ስለ ክርስቶስ ንግሥና፣ ወደ ግብፅ ስለ መሸሹ፣ ወዘተ የተነገሩ ትንቢቶች

§36. ስለ ክርስቶስ ንግሥና፣ ወደ ግብፅ ስለ መሸሹ፣ ወዘተ የተነገሩ ትንቢቶች።

ለመሆኑ አባቱን ወይም እናቱን ለመጥራት አቅም ከማግኘቱ በፊት የነገሠና በጠላቶቹ ላይ ድል የተቀዳጀ ንጉሥ ከቶ ማን ነው? ዳዊት በሠላሳ ዓመቱ፣ ሰሎሞንም ጐልማሳ በሆነ ጊዜ ዙፋን ላይ አልወጡምን? ኢዮአስ በሰባት ዓመቱ መንግሥትን አልያዘምን? ከእርሱም በኋላ የነገሠው ኢዮስያስ በሰባት ዓመት ዕድሜው ገደማ መንግሥቱን አልተቀበለምን? ሆኖም እነርሱ በዚያ ዕድሜ አባትን ወይም እናትን ለመጥራት ይችሉ ነበር። 2. እንግዲያስ ገና ሳይወለድ ማለት ይቻላል የነገሠና ጠላቶቹን የበዘበዘ ማን ነው? ወይስ በእስራኤልና በይሁዳ እንዲህ ያለ ንጉሥ መቼ ነበረ—ነገሩን የመረመሩት አይሁድ ይንገሩን—አሕዛብ ሁሉ በየአቅጣጫው ከመጣላት ይልቅ ተስፋቸውን በእርሱ ላይ ያደረጉበትና ሰላም ያገኙበት? 3. ኢየሩሳሌም ቆማ በነበረችበት ዘመን ሁሉ በመካከላቸው ዕረፍት የሌለው ጦርነት ነበረና፤ ሁሉም ከእስራኤል ጋር ተዋጉ፤ አሦራውያን አስጨነቁአቸው፣ ግብፃውያን አሳደዱአቸው፣ ባቢሎናውያን አደጋ ጣሉባቸው፤ የሚያስገርመውም ጎረቤቶቻቸው ሶርያውያን እንኳ ይዋጉአቸው ነበር። ወይስ ዳዊት ሞዓባውያንን አልወጋምን? ሶርያውያንንስ አልመታምን? ኢዮስያስ ከጎረቤቶቹ ራሱን አልጠበቀምን? ሕዝቅያስ በሰናክሬም ትምክህት አልተሸበረምን? አማሌቅ ከሙሴ ጋር አልተዋጋምን? አሞራውያንስ አልተቃወሙትምን? የኢያሪኮ ነዋሪዎችስ በነዌ ልጅ በኢያሱ ላይ አልተሰለፉምን? በአጭሩ በአሕዛብና በእስራኤል መካከል የወዳጅነት ቃል ኪዳን ስፍራ አልነበረውም። እንግዲያስ አሕዛብ ተስፋቸውን የሚያደርጉበት ማን እንደ ሆነ ማየት ይገባል። ነቢዩ ሐሰትን ሊናገር አይቻልምና እንዲህ ያለው አንድ ሊኖር ግድ ነው። 4. ነገር ግን ከቅዱሳን ነቢያት ወይም ከቀደሙት አበው ለሁሉ መዳን በመስቀል ላይ የሞተ ማን ነው? ወይስ ለሁሉ ፈውስ የቈሰለና የተገደለ ማን ነው? ወይስ ከጻድቃን ወይም ከነገሥታት መካከል ወደ ግብፅ ወርዶ፣ በመምጣቱም የግብፅ ጣዖታት የወደቁለት ማን ነው? አብርሃም ወደዚያ ሄዷልና፤ ነገር ግን ጣዖት አምልኮ እንደ ቀድሞው በሁሉ ስፍራ ሠልጥኖ ነበር። ሙሴ በዚያ ተወለደ፤ የሕዝቡ የተሳሳተ አምልኮ ግን አሁንም በዚያ ጸንቶ ነበር።