የጸሎት ተአምራት

በደርቢ ከተማ ይኖር የነበረው የሚድላንድ የባቡር መስመር ሾፌር ጆርጅ ቤንፊልድ፣ ባቡሩ ቆሞ ሳለ በሞተሩ መቆሚያ መድረክ ላይ ቆሞ ሞተሩን ዘይት እየቀባ ነበር፤ በድንገትም እግሩ አዳለጠውና በሐዲዶቹ መካከል ባለው ክፍተት ላይ ወደቀ። ፈጣኑ ባቡር ሲመጣ ሰማ፤ «ስድስት ጫማ» በሚባለው በሁለቱ መስመሮች መካከል ባለው ቦታ ላይ በሙሉ ቁመቱ ለመተኛት ብቻ የሚበቃ ጊዜ ነበረው፤ ባቡሩም እየተምዘገዘገ አለፈ፤ እርሱም ምንም ጕዳት ሳይደርስበት ተረፈ። በእኩለ ሌሊት ወደ ቤቱ ተመለሰ፤ ደረጃውን ወጥቶ ወደ ላይ ሲሄድም ከልጆቹ አንዲቱ፣ ስምንት ዓመት ገደማ የሆናት ልጅ፣ ስታለቅስና ስትንሰቀሰቅ ሰማ። እርሷም፦ «አባዬ ሆይ፣ አንድ ሰው መጥቶ ልትገደል እንደ ሆነ የነገረኝ መሰለኝ፤ ከአልጋዬም ወርጄ እግዚአብሔር እንድትሞት እንዳይፈቅድ ጸለይሁ» አለችው። ይህ ሕልም ብቻ ነበርን? ወይስ በአጋጣሚ የሆነ ግጥምጥሞሽ? ጆርጅ ቤንፊልድና ሌሎችም ሕይወቱ የተረፈው በዚያ ጸሎት እንደ ሆነ አመኑ።

— ዲን ሆል

የጌታችን የኢየሱስ ክርስቶስ ምድራዊ ሕይወት በዘላለማዊ ሕይወቱ ውስጥ እንደ መሸጋገሪያ ያለ ተራ ክስተት አልነበረም። በምድር ላይ የነበረው ማንነቱና ያደረገው ሥራ ከተለመደው ውጭ ወይም ከባሕርዩ ያፈነገጠ ሳይሆን ባሕርዩን የሚገልጥ ነበር። በምድር ላይ የነበረው ማንነቱና ያደረገው ሥራ፣ በሰማይ ያለው ማንነቱና አሁን እየሠራ ያለው ሥራ ምሳሌና ማሳያ ብቻ ነው። እርሱ «ትናንትና ዛሬ እስከ ለዘላለምም ያው ነው።» ይህ ቃል የባሕርዩ ዘላለማዊ አንድነትና አለመለወጥ መለኮታዊ ማጠቃለያ ነው። ምድራዊ ሕይወቱ በአብዛኛው ጸሎትን በመስማትና በመመለስ የተሞላ ነበር። ሰማያዊ ሕይወቱም ለዚሁ መለኮታዊ ሥራ የተሰጠ ነው። በእውነቱ ብሉይ ኪዳን እግዚአብሔር ጸሎትን እንደሚሰማና እንደሚመልስ የሚዘግብ መዝገብ ነው። መጽሐፍ ቅዱስ በሙሉ በአብዛኛው የሚያወሳው ስለዚህ እጅግ አስፈላጊ ጉዳይ ነው።

የክርስቶስ ተአምራት በተግባር የሚታዩ ትምህርቶች ናቸው። ሕያዋን ሥዕሎች ናቸው። ይናገሩናል። የሚይዙን እጆች አሏቸው። እነዚህ ተአምራት ብዙ ጠቃሚ ትምህርቶችን ያስተምሩናል። በልዩ ልዩነታቸው ያድሱናል። የኢየሱስ ክርስቶስን ወደር የሌለው ኃይል ያሳዩናል፤ በዚያው ጊዜም ለሚሠቃየው የሰው ልጅ ያለውን አስደናቂ ርኅራኄ ይገልጡልናል። እነዚህ ተአምራት አሠራሩን ማለቂያ በሌለው ሁኔታ የማለዋወጥ ችሎታውን ይገልጡልናል። እግዚአብሔር ከሰው ጋር የሚሠራበት መንገድ በሁሉም ሁኔታ አንድ ዓይነት አይደለም። ጸጋውን በማይለወጥ ቦይ ውስጥ ብቻ አያፈስስም። በእንቅስቃሴዎቹ ማለቂያ የሌለው ልዩነት አለ። በአሠራሩ አስደናቂ ብዝኀነት አለ። ፍጥረታቱን በአንድ ዓይነት ቅርጽ አይቀርጻቸውም። ልክ እንዲሁ ጌታችን በአሠራሩ የተገደበ አይደለም፤ በናሙናዎችም አይታሰርም። ራሱን ችሎ ይሠራል። የራሱ ንድፍ አውጪ ነው። ወሰን የሌለው ልዩነት ያላቸውን የራሱን ንድፎች ያዘጋጃል።

