፤ መለኮታዊው ቃል ወደ ልብህ እስኪገባ፣ ቅዱስ መገኘቱም ከአንተ ጋርና በአንተ ውስጥ እንዳለ እስኪሰማህ ድረስ ስገድ፤ ጠብቅም። የቅዱስ ፍቅሩ ጥላ ሲጋርድህ የወይን ግንዱ ሁሉን እንደሚያደርግ በማወቅ የሚገኘውን ፍጹም ጸጥታና እረፍት ይሰጥሃል።

እውነተኛ የወይን ግንድ እኔ ነኝ።—የሚናገረው እግዚአብሔር ነው፤ ወሰን በሌለው ኃይሉ ወደ ውስጣችን ሊገባ ይችላል። እርሱ ሰው ነው፤ ከእኛ ጋር አንድ ነው። በሞቱ ፍጹም ጽድቅንና መለኮታዊ ሕይወትን ያስገኘልን የተሰቀለው እርሱ ነው። መገኘቱን እውንና እውነተኛ ለማድረግ ከዙፋኑ መንፈሱን የሚሰጥ የከበረው እርሱ ነው። እርሱ ይናገራል—ኦ፣ ቃሎቹን ብቻ ሳይሆን እርሱን ራሱን አድምጥ፤ ቀን በቀን በስውር እንዲህ እያለ ያንሾካሹካልና፦ «እውነተኛ የወይን ግንድ እኔ ነኝ! የወይን ግንድ ለቅርንጫፉ ሊሆንለት የሚችለውን ሁሉ እኔ ለአንተ እሆንልሃለሁ።»

ቅዱስ ጌታ ኢየሱስ ሆይ፣ እግዚአብሔር ራሱ የተከለህ ሰማያዊ የወይን ግንድ፣ ራስህን ለነፍሴ ግለጥ ብዬ እለምንሃለሁ። አንተ የእግዚአብሔር ልጅ እንደ እውነተኛ የወይን ግንድ ለእኔ የሆንህልኝን ሁሉ መንፈስ ቅዱስ በሐሳብ ብቻ ሳይሆን በተሞክሮ እንዳውቅ ይስጠኝ።