ጸሎት — ዕድሎቹ

መንፈስ ቅዱስ አንዳንድ ጊዜ በጸሎት ውስጥ ከሰማይ በሚወርድ ጨረር ወደ ልባችን ይወርዳል፤ በዚህም የእግዚአብሔርንና የክብሩን ብዙ ነገር በአንድ ጊዜ እናያለን፤ ስለ እግዚአብሔር እጅግ የሚያስደንቁ አሳቦችንና የሰፋ ማስተዋልን እናገኛለን፤ ብዙ ጨረሮች በአንድነት ተገናኝተው በልባችን መካከል ላይ ይወድቃሉ። በእነዚህ ወረዶች ወይም መለኮታዊ ፍሰቶች እግዚአብሔር በራሱ ጨረሮች ወደ ልባችን ሾልኮ ይገባል። ከእግዚአብሔር ጋር ኅብረት የምናደርገው ብዙ የተቆራረጡ አሳቦችን አንድ ላይ በመገጣጠም አይደለም፤ ይልቁንም ከሰማይ የሚወርዱ ብዙ ጨረሮች ተሰብስበው ወደ ነፍሳችን ይፈስሳሉ፤ በዚህም በጥበብ መንገድ ብቻ በአንድ ዓመት ልናውቀው ከምንችለው ይልቅ በሩብ ሰዓት ውስጥ እግዚአብሔርን አብልጠን እናውቀዋለን፤ ከእርሱም ጋር አብልጠን እንተባበራለን።

— ቶማስ ጉድዊን

የጸሎት ዕድሎች ምንኛ ሰፊ ናቸው! የሚደርስበትስ ምንኛ ሩቅ ነው! በዚህ በእግዚአብሔር በተሾመ የጸጋ መንገድ ምንኛ ታላላቅ ነገሮች ይፈጸማሉ! ጸሎት እጁን ሁሉን በሚችል አምላክ ላይ ይጭናል፤ ጸሎት ባይቀርብ ኖሮ የማያደርገውንም እንዲያደርግ ያንቀሳቅሰዋል። ያለ እርሱ ፈጽሞ የማይሆኑ ነገሮችን ያስፈጽማል። የጸሎት ታሪክ የታላላቅ ክንውኖች ታሪክ ነው። ጸሎት ታላላቅ ዓላማዎችን ለመፈጸምና ያልተለመዱ ውጤቶችን ለማስገኘት ይጠቀሙበት ዘንድ ሁሉን የሚችል እግዚአብሔር በቅዱሳኑ እጅ ያኖረው አስደናቂ ኃይል ነው። ጸሎት ሁሉን ይደርሳል፤ እግዚአብሔር ለሰው ልጆች ተስፋ የሰጣቸውን ትልቁንም ትንሹንም ነገር ሁሉ ያቅፋል። ለጸሎት ያሉት ወሰኖች የእግዚአብሔር የተስፋ ቃሎችና እነዚያን የተስፋ ቃሎች የመፈጸም ችሎታው ብቻ ናቸው። «አፍህን አስፋ፥ እሞላዋለሁም።»

ጸሎት የፈጸማቸው ነገሮች መዝገብ እምነትን ያበረታታል፤ የቅዱሳንን ተስፋ ያስደስታል፤ ለሚጸልዩና ዋጋውን ለመፈተን ለሚሹ ሁሉ መነሣሣትን ይሰጣል። ጸሎት ያልተሞከረ ባዶ ንድፈ አሳብ አይደለም። በሰዎች አእምሮ ተፈልስፎ በእነርሱ የተጀመረ፣ ፈጽሞ ያልተሞከረና ያልተፈተነ እንግዳ ልዩ ዘዴ ወይም ፈጠራ አይደለም። ጸሎት በእግዚአብሔር የሞራል አገዛዝ ውስጥ ያለ መለኮታዊ ዝግጅት ነው፤ ለሰዎች ጥቅም የታቀደ፣ በምድር ላይ የአምላክን ዓላማ ለማራመድና በቤዛነትና በአገልግሎተ ጥበቃው ያለውን የጸጋ ዓላማዎቹን ለመፈጸም መንገድ እንዲሆን የተሰጠ ነው። ጸሎት ራሱን ያረጋግጣል። ብቃቱ በሚጸልዩ ሰዎች ሊረጋገጥ ይችላል። ጸሎት ከሚፈጽማቸው ነገሮች ሌላ ማስረጃ አያስፈልገውም። «ፈቃዱን ሊያደርግ የሚወድ ቢኖር፥ እርሱ ይህ ትምህርት ከእግዚአብሔር ቢሆን ወይም እኔ ከራሴ የምናገር ብሆን ያውቃል።» የጸሎትን ብቃት ለማወቅ የሚወድ ቢኖር፣ ምን ሊያደርግ እንደሚችል ሊያውቅ የሚሻ ቢኖር፣ ይጸልይ። ጸሎትን ይፈትነው።

