ወጣት ሆይ፣ ወደ ፊት ሂድ!

በስዋንሲ፣ በብሪንሚል በሚገኘው ውብ ካምፓስ ያሳለፍኋቸው አራት ዓመታት እጅግ የሚክሱ ነበሩ። ወደ ዩኒቨርሲቲ የገባሁት ሒሳብ ለማጥናት ቢሆንም፣ በሁለተኛው ዓመቴ ለፊዚክስ ያለኝ ፍላጎት እያደገ ስለ መጣ ወደ ፊዚክስ ትምህርት ክፍል ተዛወርሁ። (ወደ ኋላ መለስ ብሎ ሲታይ ይህም የጌታ አመራር እንደ ነበር ይታያል።) መጀመሪያ ወደ በርሚንግሃም ለመሄድ አስቤ ነበር፤ ያ ዩኒቨርሲቲ በሒሳብ ትምህርት ክፍሉ የታወቀ ነበርና። አሁን ግን በፊዚክስ ትምህርት ክፍሉ በታወቀ ኮሌጅ፣ በስዋንሲ፣ ፊዚክስ እያጠናሁ ነበር! ማንም ከጠበቀው በላይ የተሻለ የፊዚክስ ዲግሪ አገኘሁ፤ በመጨረሻው ዓመቴም የትምህርት ዲፕሎማ አገኘሁ። ዩኒቨርሲቲውን ስለቅቅ የመጀመሪያ ሥራዬን በአንድ አዲስ የሁለተኛ ደረጃ ትምህርት ቤት የፊዚክስ ትምህርት ክፍል ኃላፊ ሆኜ በማስተማር ጀመርሁ።

የኢቫንስ ቤተሰብ ቤት እንደ ቤተሰቡ አባል የምታይበት ልዩ ስፍራ ሆነ፤ በእርግጥም እስከ ዛሬ ድረስ ቤተሰቦቼ ናቸው። በአንድ ቤተ ክርስቲያን እንካፈል ነበር፤ እኔም ሜሪ ኢቫንስ ፒያኖ ተጫዋች፣ ኦብሪ ኢቫንስ ደግሞ የመዝሙር መጻሕፍት ጠባቂ የነበሩበትን የስዋንሲ የወንጌል የወንዶች መዘምራን ቡድን ተቀላቀልሁ። ሜሪ በደንብ መብላቴን ታረጋግጥ ነበር፤ ባለቤቷ ኦብሪ ደግሞ ያልተማረ ሰው ቢሆንም በዘመናት ሁሉ ከእኔ ጋር የቆዩ ብዙ የማስተዋል ዕንቍዎችን ሰጠኝ።

አንድ ጊዜ በቤተ ክርስቲያኒቱ ወጣቶች መካከል የሚታየው የቅንዓት ጉድለት ጥቂት አበሳጭቶኝ በነበረ ጊዜ ገለል አድርጎ ወሰደኝና እንዲህ አለኝ፦ «ልጄ ሆይ፣ አስታውስ፤ ርቀው የሚከተሉ ሰዎች አሁንም ጌታን ማየት ይችላሉ፤ ከዓለም ብርሃን አንድ እርምጃ ቀድመው የሚሄዱ ግን ከእንግዲህ ሊያዩት አይችሉም። በገዛ ጥላቸው ውስጥ ሲመላለሱ ራሳቸውን ያገኙታል።»

ራስል በዩኒቨርሲቲ የብረታ ብረት ሳይንስ አጠና፤ በኋላም በዚያው ተቋም ከፍተኛ ፕሮፌሰር ሆነ። ጎበዝ ተማሪ ነበር፤ በኑክሌር ፊዚክስ የክብር ትምህርቶቼን ለመወጣት ስታገል ታላቅ ረዳቴም ነበር።

ዶን ኢቫንስ ወደ መጽሐፍ ቅዱስ ኮሌጅ ሄደ፤ ለጥቂት ዓመታት በመጋቢነት አገለገለ፤ ከዚያም ፍልስፍና ለማጥናት ወደ ስዋንሲ ዩኒቨርሲቲ ኮሌጅ ገባ። አሁን በኒው ዚላንድ በዱኔዲን ፕሮፌሰር ሆኖ ይኖራል፤ በሕክምና ሥነ ምግባር ዘርፍም በዓለም ቀዳሚ ከሆኑት ምሁራን አንዱ ነው። በምሁራን ክበቦችም ሆነ በካሪዝማቲክ መታደስ እንቅስቃሴ ተናጋሪነት በብዙ ስፍራዎች ተጉዟል።