የጌታችንን ተአምራት ስንመለከት ብዙዎቹ ያለ ቅድመ ሁኔታ እንደ ተፈጸሙ እናገኛለን። ቢያንስ መለኮታዊው መዝገብ እስከሚያሳየው ድረስ ከእነርሱ ጋር የተያያዘ ቅድመ ሁኔታ አልነበረም። ይህ ዓይነቱ ተአምር የተደረገው ማንም ሳይለምነው በራሱ ፈቃድ፣ እግዚአብሔርን ለማክበርና የራሱን ክብርና ኃይል ለመግለጥ ነበር። ብዙዎቹ ታላላቅ ሥራዎቹ የተፈጸሙት ርኅራኄው ተነሣሥቶ፣ የመከራና የችግር ጥሪ ሲደርሰው፣ እንዲሁም ኃይሉ ሲጠራው ነበር። ነገር ግን አያሌዎቹን ያደረገው ለጸሎት መልስ ሆኖ ነበር። አንዳንዶቹ የተደረጉት የተጐሳቈሉት ሰዎች ራሳቸው ላቀረቡት የግል ጸሎት መልስ ሆነው ነው። ሌሎቹ ደግሞ የተጐሳቈሉት ሰዎች ወዳጆች ላቀረቡት ጸሎት መልስ ሆነው ተፈጸሙ። ለጸሎት መልስ ሆነው የተደረጉት እነዚያ ተአምራት ስለ ጸሎት ጥቅም እጅግ አስተማሪዎች ናቸው።

ቅድመ ሁኔታ ባላቸው በእነዚህ ተአምራት ውስጥ እምነት ቀዳሚውን ስፍራ ይይዛል፤ ጸሎትም የእምነት እንደራሴ ነው። እምነት የክርስቶስ ኃይል የሚሠራበት መሠረት የሆነ ቅድመ ሁኔታ፣ ወይም ኃይሉ የሚፈስበት መስመር ምን ያህል አስፈላጊ እንደ ሆነ የሚያሳይ ምሳሌ፣ ወደ ናዝሬት ባደረገው ጉብኝትና በውጤቱ፣ ይልቁንም ውጤት በማጣቱ ታሪክ ውስጥ እናገኛለን። የሁኔታው መዝገብ ይህ ነው፦

«በዚያም በጥቂቶች ድውዮች ላይ እጁን ጭኖ ከመፈወስ በቀር፥ ተአምር ሊያደርግ ምንም አልቻለም።

ስለ አለማመናቸውም ተደነቀ።»

እነዚያ የናዝሬት ሰዎች ጌታችንን ሙታናቸውን እንዲያስነሣ፣ ወይም የዕውራንን ዓይን እንዲከፍት፣ ወይም ለምጻሞችን እንዲፈውስ ለምነውት ሊሆን ይችላል፤ ነገር ግን ሁሉም ከንቱ ነበር። ምንም ያህል ሥርዓት ቢታይ፣ የእምነት አለመኖር የእግዚአብሔርን ኃይል አሠራር ይገታል፣ የክርስቶስን ክንድ ያሽመደምዳል፣ የሕይወትንም ምልክቶች ሁሉ ወደ ሞት ይለውጣል። ሁሉን የሚችለውን እግዚአብሔር ታላላቅ ሥራዎችን እንዳይሠራ ክፉኛ የሚያግደው አንዱ ነገር አለማመን ነው። ማቴዎስ ስለዚህ የናዝሬት ጉብኝት የጻፈው መዝገብ፦ «በአለማመናቸውም ምክንያት በዚያ ብዙ ተአምራት አላደረገም» ይላል። እምነት ማጣት ሁሉን የሚችለው እግዚአብሔር በሰው ልጆች መካከል በሚሠራው ሥራ እጆቹን ያስራል። ወደ ክርስቶስ የሚቀርብ ጸሎት ሁልጊዜ በእምነት ላይ የተመሠረተ፣ በእምነት የተደገፈና በእምነት የተሞላ መሆን አለበት።