ለጸሎት የተሰጠው ስፋት ምንኛ ነው! የሚደርስበት ከፍታስ ምንኛ ነው! ጸሎት ለእግዚአብሔርና ለሰው በቅንዓት የነደደች ነፍስ እስትንፋስ ነው። ወንጌል እስከሚሄድበት ድረስ ይሄዳል፤ እንደዚያ ወንጌልም ሰፊ፣ ርኅሩኅና በጸሎት የተሞላ ነው።

እነዚህ ገና ያልተወረሱና ከእግዚአብሔር የራቁ የምድር ግዛቶች ብርሃን እንዲያገኙ፣ እንዲነኩና ወደ እግዚአብሔርና ወደ ልጁ ወደ ኢየሱስ ክርስቶስ እንዲቀርቡ ምን ያህል ጸሎት ይጠይቃሉ? የክርስቶስ ደቀ መዛሙርት ነን የሚሉ ሰዎች ባለፉት ዘመናት ሊጸልዩ በሚገባቸው መጠን ጸልየው ቢሆን ኖሮ፣ ዘመናት እነዚህን ግዛቶች አሁንም በሞት፣ በኃጢአትና በድንቁርና ታስረው ባላገኙአቸውም ነበር።

ወዮ! የሰዎች አለማመን እግዚአብሔር በጸሎት በኩል ለመሥራት ያለውን ኃይል ምንኛ ወሰነው! የኢየሱስ ክርስቶስ ደቀ መዛሙርት ባለመጸለያቸው በጸሎት ላይ ምንኛ ገደቦችን አኖሩ! ቤተ ክርስቲያን ጸሎትን ቸል በማለቷ ወንጌልን ምንኛ አጠረችው! የመግቢያ በሮችንም ምንኛ ዘጋች!

የጸሎት ዕድሎች ለወንጌል መግቢያ በሮችን ይከፍታሉ፦ «… እግዚአብሔር የቃሉን ደጅ ይከፍትልን ዘንድ ስለ እኛ ደግሞ ጸልዩ።» ጸሎት ለሐዋርያት የቃሉን ደጆች ከፈተላቸው፤ ወንጌልን ለመስበክ አጋጣሚዎችን ፈጠረ፤ መግቢያዎችንም አዘጋጀ። እግዚአብሔር በጸሎት ይንቀሳቀስ ስለ ነበረ ልመናው በጸሎት ወደ እግዚአብሔር ቀረበ። በዚህም እግዚአብሔር የራሱን ሥራ በሰፋ ሁኔታና በአዳዲስ መንገዶች እንዲሠራ ተንቀሳቀሰ። የጸሎት ዕድል ታላቅ ኃይልን የሚሰጥና ለወንጌል በሮችን የሚከፍት ብቻ ሳይሆን ለወንጌል ቅልጥፍናንም ይሰጣል። ጸሎት ወንጌል በፍጥነት እንዲሄድና በክቡር ፍጥነት እንዲገሠግሥ ያደርጋል። በጸሎት ኃያል ጉልበት የተወረወረ ወንጌል ዘገምተኛ፣ ሰነፍ ወይም ደብዛዛ አይደለም። በእግዚአብሔር ኃይል፣ በእግዚአብሔር ብርሃናዊ ክብርና በመላእክት ፍጥነት ይገሠግሣል።