እኔ በምካፈልበት ቤተ ክርስቲያን ትካፈል የነበረችውን ጸሐፊ አንን ያገኘኋት በስዋንሲ በነበሩት በእነዚያ ድንቅ ዓመታት ነበር። አባቷ ኖርዌያዊ ሲሆኑ ጤንነታቸው ለብዙ ዓመታት ደካማ ቢሆንም ታማኝ የወንጌል አገልጋይ ነበሩ። ስለ እግዚአብሔር ጥልቅ ነገሮች ብዙ ማስተዋል ሰጡኝ፤ የሰጡኝን መንፈሳዊ መጻሕፍትም እስከ አሁን እንደ ውድ ሀብት እይዛቸዋለሁ። እናቷ ያደገችው በ1904 የዌልስ መነቃቃት በፈነዳበት ጊዜ ኢቫን ሮበርትስ የወጣቶች መሪ በነበረበት ቤተ ክርስቲያን ውስጥ ነበር።

የዚያን ዘመን ብዙ «ቅዱሳን» ታውቅ ነበር፤ በኋላም የ«ሪስ ሃውልስ የጸሎት ቡድን» አባል ነበረች። እንዲህ ያለ እግዚአብሔርን የሚፈራ ቅርስ ስላላት አን እኔ እያደነቅሁት የመጣሁትን ጥልቅ ክርስቲያናዊ ባሕርይ ማሳየቷ ብዙም አያስደንቅም።

በምረቃዬ ቀን ተጫጨን፤ ከአንድ ዓመት በኋላም የመምህርነት ዲፕሎማ ትምህርቴን ስጨርስ ተጋባን። በኬንፊግ ኮምፕሪሄንሲቭ ትምህርት ቤት ማስተማር ከመጀመሬ በፊት በጊዜው ወደ መጀመሪያው ቤታችን ገባን። ያንን ቦታ እንዴት እንዳገኘሁት ፈጽሞ አልገባኝም — ፈልጌው የማላውቀው ዕድል ስለ ነበር የጌታ ሌላ ቀጠሮ መሆን አለበት።

አንድ ቀን በዩኒቨርሲቲ ከፕሮፌሰሮቼ አንዱ ቀርቦ ሥራ አግኝቼ እንደ ሆነ ጠየቀኝ። ዩኒቨርሲቲው ከማለቁ በፊት ገና ጊዜ ስለ ነበር ሳልጨነቅ «ገና አላገኘሁም» ብዬ መለስሁ። ከዚያም ጽፎ ወደ ሰጠኝ አድራሻ እንድጽፍና ስለሚገኙ የሥራ ቦታዎች እንድጠይቅ አሳብ አቀረበ። ብዙም ሳይቆይ በኬንፊግ ላለው ቦታ ለቃለ መጠይቅ ተጋበዝሁ። እኔ እስከማውቀው ድረስ ቃለ መጠይቅ የተደረገለት እኔ ብቻ ነበርሁ፤ ከዚያም ፊዚክስን እስከ ከፍተኛ ደረጃ ድረስ የማስተማሩ ሥራ ተሰጠኝ።

በዚያ የመጀመሪያ ትምህርት ቤት በሦስተኛው ዓመቴ በጀርመን ከብሪታንያ ኃይሎች ጋር እንዳስተምር ተጋበዝሁ። በራይን የሰፈረው የብሪታንያ ጦር ሠራዊት የወታደሮች ልጆች የሚማሩባቸው በርካታ ትምህርት ቤቶች ነበሩት፤ እኔም በዊንዘር የወንዶች ትምህርት ቤት ማስተማር ነበረብኝ፤ ይህ ትምህርት ቤት እንደ እኅቱ የሴቶች ትምህርት ቤት ሁሉ ከ500 በላይ የሁለተኛ ደረጃ ተማሪዎች የሚኖሩበት ነበር።

«የብሔራዊ ውትድርና አገልግሎትን» ሆነ በተለምዶ የሚጠየቀውን የአምስት ዓመት የማስተማር ልምድ ሳላሟላ፣ በዚያን ጊዜ የመከላከያ ሚኒስቴር ከቀጠራቸው መምህራን ሁሉ በዕድሜ ትንሹ እኔ ነበርሁ።

በራይን ከሰፈረው የብሪታንያ ጦር ሠራዊት ጋር ለማስተማር መጀመሪያ በማመንታት ስጠይቅ እነዚያን መስፈርቶች አላወቅሁም ነበር፤ ስለዚህ የመጀመሪያ እምቢታቸውን በተቀበልሁ ጊዜ ጥቂት ቅር ተሰኘሁ። እንደዚህ ያለውን የማስተማር ሥራ አሳብ ፈጽሞ ትቼው ሳለሁ፣ ከጥቂት ወራት በኋላ በምዕራብ ጀርመን በሃም የማስተማር ክፍት ቦታ እንዳለ የሚገልጽ ሌላ ደብዳቤ ደረሰኝ። እንደሚመስለው በዚያ ትምህርት ቤት የነበረው የፊዚክስ መምህር ወደ ምክትል ርዕሰ መምህርነት ከፍ ብሎ ነበር፤ እኔም በመዝገባቸው ላይ ያለሁ ተገቢ ብቃት ያለኝ ብቸኛ የፊዚክስ መምህር ነበርሁ። እግዚአብሔር የጦር ሠራዊት ደንቦችንም እንኳ ሊሽር ይችላል!

