እንግዲህ እግዚአብሔር ዝም ሊል ይገባው ነበርን?

§13. እንግዲህ እግዚአብሔር ዝም ሊል ይገባው ነበርን? ለእርሱ እንድናቀርብ የፈጠረንን አምልኮ ለሐሰተኞች አማልክት ሊተው? ተገዢዎቹ ያመፁበት ንጉሥ ደብዳቤዎችንና መልእክቶችን ከላከ በኋላ ራሱ ወደ እነርሱ ይሄዳል። እግዚአብሔርማ የመልኩን ጸጋ በእኛ ውስጥ እንዴት አብልጦ አይመልስም! ይህን ራሳቸው ቅጂዎች ብቻ የሆኑ ሰዎች ሊያደርጉት አልቻሉም። ስለዚህ ቃል ራሱ መምጣት ነበረበት፤ (1) እንደ ገና ለመፍጠር፣ (2) ሞትን በሥጋ ለመሻር።

እንግዲህ ሰዎች እንዲህ እንደ እንስሳ ሆነው ሳሉ፣ የአጋንንትም ማታለል እንዲህ ሁሉን ስፍራ ሲያጨልምና የእውነተኛውን አምላክ እውቀት ሲሰውር፣ እግዚአብሔር ምን ያድርግ? ይህን በሚያህል ታላቅ ነገር ዝም ብሎ፣ ሰዎች በአጋንንት እንዲሳሳቱና እግዚአብሔርን እንዳያውቁ ይተዋቸውን? 2. እንግዲያስ ሰው ከመጀመሪያ በእግዚአብሔር መልክ መፈጠሩ ምን ይጠቅም ነበር? አንድ ጊዜ ነባቢ ሆኖ ከተፈጠረ በኋላ የእንስሳን ኑሮ ከሚኖር ይልቅ እንዲያው እንደ እንስሳ ተፈጥሮ ቢሆን ይሻለው ነበርና። 3. ወይስ በመጀመሪያውኑ ስለ እግዚአብሔር ግንዛቤ የሚቀበልበት ምን አስፈላጊነት ነበረ? አሁን እንኳ ሊቀበለው የማይገባው ከሆነ፣ ከመጀመሪያውኑ ባይሰጠው ይሻል ነበርና። 4. ወይስ በእርሱ የተፈጠሩ ሰዎች እርሱን ሳያመልኩ ሌሎችን ሠሪዎቻቸው አድርገው ቢያስቡ፣ ለፈጠራቸው ለእግዚአብሔር ምን ጥቅም ወይም ምን ክብር ሊሆንለት ይችላል? እንዲህ ከሆነ እግዚአብሔር እነዚህን ለራሱ ሳይሆን ለሌሎች የፈጠራቸው ሆኖ ይገኛልና። 5. ደግሞም ሰው ብቻ የሆነ ንጉሥ እንኳ ያቀናቸው አገሮች ለሌሎች እንዲገዙ ወይም ወደ ሌሎች ሰዎች እንዲሄዱ አይተዋቸውም፤ ነገር ግን በደብዳቤ ያስጠነቅቃቸዋል፤ ብዙ ጊዜም በወዳጆቹ በኩል ይልክባቸዋል፤ አስፈላጊ ከሆነም በመጨረሻ በመገኘቱ ይገሥጻቸው ዘንድ ራሱ ይመጣል፤ ይህ ሁሉ ለሌሎች እንዳይገዙና የገዛ ሥራው ከንቱ እንዳይሆን ብቻ ነው። 6. እግዚአብሔርማ ከእርሱ ተለይተው እንዳይስቱና ከንቱ ለሆኑ ነገሮች እንዳይገዙ ለገዛ ፍጥረቶቹ እጅግ አብልጦ አይራራላቸውምን? በተለይም እንዲህ ያለው መሳሳት የጥፋታቸውና የመጥፋታቸው ምክንያት ሆኖ ስለሚገኝ፣ አንድ ጊዜ የእግዚአብሔር መልክ ተካፋዮች የነበሩት መጥፋታቸውም የማይገባ ስለ ነበረ። 7. እንግዲህ እግዚአብሔር ምን ያድርግ? ወይስ ሰዎች በእርሱ አማካይነት እንደ ገና እርሱን ማወቅ እንዲችሉ በእግዚአብሔር መልክ የነበረውን ከማደስ በቀር ምን ሊደረግ ይገባ ነበር? ይህስ ራሱ የእግዚአብሔር መልክ የሆነው ጌታችን ኢየሱስ ክርስቶስ ካልተገኘ በቀር እንዴት ሊሆን ይችል ነበር? በሰዎች አማካይነት የማይቻል ነበርና፤ እነርሱ በመልክ የተፈጠሩ ብቻ ናቸውና፤ በመላእክትም አይቻልም ነበር፤ እነርሱ እንኳ (የእግዚአብሔር) መልኮች አይደሉምና። ስለዚህ የእግዚአብሔር ቃል የአብ መልክ እንደ መሆኑ በመልኩ የተፈጠረውን ሰው እንደ ገና ለመፍጠር ይችል ዘንድ ራሱ መጣ። 8. ደግሞም ሞትና መበስበስ ካልተሻሩ በቀር ይህ በሌላ መንገድ ሊሆን አይችልም ነበር። 9. ስለዚህ በዚያ ሥጋ ሞት አንድ ጊዜ ለሁልጊዜ እንዲሻር፣ በመልኩም የተፈጠሩ ሰዎች እንደ ገና እንዲታደሱ፣ እንደሚገባው ሟች ሥጋን ለበሰ። እንግዲህ ከአብ መልክ በቀር ለዚህ ፍላጎት የሚበቃ ሌላ ማንም አልነበረም።