«ወንድሞች ሆይ፥ የጌታ ቃል እንዲሮጥ እንዲከበርም ስለ እኛ ጸልዩ» የሚለው እምነቱ ለተሰበከው ቃል የጸሎትን ዕድሎች እስከ መጨበጥ የደረሰው የሐዋርያው የጳውሎስ ልመና ነው። ወንጌል እጅግ በዝግታ፣ ብዙ ጊዜም በፍርሃትና በደካማ እርምጃ ይጓዛል። ይህ ወንጌል እንደ ሯጭ በፍጥነት እንዲሄድ የሚያደርገው ምንድር ነው? ይህን ወንጌል መለኮታዊ ብርሃንና ክብር የሚሰጠው፣ ለእግዚአብሔርና ለክርስቶስ በሚገባ ሁኔታ እንዲገሠግሥ የሚያደርገውስ ምንድር ነው? መልሱ ቅርብ ነው። ጸሎት፣ የበዛ ጸሎት፣ የተሻለ ጸሎት ይህን ተግባር ይፈጽማል። ይህ የጸጋ መንገድ ለወንጌል ፍጥነትን፣ ግርማንና መለኮታዊነትን ይሰጠዋል።

የጸሎት ዕድሎች ሁሉን ነገር ይደርሳሉ። የሰውን ከፍተኛ ደኅንነት የሚመለከት ሁሉ፣ በምድር ላይ ስላሉ ሰዎች ከእግዚአብሔር ዕቅዶችና ዓላማዎች ጋር የሚገናኝ ሁሉ የጸሎት ጉዳይ ነው። «በስሜ የምትለምኑትን ሁሉ» በሚለው ቃል ውስጥ እኛን ወይም የሰው ልጆችን፣ እግዚአብሔርንም የሚመለከት ሁሉ ተጠቃሏል። ከዚያ «ሁሉ» ውጭ የቀረ ማንኛውም ነገር ከጸሎትም ውጭ የቀረ ነው። «ሁሉ» የሚለውን ቃል የሚያገልሉ ወይም የሚገድቡ መስመሮችን የምናሰምረው የት ላይ ነው? እስኪ ትርጉሙን ወስኑት፤ ቃሉ የማያጠቃልላቸውን ነገሮችም ፈልጋችሁ አውጡና አስታውቁ። «ሁሉ» የሚለው ቃል ሁሉን ነገር የማያጠቃልል ከሆነ «ማናቸውንም ነገር» የሚለውን ቃል ጨምሩበት። «ማናቸውንም ነገር በስሜ ብትለምኑ እኔ አደርገዋለሁ።»

የጸሎትን ዕድሎች ተምረን ቢሆን ኖሮ፣ እምነታችንም ጸሎትን ይመልስ ዘንድ እግዚአብሔር የሰጠንን የመለኮታዊ የተስፋ ቃሎች ሰፊ ክልል ጨብጦ ቢሆን ኖሮ፣ ምንኛ የጸጋ ባለጠግነት፣ ምንኛ መንፈሳዊና ምድራዊ በረከቶች፣ ለዚህ ዘመንና ለዘላለም ምንኛ መልካም ነገር የእኛ በሆነ ነበር! በታላቅ ተስፋ መጸለይን ብቻ ተምረን ቢሆን ኖሮ በዘመናችን ላይ ምንኛ በረከት፣ ለእግዚአብሔርም ዓላማ ምንኛ እድገት በሆነ ነበር! በዚህ ትውልድ ተነሥቶ ይህን ትምህርት ለቤተ ክርስቲያን የሚያስተምራት ማን ነው? በቀላልነቱ የሕፃን ትምህርት ነው፤ ነገር ግን ጸሎትን ለመፈተን በሚያስችል መጠን በሚገባ የተማረው ማን ነው? በወደር የለሽና ለሁሉ በሚዳረሰው መልካምነቱ ታላቅ ትምህርት ነው። የጸሎት ዕድሎች ሊነገሩ የማይችሉ ናቸው፤ ነገር ግን እነዚህን ዕድሎች የሚጨብጠውንና ከእነርሱ ጋር ተመጣጥኖ የሚኖረውን የጸሎት ትምህርት የተማረ ማን ነው?

ጌታችን በዮሐንስ ወንጌል በአሥራ አምስተኛው ምዕራፍ ባለው ንግግሩ ከእርሱ ጋር ያለውን ወዳጅነት ከጸሎት ጋር ያገናኘው ይመስላል፤ ደቀ መዛሙርቱንም የመረጣቸው በጸሎት በኩል ብዙ ፍሬ እንዲያፈሩ በማሰብ ይመስላል።

«እኔ ያዘዝኋችሁን ሁሉ ብታደርጉ እናንተ ወዳጆቼ ናችሁ።»

