ጳውሎስና የጸሎት ልመናዎቹ

ከሁሉ ነገር በላይ መጸለይን ለመማር እመኛለሁ። ለክርስቲያን ተዋጊዎች የማንቂያ መለከት ልንነፋ እንፈልጋለን። የእውነተኛ ጸሎት እጦትን እውነት ለማግኘት እንሻለን። ምንድር ነው? ለምንስ ሆነ? ጊዜውን የማዘዝ ሥልጣን የነበረው ክርስቶስ ከጊዜው ታላቁን ክፍል በምልጃ ሊያሳልፍ ሲመርጥ፣ በጸሎት የሚሳለፈው ጊዜ ስለ ምን ይህን ያህል ጥቂት ሆነ? «ስለ እኛ ሊያማልድ ዘወትር በሕይወት ይኖራል።» መልሱ ይህ ነው ብለን እናምናለን፦ ምኞቱ በልብ ውስጥ አለ፤ ፈቃድ ግን አልተገራም፤ መነሻ ምክንያቱ አለ፤ የልብ ዝንባሌዎች ግን ለሰዓታት በሚደረግ ሰማያዊ ማሰላሰል አልቀለጡም፤ አእምሮ ስለታም ነው፤ ነገር ግን ለሰዓታት ሳይታክት ለመመርመር አይደለም። አእምሮና የልብ ዝንባሌዎች በሮች ተዘግተው፣ ምኞቶች ተሰቅለው፣ በስውር ስፍራዎች ለእግዚአብሔር ክብር ለመሥራት ወይም ለመሞት በተባረከው በመንፈስ ቅዱስ ማኅተም ፈጽሞ አንድ ላይ አልተጣመሩም።—ቄስ ሆሜር ደብሊው ሆጅ።

ጳውሎስ ያገለግላቸው ለነበሩት ሰዎች ስለ ራሱ እንዲጸልዩ ያቀረባቸው ብዙ ልመናዎች፣ ጸሎት ሊያስገኘው ስለሚችለው ነገር በነበረው ግምት ውስጥ ጸሎትን ከፊት ያስቀምጡታል። ጳውሎስ ራሱ ብዙ ይጸልይ ነበር፤ ክርስቲያኖችም የጸሎትን ሥራ የግድ አስፈላጊነት እንዲገነዘቡ ሊያነቃቸው አብዝቶ ጣረ። የጸሎት አስፈላጊነት እጅግ ጥልቅ ሆኖ ስለ ተሰማው የግል ጸሎት ልማድ ነበረው። ይህንንም ለራሱ ስለ ተረዳ ይህን ዋጋ የማይገመት ግዴታ በሌሎች ላይ አጸና። የምልጃ ጸሎት፣ ማለትም ስለ ሌሎች የሚደረግ ጸሎት፣ በጸሎት ግምቱ ውስጥ ከፍ ያለ ስፍራ ነበረው። ስለዚህ ራሱን በጻፈላቸው አብያተ ክርስቲያናት ጸሎት ላይ ሲጥል ብናገኘው አያስደንቅም።

ለኢየሱስ ክርስቶስ ባላቸው መሰጠት ሁሉ፣ የእግዚአብሔር መንግሥት በምድር ላይ እንዲስፋፋ ባላቸው ፍላጎት ሁሉ፣ ከኢየሱስ ጋር ባላቸው የግል ቍርኝት ግለት ሁሉ፣ ብዙ እንዲጸልዩ፣ ሳያቋርጡ እንዲጸልዩ፣ በማንኛውም ጊዜ እንዲጸልዩ፣ በሁሉ ነገር እንዲጸልዩ፣ መጸለይንም የሕይወት ሥራ እንዲያደርጉት አደራ ይላቸዋል። ከዚያም ለአድካሚ ተግባሮቹ፣ ለከባድ ፈተናዎቹና ለታላላቅ ኃላፊነቶቹ በጸሎት ላይ የራሱን ጥገኝነት ስለ ተገነዘበ፣ የጻፈላቸውን ሰዎች በተለይ ስለ እርሱ እንዲጸልዩ ያሳስባቸዋል።

