ዕድሎች በዙ

የሚቀጥለው ዓመት እጅግ አስደሳች ዓመት ነበር! የአዲሱ ትምህርት ቤት ዕቅዶች በሂደት ላይ ነበሩ፤ ሁላችንም አርክቴክቶቹ ንድፎቻቸውን ሲያዘጋጁ አስተያየቶቻችንን በቁም ነገር መያዛቸውን በጉጉት እንከታተል ነበር። በግራማር ትምህርት ቤቱ የነበርን ሰዎች ለአጠቃላዩ የተማሪ ማኅበረሰብ ይበልጥ ለሚስማሙ እንቅስቃሴዎች ሲባል የነበሩንን አንዳንድ የላቁ የትምህርት እንቅስቃሴዎች እንዳናጣ ተጨንቀን ነበር። የሌላኛው ትምህርት ቤት መምህራንም ተማሪዎቻቸው «እንደ ሁለተኛ ደረጃ ዜጎች» እንዳይቆጠሩ እንዲሁ እንደ ተጨነቁ እርግጠኛ ነኝ። ሁለቱንም ወገኖች መወከል የእኔ ኃላፊነት ነበር።

ከፍተኛ ደረጃ ላይ ላሉት፣ ማለትም ወደ ዩኒቨርሲቲ ለመግባት ለሚዘጋጁ ተማሪዎች አዲስ ሥርዓተ ትምህርት ለማዘጋጀት የተቋቋመ፣ ጥቂት የፊዚክስ መምህራን ያሉበትን ግብረ ኃይል እንድቀላቀል ተጋበዝሁ። ሥርዓተ ትምህርቱን ከመወያየት በተጨማሪ የኤሌክትሮኒክስ መሣሪያዎችን ለመሥራትና ለመሞከር በየሳምንቱ በካርዲፍ ዩኒቨርሲቲ እንገናኝ ነበር። ትራንዚስተሮች አዲስ ፈጠራ ነበሩ፤ እንደምትገምተውም ሁላችንም በአዲስ መጫወቻዎች የምንጫወት የኤሌክትሮኒክስ «ጀማሪዎች» ነበርን። የሁለተኛ ደረጃ ትምህርቴን ያጠናቀቅሁት ከ15 ዓመት በፊት ብቻ ነበር፤ የኤሌክትሮኒክስ ሳይንስ ግን በትምህርት ዘርፍ እንኳ ትልቅ ተጽዕኖ ማሳደር ጀምሮ ነበር።

የትምህርት ዓመቱ ሊያልቅ ሲቃረብ በዩኒቨርሲቲው የሙሉ ጊዜ የኤሌክትሮኒክስ ትምህርት ለመከታተል የማመልከቻ ዕድል ቀረበልኝ — በትምህርቱ መጨረሻ የሳይንስ ማስተርስ ዲግሪ ይሰጠኝ ነበር።

ትምህርቱ ስለሚማርከኝና የማስተማር ችሎታዬን ብቻ የሚያዳብር ትምህርት እንደ ሆነ ስለ ቈጠርሁት ይህ እጅግ የሚያጓጓ ነበር።

ትምህርት ቤታችንን በፊዚክስ ትምህርት አሰጣጥ የታወቀ ቀዳሚ ትምህርት ቤት የማድረግ ግብ ቀድሞውኑ ነበረኝ። ከዚህም በላይ በፊዚክስ የዶክትሬት ዲግሪ ለመማር ከተሰጡኝ ሁለት ዕድሎች አንዱን ባለመቀበሌ ሁልጊዜ ጥቂት ቍጭት ይዤ ነበር። በምረቃዬ ጊዜ ምርምር ለማድረግ በስዋንሲ ዩኒቨርሲቲ እንድቆይ ተጋብዤ ነበር፤ ሁለተኛም፣ በአንታርክቲካ ለሦስት ዓመታት ከብሪታንያ የጂኦግራፊ ማኅበር የምርምር ቡድን ጋር እንድሠራና ከዚያም በኋላ በኦክስፎርድ ዩኒቨርሲቲ «የተረጋገጠ» የዶክትሬት ዲግሪ እንዳገኝ ተጋብዤ ነበር፤ ሆኖም እኔ ራስን ዝቅ አድርጎ የማየት ብሔራዊ ጠባይ ያለኝ የተለመደ ዌልሳዊ ነበርሁ፤ የዶክትሬት ግቡን በእርግጥ ልደርስበት እንደምችል አላመንሁም ነበር። ደግሞም አንን አግኝቼ ነበር — በፍቅርም ወድቄ ነበር!