እነዚያ ዓመታት ለእኔና ለአን መልካም ዓመታት ነበሩ። እግዚአብሔር ቀድሞውኑ በዌልስ በተወለደችው በአንዲት ሴት ልጃችን በኮሪን ባርኮን ነበር፤ አሁን ደግሞ ቤተሰባችንን የሚያሟሉ ሁለት ተጨማሪ ሴቶች ልጆችን — አንድሪያንና ሊኔትን — ሰጠን። ብዙ ጀርመናውያን ወዳጆች አፈራን፤ በሌላ ባህል ውስጥ መኖርንም ወደድነው።

እሑድ እሑድ የድኅነት ሠራዊት የምሽት አገልግሎት ወደሚያካሂድበት በአጎራባች ወዳለው የካናዳ ጦር ሠፈር እንጓዝ ነበር። አብረን ኅብረት ስናደርግ፣ የአገሬው ተወላጅ ሕንዳውያንና የኢኑይት፣ የ«ማውንቲዎች» (የካናዳ ፈረሰኛ ፖሊሶች) እና የአዳኞች፣ የድቦችና የንስሮች፣ የፒዛና የሳልሞን ዓሣ ምድር ከሆነችው አገር ለመጡት ለእነዚህ እንግዳ ተቀባይ ሰዎች ልቤ ሞቀ። በዚህም ሁኔታ፣ በእነርሱ ማበረታቻ፣ በካናዳ የማስተማርን ዕድል መከታተል ጀመርን።

ብዙም ሳይቆይ በካናዳ፣ በቶሮንቶ በሚገኝ አንድ የታወቀ የቴክኒክ ኮሌጅ ፊዚክስ ለማስተማር ተቀባይነት እንዳገኘሁ የሚያሳውቅ ደብዳቤ ደረሰኝ። ብቃቴን ለማረጋገጥ የዲግሪና የዲፕሎማ የምስክር ወረቀቶቼን ቅጂዎች መላክ ነበረብኝ፤ እነርሱም ወደ ታላቂቱ የሰሜን ምድር ስለሚደረገው የበረራ ዝግጅት ያሳውቁኛል።

ሰነዶቻችን በቶሮንቶ ወደሚገኘው ወደ ብሉር ጎዳና ተላኩ፤ ብዙም ሳይቆይ «የ‹ታይፕ ኤ› ልዩ ባለሙያ ዲፕሎማ» ለማግኘት ብቁ ልሆን እንደምችል የሚገልጽ መልስ ደረሰኝ። ጥልቅ የሕክምና ምርመራዎች ተከተሉ፤ ቪዛዎች ተገኙ፤ ለትምህርት ቤቱ መልቀቂያዬን አስገባሁ፤ እኛም ጠበቅን… ሁለተኛው ደብዳቤ ግን ያን ያህል ደስ የሚያሰኝ አልነበረም! ስሕተት ተፈጽሞ ነበር! የኮሌጁ ርዕሰ መምህር ቀድሞውኑ እኔን መቀበሉን ሳያውቅ የአካባቢው የትምህርት ዳይሬክተር ቦታዬን እንዲይዝ ሌላ መምህር ሾሞ ነበር! ለሁለት ክፍት ቦታዎች ሦስት መምህራን ተሹመው ነበር፤ እኔም ከአገር ውጭ የመጣሁ ስለ ሆንሁ ቅር የሚሰኘው እኔ ሆንሁ።

የቅርብ ጊዜውን ዜና ለወዳጆቻችን ስንነግር ኀፍረቱ ታላቅ ነበር። ስለ እግዚአብሔር ቸርነት እንዲህ ያለ ደማቅ ምስክርነት ሰጥተን ነበር፤ አሁን ግን ከንቱ ቃል ብቻ የነበረ መሰለ። ለአዲሱ የትምህርት ዓመት ሥራ አልነበረንም፤ ቢያንስ ለአንድ የትምህርት ወቅት ሌላ ሥራ ለመፈለግ ወደ ዌልስ መመለስ ነበረብን። ጸሎታችን በጥያቄ የተሞላ ነበር፤ ጌታ የሚያደርገውን በትክክል እንደሚያውቅ አልተገነዘብንም ነበርና!

ከሦስት ቀን በኋላ ሌላ ደብዳቤ መጣ። ይህ ከብሪታንያ ጦር ሠራዊት ነበር፤ በመልቀቄ እንዳዘኑ የሚገልጽና እንደ ገና እንዳስብበት የሚጋብዝ ነበር። እንዲህ ብለው ጻፉ፦ «በሆንግ ኮንግ ለፊዚክስ መምህርነት ሌላ ክፍት ቦታ አለን። እባክህ ያንን ቦታ አስብበትና ውሳኔህን በተቻለ ፍጥነት አሳውቀን።»

የቅርብ ወዳጆቻችንም ወደ ሆንግ ኮንግ ይሄዱ ስለ ነበር ውሳኔው ቀላል ሆነ። ጌታ ከእኛ ጥቂት እርምጃዎች ቀድሞ እንደ ነበር እንደ ገና ልናውቅ ነበር።