ስጦታዎች

በዌልስ የወጣቶችን አገልግሎት በምመራበት ወቅት ያጋጠመኝን የብስጭት ጊዜ በሚገባ አስታውሳለሁ።

ቁጥራችን አድጎ ስለ ነበር ከቤተ ክርስቲያኑ አጠገብ የነበረውን መጠጥ ቤት (የቢራ መሸጫ) ገዝተን የወጣቶች ማዕከል ለማድረግ እያሰብን ነበር። ለዚህ የሚያስፈልገው የገንዘብ ዋስትና ከቤተ ክርስቲያኑ መምጣት ስለ ነበረበት የምእመናን ጉባኤ ተጠራ። ከሁሉም የቤተ ክርስቲያኑ ክፍሎች የታየው ድጋፍ የሚያበረታታ ነበር። ከአባሎቻችን አንዱ የሕግ ባለሙያ ለመሆን እየተማረ ስለ ነበር የግዢው የሕግ ጉዳዮች በእጁ ተሰጡ። ሌላ አባል ደግሞ አነስተኛ የግንባታ ድርጅት ነበረው፤ ስለዚህ የሕንጻውን ደኅንነትና የእድሳት ፍላጎቶቹን የመፈተሽ ኃላፊነት ለእርሱ ተሰጠ። እነዚህን «ሹመቶች» ማንም አልተቃወመም — ግልጽ ነገሮች ተደርገው ተቆጠሩ።

ያ የጉባኤው ክፍል በአጥጋቢ ሁኔታ ተጠናቀቀ፤ ስለዚህ ፓስተሩ ሌላ ጉዳይ ለማንሣት አጋጣሚውን ተጠቀመበት። የሰንበት ትምህርት ቤቱ አስተማሪዎች ያስፈልጉት ነበር። ለታሰቡት ክፍት ቦታዎች በቂ በፈቃደኝነት የሚያገለግሉ ሰዎች እንደማይገኙ በግልጽ ሲታወቅ፣ ታዳጊዎቹ በድምፅ የተቀዱ ትምህርቶችን ሊያዳምጡ ይችላሉ የሚል ሐሳብ ቀረበ፤ በሙሉ ልብም ተቀባይነት አገኘ! እኔ ግን ይህን አጥብቄ ተቃወምሁ፤ ምክንያቱም ከማስተማር ልምዴ እንደማውቀው የምንማረው ነገር ጥቂቱ ክፍል ብቻ ነው በ«ጆሮ በር» በኩል ወደ ማስተዋላችንና ወደ ትዝታችን የሚገባው።

እጅግ የሚበልጠው ክፍል የሚገባው በ«ዓይን በር» በኩል ነው፤ አብዛኛው ግን የሚመጣው በእጅ በመሥራት በሚገኝ ተሞክሮ ነው።

በማስተማር ሙያዬ «ከፍተኛ ደረጃ» ላይ መድረሴ በቂ አልነበረም — የሥራ ባልደረቦቼ የመምህራን ፕሬዚዳንት አድርገው መርጠውኝ ነበር፤ በትምህርት ቤቱ የአስተዳደር ቦርድ ውስጥ አገለግል ነበር፤ የትምህርት ቤቱ የመጨረሻ ክፍል ኃላፊ መምህር ነበርሁ፤ የትምህርት ዓይነቴን የፊዚክስን ብሔራዊ ሥርዓተ ትምህርት በሚያዘጋጁ ጥቂት የተመረጡ መምህራን ቡድን ውስጥም ነበርሁ። መጠጥ ቤት ስለ መግዛት የሕግ ጉዳዮች ብዙ የሚያውቅ ሰው ስላልነበረ ጉዳዩን ለ«ባለሙያው» በማስተላለፋቸው ደስ አላቸው።

ስለ ሕንጻ አሠራርና ጥገና ብዙ የሚያውቅ ሰው ስላልነበረ ያንንም አሳልፈው ሰጡ። ሆኖም በዚያ የምእመናን ጉባኤ የነበረው ሰው ሁሉ ማስተማር የሚችል መስሎት የነበረ ይመስላል፤ የእኔም አስተያየት ልክ ያው ነበር — ከሌላው ከማንኛውም የማይበልጥ ክብደት ያለው ሌላ አንድ አስተያየት። ሁሉም ሰው ማስተማር የሚችል ከሆነ በትምህርት ቤቶቻችን የመማሪያ ክፍሎች ውስጥ ይህን ያህል ብዙ ደካማ አስተማሪዎች ለምን ኖሩ?

