ቶሮንቶ ዕብራይስጥ አካዳሚ

በዕብራይስጥ አካዳሚ ያሳለፍኋቸው ሁለት ዓመታት እጅግ አስደሳች ነበሩ፤ በዚያ ያሉት ተማሪዎች ከፍተኛ ተነሣሽነት የነበራቸውና በትምህርታቸው ጠንክረው የሚሠሩ ነበሩና። ከትምህርት ክፍሌ ሥራ በተጨማሪ የትምህርት ቤቱን የእግር ኳስ ቡድን አሠልጥኜ በአካባቢው ሊግ የመጀመሪያውን ስኬታማ የውድድር ዘመን እንዲያሳልፍ አደረግሁ። በማስተማር ዘመኔ ለመጀመሪያ ጊዜ ጥሩ ደመወዝ እያገኘሁ ነበር (ምናልባትም በመላው ቶሮንቶ ከፍተኛው ሳይሆን አይቀርም፤ የዕብራይስጥ አካዳሚው የመንግሥት ትምህርት ቤቶች የሚከፍሉትን «ቢያንስ» ያህል ለመምህራኑ ለመክፈል ቆርጦ ነበርና)። ሴቶች ልጆቻችን ስለምንገዛው አዲስ ቤት ያወሩ ነበር — የመዋኛ ገንዳ ያለው መሆኑ ደግሞ የታወቀ ነው! አንድ ነገር ብቻ ጎደለ! በሌሎቹ ትምህርት ቤቶቼ ሁሉ ቅድሚያውን ወስጄ ለተማሪዎቼ ስለ እምነቴ ለመናገር ነፃነት ነበረኝ። በእያንዳንዳቸው ታዋቂ ተናጋሪዎች የሚመጡባቸው ወይም እኔ ውይይቱን የምመራባቸው የክርስቲያን ኅብረት ወይም ተመሳሳይ ስብሰባዎችን ለተማሪዎቹ መጀመር ችዬ ነበር። በዕብራይስጥ አካዳሚ ግን ይህ የሚቻል እንዳልሆነ የታወቀ ነው።

ስለዚህ ቤተሰቤ የሚካፈልባትን ቤተ ክርስቲያን የአውራጃ የበላይ ተቈጣጣሪ ቀርቤ እንደ ምእመን የመስበክ ዕድል ጠየቅሁ። በካናዳ ምእመናን መስበካቸው የተለመደ እንዳልሆነ ነገረኝ፤ ሆኖም በዌልስ የነበረኝን የስብከት ልምድ ከሰማ በኋላ ወደ አገልግሎት ለመግባት ለምን እንደማላስብ ጠየቀኝ።

መጋቢ ከመሆን የበለጠ የምወደው ነገር እንደሌለ፣ ነገር ግን የሥነ መለኮት ትምህርት ቤት ገብቼ ሦስት ዓመት ለማሳለፍ አቅም እንደሌለኝ ነገርሁት፤ ከዚህም በላይ የሙሉ ጊዜ መጋቢ ለመሆን ማስተማርን ከመተዌ በፊት ከጌታ ግልጽ ጥሪ በእርግጥ ሊኖረኝ እንደሚገባ ገለጽሁለት። (ከእግዚአብሔር የሆነ ቅባት ምንም ምልክት የማያሳዩ እጅግ ብዙ ሰዎች በአገልግሎት ውስጥ እንዳሉ አገኛለሁ፤ ጥሩ ሰዎች ናቸው፤ ነገር ግን መጋቢ እንዲሆኑ አልተጠሩም።) እርሱም በአካባቢው ቤተ ክርስቲያን ሽማግሌ ሆኜ የምሠራውን ሥራ ያውቅ ስለ ነበር የሥነ መለኮት ትምህርት ቤት እንድገባ እንደማይጠይቀኝ መለሰልኝ። «ጥሪውን» በተመለከተ ደግሞ «የወንድሞችን ምስክርነት» እንደሚሻ ተናገረ።

ከጥቂት ሳምንታት በኋላ መጋቢያችን ተዘዋዋሪ የዝማሬ አገልግሎት ለመጀመር ሥራቸውን ለቀቁ፤ እኔም የስብከት ልምድ ያለኝ ብቸኛ ሽማግሌ ስለ ነበርሁ በ«ሽኝታቸው» ላይ እንድናገር ተጋበዝሁ። ከአገልግሎቱ በኋላ ሁለቱም የቀድሞ መጋቢዎች የሆኑ ሁለት የጉባኤው ሰዎች (ከአውራጃው የበላይ ተቈጣጣሪ ጋር ስለ ነበረኝ ስብሰባ ሳያውቁ) ቀርበው «አንተ ማስተማር የለብህም፤ በአገልግሎት ውስጥ መሆን አለብህ!» አሉኝ።

