ማመልከቻው

በቶሮንቶ ፈረንሳይኛ ትምህርት ቤት ያሳለፍሁት ሁለተኛ ዓመቴ መልካም ነበር። ደመወዜ ወደ 17,000 ዶላር ከፍ አለ፤ በአዲስ አገር የመጀመሪያው ዓመት ዋና ዋና ወጪዎች ስላለፉ ይህ አሁን ለኑሮ በቂ ነበር። ይሁን እንጂ ከዚህ ጭማሪ ጋር በሒሳብና በፊዚክስ ተጨማሪ እገዛ ለሚያስፈልጋቸው ተማሪዎች ዝግጁ እንድሆን በሳምንት ሁለት ምሽቶች እስከ ምሽቱ 1 ሰዓት ድረስ በትምህርት ቤቱ እንድቆይ ይጠበቅብኝ ነበር። አሁን ደግሞ ለተማሪዎቹ ከመደበኛ ትምህርት ውጭ የሆኑትን እንቅስቃሴዎች ሁሉ የማዘጋጀት ኃላፊነት ነበረብኝ፤ እነዚህም የሙዚቃና የዳንስ ውድድሮችን፣ የቼዝ ውድድሮችን፣ የመኪና ራሊ ውድድሮችንና የመሳሰሉትን ይጨምሩ ነበር።

የትምህርት ዓመቱ ወደ ማብቂያው ሲቃረብ በካናዳ የመንግሥት ትምህርት ቤቶች ሥርዓት ውስጥ ምን ዓይነት የማስተማር ቦታዎች ማስታወቂያ እንደ ወጣላቸው ለማየት ጋዜጦችን ማንበብ ጀመርሁ። ትኩረቴን የሳቡ ሁለት ነበሩ፦ አፐር ካናዳ ኮሌጅና ቶሮንቶ ዕብራይስጥ አካዳሚ። አፐር ካናዳ ኮሌጅ በቶሮንቶ መሀል የሚገኝ፣ በትምህርትም በስፖርትም የላቀ የስኬት ታሪክ ያለው ታሪካዊ የግል ትምህርት ቤት ነው፤ ከፍተኛ የፊዚክስ መምህር ይፈልጉ ነበር። ቶሮንቶ ዕብራይስጥ አካዳሚ ደግሞ የሳይንስ ትምህርት ክፍል ኃላፊ የሚሆን ሰው ይፈልግ ነበር፤ ይህ ቦታ ግን የታይፕ ኤ ልዩ ባለሙያ የምስክር ወረቀት ይጠይቅ ነበር።

አንድ ሰው ለአዲስ የሥራ ቦታ ሲያመለክት ማስታወቂያ ለወጣባቸው ሁሉ ማመልከቱ አስፈላጊ ነው። በዚህ መንገድ ስምህ ይታወቃል፤ ብዙ ጊዜም ያልተሳካላቸው ዕጩዎች ስምና ብቃት ለሌሎች ትምህርት ቤቶች ይተላለፋል።

ስለዚህ ለሁለቱም ትምህርት ቤቶች ማመልከቻዬን ላክሁ። በአፐር ካናዳ ኮሌጅ ለነበረው ቦታ በመጨረሻዎቹ ዕጩዎች ዝርዝር ውስጥ ገባሁ፤ ይህም አስደሰተኝ፤ ነገር ግን በዕብራይስጥ አካዳሚም ለቃለ መጠይቅ ተጋበዝሁ። አይሁዳዊ አለመሆኔ ከማመልከቻዬ ግልጽ ስለ ነበር ይህ አስገረመኝ።

ቃለ መጠይቁ ከትምህርት ቤቱ ርዕሰ መምህርና ከዋናው ረቢያቸው ጋር በአንድ ሰኞ ቀን እንዲሆን ተወሰነ። ለአንድ ሰዓት ያህል ከጠየቁኝ በኋላ የምጠይቀው ጥያቄ እንዳለኝ ጠየቁኝ። በዚያን ጊዜ የምጠይቀው አልነበረኝም፤ ነገር ግን እንዲህ አልኋቸው፦ «አይሁዳዊ እንዳልሆንሁ ታውቃላችሁ አይደል? እንዲያውም ‹ዳግመኛ የተወለድሁ› ክርስቲያን ነኝ! በቤተ ሙከራዬ የማስተምረው ፊዚክስን ብቻ እንደ ሆነ እርግጥ ነው፤ ነገር ግን አንድ ተማሪ በአንዳንድ ጉዳዮች ላይ ያለኝን እምነት ቢጠይቀኝ ላለመመለስ ይከብደኛል።»

ሰዎቹ በማመልከቻዬ የተሳቡ ቢመስሉም፣ ያም ሆነ ይህ ቦታውን የማግኘት ተስፋ ስላልነበረኝ ይህን መናገሬ ምንም ጉዳት አያመጣም ብዬ አሰብሁ! ርዕሰ መምህሩ ጋሪ ዳይመንድ እንዲህ ብሎ መለሰ፦ «አዎ፣ እንረዳለን። ተማሪዎቻችን የሌላ እምነት ተከታይ በሆነ ሰው መፈተናቸው መልካም ሊሆን ይችላል ብለን እናስባለን!»

