ክርስቶስ እጅግ የዋህ ነው፤ ቢሆንም የየዋህነቱን መጽናናት የሚያገኙትን ይገዛቸዋል

ይህ የቍጥሩ ክፍል ከቀደመው ጋር ካለው ትስስር የምናገኘው የመጀመሪያው ድምዳሜ ይህ ነው፦ ክርስቶስ የዋህ የሆነው በዚህ ቃል ነው፤ ይኸውም እጅግ የሚራራላቸውንና የሚጠነቀቅላቸውን ሰዎች በውስጣቸው አገዛዙን ያቆማል። ይቅር ይላል፤ ነገር ግን እንደ ንጉሥ እንዲታዘዝ ይሻል፤ ሙሽራው አድርጎ ይወስደናል፤ ነገር ግን እንደ ባል እንዲታዘዝ ይሻል፤ እንዲከድነን የጽድቁን አስፈላጊነት የሚያሳምነን ያው መንፈስ እንዲገዛን የአገዛዙንም አስፈላጊነት ያሳምነናል። ለእኛ ያለው ፍቅር እርሱን እንድንመስል አድርጎ እንዲቀርጸን ያነሣሣዋል፤ ለእርሱ ያለን ፍቅርም ደስ የሚሰኝብን ሰዎች እንድንሆን ያነቃቃናል፤ እርሱ ንጹሕ እንደ ሆነ ለመንጻት ካለን ትጋት የሚበልጥ እምነትም ተስፋም የለንም፤ ከእርሱ በታች ያሉ ገዢዎች፣ እንዲያውም ከእርሱ በታች ነገሥታት ያደርገናል፤ ወራዳ የልብ ዝንባሌዎቻችንን እንድንቃወም ብቻ ሳይሆን በተወሰነ መጠን እንድናሸንፋቸውም ጸጋን ይሰጠናል። እያንዳንዳችንን ከክፋታችን እንዲመልስ የክርስቶስ ከፍ ከፍ ማለት ዋና ፍሬ አንዱ ነው (የሐዋርያት ሥራ 3:26)። ክርስቶስ የሞተው፣ የተነሣውና ሕያው ሆኖ የሚኖረው ለዚህ ዓላማ ነው፤ ይኸውም «ሙታንንም ሕያዋንንም ይገዛ ዘንድ» ነው (ሮሜ 14:9)። እግዚአብሔር በዓለም ፊት ብቻ ሳይሆን በፊቱ በቅድስናና በጽድቅ ያለ ፍርሃት እናገለግለው ዘንድ ይህን ሊሰጠን በመሐላ ራሱን አስሮአል (ሉቃስ 1:75)። 1. ይህ በክርስቶስ ምሕረት ላይ ትክክለኛ ይገባኛል ሊሉ የሚችሉት እነማን እንደ ሆኑ ለመለየት መፈተኛ ሊሆን ይችላል፤ እነርሱም ቀንበሩን የሚሸከሙ፣ ማንኛውንም የሥጋ ነጻነት ከማጣጣም ይልቅ ከአገዛዙ በታች መሆንን እንደ ታላቅ ደስታ የሚቈጥሩ፤ ለጊዜው ከሚያረካቸው ጋር የሚስማማውን ብቻ ከእርሱ መርጠው ሳይሆን ክርስቶስን ሙሉውን የሚቀበሉ፤ ጌታን ከኢየሱስ ለይተው የገዛ ራሳቸውን ክርስቶስ የማይሠሩ ብቻ ናቸው። ይቅር የሚለውን ምሕረት በእውነት የፈለገ ሁሉ የሚፈውሰውንም ምሕረት ፈልጓል። ዳዊት ይቅር የሚለውን ምሕረት እንዲያውቅ እንደ ጸለየ ሁሉ አዲስ መንፈስንም እንዲያገኝ ይጸልያል (መዝሙር 51)።