ይህ «የወንድሞች ምስክርነት» ይሆን? ያ በሕይወቴ ፍጹም አዲስ አቅጣጫ ከፈተ። ውጤቱም፣ በቶሮንቶ ዕብራይስጥ አካዳሚ ለሁለት ዓመታት ካስተማርሁ በኋላ በክርስቲያን ኤንድ ሚሽነሪ አላያንስ መጋቢ ልሆን ስለ ነበር ትምህርት ቤቱን ለመልቀቅ ማሳወቂያ መስጠቴ ነበር፤ ያ ግን ሌላ ታሪክ ነው።

የመጨረሻውን የትምህርት ወቅት በእስራኤል በአንድ ኪቡትዝ ለሚያሳልፉት ለ13ኛ ክፍል ተማሪዎቻችን የጸደይ ወቅት ትምህርት ሊያበቃ አራት ሳምንት ቀርቶት ነበር። በመምህራን ክፍል ውስጥ ሳለሁ አሪ ባርኪ ወደ እኔ ቀረበ።

አሪ የኢየሩሳሌም ዩኒቨርሲቲ ምሩቅ ሲሆን በቶሮንቶ የነበረው የዕብራይስጥ ጥናቶችን ለማስተማር ነበር፤ ይህም ስለ ንጽጽር ሃይማኖቶች የተወሰነ ትምህርትን ይጨምር ነበር።

«ጋሬዝ፣» አለ፤ «ስለ ክርስትና ትምህርት ልሰጥ ነው፤ አንተ ከእኔ ይልቅ ስለ ክርስትና እጅግ የበለጠ እያወቅህ እኔ ይህን ማድረጌ ሞኝነት ይሆናል ብዬ አሰብሁ! ወደ ክፍለ ጊዜዬ አብረኸኝ ለመግባት ፈቃደኛ ትሆናለህ?»

ደስ እንደሚለኝ መናገሬ የታወቀ ነው፤ ስለዚህ በማግሥቱ ጠዋት ከእርሱ ጋር ወደ አንድ የ13ኛ ክፍል የ«ሃይማኖቶች» ትምህርት ሄድሁ። ዕድሜያቸው ከ17 እስከ 19 የሆነው 25 ተማሪዎች ስንገባ ብዙም ፍላጎት አላሳዩም። ለነገሩ እኔ ማን እንደ ሆንሁ ያውቁ ነበር — በየቀኑ በፊዚክስ ቤተ ሙከራ ያዩኝ ነበርና። አሪ በዕብራይስጥ ተናገረና ከዚያም «አቶ ኢቫንስ አሁን ስለ ክርስትና ትምህርት ይሰጣችኋል!» አለ።

ምራቄን ዋጥሁ! በዚያ የምገኘው ጥያቄዎችን የሚመልስ የመረጃ ምንጭ ሆኜ ብቻ መስሎኝ ነበር። ትምህርቱን እኔ እሰጣለሁ ብዬ አልጠበቅሁም ነበር።

«ምናልባት ክርስትና ምን እንዳልሆነ ልንገራችሁ፤» ብዬ ጀመርሁ፤ የምናገረውን ለማሰብ በጭንቀት እየታገልሁ ነበር። «ክርስትና የሃይማኖት ቡድኖች ጦርነት ያለባት ሰሜን አየርላንድ አይደለም። ደም መፋሰስ የሞላበት የመስቀል ጦርነቶችም አይደለም። የብዙውን የምዕራቡ ዓለም ፖለቲካም አይደለም። ይልቁንም ኢየሱስ የሰዎችን ኃጢአት ሊያስወግድ የመጣ የእግዚአብሔር መሲሕ መሆኑን መቀበል ነው። ክርስቲያን እንዴት እንደ ሆንሁ ልንገራችሁ። ከዚያም አይሁዳዊ እንዴት እንደ ሆንሁ እነግራችኋለሁ!» ሁሉም ነቃ! «ከዚያም ማንኛውንም ጥያቄ እመልሳለሁ።»

ምስክርነቴን በአጭሩ ሰጠሁ (በምዕራፍ ሁለት እንደ ተጻፈው)፤ ከዚያም ይህ እንዴት የእግዚአብሔር ልጅ እንዳደረገኝ አስተማርኋቸው። የአብርሃም እምነት በእግዚአብሔር ፊት ጻድቅና «የምእመናን አባት» እንዳደረገው ሁሉ (ዘፍጥረት 15)፣ እኔም አሁን በእምነት ወደ ቤተሰቡ «በልጅነት ተቀብዬ» የአይሁድን አምላክ እንደማመልክ ነገርኋቸው። ለአሥር ደቂቃ ያህል ከተናገርሁ በኋላ «ጥያቄ አላችሁ?» ብዬ ጠየቅሁ።