«እኔ መረጥኋችሁ እንጂ እናንተ አልመረጣችሁኝም፤ አብም በስሜ የምትለምኑትን ሁሉ እንዲሰጣችሁ፥ ልትሄዱና ፍሬ ልታፈሩ ፍሬአችሁም ሊኖር ሾምኋችሁ።»

ጸሎት ወደ ሙሉ ዕድሉ ይደርስ ዘንድ፣ አብም ይሰጥ ዘንድ፣ ኢየሱስ ፍሬ ማፍራትንና ፍሬ መኖርን — የበሰለ፣ ያልጠወለገና የበለጸገ ፍሬን — ያስቀድማል። እዚህም በጸሎት ዕድሎች ልንጸልይላቸው የሚገቡንን መብቶችና ነገሮች የሚሸፍነውን፣ ያልተወሰነውንና ገደብ የሌለውን «… የምትለምኑትን ሁሉ» የሚለውን ቃል እንደ ገና እናገኛለን።

ከኢየሱስ ዘንድ ደግሞ ሌላ አዋጅ አለን፦

«እውነት እውነት እላችኋለሁ፥ አብ በስሜ የምትለምኑትን ሁሉ ይሰጣችኋል።»

«እስከ አሁን በስሜ ምንም አልለመናችሁም፤ ደስታችሁ ፍጹም እንዲሆን ለምኑ ትቀበሉማላችሁ።»

ይህ ጌታችን በሰፊው እንድንጸልይ የሰጠን እጅግ ግልጽ ምክር ነው። እዚህ ታላላቅ ነገሮችን እንድንለምን በግልጽ ያሳስበናል፤ ይህም «እውነት እውነት» በሚለው ድርብ አሜን በተገለጠ ግርማና ክብደት ታውጇል። ጌታችን ከደቀ መዛሙርቱ ጋር ባደረገውና በመጨረሻ በተመዘገበው በዚህ ወሳኝ ንግግር ውስጥ እነዚህ አስደናቂ ማሳሰቢያዎች ለምን ተሰጡ? መልሱ፦ ጸሎት እንዲህ ያሉ አስደናቂ ውጤቶች ለሚኖሩበት፣ ጸሎትም ወንጌሉን ለመጠበቅና ወደ ፊት ለማስገሥገሥ ዋነኛ መሣሪያ ለሚሆንበት ለአዲሱ ዘመን ጌታችን ያዘጋጃቸው ዘንድ ነው።

ጌታችን ፍሬ እንዲያፈሩ ስለ መረጣቸው ለደቀ መዛሙርቱ በተናገረው ቃል፣ በዚህ በጌታችን የተትረፈረፈ አባባል፣ ይህ የመጸለይና ፍሬ የማፍራት ጉዳይ እኛ እንደ ፈለግን የምንመርጠው ተራ ነገር ወይም ከሌሎች ጉዳዮች አንጻር ሁለተኛ ደረጃ ያለው ጉዳይ እንዳልሆነ፣ ይልቁንም ለዚሁ ለመጸለይ ሥራ እርሱ እንደ መረጠን በግልጽ ያስተምረናል። በተለይ በአእምሮው የያዘው መጸለያችንን ነበር፤ በገዛ መለኮታዊ ምርጫው መረጠን፤ ይህን አንድ የመጸለይ ነገር እንድናደርግ፣ በማስተዋልና በሚገባም እንድናደርገው ይጠብቅብናል። አስቀድሞ ወዳጆቹ እንዳደረገን፣ ወደ ቅርብ የልብ ምሥጢሩ እንዳስገባን፣ ከእርሱም ጋር በነጻና በሙሉ መመካከር እንዳገባን ተናግሮአልና። እኛን ደቀ መዛሙርቱ አድርጎ የመምረጡና ከእርሱ ጋር ያለን ወዳጅነት ዋናው ዓላማ የጸሎትን ፍሬ ለማፍራት ይበልጥ እንድንበቃ ነበር።

እውነተኛ ጸላዮች ያላቸውን ዕድሎች እየተመለከትን መሆናችንን አንርሳ። «ማናቸውንም ነገር» የሚለው የስፋትና የዙሪያ ቃል ነው። እስከ ምን ድረስ እንደሚደርስ ላናውቅ እንችላለን። ምን ያህል እንደሚሰፋ አእምሮአችን ሊደርስበት አይችልም። ከሚደርስበት ውጭ የሆነ ምን ነገር አለ? ኢየሱስ የጸሎትን ወሰን የለሽ ግርማና ልክ የሌለውን ለጋስነት አጽንቶ ለማሳየት ባይፈልግ ኖሮ እነዚህን ሁሉን አቃፊና ወሰን የለሽ ቃላት ለምን ይደጋግማቸዋል? ለምንስ እስከ ጥግ ድረስ ይጠቀምባቸዋል? ድህነታችን እንዲበለጽግና በጸሎት የሚገኘው ወሰን የለሽ ርስታችን እንዲረጋገጥልን ሰዎች እንዲጸልዩ ለምን አጥብቆ ያሳስባቸዋል?