በጌታችን ምድራዊ ሕይወት ውስጥ የተአምራት ሁሉ ተአምር የሆነው የአልዓዛር ከሙታን መነሣት ከጸሎት ጋር በመያያዙ የተለየ ነበር። በእውነቱ በበኣል ነቢያትና በኤልያስ መካከል እንደ ነበረው ያለ በጸሎት የሚለይ ፍጥጫ ነበር። ለእርዳታ የቀረበ ጸሎት አልነበረም። የምስጋናና የተረጋገጠ መተማመን ጸሎት ነበር። እናንብበው፦

«ኢየሱስም ዓይኖቹን ወደ ላይ አንሥቶ እንዲህ አለ፦ አባት ሆይ፥ ስለ ሰማኸኝ አመሰግንሃለሁ።

ሁልጊዜም እንድትሰማኝ አወቅሁ፤ ነገር ግን አንተ እንደ ላክኸኝ ያምኑ ዘንድ በዚህ ዙሪያ ስለ ቆሙት ሕዝብ ተናገርሁ።»

ጸሎቱ በዋነኛነት የቀረበው በዚያ ለነበሩት ሰዎች ጥቅም ነበር፤ ጸሎቱን ስለ መለሰለት እግዚአብሔር ከእርሱ ጋር እንደ ሆነ እንዲያውቁ፣ በእግዚአብሔርም ላይ ያለ እምነት በልባቸው እንዲፈነጥቅ ነው።

የተመለሱ ጸሎቶች አንዳንድ ጊዜ ከሁሉ ይበልጥ የሚያሳምኑና እምነትን የሚወልዱ ኃይሎች ናቸው። ያልተመለሱ ጸሎቶች ግን አየሩን ያቀዘቅዛሉ፤ የእምነትንም አፈር እንደ በረዶ ያጠነክራሉ። ክርስቲያኖች ጸሎታቸው እንዲመለስላቸው፣ ከእግዚአብሔር ዘንድ ግልጽ፣ ፈጣንና በሚታይ ሁኔታ የሚገለጥ መልስ እንዲያገኙ እንዴት መጸለይ እንዳለባቸው ቢያውቁ ኖሮ፣ እምነት ይበልጥ በሰፊው ይሰራጭ፣ ይበልጥ የተለመደ ይሆን፣ ይበልጥ ጥልቅ ይሆን፣ በዓለምም ውስጥ እጅግ ታላቅ ኃይል ይሆን ነበር።

የመቶ አለቃው ብላቴና የተፈወሰበት ተአምር እንዴት ያለ ውድ የእምነትና የምልጃ ጸሎት ትምህርት ያመጣልናል! የዚህ ሮማዊ መኮንን እምነት ቅለትና ብርታት አስደናቂ ነው፤ ልመናው እንዲፈጸምለት ጌታችን በቀጥታ ወደ ቤቱ መሄድ እንደማያስፈልገው አምኗልና፦ «ነገር ግን ቃል ብቻ ተናገር፥ ብላቴናዬም ይፈወሳል።» ጌታችንም፦ «እውነት እላችኋለሁ፥ በእስራኤል እንኳ እንዲህ ያለ ትልቅ እምነት አላገኘሁም» በማለት በዚህ ሰው እምነት ላይ ምልክቱን አኖረ። የዚህ ሰው ጸሎት የብርቱ እምነቱ መግለጫ ነበር፤ እንዲህ ያለውም እምነት መልሱን ፈጥኖ አመጣ።

ያንኑ ውድ ትምህርት ስለ ተጐሳቈለችው ልጇ ወደ ጌታችን ከሄደችው ከሲሮፊኒቃዊቷ ሴት የጸሎት ተአምር እናገኛለን፤ እርሷ፦ «ጌታ ሆይ፥ እርዳኝ» ብላ በመማጸን የልጇን ጉዳይ የራሷ ጉዳይ አደረገችው። ይህ ጽናት ነበር፤ አጥብቆ መያዝ፣ ጉዳይን መግፋት፣ መልቀቅንና እምቢ መባልን አለመቀበል ነበር። የምልጃ ጸሎትና የበረከቱ ብርቱ ምሳሌ ነበር። ጌታችን ለጊዜው የገፋት ቢመስልም በመጨረሻ እሺ አላት፤ በብርቱ እምነቷም ላይ ማኅተሙን አሳረፈ፦ «አንቺ ሴት፥ እምነትሽ ታላቅ ነው፤ እንደወደድሽ ይሁንልሽ።» ስለ ሌሎች መጸለይና ስለሚያስገኘው ታላቅ በረከት እንዴት ያለ ትምህርት ነው!