በክፍሉ ያለ እጅ ሁሉ ወደ ላይ ተወነጨፈ። ከክፍሉ በስተ ኋላ በቀኝ ጥግ ከነበረ አንድ ልጅ እንደ ጀመርሁ አስታውሳለሁ። መሲሑ በምድር ላይ ሰላምን እንደሚያመጣ ሁሉም እያወቀ፣ ኢየሱስ ከመጣ በኋላ ግን ጦርነቶች ብቻ ተከትለው ሳሉ፣ ኢየሱስ እንዴት መሲሕ ሊሆን እንደሚችል ጠየቀ። ድል ስለሚነሣው መሲሕ ብቻ ሳይሆን መከራ ስለሚቀበለው መሲሕም የሚናገሩትን የብሉይ ኪዳን ትንቢቶች በመጠቈም መለስሁለት። ጦርነቶች የሚመጡት ሰው እርሱ በቀራንዮ ያቀረበውን መሥዋዕት ኃይል ለመቀበል እምቢ በማለቱ ነው፤ ይሁን እንጂ እርሱ የእርሱን «በምድር ሰላም» ለማቋቋም በዚህ ጊዜ እንደ ንጉሥ ሆኖ ይመለሳል።

ብዙ ጥያቄዎች ተከተሉ፤ ተማሪዎቹ ጥያቄያቸው እንዲሰማ እጃቸውን እያወዛወዙ ይጮኹ ነበር።

«እባክዎ መምህር! እባክዎ መምህር! ቀጥሎ እኔ ነኝ መምህር!»

አንዲት ልጃገረድ «መሲሑ በእኛ ዕድሜ ዘመን የሚመጣ ይመስልዎታል?» ብላ ጠየቀች። አዎ ብዬ መለስሁ፤ በመጣ ጊዜም አብረን እንድንሆን ተስፋ እንደማደርግ ጨመርሁ። «ለምን?» ብላ ስትጠይቀኝ «ያን ጊዜ በእጆቹና በእግሮቹ ያለውን የችንካር ምልክት ላሳይሽ እችላለሁና!» ብዬ መለስሁ።

ትምህርቱ በዚህ ሁኔታ ለ40 ደቂቃ ቀጠለ፤ ከዚያም ወደ ቀጣዩ ክፍለ ጊዜ የመሄጃው ሰዓት እንደ ደረሰ የትምህርት ቤቱ ደወል አመለከተ፤ ሆኖም እነዚህ ተማሪዎች ሊጠይቋቸው የሚጓጉ ብዙ ያልተመለሱ ጥያቄዎች ስለ ነበሯቸው ሊለቁኝ ፈቃደኞች አልነበሩም። ብዙም ሳይቆይ እጅግ ብዙ ጊዜ እንዳለፈና ወደ ቀጣዩ ክፍለ ጊዜ መሄዴ ፋይዳ እንደሌለው አስተዋልሁ። በዚህ ጊዜ ተማሪዎቹ ከፊዚክስ ቤተ ሙከራ ወጥተው በቤተ መጻሕፍቱ ለማጥናት ተቀምጠው ይሆናል። አንድ መምህር ለክፍለ ጊዜው በሰዓቱ ካልደረሰ የተለመደው አሠራር ይህ ነበር። ስለዚህ ሌላ ክፍለ ጊዜ እስኪያልፍ ድረስ ጥያቄዎቹን መመለሴን ቀጠልሁ። በዚህ ጊዜ መሄድ ግድ ሆነብኝ፤ ይህም ግን መምህራቸው ከፈለገ እንደ ገና እንደምመጣ ቃል ከገባሁ በኋላ ነበር።

በዚያ ምሽት ወደ ቤቴ ስነዳ ከእነዚህ ልዩ ወጣቶች ጋር ስለ እምነቴ የመናገር ዕድል በማግኘቴ እጅግ ተደስቼ ነበር። ይህ ይቻላል ብዬ ፈጽሞ አልሜ አላውቅም ነበር፤ በእግዚአብሔር ድንቅ መንገዶችም ከመደነቅ በቀር ምንም ማድረግ አልቻልሁም። ጌታ ዘሩን ፈጽሞ በከንቱ እንደማይዘራ በመተማመን የተናገርኋቸው ቃላት በእነዚያ ተማሪዎች ሕይወት ውስጥ ፍሬ እንዲያፈሩ ጸለይሁ።

