አባ እንጦንስ ስለ ኃጢአቱ ስርየት ያየው ራእይ

65. ብዙ መነኮሳትም እንዲህ ያሉ ሌሎች ብዙ ነገሮች በእርሱ እንደ ተደረጉ በታላቅ ስምምነትና በአንድ ቃል ተርከዋል። ነገር ግን እነዚህ እንኳ ሌሎች አንዳንድ ነገሮች የሚያስደንቁትን ያህል የሚያስደንቁ አይመስሉም። አንድ ጊዜ ሊበላ ሲል፣ በዘጠኝ ሰዓት ገደማ ለጸሎት ተነሥቶ ሳለ፣ በመንፈስ እንደ ተነጠቀ ተሰማው፤ የሚያስደንቀውም ነገር፣ ቆሞ ራሱን ከራሱ ውጭ ሆኖ እንደሚያየው አየ፤ አንዳንዶችም በአየር ውስጥ ይመሩት ነበር። ቀጥሎም መራራና አስፈሪ የሆኑ ፍጡራን በአየር ውስጥ ቆመው እንዳያልፍ ሊከለክሉት ፈለጉ። የሚመሩት ግን በተቃወሟቸው ጊዜ፣ እርሱ ለእነርሱ ተጠያቂ አይደለምን ብለው ጠየቁ። ከተወለደበት ጊዜ ጀምሮ ሒሳቡን ሊያወራርዱ በፈለጉ ጊዜ፣ የአባ እንጦንስ መሪዎች እንዲህ ብለው ከለከሏቸው፦ «ከተወለደበት ጊዜ ጀምሮ ያለውን ኃጢአት ጌታ ደምስሶታል፤ መነኩሴ ከሆነበትና ራሱን ለእግዚአብሔር ከሰጠበት ጊዜ ጀምሮ ያለውን ግን ልትቈጥሩ ተፈቅዶላችኋል።» ከዚያም ከሰሱት፤ ሊረቱት ግን አልቻሉም፤ መንገዱም ያለ እንቅፋት ነጻ ሆነለት። ወዲያውኑም ራሱን እንደ ገና መጥቶ ከራሱ ጋር ሲቆም አየ፤ ዳግመኛም እንደ ቀድሞው እንጦንስ ሆነ። ከዚያም መብላቱን ረስቶ የቀረውን ቀንና ሌሊቱን ሁሉ እየቃተተና እየጸለየ አሳለፈ። ትግላችን ከምን ያህል ኃያላን ተቃዋሚዎች ጋር እንደ ሆነ፣ በአየርም ውስጥ በምን ያህል ድካም ማለፍ እንዳለብን ባየ ጊዜ ተደንቆ ነበርና። ሐዋርያውም፦ «በአየር ላይ ሥልጣን እንዳለው አለቃ» ብሎ የተናገረው ይህ እንደ ሆነ አስታወሰ። ጠላት በዚያ ለመዋጋትና የሚያልፉትን ለማሰናከል ሥልጣን አለውና። ስለዚህም ሐዋርያው፦ «በክፉው ቀን ለመቃወም፥ ሁሉንም ፈጽማችሁ ለመቆም እንድትችሉ የእግዚአብሔርን ዕቃ ጦር ሁሉ አንሡ» ብሎ አጥብቆ መከረ፤ ይኸውም ጠላት «ስለ እኛ የሚናገረው ክፉ ነገር ስለሌለው እንዲያፍር» ነው። ይህን የተማርን እኛም ሐዋርያው፦ «በሥጋ እንደ ሆነ አላውቅም ወይም ከሥጋ ውጭ እንደ ሆነ አላውቅም፥ እግዚአብሔር ያውቃል» ሲል የተናገረውን እናስብ። ነገር ግን ጳውሎስ እስከ ሦስተኛው ሰማይ ድረስ ተነጠቀ፤ የማይነገረውን ቃል ሰምቶም ወረደ፤ እንጦንስ ግን ወደ አየር እንደ ደረሰ አየ፤ ነጻ እስኪወጣም ድረስ ተጋደለ።