ይህን አዲስ ዕድል በጥንቃቄ አሰብሁበት። ተተኪ መምህር አዘጋጀሁ፤ ከዚያም የራሴን ትምህርት ለማሳደግ የጥናት ፈቃድ ጠየቅሁ። ርዕሰ መምህሬ አቶ ፕራይስ ማመልከቻዬን ደገፈው፤ ማመልከቻውም ለአስተዳደር ቦርዱ ቀረበ። የሚቀጥለው የቦርድ ስብሰባችን ገና ሁለት ሳምንት ይቀረው ስለ ነበር፣ ከጥቂት ቀናት በኋላ ቦርዱ ማመልከቻዬን ውድቅ እንዳደረገው ርዕሰ መምህሩ ሲነግረኝ ተገረምሁ። ተጨማሪ ስጠይቅ ውሳኔውን ያለ ምክክር የወሰነው ሊቀ መንበሩ ብቻ እንደ ሆነ ተረዳሁ፤ ስለዚህ ቅሬታዬን ለአቶ ፕራይስ ገለጽሁ። ለቀጠሯቸው መምህራን ባላቸው የርኅራኄ ጉድለት በሚታወቁት የትምህርት ቤት ቦርዶች ዘንድ እንዲህ ያሉ ድርጊቶች የተለመዱ ነበሩ።

የትምህርት ሚኒስቴር በእያንዳንዱ የአስተዳደር ቦርድ ውስጥ በሥራ ላይ ያለ መምህር እንዲሾም አጥብቆ የጠየቀበት አንዱ ምክንያት ይህ ነበር። የጥናት ፈቃድ የጠየቀው መምህር በቦርዱ ስብሰባ ላይ የሚቀመጠው ያው መምህር መሆኑን ሊቀ መንበሩ እንዳልተገነዘበ እገምታለሁ!

ርዕሰ መምህሩ ከዚህ የተሻለ አሳብ ስላለው ብዙ እንዳልከፋ ነገረኝ። «ጋሬዝ፣ የመካከለኛ ደረጃ ክፍል ርዕሰ መምህር እየፈለግሁ ነው፤ ለዚያ ቦታ አንተ የምትሆን ይመስለኛል፤ ወደ ዩኒቨርሲቲ መመለስህ ግን ያንን ዕድል አደጋ ላይ ሊጥለው ይችላል።»

ነገሮች እጅግ አስደሳች እየሆኑ ነበር! ውሳኔዎች መወሰን ነበረባቸው፤ እኔ ግን የትኞቹን ውሳኔዎች እንደምወስን እርግጠኛ አልነበርሁም። ለማስተርስ ዲግሪ ትምህርት እንዲለቁኝ የአስተዳደር ቦርዱን ልጫን ይሆን? ወይስ ያንን ጥያቄ ትቼ ርዕሰ መምህሩ አሳቡን ተግባራዊ እንደሚያደርግ ልታመን? በእርግጥ ፊዚክስ ማስተማርን ትቼ ወደ አስተዳደራዊ ሥራ መሄድ እፈልግ ነበርን? ከዚህ ሁሉ ጋር ደግሞ የመምህራን ማኅበሩን፣ ሕገ ደንቡንና ከአስተዳደር ቦርዱ ጋር ያለውን ግንኙነት የማደራጀት ተጨማሪ ሥራ ነበር።

እኔና አን ስለ አማራጮቹ ተወያየን፤ ጸለይንም፤ ነገር ግን ግልጽ አቅጣጫ አላየንም። ጌታ እየሆነ ባለው ነገር ሁሉ ውስጥ ቀድሞውኑ በንቃት እየሠራ እንደ ነበር ብዙም አልተረዳንም ነበር። እንደ ገናም፣ የጥናት ፈቃዴ በመከልከሉ የተሰማኝ ተስፋ መቍረጥ ከጊዜ በኋላ ለሚበልጥና ለሚሻል ነገር የእርሱ ቀጠሮ ሆኖ ይታይ ነበር።