በቤተ ክርስቲያንም ያው መርሕ ይሠራል። እግዚአብሔር በቤተ ክርስቲያን ውስጥ ልዩ ልዩ ስጦታዎችን፣ መክሊቶችንና ችሎታዎችን አኑሯል፤ እኛም እነዚህን በሕዝባችን ውስጥ ብናገኛቸው ጥበብ ነው። ለምሳሌ በሽማግሌና በዲያቆን መካከል ያለው ብቸኛው እውነተኛ ልዩነት የመጀመሪያው «ለማስተማር የሚበቃ» መሆኑ ነው። ይህ «የበለጠ መንፈሳዊ» የመሆን ወይም በማዕረግ ከፍ የማለት ጉዳይ አይደለም፤ የተለየ ስጦታ ነው እንጂ።

ይህ ማለት ሽማግሌው የተወሰነ ሥርዓተ ትምህርት የሚያስተምር የሰንበት ትምህርት ቤት አስተማሪ መሆን አለበት ማለት አይደለም፤ ነገር ግን በቤተ ክርስቲያን ውስጥ ወይም በአንድ ሰው ሕይወት ውስጥ ያለን ሁኔታ በቀረበ ቁጥር የመጽሐፍ ቅዱስን መርሕ ለማስተማር ወደ መጽሐፍ ቅዱስ መዞር ለእርሱ ተፈጥሯዊ ጠባዩ ነው ማለት ነው።

አንዳንድ የቤተ ክርስቲያን አባላት የገንዘብ ችግር ቢገጥማቸው፣ ሽማግሌው ራሳችንን በዕዳ ውስጥ እንድንገባ በፈቀድን ቁጥር እግዚአብሔር በሕይወታችን የሚሠራውን ሥራ እንዴት እንደምናደናቅፍ ለማሳየት ምናልባት ወደ መጻሕፍት ይመራቸዋል። ከዚያም ስለ ገንዘብ የመጽሐፍ ቅዱስን አመለካከት ያሳያቸው ይሆናል፤ ይህንንም ካደረገ በኋላ በገንዘብ ምክር የበለጠ እውቀት ወዳለው ሰው ይመራቸዋል። ያ ሁለተኛው ሰው በቤተ ክርስቲያን የገንዘብ ጉዳይ የሚያገለግል ዲያቆን ሊሆን ይችላል።

በተዋረድ በተደራጀ የቤተ ክርስቲያን መዋቅር ውስጥ የሚሠሩ፣ ቤተ ክርስቲያንን የሚመሩ፣ ነገር ግን የመጽሐፍ ቅዱስን ሥርዓትና ትምህርት የማቅረብ ብቃታቸው አነስተኛ የሆነ «ሽማግሌዎችን» ማየት እንዴት ያሳዝናል! ብዙዎቹ ለዚያ ቦታ የተመረጡት የመጽሐፍ ቅዱስን መስፈርቶች ብዙም ከግምት ሳያስገቡ፣ በታማኝነት ላበረከቱት የዲያቆንነት አገልግሎት እንደ ዕድገት ወይም በንግድ ብልሃታቸው፣ በፖለቲካ ብልጠታቸው ወይም በግል ማራኪነታቸው ምክንያት ነው።