ከተማዋን አቋርጬ 20 ማይል ወደ ቤቴ ስነዳ በመደነቅ ተውጬ ነበር። በኦርቶዶክስ አይሁድ አካዳሚ ማስተማሬ በእርግጥ ይቻል ይሆን? የአን አባት ከአሜሪካ በየጊዜው ይደርሳቸው ከነበረው «የእስራኤል እረኛ» ከተሰኘ መጽሔት ጋር ካስተዋወቁኝ ጊዜ ጀምሮ የአይሁድን ሕዝብ ሁልጊዜ እወድ ነበር። «ዌልሳዊ ባልሆን ኖሮ አይሁዳዊ ሆኜ ብወለድ ደስ ይለኝ ነበር!» እል ነበር።

በቀጣዩ ዓርብ ቀትር ላይ ኪት ወደ ቢሮው ጠርቶኝ የዕብራይስጥ አካዳሚው በማመልከቻዬ እጅግ እንደ ተሳበና የትምህርት ማስረጃዎቼ እውነተኛ መሆናቸውን ለማረጋገጥ እንደ ደወለ ነገረኝ። በቶሮንቶ ስለ እኔ በእርግጥ የሚያውቀው ብቸኛ ሰው — በተለይም በሥራ ታሪኬ ማጠቃለያ ላይ የሰፈሩትን «የሠራተኞች ማኅበር ፕሬዚዳንት፤ የአስተዳደር ቦርድ አባል» የሚሉትን የመጨረሻዎቹን ሁለት ግቤቶች በተመለከተ — ራሱ ኪት መሆኑ ልብ የሚባል ይመስለኛል! በዚያ ምሽት የስልክ ጥሪ ደረሰኝ። በቶሮንቶ ዕብራይስጥ አካዳሚ ከሴፕቴምበር ጀምሮ በ33,000 ዶላር ደመወዝ ቦታውን እንድይዝ የሚጋብዘኝ አቶ ዳይመንድ ነበር! መቀበሌን አጉተምትሜ ገለጽሁ፤ ለጥቂት ደቂቃዎች አጠቃላይ ጨዋታ ካደረግን በኋላ ዜናውን ለመንገር ወዲያውኑ ወደ አን ደወልሁ!

ልባችን በደስታ ተጥለቀለቀ። ወደ ልቦናችን ስንመለስ ጌታን ስለ ድንቅ መንገዶቹ ማመስገን ጀመርን። ወደ ካናዳ በማምጣት ራሱን ለእኔ ያረጋግጥ ዘንድ ከረጅም ጊዜ በፊት በጀርመን ያንን በር የዘጋበት ምክንያት ይህ ይሆን? ታይቶ በማይታወቅ በአንድ ዓመት ጊዜ ውስጥ የታይፕ ኤ የምስክር ወረቀት አዘጋጅቶልኝ ነበር፤ አሁን ደግሞ ወደ ተመረጠው ሕዝቡ በር ከፈተልኝ! በብሪጅኤንድ በብሩወሪ ፊልድ አጠገብ ከመጸለይ በቀር ይህ እንዲገባኝ ምን አደረግሁ?

በኋላ እንደ ተረዳሁት በቶሮንቶ ዕብራይስጥ አካዳሚ ለዚያው ቦታ ሌሎች ሰባት ሰዎች አመልክተው ነበር፤ እያንዳንዳቸውም የልዩ ባለሙያ ዲፕሎማ ያላቸውና አይሁድ ነበሩ። እንዲያውም ሁለቱ ቀድሞውኑ በትምህርት ቤቱ የነበሩ ሲሆኑ ሁለቱም በሁለት የትምህርት ዓይነቶች ታይፕ ኤ ነበራቸው! በዕብራይስጥ ማኅበረሰብ ውስጥ ኑሮዬን ስለምድ አንዲና ማርቲ ሁለቱም የቅርብ ወዳጆቼ መሆናቸው የሚያስመሰግናቸው ነው።

በትምህርት ቤቱ 50 መምህራን ነበሩ፤ ከእነርሱም አይሁድ ያልሆንነው ሁለታችን ብቻ ነበርን፤ እነርሱ ግን የእነርሱ አካል መሆኔን እንዳውቅ ከወትሮው የተለየ ጥረት አደረጉ።