አጋንንትን ስለ ማስወጣት የተነገሩ አስደናቂ ታሪኮች

63. ከዚያም በኋላ በሌላ ጊዜ ወደ ውጪዎቹ በዓቶች ወርዶ ሳለ፣ ወደ አንዲት መርከብ ገብቶ ከመነኮሳቱ ጋር እንዲጸልይ ለመኑት፤ በዚያም እርሱ ብቻ እጅግ የሚያስጸይፍ ሽታ ተሰማው። በመርከቡ ላይ የነበሩት ግን ሽታው በመርከቡ ውስጥ ካለው ዓሣና በጨው ከታሸ ሥጋ የመጣ ነው አሉ። እርሱ ግን ሽታው ከዚያ የተለየ እንደ ሆነ መለሰላቸው፤ ገና እየተናገረ ሳለም፣ መጥቶ በመርከቡ ውስጥ ተሸሽጎ የነበረ ርኩስ መንፈስ ያደረበት አንድ ጐበዝ ጮኸ። ጋኔኑ ግን በጌታ በኢየሱስ ክርስቶስ ስም ተገሥጾ ከእርሱ ወጣ፤ ሰውየውም ተፈወሰ። ሁሉም መጥፎው ሽታ ከጋኔኑ የመጣ እንደ ነበረ አወቁ።

64. ሌላም ባለ ማዕረግ ሰው ጋኔን አድሮበት ወደ እርሱ መጣ፤ ጋኔኑም እጅግ አስፈሪ ከመሆኑ የተነሣ ሰውየው ወደ አባ እንጦንስ እየመጣ መሆኑን እንኳ አያውቅም ነበር። ከሰውነቱ የሚወጣውን ዓይነ ምድር እንኳ ይበላ ነበር። ስለዚህ ያመጡት ሰዎች እንጦንስ እንዲጸልይለት ለመኑት። እንጦንስም ለጐበዙ ራርቶ ጸለየ፤ ሌሊቱንም ሁሉ ከእርሱ ጋር ተግቶ አደረ። ሊነጋ ሲልም ጐበዙ ድንገት በእንጦንስ ላይ ተነሥቶ ገፋው። ከእርሱ ጋር የመጡት ሰዎች በተቈጡ ጊዜ ግን እንጦንስ እንዲህ አለ፦ «በጐበዙ ላይ አትቈጡ፤ ይህን ያደረገው እርሱ አይደለም፤ በውስጡ ያለው ጋኔን ነው እንጂ። ጋኔኑ ተገሥጾ ውኃ በሌለበት ቦታ እንዲሄድ ስለ ታዘዘ በቍጣ አበደ፤ ይህንም አደረገ። ስለዚህ ጌታን አመስግኑ፤ በእኔ ላይ እንዲህ መነሣቱ ርኩሱ መንፈስ ለመውጣቱ ምልክት ነውና።» እንጦንስ ይህን እንደ ተናገረ ወዲያውኑ ጐበዙ ተፈወሰ፤ በመጨረሻም ልቡ ተመልሶ የት እንዳለ አወቀ፤ ለአረጋዊውም እጅ ነሣ፤ እግዚአብሔርንም አመሰገነ።