በቅርቡ በአንድ የደቡብ አሜሪካ አገር በአንድ ትልቅ አገልግሎት ተሳትፌ ነበር፤ በዚያም የምንሠራበትን ቢሮ የሚጎበኙ ሰዎች በቀላሉ እንዲለዩአቸው ሠራተኞቹ ሁሉ የስም መለያ ማድረግ ነበረባቸው። የእኔ «ፓስተር ጋሬዝ ኢቫንስ» ይል ነበር። በኮቴ ደረት ላይ አድርጌ ለተወሰነ ጊዜ ለበስሁት፤ ነገር ግን ሌሎች ብዙዎች ደግሞ «ፓስተር» ተብለው እንደሚጠሩ አስተዋልሁ፤ ከእነርሱ ግን በዚያ ሚና አገልግሎ የሚያውቅ ያለ አይመስልም ነበር። ሁሉም በአንድ ዓይነት አገልግሎት ውስጥ ስለ ነበሩ ሁሉም ፓስተሮች እንደ ሆኑ ተገለጸልኝ። በዌልስ ባለችው ቤተ ክርስቲያኔ ያለ ሰው ሁሉ ማስተማር እንደሚችል እንዳሰበ ሁሉ፣ አሁን ደግሞ በዚያ ቢሮ ያለ ሰው ሁሉ እረኝነት ማድረግ እንደሚችል ያሰበ መሰለ! የስም መለያዬን በጸጥታ አውልቄ በቀላሉ «ጋሬዝ ኢቫንስ» በሚል መለያ ቀየርሁት።

ጌታ ያልሾማቸውን ሰዎች ፓስተሮች ወይም ሽማግሌዎች ብለን ስንጠራቸው የዚያን ቦታ ሥልጣን እናዳክማለን፤ ቅባቱንም የማጣት አደጋ ላይ እንወድቃለን። እነርሱ የሚመሩት ሕዝብ ብዙ ጊዜ የእግዚአብሔርን ቃል ጠንካራ ምግብ ተርቦ በወተቱ ብቻ ቢያድግ አያስደንቅም።

ጌታ «አንዳንዶቹ ሐዋርያት፥ ሌሎቹም ነቢያት፥ ሌሎቹም ወንጌልን ሰባኪዎች፥ ሌሎቹም እረኞችና አስተማሪዎች እንዲሆኑ ሰጠ፤ ቅዱሳንን ለአገልግሎት ሥራ ፍጹማን ለማድረግ ለክርስቶስ አካል ሕንጻ ነው፤ ይህም ሁላችን የእግዚአብሔርን ልጅ በማመንና በማወቅ ወደሚገኘው አንድነት፥ ወደ ፍጹም ሰው፥ ወደ ክርስቶስ ሙላት ቁመት መጠን እስክንደርስ ድረስ ነው።» (ኤፌሶን 4:11-13) እነዚህ አምስቱ የአገልግሎት ስጦታዎች ጌታ በቤተ ክርስቲያን — በአካሉ — ውስጥ ካኖራቸው ልዩ ልዩ ስጦታዎችና መክሊቶች ጥቂቱ ክፍል ብቻ ናቸው። ሐዋርያው ጳውሎስ በአማኞች ሁሉ አንድነት ውስጥ ሊኖር የሚገባውን ግንኙነት ለመግለጽ የአካልን ምሳሌ ይጠቀማል። ክርስቶስ ራሱ የሆነለት አንድ አካል ነን።

(በነገራችን ላይ፦ ብዙ ጊዜ «አንተ ከአካሉ የትኛው ክፍል ነህ?» ተብዬ እጠየቃለሁ። እኔም ፈገግ ብዬ፦ «እኔ ‹ትልቁ የእግር ጣት› ነኝ!» ብዬ እመልሳለሁ። እንዳብራራ ስጠየቅ፣ ፓስተር ልክ እንደ ትልቁ የእግር ጣት ብዙ ጊዜ በሰዎች ሕይወት ውስጥ «በጨለማና በሚሸቱ ስፍራዎች» እንደሚሠራ አድማጮቼን አስታውሳቸዋለሁ። ደግሞም ሁልጊዜ «ጫና ውስጥ» ነው፤ ነገር ግን ራሴን «ትልቁ የእግር ጣት» አድርጌ የምቆጥርበት ዋነኛው ምክንያት ለክርስቶስ አካል ሚዛን ማምጣት ስለምፈልግ ነው።)

ጳውሎስ ስለ ክርስቶስ አካል የሚጽፍባቸው ሦስቱ ክፍሎች የመንፈስ ቅዱስን ስጦታዎች አጽንዖት የሚሰጥባቸውም ያው ሦስቱ ስፍራዎች መሆናቸው ልብ ሊባል የሚገባው ነው። እነዚህን ስናጠና የመንፈስ ስጦታዎች ለግለሰቡ ሳይሆን ለቤተ ክርስቲያን — ለአካሉ — ጥቅም የተሰጡ መሆናቸው ግልጽ ይሆናል።