ሁሉን የሚችል እግዚአብሔር ጸሎትን እንደሚመልስ በፍጹም እርግጠኝነት እናረጋግጣለን። የጸሎት ሰፊ ዕድሎችና አስቸኳይ አስፈላጊነት የተመሠረቱት እግዚአብሔር ጸሎትን ይሰማል ይመልስማል በሚለው በዚህ ታላቅ እውነታ ላይ ነው። እግዚአብሔር ጸሎትን ሁሉ ይሰማል ይመልሳልም። የእውነተኛ ጸሎት ቅድመ ሁኔታዎች በተሟሉበት ስፍራ ሁሉ ጸሎትን ሁሉ ይሰማል ይመልሳልም። ይህ ወይ እውነት ነው ወይ አይደለም። እውነት ካልሆነ በጸሎት ውስጥ ምንም ነገር የለም። ያን ጊዜ ጸሎት ቃላትን መደጋገም፣ የቃል ትርኢት ብቻ፣ ባዶ ሥርዓት ነው። ያን ጊዜ ጸሎት ፈጽሞ ከንቱ ልምምድ ነው። እኛ የተናገርነው ግን እውነት ከሆነ በጸሎት ውስጥ ሰፊ ዕድሎች አሉ። ያን ጊዜ ጸሎት በክልሉ እጅግ ሩቅ የሚደርስ ነው፤ ስፋቱም ታላቅ ነው። ያን ጊዜ ጸሎት እጁን ሁሉን በሚችል አምላክ ላይ መጫንና ታላላቅና አስደናቂ ነገሮችን እንዲያደርግ ማንቀሳቀስ እንደሚችል እውነት ነው።

የጸሎት ጥቅሞች፣ ዕድሎችና አስፈላጊነት በጸላዩ ውስጥ ብቻ የሚወሰኑ አይደሉም፤ ይልቁንም በባሕርያቸው በተለይ ከጸላዩ ውጭ ወዳለ ዓላማ የሚያነጣጥሩ ናቸው። ጸሎት የተወሰነ ዓላማ ላይ ያነጣጥራል። ጸሎት ቀጥተኛ ዕቅድ በፊቱ አለው። ጸሎት ሁልጊዜ በአእምሮ ዓይን ፊት አንድ የተለየ ነገር አለው። ከመጸለይ የተነሣ በውስጥ የሚገኙ አንዳንድ ጥቅሞች ሊኖሩ ይችላሉ፤ ይህ ግን ፈጽሞ ሁለተኛ ደረጃና ተጓዳኝ ነው። ጸሎት ሁልጊዜ ወደ አንድ ዓላማ በቀጥታ ያመራል፤ የሚፈለገውንም ፍጻሜ ለማግኘት ይጥራል። ጸሎት የሌለንን፣ የምንፈልገውንና እግዚአብሔር ተስፋ የሰጠንን ነገር ለማግኘት መለመን፣ መፈለግና በር ማንኳኳት ነው።

ጸሎት በቀጥታ ለእግዚአብሔር የሚቀርብ ንግግር ነው። «በነገር ሁሉ በጸሎትና በምልጃ ከምስጋና ጋር በእግዚአብሔር ዘንድ ልመናችሁን አስታውቁ።» ጸሎት የእግዚአብሔርን ጆሮ ስለሚደርስ በረከቶችን ያስገኛል፤ ሰዎችንም ያሻሽላል። ጸሎት ሰዎችን የሚያሻሽለው እግዚአብሔርን ነክቶ ለሰዎች አንድ ነገር እንዲያደርግ ሲያንቀሳቅሰው ብቻ ነው። ጸሎት ሰዎችን የሚነካው እግዚአብሔርን በመንካት ነው። ጸሎት ሰዎችን የሚያንቀሳቅሰው ሰዎችን እንዲያንቀሳቅስ እግዚአብሔርን ስለሚያንቀሳቅስ ነው። ጸሎት በሰዎች ላይ ተጽዕኖ የሚያሳድረው በእነርሱ ላይ ተጽዕኖ እንዲያሳድር በእግዚአብሔር ላይ ተጽዕኖ በማሳደር ነው። ጸሎት ዓለምን የሚያንቀሳቅሰውን እጅ ያንቀሳቅሳል።