በማግሥቱ ጠዋት በትምህርት ቤቱ የደብዳቤ ሣጥኔ ውስጥ አንድ ማስታወሻ ይጠብቀኝ ነበር። እንዲህ ይላል፦ «አቶ ኢቫንስ፣ እባክህ ዛሬ ጠዋት ከጠዋቱ 4 ሰዓት ቢሮዬ መጥተህ አግኘኝ። — ረቢ ኤስ» ልቤ ደነገጠ። ዋናው ረቢ ከ13ኛ ክፍል ተማሪዎች ጋር ስላሳለፍሁት ጊዜ እንደ ሰማና ልገሠጽ እንደ ሆነ ግልጽ ነበር። ምናልባትም ትምህርት ቤቱን እንድለቅ እጠየቅ ይሆናል!

እጅግ ተጋላጭነት ተሰማኝ፤ ነገር ግን ይህ ሊሆን እንደሚችል በቃለ መጠይቁ ላይ እንዳስጠነቀቅኋቸው በማስታወስ ራሴን አጽናናሁ። ግድግዳው መስታወት ወደ ሆነው ቢሮ ስቀርብ አሪ ባርኪ ውስጥ ተቀምጦ ከረቢው ጋር ሲነጋገር አየሁ።

«አሃ፣ ጋሬዝ፣ ግባ!» አለ ረቢ ኤስ። «እኔና አሪ ትናንት ከ13ኛ ክፍል ተማሪዎች ጋር ስለ ሰጠኸው ትምህርት እየተወያየን ነበር።» ቀጠለናም፦ «እንደምታውቀው ይህ ትምህርት ቤት የተመሠረተው ለአይሁድ ልጆቻችን የላቀ ትምህርት ለመስጠት ነው፤ የዚያም እጅግ አስፈላጊ ክፍል ለአይሁድ ነገር ሁሉ ፍቅርን በውስጣቸው መትከል ነው፤ ስለዚህ ታሪካችንን፣ ቅኔያችንን፣ ባህላችንንና ሃይማኖታችንን እናስተምራቸዋለን። እዚህ ለበርካታ ዓመታት አስተምሬአለሁ፤ ከታላላቅ ቅሬታዎቼ አንዱ ወደ እውነተኛ የእግዚአብሔር እምነት የሚመጡት እጅግ ጥቂቶች መሆናቸው እንደ ሆነ መናዘዝ አለብኝ፤ ይሁን እንጂ ዛሬ ጠዋት ወደ ክፍሌ ስገባ ሁሉም ስለ እምነትና ስለ እግዚአብሔር ለመነጋገር ሲፈልጉ አገኘኋቸው። ጋሬዝ፣ እንዲህ ተደስተው አይቻቸው አላውቅም! ብቸኛው ችግር ሁሉም ነገር በጭንቅላታቸው እንጂ በልባቸው አለመሆኑ ነው። እንዲህ ያለውን እምነት ወደ ልባቸው እንድናስገባ ልትረዳን ትችል እንደ ሆነ እያሰብን ነበር!»

«እኔ የማውቀው ብቸኛ መንገድ ኢየሱስ መሲሕ መሆኑን መቀበል ነው፤» አልሁ፤ ራሴ መዞር ጀምሮ ነበር።

«ያንን እረዳለሁ፤» አለ ረቢው፤ «ነገር ግን በዚህ ጉዳይ ላይ እንደማንስማማ ተቀብለን ማለፍ እንዳለብን ታውቃለህ፤ ሆኖም… ተማሪዎቻችንን ለማስተማር ወደ ሌሎች ተጨማሪ ክፍሎች ለመግባት ፈቃደኛ ትሆን እንደ ሆነ እያሰብን ነበር።

የእምነት ሰው የሆነ የሳይንስ ሰው በማግኘታቸው ተደንቀዋል። በተለይም እንደ አንተ መጻሕፍቶቻቸውን የሚያውቅ ሰው። እባክህ ትመጣለህ?»

ፈቃደኛ መሆኔን ወዲያውኑ ገለጽሁ፤ በማግሥቱም የ13ኛ ክፍል ትምህርት እንድካፈል ዝግጅት ተደረገ። «ስለዚህ ጉዳይ ልጸልይበት» ብዬ «መንፈሳዊ» መስዬ መናገር እችል እንደ ነበር እገምታለሁ፤ ጌታ ግን ስለ ችኮላዬ ይቅር ሳይለኝ አይቀርም!