ኤፌሶን 4 — ከላይ የተጠቀሰው።

ቁጥር 4-7፦ አንድ አካል… የሚያያይዘው ቁጥር፣ ቁጥር 7፦ «ነገር ግን እንደ ክርስቶስ ስጦታ መጠን ለእያንዳንዳችን ጸጋ ተሰጠን።» ቁጥር 11-13፦ ለማዘጋጀት የተሰጡ አምስት ስጦታዎች። ሮሜ 12 ቁጥር 4-5፦ በአንድ አካል ብዙ ብልቶች አሉ፤ ሁሉም ደግሞ አንድ ዓይነት ሥራ የላቸውም።

የሚያያይዘው ቁጥር፣ ቁጥር 6፦ «እንደ ተሰጠንም ጸጋ ልዩ ልዩ ስጦታ አለን፤ በዚያው መሠረትም እንጠቀምባቸው፦» ቁጥር 6-8፦ ትንቢት፣ ማገልገል፣ ማስተማር፣ መምከር፣ መስጠት፣ መምራት፣ ምሕረት ማድረግ። 1ኛ ቆሮንቶስ 12 ቁጥር 12-27፦ «…በአንድ መንፈስ አንድ አካል እንድንሆን ተጠምቀናል…» «…አካል ብዙ ብልቶች እንጂ አንድ ብልት አይደለም…» ጆሮ ዓይንን «አታስፈልገኝም» ሊለው አይችልም… «አሁን ግን እግዚአብሔር እንደ ወደደ ብልቶችን እያንዳንዳቸው በአካል አድርጎአል።» የሚያያይዙት ቁጥሮች፣ ቁጥር 4-7፦ «የጸጋም ስጦታ ልዩ ልዩ ነው… አገልግሎትም ልዩ ልዩ ነው… አሠራርም ልዩ ልዩ ነው… ነገር ግን መንፈስ ቅዱስን መግለጥ ለእያንዳንዱ ለጥቅም ይሰጠዋል።»

ቁጥር 8-11፦ የጥበብ ቃል፣ የእውቀት ቃል፣ (የ)እምነት (ስጦታ)፣ የመፈወስ ስጦታዎች፣ ተአምራትን ማድረግ፣ ትንቢት፣ መናፍስትን መለየት፣ ልዩ ልዩ ዓይነት ልሳኖች፣ ልሳኖችን መተርጎም።

ቁጥር 28-30፦ ሐዋርያት፣ ነቢያት፣ አስተማሪዎች (በኤፌሶን 4 ደግሞ ይገኛሉ)፣ ተአምራት፣ ፈውሶች፣ ልሳኖች (በዚሁ ምዕራፍ ቀደም ብለውም ተጠቅሰዋል)፣ እርዳታ፣ አገዛዝ (በሮሜ 12 ደግሞ ይገኛሉ — ማገልገልና መምራት)። ስጦታዎቹ ስንት እንደ ሆኑ ማወቅ ወይም እያንዳንዱ ስጦታ ምን እንደሚያካትት በግልጽ መተርጎም መቻል አስፈላጊ አይደለም። አስፈላጊው እነዚህን ስጦታዎች የሾመው ሰው ሳይሆን ቅድስት ሥላሴ መሆናቸውን መገንዘብ ነው። (1ኛ ቆሮንቶስ 12:28 — «እግዚአብሔርም በቤተ ክርስቲያን … አድርጎአል።» 1ኛ ቆሮንቶስ 12:11 — «ያ አንዱ መንፈስ … እያካፈለ…» ኤፌሶን 4:11 — «ወደ ላይ በወጣ ጊዜ … ሰጠ።»)

ጌታ በላያቸው ያኖረውን ሸክም መሸከም እንዲችሉ ለሕዝቡ ስጦታዎችን፣ መክሊቶችንና ችሎታዎችን ይሰጣል። እነዚህ ቀንበሩን «ልዝብ»፣ ሸክሙንም «ቀሊል» ያደርጉታል።