«ያ ኃይል ጸሎት ነው፣ ወደ ላይ የሚመጥቅ፣ በኢየሱስ በኩል ወደ ዙፋኑ፤ ዓለምን የሚያንቀሳቅሰውንም እጅ ያንቀሳቅሳል፣ መዳንን ወደ ምድር ያወርድ ዘንድ።»

የጸሎት የመጨረሻ ዕድሎች የተጨበጡት እጅግ አልፎ አልፎ ነው። እግዚአብሔር ራሱን እንዲህ በሙላት በጸላዮች እጅ ሲሰጥ፣ በእውነት ለሚጸልዩ የሰጣቸው የተስፋ ቃሎች እጅግ ታላላቅ ከመሆናቸው የተነሣ እምነታችንን ሊያንገዳግዱትና በመደነቅ እንድናመነታ ሊያደርጉን ይቃረባሉ። «ሁሉን»፣ «ማናቸውንም ነገር»፣ «… ሁሉ»፣ «… የምትለምኑትን ሁሉ» ሊመልስ፣ ሊያደርግና ሊሰጥ የሰጠው የተስፋ ቃል እጅግ ሰፊ፣ እጅግ ታላቅና ከመጠን በላይ ስፋት ያለው ከመሆኑ የተነሣ በመደነቅ ወደ ኋላ እንቆማለን፤ ራሳችንንም ለጥያቄና ለጥርጣሬ አሳልፈን እንሰጣለን። በተስፋ ቃሎቹ «ባለማመን እንጠራጠራለን»። በእውነቱ የእግዚአብሔርን የተስፋ ቃሎች ለጸሎት እኛ ወደ ትንሿ እምነታችን መጠን ቀርጸን አሳንሰናቸዋል፤ ስለ እግዚአብሔር ችሎታ፣ ለጋስነትና ሀብት ወዳለን ጠባብ አሳብ ዝቅተኛ ደረጃ አውርደናቸዋል። እግዚአብሔር በተስፋ ቃሎቹ ሁሉ የሚናገረውን ማለቱ እንደ ሆነ ዘወትር እናስብ፤ ይህንንም ለአንዲት ቅጽበት እንኳ እንድንጠራጠር ለራሳችን ፈጽሞ አንፍቀድ። የእግዚአብሔር የተስፋ ቃሎች የገዛ ቃሉ ናቸው። እውነተኛነቱ በእነርሱ ውስጥ ተይዟል። እነርሱን መጠራጠር እውነተኛነቱን መጠራጠር ነው። ለቃሉ የማይታመን ሆኖ መገኘት ከቶ አይሆንለትም። «የማይዋሽ እግዚአብሔር ከዘላለም ዘመናት በፊት ተስፋ በሰጠው በዘላለም ሕይወት ተስፋ።» የተስፋ ቃሎቹ ለተራ ሰዎች ናቸው፤ ለሚጸልዩትም ሁሉ አደርገዋለሁ ያለውን ልክ ሊያደርግ ያስባል። «የተስፋን ቃል የሰጠው የታመነ ነውና።»

የሚያሳዝነው ራሳችንን በጸሎት አላፈሰስንም። የእስራኤልን ቅዱስ ወስነነዋል። የመጸለይ ችሎታ በመንፈስ ቅዱስ ጸጋና ኃይል ሊገኝ ይችላል፤ ነገር ግን እጅግ ብርቱና ከፍ ያለ ባሕርይ ስለሚጠይቅ አንድ ወንድ ወይም ሴት «በጸሎት መቆሚያ ላይ ሆኖ ከእግዚአብሔር ጋር በልመና መነጋገር የሚችልበት ግንኙነት» ውስጥ መገኘቱ ብርቅ ነገር ነው። «የጻድቅ ሰው ጸሎት በሥራዋ እጅግ ኃይል ታደርጋለች» የሚለው ቃል በኤልያስ ዘመን እውነት እንደ ነበረ ዛሬም እንዲሁ እውነት ነው። እንዲህ ያለው ጸሎት ምን ያህል ኃይል እንደሚያደርግ ማን ሊናገር ይችላል?

