መስቀል ሞት ከሰው ጋር ባለው ግንኙነት ላይ ያመጣው ለውጥ

§27. መስቀል ሞት ከሰው ጋር ባለው ግንኙነት ላይ ያመጣው ለውጥ።

ሞት እንደ ጠፋ፣ መስቀልም በእርሱ ላይ ድል እንደ ሆነ፣ ከእንግዲህም ኃይል እንደሌለው ይልቁንም በእውነት የሞተ እንደ ሆነ የሚያሳይ ትንሽ ያይደለ ማስረጃ፣ ይልቁንም ግልጥ ዋስትና ይህ ነው፤ የክርስቶስ ደቀ መዛሙርት ሁሉ ይንቁታል፤ ሁሉም በእርሱ ላይ ተነሥተው ይዋጉታል፤ ከእንግዲህም አይፈሩትም፤ ነገር ግን በመስቀል ምልክትና በክርስቶስ በማመን እንደ ሞተ ነገር ይረግጡታል። 2. ቀድሞ የመድኃኒታችን መለኮታዊ መምጣት ሳይፈጸም፣ ለቅዱሳን እንኳ ሞት አስፈሪ ነበርና፤ ሁሉም ለሙታን እንደ ጠፉ አድርገው ያለቅሱ ነበር። አሁን ግን መድኃኒታችን ሥጋውን ስላስነሣ ሞት ከእንግዲህ አስፈሪ አይደለም፤ በክርስቶስ የሚያምኑ ሁሉ እንደ ኢምንት ይረግጡታልና፤ በክርስቶስ ያላቸውን እምነት ከመካድም ይልቅ መሞትን ይመርጣሉ። ሲሞቱ እንደማይጠፉ፣ ይልቁንም በእውነት [መኖር እንደሚጀምሩ]፣ በትንሣኤም የማይበሰብሱ እንደሚሆኑ በእርግጥ ያውቃሉና። 3. ቀድሞ በሞት በክፋት ደስ ይለው የነበረው ያ ዲያብሎስ ግን፣ አሁን የሞት ጣር ስለ ተፈታ፣ በእውነት የሞተው እርሱ ብቻ ሆኖ ቀረ። ለዚህም ማስረጃው ይህ ነው፤ ሰዎች በክርስቶስ ከማመናቸው በፊት ሞትን እንደ አስፈሪ ነገር ያዩታል፤ በፊቱም ይፈራሉ። ወደ ክርስቶስ እምነትና ትምህርት በተሻገሩ ጊዜ ግን ሞትን እጅግ ስለሚንቁት በጉጉት ወደ እርሱ እንኳ ይሮጣሉ፤ መድኃኒታችን በእርሱ ላይ ለፈጸመው ትንሣኤም ምስክሮች ይሆናሉ። ገና በልጅነት ዕድሜ ሳሉ ለመሞት ይቸኩላሉና፤ ወንዶች ብቻ ሳይሆኑ ሴቶችም ጭምር በሰውነት ተጋድሎ ራሳቸውን በእርሱ ላይ ያለማምዳሉ። ሞት እጅግ ከመድከሙ የተነሣ ቀድሞ ያታለላቸው ሴቶች እንኳ አሁን እንደ ሞተና ሽባ እንደ ሆነ ነገር ይዘብቱበታል። 4. አንድ አምባገነን በእውነተኛ ንጉሥ ተሸንፎ እጅና እግሩ በታሰረ ጊዜ፣ በአጠገቡ የሚያልፉ ሁሉ ድል ካደረገው ንጉሥ የተነሣ ቁጣውንና ጭካኔውን ከእንግዲህ ሳይፈሩ እየመቱና እየሰደቡ እንደሚሥቁበት፣ እንዲሁ ደግሞ ሞት በመስቀል ላይ በመድኃኒታችን ተሸንፎና ተጋልጦ እጅና እግሩ ስለ ታሰረ፣ በክርስቶስ ያሉ ሁሉ በአጠገቡ ሲያልፉ ይረግጡታል፤ ለክርስቶስም እየመሰከሩ በሞት ይዘብታሉ፤ እያላገጡበትም ከጥንት በእርሱ ላይ የተጻፈውን፦ «ሞት ሆይ፥ መውጊያህ የት አለ? ሲኦል ሆይ፥ ድል መንሣትህ የት አለ?» ይላሉ።