የመስቀሉ ትንቢቶች

§35. የመስቀሉ ትንቢቶች። እነዚህ ትንቢቶች በክርስቶስ ብቻ እንዴት እንደ ተፈጸሙ።

ምናልባትም ስለ ሞቱ የተነገረውን ትንቢት ሰምተህ ስለ መስቀሉ ደግሞ የተገለጠውን ለማወቅ ትሻ ይሆናል። ይህም አልታለፈምና፤ ቅዱሳን ሰዎች እጅግ ግልጽ አድርገው አሳይተውታል። 2. በመጀመሪያ ሙሴ ይህን አስቀድሞ ይናገራል፤ ያውም በታላቅ ድምፅ፦ «ሕይወታችሁ በዓይኖቻችሁ ፊት ተሰቅሎ ታያላችሁ፤ አታምኑምም» ይላል። 3. ከእርሱም በኋላ ያሉት ነቢያት ስለዚህ ሲመሰክሩ እንዲህ ይላሉ፦ «እኔ ግን ለመታረድ እንደሚነዳ የዋህ ጠቦት ነበርሁ፤ አላወቅሁም፤ በእኔ ላይ ክፉ ምክር መከሩ፤ ‹ኑ፣ በእንጀራው ላይ እንጨት እንጣልበት፤ ከሕያዋንም ምድር እናጥፋው› አሉ።» 4. ደግሞም፦ «እጆቼንና እግሮቼን ቸነከሩ፤ አጥንቶቼንም ሁሉ ቈጠሩ፤ ልብሴን እርስ በርሳቸው ተከፋፈሉ በእጀ ጠባቤም ዕጣ ተጣጣሉበት።» 5. ወደ ላይ ከፍ ብሎ በእንጨት ላይ የሚፈጸም ሞት ከመስቀል በቀር ሌላ ሊሆን አይችልም፤ ደግሞም ከመስቀል በቀር በሌላ በማንኛውም ሞት እጅና እግር አይቸነከሩም። 6. ነገር ግን መድኃኒታችን በሰዎች መካከል በመምጣቱ አሕዛብ ሁሉ ደግሞ በየአቅጣጫው እግዚአብሔርን ማወቅ ስለ ጀመሩ፣ ይህንንም ነገር ሳይጠቅሱ አላለፉትም፤ ይህም ጉዳይ በቅዱሳት መጻሕፍት ተጠቅሷል። «የእሴይ ሥር አሕዛብንም ሊገዛ የሚነሣው ይሆናል፤ በእርሱ አሕዛብ ተስፋ ያደርጋሉ» ይላልና። ይህም ለተፈጸመው ነገር ጥቂት ማስረጃ ነው። 7. ነገር ግን መጽሐፍ ሁሉ የአይሁድን አለማመን በሚያስተባብሉ ማስረጃዎች የተሞላ ነው። በመለኮታዊ መጻሕፍት ከተመዘገቡት ጻድቃንና ቅዱሳን ነቢያት፣ ከአበውም መካከል ከድንግል ብቻ በሥጋ የተወለደ ማን ነው? ወይስ ያለ ወንድ የሰውን ልጅ ለመፅነስ የበቃች ሴት ማን ናት? አቤል ከአዳም፣ ሄኖክ ከያሬድ፣ ኖኅ ከላሜሕ፣ አብርሃም ከታራ፣ ይስሐቅ ከአብርሃም፣ ያዕቆብም ከይስሐቅ አልተወለዱምን? ይሁዳ ከያዕቆብ፣ ሙሴና አሮንም ከእንበረም አልተወለዱምን? ሳሙኤል ከሕልቃና፣ ዳዊት ከእሴይ፣ ሰሎሞን ከዳዊት፣ ሕዝቅያስ ከአካዝ፣ ኢዮስያስ ከአሞን፣ ኢሳይያስ ከአሞጽ፣ ኤርምያስ ከኬልቅያስ፣ ሕዝቅኤልም ከቡዝ አልተወለዱምን? እያንዳንዳቸው የመኖራቸው ምክንያት የሆነ አባት አልነበራቸውምን? እንግዲያስ ከድንግል ብቻ የተወለደው ማን ነው? ነቢዩ ይህን ምልክት እጅግ ከፍ አድርጎ ተናግሮታልና። 8. ወይስ የተወለደውን ለዓለም ያበሥር ዘንድ በሰማይ ያለ ኮከብ የማንን ልደት ቀድሞ አመለከተ? ሙሴ በተወለደ ጊዜ ወላጆቹ ሸሸጉት፤ ዳዊትን ጎረቤቶቹ እንኳ አላወቁትም ነበር፤ ታላቁ ሳሙኤል እንኳ አላወቀውምና፣ ለእሴይ ሌላ ልጅ ደግሞ እንዳለው ጠየቀ። አብርሃምም ታላቅ ሰው መሆኑ በጎረቤቶቹ ዘንድ የታወቀው ከተወለደ በኋላ ብዙ ቆይቶ ነው። የክርስቶስን ልደት የመሰከረው ግን ሰው አይደለም፤ እርሱ ይወርድበት ከነበረው ከዚያ ሰማይ የወጣ ኮከብ ነው እንጂ።