የተጐሳቈሉት ሰዎች ራሳቸው ስለ ራሳቸው የማለዱባቸውን የግል ታሪኮች መጥቀስ ይቻላል፤ እነርሱም ጌታችን ለተጨነቁት ሰዎች ጩኸት መልስ ሆኖ ድንቅ ነገሮችን ያደረገባቸው ምሳሌዎች ናቸው። የወንጌላውያንን መዝገብ ስናነብ፣ ገጾቹ ለጸሎት መልስ ሆነው በተደረጉ የጌታችን ተአምራት ታሪኮች ያንጸባርቃሉ ማለት ይቻላል፤ ይህም በዚህ በመለኮት በተሾመው የጸጋ መንገድ የተፈጸሙትን ድንቅ ነገሮች ያሳያል።

ወደ ብሉይ ኪዳን ዘመን ብንመለስ የጸሎት ተአምራት ምሳሌዎች አይጐድሉንም። የዚያ ዘመን ቅዱሳን ጸሎት እግዚአብሔርን ታላላቅ ነገሮች እንዲያደርግ የማንቀሳቀስ ኃይል እንዳለው ጠንቅቀው ያውቁ ነበር። ሁሉን የሚችለው እግዚአብሔር የሚጸልዩ ልጆቹ ሲማጸኑት የተፈጥሮ ሕጎች መንገዱን አልዘጉበትም። ፈርዖን እግዚአብሔርን ያገለግሉ ዘንድ የእስራኤልን ልጆች እንዲለቅቅ ለማድረግ እነዚያ ተከታታይ መቅሠፍቶች በግብፅ ላይ በወረዱ ጊዜ የሙሴ ታሪክ እንዴት ያለ አስደናቂ መዝገብ ነው! እነዚያ መቅሠፍቶች አንዱ ከሌላው ቀጥሎ በመጡ ጊዜ ፈርዖን ሙሴን፦ «ይህን ሞት ያርቅ ዘንድ ወደ አምላካችሁ ወደ እግዚአብሔር ለምኑ» እያለ ይማጸነው ነበር። መቅሠፍቶቹ ራሳቸው ተአምራት እንደ ነበሩ፣ ሁሉን የሚችለው እግዚአብሔር ልክ እንደ ላካቸው ፈጥኖ ጸሎት አስወገዳቸው። እነዚህን አጥፊ መቅሠፍቶች በግብፅ ላይ የላከው ያው እጅ በባሪያው በሙሴ ጸሎት ተነሣሥቶ እነዚያኑ መቅሠፍቶች አስወገደ። ለጸሎት መልስ ሆኖ የመቅሠፍቶቹ መወገድ፣ በመጀመሪያ መቅሠፍቶቹ እንደ መላካቸው ያህል አስደናቂ የመለኮታዊ ኃይል መገለጥ ነበር። ለጸሎት መልስ ሆኖ የተደረገው መወገድ፣ ልክ መቅሠፍቶቹ ራሳቸው እንደሚያደርጉት፣ የእግዚአብሔርን ህልውናና ኃይል ያሳይ ነበር። የጸሎት ተአምራት ነበሩ።

በብሉይ ኪዳን ዘመን ከዳር እስከ ዳር እነዚህን የጸሎት ተአምራት እናያለን። የሚጸልዩት የእግዚአብሔር ባሪያዎች ጸሎት አስደናቂ ውጤቶችን እንደሚያመጣና ከተፈጥሮ በላይ የሆነውን ወደ ምድር ጉዳዮች እንደሚያስገባ ቅንጣት ታህል አልተጠራጠሩም። ተአምራትና ጸሎት እጅ ለእጅ ተያይዘው ይሄዱ ነበር። ባልንጀሮች ነበሩ። አንዱ ምክንያት፣ ሌላው ውጤት ነበር። አንዱ ሌላውን ያስገኝ ነበር። ተአምሩ እግዚአብሔር ጸሎትን እንደሚሰማና እንደሚመልስ ማረጋገጫ ነበር። ተአምሩ በሰማይ ያለው እግዚአብሔር በምድር ጉዳዮች ውስጥ እንደሚገባ፣ ሰዎችን ለመርዳት ጣልቃ እንደሚገባ፣ አስፈላጊ ከሆነም ለጸሎት መልስ ሆኖ ዓላማውን ለመፈጸም ከተፈጥሮ በላይ በሆነ መንገድ እንደሚሠራ የሚያሳይ መለኮታዊ ማስረጃ ነበር።