ደግሞም «ተፈጥሯዊ» ችሎታዎቻችንንና መክሊቶቻችንን ሊጠቀምባቸው ይፈልጋል፤ ከመንፈሳዊ ስጦታዎች ጋር አብረው ሲሠሩም ቅባቱን በላያቸው ሊያኖር ይችላል።

እግዚአብሔር ሕዝቡን በግብፅ ከነበሩበት ባርነት እንዲያወጣ ሙሴን በጠራው ጊዜ አገልጋዩ ስጋቱን ገለጸ። «አያምኑኝም» አለ። «አንተ እንደ ላክኸኝ አይቀበሉም።» በሌላ አነጋገር፣ ሥልጣኑን ይጠራጠሩ ነበር ማለት ነው።

ጌታም፦ «ያ በእጅህ ያለው ምንድን ነው?» አለው።

«የእረኛ በትሬ ብቻ ነው።» «ያለኝ ይህ ብቻ ነው፤ ላለፉት አርባ ዓመታት በግ ስጠብቅ ቆይቻለሁና።»

ጌታም እንዲህ ብሎ መልሶለት ሊሆን ይችላል፦ «ልክ ነህ! ያ እንደ እረኛ ያለህ የሥልጣንህ ምልክት ነው። ለሚቀጥሉት አርባ ዓመታት አንድ ሚሊዮን የሚያለቅሱ ባለ ሁለት እግር በጎችን የምመራበት የተቀባ መሣሪያ እንድትሆን ላለፉት አርባ ዓመታት ሳሠለጥነውና ስቀርጸው የቆየሁት እረኛ ነህ!»

«ዳዊት ሆይ፣ በኪስህ ያለው ምንድን ነው?»

እረኛው ብላቴናም፦ «ድቦችንና አንበሶችን የማባርርበት ወንጭፍ ብቻ ነው» ብሎ መለሰ።

«መልካም! ይህን ግዙፍ ጎልያድን ለማሸነፍ ያ ይበቃል፤ ለዚህ ቀን ሳሠለጥንህ ቆይቻለሁና!»

«አንቺ መበለት ሆይ፣ በቤትሽ ያለሽ ምንድን ነው?»

«አንዲት ትንሽ የዘይት ማሰሮ ብቻ።»

«የምትችዪውን ማሰሮና ድስት ሁሉ ሰብስቢ። ጎረቤቶችሽን ሁሉ ልንባርክ ነው!»

«ጴጥሮስ ሆይ፣ በታንኳህ ያለው ምንድን ነው?»

«የዓሣ አጥማጅ መረቤ ብቻ።»

«ታላቅ የዓሣ ብዛት እንድትጎትት በታንኳይቱ በሌላኛው ወገን ጣለው።»

«ጳውሎስ ሆይ፣ ያን ያህል አጥብቀህ የምትጠብቀው ያ ሰነድ ምንድን ነው?»

«የሮሜ ዜግነቴ ማረጋገጫ ሰነድ ነው።»

«ያ ያስፈልግሃል፤ በዚህ ዓለም ዋና ከተማ ምስክሬ እንድትሆን ወደ ሮሜ እወስድሃለሁና።»

ይህን ትምህርት በአንድ የሳምንት መጨረሻ የመንፈሳዊ ማረፊያ ስብሰባ ላይ ለሃምሳ ያህል ወንዶች እያቀረብሁ ነበር። በትምህርቱ በዚህ ነጥብ ላይ ሳለሁ ከተሰብሳቢዎቹ አንዱ ተነሥቶ አንድ ታሪክ መናገር ይችል እንደ ሆነ ጠየቀ። እንዲህ ሲል ጀመረ፦ «ለጌታ የማቀርበው ስጦታ ያለኝ መስሎኝ አያውቅም ነበር። አንድ ቀን ግን በቤተ ክርስቲያን ዘወትር ከፊቴ የምትቀመጥ አንዲት ወጣት ሴት ከአምልኮው ፕሮግራም እንደ ቀረች አስተዋልሁ። በሚቀጥለው ሳምንት እርሷን ለማነጋገር አጋጣሚ አገኘሁ፤ ስለዚህ እንደ ናፈቅናት ነገርኋት። መኪናዋ አዲስ የፍሬን ሸራ ያስፈልገው ስለ ነበረና ለማሠራት አቅም ስላልነበራት ወደ አምልኮው መምጣት እንዳልቻለች ነገረችኝ።