የሐዋርያት አለቃ ጸሎት ያስፈልገው ነበር። የሌሎችን ጸሎት ያስፈልገው ነበር፤ ይህንንም ጸሎታቸውን በመለመኑ በተግባር አምኗል። ለሐዋርያነት መጠራቱ ከዚህ ፍላጎት በላይ ከፍ አላደረገውም። በጸሎት ላይ ጥገኛ መሆኑን ተገንዝቦ አመነ። የደጋግ ሰዎችን ሁሉ ጸሎት ተመኘ፤ አከበረም። ለራሱ ጸሎት ለመለመን ወይም በየስፍራው ያሉ ወንድሞች ስለ እርሱ እንዲጸልዩ ለማሳሰብ አላፈረም።

ለዕብራውያን ሲጽፍ የጸሎት ልመናውን በሁለት ምክንያቶች ላይ ይመሠርታል፤ እነርሱም ቅንነቱና እነርሱን ለመጐብኘት የነበረው ጉጉት ናቸው። ቅን ባይሆን ኖሮ ጸሎታቸውን ሊጠይቅ መብት ባልነበረው ነበር። ስለ እርሱ መጸለያቸው ወደ እነርሱ የሚያደርገውን ጉብኝት የሚያቀልል ብርቱ መሣሪያ ይሆን ነበር። የነፋሱንና የማዕበሉን ስውር ስፍራ ይነኩ ነበር፤ ሁለተኛ ደረጃ ያላቸውን ምክንያቶች ሁሉ አስተካክለው ለዚህ ዓላማ እንዲያገለግሉ ያደርጓቸው ነበር። ጸሎት ከእጁ የምንሻቸውን ነገሮች ለእኛ እንዲያደርግ እግዚአብሔርን ያስቸኩለዋል።

ጳውሎስ ወንድሞቹን ደጋግሞ የሚለምነው «ስለ እርሱ እንዲጸልዩ» ነበር። የአንድን ነገር ዋጋ የምንገምተው ምን ያህል ጊዜ እንደሚለመን፣ ስለ እርሱም በሚቀርበው ልዩና አስቸኳይ ተማኅፅኖ ነው። ይህ እውነት ከሆነ ለጳውሎስ የቅዱሳን ጸሎት ከታላላቅ ሀብቶቹ መካከል ነበረ። «ስለ እኔ ጸልዩ» የሚለውን ልመና በአስቸኳይነትና ደጋግሞ በመድገም ጳውሎስ ለጸሎት እንደ ጸጋ መንገድ የሰጠውን ታላቅ ዋጋ በማያጠራጥር ሁኔታ አሳየ። ጳውሎስ እንደ ጸሎት ፍላጎት የሚያስጨንቀው ሌላ ፍላጎት አልነበረውም። እንደ ታማኞቹ ጸሎት የሚያደንቀውና የሚገምተው ሌላ ዋጋ አልነበረም።

ጳውሎስ ታላቁን የጸሎት ኃይል በሥራው ውስጥ ታላቅ ኃይል አድርጎ አስቀመጠው። በጳውሎስ ግምት እጅግ ብርቱውና እጅግ ሩቅ የሚደርሰው ኃይል ጸሎት ነው። የእግዚአብሔርን ሕዝብ ጸሎት ሲፈልግ ይመኘዋል፤ እንደ ሀብትም ያከማቸዋል። የነፍሱ ትጋት በእነዚህ ልመናዎች ውስጥ ይወጣል። ለሮሜ ሰዎች በሚጽፈው በዚህ የጸሎት ተማኅፅኖ ውስጥ አድምጡት፦

«ወንድሞች ሆይ፥ ስለ እኔ ወደ እግዚአብሔር እየጸለያችሁ ከእኔ ጋር ትጋደሉ ዘንድ በጌታችን በኢየሱስ ክርስቶስና በመንፈስ ፍቅር እለምናችኋለሁ።»

ሌሎች ስለ ጳውሎስ ያደረጉት ጸሎት ስለ ረዳው ዋጋ ያለው ነበር። ጸሎቶች ታላላቅ ረዳቶች ናቸው። በችግራችን ጊዜ እንደ እውነተኛ ጸሎት የሚረዳን ምንም ነገር የለም። ጸሎቶች ጕድለትን ይሞላሉ፤ ከጭንቅም ያወጣሉ። ጳውሎስ ለቆሮንቶስ ሰዎች እንደ ጻፈው፣ እምነቱ እጅግ ተፈትኖ ነበር፤ በእግዚአብሔርም ማዳን እጅግ ተረድቶና እጅግ በርትቶ ነበር። «እናንተም ደግሞ ስለ እኛ በልመናችሁ አብራችሁ ትረዳላችሁ።» እግዚአብሔር በሌሎች ጸሎት ለተወደዱ ቅዱሳኑ ምንኛ ድንቅ ነገሮችን አድርጓል! ቅዱሳን ቅዱሳንን ከሌላ ከማንኛውም መንገድ ይልቅ በብርቱ ጸሎት ሊረዱ ይችላሉ።