2. ይህ ክርስቶስን ለእኛ ጽድቅ ብቻ የሚያደርጉት፣ በመቈጠር ካልሆነ በቀር ቅድስና የማያደርጉት የተሳሳቱ መሆናቸውን ያሳያል፤ ለእኛ የተወለደና ለእኛ የተሰጠ ብቻ ሳይሆን አለቅነትም በጫንቃው ላይ ያለ (ኢሳይያስ 9:6-7)፣ አዳኛችን ብቻ ሳይሆን ቀዳሻችንም የሆነ፣ በሞቱ ብቃት ከኃጢአት በደል እንዳዳነን እንዲሁ በመንፈሱ ውጤታማ ኃይል ከኃጢአት ሥልጣን የሚያድነን እንዲህ ያለ ጌታ ከበላያችን መኖሩ የደስታችን ታላቅ ክፍል ነውና። ስለዚህ ይህ ይታሰብ፦ 1. የመጽናናታችን የመጀመሪያውና ዋናው መሠረት ክርስቶስ እንደ ካህን ስለ እኛ ራሱን ለአባቱ መሥዋዕት አድርጎ ማቅረቡ ነው። በደለኛዪቱ ነፍስ በመጀመሪያ ስለ እኛ እርግማን ወደ ሆነው ወደ ተሰቀለው ክርስቶስ ትሸሻለች። ክርስቶስ እኛን የመግዛት መብት ያገኘው ከዚህ ነው፤ ወደ ቤት የሚመራን መሪ አድርጎ መንፈሱን የሚሰጠንም ከዚህ የተነሣ ነው።

2. በሕይወታችን ጉዞ፣ በጸጋ ሁኔታ ውስጥ ከሆንን በኋላ በማንኛውም ኃጢአት ብንያዝ፣ በመጀመሪያ ይቅር እንዲለን ወደ ክርስቶስ ምሕረት፣ ከዚያም እንዲገዛን ወደ መንፈሱ የተስፋ ቃል መሸሸግን ልናስታውስ ይገባናል።

3. በልብ ዝንባሌና በተግባር ቀዝቅዘን ራሳችንን ስናገኝም፣ ስለ እኛ ራሱን በመስጠቱ በተገለጠው በዚህ በፍቅሩና በምሕረቱ እሳት ራሳችንን ማሞቅ ከሁሉ የተሻለ መንገድ ነው።

4. ደግሞም ይህን አስታውስ፦ ክርስቶስ የሚገዛን ከፍቅሩ ስሜት በሚመነጭ በፍቅር መንፈስ ነው፤ በዚህም ትእዛዛቱ ለእኛ ቀላል ይሆናሉ፤ በነጻ መንፈሱ፣ በአርነት መንፈስ ይመራናል፤ ተገዢዎቹ በገዛ ፈቃዳቸው የሚያገለግሉ ናቸው፤ በተገዢዎቹ ላይ የሚያኖረው ግዴታ የፍቅር ግዴታ ነው፤ በፍቅር ገመድ በጣፋጭነት ይስበናል። ቢሆንም ደግሞ በኃይል መንፈስ አጥብቆ እንደሚስበን አስታውስ፤ ሊያጸድቀን ራሱን ስለ እኛ ከሰጠበት ከዚያ ፍቅሩ የተነሣ ክርስቶስን ለመውደድና ለመታዘዝ የሚያነሣሡ ምክንያቶችና ማበረታቻዎች ማግኘታችን ብቻ በቂ አይደለምና፤ ይልቁንም የክርስቶስ መንፈስ ልባችንን ሊያስገዛና እርሱን እንዲወድዱ ሊቀድሳቸው ይገባል፤ ያለዚህ የሚያነሣሡ ምክንያቶች ሁሉ ፍሬ ቢሶች በሆኑ ነበር። ባሕርያችን ሊለወጥ ይገባዋል፤ አዲስ ፍጥረት ልንሆን ይገባናል፤ ባልተለወጠ ልብ ውስጥ መንፈሳዊ ፍቅርን የሚፈልጉ በሲኦል ውስጥ መንግሥተ ሰማያትን ይፈልጋሉ። ልጅ አባቱን ሲታዘዝ የሚያደርገው በሚያሳምኑት ምክንያቶች ብቻ ሳይሆን ለእነዚያ ምክንያቶች ብርታት ከሚሰጥ ከልጅነት ባሕርይም የተነሣ ነው፤ እንዲሁ የእግዚአብሔር ልጅ በታደሰበት መጠን ክርስቶስን መውደዱ ተፈጥሮአዊ ነው፤ ይህም እንዲያደርግ በምክንያት ስለ ተገፋፋ ብቻ ሳይሆን፣ እነዚያ ምክንያቶች ዋና ኃይላቸውን ከሚያገኙበት ከውስጣዊ የጸጋ መርሕና ሥራ የተነሣ ነው፤ በመጀመሪያ ከመለኮት ባሕርይ ተካፋዮች እንሆናለን፤ ከዚያም በኋላ በክርስቶስ መንፈስ ወደ መንፈሳዊ ተግባራት በቀላሉ እንገፋፋለን፤ እንመራለንም።