በዚያን ዕለት አንዲት ጓደኛዋ አምጥታት ነበር፤ መኪናዋም አገልግሎት መስጠት በማይችልበት ሁኔታ ላይ ነበረ። በዚያው ሳምንት መኪናዋን ጋራዥ ወዳለው አንድ ወዳጄ ወሰድሁት፤ ለእኔ ብሎ ሸራዎቹን እንዲቀይርላትና እኔም እንደምከፍለው ጠየቅሁት። እርሱም ተስማማ፤ ነገር ግን የመለዋወጫዎቹን ዋጋ ብቻ በማስከፈል እርሱም ይህችን ወጣት ሴት በመባረኩ ተካፋይ እንደሚሆን አጥብቆ ተናገረ። መኪናዋ ሲመለስላት በፊቷ ላይ የነበረውን ፈገግታ ስናይ ሁለታችንም ታላቅ በረከት ተቀበልን። ጌታ ምን እያቀደ እንደ ነበር ግን አላወቅንም ነበር።

በዚህ መንገድ ልረዳቸው የምችላቸውን ሌሎች ሰዎች ለማግኘት በቤተ ክርስቲያኑ ዙሪያ መመልከት ጀመርሁ፤ በተለይ መኪናዎቻቸውን በጥሩ ሁኔታና በሥራ ላይ የማቆየት ብዙም ልምድ የሌላቸውን ወጣቶች — ይህ ደግሞ እኔ በሚገባ የማውቀው ነገር ነበር። አንድ ቀን በዋናው ፓስተር ፊት እስክጠራ ድረስ እኔና ወዳጄ በየሳምንቱ መጨረሻ አብረን የአንድን ሰው አሮጌ ተሽከርካሪ እንጠግን ነበር።

እርሱም፦ ‹ሁለታችሁ ወጣቶቻችንን ይህን ያህል በመባረካችሁ ደስተኛ አይደለሁም!› አለኝ። ደነገጥሁ፤ እርሱ ግን እንዲህ ብሎ ጨመረ፦ ‹ሁሉም ስለ እናንተ እያወራ ነው፤ ይህች ቤተ ክርስቲያን ለእነርሱ ምን ያህል እንደምታስብላቸው ከእነዚህ ወጣቶች ስለ ሰሙ ብዙ አዳዲስ ሰዎች ወደ ቤተ ክርስቲያኑ እየመጡ ነው። ነገር ግን ይህን በረከት ከእናንተ ጋር እንድንካፈል አልፈቀዳችሁልንም! ፍላጎቶችን መፈለጋችሁን እንድትቀጥሉ፣ የሚረዷችሁን ሌሎች ሰዎች እንድታሰልፉ፣ ወጪውንም በቤተ ክርስቲያኒቱ ሒሳብ እንድታደርጉ እፈልጋለሁ!› ብዙዎቹ ወንዶቻችን ወደ እርዳታ አገልግሎት ሲለቀቁ ስናይ እጅግ ተባርከናል!»

እንዴት ያለ ጥበበኛ ፓስተር ነው! ያቺ ቤተ ክርስቲያን በቁጥርም በዚያ ማኅበረሰብ ላይ ባላት ተጽዕኖም ብታድግ አያስደንቅም!

ያ ወንድም ችሎታውንና ገንዘቡን (ዓለማዊ ስጦታዎችን) አቀረበ፤ ጌታ ግን እነርሱን የሚያጎለብት የ«እርዳታ» መንፈሳዊ ስጦታ ሰጥቶት ነበር። በሸክሙ ውስጥ ሆኖ ባገለገለ ጊዜ በእርሱና በቤተ ክርስቲያኑ ላይ ቅባት መጣ።

«ጳውሎስ ሆይ፣ ይህን ያህል የምትጓዘውና የምትጽፈው ለምንድን ነው?»

«ጌታ ለአሕዛብ ሐዋርያ የመሆንን ስጦታ ስለ ሰጠኝ ነው።»

«ፊልጶስ ሆይ፣ ያን ኢትዮጵያዊ ጃንደረባ ለማነጋገር ወደ ምድረ በዳ የሄድኸው ለምንድን ነው?»