በቅንአትና በሐሜት መካከል፣ በሐሰተኞች ወንድሞችም ዘንድ በሚደርስበት አደጋ ውስጥ ሆኖ ለፊልጵስዩስ ሰዎች እንዲህ ብሎ ይጽፋል፦

«ይህ በጸሎታችሁና በኢየሱስ ክርስቶስ መንፈስ መሰጠት ለመዳኔ እንዲሆንልኝ አውቃለሁና፥»

«ይህ ናፍቆቴ ተስፋዬም ነውና፤ በአንድ ነገር እንኳ አላፍርም ነገር ግን በህይወት ብኖር ወይም ብሞት፥ ክርስቶስ በግልጥነት ሁሉ እንደ ወትሮው አሁን ደግሞ በስጋዬ ይከብራል።»

በፊልጵስዩስ የነበሩት ቅዱሳን ስለ ጳውሎስ ባቀረቡት ጸሎት ኀፍረት ተወገደ፣ ቅዱስ ድፍረት ተገኘ፣ ሕይወትና ሞትም የከበሩ ሆኑ።

ጳውሎስ በአገልግሎቱ ውስጥ ብዙ ብርቱ ኃይሎች ነበሩት። አስደናቂው መለወጡ ታላቅ ኃይል፣ እጅግ ወደ ፊት የሚገፋና የሚያራምድ ኃይል ምንጭ ነበር፤ ሆኖም በአገልግሎቱ ውጤቶቹን ያገኘው ዘመን በለወጠው በዚያ መለወጡ ኃይል አልነበረም። ለሐዋርያነት መጠራቱ ግልጽ፣ ብሩህና ፍጹም የሚያሳምን ነበር፤ ነገር ግን በአገልግሎቱ ለተገኙት ታላላቅ ውጤቶች በዚያ ላይ አልተደገፈም።

የጳውሎስ ሩጫ ይበልጥ በግልጽ የተቀየሰውና ሕይወቱ ይበልጥ በብርቱ የተከናወነው ከሌላ ከማንኛውም ኃይል ይልቅ በጸሎት ነው።

ጳውሎስ ከማያምኑ ሰዎች እንዲድን የሮሜ ክርስቲያኖች ስለ እርሱ እንዲጸልዩ ያሳስባቸዋል። ጸሎት ከክፉ ሰዎች ክፋትና ሤራ የሚጠብቅ መከላከያና ጋሻ ነው። እግዚአብሔር በሰዎች ላይ ተጽዕኖ ሊያደርግ ስለሚችል ጸሎትም በሰዎች ላይ ተጽዕኖ ሊያደርግ ይችላል። ጳውሎስ የሚታገላቸው የማያምኑ ጠላቶች ብቻ አልነበሩትም፤ ከእጁ ማንኛውንም የክርስቲያን አገልግሎት ይቀበሉ እንደ ሆነ እስኪያጠራጥር ድረስ ብዙ ክርስቲያኖች በእርሱ ላይ ጭፍን ጥላቻ ነበራቸው። ይህ በተለይ በኢየሩሳሌም እንዲህ ነበር፤ ስለዚህ የተቀጣጠለውንና ሥር የሰደደውን ብርቱና ጎጂ የጭፍን ጥላቻ ኃይል ለማስወገድ ጸሎት፣ ብርቱ ጸሎት፣ ሥራ ላይ መዋል ነበረበት።

እነርሱ ስለ እርሱ የሚያቀርቡት ጸሎት ለደኅንነቱ፣ ደግሞም የቀና መንገድና የእግዚአብሔር ፈቃድ ፈጥኖና በእርግጥ ወደ እነርሱ እንዲያደርሱት፣ በዚህም እርሱና የሮሜ ክርስቲያኖች እርስ በርሳቸው እንዲባረኩና እንዲታደሱ ሥራ ላይ መዋል ነበረበት።

