ሕመሙና የመጨረሻ ኑዛዜው

91. እርሱ ግን ልማዳቸውን አውቆ ሥጋውም እንዲሁ እንዳይደረግበት ፈርቶ ቸኰለ፤ በውጪው ተራራ የነበሩትን መነኮሳት ተሰናብቶም አዘውትሮ ይኖርበት ወደ ነበረው ወደ ውስጠኛው ተራራ ገባ። ከጥቂት ወራትም በኋላ ታመመ። በዚያ የነበሩትን አስጠራ—እነርሱም በተራራው ዐሥራ አምስት ዓመት የኖሩ፣ ተጋድሎ እያደረጉ ስለ ሽምግልናውም አባ እንጦንስን የሚያገለግሉ ሁለት ሰዎች ነበሩ—እንዲህም አላቸው፦ «እኔ እንደ ተጻፈው በአባቶች መንገድ እሄዳለሁ፤ ጌታ እንደ ጠራኝ ተረድቻለሁና። እናንተም ንቁ፤ የረጅም ዘመን ተጋድሎአችሁንም አታጥፉ፤ ነገር ግን አሁን እንደምትጀምሩ ሆናችሁ ቍርጥ ሐሳባችሁን በትጋት ጠብቁ። የአጋንንትን ተንኰል፣ ምን ያህል ጨካኞች እንደ ሆኑ፣ ነገር ግን ምን ያህል ጥቂት ኀይል እንዳላቸው ታውቃላችሁና። ስለዚህ አትፍሩአቸው፤ ይልቁንም ሁልጊዜ ክርስቶስን ተንፍሱ፤ በእርሱም ታመኑ። ዕለት ዕለት እንደምትሞቱ ሆናችሁ ኑሩ። ለራሳችሁ ተጠንቀቁ፤ ከእኔም የሰማችሁትን ምክር አስቡ። ከከፋፋዮች ጋር ኅብረት አይኑራችሁ፤ ከመናፍቃኑ ከአርዮሳውያንም ጋር ፈጽሞ ምንም ግንኙነት አይኑራችሁ። ለክርስቶስ ባላቸው ጠላትነትና በኑፋቄያቸው እንግዳ ትምህርት ምክንያት እንዴት እንደ ራቅኋቸው ታውቃላችሁና። ስለዚህ ሁልጊዜ አስቀድማችሁ እግዚአብሔርን ከዚያም ቅዱሳንን ለመከተል ይበልጥ ትጉ፤ ይህም ከሞት በኋላ እነርሱ ደግሞ እንደ ታወቁ ወዳጆች በዘላለም ቤቶች እንዲቀበሉአችሁ ነው። እነዚህን ነገሮች አሰላስሉ፤ አስቡባቸውም፤ ስለ እኔም ብትገዱና እንደ አባት ብታስቡኝ ማንም ሥጋዬን ወደ ግብፅ እንዲወስድ አትፍቀዱ፤ በቤቶች ውስጥ እንዳያኖሩኝ፤ ይህን ለማስቀረት ብዬ ወደ ተራራው ገብቼ ወደዚህ መጥቻለሁና። ደግሞም ይህ ልማድ የነበራቸውን ሁልጊዜ እንዴት እንደ ገሠጽኋቸውና እንዲተዉትም እንደ መከርኋቸው ታውቃላችሁ። ስለዚህ ሥጋዬን ቅበሩ፤ እናንተ ራሳችሁ ከመሬት በታች ሰውሩት፤ ከእናንተ በቀር ማንም ስፍራውን እንዳያውቅ ቃሌን ጠብቁ። በሙታን ትንሣኤ ከመድኃኒታችን የማይበሰብስ ሆኖ እቀበለዋለሁና። ልብሶቼንም ተካፈሉ። ለኤጲስ ቆጶሱ ለአትናቴዎስ አንዱን የበግ ለምድና የተኛሁበትን ልብስ ስጡት፤ ይህን ልብስ እርሱ ራሱ አዲስ ሆኖ ሰጠኝ፤ ከእኔ ጋር ግን አረጀ። ለኤጲስ ቆጶሱ ለሴራፕዮን ሁለተኛውን የበግ ለምድ ስጡት፤ የጠጕሩንም ልብስ ለራሳችሁ ያዙ። ለቀረው ግን ልጆቼ ሆይ፣ ደኅና ሁኑ፤ እንጦንስ ይሄዳልና፤ ከእንግዲህም ከእናንተ ጋር አይኖርም።»