የምትወዱትን ሁሉ

በእኔ ብትኖሩ ቃሎቼም በእናንተ ቢኖሩ የምትወዱትን ሁሉ ለምኑ ይሆንላችሁማል—ዮሐንስ 15:7

ቅርንጫፉ በወይኑ ግንድ ውስጥ ያለው ስፍራ በሙሉ የማያቋርጥ ጸሎት ስፍራ ነው። ያለማቋረጥ ሁልጊዜ እንዲህ እያለ ይጣራል፦ «የወይን ግንዴ ሆይ፣ ፍሬህን እንዳፈራ የሚያስፈልገኝን ጭማቂ ላክልኝ።» ጸሎቱም መልስ አጥቶ አያውቅም፤ የሚያስፈልገውን፣ የሚወደውን ይለምናል፤ ይሆንለትማል።

በክርስቶስ ያለ አማኝ ጤናማ ሕይወትም እንዲሁ የማያቋርጥ ጸሎት ሕይወት ነው። አውቆም ሳያውቅም በማያቋርጥ ጥገኝነት ይኖራል። «ምንም ልታደርጉ አትችሉም» የሚለው የጌታው ቃል፣ መለመኑና መቀበሉ ቅርንጫፉ በወይኑ ግንድ ውስጥ ከሚኖርበት ያላነሰ ያልተቋረጠ መሆን እንዳለበት አስተምሮታል። የጥቅሳችን ተስፋ ቃል ወሰን የሌለው ድፍረት ይሰጠናል፦ «የምትወዱትን ሁሉ ለምኑ ይሆንላችሁማል።»

ተስፋው የተሰጠው ፍሬ ከማፍራት ጋር በቀጥታ ተያይዞ ነው። ለራስህና ለራስህ ፍላጎቶች ብቻ ብትወስነው ኃይሉን ትገፈዋለህ፤ ራስህንም ተስፋውን የራስህ የማድረግን ኃይል ታሳጣለህ። ክርስቶስ እነዚህን ደቀ መዛሙርት ሊልካቸው ነበር፤ እነርሱም ሕይወታቸውን ለዓለም ለመስጠት ዝግጁ ነበሩ፤ ለእነርሱ የሰማይን መዝገቦች በሥልጣናቸው ሥር ሰጣቸው። ጸሎታቸው ለሥራቸው የሚያስፈልጋቸውን መንፈስና ኃይል ያመጣ ነበር።

ተስፋው የተሰጠው ከመንፈስ መምጣት ጋር በቀጥታ ተያይዞ ነው። የወይኑ ግንድ ጭማቂ በምሳሌው ውስጥ እንዳልተጠቀሰ ሁሉ መንፈስም አልተጠቀሰም። ነገር ግን ሁለቱም ከመጀመሪያ እስከ መጨረሻ የታሰቡ ናቸው። ከምሳሌው በፊት ባለው ምዕራፍ ጌታችን ስለ መንፈስ ቅዱስ ከውስጣዊ ሕይወታቸው ጋር በተያያዘ—በእነርሱ ውስጥ እንደሚሆንና በውስጣቸው ራሱን እንደሚገልጥ—ተናግሮ ነበር (14:15-23)። በሚቀጥለው ምዕራፍ ደግሞ ስለ መንፈስ ቅዱስ ከሥራቸው ጋር በተያያዘ—ወደ እነርሱ እንደሚመጣ፣ ዓለምን እንደሚወቅስና እርሱን እንደሚያከብር—ይናገራል (16:7-14)። ወሰን የሌለውን የጸሎት ተስፋ ቃል ለመጠቀም በመንፈስ የተሞላንና ለኢየሱስ ሥራና ክብር ፈጽሞ ራሳችንን የሰጠን ሰዎች መሆን አለብን። መንፈስ ወደ ትርጉሙ እውነትና ወደ ፍጻሜው እርግጠኝነት ይመራናል።

ብዙ ፍሬ የማፍራት ጥሪያችንን ልንፈጽም የምንችለው አብዝተን በመጸለይ ብቻ መሆኑን እንገንዘብ። በዙሪያችን ያሉ ሰዎች የሚያስፈልጋቸው መዝገብ ሁሉ በክርስቶስ ተሰውሮአል፤ በእርሱ የእግዚአብሔር ልጆች ሁሉ በመንፈሳዊ በረከት ሁሉ ተባርከዋል፤ እርሱ ጸጋንና እውነትን የተሞላ ነው። ነገር ግን እነዚህን በረከቶች ለማውረድ ጸሎት፣ ብዙ ጸሎት፣ ብርቱና የሚያምን ጸሎት ያስፈልጋል። እንዲሁም ለሰዎች የተሰጠ ሕይወት ሳይኖረን ተስፋውን የራሳችን ማድረግ እንደማንችል እናስታውስ። ብዙዎች ተስፋውን ለመያዝ ይሞክራሉ፤ ከዚያም ምን ሊለምኑ እንደሚችሉ ዙሪያቸውን ይመለከታሉ። መንገዱ ይህ አይደለም፤ ይልቁንም ፍጹም ተቃራኒው ነው። ልብህ የነፍሳትን ችግርና እነርሱን የማዳንን ትእዛዝ እንደ ሸክም ይሸከም፤ ተስፋውን የመጠየቅ ኃይልም ይመጣል።

በወይኑ ግንድ ውስጥ ካለን አስደናቂ ሕይወት መገለጦች አንዱ አድርገን እንጠይቀው፦ በስሙ፣ ከእርሱ ጋር ባለን አንድነት መሠረት ብንለምን፣ ምንም ቢሆን እንደሚሆንልን ይነግረናል። ጸሎት እጅግ ስላነሰ ነፍሳት እየጠፉ ነው። ጸሎት እጅግ ስላነሰ የእግዚአብሔር ልጆች ደካሞች ናቸው። ጸሎት እጅግ ስላነሰ እጅግ ጥቂት ፍሬ እናፈራለን። በዚህ ተስፋ ቃል ማመን ለመጸለይ ብርቱዎች ያደርገናል፤ ወደ ልባችን ጥልቅ እስኪገባና በክርስቶስ ኃይል ስቦን በረከቱ በኃይል እስኪመጣ ድረስ በጸሎት እንድንጸና፣ እንድንደክምና እንድንጋደል እስኪያደርገን ድረስ አናርፍ። ቅርንጫፍ መሆን ማለት በምድር ላይ ፍሬ ማፍራት ብቻ ሳይሆን ከሰማይ በረከትን ለማውረድ በጸሎት ኃይል ማግኘትም ነው። ሙሉ በሙሉ መኖር ማለት አብዝቶ መጸለይ ማለት ነው።

የምትወዱትን ሁሉ ለምኑ። ጌታዬ ሆይ፣ ልባችን እነዚህን ቃላት በመለኮታዊ ቀላልነታቸው ለመቀበል እንዲህ አቅም የሚያንሰው ስለ ምንድር ነው? ኦ፣ የዓለምንና የሰይጣንን ኃይላት ለማሸነፍ ከዚህ ተስፋ ቃል ያነሰ ምንም እንደማይበቃን እንዳይ አድርገኝ! በዚህ ተስፋ ቃልህ በማመን እንድንጸልይ አስተምረን።