ወደ ጥንቲቱ ቤተ ክርስቲያን ዘመን ስንሻገር ያንኑ የጸሎት ተአምራት መለኮታዊ መዝገብ እናገኛለን። ዶርቃ እንደ ሞተችና እርሱም በኢዮጴ እንደሚፈለግ የሚገልጽ አሳዛኝ ወሬ ወደ ጴጥሮስ መጣ። እርሱም ፈጥኖ ወደዚያ ስፍራ ሄደ። ጴጥሮስ ሁሉን ከክፍሉ ወደ ውጭ አስወጣ፤ ከዚያም ተንበርክኮ ጸለየ፤ በእምነትም፦ «ጣቢታ ሆይ፥ ተነሺ» አለ፤ እርሷም ዓይኖቿን ከፈተች፣ ቀና ብላም ተቀመጠች። ጴጥሮስ ተንበርክኮ የሠራው ሥራ ጉዳዩን ፈጸመው። ጸሎት ነገሮችን አስፈጸመ፤ ዶርቃንም በምድር ላይ ለተጨማሪ ሥራ አተረፋት።

ጳውሎስ በጠባቂዎች ተይዞ ወደ ሮሜ በሚያደርገው በዚያ የታወቀ ጉዞ ላይ ነበር፤ መርከቡም ተሰብሮ በአንዲት ደሴት ላይ ወድቆ ነበር። የደሴቲቱ አለቃ ፑፕልዮስ ነበረ፤ ሽማግሌው አባቱም በደም ተቅማጥ ክፉኛ ታሞ ነበር። ጳውሎስ እጁን በሽማግሌው ላይ ጭኖ ጸለየለት፤ እግዚአብሔርም ለእርዳታ ደረሰ፤ የታመመውንም ሰው ፈወሰው። ጸሎት የተፈለገውን ነገር አስፈጸመ። እግዚአብሔር የተፈጥሮን ሕጎች ለጊዜው አቁሞ ወይም ወደ ጎን አድርጎ በእነርሱ ላይ ጣልቃ ገባ፤ የዚህንም የሚጸልይ ባሪያውን ጸሎት መለሰ። በእነዚያ አረማውያን ሰዎች መካከል የተገኘው የጸሎት መልስ ከተፈጥሮ በላይ የሆነ ኃይል በመካከላቸው እየሠራ እንደ ሆነ አሳመናቸው። እንዲያውም ይህ እጅግ እውነት ከመሆኑ የተነሣ ከተፈጥሮ በላይ የሆነ አንድ አካል ወደ መካከላቸው እንደ መጣ ያሰቡ ይመስሉ ነበር።

ሄሮድስ ያዕቆብን በሰይፍ ከገደለው በኋላ ጴጥሮስን በወኅኒ አስገባው። ወጣቲቱ ቤተ ክርስቲያን እጅግ ተጨነቀች፤ ነገር ግን ምእመናኑ ተስፋ አልቈረጡም፤ ራሳቸውንም ለማያስፈልግ ብስጭትና ጭንቀት አሳልፈው አልሰጡም። ከዚህ በፊት ረድኤታቸው ከወዴት እንደሚመጣ ተምረው ነበር። በጸሎት ትምህርት ቤት ሠልጥነው ነበር። እግዚአብሔር ቀደም ብሎ ስለ ባሪያዎቹ ጣልቃ ገብቶ ነበር፤ ዓላማውም አደጋ ላይ በወደቀ ጊዜ ገብቶ ነበር። «በቤተ ክርስቲያን ስለ እርሱ ወደ እግዚአብሔር ጸሎት አጥብቆ ይደረግ ነበር።» መልአክ በፈጣን ክንፎች ለእርዳታ ይመጣል፤ በአስደናቂና ከተፈጥሮ በላይ በሆነ መንገድም ጴጥሮስን ፈትቶ የወኅኒውን በሮች እንደ ተቈለፉ ይተዋቸዋል። ሕዝቡ በጸሎት ወደ እርሱ በሚጮኹ ጊዜ፣ ቍልፎች፣ የወኅኒ በሮችና ጠላት የሆነ ንጉሥ ሁሉን የሚችለውን እግዚአብሔር ሊያግዱት አይችሉም። የተስፋ ቃሎቹን ለመፈጸምና ዕቅዶቹን ወደ ፊት ለማራመድ አስፈላጊ ከሆነ ስለ እነርሱ ተአምራት ይደረጋሉ። የእግዚአብሔር ቃል «የጸሎት ተአምራት» ሊባሉ በሚችሉት ነገሮች አማካይነት የጸሎትን ዕድሎች በዚህ መንገድ ያሳያል፣ ያሰፋል፣ ያጸናልም።