እነዚህ የጳውሎስ የጸሎት ልመናዎች ብዙ ገጽታ ያላቸውና ሁሉን የሚያካትቱ ናቸው። ለሮሜ ቤተ ክርስቲያን ያቀረበው ልመና ምን ያህል ብዙ ነገሮችን ያካትታል! ጸሎታቸውን የለመነበት ልመና እንደ ተላከላት ቤተ ክርስቲያን ሁሉ ዓለም አቀፍ ነው። ይማልዳቸዋል፤ ይለምናቸዋል፤ ይህም ብርታትንና ትጋትን የሚያመለክት ቃል ነው፤ «ስለ ኢየሱስ ክርስቶስ ብለው ስለ እርሱ በሚጸልዩት ጸሎት ከእርሱ ጋር እንዲጋደሉ» ይለምናቸዋል። ይህን የሚመኘው በተልእኮው ሊያደናቅፉትና ሊያሳፍሩት ከሚችሉ ክፉና ተንኰለኛ ሰዎች እንዲድን፣ ደግሞም ለድሆች ቅዱሳን ያደረገው አገልግሎት በቅዱሳኑ ዘንድ የተወደደ እንዲሆን፣ በመጨረሻም እንዲታደሱ በደስታ ወደ እነርሱ እንዲመጣ ነው።

ልመናው ምንኛ የልብ ትጋት የሞላበት ነው! ተማኅፅኖው ምንኛ ርኅሩኅና የፍቅር ነው! ወደ ከፍተኛውና ወደ እውነተኛው የጸሎት ዓይነት የሚገፋፋው ምክንያቱ፣ «በጌታችን በኢየሱስ ክርስቶስ» የሚለው፣ ምንኛ ልብ የሚነካና ከፍ ያለ ነው! ደግሞም ለመንፈስ ባለን ፍቅር፣ ወይም መንፈስ ለእኛ ባለው ፍቅር፤ በቅዱሱ ወንድማማችነት ማሰሪያ። በእነዚህ ከፍ ባሉና አስገዳጅ በሆኑ ምክንያቶች ስለ እርሱ እንዲጸልዩና በጋራ ጸሎታቸው «ከእርሱ ጋር እንዲጋደሉ» ያሳስባቸዋል። ጳውሎስ በታላቁ የጸሎት ትግል ውስጥ ነው፤ ይህም እጅግ ታላላቅ ጉዳዮች የተያዙበትና አደጋ ላይ የወደቁበት ትግል ነው፤ እርሱም በዚህ ትግል መካከል ነው። ክርስቶስ በውስጡ ስላለ ራሱን ለእርሱ ሰጥቷል። እርዳታ ያስፈልገዋል፤ ይህም በጸሎት ብቻ የሚመጣ እርዳታ ነው። ስለዚህ ወንድሞቹ ስለ እርሱና ከእርሱ ጋር እንዲጸልዩ ይማጸናቸዋል።

በጸሎት ጠላቶች ከመንገድ ተጠራርገው ሊወገዱ ነው። በጸሎት ጭፍን ጥላቻዎች ከደጋግ ሰዎች ልብ ሊባረሩ ነው። ወደ ኢየሩሳሌም የሚወስደው መንገዱ ከችግሮች ይጠራል፤ የተልእኮው መከናወን ይረጋገጣል፤ የእግዚአብሔር ፈቃድና የቅዱሳን መልካም ነገር ይፈጸማል። እነዚህ ድንቅ ፍጻሜዎች ሁሉ በድንቅ ጸሎት ይገኛሉ። በብርቱ ጸሎት የሚገኙት ውጤቶች ድንቅና ዓለም አቀፍ ናቸው። የሐዋርያት ተተኪዎች ሁሉ ጳውሎስ እንደ ጸለየ ቢጸልዩ ኖሮ፣ በእነዚህ ዘመናት ሁሉ የነበሩ ክርስቲያኖች ሁሉ በብርቱው የጸሎት ተጋድሎ ከሐዋርያዊ ሰዎች ጋር አንድ ቢሆኑ ኖሮ፣ የእግዚአብሔር ቤተ ክርስቲያን ታሪክ ምንኛ ድንቅና መለኮታዊ ይሆን ነበር! መከናወኗስ ምንኛ ወደር የለሽ ይሆን ነበር! የሺው ዓመት መንግሥቷ ክብር ከብዙ ዘመናት በፊት ዓለምን ባበራና በባረከ ነበር።