«የጌታ መንፈስ ስለ መራኝና የምናገረውን ስለ ነገረኝ ነው።»

«ከአሁን ጀምሮ ‹ወንጌላዊው ፊልጶስ› ተብለህ ትታወቃለህ።»

«ጢሞቴዎስ ሆይ፣ የአገልግሎትህ ምሥጢር ምንድን ነው?»

«(በጳውሎስ) እጆች መጫን የተቀበልሁት የእምነት ስጦታ ነው።»

«እንግዲያውስ እንደ ገና አቀጣጥለው፤ የኃይልና የፍቅር ራስንም የመግዛት መንፈስ እንጂ የፍርሃት መንፈስ አልተቀበልህምና።» (2ኛ ጢሞቴዎስ 1:6-7) «ልጄ ሆይ፣ በነፍስህ ያለው ምንድን ነው?»

«‹የዘይት ማሰሮዬ› አለኝ — የመንፈስ ቅዱስህ ሀልዎት» (በመጻሕፍት ሁሉ ውስጥ ዘይት ሁልጊዜ ስለ መንፈስ ቅዱስ ይናገራል)።

«ሸክሜን እንድትሸከም፣ የተማረኩትን ነጻ እንድታወጣ፣ ግዙፎቹን እንድታሸንፍ፣ ጎረቤቶችህን እንድትባርክ፣ ሰዎችን አጥማጆች እንድትሆን፣ በኢየሩሳሌምህ፣ በሰማርያና በይሁዳ እስከ ምድር ዳርም ድረስ ምስክሬ እንድትሆን እንዲሰጡህ የምፈልጋቸውን ስጦታዎች ሊሰጥህ መጥቷል።»

ስጦታህ

እንግዲህ ጌታ በመንግሥቱ ሊጠቀምበት የሚችል ምን ስጦታዎችን ሰጥቶሃል?

በአንተ ውስጥ የመንፈሳዊ ስጦታ ማስረጃ ያዩ እንደ ሆነ የጎለመሱ ሌሎች አማኞችን ጠይቅ። ሸክምህን መግለጽ ያለብህ አንተ ነህ፤ ስጦታህን ግን መግለጽ ያለባቸው ሌሎች ናቸው። ለእርሱ ስታቀርባቸው ጌታ ሊጠቀምባቸው የሚችል ተፈጥሯዊ ስጦታዎች፣ መክሊቶች ወይም ችሎታዎች አሉ። በእነርሱም ላይ ልዩ ቅባት ሊያኖር ይችላል፤ ይህን የማድረግ ግዴታ ግን የለበትም። ሆኖም በሸክሙ ውስጥ ሆኖ የሚያገለግለውንና ለዚያ ዓላማ የሰጠውን መንፈሳዊ ስጦታ የሚጠቀመውን ትሑት ወንድ ወይም ሴት ሁልጊዜ ቅባቱን በላዩ ያኖራል።

ሌሎች አንዳንድ ስጦታዎች ዝርዝር ይኸውልህ፦ መንፈሳዊ (የዘይት ማሰሮዬ)፦ ዲያቆን፤ ገርነት፤ በጎነት፤ አገዛዝ፤ እርዳታ፤ ተስፋ፤ ደስታ፤ ፍቅር፤ የዋህነት ወይም ለመማር ዝግጁነት፤ ምሕረት ማድረግ፤ ሰላም፤ ራስን መግዛት ወይም ልከኝነት፤ ….

ዓለማዊ (በእጄ ያለው በትር)፦ የአየር ወይም የባሕር ጉዞ ሙያ፤ የንግድ ችሎታ ወይም ቦታ፤ የምግብ ዝግጅት፤ ኮምፒውተርና መገናኛ ብዙኃን፤ ማሽከርከርና አብራሪነት፤ ትምህርት፤ ልምድ፤ ገንዘብ፤ እንግዳ ተቀባይነት፤ ቋንቋዎች፤ መልካም ትዳር፤ ነርስነት፤ የቢሮ ሥራ፤ ሳይንስ፤ ሌላ የተለየ ልዩ እውቀት፤ ስፖርት፤ ማስተማር፤ ጉዞና ሥነ ጽሑፍ፤ ….

…. የራስህን ጻፍ።