ከመስፋታችን በኋላ ጭንቀታችን እንዴት ፈጥኖ ይከተላል! እግዚአብሔር በሶምሶን በኩል አስደናቂ ሥራ ሠራ፤ በአንድ ተራ መሣሪያ፣ በአህያ መንጋጋ፣ አንድ ሺህ ሰዎችን እንዲገድል አስችሎ ታላቅ ማዳን ሰጠው። ብዙም ሳይቆይ ከልክ በላይ ተጠማ፤ ውኃም ሊያገኝ አልቻለም። በውኃ ጥም የሚጠፋ መሰለ። እግዚአብሔር ከፍልስጥኤማውያን እጅ አድኖት ነበር። ከውኃ ጥምስ ሊያድነው አይችልምን? ስለዚህ ሶምሶን ወደ እግዚአብሔር ጮኸ፤ «እግዚአብሔርም በመንጋጋው ውስጥ የነበረውን ጕድጓድ ሰነጠቀ፥ ከእርሱም ውኃ ወጣ፤ በጠጣም ጊዜ መንፈሱ ተመለሰች፥ ተጠናከረም።» እግዚአብሔር በመንጋጋው ለሶምሶን ድል እንደ ሰጠው ሁሉ ከመንጋጋውም ውኃ ማውጣት ይችል ነበር። እግዚአብሔር ለጠላቶቹ ሞትን ያመጣውን ነገር ለውጦ ለባሪያው ሕይወት ሰጪ ሊያደርገው ይችል ነበር። እግዚአብሔር ጠላቶቹን ለማጥፋት ተአምር ከመሥራት ይልቅ ወዳጆቹን ለማዳን ለጸሎት መልስ ሆኖ ተአምር ለመሥራት ይቀድማል፤ ይሠራልም። ይሁን እንጂ ሁለቱንም ለጸሎት መልስ ሆኖ ያደርጋል።

የተፈጥሮ ኃይሎች ሁሉ በእግዚአብሔር ቍጥጥር ሥር ናቸው። ዓለምን ፈጥሮ በሕግ ሥር ካደረገው በኋላ፣ ለአስተዋይ ፍጥረታቱ ደኅንነት ደንታ ሳይሰጥ ዕጣ ፈንታውን በራሱ እንዲወስን ትቶት ከእርሱ ገለል አላለም። የተፈጥሮ ሕጎች የእግዚአብሔር ሕጎች ብቻ ናቸው፤ በእነርሱም በተፈጥሮ ያሉትን ነገሮች ሁሉ ይገዛል፣ ይቈጣጠራልም። ተፈጥሮ የእግዚአብሔር አገልጋይ እንጂ ሌላ ምንም አይደለችም። እግዚአብሔር ከተፈጥሮ በላይ ነው፤ እግዚአብሔር የተፈጥሮ ባሪያ አይደለም። ይህ እውነት ከሆነ፣ እግዚአብሔር በቤዛነት ያለውን ከፍ ያለ ዓላማውን ለመፈጸም የተፈጥሮን ሕጎች አሠራር ማቆም ይችላል፤ ያቆማልም፤ ሁሉን በሚችል እጁ በእንጥልጥል ሊያቆያቸው፣ ለጊዜውም ወደ ጎን ሊያደርጋቸው ይችላል። ከተፈጥሮ በላይ የሆነው እርሱ ለጸሎት መልስ ሆኖ ተፈጥሮን አገልጋዩ ሲያደርጋትና ዕቅዱንና ዓላማውን እንድትፈጽም ሲያደርጋት የተፈጥሮን ሕጎች መጣስ አይደለም።