በጳውሎስ ልመናዎች ውስጥ ስለ ጸሎት ሩቅ የሚደርስ ኃይል የነበረውን ግምት እናያለን። ይህም ጸሎት በውስጡ የክታብ ኃይል ስላለው ወይም የሚመለክ ነገር ስለ ሆነ አይደለም፤ ይልቁንም የሚጠይቃቸውን ነገሮች እንዲያደርግ እግዚአብሔርን ስለሚያንቀሳቅስ ነው። ጸሎት በራሱ ምንም አስማት ወይም ኃይለኛ ድግምት የለውም፤ ሁሉን የሚችል የሚሆነው ሁሉን የሚችለው እግዚአብሔር ልመናውን እንዲፈጽም ስለሚያደርገው ብቻ ነው። ጳውሎስ እንደ ገለጸው ወይም እንደ ተረዳው በጸሎት ሁሉ ውስጥ ያለው ቀዳሚ መሠረት «ስለ እኔ ወደ እግዚአብሔር እየጸለያችሁ ከእኔ ጋር ትጋደሉ ዘንድ» የሚለው ነው። የጳውሎስ ነፍስ የተሰማራችበት የብርቱ ውጊያ ባሕርይ ያለው ነው፤ ትግል፣ ፊት ለፊት የሚደረግ ፍልሚያ ነው። ውጥረቱ ብርቱ ነው፤ የነፍስን ጉልበት ሁሉ ያደክማል፤ ፍጻሜውም በጥርጣሬ ይወዛወዛል። ጳውሎስ በዚህ የጸሎት ትግል ውስጥ በተጋድሎው ተጨማሪ ኃይልና መለኮታዊ እርዳታ ያስፈልገዋል። በትግሉ መካከል ነው፤ የውጊያውንም ክብደት ይሸከማል፤ ነገር ግን የሌሎችን እርዳታ ይጠይቃል፤ ይማጸናልም። ጸሎታቸው አሁን የሚያስፈልግ ነው፤ ብርቱ ጸሎት ለማቅረብ እርዳታ ያስፈልገዋል።

ጸሎት በከንቱ «መጋደል» አልተባለም፤ እጅግ ብርቱ ትግል ነውና። በጸሎት ላይ እጅግ ታላላቅ እንቅፋቶችና እጅግ የከረሩ ጠላቶች አሉ። ብርቱ የክፋት ኃይሎች በጸሎት እልፍኞች ዙሪያ ይናወጣሉ። ብርቱዎችና በብርቱ የመሸጉ ጠላቶች ጸሎት በሚደረግባቸው እልፍኞች ዙሪያ አሉ። ጳውሎስ የሚያደርገው ይህ ጸሎት ደካማና ግድ የለሽ ድርጊት አይደለም። በዚህ ነገር «የልጅነትን ጠባይ ሽሯል»። ተራውና ልፍስፍሱ ተወግዷል። ጳውሎስ ይህን ጸሎት በብርታት ማድረግ አለበት፤ አለዚያ ጨርሶ አያደርገውም። ሲኦል በጸሎቱ ምት ብርታት ሊሰማው፣ ሊንገዳገድም ይገባዋል፤ አለዚያ ጨርሶ አይመታም። እዚህ እጅግ ብርቱ ጸጋዎችና እጅግ ወንዳወንድ ጥረቶች ያስፈልጋሉ። ጳውሎስ በሚያደርገው ጸሎት ውስጥ ብርታት ይፈለጋል። በእርሱም ውስጥ ድፍረት እጅግ ውድ ነው። እያሰብነው ባለነው በጳውሎስ አእምሮ ውስጥ ፈሪ ንክኪዎችና ልበ ደካማ ምኞቶች ምንም አይጠቅሙም። ጠላቶች ፊት ለፊት ተገጥመው መበተን፣ የጦር ሜዳዎችም መያዝ አለባቸው። ለጸሎት የማይደክምና የማይሸነፍ ጀግንነት፣ ከፍተኛዎቹ የክርስቲያን ወታደርነት ባሕርያትም ይፈለጋሉ። ታላቁ መንፈሳዊ ውጊያ በሚፋፋምበት ጊዜ ለትጋትና ለጽኑ ጸሎት የተነፋ የጸሎት መለከት ጥሪ፣ የጦር አለቃ የእምቢልታ ድምፅ ነው።