በእኔ ብትኖሩ

በእኔ ብትኖሩ ቃሎቼም በእናንተ ቢኖሩ የምትወዱትን ሁሉ ለምኑ ይሆንላችሁማል—ዮሐንስ 15:7

የወይን ግንዱና ቅርንጫፎቹ የክርስቲያናዊ ሕይወት እውነተኛ ምሳሌ የሆኑበት ምክንያት፣ ፍጥረት ሁሉ አንድ ምንጭ ያለውና አንድ መንፈስ የሚተነፍስ በመሆኑ ነው። የዕፅዋት ዓለም የተፈጠረው ለሰው ትምህርት ሰጪ ምሳሌ እንዲሆንለት፣ በእግዚአብሔር ላይ ፈጽሞ ጥገኛ መሆኑንና በዚያም ጥገኝነት ያለውን ዋስትና እንዲያስተምረው ነው። የሜዳ አበቦችን የሚያለብስ እርሱ እኛንማ ይልቁን ያለብሰናል። ለዛፎችና ለወይን ግንዶች ውበታቸውንና ፍሬአቸውን የሚሰጥ፣ እያንዳንዳቸውንም እንዲሆኑ ያሰበውን የሚያደርጋቸው እርሱ፣ እኛንም እንድንሆን የሚወደውን ይልቁን በእርግጥ ያደርገናል። ልዩነቱ አንድ ብቻ ነው፤ እግዚአብሔር በዛፎች ውስጥ የሚሠራው እነርሱ በማያውቁት ኃይል ነው። በእኛ ውስጥ ግን በእኛ ፈቃድ ሊሠራ ይወዳል። የሰው ክቡርነት ይህ ነው፤ እግዚአብሔር ሊያደርግለት ያቀረበውን በመረዳት፣ በመስማማትና በመቀበል ከእርሱ ጋር ሊተባበር የሚችል ፈቃድ ያለው መሆኑ ነው።

በእኔ ብትኖሩ—የተፈጥሮው የወይን ግንድ ቅርንጫፍና የመንፈሳዊው የወይን ግንድ ቅርንጫፍ ልዩነት ይህ ነው። የመጀመሪያው የሚኖረው በተፈጥሮ ግፊት ነው፤ ሁለተኛው ግን የሚኖረው በፈቃድ ብርታት ሳይሆን፣ ፈቃዱ ሲስማማ በሚሰጠው መለኮታዊ ኃይል ነው። እግዚአብሔር ያዘጋጀው ድንቅ ዝግጅት እንዲህ ነው፤ በአንደኛው የተፈጥሮ ኃይል የሚያደርገውን፣ በሌላኛው የጸጋ ኃይል ያደርገዋል። ቅርንጫፉ በወይኑ ግንድ ሊኖር ይችላል።

በእኔ ብትኖሩ … የምትወዱትን ሁሉ ለምኑ—የጸሎት ፍቅር፣ ኃይልና ተሞክሮ የሚታይበት እውነተኛ የጸሎት ሕይወት ልንኖር ከሆነ፣ ስለ መኖሩ ምንም ጥያቄ ሊኖር አይገባም። ብንኖር ደግሞ የምንወደውን ለመለመን ስላለን ነጻነትና ስለሚደረግልንም እርግጠኝነት ምንም ጥያቄ አያስፈልግም። ቅድመ ሁኔታው አንድ ነው፦ «በእኔ ብትኖሩ»። ይህ ስለሚቻል መሆኑም ሆነ ስለ እርግጠኝነቱ ምንም ማመንታት ሊኖር አይገባም። በእውነት መኖርን እስክንማር ድረስ ያቺን ትንሽ ቅርንጫፍና እንዲያ ያለ ውብ ፍሬ የማፍራት ድንቅ ኃይሏን አተኩረን እንመልከት።

ምስጢሩስ ምንድን ነው? ሙሉ በሙሉ በኢየሱስ ተጠመድ። የማንነትህን ሥሮች በእምነት፣ በፍቅርና በመታዘዝ ወደ እርሱ ጥልቅ አድርገህ ስደድ። በዚህ ለመኖር ከሌላው ስፍራ ሁሉ ፈጽመህ ውጣ። በሰማይ ላለው ለከበረው የእግዚአብሔር ልጅ በምድር ላይ ቅርንጫፍ የመሆንን ከአእምሮ በላይ የሆነ መብት ለማግኘት ሁሉን ተው። ክርስቶስ የመጀመሪያ ይሁን። ክርስቶስ ሁሉ ይሁን። በመኖሩ አትጠመድ—በክርስቶስ ተጠመድ! እርሱ ይይዝሃል፤ በእርሱ እየኖርህ እንድትጸና ይጠብቅሃል። እርሱ በአንተ ይኖራል።

በእኔ ብትኖሩ ቃሎቼም በእናንተ ቢኖሩ—ይህን የሰጠው ከሌላው አነጋገር ጋር እኩል አድርጎ ነው፦ «እኔም በእናንተ። ቃሎቼም በእናንተ ቢኖሩ»—ማለትም በማሰላሰል፣ በትውስታ፣ በፍቅር፣ በእምነት ብቻ ሳይሆን—እነዚህ ቃሎች ሁሉ ወደ ፈቃድህና ወደ ማንነትህ ገብተው ሕይወትህ ቢሆኑ—ባሕርይህን ወደ ራሳቸው መልክ ቢለውጡት፣ አንተም እነርሱ የሚናገሩትንና የሚያመለክቱትን ብትሆንና ብትኖር—የምትወዱትን ሁሉ ለምኑ ይሆንላችሁማል። በጸሎት ለእግዚአብሔር የምትናገራቸው ቃሎችህ በአንተ ውስጥ የሚኖሩት የክርስቶስና የቃሎቹ ፍሬ ይሆናሉ።

የምትወዱትን ሁሉ ለምኑ ይሆንላችሁማል—በዚህ ተስፋ እውነትነት እመን። ለሰዎች አማላጅ ለመሆን ራስህን ስጥ፤ ፍሬ የሚያፈራ፣ ዘወትር ተጨማሪ በረከትን የሚያወርድ አማላጅ። እንዲህ ያለው እምነትና ጸሎት ሙሉ በሙሉና ያለማቋረጥ እንድትኖር በሚያስደንቅ ሁኔታ ይረዳሃል።

በእኔ ብትኖሩ። አዎን ጌታ ሆይ፣ የመጸለይ ኃይልና የማሸነፍ ኃይል በዚህ በአንተ በመኖር ላይ የተመሠረተ ነው። አንተ የወይን ግንዱ እንደ ሆንህ፣ መንፈስህን በእኛ ውስጥ እፍ የምትል መለኮታዊው አማላጅም አንተ ነህ። ኦ፣ በቀላልነትና ሙሉ በሙሉ በአንተ እንድኖርና ታላላቅ ነገሮችን እንድለምን ጸጋን ስጠኝ!