ኢያሱ በጌታ በእግዚአብሔር ብርታትና ኃይል የእስራኤልን ጠላቶች ድል የማድረጉን ሥራ ለመፈጸም ጊዜ እንዲገኝ ፀሐይና ጨረቃ እንዲቆሙ ያዘዘበት ያ የብሉይ ኪዳን ዘመን አስደናቂ የጸሎት ተአምር ማብራሪያ ይህ ነው። የተፈጥሮና የጸጋ አምላክ ለጸሎት መልስ ሆኖና ለዓላማው መልካምነት ለአጭር ጊዜ በራሱ የተፈጥሮ ሕጎች ውስጥ ጣልቃ መግባቱ ስለ ምን የማይታመን ነገር ሆኖ ይቈጠራል? እግዚአብሔር እጅና እግሩ ታስሯልን? የጸሎትን ሕግ ማሠራት እስከማይችል ድረስ ራሱን ገድቧልን? የተፈጥሮ ሕግ ከጸሎት ሕግ ይበልጣልን? በፍጹም አይደለም። እርሱ የተፈጥሮ አምላክ እንደ ሆነ ሁሉ የጸሎትም አምላክ ነው። ለጸሎትም ለተፈጥሮም ፈጣሪያቸው፣ ገዢያቸውና አስፈጻሚያቸው እግዚአብሔር ነው። ተፈጥሮም አገልጋዩ እንደ ሆነች ሁሉ ጸሎትም የእግዚአብሔር አገልጋይ ነው።

በእግዚአብሔር አስተዳደር ውስጥ የጸሎት ኃይል እንደ ማንኛውም ሌላ ኃይል ብርቱ ነው፤ የተፈጥሮና ሌሎች ኃይሎች ሁሉ ለጸሎት ኃይል ቦታ መልቀቅ አለባቸው። ፀሐይ፣ ጨረቃና ከዋክብት ለጸሎት መልስ ሆነው በእግዚአብሔር ቍጥጥር ሥር ናቸው። ዝናብ፣ የፀሐይ ብርሃንና ድርቅ ለፈቃዱ ይታዘዛሉ። «እሳትና በረዶ፥ አመዳይና ጉም፥ ቃሉን የሚያደርግ ዐውሎ ነፋስ።» ሕመምና ጤና በእርሱ ይገዛሉ። በሰማይና በምድር ያሉ ነገሮች ሁሉ፣ አዎን ሁሉም፣ ሰማይንና ምድርን በፈጠረውና ሁሉን እንደ ፈቃዱ በሚገዛው በእርሱ ፍጹም ቍጥጥር ሥር ናቸው።

ጸሎት ዛሬም በሰዎች መካከል ተአምራትን ይሠራል፤ ታላላቅ ነገሮችንም ያስፈጽማል። ያዕቆብ መልእክቱን በጻፈበት ጊዜ እንደ ነበረው ሁሉ ዛሬም፦ «የጻድቅ ሰው ጸሎት በሥራዋ እጅግ ኃይል ታደርጋለች» የሚለው እውነት ነው። የዘላለም መዝገቦች በተሰበሰበ ዓለም ፊት በሚነበቡበት ጊዜ ጸሎት በዚህ ዓለም ምን ያህል እንደ ሠራ ያን ጊዜ ይገለጣል። ጸሎት ከፈጸመውና እየፈጸመ ካለው ሁሉ ጋር ሲነጻጸር አሁን የሚታየው የጸሎት ፍሬ ጥቂት ነው። በፍርድ ቀን እግዚአብሔር በቅዱሳን ጸሎት አማካይነት በዚህ ዓለም የተፈጸሙትን ነገሮች ይገልጣል። አሁን እንደ ተራ ነገር የሚታዩ ብዙ ክስተቶች በዚያን ጊዜ የጌታ ጸሎተኞች ስለ ጸለዩ የሆኑ መሆናቸው ይታያል።