የጸሎት ዕድሎች የእምነት ዕድሎች ናቸው። ጸሎትና እምነት እንደ ተጣበቁ መንታዎች ናቸው። ሁለቱንም አንድ ልብ ሕያው ያደርጋቸዋል። እምነት ሁልጊዜ ይጸልያል። ጸሎት ሁልጊዜ ያምናል። እምነት የሚናገርበት አንደበት ሊኖረው ይገባል። ጸሎት የእምነት አንደበት ነው። እምነት መቀበል አለበት። ጸሎት ለመቀበል የተዘረጋች የእምነት እጅ ናት። ጸሎት መነሣትና መምጠቅ አለበት። እምነት ለጸሎት የሚበርበትንና የሚመጥቅበትን ክንፍ ሊሰጠው ይገባል። ጸሎት በእግዚአብሔር ፊት መቅረብ አለበት። እምነት በሩን ይከፍታል፤ መግባትና በፊቱ መቅረብም ይሰጣል። ጸሎት ይለምናል። እምነት በተለመነው ነገር ላይ እጁን ይጭናል።

የእግዚአብሔር ሁሉን የሚችል ኃይል ሁሉን ለሚችል እምነትና ሁሉን ለሚችል ጸሎት መሠረት ነው። «ለሚያምን ሁሉ ይቻላል»፤ «በጸሎት የምትለምኑትን ሁሉ» ደግሞ ለሚጸልይ ይሰጠዋል። የእግዚአብሔር ውሳኔና ሞት ለሕዝቅያስ እምነትና ጸሎት ወዲያውኑ ተሸነፉ። የእግዚአብሔር የተስፋ ቃልና የሰው ጸሎት በእምነት ሲዋሐዱ ያን ጊዜ «የሚሳናችሁም ነገር የለም»። ጽኑ ጸሎት እጅግ ሁሉን የሚችልና የማይቋቋሙት ከመሆኑ የተነሣ የተስፋ ቃሎችን ያገኛል፤ ወይም ሁኔታውም ሆነ የተስፋ ቃሉ የሚቃወሙት በሚመስሉበት ስፍራ እንኳ ያሸንፋል። በእውነቱ የአዲስ ኪዳን የተስፋ ቃል በሰማይና በምድር ያለውን ሁሉ ያጠቃልላል። እግዚአብሔር በተስፋ ቃሉ ያለውን ሁሉ በሰው እጅ ያኖራል። ጸሎትና እምነት ሰውን የዚህ ወሰን የለሽ ርስት ባለቤት ያደርጉታል።

ጸሎት ግድ የማይሰጥ ወይም ትንሽ ነገር አይደለም። ጣፋጭ ትንሽ መብት አይደለም። ውጤቱ እጅግ ሩቅ የሚደርስ ታላቅ ልዩ መብት ነው። አለመጸለይ ቸል ካለው ሰው እጅግ የሚያልፍ ኪሳራ ያስከትላል። ጸሎት በክርስቲያናዊ ሕይወት ውስጥ እንዲሁ የሚያልፍ አጋጣሚ አይደለም። ይልቁንም ሕይወት ሁሉ ለጸሎት ዝግጅትና የጸሎት ውጤት ነው። በሁኔታው ጸሎት የሃይማኖት ድምር ነው። እምነት የጸሎት መተላለፊያ ብቻ ነው። እምነት ለጸሎት ክንፍንና ፍጥነትን ይሰጠዋል። ጸሎት ቅድስና የሚተነፍስበት ሳንባ ነው። ጸሎት የመንፈሳዊ ሕይወት ቋንቋ ብቻ ሳይሆን ዋናውን ማንነቱን ይሠራል፤ እውነተኛ ባሕርዩንም ይቀርጻል።

«ኦ የማትሸሽ እምነት ብትኖረኝ፣ ጠላት ሁሉ ቢገፋትም፤ በምድራዊ መከራ ሁሉ አፋፍ ላይ፣ የማትንቀጠቀጥ እምነት።»

«ጌታ ሆይ፣ እንዲህ ያለች እምነት ስጠን፤ ከዚያም የሚመጣው ቢመጣ፣ የዘላለም ቤታችንን ቅዱስ ደስታ፣ እዚሁ እንኳ እንቀምሳለን።»