በእንግሊዝ አገር በብሪስቶል የነበረው የጆርጅ ሙለር ሥራ የአሥራ ዘጠነኛው ክፍለ ዘመን ተአምር ነበር። በጸሎት ያከናወነውን ሁሉ ለመግለጥ በታላቁ የፍርድ ቀን የመጻሕፍቱ መከፈት ያስፈልጋል። በመቶዎች የሚቈጠሩ አባትና እናት የሌላቸው ልጆች የሚጠበቁበት የወላጅ አልባ ሕፃናት ማሳደጊያው የዘመናችን ድንቅ ነው፤ ይህ እግዚአብሔርን የሚፈራ ሰው ማሳደጊያውን ለማኖር የዕለት ተዕለት ወጪውን የሚሸፍንበትን ገንዘብ ማንንም ጠይቆ አያውቅም። ልማዱ ሁልጊዜ የሚያስፈልገውን ብቻ እግዚአብሔርን መለመን ነበር፤ የመጡለትም መልሶች የሐዋርያትን ዘመን መዝገብ ይመስላሉ። ለሁሉም ነገር ይጸልይ ነበር፤ የሚያስፈልገውንም ሁሉ እንዲሰጠው ያለ ጥርጥር በእግዚአብሔር ይታመን ነበር። እርሱና ወላጅ አልባዎቹ አንዳችም መልካም ነገር አጥተው እንደማያውቁ በመዝገብ የተረጋገጠ ነው።

ስለ ክርስቶስና ስለሚሠቃየው የሰው ልጅ ይህን ያህል ስለ ሠራ አንድ ቅዱስ ሰው በመቃብሩ አጠገብ እንዲህ ተብሎ ነበር፦

«የሆስፒታልን ቅጥሮች በጸሎት አቆመ፤ የነርሶችንም ልብ በጸሎት አዘጋጀ። የሚስዮን ጣቢያዎችን በጸሎት አስገኘ፤ ሚስዮናውያንንም በጸሎት ወደ እምነት አመጣ። የባለ ጠጎችን ልብ በጸሎት ከፈተ፤ ከእጅግ ሩቅ አገሮችም ወርቅን በጸሎት አመጣ።»

ሉተር በአንድ ወቅት፦ «የክርስቲያን ሙያ መጸለይ ነው» እንዳለ ይነገራል። በእርግጥም፣ በታላቅ ምክንያት፣ የሰባኪው ሙያ መጸለይ ሊሆን ይገባል። ብዙ ሰባኪዎች ስለዚህ የመጸለይ ሙያ ምንም እንደማያውቁ፣ ስለዚህም በዚህ ሙያ ፈጽሞ እንደማይሳካላቸው እጅግ እንፈራለን። በመጸለይ ሙያ የተካነ ባለ ሙያ ለመሆን ጠንካራ የለማጅነት ዘመን ማለፍ ያስፈልጋል። በዚህ የመጸለይ ሙያ የሚሠሩ የተካኑ ባለ ሙያዎች ጥቂቶች መሆናቸው ብቻ ሳይሆን፣ ብዙዎች በጸሎት ለማጆች እንኳ ሆነው አያውቁም። በእነርሱ በኩል የሚፈጸመው ነገር ጥቂት መሆኑ አያስደንቅም። እግዚአብሔርና ከተፈጥሮ በላይ የሆነው ከዕቅዶቻቸው ውጭ ተደርገዋል።

ብዙዎች ይህን የመጸለይ ሙያ ፈጽሞ ስላልተማሩት አይረዱትም፤ ስለዚህም አይሠሩበትም። በጸሎታችን ብዙ ተአምራት ሊሠሩ ይገባል። ለምን አይሆንም? የጌታ ክንድ ማዳን እንዳይችል አጠረችን? ጆሮውስ መስማት እንዳይችል ደነቈረችን? ዓመፃ ስለ በዛና የብዙዎች ፍቅር ስለ ቀዘቀዘ ጸሎት ኃይሉን አጥቷልን? እግዚአብሔር ቀድሞ ከነበረው ተለውጧልን? ለእነዚህ ጥያቄዎች ሁሉ ቁርጥ ያለ የአሉታ መልስ እንሰጣለን። እግዚአብሔር በቀድሞው ዘመን እንዳደረገው ሁሉ ዛሬም በጸሎት ተአምራትን በቀላሉ ሊሠራ ይችላል። «እኔ እግዚአብሔር አልለወጥም።» «በውኑ ለእግዚአብሔር የሚሳነው ነገር አለን?»

በጸሎት ተአምራትን የሚሠራ ሰው ከሁሉ አስቀድሞ ዋናውን ተአምር በራሱ ላይ ይሠራል። ምነው የክርስቲያንን የመጸለይ ሙያ በሚገባ ብንረዳ፣ ያንንም ሙያ ዕለት ዕለት ብንከተልና በዚህም ታላቅ መንፈሳዊ ሀብት ለራሳችን ብናከማች!